𑁧𑁦. 𑀭𑀸𑀚𑀲𑀺𑀓𑁆𑀔𑀸𑀧𑀤𑀁

𑁫𑁩𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑁄 𑀫𑀳𑀸𑀫𑀢𑁆𑀢𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀤𑀽𑀢𑁂𑀦 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀸𑀳𑁂𑀲𑀺 𑁋 ‘‘𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀅𑀬𑁆𑀬𑀁 𑀉𑀧𑀦𑀦𑁆𑀤𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻’’𑀢𑀺. 𑀅𑀣 𑀔𑁄 𑀲𑁄 𑀤𑀽𑀢𑁄 𑀬𑁂𑀦𑀸𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑀁 𑀤𑀽𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫 𑀓𑀸𑀮𑁂𑀦 𑀓𑀧𑁆𑀧𑀺𑀬’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀤𑀽𑀢𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺? 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀆𑀭𑀸𑀫𑀁 𑀅𑀕𑀫𑀸𑀲𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑀁 𑀤𑀽𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑁄 𑀔𑁄, 𑀆𑀯𑀼𑀲𑁄, 𑀉𑀧𑀸𑀲𑀓𑁄 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺. 𑀅𑀣 𑀔𑁄 𑀲𑁄 𑀤𑀽𑀢𑁄 𑀢𑀁 𑀉𑀧𑀸𑀲𑀓𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀦𑀺𑀤𑁆𑀤𑀺𑀲𑀺 𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸. 𑀉𑀧𑀲𑀗𑁆𑀓𑀫𑀢𑀼 𑀆𑀬𑀲𑁆𑀫𑀸 𑀓𑀸𑀮𑁂𑀦, 𑀘𑀻𑀯𑀭𑁂𑀦 𑀢𑀁 𑀅𑀘𑁆𑀙𑀸𑀤𑁂𑀲𑁆𑀲𑀢𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀫𑀳𑀸𑀫𑀢𑁆𑀢𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀧𑀭𑀺𑀪𑀼𑀜𑁆𑀚𑀢𑀼 𑀅𑀬𑁆𑀬𑁄 𑀢𑀁 𑀘𑀻𑀯𑀭𑀁, 𑀇𑀘𑁆𑀙𑀸𑀫 𑀫𑀬𑀁 𑀅𑀬𑁆𑀬𑁂𑀦 𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑀁 𑀉𑀧𑀸𑀲𑀓𑀁 𑀦 𑀓𑀺𑀜𑁆𑀘𑀺 𑀅𑀯𑀘𑀸𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀫𑀳𑀸𑀫𑀢𑁆𑀢𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀧𑀭𑀺𑀪𑀼𑀜𑁆𑀚𑀢𑀼 𑀅𑀬𑁆𑀬𑁄 𑀢𑀁 𑀘𑀻𑀯𑀭𑀁, 𑀇𑀘𑁆𑀙𑀸𑀫 𑀫𑀬𑀁 𑀅𑀬𑁆𑀬𑁂𑀦 𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑀁 𑀉𑀧𑀸𑀲𑀓𑀁 𑀦 𑀓𑀺𑀜𑁆𑀘𑀺 𑀅𑀯𑀘𑀸𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀫𑀳𑀸𑀫𑀢𑁆𑀢𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀧𑀭𑀺𑀪𑀼𑀜𑁆𑀚𑀢𑀼 𑀅𑀬𑁆𑀬𑁄 𑀢𑀁 𑀘𑀻𑀯𑀭𑀁, 𑀇𑀘𑁆𑀙𑀸𑀫 𑀫𑀬𑀁 𑀅𑀬𑁆𑀬𑁂𑀦 𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀢𑁆𑀢’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑁂𑀕𑀫𑀲𑁆𑀲 𑀲𑀫𑀬𑁄 𑀳𑁄𑀢𑀺. 𑀦𑁂𑀕𑀫𑁂𑀦 𑀘 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺 𑁋 ‘‘𑀬𑁄 𑀧𑀘𑁆𑀙𑀸 𑀆𑀕𑀘𑁆𑀙𑀢𑀺 𑀧𑀜𑁆𑀜𑀸𑀲𑀁 𑀩𑀤𑁆𑀥𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀬𑁂𑀦 𑀲𑁄 𑀉𑀧𑀸𑀲𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’’𑀢𑀺. ‘‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀺, 𑀅𑀚𑁆𑀚 𑀦𑁂𑀕𑀫𑀲𑁆𑀲 𑀲𑀫𑀬𑁄. 𑀦𑁂𑀕𑀫𑁂𑀦 𑀘 𑀓𑀢𑀺𑀓𑀸 𑀓𑀢𑀸 𑀳𑁄𑀢𑀺 𑁋 ‘𑀬𑁄 𑀧𑀘𑁆𑀙𑀸 𑀆𑀕𑀘𑁆𑀙𑀢𑀺 𑀧𑀜𑁆𑀜𑀸𑀲𑀁 𑀩𑀤𑁆𑀥𑁄’’’𑀢𑀺. ‘‘𑀅𑀚𑁆𑀚𑁂𑀯 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑀁 𑀤𑁂𑀳𑀻’’𑀢𑀺 𑀑𑀯𑀝𑁆𑀝𑀺𑀓𑀸𑀬 𑀧𑀭𑀸𑀫𑀲𑀺. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀆𑀬𑀲𑁆𑀫𑀢𑀸 𑀉𑀧𑀦𑀦𑁆𑀤𑁂𑀦 𑀲𑀓𑁆𑀬𑀧𑀼𑀢𑁆𑀢𑁂𑀦 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀆𑀬𑀲𑁆𑀫𑀢𑁄 𑀉𑀧𑀦𑀦𑁆𑀤𑀲𑁆𑀲 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀅𑀬𑁆𑀬𑁄, 𑀧𑀘𑁆𑀙𑀸 𑀆𑀕𑀢𑁄, 𑀧𑀜𑁆𑀜𑀸𑀲𑀁 𑀚𑀻𑀦𑁄𑀲𑀻’’𑀢𑀺.

𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀫𑀳𑀺𑀘𑁆𑀙𑀸 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀲𑀦𑁆𑀢𑀼𑀝𑁆𑀞𑀸. 𑀦𑀬𑀺𑀫𑁂𑀲𑀁 𑀲𑀼𑀓𑀭𑀁 𑀯𑁂𑀬𑁆𑀬𑀸𑀯𑀘𑁆𑀘𑀫𑁆𑀧𑀺 𑀓𑀸𑀢𑀼𑀁. 𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀉𑀧𑀸𑀲𑀓𑁂𑀦 𑁋 ‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀻’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀦𑀸𑀕𑀫𑁂𑀲𑁆𑀲𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀉𑀧𑀸𑀲𑀓𑁂𑀦 𑁋 ‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀻’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀦𑀸𑀕𑀫𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀉𑀧𑀸𑀲𑀓𑁂𑀦 𑁋 ‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀻’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀦𑀸𑀕𑀫𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀉𑀧𑀸𑀲𑀓𑁂𑀦 𑁋 ‘𑀅𑀚𑁆𑀚𑀡𑁆𑀳𑁄, 𑀪𑀦𑁆𑀢𑁂, 𑀆𑀕𑀫𑁂𑀳𑀻’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀦𑀸𑀕𑀫𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁫𑁩𑁮. ‘‘𑀪𑀺𑀓𑁆𑀔𑀼𑀁 𑀧𑀦𑁂𑀯 𑀉𑀤𑁆𑀤𑀺𑀲𑁆𑀲 𑀭𑀸𑀚𑀸 𑀯𑀸 𑀭𑀸𑀚𑀪𑁄𑀕𑁆𑀕𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀕𑀳𑀧𑀢𑀺𑀓𑁄 𑀯𑀸 𑀤𑀽𑀢𑁂𑀦 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀳𑀺𑀡𑁂𑀬𑁆𑀬 𑁋 ‘𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦 𑀘𑀻𑀯𑀭𑀁 𑀘𑁂𑀢𑀸𑀧𑁂𑀢𑁆𑀯𑀸 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀳𑀻’𑀢𑀺. 𑀲𑁄 𑀘𑁂 𑀤𑀽𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀤𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’𑀦𑁆𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑁄 𑀤𑀽𑀢𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀓𑀸𑀮𑁂𑀦 𑀓𑀧𑁆𑀧𑀺𑀬’𑀦𑁆𑀢𑀺. 𑀲𑁄 𑀘𑁂 𑀤𑀽𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’𑀢𑀺, 𑀘𑀻𑀯𑀭𑀢𑁆𑀣𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸 𑁋 ‘𑀏𑀲𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’𑀢𑀺. 𑀲𑁄 𑀘𑁂 𑀤𑀽𑀢𑁄 𑀢𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀬𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀦𑀺𑀤𑁆𑀤𑀺𑀲𑀺 𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸, 𑀉𑀧𑀲𑀗𑁆𑀓𑀫𑀢𑀼 𑀆𑀬𑀲𑁆𑀫𑀸 𑀓𑀸𑀮𑁂𑀦, 𑀘𑀻𑀯𑀭𑁂𑀦 𑀢𑀁 𑀅𑀘𑁆𑀙𑀸𑀤𑁂𑀲𑁆𑀲𑀢𑀻’𑀢𑀺, 𑀘𑀻𑀯𑀭𑀢𑁆𑀣𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑀩𑁆𑀩𑁄 𑀲𑀸𑀭𑁂𑀢𑀩𑁆𑀩𑁄 𑁋 ‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’𑀢𑀺. 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀬𑀫𑀸𑀦𑁄 𑀲𑀸𑀭𑀬𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁂𑀦 𑀉𑀤𑁆𑀤𑀺𑀲𑁆𑀲 𑀞𑀸𑀢𑀩𑁆𑀩𑀁. 𑀘𑀢𑀼𑀓𑁆𑀔𑀢𑁆𑀢𑀼𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀙𑀓𑁆𑀔𑀢𑁆𑀢𑀼𑀧𑀭𑀫𑀁 𑀢𑀼𑀡𑁆𑀳𑀻𑀪𑀽𑀢𑁄 𑀉𑀤𑁆𑀤𑀺𑀲𑁆𑀲 𑀢𑀺𑀝𑁆𑀞𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀢𑀢𑁄 𑀘𑁂 𑀉𑀢𑁆𑀢𑀭𑀺𑀯𑀸𑀬𑀫𑀫𑀸𑀦𑁄 𑀢𑀁 𑀘𑀻𑀯𑀭 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀦𑁄 𑀘𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀬𑀢𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁, 𑀢𑀢𑁆𑀣 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘𑀬𑀁 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀳𑀺𑀡𑀺𑀢𑁆𑀣, 𑀦 𑀢𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺, 𑀬𑀼𑀜𑁆𑀚𑀦𑁆𑀢𑀸𑀬𑀲𑁆𑀫𑀦𑁆𑀢𑁄 𑀲𑀓𑀁, 𑀫𑀸 𑀯𑁄 𑀲𑀓𑀁 𑀯𑀺𑀦𑀲𑁆𑀲𑀸’𑀢𑀺, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻’’𑀢𑀺.

𑁫𑁩𑁯. 𑀪𑀺𑀓𑁆𑀔𑀼𑀁 𑀧𑀦𑁂𑀯 𑀉𑀤𑁆𑀤𑀺𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲𑀢𑁆𑀣𑀸𑀬, 𑀪𑀺𑀓𑁆𑀔𑀼𑀁 𑀆𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸, 𑀪𑀺𑀓𑁆𑀔𑀼𑀁 𑀅𑀘𑁆𑀙𑀸𑀤𑁂𑀢𑀼𑀓𑀸𑀫𑁄.

𑀭𑀸𑀚𑀸 𑀦𑀸𑀫 𑀬𑁄 𑀓𑁄𑀘𑀺 𑀭𑀚𑁆𑀚𑀁 𑀓𑀸𑀭𑁂𑀢𑀺.

𑀭𑀸𑀚𑀪𑁄𑀕𑁆𑀕𑁄 𑀦𑀸𑀫 𑀬𑁄 𑀓𑁄𑀘𑀺 𑀭𑀜𑁆𑀜𑁄 𑀪𑀢𑁆𑀢𑀯𑁂𑀢𑀦𑀸𑀳𑀸𑀭𑁄.

𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄.

𑀕𑀳𑀧𑀢𑀺𑀓𑁄 𑀦𑀸𑀫 𑀞𑀧𑁂𑀢𑁆𑀯𑀸 𑀭𑀸𑀚𑀁 𑀭𑀸𑀚𑀪𑁄𑀕𑁆𑀕𑀁 𑀩𑁆𑀭𑀸𑀳𑁆𑀫𑀡𑀁 𑀅𑀯𑀲𑁂𑀲𑁄 𑀕𑀳𑀧𑀢𑀺𑀓𑁄 𑀦𑀸𑀫.

𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀦𑀸𑀫 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀫𑀼𑀢𑁆𑀢𑀸 𑀯𑀸 𑀫𑀡𑀺 𑀯𑀸.

𑀇𑀫𑀺𑀦𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑁂𑀦𑀸𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁂𑀦.

𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸.

𑀅𑀘𑁆𑀙𑀸𑀤𑁂𑀳𑀻𑀢𑀺 𑀤𑀚𑁆𑀚𑁂𑀳𑀺.

𑀲𑁄 𑀘𑁂 𑀤𑀽𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀤𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀘𑀻𑀯𑀭𑀘𑁂𑀢𑀸𑀧𑀦𑁆𑀦’’𑀦𑁆𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑁄 𑀤𑀽𑀢𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀘𑀻𑀯𑀭𑀜𑁆𑀘 𑀔𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫, 𑀓𑀸𑀮𑁂𑀦 𑀓𑀧𑁆𑀧𑀺𑀬’’𑀦𑁆𑀢𑀺. 𑀲𑁄 𑀘𑁂 𑀤𑀽𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀢𑁆𑀣𑀺 𑀧𑀦𑀸𑀬𑀲𑁆𑀫𑀢𑁄 𑀓𑁄𑀘𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺? 𑀘𑀻𑀯𑀭𑀢𑁆𑀣𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸 𑁋 ‘‘𑀏𑀲𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄’’𑀢𑀺. 𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀢𑀲𑁆𑀲 𑀤𑁂𑀳𑀻𑀢𑀺 𑀯𑀸, 𑀲𑁄 𑀯𑀸 𑀦𑀺𑀓𑁆𑀔𑀺𑀧𑀺𑀲𑁆𑀲𑀢𑀺, 𑀲𑁄 𑀯𑀸 𑀧𑀭𑀺𑀯𑀢𑁆𑀢𑁂𑀲𑁆𑀲𑀢𑀺, 𑀲𑁄 𑀯𑀸 𑀘𑁂𑀢𑀸𑀧𑁂𑀲𑁆𑀲𑀢𑀻’’𑀢𑀺.

𑀲𑁄 𑀘𑁂 𑀤𑀽𑀢𑁄 𑀢𑀁 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀬𑀁 𑀔𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁 𑀦𑀺𑀤𑁆𑀤𑀺𑀲𑀺 𑀲𑀜𑁆𑀜𑀢𑁆𑀢𑁄 𑀲𑁄 𑀫𑀬𑀸. 𑀉𑀧𑀲𑀗𑁆𑀓𑀫𑀢𑀼 𑀆𑀬𑀲𑁆𑀫𑀸 𑀓𑀸𑀮𑁂𑀦, 𑀘𑀻𑀯𑀭𑁂𑀦 𑀢𑀁 𑀅𑀘𑁆𑀙𑀸𑀤𑁂𑀲𑁆𑀲𑀢𑀻’’𑀢𑀺, 𑀘𑀻𑀯𑀭𑀢𑁆𑀣𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑀩𑁆𑀩𑁄 𑀲𑀸𑀭𑁂𑀢𑀩𑁆𑀩𑁄 𑁋 ‘‘𑀅𑀢𑁆𑀣𑁄 𑀫𑁂, 𑀆𑀯𑀼𑀲𑁄, 𑀘𑀻𑀯𑀭𑁂𑀦𑀸’’𑀢𑀺. 𑀦 𑀯𑀢𑁆𑀢𑀩𑁆𑀩𑁄 𑁋 ‘‘𑀤𑁂𑀳𑀺 𑀫𑁂 𑀘𑀻𑀯𑀭𑀁, 𑀆𑀳𑀭 𑀫𑁂 𑀘𑀻𑀯𑀭𑀁, 𑀧𑀭𑀺𑀯𑀢𑁆𑀢𑁂𑀳𑀺 𑀫𑁂 𑀘𑀻𑀯𑀭𑀁, 𑀘𑁂𑀢𑀸𑀧𑁂𑀳𑀺 𑀫𑁂 𑀘𑀻𑀯𑀭’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑁄. 𑀢𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁂𑀦 𑀉𑀤𑁆𑀤𑀺𑀲𑁆𑀲 𑀞𑀸𑀢𑀩𑁆𑀩𑀁. 𑀦 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀆𑀫𑀺𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄. ‘‘𑀓𑀺𑀁 𑀓𑀸𑀭𑀡𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀬𑀫𑀸𑀦𑁄 ‘‘𑀚𑀸𑀦𑀸𑀳𑀺, 𑀆𑀯𑀼𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀆𑀲𑀦𑁂 𑀯𑀸 𑀦𑀺𑀲𑀻𑀤𑀢𑀺, 𑀆𑀫𑀺𑀲𑀁 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀥𑀫𑁆𑀫𑀁 𑀯𑀸 𑀪𑀸𑀲𑀢𑀺, 𑀞𑀸𑀦𑀁 𑀪𑀜𑁆𑀚𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀞𑀸𑀢𑀩𑁆𑀩𑀁. 𑀢𑀢𑀺𑀬𑀫𑁆𑀧𑀺 𑀞𑀸𑀢𑀩𑁆𑀩𑀁. 𑀘𑀢𑀼𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀞𑀸𑀢𑀩𑁆𑀩𑀁. 𑀧𑀜𑁆𑀘𑀓𑁆𑀔𑀢𑀼𑀁 𑀘𑁄𑀤𑁂𑀢𑁆𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀞𑀸𑀢𑀩𑁆𑀩𑀁. 𑀙𑀓𑁆𑀔𑀢𑁆𑀢𑀼𑀁 𑀘𑁄𑀤𑁂𑀢𑁆𑀯𑀸 𑀦 𑀞𑀸𑀢𑀩𑁆𑀩𑀁. 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀸𑀬𑀫𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁…𑀧𑁂… 𑀇𑀤𑀁 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀅𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀅𑀪𑀺𑀦𑀺𑀧𑁆𑀨𑀸𑀤𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀚𑁆𑀚𑀸𑀫𑀻𑀢𑀺…𑀧𑁂… 𑀤𑀤𑁂𑀬𑁆𑀬𑀸𑀢𑀺…𑀧𑁂… 𑀤𑀤𑁂𑀬𑁆𑀬𑀼𑀦𑁆𑀢𑀺…𑀧𑁂… 𑀆𑀬𑀲𑁆𑀫𑀢𑁄 𑀤𑀫𑁆𑀫𑀻𑀢𑀺.

𑀦𑁄 𑀘𑁂 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀬𑀢𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀆𑀪𑀢𑀁 𑀢𑀢𑁆𑀣 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀬𑀁 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀳𑀺𑀡𑀺𑀢𑁆𑀣 𑀦 𑀢𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺. 𑀬𑀼𑀜𑁆𑀚𑀦𑁆𑀢𑀸𑀬𑀲𑁆𑀫𑀦𑁆𑀢𑁄 𑀲𑀓𑀁, 𑀫𑀸 𑀯𑁄 𑀲𑀓𑀁 𑀯𑀺𑀦𑀲𑁆𑀲𑀸’’𑀢𑀺.

𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻𑀢𑀺 𑀅𑀬𑀁 𑀢𑀢𑁆𑀣 𑀅𑀦𑀼𑀥𑀫𑁆𑀫𑀢𑀸.

𑁫𑁪𑁦. 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀅𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀅𑀢𑀺𑀭𑁂𑀓𑀲𑀜𑁆𑀜𑀻 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀅𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀯𑁂𑀫𑀢𑀺𑀓𑁄 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀢𑀺𑀭𑁂𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀅𑀢𑀺𑀭𑁂𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀊𑀦𑀓𑀲𑀜𑁆𑀜𑀻 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁.

𑀊𑀦𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀊𑀦𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀅𑀢𑀺𑀭𑁂𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀊𑀦𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬 𑀊𑀦𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦 𑀊𑀦𑀓𑀲𑀜𑁆𑀜𑀻 𑀅𑀦𑀸𑀧𑀢𑁆𑀢𑀺.

𑁫𑁪𑁧. 𑀅𑀦𑀸𑀧𑀢𑁆𑀢𑀺 𑁋 𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬, 𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦, 𑀊𑀦𑀓𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀦𑀸𑀬, 𑀊𑀦𑀓𑀙𑀓𑁆𑀔𑀢𑁆𑀢𑀼𑀁 𑀞𑀸𑀦𑁂𑀦, 𑀅𑀘𑁄𑀤𑀺𑀬𑀫𑀸𑀦𑁄 𑀤𑁂𑀢𑀺, 𑀲𑀸𑀫𑀺𑀓𑀸 𑀘𑁄𑀤𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀭𑀸𑀚𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀓𑀣𑀺𑀦𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀩𑁆𑀪𑀢𑀁 𑀓𑀣𑀺𑀦𑀁 𑀢𑀻𑀡𑀺, 𑀥𑁄𑀯𑀦𑀜𑁆𑀘 𑀧𑀝𑀺𑀕𑁆𑀕𑀳𑁄;

𑀅𑀜𑁆𑀜𑀸𑀢𑀓𑀸𑀦𑀺 𑀢𑀻𑀡𑁂𑀯, 𑀉𑀪𑀺𑀦𑁆𑀦𑀁 𑀤𑀽𑀢𑀓𑁂𑀦 𑀘𑀸𑀢𑀺.