𑁮. 𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀁

𑁫𑁮𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀓𑀼𑀮𑀽𑀧𑀓𑁄 𑀳𑁄𑀢𑀺 𑀦𑀺𑀘𑁆𑀘𑀪𑀢𑁆𑀢𑀺𑀓𑁄. 𑀬𑀁 𑀢𑀲𑁆𑀫𑀺𑀁 𑀓𑀼𑀮𑁂 𑀉𑀧𑁆𑀧𑀚𑁆𑀚𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀢𑀢𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀧𑀝𑀺𑀯𑀺𑀲𑁄 𑀞𑀧𑀺𑀬𑁆𑀬𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀬𑀁 𑀢𑀲𑁆𑀫𑀺𑀁 𑀓𑀼𑀮𑁂 𑀫𑀁𑀲𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀢𑀢𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀧𑀝𑀺𑀯𑀺𑀲𑁄 𑀞𑀧𑀺𑀢𑁄 𑀳𑁄𑀢𑀺. 𑀢𑀲𑁆𑀲 𑀓𑀼𑀮𑀲𑁆𑀲 𑀤𑀸𑀭𑀓𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀭𑁄𑀤𑀢𑀺 𑁋 ‘‘𑀫𑀁𑀲𑀁 𑀫𑁂 𑀤𑁂𑀣𑀸’’𑀢𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀚𑀸𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑁆𑀬𑀲𑁆𑀲 𑀧𑀝𑀺𑀯𑀺𑀲𑀁 𑀤𑀸𑀭𑀓𑀲𑁆𑀲 𑀤𑁂𑀳𑀺. 𑀅𑀜𑁆𑀜𑀁 𑀘𑁂𑀢𑀸𑀧𑁂𑀢𑁆𑀯𑀸 𑀅𑀬𑁆𑀬𑀲𑁆𑀲 𑀤𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀬𑁂𑀦 𑀢𑀁 𑀓𑀼𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀬𑁂𑀦𑀸𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀧𑀼𑀭𑀺𑀲𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀳𑀺𑀬𑁆𑀬𑁄 𑀔𑁄, 𑀪𑀦𑁆𑀢𑁂, 𑀲𑀸𑀬𑀁 𑀫𑀁𑀲𑀁 𑀉𑀧𑁆𑀧𑀦𑁆𑀦𑀁 𑀅𑀳𑁄𑀲𑀺. 𑀢𑀢𑁄 𑀅𑀬𑁆𑀬𑀲𑁆𑀲 𑀧𑀝𑀺𑀯𑀺𑀲𑁄 𑀞𑀧𑀺𑀢𑁄. 𑀅𑀬𑀁, 𑀪𑀦𑁆𑀢𑁂, 𑀤𑀸𑀭𑀓𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀭𑁄𑀤𑀢𑀺 𑁋 ‘𑀫𑀁𑀲𑀁 𑀫𑁂 𑀤𑁂𑀣𑀸’𑀢𑀺. 𑀅𑀬𑁆𑀬𑀲𑁆𑀲 𑀧𑀝𑀺𑀯𑀺𑀲𑁄 𑀤𑀸𑀭𑀓𑀲𑁆𑀲 𑀤𑀺𑀦𑁆𑀦𑁄. 𑀓𑀳𑀸𑀧𑀡𑁂𑀦, 𑀪𑀦𑁆𑀢𑁂, 𑀓𑀺𑀁 𑀆𑀳𑀭𑀺𑀬𑁆𑀬𑀢𑀽’’𑀢𑀺? ‘‘𑀧𑀭𑀺𑀘𑁆𑀘𑀢𑁆𑀢𑁄 𑀫𑁂, 𑀆𑀯𑀼𑀲𑁄, 𑀓𑀳𑀸𑀧𑀡𑁄’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀧𑀭𑀺𑀘𑁆𑀘𑀢𑁆𑀢𑁄’’𑀢𑀺. ‘‘𑀢𑀜𑁆𑀜𑁂𑀯 𑀫𑁂, 𑀆𑀯𑀼𑀲𑁄, 𑀓𑀳𑀸𑀧𑀡𑀁 𑀤𑁂𑀳𑀻’’𑀢𑀺.

𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀢𑀣𑁂𑀯 𑀫𑀬𑀁 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫 𑀏𑀯𑀫𑁂𑀯𑀺𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺 [𑀧𑀝𑀺𑀕𑁆𑀕𑀡𑁆𑀳𑀸𑀲𑀻𑀢𑀺 (𑀲𑁆𑀬𑀸.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁫𑁮𑁩. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀢𑀭𑀽𑀧𑀭𑀚𑀢𑀁 𑀉𑀕𑁆𑀕𑀡𑁆𑀳𑁂𑀬𑁆𑀬 𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬 𑀯𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁫𑁮𑁪. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀚𑀸𑀢𑀭𑀽𑀧𑀁 𑀦𑀸𑀫 𑀲𑀢𑁆𑀣𑀼𑀯𑀡𑁆𑀡𑁄 𑀯𑀼𑀘𑁆𑀘𑀢𑀺.

𑀭𑀚𑀢𑀁 𑀦𑀸𑀫 𑀓𑀳𑀸𑀧𑀡𑁄 𑀮𑁄𑀳𑀫𑀸𑀲𑀓𑁄 𑀤𑀸𑀭𑀼𑀫𑀸𑀲𑀓𑁄 𑀚𑀢𑀼𑀫𑀸𑀲𑀓𑁄 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀺.

𑀉𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀲𑀬𑀁 𑀕𑀡𑁆𑀳𑀸𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 [𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺 (𑀲𑁆𑀬𑀸.)].

𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀕𑀸𑀳𑀸𑀧𑁂𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 [𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺 (𑀲𑁆𑀬𑀸.)].

𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬𑀸𑀢𑀺 𑀇𑀤𑀁 𑀅𑀬𑁆𑀬𑀲𑁆𑀲 𑀳𑁄𑀢𑀽𑀢𑀺 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑁋 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑁂𑀲𑀺𑀁. 𑀇𑀤𑀁 𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻’’𑀢𑀺. 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀆𑀧𑀢𑁆𑀢𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀲𑀘𑁂 𑀢𑀢𑁆𑀣 𑀆𑀕𑀘𑁆𑀙𑀢𑀺 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀆𑀯𑀼𑀲𑁄, 𑀇𑀫𑀁 𑀚𑀸𑀦𑀸𑀳𑀻’’𑀢𑀺. 𑀲𑀘𑁂 𑀲𑁄 𑀪𑀡𑀢𑀺 𑁋 ‘‘𑀇𑀫𑀺𑀦𑀸 𑀓𑀺𑀁 𑀆𑀳𑀭𑀺𑀬𑁆𑀬𑀢𑀽’’𑀢𑀺, 𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀇𑀫𑀁 𑀯𑀸 𑀇𑀫𑀁 𑀯𑀸 𑀆𑀳𑀭𑀸’’𑀢𑀺. 𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀫𑀥𑀼 𑀯𑀸 𑀨𑀸𑀡𑀺𑀢𑀁 𑀯𑀸. 𑀲𑀘𑁂 𑀲𑁄 𑀢𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀆𑀳𑀭𑀢𑀺 𑀭𑀽𑀧𑀺𑀬𑀧𑁆𑀧𑀝𑀺𑀕𑁆𑀕𑀸𑀳𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀳𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀮𑀪𑁂𑀣, 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀆𑀯𑀼𑀲𑁄, 𑀇𑀫𑀁 𑀙𑀟𑁆𑀟𑁂𑀳𑀻’’𑀢𑀺. 𑀲𑀘𑁂 𑀲𑁄 𑀙𑀟𑁆𑀟𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀙𑀟𑁆𑀟𑁂𑀢𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀭𑀽𑀧𑀺𑀬𑀙𑀟𑁆𑀟𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀙𑀟𑁆𑀟𑀺𑀢𑀸𑀙𑀟𑁆𑀟𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄. 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁫𑁮𑁫. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀭𑀽𑀧𑀺𑀬𑀙𑀟𑁆𑀟𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀭𑀽𑀧𑀺𑀬𑀙𑀟𑁆𑀟𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀽𑀧𑀺𑀬𑀙𑀟𑁆𑀟𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀭𑀽𑀧𑀺𑀬𑀙𑀟𑁆𑀟𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀲𑀫𑁆𑀫𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀧𑀸𑀢𑁂𑀢𑀩𑁆𑀩𑀁. 𑀲𑀘𑁂 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀧𑀸𑀢𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁫𑁮𑁬. 𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀭𑀽𑀧𑀺𑀬𑁂 𑀯𑁂𑀫𑀢𑀺𑀓𑁄 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀭𑀽𑀧𑀺𑀬𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑀅𑀦𑀸𑀧𑀢𑁆𑀢𑀺 𑀅𑀚𑁆𑀛𑀸𑀭𑀸𑀫𑁂 𑀯𑀸 𑀅𑀚𑁆𑀛𑀸𑀯𑀲𑀣𑁂 𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀯𑀸 𑀉𑀕𑁆𑀕𑀳𑀸𑀧𑁂𑀢𑁆𑀯𑀸 𑀯𑀸 𑀦𑀺𑀓𑁆𑀔𑀺𑀧𑀢𑀺 𑁋 𑀬𑀲𑁆𑀲 𑀪𑀯𑀺𑀲𑁆𑀲𑀢𑀺 𑀲𑁄 𑀳𑀭𑀺𑀲𑁆𑀲𑀢𑀻𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.