𑁬. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀁

𑁫𑁭𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀸𑀦𑀺 𑀏𑀴𑀓𑀮𑁄𑀫𑀸𑀦𑀺 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀉𑀧𑁆𑀧𑀡𑁆𑀟𑁂𑀲𑀼𑀁 𑁋 ‘‘𑀓𑀺𑀢𑁆𑀢𑀓𑁂𑀦 𑀢𑁂, 𑀪𑀦𑁆𑀢𑁂, 𑀓𑀻𑀢𑀸𑀦𑀺? 𑀓𑀺𑀢𑁆𑀢𑀓𑁄 𑀉𑀤𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺? 𑀲𑁄 𑀪𑀺𑀓𑁆𑀔𑀼 𑀢𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀉𑀧𑁆𑀧𑀡𑁆𑀟𑀺𑀬𑀫𑀸𑀦𑁄 𑀫𑀗𑁆𑀓𑀼 𑀅𑀳𑁄𑀲𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀸𑀦𑀺 𑀏𑀴𑀓𑀮𑁄𑀫𑀸𑀦𑀺 𑀞𑀺𑀢𑀓𑁄𑀯 𑀆𑀲𑀼𑀫𑁆𑀪𑀺. 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀸𑀦𑀺 𑀏𑀴𑀓𑀮𑁄𑀫𑀸𑀦𑀺 𑀞𑀺𑀢𑀓𑁄𑀯 𑀆𑀲𑀼𑀫𑁆𑀪𑀲𑀻’’𑀢𑀺? ‘‘𑀢𑀣𑀸 𑀳𑀺 𑀧𑀦𑀸𑀳𑀁, 𑀆𑀯𑀼𑀲𑁄, 𑀇𑀫𑁂𑀲𑀁 𑀏𑀴𑀓𑀮𑁄𑀫𑀸𑀦𑀁 𑀓𑀸𑀭𑀡𑀸 𑀫𑀦𑀼𑀲𑁆𑀲𑁂𑀳𑀺 𑀉𑀧𑁆𑀧𑀡𑁆𑀟𑀺𑀢𑁄’’𑀢𑀺. ‘‘𑀓𑀻𑀯 𑀤𑀽𑀭𑀢𑁄 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀇𑀫𑀸𑀦𑀺 𑀏𑀴𑀓𑀮𑁄𑀫𑀸𑀦𑀺 𑀆𑀳𑀭𑀻’’𑀢𑀺? ‘‘𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀁, 𑀆𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀁 𑀏𑀴𑀓𑀮𑁄𑀫𑀸𑀦𑀺 𑀆𑀳𑀭𑀺𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀁 𑀏𑀴𑀓𑀮𑁄𑀫𑀸𑀦𑀺 𑀆𑀳𑀭𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀁 𑀏𑀴𑀓𑀮𑁄𑀫𑀸𑀦𑀺 𑀆𑀳𑀭𑀺𑀲𑁆𑀲𑀲𑀺! 𑀦𑁂𑀢𑀁 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁫𑁭𑁨. ‘‘𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑀬𑁆𑀬𑀼𑀁. 𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀺𑀬𑁄𑀚𑀦𑀧𑀭𑀫𑀁 𑀲𑀳𑀢𑁆𑀣𑀸 𑀳𑀭𑀺𑀢𑀩𑁆𑀩𑀸𑀦𑀺 [𑀳𑀸𑀭𑁂𑀢𑀩𑁆𑀩𑀸𑀦𑀺 (𑀲𑀻. 𑀲𑁆𑀬𑀸. 𑀓.)], 𑀅𑀲𑀦𑁆𑀢𑁂 𑀳𑀸𑀭𑀓𑁂. 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀳𑀭𑁂𑀬𑁆𑀬, 𑀅𑀲𑀦𑁆𑀢𑁂𑀧𑀺 𑀳𑀸𑀭𑀓𑁂, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁫𑁭𑁩. 𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀧𑀦𑁆𑀣𑀁 𑀕𑀘𑁆𑀙𑀦𑁆𑀢𑀲𑁆𑀲.

𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀜𑀸𑀢𑀺𑀢𑁄 𑀯𑀸 𑀫𑀺𑀢𑁆𑀢𑀢𑁄 𑀯𑀸 𑀧𑀁𑀲𑀼𑀓𑀽𑀮𑀁 𑀯𑀸 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦.

𑀆𑀓𑀗𑁆𑀔𑀫𑀸𑀦𑁂𑀦𑀸𑀢𑀺 𑀇𑀘𑁆𑀙𑀫𑀸𑀦𑁂𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀺.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀺𑀬𑁄𑀚𑀦𑀧𑀭𑀫𑀁 𑀲𑀳𑀢𑁆𑀣𑀸 𑀳𑀭𑀺𑀢𑀩𑁆𑀩𑀸𑀦𑀻𑀢𑀺 𑀢𑀺𑀬𑁄𑀚𑀦𑀧𑀭𑀫𑀢𑀸 𑀲𑀳𑀢𑁆𑀣𑀸 𑀳𑀭𑀺𑀢𑀩𑁆𑀩𑀸𑀦𑀺.

𑀅𑀲𑀦𑁆𑀢𑁂 𑀳𑀸𑀭𑀓𑁂𑀢𑀺 𑀦𑀸𑀜𑁆𑀜𑁄 𑀓𑁄𑀘𑀺 𑀳𑀸𑀭𑀓𑁄 𑀳𑁄𑀢𑀺 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸.

𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀳𑀭𑁂𑀬𑁆𑀬, 𑀅𑀲𑀦𑁆𑀢𑁂𑀧𑀺 𑀳𑀸𑀭𑀓𑁂𑀢𑀺 𑀧𑀞𑀫𑀁 𑀧𑀸𑀤𑀁 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 [𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺 (𑀲𑁆𑀬𑀸.)]. 𑀅𑀦𑁆𑀢𑁄𑀢𑀺𑀬𑁄𑀚𑀦𑁂 𑀞𑀺𑀢𑁄 𑀩𑀳𑀺𑀢𑀺𑀬𑁄𑀚𑀦𑀁 𑀧𑀸𑀢𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 [𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺 (𑀲𑁆𑀬𑀸.)]. 𑀅𑀜𑁆𑀜𑀲𑁆𑀲 𑀬𑀸𑀦𑁂 𑀯𑀸 𑀪𑀡𑁆𑀟𑁂 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺. 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀸𑀦𑀺 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀸𑀦𑀺…𑀧𑁂… 𑀇𑀫𑀸𑀦𑀺 𑀫𑁂, 𑀪𑀦𑁆𑀢𑁂, 𑀏𑀴𑀓𑀮𑁄𑀫𑀸𑀦𑀺 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑀺𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺. 𑀇𑀫𑀸𑀦𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺…𑀧𑁂… 𑀤𑀤𑁂𑀬𑁆𑀬𑀸𑀢𑀺…𑀧𑁂… 𑀤𑀤𑁂𑀬𑁆𑀬𑀼𑀦𑁆𑀢𑀺…𑀧𑁂… 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻𑀢𑀺.

𑁫𑁭𑁪. 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑁂 𑀅𑀢𑀺𑀭𑁂𑀓𑀲𑀜𑁆𑀜𑀻 𑀅𑀢𑀺𑀓𑁆𑀓𑀸𑀫𑁂𑀢𑀺 [𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺 (𑀲𑁆𑀬𑀸.)], 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑁂 𑀯𑁂𑀫𑀢𑀺𑀓𑁄 𑀅𑀢𑀺𑀓𑁆𑀓𑀸𑀫𑁂𑀢𑀺 [𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺 (𑀲𑁆𑀬𑀸.)], 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑁂 𑀊𑀦𑀓𑀲𑀜𑁆𑀜𑀻 𑀅𑀢𑀺𑀓𑁆𑀓𑀸𑀫𑁂𑀢𑀺 [𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺 (𑀲𑁆𑀬𑀸.)], 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀊𑀦𑀓𑀢𑀺𑀬𑁄𑀚𑀦𑁂 𑀅𑀢𑀺𑀭𑁂𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀢𑀺𑀬𑁄𑀚𑀦𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀢𑀺𑀬𑁄𑀚𑀦𑁂 𑀊𑀦𑀓𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁫𑁭𑁫. 𑀅𑀦𑀸𑀧𑀢𑁆𑀢𑀺 𑀢𑀺𑀬𑁄𑀚𑀦𑀁 𑀳𑀭𑀢𑀺, 𑀊𑀦𑀓𑀢𑀺𑀬𑁄𑀚𑀦𑀁 𑀳𑀭𑀢𑀺, 𑀢𑀺𑀬𑁄𑀚𑀦𑀁 𑀳𑀭𑀢𑀺𑀧𑀺, 𑀧𑀘𑁆𑀘𑀸𑀳𑀭𑀢𑀺𑀧𑀺, 𑀢𑀺𑀬𑁄𑀚𑀦𑀁 𑀯𑀸𑀲𑀸𑀥𑀺𑀧𑁆𑀧𑀸𑀬𑁄 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀳𑀭𑀢𑀺, 𑀅𑀘𑁆𑀙𑀺𑀦𑁆𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀳𑀭𑀢𑀺, 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸 𑀳𑀭𑀢𑀺, 𑀅𑀜𑁆𑀜𑀁 𑀳𑀭𑀸𑀧𑁂𑀢𑀺 𑀓𑀢𑀪𑀡𑁆𑀟𑀁, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.