𑁨. 𑀘𑁄𑀤𑀓𑀸𑀤𑀺𑀧𑀝𑀺𑀧𑀢𑁆𑀢𑀺

𑁩𑁬𑁩. 𑀘𑁄𑀤𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀘𑀼𑀤𑀺𑀢𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀲𑀗𑁆𑀖𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀅𑀦𑀼𑀯𑀺𑀚𑁆𑀚𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁? 𑀘𑁄𑀤𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀘𑁄𑀤𑀓𑁂𑀦 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄. 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀸𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺 𑁋 𑀘𑁄𑀤𑀓𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀘𑀼𑀤𑀺𑀢𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀘𑀼𑀤𑀺𑀢𑀓𑁂𑀦 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘 𑁋 𑀘𑀼𑀤𑀺𑀢𑀓𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀲𑀗𑁆𑀖𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀲𑀗𑁆𑀖𑁂𑀦 𑀑𑀢𑀺𑀡𑁆𑀡𑀸𑀦𑁄𑀢𑀺𑀡𑁆𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀲𑀗𑁆𑀖𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀦𑀼𑀯𑀺𑀚𑁆𑀚𑀓𑁂𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺? 𑀅𑀦𑀼𑀯𑀺𑀚𑁆𑀚𑀓𑁂𑀦 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀅𑀦𑀼𑀯𑀺𑀚𑁆𑀚𑀓𑁂𑀦 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑁩𑁬𑁪. 𑀉𑀧𑁄𑀲𑀣𑁄 𑀓𑀺𑀫𑀢𑁆𑀣𑀸𑀬, 𑀧𑀯𑀸𑀭𑀡𑀸 𑀓𑀺𑀲𑁆𑀲 𑀓𑀸𑀭𑀡𑀸;

𑀧𑀭𑀺𑀯𑀸𑀲𑁄 𑀓𑀺𑀫𑀢𑁆𑀣𑀸𑀬, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀓𑀺𑀲𑁆𑀲 𑀓𑀸𑀭𑀡𑀸;

𑀫𑀸𑀦𑀢𑁆𑀢𑀁 𑀓𑀺𑀫𑀢𑁆𑀣𑀸𑀬, 𑀅𑀩𑁆𑀪𑀸𑀦𑀁 𑀓𑀺𑀲𑁆𑀲 𑀓𑀸𑀭𑀡𑀸.

𑀉𑀧𑁄𑀲𑀣𑁄 𑀲𑀸𑀫𑀕𑁆𑀕𑀢𑁆𑀣𑀸𑀬, 𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀧𑀯𑀸𑀭𑀡𑀸;

𑀧𑀭𑀺𑀯𑀸𑀲𑁄 𑀫𑀸𑀦𑀢𑁆𑀢𑀢𑁆𑀣𑀸𑀬, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀦𑀺𑀕𑁆𑀕𑀳𑀢𑁆𑀣𑀸𑀬;

𑀫𑀸𑀦𑀢𑁆𑀢𑀁 𑀅𑀩𑁆𑀪𑀸𑀦𑀢𑁆𑀣𑀸𑀬, 𑀯𑀺𑀲𑀼𑀤𑁆𑀥𑀢𑁆𑀣𑀸𑀬 𑀅𑀩𑁆𑀪𑀸𑀦𑀁.

𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀣𑁂𑀭𑁂 𑀘 𑀧𑀭𑀺𑀪𑀸𑀲𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀔𑀢𑁄 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄;

𑀦𑀺𑀭𑀬𑀁 𑀕𑀘𑁆𑀙𑀢𑀺 𑀤𑀼𑀫𑁆𑀫𑁂𑀥𑁄, 𑀦 𑀘 𑀲𑀺𑀓𑁆𑀔𑀸𑀬 𑀕𑀸𑀭𑀯𑁄.

𑀦 𑀘 𑀆𑀫𑀺𑀲𑀁 𑀦𑀺𑀲𑁆𑀲𑀸𑀬;

𑀦 𑀘 𑀦𑀺𑀲𑁆𑀲𑀸𑀬 𑀧𑀼𑀕𑁆𑀕𑀮𑀁;

𑀉𑀪𑁄 𑀏𑀢𑁂 𑀯𑀺𑀯𑀚𑁆𑀚𑁂𑀢𑁆𑀯𑀸;

𑀬𑀣𑀸𑀥𑀫𑁆𑀫𑁄 𑀢𑀣𑀸 𑀓𑀭𑁂.