𑁭. 𑀕𑀩𑁆𑀪𑀺𑀦𑀻𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀁

𑁧𑁦𑁬𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀲𑀸 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀤𑁂𑀣𑀸𑀬𑁆𑀬𑀸𑀬 𑀪𑀺𑀓𑁆𑀔𑀁, 𑀕𑀭𑀼𑀪𑀸𑀭𑀸 [𑀕𑀭𑀼𑀕𑀩𑁆𑀪𑀸 (𑀲𑁆𑀬𑀸.)] 𑀅𑀬𑁆𑀬𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁦𑁬𑁮. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀕𑀩𑁆𑀪𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁦𑁬𑁯. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀕𑀩𑁆𑀪𑀺𑀦𑀻 𑀦𑀸𑀫 𑀆𑀧𑀦𑁆𑀦𑀲𑀢𑁆𑀢𑀸 𑀯𑀼𑀘𑁆𑀘𑀢𑀺. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁭𑁦. 𑀕𑀩𑁆𑀪𑀺𑀦𑀺𑀬𑀸 𑀕𑀩𑁆𑀪𑀺𑀦𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀩𑁆𑀪𑀺𑀦𑀺𑀬𑀸 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀕𑀩𑁆𑀪𑀺𑀦𑀺𑀬𑀸 𑀅𑀕𑀩𑁆𑀪𑀺𑀦𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀕𑀩𑁆𑀪𑀺𑀦𑀺𑀬𑀸 𑀕𑀩𑁆𑀪𑀺𑀦𑀺𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀕𑀩𑁆𑀪𑀺𑀦𑀺𑀬𑀸 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀕𑀩𑁆𑀪𑀺𑀦𑀺𑀬𑀸 𑀅𑀕𑀩𑁆𑀪𑀺𑀦𑀺𑀲𑀜𑁆𑀜𑀸, 𑀅𑀦𑀸𑀧𑀢𑁆𑀢𑀺.

𑁧𑁦𑁭𑁧. 𑀅𑀦𑀸𑀧𑀢𑁆𑀢𑀺 𑀕𑀩𑁆𑀪𑀺𑀦𑀺𑀁 𑀅𑀕𑀩𑁆𑀪𑀺𑀦𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀕𑀩𑁆𑀪𑀺𑀦𑀺𑀁 𑀅𑀕𑀩𑁆𑀪𑀺𑀦𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁧𑁦𑁭𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀲𑀸 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀤𑁂𑀣𑀸𑀬𑁆𑀬𑀸𑀬 𑀪𑀺𑀓𑁆𑀔𑀁, 𑀲𑀤𑀼𑀢𑀺𑀬𑀺𑀓𑀸 𑀅𑀬𑁆𑀬𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁦𑁭𑁩. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀸𑀬𑀦𑁆𑀢𑀺𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁦𑁭𑁪. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀸𑀬𑀦𑁆𑀢𑀻 𑀦𑀸𑀫 𑀫𑀸𑀢𑀸 𑀯𑀸 𑀳𑁄𑀢𑀺 [𑀳𑁄𑀢𑀼 (𑀓.)] 𑀥𑀸𑀢𑀺 [𑀥𑀸𑀢𑀻 (𑀲𑀻. 𑀲𑁆𑀬𑀸.)] 𑀯𑀸.

𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁭𑁫. 𑀧𑀸𑀬𑀦𑁆𑀢𑀺𑀬𑀸 𑀧𑀸𑀬𑀦𑁆𑀢𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀧𑀸𑀬𑀦𑁆𑀢𑀺𑀬𑀸 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀸𑀬𑀦𑁆𑀢𑀺𑀬𑀸 𑀅𑀧𑀸𑀬𑀦𑁆𑀢𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀧𑀸𑀬𑀦𑁆𑀢𑀺𑀬𑀸 𑀧𑀸𑀬𑀦𑁆𑀢𑀺𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀧𑀸𑀬𑀦𑁆𑀢𑀺𑀬𑀸 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀧𑀸𑀬𑀦𑁆𑀢𑀺𑀬𑀸 𑀅𑀧𑀸𑀬𑀦𑁆𑀢𑀺𑀲𑀜𑁆𑀜𑀸, 𑀅𑀦𑀸𑀧𑀢𑁆𑀢𑀺.

𑁧𑁦𑁭𑁬. 𑀅𑀦𑀸𑀧𑀢𑁆𑀢𑀺 𑀧𑀸𑀬𑀦𑁆𑀢𑀺𑀁 𑀅𑀧𑀸𑀬𑀦𑁆𑀢𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀧𑀸𑀬𑀦𑁆𑀢𑀺𑀁 𑀅𑀧𑀸𑀬𑀦𑁆𑀢𑀺𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁧𑁦𑁭𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀸 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀫𑀸𑀦𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀢𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀅𑀳𑀁, 𑀅𑀬𑁆𑀬𑁂, 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀲𑀺𑀓𑁆𑀔𑀫𑀸𑀦𑀸. 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁭𑁮. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀲𑀺𑀓𑁆𑀔𑀫𑀸𑀦𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀲𑀺𑀓𑁆𑀔𑀫𑀸𑀦𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁦𑁭𑁯. 𑀲𑀸 𑀲𑀺𑀓𑁆𑀔𑀫𑀸𑀦𑀸 ‘‘𑀏𑀯𑀁 𑀯𑀤𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺. 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺. 𑀅𑀩𑁆𑀭𑀳𑁆𑀫𑀘𑀭𑀺𑀬𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺. 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺. 𑀯𑀺𑀓𑀸𑀮𑀪𑁄𑀚𑀦𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁦𑁮𑁦. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁦𑁮𑁧. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀦𑀸𑀫 𑀲𑀺𑀓𑁆𑀔𑀸 𑀯𑀸 𑀦 𑀤𑀺𑀦𑁆𑀦𑀸 𑀳𑁄𑀢𑀺, 𑀤𑀺𑀦𑁆𑀦𑀸 𑀯𑀸 𑀲𑀺𑀓𑁆𑀔𑀸 𑀓𑀼𑀧𑀺𑀢𑀸. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁮𑁨. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁮𑁩. 𑀅𑀦𑀸𑀧𑀢𑁆𑀢𑀺 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁

𑁧𑁦𑁮𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀣, 𑀲𑀺𑀓𑁆𑀔𑀫𑀸𑀦𑀸, 𑀇𑀫𑀁 𑀚𑀸𑀦𑀸𑀣, 𑀇𑀫𑀁 𑀤𑁂𑀣, 𑀇𑀫𑀁 𑀆𑀳𑀭𑀣, 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀫𑀁 𑀓𑀧𑁆𑀧𑀺𑀬𑀁 𑀓𑀭𑁄𑀣𑀸’’𑀢𑀺. 𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀅𑀬𑁆𑀬𑁂, 𑀲𑀺𑀓𑁆𑀔𑀫𑀸𑀦𑀸. 𑀪𑀺𑀓𑁆𑀔𑀼𑀦𑀺𑀬𑁄 𑀫𑀬’’𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀅𑀬𑁆𑀬𑁂, 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀺𑀓𑁆𑀔𑀫𑀸𑀦𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁮𑁫. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀺𑀓𑁆𑀔𑀫𑀸𑀦𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀺𑀓𑁆𑀔𑀫𑀸𑀦𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀫𑀸𑀦𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺; 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁦𑁮𑁬. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁦𑁮𑁭. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀦𑀸𑀫 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸. 𑀅𑀲𑀫𑁆𑀫𑀢𑀸 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺 𑀦 𑀤𑀺𑀦𑁆𑀦𑀸𑀳𑁄𑀢𑀺. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁮𑁮. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁮𑁯. 𑀅𑀦𑀸𑀧𑀢𑁆𑀢𑀺 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀺𑀓𑁆𑀔𑀫𑀸𑀦𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁

𑁧𑁦𑁯𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀸 𑀅𑀓𑁆𑀔𑀫𑀸 𑀳𑁄𑀦𑁆𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑀸 𑀳𑁄𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 [𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸𑀳𑀺 (𑀓.)], 𑀪𑀺𑀓𑁆𑀔𑀯𑁂, 𑀕𑀺𑀳𑀺𑀕𑀢𑀸 𑀅𑀓𑁆𑀔𑀫𑀸 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑀸 𑀳𑁄𑀢𑀺. 𑀤𑁆𑀯𑀸𑀤𑀲𑀯𑀲𑁆𑀲𑀸𑀯 [𑀤𑁆𑀯𑀸𑀤𑀲𑀯𑀲𑁆𑀲𑀸 𑀘 (𑀲𑁆𑀬𑀸. 𑀓.)] 𑀔𑁄, 𑀪𑀺𑀓𑁆𑀔𑀯𑁂, 𑀕𑀺𑀳𑀺𑀕𑀢𑀸 𑀔𑀫𑀸 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑀸 𑀳𑁄𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁦𑁯𑁧. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁦𑁯𑁨. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀦𑀸𑀫 𑀅𑀧𑁆𑀧𑀢𑁆𑀢𑀤𑁆𑀯𑀸𑀤𑀲𑀯𑀲𑁆𑀲𑀸. 𑀕𑀺𑀳𑀺𑀕𑀢𑀸 𑀦𑀸𑀫 𑀧𑀼𑀭𑀺𑀲𑀦𑁆𑀢𑀭𑀕𑀢𑀸 𑀯𑀼𑀘𑁆𑀘𑀢𑀺. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁯𑁩. 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺.

𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸, 𑀅𑀦𑀸𑀧𑀢𑁆𑀢𑀺.

𑁧𑁦𑁯𑁪. 𑀅𑀦𑀸𑀧𑀢𑁆𑀢𑀺 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁

𑁧𑁦𑁯𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀸 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀢𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀅𑀳𑀁, 𑀅𑀬𑁆𑀬𑁂, 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀕𑀺𑀳𑀺𑀕𑀢𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁦𑁯𑁬. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀕𑀺𑀳𑀺𑀕𑀢𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀕𑀺𑀳𑀺𑀕𑀢𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀲𑀸 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀕𑀺𑀳𑀺𑀕𑀢𑀸 𑀏𑀯𑀁 𑀯𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺…𑀧𑁂… 𑀯𑀺𑀓𑀸𑀮𑀪𑁄𑀚𑀦𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁦𑁯𑁭. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁦𑁯𑁮. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀦𑀸𑀫 𑀧𑀢𑁆𑀢𑀤𑁆𑀯𑀸𑀤𑀲𑀯𑀲𑁆𑀲𑀸. 𑀕𑀺𑀳𑀺𑀕𑀢𑀸 𑀦𑀸𑀫 𑀧𑀼𑀭𑀺𑀲𑀦𑁆𑀢𑀭𑀕𑀢𑀸 𑀯𑀼𑀘𑁆𑀘𑀢𑀺. 𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀦𑀸𑀫 𑀲𑀺𑀓𑁆𑀔𑀸 𑀯𑀸 𑀦 𑀤𑀺𑀦𑁆𑀦𑀸 𑀳𑁄𑀢𑀺, 𑀤𑀺𑀦𑁆𑀦𑀸 𑀯𑀸 𑀲𑀺𑀓𑁆𑀔𑀸 𑀓𑀼𑀧𑀺𑀢𑀸. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁦𑁯𑁯. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁦𑁦. 𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁦𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀣 𑀲𑀺𑀓𑁆𑀔𑀫𑀸𑀦𑀸, 𑀇𑀫𑀁 𑀚𑀸𑀦𑀸𑀣, 𑀇𑀫𑀁 𑀤𑁂𑀣, 𑀇𑀫𑀁 𑀆𑀳𑀭𑀣, 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀫𑀁 𑀓𑀧𑁆𑀧𑀺𑀬𑀁 𑀓𑀭𑁄𑀣𑀸’’𑀢𑀺. 𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀅𑀬𑁆𑀬𑁂, 𑀲𑀺𑀓𑁆𑀔𑀫𑀸𑀦𑀸, 𑀪𑀺𑀓𑁆𑀔𑀼𑀦𑀺𑀬𑁄 𑀫𑀬’’𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑁆𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀢𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀅𑀳𑀁, 𑀅𑀬𑁆𑀬𑁂, 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀕𑀺𑀳𑀺𑀕𑀢𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸, 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄.

𑁧𑁧𑁦𑁨. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀕𑀺𑀳𑀺𑀕𑀢𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀕𑀺𑀳𑀺𑀕𑀢𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀕𑀺𑀳𑀺𑀕𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁦𑁩. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁦𑁪. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀦𑀸𑀫 𑀧𑀢𑁆𑀢𑀤𑁆𑀯𑀸𑀤𑀲𑀯𑀲𑁆𑀲𑀸. 𑀕𑀺𑀳𑀺𑀕𑀢𑀸 𑀦𑀸𑀫 𑀧𑀼𑀭𑀺𑀲𑀦𑁆𑀢𑀭𑀕𑀢𑀸 𑀯𑀼𑀘𑁆𑀘𑀢𑀺. 𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀦𑀸𑀫 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸. 𑀅𑀲𑀫𑁆𑀫𑀢𑀸 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺 𑀦 𑀤𑀺𑀦𑁆𑀦𑀸 𑀳𑁄𑀢𑀺. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁦𑁫. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁦𑁬. 𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀁 𑀕𑀺𑀳𑀺𑀕𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁦𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀢𑀺. 𑀢𑀸 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸; 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀢𑀺 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀢𑀺 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁦𑁮. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁦𑁯. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀲𑀳𑀚𑀻𑀯𑀺𑀦𑀻 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀻 𑀯𑀼𑀘𑁆𑀘𑀢𑀺. 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸. 𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺.

𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀦 𑀲𑀬𑀁 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬 𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀑𑀯𑀸𑀤𑁂𑀦 𑀅𑀦𑀼𑀲𑀸𑀲𑀦𑀺𑀬𑀸.

𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀬𑁆𑀬𑀸𑀢𑀺 𑀦 𑀅𑀜𑁆𑀜𑀁 𑀆𑀡𑀸𑀧𑁂𑀬𑁆𑀬 ‘‘𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑁂𑀯 𑀅𑀦𑀼𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺 𑀦 𑀅𑀦𑀼𑀕𑁆𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁧𑁦. 𑀅𑀦𑀸𑀧𑀢𑁆𑀢𑀺 𑀲𑀢𑀺 𑀅𑀦𑁆𑀢𑀭𑀸𑀬𑁂, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦 𑀮𑀪𑀢𑀺, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁧𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑀦𑁆𑀢𑀺. 𑀢𑀸 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸; 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑀺𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁧𑁨. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀯𑀼𑀝𑁆𑀞𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁧𑁩. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀯𑀼𑀝𑁆𑀞𑀸𑀧𑀺𑀢𑀦𑁆𑀢𑀺 𑀉𑀧𑀲𑀫𑁆𑀧𑀸𑀤𑀺𑀢𑀁. 𑀧𑀯𑀢𑁆𑀢𑀺𑀦𑀻 𑀦𑀸𑀫 𑀉𑀧𑀚𑁆𑀛𑀸𑀬𑀸 𑀯𑀼𑀘𑁆𑀘𑀢𑀺. 𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸𑀢𑀺 𑀦 𑀲𑀬𑀁 𑀉𑀧𑀝𑁆𑀞𑀳𑁂𑀬𑁆𑀬. 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑀺𑀲𑁆𑀲𑀸𑀫𑀻𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁧𑁪. 𑀅𑀦𑀸𑀧𑀢𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸 𑀯𑀸 𑀳𑁄𑀢𑀺 𑀅𑀮𑀚𑁆𑀚𑀺𑀦𑀻 𑀯𑀸, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁧𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑁂𑀯 𑀯𑀽𑀧𑀓𑀸𑀲𑁂𑀢𑀺 𑀦 𑀯𑀽𑀧𑀓𑀸𑀲𑀸𑀧𑁂𑀢𑀺. 𑀲𑀸𑀫𑀺𑀓𑁄 𑀅𑀕𑁆𑀕𑀳𑁂𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑁂𑀯 𑀯𑀽𑀧𑀓𑀸𑀲𑁂𑀲𑁆𑀲𑀢𑀺 𑀦 𑀯𑀽𑀧𑀓𑀸𑀲𑀸𑀧𑁂𑀲𑁆𑀲𑀢𑀺, 𑀲𑀸𑀫𑀺𑀓𑁄 𑀅𑀕𑁆𑀕𑀳𑁂𑀲𑀺! 𑀲𑀘𑀸𑀬𑀁 𑀪𑀺𑀓𑁆𑀔𑀼𑀦𑀻 𑀧𑀓𑁆𑀓𑀦𑁆𑀢𑀸 𑀅𑀲𑁆𑀲, 𑀦 𑀘 𑀲𑀸𑀫𑀺𑀓𑁄 𑀕𑀡𑁆𑀳𑁂𑀬𑁆𑀬𑀸’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑁂𑀯 𑀯𑀽𑀧𑀓𑀸𑀲𑁂𑀢𑀺 𑀦 𑀯𑀽𑀧𑀓𑀸𑀲𑀸𑀧𑁂𑀢𑀺 […𑀲𑀺 (𑀓.)], 𑀲𑀸𑀫𑀺𑀓𑁄 𑀅𑀕𑁆𑀕𑀳𑁂𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑁂𑀯 𑀯𑀽𑀧𑀓𑀸𑀲𑁂𑀲𑁆𑀲𑀢𑀺 𑀦 𑀯𑀽𑀧𑀓𑀸𑀲𑀸𑀧𑁂𑀲𑁆𑀲𑀢𑀺, 𑀲𑀸𑀫𑀺𑀓𑁄 𑀅𑀕𑁆𑀕𑀳𑁂𑀲𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁧𑁬. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀳𑀚𑀻𑀯𑀺𑀦𑀺𑀁 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀦𑁂𑀯 𑀯𑀽𑀧𑀓𑀸𑀲𑁂𑀬𑁆𑀬 𑀦 𑀯𑀽𑀧𑀓𑀸𑀲𑀸𑀧𑁂𑀬𑁆𑀬 𑀅𑀦𑁆𑀢𑀫𑀲𑁄 𑀙𑀧𑁆𑀧𑀜𑁆𑀘𑀬𑁄𑀚𑀦𑀸𑀦𑀺𑀧𑀺, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁧𑁭. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀲𑀳𑀚𑀻𑀯𑀺𑀦𑀻 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀻 𑀯𑀼𑀘𑁆𑀘𑀢𑀺. 𑀯𑀼𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸. 𑀦𑁂𑀯 𑀯𑀽𑀧𑀓𑀸𑀲𑁂𑀬𑁆𑀬𑀸𑀢𑀺 𑀦 𑀲𑀬𑀁 𑀯𑀽𑀧𑀓𑀸𑀲𑁂𑀬𑁆𑀬. 𑀦 𑀯𑀽𑀧𑀓𑀸𑀲𑀸𑀧𑁂𑀬𑁆𑀬𑀸𑀢𑀺 𑀦 𑀅𑀜𑁆𑀜𑀁 𑀆𑀡𑀸𑀧𑁂𑀬𑁆𑀬. ‘‘𑀦𑁂𑀯 𑀯𑀽𑀧𑀓𑀸𑀲𑁂𑀲𑁆𑀲𑀸𑀫𑀺 𑀦 𑀯𑀽𑀧𑀓𑀸𑀲𑀸𑀧𑁂𑀲𑁆𑀲𑀸𑀫𑀺 𑀅𑀦𑁆𑀢𑀫𑀲𑁄 𑀙𑀧𑁆𑀧𑀜𑁆𑀘𑀬𑁄𑀚𑀦𑀸𑀦𑀺𑀧𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁧𑁮. 𑀅𑀦𑀸𑀧𑀢𑁆𑀢𑀺 𑀲𑀢𑀺 𑀅𑀦𑁆𑀢𑀭𑀸𑀬𑁂, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀼𑀢𑀺𑀬𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀦 𑀮𑀪𑀢𑀺, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑀕𑀩𑁆𑀪𑀺𑀦𑀺𑀯𑀕𑁆𑀕𑁄 𑀲𑀢𑁆𑀢𑀫𑁄.