𑁯. 𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀁

𑁩𑁯𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑀸 𑀅𑀤𑁆𑀤𑀲𑀁𑀲𑀼 𑀙𑀕𑀮𑀓𑀁 [𑀙𑀓𑀮𑀓𑀁 (𑀲𑁆𑀬𑀸.)] 𑀅𑀚𑀺𑀓𑀸𑀬 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀏𑀯𑀫𑀸𑀳𑀁𑀲𑀼 𑁋 ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀇𑀫𑀁 𑀙𑀕𑀮𑀓𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀓𑀭𑁄𑀫. 𑀇𑀫𑀁 𑀅𑀚𑀺𑀓𑀁 𑀫𑁂𑀢𑁆𑀢𑀺𑀬𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀁 𑀓𑀭𑁄𑀫. 𑀏𑀯𑀁 𑀫𑀬𑀁 𑀯𑁄𑀳𑀭𑀺𑀲𑁆𑀲𑀸𑀫. 𑀧𑀼𑀩𑁆𑀩𑁂 𑀫𑀬𑀁, 𑀆𑀯𑀼𑀲𑁄, 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀲𑀼𑀢𑁂𑀦 𑀅𑀯𑁄𑀘𑀼𑀫𑁆𑀳𑀸. 𑀇𑀤𑀸𑀦𑀺 𑀧𑀦 𑀅𑀫𑁆𑀳𑁂𑀳𑀺 𑀲𑀸𑀫𑀁 𑀤𑀺𑀝𑁆𑀞𑁄 𑀫𑁂𑀢𑁆𑀢𑀺𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄’’𑀢𑀺. 𑀢𑁂 𑀢𑀁 𑀙𑀕𑀮𑀓𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀦𑀸𑀫 𑀅𑀓𑀁𑀲𑀼. 𑀢𑀁 𑀅𑀚𑀺𑀓𑀁 𑀫𑁂𑀢𑁆𑀢𑀺𑀬𑀁 𑀦𑀸𑀫 𑀪𑀺𑀓𑁆𑀔𑀼𑀦𑀺𑀁 𑀅𑀓𑀁𑀲𑀼. 𑀢𑁂 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀼𑀁 𑁋 ‘‘𑀧𑀼𑀩𑁆𑀩𑁂 𑀫𑀬𑀁, 𑀆𑀯𑀼𑀲𑁄, 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀲𑀼𑀢𑁂𑀦 𑀅𑀯𑁄𑀘𑀼𑀫𑁆𑀳𑀸. 𑀇𑀤𑀸𑀦𑀺 𑀧𑀦 𑀅𑀫𑁆𑀳𑁂𑀳𑀺 𑀲𑀸𑀫𑀁 𑀤𑀺𑀝𑁆𑀞𑁄 𑀫𑁂𑀢𑁆𑀢𑀺𑀬𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄’’𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀸𑀯𑀼𑀲𑁄, 𑀏𑀯𑀁 𑀅𑀯𑀘𑀼𑀢𑁆𑀣. 𑀦𑀸𑀬𑀲𑁆𑀫𑀸 𑀤𑀩𑁆𑀩𑁄 𑀫𑀮𑁆𑀮𑀧𑀼𑀢𑁆𑀢𑁄 𑀏𑀯𑀁 𑀓𑀭𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀭𑀲𑀺 𑀢𑁆𑀯𑀁, 𑀤𑀩𑁆𑀩, 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀬𑀣𑀬𑀺𑀫𑁂 𑀪𑀺𑀓𑁆𑀔𑀽 𑀆𑀳𑀁𑀲𑀽’’𑀢𑀺? ‘‘𑀬𑀣𑀸 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀚𑀸𑀦𑀸𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀭𑀲𑀺 𑀢𑁆𑀯𑀁, 𑀤𑀩𑁆𑀩, 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀬𑀣𑀬𑀺𑀫𑁂 𑀪𑀺𑀓𑁆𑀔𑀽 𑀆𑀳𑀁𑀲𑀽’’𑀢𑀺? ‘‘𑀬𑀣𑀸 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀚𑀸𑀦𑀸𑀢𑀻’’𑀢𑀺. ‘‘𑀦 𑀔𑁄, 𑀤𑀩𑁆𑀩, 𑀤𑀩𑁆𑀩𑀸 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀺. 𑀲𑀘𑁂 𑀢𑀬𑀸 𑀓𑀢𑀁 𑀓𑀢𑀦𑁆𑀢𑀺 𑀯𑀤𑁂𑀳𑀺, 𑀲𑀘𑁂 𑀢𑀬𑀸 𑀅𑀓𑀢𑀁 𑀅𑀓𑀢𑀦𑁆𑀢𑀺 𑀯𑀤𑁂𑀳𑀻’’𑀢𑀺. ‘‘𑀬𑀢𑁄 𑀅𑀳𑀁, 𑀪𑀦𑁆𑀢𑁂, 𑀚𑀸𑀢𑁄 𑀦𑀸𑀪𑀺𑀚𑀸𑀦𑀸𑀫𑀺 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀸, 𑀧𑀕𑁂𑀯 𑀚𑀸𑀕𑀭𑁄’’𑀢𑀺! 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀼𑀯𑁂, 𑀇𑀫𑁂 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀣𑀸’’𑀢𑀺. 𑀇𑀤𑀁 𑀯𑀢𑁆𑀯𑀸 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀅𑀦𑀼𑀬𑀼𑀜𑁆𑀚𑀺𑀁𑀲𑀼. 𑀢𑁂 𑀪𑀺𑀓𑁆𑀔𑀽𑀳𑀺 𑀅𑀦𑀼𑀬𑀼𑀜𑁆𑀚𑀻𑀬𑀫𑀸𑀦𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀣𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀣𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀤𑀩𑁆𑀩𑀁 𑀫𑀮𑁆𑀮𑀧𑀼𑀢𑁆𑀢𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁯𑁨. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀤𑀼𑀝𑁆𑀞𑁄 𑀤𑁄𑀲𑁄 𑀅𑀧𑁆𑀧𑀢𑀻𑀢𑁄 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀬𑁆𑀬 𑁋 ‘𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸 𑀘𑀸𑀯𑁂𑀬𑁆𑀬’𑀦𑁆𑀢𑀺. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀅𑀜𑁆𑀜𑀪𑀸𑀕𑀺𑀬𑀜𑁆𑀘𑁂𑀯 𑀢𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺 𑀓𑁄𑀘𑀺𑀤𑁂𑀲𑁄 𑀮𑁂𑀲𑀫𑀢𑁆𑀢𑁄 𑀉𑀧𑀸𑀤𑀺𑀦𑁆𑀦𑁄, 𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑁩𑁯𑁩. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀪𑀺𑀓𑁆𑀔𑀼𑀦𑁆𑀢𑀺 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁.

𑀤𑀼𑀝𑁆𑀞𑁄 𑀤𑁄𑀲𑁄𑀢𑀺 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀅𑀦𑀪𑀺𑀭𑀤𑁆𑀥𑁄 𑀆𑀳𑀢𑀘𑀺𑀢𑁆𑀢𑁄 𑀔𑀺𑀮𑀚𑀸𑀢𑁄.

𑀅𑀧𑁆𑀧𑀢𑀻𑀢𑁄𑀢𑀺 𑀢𑁂𑀦 𑀘 𑀓𑁄𑀧𑁂𑀦, 𑀢𑁂𑀦 𑀘 𑀤𑁄𑀲𑁂𑀦, 𑀢𑀸𑀬 𑀘 𑀅𑀦𑀢𑁆𑀢𑀫𑀦𑀢𑀸𑀬, 𑀢𑀸𑀬 𑀘 𑀅𑀦𑀪𑀺𑀭𑀤𑁆𑀥𑀺𑀬𑀸 𑀅𑀧𑁆𑀧𑀢𑀻𑀢𑁄 𑀳𑁄𑀢𑀺.

𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀯𑀸 𑀳𑁄𑀢𑀺 𑀅𑀥𑀺𑀓𑀭𑀡𑀜𑁆𑀜𑀪𑀸𑀕𑀺𑀬𑀁 𑀯𑀸. 𑀓𑀣𑀁 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁. 𑀏𑀯𑀁 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁.

𑀓𑀣𑀁 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀲𑀺𑀬𑀸 𑀢𑀩𑁆𑀪𑀸𑀕𑀺𑀬𑀁 𑀲𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀁.

𑀓𑀣𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁? 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀸. 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀸. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀸. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀸. 𑀏𑀯𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀁.

𑀓𑀣𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁? 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀩𑁆𑀪𑀸𑀕𑀺𑀬𑀸. 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀩𑁆𑀪𑀸𑀕𑀺𑀬𑀸. 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀩𑁆𑀪𑀸𑀕𑀺𑀬𑀸. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀢𑀩𑁆𑀪𑀸𑀕𑀺𑀬𑀸. 𑀏𑀯𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁.

𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁. 𑀏𑀯𑀁 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁.

𑁩𑁯𑁪. 𑀓𑀺𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬𑀸𑀢𑀺 𑀮𑁂𑀲𑁄 𑀦𑀸𑀫 𑀤𑀲 𑀮𑁂𑀲𑀸 𑁋 𑀚𑀸𑀢𑀺𑀮𑁂𑀲𑁄, 𑀦𑀸𑀫𑀮𑁂𑀲𑁄, 𑀕𑁄𑀢𑁆𑀢𑀮𑁂𑀲𑁄, 𑀮𑀺𑀗𑁆𑀕𑀮𑁂𑀲𑁄, 𑀆𑀧𑀢𑁆𑀢𑀺𑀮𑁂𑀲𑁄, 𑀧𑀢𑁆𑀢𑀮𑁂𑀲𑁄, 𑀘𑀻𑀯𑀭𑀮𑁂𑀲𑁄, 𑀉𑀧𑀚𑁆𑀛𑀸𑀬𑀮𑁂𑀲𑁄, 𑀆𑀘𑀭𑀺𑀬𑀮𑁂𑀲𑁄, 𑀲𑁂𑀦𑀸𑀲𑀦𑀮𑁂𑀲𑁄.

𑁩𑁯𑁫. 𑀚𑀸𑀢𑀺𑀮𑁂𑀲𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀔𑀢𑁆𑀢𑀺𑀬𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄 [𑀏𑀢𑁆𑀣 ‘‘𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄’’𑀢𑀺 𑀧𑀸𑀞𑁄 𑀊𑀦𑁄 𑀫𑀜𑁆𑀜𑁂, 𑀅𑀝𑁆𑀞𑀓𑀣𑀸𑀬𑀁 𑀳𑀺 ‘‘𑀔𑀢𑁆𑀢𑀺𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄’’𑀢𑀺 𑀤𑀺𑀲𑁆𑀲𑀢𑀺]. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑁆𑀭𑀸𑀳𑁆𑀫𑀡𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀯𑁂𑀲𑁆𑀲𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀲𑀼𑀤𑁆𑀤𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀲𑀼𑀤𑁆𑀤𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀲𑀼𑀤𑁆𑀤𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁩𑁯𑁬. 𑀦𑀸𑀫𑀮𑁂𑀲𑁄 𑀦𑀸𑀫 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀥𑀫𑁆𑀫𑀭𑀓𑁆𑀔𑀺𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑀭𑀓𑁆𑀔𑀺𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀲𑀗𑁆𑀖𑀭𑀓𑁆𑀔𑀺𑀢𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀲𑀗𑁆𑀖𑀭𑀓𑁆𑀔𑀺𑀢𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁩𑁯𑁭. 𑀕𑁄𑀢𑁆𑀢𑀮𑁂𑀲𑁄 𑀦𑀸𑀫 𑀕𑁄𑀢𑀫𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀓𑀘𑁆𑀘𑀸𑀬𑀦𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀯𑀸𑀲𑀺𑀝𑁆𑀞𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀯𑀸𑀲𑀺𑀝𑁆𑀞𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀯𑀸𑀲𑀺𑀝𑁆𑀞𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁩𑁯𑁮. 𑀮𑀺𑀗𑁆𑀕𑀮𑁂𑀲𑁄 𑀦𑀸𑀫 𑀤𑀻𑀖𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀭𑀲𑁆𑀲𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀓𑀡𑁆𑀳𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀑𑀤𑀸𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀑𑀤𑀸𑀢𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀑𑀤𑀸𑀢𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁩𑁯𑁯. 𑀆𑀧𑀢𑁆𑀢𑀺𑀮𑁂𑀲𑁄 𑀦𑀸𑀫 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁪𑁦𑁦. 𑀧𑀢𑁆𑀢𑀮𑁂𑀲𑁄 𑀦𑀸𑀫 𑀮𑁄𑀳𑀧𑀢𑁆𑀢𑀥𑀭𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀲𑀸𑀝𑀓𑀧𑀢𑁆𑀢𑀥𑀭𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀲𑀼𑀫𑁆𑀪𑀓𑀧𑀢𑁆𑀢𑀥𑀭𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀲𑀼𑀫𑁆𑀪𑀓𑀧𑀢𑁆𑀢𑀥𑀭𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀲𑀼𑀫𑁆𑀪𑀓𑀧𑀢𑁆𑀢𑀥𑀭𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁪𑁦𑁧. 𑀘𑀻𑀯𑀭𑀮𑁂𑀲𑁄 𑀦𑀸𑀫 𑀧𑀁𑀲𑀼𑀓𑀽𑀮𑀺𑀓𑁄 𑀤𑀺𑀝𑁆𑀞𑁄 𑀳𑁄𑀢𑀺…𑀧𑁂… 𑀕𑀳𑀧𑀢𑀺𑀘𑀻𑀯𑀭𑀥𑀭𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀕𑀳𑀧𑀢𑀺𑀘𑀻𑀯𑀭𑀥𑀭𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀕𑀳𑀧𑀢𑀺𑀘𑀻𑀯𑀭𑀥𑀭𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁪𑁦𑁨. 𑀉𑀧𑀚𑁆𑀛𑀸𑀬𑀮𑁂𑀲𑁄 𑀦𑀸𑀫 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁪𑁦𑁩. 𑀆𑀘𑀭𑀺𑀬𑀮𑁂𑀲𑁄 𑀦𑀸𑀫 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺’’…𑀧𑁂… 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁪𑁦𑁪. 𑀲𑁂𑀦𑀸𑀲𑀦𑀮𑁂𑀲𑁄 𑀦𑀸𑀫 𑀇𑀢𑁆𑀣𑀦𑁆𑀦𑀸𑀫𑀲𑁂𑀦𑀸𑀲𑀦𑀯𑀸𑀲𑀺𑀓𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄. 𑀅𑀜𑁆𑀜𑀁 𑀇𑀢𑁆𑀣𑀦𑁆𑀦𑀸𑀫𑀲𑁂𑀦𑀸𑀲𑀦𑀯𑀸𑀲𑀺𑀓𑀁 𑀧𑀲𑁆𑀲𑀺𑀢𑁆𑀯𑀸 𑀘𑁄𑀤𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀲𑁂𑀦𑀸𑀲𑀦𑀯𑀸𑀲𑀺𑀓𑁄 𑀫𑀬𑀸 𑀤𑀺𑀝𑁆𑀞𑁄. 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀺, 𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁪𑁦𑁫. 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦𑀸𑀢𑀺 𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦.

𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸.

𑀅𑀧𑁆𑀧𑁂𑀯 𑀦𑀸𑀫 𑀦𑀁 𑀇𑀫𑀫𑁆𑀳𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀘𑀸𑀯𑁂𑀬𑁆𑀬𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸 𑀘𑀸𑀯𑁂𑀬𑁆𑀬𑀁, 𑀲𑀫𑀡𑀥𑀫𑁆𑀫𑀸 𑀘𑀸𑀯𑁂𑀬𑁆𑀬𑀁, 𑀲𑀻𑀮𑀓𑁆𑀔𑀦𑁆𑀥𑀸 𑀘𑀸𑀯𑁂𑀬𑁆𑀬𑀁, 𑀢𑀧𑁄𑀕𑀼𑀡𑀸 𑀘𑀸𑀯𑁂𑀬𑁆𑀬𑀁.

𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀔𑀡𑁂 𑀅𑀦𑀼𑀤𑁆𑀥𑀁𑀲𑀺𑀢𑁄 𑀳𑁄𑀢𑀺, 𑀢𑀁 𑀔𑀡𑀁 𑀢𑀁 𑀮𑀬𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀯𑀢𑁆𑀢𑁂.

𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄𑀢𑀺 𑀬𑁂𑀦 𑀯𑀢𑁆𑀣𑀼𑀦𑀸 𑀅𑀦𑀼𑀤𑁆𑀥𑀁𑀲𑀺𑀢𑁄 𑀳𑁄𑀢𑀺 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄.

𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄𑀢𑀺 𑀦 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑁄.

𑀅𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁.

𑀓𑁄𑀘𑀺 𑀤𑁂𑀲𑁄 𑀮𑁂𑀲𑀫𑀢𑁆𑀢𑁄 𑀉𑀧𑀸𑀤𑀺𑀦𑁆𑀦𑁄𑀢𑀺 𑀢𑁂𑀲𑀁 𑀤𑀲𑀦𑁆𑀦𑀁 𑀮𑁂𑀲𑀸𑀦𑀁 𑀅𑀜𑁆𑀜𑀢𑀭𑁄 𑀮𑁂𑀲𑁄 𑀉𑀧𑀸𑀤𑀺𑀦𑁆𑀦𑁄 𑀳𑁄𑀢𑀺.

𑀪𑀺𑀓𑁆𑀔𑀼 𑀘 𑀤𑁄𑀲𑀁 𑀧𑀢𑀺𑀝𑁆𑀞𑀸𑀢𑀻𑀢𑀺 𑀢𑀼𑀘𑁆𑀙𑀓𑀁 𑀫𑀬𑀸 𑀪𑀡𑀺𑀢𑀁, 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀁, 𑀅𑀪𑀽𑀢𑀁 𑀫𑀬𑀸 𑀪𑀡𑀺𑀢𑀁, 𑀅𑀚𑀸𑀦𑀦𑁆𑀢𑁂𑀦 𑀫𑀬𑀸 𑀪𑀡𑀺𑀢𑀁.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 …𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁪𑁦𑁬. 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺, 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁂 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺 𑀳𑁄𑀢𑀺…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀓𑁆𑀓𑀝𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺’’…𑀧𑁂… 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀣𑀼𑀮𑁆𑀮𑀘𑁆𑀘𑀬𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑁂 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺 𑀳𑁄𑀢𑀺…𑀧𑁂… 𑀣𑀼𑀮𑁆𑀮𑀘𑁆𑀘𑀬𑁂 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀓𑁆𑀓𑀝𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺 𑀳𑁄𑀢𑀺… 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺’’ …𑀧𑁂… 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀧𑀸𑀘𑀺𑀢𑁆𑀢𑀺𑀬𑀁…𑀧𑁂… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀤𑀼𑀩𑁆𑀪𑀸𑀲𑀺𑀢𑁂 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺 𑀳𑁄𑀢𑀺…𑀧𑁂… 𑀤𑀼𑀩𑁆𑀪𑀸𑀲𑀺𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀺… 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀓𑁆𑀓𑀝𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺, 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑁂𑀓𑀁 𑀫𑀽𑀮𑀁 𑀓𑀸𑀢𑀼𑀦 𑀘𑀓𑁆𑀓𑀁 𑀩𑀦𑁆𑀥𑀺𑀢𑀩𑁆𑀩𑀁.

𑁪𑁦𑁭. 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑀸𑀧𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺’’…𑀧𑁂… 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁂 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺 𑀳𑁄𑀢𑀺…𑀧𑁂… 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀓𑁆𑀓𑀝𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑀸𑀧𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺’’…𑀧𑁂… 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀣𑀼𑀮𑁆𑀮𑀘𑁆𑀘𑀬𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀣𑀼𑀮𑁆𑀮𑀘𑁆𑀘𑀬𑁂 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺 𑀳𑁄𑀢𑀺…𑀧𑁂… 𑀣𑀼𑀮𑁆𑀮𑀘𑁆𑀘𑀬𑁂 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀓𑁆𑀓𑀝𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺 𑀳𑁄𑀢𑀺… 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑀸𑀧𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺’’…𑀧𑁂… 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀧𑀸𑀘𑀺𑀢𑁆𑀢𑀺𑀬𑀁…𑀧𑁂… 𑀧𑀸𑀝𑀺𑀤𑁂𑀲𑀦𑀻𑀬𑀁… 𑀤𑀼𑀓𑁆𑀓𑀝𑀁… 𑀤𑀼𑀩𑁆𑀪𑀸𑀲𑀺𑀢𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀺 𑀤𑀼𑀩𑁆𑀪𑀸𑀲𑀺𑀢𑁂 𑀤𑀼𑀩𑁆𑀪𑀸𑀲𑀺𑀢𑀤𑀺𑀝𑁆𑀞𑀺 𑀳𑁄𑀢𑀺…𑀧𑁂… 𑀤𑀼𑀩𑁆𑀪𑀸𑀲𑀺𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀺… 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀘𑀺𑀢𑁆𑀢𑀺𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀧𑀸𑀝𑀺𑀤𑁂𑀲𑀦𑀻𑀬𑀤𑀺𑀝𑁆𑀞𑀺 𑀳𑁄𑀢𑀺… 𑀤𑀼𑀓𑁆𑀓𑀝𑀤𑀺𑀝𑁆𑀞𑀺 𑀳𑁄𑀢𑀺. 𑀢𑀜𑁆𑀘𑁂 𑀧𑀸𑀭𑀸𑀚𑀺𑀓𑁂𑀦 𑀘𑁄𑀤𑀸𑀧𑁂𑀢𑀺 𑁋 ‘‘𑀅𑀲𑁆𑀲𑀫𑀡𑁄𑀲𑀺, 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀲𑀺, 𑀦𑀢𑁆𑀣𑀺 𑀢𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀲𑀗𑁆𑀖𑀓𑀫𑁆𑀫𑀁 𑀯𑀸’’𑀢𑀺, 𑀏𑀯𑀫𑁆𑀧𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀳𑁄𑀢𑀺 𑀮𑁂𑀲𑁄 𑀘 𑀉𑀧𑀸𑀤𑀺𑀦𑁆𑀦𑁄, 𑀆𑀧𑀢𑁆𑀢𑀺 𑀯𑀸𑀘𑀸𑀬, 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁪𑁦𑁮. 𑀅𑀦𑀸𑀧𑀢𑁆𑀢𑀺 𑀢𑀣𑀸𑀲𑀜𑁆𑀜𑀻 𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.