𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀁

𑁫𑁪𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑁄𑀲𑀺𑀬𑀓𑀸𑀭𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀩𑀳𑀽, 𑀆𑀯𑀼𑀲𑁄, 𑀓𑁄𑀲𑀓𑀸𑀭𑀓𑁂 𑀧𑀘𑀣, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀲𑁆𑀲𑀣, 𑀫𑀬𑀫𑁆𑀧𑀺 𑀇𑀘𑁆𑀙𑀸𑀫 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀢𑀼’’𑀦𑁆𑀢𑀺. 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀫𑁆𑀳𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀓𑁆𑀔𑀦𑁆𑀢𑀺 𑁋 ‘𑀩𑀳𑀽, 𑀆𑀯𑀼𑀲𑁄, 𑀓𑁄𑀲𑀓𑀸𑀭𑀓𑁂 𑀧𑀘𑀣, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀲𑁆𑀲𑀣, 𑀫𑀬𑀫𑁆𑀧𑀺 𑀇𑀘𑁆𑀙𑀸𑀫 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀢𑀼’𑀦𑁆𑀢𑀺! 𑀅𑀫𑁆𑀳𑀸𑀓𑀫𑁆𑀧𑀺 𑀅𑀮𑀸𑀪𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀼𑀮𑁆𑀮𑀤𑁆𑀥𑀁, 𑀬𑁂 𑀫𑀬𑀁 𑀆𑀚𑀻𑀯𑀲𑁆𑀲 𑀳𑁂𑀢𑀼 𑀧𑀼𑀢𑁆𑀢𑀤𑀸𑀭𑀲𑁆𑀲 𑀓𑀸𑀭𑀡𑀸 𑀩𑀳𑀽 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀫𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑁄𑀲𑀺𑀬𑀓𑀸𑀭𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀓𑁆𑀔𑀦𑁆𑀢𑀺 𑁋 ‘𑀩𑀳𑀽, 𑀆𑀯𑀼𑀲𑁄, 𑀓𑁄𑀲𑀓𑀸𑀭𑀓𑁂 𑀧𑀘𑀣, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀲𑁆𑀲𑀣, 𑀫𑀬𑀫𑁆𑀧𑀺 𑀇𑀘𑁆𑀙𑀸𑀫 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀢𑀼’’’𑀦𑁆𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀓𑁄𑀲𑀺𑀬𑀓𑀸𑀭𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀣 𑁋 ‘𑀩𑀳𑀽, 𑀆𑀯𑀼𑀲𑁄, 𑀓𑁄𑀲𑀓𑀸𑀭𑀓𑁂 𑀧𑀘𑀣, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀲𑁆𑀲𑀣, 𑀫𑀬𑀫𑁆𑀧𑀺 𑀇𑀘𑁆𑀙𑀸𑀫 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀢𑀼’’’𑀦𑁆𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀓𑁄𑀲𑀺𑀬𑀓𑀸𑀭𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀓𑁆𑀔𑀣 𑁋 𑀩𑀳𑀽, 𑀆𑀯𑀼𑀲𑁄, 𑀓𑁄𑀲𑀓𑀸𑀭𑀓𑁂 𑀧𑀘𑀣, 𑀅𑀫𑁆𑀳𑀸𑀓𑀫𑁆𑀧𑀺 𑀤𑀲𑁆𑀲𑀣, 𑀫𑀬𑀫𑁆𑀧𑀺 𑀇𑀘𑁆𑀙𑀸𑀫 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀢𑀼𑀦𑁆𑀢𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁫𑁪𑁩. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁫𑁪𑁪. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀲𑀦𑁆𑀣𑀢𑀁 𑀦𑀸𑀫 𑀲𑀦𑁆𑀣𑀭𑀺𑀢𑁆𑀯𑀸 𑀓𑀢𑀁 𑀳𑁄𑀢𑀺 𑀅𑀯𑀸𑀬𑀺𑀫𑀁.

𑀓𑀸𑀭𑀸𑀧𑁂𑀬𑁆𑀬𑀸𑀢𑀺 𑀏𑀓𑁂𑀦𑀧𑀺 𑀓𑁄𑀲𑀺𑀬𑀁𑀲𑀼𑀦𑀸 𑀫𑀺𑀲𑁆𑀲𑀺𑀢𑁆𑀯𑀸 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩…𑀧𑁂… 𑀇𑀤𑀁 𑀫𑁂, 𑀪𑀦𑁆𑀢𑁂, 𑀓𑁄𑀲𑀺𑀬𑀫𑀺𑀲𑁆𑀲𑀓𑀁 𑀲𑀦𑁆𑀣𑀢𑀁 𑀓𑀸𑀭𑀸𑀧𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺…𑀧𑁂… 𑀤𑀤𑁂𑀬𑁆𑀬𑀸𑀢𑀺…𑀧𑁂… 𑀤𑀤𑁂𑀬𑁆𑀬𑀼𑀦𑁆𑀢𑀺…𑀧𑁂… 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻𑀢𑀺.

𑁫𑁪𑁫. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁫𑁪𑁬. 𑀅𑀦𑀸𑀧𑀢𑁆𑀢𑀺 𑀯𑀺𑀢𑀸𑀦𑀁 𑀯𑀸 𑀪𑀽𑀫𑀢𑁆𑀣𑀭𑀡𑀁 𑀯𑀸 𑀲𑀸𑀡𑀺𑀧𑀸𑀓𑀸𑀭𑀁 𑀯𑀸 𑀪𑀺𑀲𑀺𑀁 𑀯𑀸 𑀩𑀺𑀩𑁆𑀩𑁄𑀳𑀦𑀁 𑀯𑀸 𑀓𑀭𑁄𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.