𑁩. 𑀅𑀦𑀺𑀬𑀢𑀓𑀡𑁆𑀟𑀁

𑁧. 𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀁

𑀇𑀫𑁂 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁄 𑀤𑁆𑀯𑁂 𑀅𑀦𑀺𑀬𑀢𑀸 𑀥𑀫𑁆𑀫𑀸

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺.

𑁪𑁪𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀽𑀧𑀓𑁄 𑀳𑁄𑀢𑀺, 𑀩𑀳𑀼𑀓𑀸𑀦𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀲𑁆𑀲 𑀓𑀼𑀫𑀸𑀭𑀺𑀓𑀸 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀓𑀼𑀫𑀸𑀭𑀓𑀲𑁆𑀲 𑀤𑀺𑀦𑁆𑀦𑀸 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀢𑀁 𑀓𑀼𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀇𑀢𑁆𑀣𑀦𑁆𑀦𑀸𑀫𑀸’’𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀤𑀺𑀦𑁆𑀦𑀸, 𑀪𑀦𑁆𑀢𑁂, 𑀅𑀫𑀼𑀓𑀲𑁆𑀲 𑀓𑀼𑀮𑀲𑁆𑀲 𑀓𑀼𑀫𑀸𑀭𑀓𑀲𑁆𑀲𑀸’’𑀢𑀺. 𑀢𑀫𑁆𑀧𑀺 𑀔𑁄 𑀓𑀼𑀮𑀁 𑀆𑀬𑀲𑁆𑀫𑀢𑁄 𑀉𑀤𑀸𑀬𑀺𑀲𑁆𑀲 𑀉𑀧𑀝𑁆𑀞𑀸𑀓𑀁 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀢𑀁 𑀓𑀼𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀇𑀢𑁆𑀣𑀦𑁆𑀦𑀸𑀫𑀸’’𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀲𑀸𑀬𑁆𑀬, 𑀑𑀯𑀭𑀓𑁂 𑀦𑀺𑀲𑀺𑀦𑁆𑀦𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀲𑀸 𑀓𑀼𑀫𑀸𑀭𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺 𑀓𑀸𑀮𑀬𑀼𑀢𑁆𑀢𑀁 𑀲𑀫𑀼𑀮𑁆𑀮𑀧𑀦𑁆𑀢𑁄 𑀓𑀸𑀮𑀬𑀼𑀢𑁆𑀢𑀁 𑀥𑀫𑁆𑀫𑀁 𑀪𑀡𑀦𑁆𑀢𑁄.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀩𑀳𑀼𑀧𑀼𑀢𑁆𑀢𑀸 𑀳𑁄𑀢𑀺 𑀩𑀳𑀼𑀦𑀢𑁆𑀢𑀸 𑀅𑀭𑁄𑀕𑀧𑀼𑀢𑁆𑀢𑀸 𑀅𑀭𑁄𑀕𑀦𑀢𑁆𑀢𑀸 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀸. 𑀫𑀦𑀼𑀲𑁆𑀲𑀸 𑀬𑀜𑁆𑀜𑁂𑀲𑀼 𑀙𑀡𑁂𑀲𑀼 𑀉𑀲𑁆𑀲𑀯𑁂𑀲𑀼 𑀯𑀺𑀲𑀸𑀔𑀁 𑀫𑀺𑀕𑀸𑀭𑀫𑀸𑀢𑀭𑀁 𑀧𑀞𑀫𑀁 𑀪𑁄𑀚𑁂𑀦𑁆𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀦𑀺𑀫𑀦𑁆𑀢𑀺𑀢𑀸 𑀢𑀁 𑀓𑀼𑀮𑀁 𑀅𑀕𑀫𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀢𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑀁 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁 𑀬𑀁 𑀅𑀬𑁆𑀬𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺. 𑀓𑀺𑀜𑁆𑀘𑀸𑀧𑀺, 𑀪𑀦𑁆𑀢𑁂, 𑀅𑀬𑁆𑀬𑁄 𑀅𑀦𑀢𑁆𑀣𑀺𑀓𑁄 𑀢𑁂𑀦 𑀥𑀫𑁆𑀫𑁂𑀦, 𑀅𑀧𑀺𑀘 𑀤𑀼𑀲𑁆𑀲𑀤𑁆𑀥𑀸𑀧𑀬𑀸 𑀅𑀧𑁆𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀯𑀼𑀘𑁆𑀘𑀫𑀸𑀦𑁄 𑀦𑀸𑀤𑀺𑀬𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀤𑀸𑀬𑀺, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁪𑁪𑁪. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀢𑀫𑁂𑀦𑀁 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀤𑀺𑀲𑁆𑀯𑀸 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀤𑁂𑀬𑁆𑀬 𑁋 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸, 𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄 𑁋 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸 𑀬𑁂𑀦 𑀯𑀸 𑀲𑀸 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬, 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄. 𑀅𑀬𑀁 𑀥𑀫𑁆𑀫𑁄 𑀅𑀦𑀺𑀬𑀢𑁄’’𑀢𑀺.

𑁪𑁪𑁫. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸. 𑀅𑀦𑁆𑀢𑀫𑀲𑁄 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸, 𑀧𑀕𑁂𑀯 𑀫𑀳𑀢𑁆𑀢𑀭𑀻.

𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄.

𑀏𑀓𑁄 𑀏𑀓𑀸𑀬𑀸𑀢𑀺 𑀪𑀺𑀓𑁆𑀔𑀼 𑀘𑁂𑀯 𑀳𑁄𑀢𑀺 𑀫𑀸𑀢𑀼𑀕𑀸𑀫𑁄 𑀘.

𑀭𑀳𑁄 𑀦𑀸𑀫 𑀘𑀓𑁆𑀔𑀼𑀲𑁆𑀲 𑀭𑀳𑁄, 𑀲𑁄𑀢𑀲𑁆𑀲 𑀭𑀳𑁄. 𑀘𑀓𑁆𑀔𑀼𑀲𑁆𑀲 𑀭𑀳𑁄𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀻𑀬𑀫𑀸𑀦𑁂 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀧𑀲𑁆𑀲𑀺𑀢𑀼𑀁. 𑀲𑁄𑀢𑀲𑁆𑀲 𑀭𑀳𑁄𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀓𑀣𑀸 𑀲𑁄𑀢𑀼𑀁.

𑀧𑀝𑀺𑀘𑁆𑀙𑀦𑁆𑀦𑀁 𑀦𑀸𑀫 𑀆𑀲𑀦𑀁 𑀓𑀼𑀝𑁆𑀝𑁂𑀦 𑀯𑀸 [𑀓𑀼𑀟𑁆𑀟𑁂𑀦 𑀯𑀸 (𑀲𑀻. 𑀲𑁆𑀬𑀸.)] 𑀓𑀯𑀸𑀝𑁂𑀦 𑀯𑀸 𑀓𑀺𑀮𑀜𑁆𑀚𑁂𑀦 𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀯𑀸 𑀭𑀼𑀓𑁆𑀔𑁂𑀦 𑀯𑀸 𑀣𑀫𑁆𑀪𑁂𑀦 𑀯𑀸 𑀓𑁄𑀢𑁆𑀣𑀴𑀺𑀬𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺.

𑀅𑀮𑀁𑀓𑀫𑁆𑀫𑀦𑀺𑀬𑁂𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁.

𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀫𑀸𑀢𑀼𑀕𑀸𑀫𑁂 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀼 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸. 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸. 𑀉𑀪𑁄 𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀉𑀪𑁄 𑀯𑀸 𑀦𑀺𑀧𑀦𑁆𑀦𑀸.

𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀦𑀸𑀫 𑀆𑀕𑀢𑀨𑀮𑀸 𑀅𑀪𑀺𑀲𑀫𑁂𑀢𑀸𑀯𑀺𑀦𑀻 𑀯𑀺𑀜𑁆𑀜𑀸𑀢𑀲𑀸𑀲𑀦𑀸.

𑀉𑀧𑀸𑀲𑀺𑀓𑀸 𑀦𑀸𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸.

𑀤𑀺𑀲𑁆𑀯𑀸𑀢𑀺 𑀧𑀲𑁆𑀲𑀺𑀢𑁆𑀯𑀸.

𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀤𑁂𑀬𑁆𑀬 𑁋 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸. 𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄 𑁋 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸. 𑀬𑁂𑀦 𑀯𑀸 𑀲𑀸 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄.

𑁪𑁪𑁬. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀘𑁆𑀘𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀦𑁄 𑀘 𑀔𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺’’𑀦𑁆𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀧𑀦𑁆𑀦𑁄’’𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦𑀸𑀳𑀁 𑀦𑀺𑀲𑀺𑀦𑁆𑀦𑁄 𑀅𑀧𑀺𑀘 𑀔𑁄 𑀞𑀺𑀢𑁄’’𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑁪𑁪𑁭. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀧𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀧𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀘𑁆𑀘𑀸𑀳𑀁 𑀦𑀺𑀧𑀦𑁆𑀦𑁄, 𑀦𑁄 𑀘 𑀔𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺’’𑀦𑁆𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀧𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀲𑀺𑀦𑁆𑀦𑁄’’𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀧𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀦𑀸𑀳𑀁 𑀦𑀺𑀧𑀦𑁆𑀦𑁄 𑀅𑀧𑀺𑀘 𑀔𑁄 𑀞𑀺𑀢𑁄’’𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑁪𑁪𑁮. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀲𑀘𑁆𑀘𑀸𑀳𑀁 𑀦𑀺𑀲𑀺𑀦𑁆𑀦𑁄 𑀦𑁄 𑀘 𑀔𑁄 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄 𑀅𑀧𑀺𑀘 𑀔𑁄 𑀦𑀺𑀧𑀦𑁆𑀦𑁄𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀧𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀲𑀘𑁆𑀘𑀸𑀳𑀁 𑀦𑀺𑀧𑀦𑁆𑀦𑁄, 𑀦𑁄 𑀘 𑀔𑁄 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑁪𑁪𑁯. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀺𑀦𑁆𑀦𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄 𑀅𑀧𑀺𑀘 𑀔𑁄 𑀦𑀺𑀧𑀦𑁆𑀦𑁄𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑁪𑁫𑁦. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀧𑀦𑁆𑀦𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀅𑀦𑀺𑀬𑀢𑁄𑀢𑀺 𑀦 𑀦𑀺𑀬𑀢𑁄, 𑀧𑀸𑀭𑀸𑀚𑀺𑀓𑀁 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀸.

𑁪𑁫𑁧. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸

𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀧𑀞𑀫𑁄 𑀅𑀦𑀺𑀬𑀢𑁄 𑀦𑀺𑀝𑁆𑀞𑀺𑀢𑁄.

𑁨. 𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀁

𑁪𑁫𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑁋 ‘‘𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀺 𑀓𑀸𑀮𑀬𑀼𑀢𑁆𑀢𑀁 𑀲𑀫𑀼𑀮𑁆𑀮𑀧𑀦𑁆𑀢𑁄 𑀓𑀸𑀮𑀬𑀼𑀢𑁆𑀢𑀁 𑀥𑀫𑁆𑀫𑀁 𑀪𑀡𑀦𑁆𑀢𑁄. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀦𑀺𑀫𑀦𑁆𑀢𑀺𑀢𑀸 𑀢𑀁 𑀓𑀼𑀮𑀁 𑀅𑀕𑀫𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀢𑀲𑁆𑀲𑀸𑀬𑁂𑀯 𑀓𑀼𑀫𑀸𑀭𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑀁 𑀏𑀓𑀸𑀬 𑀭𑀳𑁄 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁 𑀬𑀁 𑀅𑀬𑁆𑀬𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀢𑀺. 𑀓𑀺𑀜𑁆𑀘𑀸𑀧𑀺, 𑀪𑀦𑁆𑀢𑁂, 𑀅𑀬𑁆𑀬𑁄 𑀅𑀦𑀢𑁆𑀣𑀺𑀓𑁄 𑀢𑁂𑀦 𑀥𑀫𑁆𑀫𑁂𑀦, 𑀅𑀧𑀺𑀘 𑀤𑀼𑀲𑁆𑀲𑀤𑁆𑀥𑀸𑀧𑀬𑀸 𑀅𑀧𑁆𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀯𑀺𑀲𑀸𑀔𑀸𑀬 𑀫𑀺𑀕𑀸𑀭𑀫𑀸𑀢𑀼𑀬𑀸 𑀯𑀼𑀘𑁆𑀘𑀫𑀸𑀦𑁄 𑀦𑀸𑀤𑀺𑀬𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 …𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀤𑀸𑀬𑀺, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁪𑁫𑁩. ‘‘𑀦 𑀳𑁂𑀯 𑀔𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑀁 𑀆𑀲𑀦𑀁 𑀳𑁄𑀢𑀺 𑀦𑀸𑀮𑀁 𑀓𑀫𑁆𑀫𑀦𑀺𑀬𑀁, 𑀅𑀮𑀜𑁆𑀘 𑀔𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀢𑀼𑀁. 𑀬𑁄 𑀧𑀦 𑀪𑀺𑀓𑁆𑀔𑀼 𑀢𑀣𑀸𑀭𑀽𑀧𑁂 𑀆𑀲𑀦𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬, 𑀢𑀫𑁂𑀦𑀁 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀤𑀺𑀲𑁆𑀯𑀸 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀤𑁂𑀬𑁆𑀬 𑁋 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸. 𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄 𑁋 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸. 𑀬𑁂𑀦 𑀯𑀸 𑀲𑀸 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀅𑀦𑀺𑀬𑀢𑁄’’𑀢𑀺.

𑁪𑁫𑁪. 𑀦 𑀳𑁂𑀯 𑀔𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑀁 𑀆𑀲𑀦𑀁 𑀳𑁄𑀢𑀻𑀢𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺 𑀓𑀼𑀝𑁆𑀝𑁂𑀦 𑀯𑀸 𑀓𑀯𑀸𑀝𑁂𑀦 𑀯𑀸 𑀓𑀺𑀮𑀜𑁆𑀚𑁂𑀦 𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀯𑀸 𑀭𑀼𑀓𑁆𑀔𑁂𑀦 𑀯𑀸 𑀣𑀫𑁆𑀪𑁂𑀦 𑀯𑀸 𑀓𑁄𑀢𑁆𑀣𑀴𑀺𑀬𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺.

𑀦𑀸𑀮𑀁 𑀓𑀫𑁆𑀫𑀦𑀺𑀬𑀦𑁆𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁.

𑀅𑀮𑀜𑁆𑀘 𑀔𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀢𑀼𑀦𑁆𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀢𑀼𑀁.

𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀢𑀣𑀸𑀭𑀽𑀧𑁂 𑀆𑀲𑀦𑁂𑀢𑀺 𑀏𑀯𑀭𑀽𑀧𑁂 𑀆𑀲𑀦𑁂.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼𑀁.

𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄.

𑀏𑀓𑁄 𑀏𑀓𑀸𑀬𑀸𑀢𑀺 𑀪𑀺𑀓𑁆𑀔𑀼 𑀘𑁂𑀯 𑀳𑁄𑀢𑀺 𑀫𑀸𑀢𑀼𑀕𑀸𑀫𑁄 𑀘.

𑀭𑀳𑁄 𑀦𑀸𑀫 𑀘𑀓𑁆𑀔𑀼𑀲𑁆𑀲 𑀭𑀳𑁄, 𑀲𑁄𑀢𑀲𑁆𑀲 𑀭𑀳𑁄. 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀻𑀬𑀫𑀸𑀦𑁂 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀻𑀬𑀫𑀸𑀦𑁂 𑀧𑀲𑁆𑀲𑀺𑀢𑀼𑀁. 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀓𑀢𑀺𑀓𑀣𑀸 𑀲𑁄𑀢𑀼𑀁.

𑀦𑀺𑀲𑀚𑁆𑀚𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀫𑀸𑀢𑀼𑀕𑀸𑀫𑁂 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀼 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸. 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁂 𑀫𑀸𑀢𑀼𑀕𑀸𑀫𑁄 𑀉𑀧𑀦𑀺𑀲𑀺𑀦𑁆𑀦𑁄 𑀯𑀸 𑀳𑁄𑀢𑀺 𑀉𑀧𑀦𑀺𑀧𑀦𑁆𑀦𑁄 𑀯𑀸. 𑀉𑀪𑁄 𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀉𑀪𑁄 𑀯𑀸 𑀦𑀺𑀧𑀦𑁆𑀦𑀸.

𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀦𑀸𑀫 𑀆𑀕𑀢𑀨𑀮𑀸 𑀅𑀪𑀺𑀲𑀫𑁂𑀢𑀸𑀯𑀺𑀦𑀻 𑀯𑀺𑀜𑁆𑀜𑀸𑀢𑀲𑀸𑀲𑀦𑀸.

𑀤𑀺𑀲𑁆𑀯𑀸𑀢𑀺 𑀧𑀲𑁆𑀲𑀺𑀢𑁆𑀯𑀸.

𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀤𑁂𑀬𑁆𑀬 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸. 𑀦𑀺𑀲𑀚𑁆𑀚𑀁 𑀪𑀺𑀓𑁆𑀔𑀼 𑀧𑀝𑀺𑀚𑀸𑀦𑀫𑀸𑀦𑁄 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑁂𑀢𑀩𑁆𑀩𑁄 𑁋 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑁂𑀦 𑀯𑀸. 𑀬𑁂𑀦 𑀯𑀸 𑀲𑀸 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸 𑀯𑀤𑁂𑀬𑁆𑀬, 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄.

𑁪𑁫𑁫. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀘𑁆𑀘𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀦𑁄 𑀘 𑀔𑁄 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺’’𑀦𑁆𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀧𑀦𑁆𑀦𑁄𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀧𑀦𑁆𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀲𑀘𑁆𑀘𑀸𑀳𑀁 𑀦𑀺𑀧𑀦𑁆𑀦𑁄, 𑀦𑁄 𑀘 𑀔𑁄 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄 …𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑀲𑁆𑀲 𑀫𑀬𑀸 𑀲𑀼𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑀲𑁆𑀲 𑀫𑀬𑀸 𑀲𑀼𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺, 𑀲𑁄 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀲𑀘𑁆𑀘𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀦𑁄 𑀘 𑀔𑁄 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺’’𑀦𑁆𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀧𑀦𑁆𑀦𑁄𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑀲𑁆𑀲 𑀫𑀬𑀸 𑀲𑀼𑀢𑀁 𑀦𑀺𑀧𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀲𑀘𑁆𑀘𑀸𑀳𑀁 𑀦𑀺𑀧𑀦𑁆𑀦𑁄 𑀦𑁄 𑀘 𑀔𑁄 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀦𑁆𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑁪𑁫𑁬. 𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀲𑀺𑀦𑁆𑀦𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀧𑀦𑁆𑀦𑁄𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀲𑀺𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀏𑀓𑁄 𑀏𑀓𑀸𑀬 𑀭𑀳𑁄 𑀦𑀺𑀧𑀦𑁆𑀦𑁄’’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀧𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀸𑀳𑀁 𑀦𑀺𑀧𑀦𑁆𑀦𑁄, 𑀅𑀧𑀺𑀘 𑀔𑁄 𑀞𑀺𑀢𑁄𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀅𑀦𑀺𑀬𑀢𑁄𑀢𑀺 𑀦 𑀦𑀺𑀬𑀢𑁄, 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀸 𑀧𑀸𑀘𑀺𑀢𑁆𑀢𑀺𑀬𑀁 𑀯𑀸.

𑁪𑁫𑁭. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄.

𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄. 𑀕𑀫𑀦𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀦𑀺𑀲𑀚𑁆𑀚𑀁 𑀦 𑀧𑀝𑀺𑀚𑀸𑀦𑀸𑀢𑀺 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀚𑀸𑀦𑀸𑀢𑀺, 𑀦 𑀓𑀸𑀭𑁂𑀢𑀩𑁆𑀩𑁄𑀢𑀺.

𑀤𑀼𑀢𑀺𑀬𑁄 𑀅𑀦𑀺𑀬𑀢𑁄 𑀦𑀺𑀝𑁆𑀞𑀺𑀢𑁄.

𑁪𑁫𑁮. 𑀉𑀤𑁆𑀤𑀺𑀝𑁆𑀞𑀸 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀤𑁆𑀯𑁂 𑀅𑀦𑀺𑀬𑀢𑀸 𑀥𑀫𑁆𑀫𑀸. 𑀢𑀢𑁆𑀣𑀸𑀬𑀲𑁆𑀫𑀦𑁆𑀢𑁂 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’? 𑀤𑀼𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’? 𑀢𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’? 𑀧𑀭𑀺𑀲𑀼𑀤𑁆𑀥𑁂𑀢𑁆𑀣𑀸𑀬𑀲𑁆𑀫𑀦𑁆𑀢𑁄; 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀮𑀁 𑀓𑀫𑁆𑀫𑀦𑀺𑀬𑀜𑁆𑀘𑁂𑀯, 𑀢𑀣𑁂𑀯 𑀘 𑀦𑀳𑁂𑀯 𑀔𑁄;

𑀅𑀦𑀺𑀬𑀢𑀸 𑀲𑀼𑀧𑀜𑁆𑀜𑀢𑁆𑀢𑀸, 𑀩𑀼𑀤𑁆𑀥𑀲𑁂𑀝𑁆𑀞𑁂𑀦 𑀢𑀸𑀤𑀺𑀦𑀸𑀢𑀺.

𑀅𑀦𑀺𑀬𑀢𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.