𑁪. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀁

𑁬𑁨𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 ‘‘𑀪𑀕𑀯𑀢𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺, 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀓𑀢𑁆𑀯𑀸 𑀦𑀺𑀯𑀸𑀲𑁂𑀦𑁆𑀢𑀺, 𑀚𑀺𑀡𑁆𑀡𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀧𑀝𑀺𑀓𑀘𑁆𑀘𑁂𑀯 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀲𑁆𑀲𑀦𑁆𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀓𑀢𑁆𑀯𑀸 𑀦𑀺𑀯𑀸𑀲𑁂𑀲𑁆𑀲𑀦𑁆𑀢𑀺, 𑀚𑀺𑀡𑁆𑀡𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀝𑀺𑀓𑀘𑁆𑀘𑁂𑀯 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀣? 𑀧𑀝𑀺𑀓𑀘𑁆𑀘𑁂𑀯 𑀓𑀢𑁆𑀯𑀸 𑀦𑀺𑀯𑀸𑀲𑁂𑀣? 𑀚𑀺𑀡𑁆𑀡𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀣𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂 𑀫𑁄𑀖𑀧𑀼𑀭𑀺𑀲𑀸, 𑀧𑀝𑀺𑀓𑀘𑁆𑀘𑁂𑀯 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀲𑁆𑀲𑀣, 𑀧𑀝𑀺𑀓𑀘𑁆𑀘𑁂𑀯 𑀓𑀢𑁆𑀯𑀸 𑀦𑀺𑀯𑀸𑀲𑁂𑀲𑁆𑀲𑀣, 𑀚𑀺𑀡𑁆𑀡𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑀸 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁬𑁨𑁭. ‘‘𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁; ‘𑀅𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀁. ‘𑀑𑀭𑁂𑀦 𑀘𑁂 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑁂𑀬𑁆𑀬, ‘𑀑𑀭𑁂𑀦𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁬𑁨𑁮. ‘𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀪𑀺𑀓𑁆𑀔𑀼𑀦𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺. 𑀬𑁂 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂𑀧𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀤𑁂𑀦𑁆𑀢𑀺 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀲𑁆𑀲𑀼 𑀯𑀘𑀦𑀻𑀬𑀸 𑁋 ‘‘𑀓𑀸𑀮𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬, 𑀲𑀫𑀬𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬, 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀤𑁂𑀦𑁆𑀢𑀻’’𑀢𑀺. 𑀦 𑀯𑀢𑁆𑀢𑀩𑁆𑀩𑀸 𑁋 ‘‘𑀤𑁂𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁, 𑀆𑀳𑀭𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁, 𑀧𑀭𑀺𑀯𑀢𑁆𑀢𑁂𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁, 𑀘𑁂𑀢𑀸𑀧𑁂𑀣 𑀫𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭’’𑀦𑁆𑀢𑀺.

‘𑀅𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀦𑁆𑀢𑀺. 𑀅𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩𑀁.

‘𑀑𑀭𑁂𑀦 𑀘𑁂 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲 𑀕𑀺𑀫𑁆𑀳𑀸𑀦𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

‘𑀑𑀭𑁂𑀦𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁…𑀧𑁂… 𑀇𑀤𑀁 𑀫𑁂, 𑀪𑀦𑁆𑀢𑁂, 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀧𑀭𑀺𑀬𑀺𑀝𑁆𑀞𑀁 𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀓𑀢𑁆𑀯𑀸 𑀧𑀭𑀺𑀤𑀳𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺.…𑀧𑁂… 𑀤𑀤𑁂𑀬𑁆𑀬𑀸𑀢𑀺…𑀧𑁂… 𑀤𑀤𑁂𑀬𑁆𑀬𑀼𑀦𑁆𑀢𑀺…𑀧𑁂… 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻𑀢𑀺.

𑁬𑁨𑁯. 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀅𑀢𑀺𑀭𑁂𑀓𑀲𑀜𑁆𑀜𑀻 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀯𑁂𑀫𑀢𑀺𑀓𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀊𑀦𑀓𑀲𑀜𑁆𑀜𑀻 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀅𑀢𑀺𑀭𑁂𑀓𑀲𑀜𑁆𑀜𑀻 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀯𑁂𑀫𑀢𑀺𑀓𑁄 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀊𑀦𑀓𑀲𑀜𑁆𑀜𑀻 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀲𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀦𑀕𑁆𑀕𑁄 𑀓𑀸𑀬𑀁 𑀑𑀯𑀲𑁆𑀲𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀅𑀢𑀺𑀭𑁂𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀊𑀦𑀓𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑀊𑀦𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀅𑀢𑀺𑀭𑁂𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀤𑁆𑀥𑀫𑀸𑀲𑁂 𑀲𑁂𑀲𑁂 𑀕𑀺𑀫𑁆𑀳𑀸𑀦𑁂 𑀊𑀦𑀓𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁬𑁩𑁦. 𑀅𑀦𑀸𑀧𑀢𑁆𑀢𑀺 ‘𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺, ‘𑀅𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀺, ‘𑀊𑀦𑀓𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀢𑀺, ‘𑀊𑀦𑀓𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’𑀦𑁆𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀺, 𑀧𑀭𑀺𑀬𑀺𑀝𑁆𑀞𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀺𑀬𑁆𑀬𑀢𑀺, 𑀦𑀺𑀯𑀢𑁆𑀣𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬 𑀯𑀲𑁆𑀲𑀁 𑀉𑀓𑁆𑀓𑀟𑁆𑀠𑀺𑀬𑁆𑀬𑀢𑀺, 𑀥𑁄𑀯𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀲𑀫𑀬𑁂 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲, 𑀦𑀝𑁆𑀞𑀘𑀻𑀯𑀭𑀲𑁆𑀲, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.