𑁬. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁

𑁬𑁩𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀘𑀻𑀯𑀭𑀓𑀸𑀭𑀲𑀫𑀬𑁂 𑀩𑀳𑀼𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀲𑀼𑀁. 𑀓𑀢𑁂𑀧𑀺 𑀘𑀻𑀯𑀭𑁂 𑀩𑀳𑀼𑀁 𑀲𑀼𑀢𑁆𑀢𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺. 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀅𑀜𑁆𑀜𑀫𑁆𑀧𑀺 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀫𑀸’’𑀢𑀺. 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀜𑁆𑀜𑀫𑁆𑀧𑀺 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑀼𑀁. 𑀯𑀻𑀢𑁂𑀧𑀺 𑀘𑀻𑀯𑀭𑁂 𑀩𑀳𑀼𑀁 𑀲𑀼𑀢𑁆𑀢𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀜𑁆𑀜𑀫𑁆𑀧𑀺 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑀼𑀁. 𑀯𑀻𑀢𑁂𑀧𑀺 𑀘𑀻𑀯𑀭𑁂 𑀩𑀳𑀼𑀁 𑀲𑀼𑀢𑁆𑀢𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀜𑁆𑀜𑀫𑁆𑀧𑀺 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑀼𑀁. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺!

𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀣𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁬𑁩𑁭. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁬𑁩𑁮. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀲𑀸𑀫𑀦𑁆𑀢𑀺 𑀲𑀬𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸.

𑀲𑀼𑀢𑁆𑀢𑀁 𑀦𑀸𑀫 𑀙 𑀲𑀼𑀢𑁆𑀢𑀸𑀦𑀺 𑁋 𑀔𑁄𑀫𑀁 𑀓𑀧𑁆𑀧𑀸𑀲𑀺𑀓𑀁 𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 𑀲𑀸𑀡𑀁 𑀪𑀗𑁆𑀕𑀁.

𑀢𑀦𑁆𑀢𑀯𑀸𑀬𑁂𑀳𑀻𑀢𑀺 𑀧𑁂𑀲𑀓𑀸𑀭𑁂𑀳𑀺 𑀯𑀸𑀬𑀸𑀧𑁂𑀢𑀺, 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 [𑀯𑀸𑀬𑀸𑀧𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁 (𑀲𑁆𑀬𑀸.)]. 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁…𑀧𑁂… 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺 𑀯𑀸𑀬𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺…𑀧𑁂… 𑀤𑀤𑁂𑀬𑁆𑀬𑀸𑀢𑀺…𑀧𑁂… 𑀤𑀤𑁂𑀬𑁆𑀬𑀼𑀦𑁆𑀢𑀺…𑀧𑁂… 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻𑀢𑀺.

𑁬𑁩𑁯. 𑀯𑀸𑀬𑀸𑀧𑀺𑀢𑁂 𑀯𑀸𑀬𑀸𑀧𑀺𑀢𑀲𑀜𑁆𑀜𑀻, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀸𑀬𑀸𑀧𑀺𑀢𑁂 𑀯𑁂𑀫𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀯𑀸𑀬𑀸𑀧𑀺𑀢𑁂 𑀅𑀯𑀸𑀬𑀸𑀧𑀺𑀢𑀲𑀜𑁆𑀜𑀻, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀯𑀸𑀬𑀸𑀧𑀺𑀢𑁂 𑀯𑀸𑀬𑀸𑀧𑀺𑀢𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀯𑀸𑀬𑀸𑀧𑀺𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀯𑀸𑀬𑀸𑀧𑀺𑀢𑁂 𑀅𑀯𑀸𑀬𑀸𑀧𑀺𑀢𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁬𑁪𑁦. 𑀅𑀦𑀸𑀧𑀢𑁆𑀢𑀺 𑁋 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀁, 𑀆𑀬𑁄𑀕𑁂, 𑀓𑀸𑀬𑀩𑀦𑁆𑀥𑀦𑁂, 𑀅𑀁𑀲𑀩𑀦𑁆𑀥𑀓𑁂 [𑀅𑀁𑀲𑀯𑀝𑁆𑀝𑀓𑁂 (𑀲𑀻.)], 𑀧𑀢𑁆𑀢𑀢𑁆𑀣𑀯𑀺𑀓𑀸𑀬, 𑀧𑀭𑀺𑀲𑁆𑀲𑀸𑀯𑀦𑁂, 𑀜𑀸𑀢𑀓𑀸𑀦𑀁, 𑀧𑀯𑀸𑀭𑀺𑀢𑀸𑀦𑀁, 𑀅𑀜𑁆𑀜𑀲𑁆𑀲𑀢𑁆𑀣𑀸𑀬, 𑀅𑀢𑁆𑀢𑀦𑁄 𑀥𑀦𑁂𑀦, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.