𑁮. 𑀓𑀼𑀫𑀸𑀭𑀻𑀪𑀽𑀢𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁧𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀸 𑀅𑀓𑁆𑀔𑀫𑀸 𑀳𑁄𑀦𑁆𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲 𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦𑀁 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁. 𑀉𑀧𑁆𑀧𑀦𑁆𑀦𑀸𑀦𑀁 𑀲𑀸𑀭𑀻𑀭𑀺𑀓𑀸𑀦𑀁 𑀯𑁂𑀤𑀦𑀸𑀦𑀁 𑀤𑀼𑀓𑁆𑀔𑀸𑀦𑀁 𑀢𑀺𑀩𑁆𑀩𑀸𑀦𑀁 𑀔𑀭𑀸𑀦𑀁 𑀓𑀝𑀼𑀓𑀸𑀦𑀁 𑀅𑀲𑀸𑀢𑀸𑀦𑀁 𑀅𑀫𑀦𑀸𑀧𑀸𑀦𑀁 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑀸 𑀳𑁄𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀊𑀦𑀯𑀻𑀲𑀢𑀺𑀯𑀲𑁆𑀲𑀸, 𑀪𑀺𑀓𑁆𑀔𑀯𑁂, 𑀓𑀼𑀫𑀸𑀭𑀺𑀪𑀽𑀢𑀸 𑀅𑀓𑁆𑀔𑀫𑀸 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲…𑀧𑁂… 𑀧𑀸𑀡𑀳𑀭𑀸𑀦𑀁 𑀅𑀦𑀥𑀺𑀯𑀸𑀲𑀓𑀚𑀸𑀢𑀺𑀓𑀸 𑀳𑁄𑀢𑀺. 𑀯𑀻𑀲𑀢𑀺𑀯𑀲𑁆𑀲𑀸𑀯 𑀔𑁄, 𑀪𑀺𑀓𑁆𑀔𑀯𑁂, 𑀓𑀼𑀫𑀸𑀭𑀺𑀪𑀽𑀢𑀸 𑀔𑀫𑀸 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲…𑀧𑁂… 𑀧𑀸𑀡𑀳𑀭𑀸𑀦𑀁 𑀅𑀥𑀺𑀯𑀸𑀲𑀓𑀚𑀸𑀢𑀺𑀓𑀸 𑀳𑁄𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁨𑁦. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁨𑁧. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀊𑀦𑀯𑀻𑀲𑀢𑀺𑀯𑀲𑁆𑀲𑀸 𑀦𑀸𑀫 𑀅𑀧𑁆𑀧𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑀸. 𑀓𑀼𑀫𑀸𑀭𑀺𑀪𑀽𑀢𑀸 𑀦𑀸𑀫 𑀲𑀸𑀫𑀡𑁂𑀭𑀻 𑀯𑀼𑀘𑁆𑀘𑀢𑀺. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁨𑁨. 𑀊𑀦𑀯𑀻𑀲𑀢𑀺𑀯𑀲𑁆𑀲𑀸𑀬 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀊𑀦𑀯𑀻𑀲𑀢𑀺𑀯𑀲𑁆𑀲𑀸𑀬 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀯𑀻𑀲𑀢𑀺𑀯𑀲𑁆𑀲𑀸𑀬 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸, 𑀅𑀦𑀸𑀧𑀢𑁆𑀢𑀺.

𑁧𑁧𑁨𑁩. 𑀅𑀦𑀸𑀧𑀢𑁆𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁧𑁧𑁨𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀸 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸; 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀤𑀸𑀢𑀩𑁆𑀩𑀸. 𑀢𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀅𑀳𑀁, 𑀅𑀬𑁆𑀬𑁂, 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸 𑀓𑀼𑀫𑀸𑀭𑀺𑀪𑀽𑀢𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁧𑁨𑁫. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸 𑀓𑀼𑀫𑀸𑀭𑀺𑀪𑀽𑀢𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸 𑀓𑀼𑀫𑀸𑀭𑀺𑀪𑀽𑀢𑀸 𑀲𑀗𑁆𑀖𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀲𑀸 𑀅𑀝𑁆𑀞𑀸𑀭𑀲𑀯𑀲𑁆𑀲𑀸 𑀓𑀼𑀫𑀸𑀭𑀺𑀪𑀽𑀢𑀸 𑀏𑀯𑀁 𑀯𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀺…𑀧𑁂… 𑀯𑀺𑀓𑀸𑀮𑀪𑁄𑀚𑀦𑀸 𑀯𑁂𑀭𑀫𑀡𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀯𑀻𑀢𑀺𑀓𑁆𑀓𑀫𑁆𑀫 𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀸𑀫𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁨𑁬. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁨𑁭. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸 𑀦𑀸𑀫 𑀧𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑀸. 𑀓𑀼𑀫𑀸𑀭𑀺𑀪𑀽𑀢𑀸 𑀦𑀸𑀫 𑀲𑀸𑀫𑀡𑁂𑀭𑀻 𑀯𑀼𑀘𑁆𑀘𑀢𑀺. 𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀅𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀦𑀸𑀫 𑀲𑀺𑀓𑁆𑀔𑀸 𑀯𑀸 𑀦 𑀤𑀺𑀦𑁆𑀦𑀸 𑀳𑁄𑀢𑀺, 𑀤𑀺𑀦𑁆𑀦𑀸 𑀯𑀸 𑀲𑀺𑀓𑁆𑀔𑀸 𑀓𑀼𑀧𑀺𑀢𑀸. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

𑁧𑁧𑁨𑁮. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁨𑁯. 𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁧𑁧𑁩𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀣 𑀲𑀺𑀓𑁆𑀔𑀫𑀸𑀦𑀸, 𑀇𑀫𑀁 𑀚𑀸𑀦𑀸𑀣, 𑀇𑀫𑀁 𑀤𑁂𑀣, 𑀇𑀫𑀁 𑀆𑀳𑀭𑀣, 𑀇𑀫𑀺𑀦𑀸 𑀅𑀢𑁆𑀣𑁄, 𑀇𑀫𑀁 𑀓𑀧𑁆𑀧𑀺𑀬𑀁 𑀓𑀭𑁄𑀣𑀸’’𑀢𑀺. 𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁, 𑀅𑀬𑁆𑀬𑁂, 𑀲𑀺𑀓𑁆𑀔𑀫𑀸𑀦𑀸; 𑀪𑀺𑀓𑁆𑀔𑀼𑀦𑀺𑀬𑁄 𑀫𑀬’’𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀢𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀅𑀳𑀁, 𑀅𑀬𑁆𑀬𑁂, 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸 𑀓𑀼𑀫𑀸𑀭𑀺𑀪𑀽𑀢𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁧𑁩𑁧. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸 𑀓𑀼𑀫𑀸𑀭𑀺𑀪𑀽𑀢𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀇𑀢𑁆𑀣𑀦𑁆𑀦𑀸𑀫𑀸𑀬 𑀅𑀬𑁆𑀬𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸 𑀓𑀼𑀫𑀸𑀭𑀺𑀪𑀽𑀢𑀸 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀲𑀗𑁆𑀖𑀁 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸𑀬 𑀓𑀼𑀫𑀸𑀭𑀺𑀪𑀽𑀢𑀸𑀬 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸𑀬 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁧𑁩𑁨. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁩𑁩. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀸 𑀦𑀸𑀫 𑀧𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑀸. 𑀓𑀼𑀫𑀸𑀭𑀺𑀪𑀽𑀢𑀸 𑀦𑀸𑀫 𑀲𑀸𑀫𑀡𑁂𑀭𑀻 𑀯𑀼𑀘𑁆𑀘𑀢𑀺. 𑀤𑁆𑀯𑁂 𑀯𑀲𑁆𑀲𑀸𑀦𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺. 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀦𑀸𑀫 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸. 𑀅𑀲𑀫𑁆𑀫𑀢𑀸 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀦𑀲𑀫𑁆𑀫𑀼𑀢𑀺 𑀦 𑀤𑀺𑀦𑁆𑀦𑀸 𑀳𑁄𑀢𑀺. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

𑁧𑁧𑁩𑁪. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁩𑁫. 𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀁 𑀓𑀼𑀫𑀸𑀭𑀺𑀪𑀽𑀢𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀁 𑀲𑀗𑁆𑀖𑁂𑀦 𑀲𑀫𑁆𑀫𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁

𑁧𑁧𑁩𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀸 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀬𑁄𑀧𑀺 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸; 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁩𑁭. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁩𑁮. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀊𑀦𑀤𑁆𑀯𑀸𑀤𑀲𑀯𑀲𑁆𑀲𑀸 𑀦𑀸𑀫 𑀅𑀧𑁆𑀧𑀢𑁆𑀢𑀤𑁆𑀯𑀸𑀤𑀲𑀯𑀲𑁆𑀲𑀸.

𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

𑁧𑁧𑁩𑁯. 𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁪𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀢𑀸 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸; 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑀺𑀬𑁄𑀧𑀺 𑀩𑀸𑀮𑀸 𑀳𑁄𑀦𑁆𑀢𑀺 𑀅𑀩𑁆𑀬𑀢𑁆𑀢𑀸; 𑀦 𑀚𑀸𑀦𑀦𑁆𑀢𑀺 𑀓𑀧𑁆𑀧𑀺𑀬𑀁 𑀯𑀸 𑀅𑀓𑀧𑁆𑀧𑀺𑀬𑀁 𑀯𑀸. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀢𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀅𑀳𑀁, 𑀅𑀬𑁆𑀬𑁂, 𑀇𑀢𑁆𑀣𑀦𑁆𑀦𑀸𑀫𑀸 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀸 𑁋 ‘‘𑀩𑁆𑀬𑀢𑁆𑀢𑀸𑀬𑀁 𑀪𑀺𑀓𑁆𑀔𑀼𑀦𑀻 𑀮𑀚𑁆𑀚𑀺𑀦𑀻’’𑀢𑀺. 𑀲𑀘𑁂 𑀩𑀸𑀮𑀸 𑀘 𑀳𑁄𑀢𑀺 𑀅𑀮𑀚𑁆𑀚𑀺𑀦𑀻 𑀘, 𑀦 𑀤𑀸𑀢𑀩𑁆𑀩𑀸. 𑀲𑀘𑁂 𑀩𑀸𑀮𑀸 𑀳𑁄𑀢𑀺 𑀮𑀚𑁆𑀚𑀺𑀦𑀻, 𑀦 𑀤𑀸𑀢𑀩𑁆𑀩𑀸. 𑀲𑀘𑁂 𑀩𑁆𑀬𑀢𑁆𑀢𑀸 𑀳𑁄𑀢𑀺 𑀅𑀮𑀚𑁆𑀚𑀺𑀦𑀻, 𑀦 𑀤𑀸𑀢𑀩𑁆𑀩𑀸. 𑀲𑀘𑁂 𑀩𑁆𑀬𑀢𑁆𑀢𑀸 𑀘 𑀳𑁄𑀢𑀺 𑀮𑀚𑁆𑀚𑀺𑀦𑀻 𑀘, 𑀤𑀸𑀢𑀩𑁆𑀩𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁧𑁧𑁪𑁧. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀬𑀸 𑀤𑀸𑀦𑀁, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸𑀬 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁧𑁧𑁪𑁨. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁪𑁩. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀦𑀸𑀫 𑀧𑀢𑁆𑀢𑀤𑁆𑀯𑀸𑀤𑀲𑀯𑀲𑁆𑀲𑀸.

𑀅𑀲𑀫𑁆𑀫𑀢𑀸 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺 𑀦 𑀤𑀺𑀦𑁆𑀦𑀸 𑀳𑁄𑀢𑀺. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

𑁧𑁧𑁪𑁪. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁪𑁫. 𑀅𑀦𑀸𑀧𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀤𑁆𑀯𑀸𑀤𑀲𑀯𑀲𑁆𑀲𑀸 𑀲𑀗𑁆𑀖𑁂𑀦 𑀲𑀫𑁆𑀫𑀢𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁

𑁧𑁧𑁪𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀬𑀸𑀘𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘𑀡𑁆𑀟𑀓𑀸𑀴𑀺𑀁 𑀪𑀺𑀓𑁆𑀔𑀼𑀦𑀺𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑁋 ‘‘𑀅𑀮𑀁 𑀢𑀸𑀯 𑀢𑁂, 𑀅𑀬𑁆𑀬𑁂, 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’’𑀢𑀺, 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀦 𑀅𑀤𑀸𑀲𑀺. 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀜𑁆𑀜𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀤𑁂𑀢𑀺. 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀅𑀳𑀫𑁂𑀯 𑀦𑀽𑀦 𑀩𑀸𑀮𑀸, 𑀅𑀳𑀫𑁂𑀯 𑀦𑀽𑀦 𑀅𑀮𑀚𑁆𑀚𑀺𑀦𑀻; 𑀬𑀁 𑀲𑀗𑁆𑀖𑁄 𑀅𑀜𑁆𑀜𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺𑀁 𑀤𑁂𑀢𑀺, 𑀫𑀬𑁆𑀳𑀫𑁂𑀯 𑀦 𑀤𑁂𑀢𑀻’’𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀘𑀡𑁆𑀟𑀓𑀸𑀴𑀻 𑁋 ‘𑀅𑀮𑀁 𑀢𑀸𑀯 𑀢𑁂, 𑀅𑀬𑁆𑀬𑁂, 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’𑀢𑀺 𑀯𑀼𑀘𑁆𑀘𑀫𑀸𑀦𑀸 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, ‘𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀅𑀮𑀁 𑀢𑀸𑀯 𑀢𑁂 𑀅𑀬𑁆𑀬𑁂 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’𑀢𑀺 𑀯𑀼𑀘𑁆𑀘𑀫𑀸𑀦𑀸 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑀢𑀻𑀢𑀺 [𑀆𑀧𑀚𑁆𑀚𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑁋 ‘‘𑀅𑀮𑀁 𑀢𑀸𑀯 𑀢𑁂, 𑀅𑀬𑁆𑀬𑁂, 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀸 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁪𑁭. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑁋 ‘𑀅𑀮𑀁 𑀢𑀸𑀯 𑀢𑁂, 𑀅𑀬𑁆𑀬𑁂, 𑀯𑀼𑀝𑁆𑀞𑀸𑀧𑀺𑀢𑁂𑀦𑀸’𑀢𑀺 𑀯𑀼𑀘𑁆𑀘𑀫𑀸𑀦𑀸 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁪𑁮. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀅𑀮𑀁 𑀢𑀸𑀯 𑀢𑁂 𑀅𑀬𑁆𑀬𑁂 𑀯𑀼𑀝𑁆𑀞𑀸𑀧𑀺𑀢𑁂𑀦𑀸𑀢𑀺 𑀅𑀮𑀁 𑀢𑀸𑀯 𑀢𑁂, 𑀅𑀬𑁆𑀬𑁂, 𑀉𑀧𑀲𑀫𑁆𑀧𑀸𑀤𑀺𑀢𑁂𑀦. ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁪𑁯. 𑀅𑀦𑀸𑀧𑀢𑁆𑀢𑀺 𑀧𑀓𑀢𑀺𑀬𑀸 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀓𑀭𑁄𑀦𑁆𑀢𑀁 𑀔𑀺𑀬𑁆𑀬𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁫𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀲𑀺𑀓𑁆𑀔𑀫𑀸𑀦𑀸 𑀣𑀼𑀮𑁆𑀮𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀢𑀁 𑀲𑀺𑀓𑁆𑀔𑀫𑀸𑀦𑀁 𑁋 ‘‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺. 𑀅𑀣 𑀔𑁄 𑀲𑀸 𑀲𑀺𑀓𑁆𑀔𑀫𑀸𑀦𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀲𑀺𑀓𑁆𑀔𑀫𑀸𑀦𑀁 𑁋 ‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀁 𑁋 ‘‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀁 𑁋 ‘‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁫𑁧. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀁 𑁋 ‘𑀲𑀘𑁂 𑀫𑁂 𑀢𑁆𑀯𑀁, 𑀅𑀬𑁆𑀬𑁂, 𑀘𑀻𑀯𑀭𑀁 𑀤𑀲𑁆𑀲𑀲𑀺, 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸, 𑀲𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻 𑀦𑁂𑀯 𑀯𑀼𑀝𑁆𑀞𑀸𑀧𑁂𑀬𑁆𑀬 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁫𑁨. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀲𑀺𑀓𑁆𑀔𑀫𑀸𑀦𑀸 𑀦𑀸𑀫 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀲𑀘𑁂 𑀫𑁂 𑀢𑁆𑀯𑀁 𑀅𑀬𑁆𑀬𑁂 𑀘𑀻𑀯𑀭𑀁 𑀤𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻𑀢𑀺 𑀏𑀯𑀸𑀳𑀁 𑀢𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀺.

𑀲𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻𑀢𑀺 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂.

𑀦𑁂𑀯 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀦 𑀲𑀬𑀁 𑀯𑀼𑀝𑁆𑀞𑀸𑀧𑁂𑀬𑁆𑀬.

𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀸𑀢𑀺 𑀦 𑀅𑀜𑁆𑀜𑀁 𑀆𑀡𑀸𑀧𑁂𑀬𑁆𑀬. ‘‘𑀦𑁂𑀯 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁫𑁩. 𑀅𑀦𑀸𑀧𑀢𑁆𑀢𑀺 𑀲𑀢𑀺 𑀅𑀦𑁆𑀢𑀭𑀸𑀬𑁂, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦 𑀮𑀪𑀢𑀺, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁫𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀲𑀺𑀓𑁆𑀔𑀫𑀸𑀦𑀸 𑀣𑀼𑀮𑁆𑀮𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀢𑀁 𑀲𑀺𑀓𑁆𑀔𑀫𑀸𑀦𑀁 ‘‘𑀲𑀘𑁂 𑀫𑀁 𑀢𑁆𑀯𑀁, 𑀅𑀬𑁆𑀬𑁂, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺. 𑀅𑀣 𑀔𑁄 𑀲𑀸 𑀲𑀺𑀓𑁆𑀔𑀫𑀸𑀦𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀲𑀺𑀓𑁆𑀔𑀫𑀸𑀦𑀁 𑁋 𑀲𑀘𑁂 𑀫𑀁 𑀢𑁆𑀯𑀁, 𑀅𑀬𑁆𑀬𑁂, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀁 𑁋 ‘‘𑀲𑀘𑁂 𑀫𑀁 𑀢𑁆𑀯𑀁 𑀅𑀬𑁆𑀬𑁂 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀁 𑁋 ‘‘𑀲𑀘𑁂 𑀫𑀁 𑀢𑁆𑀯𑀁, 𑀅𑀬𑁆𑀬𑁂, 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸, 𑀦𑁂𑀯 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁫𑁫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀺𑀓𑁆𑀔𑀫𑀸𑀦𑀁 𑁋 ‘𑀲𑀘𑁂 𑀫𑀁 𑀢𑁆𑀯𑀁 𑀅𑀬𑁆𑀬𑁂 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀺 𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸, 𑀲𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻 𑀦𑁂𑀯 𑀯𑀼𑀝𑁆𑀞𑀸𑀧𑁂𑀬𑁆𑀬 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁫𑁬. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀲𑀺𑀓𑁆𑀔𑀫𑀸𑀦𑀸 𑀦𑀸𑀫 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀲𑀘𑁂 𑀫𑀁 𑀢𑁆𑀯𑀁 𑀅𑀬𑁆𑀬𑁂 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀺𑀲𑁆𑀲𑀲𑀻𑀢𑀺 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺 𑀉𑀧𑀝𑁆𑀞𑀳𑀺𑀲𑁆𑀲𑀲𑀺.

𑀏𑀯𑀸𑀳𑀁 𑀢𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻𑀢𑀺 𑀏𑀯𑀸𑀳𑀁 𑀢𑀁 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀺.

𑀲𑀸 𑀧𑀘𑁆𑀙𑀸 𑀅𑀦𑀦𑁆𑀢𑀭𑀸𑀬𑀺𑀓𑀺𑀦𑀻𑀢𑀺 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂.

𑀦𑁂𑀯 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀦 𑀲𑀬𑀁 𑀯𑀼𑀝𑁆𑀞𑀸𑀧𑁂𑀬𑁆𑀬.

𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀸𑀢𑀺 𑀦 𑀅𑀜𑁆𑀜𑀁 𑀆𑀡𑀸𑀧𑁂𑀬𑁆𑀬. ‘‘𑀦𑁂𑀯 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀺 𑀦 𑀯𑀼𑀝𑁆𑀞𑀸𑀧𑀦𑀸𑀬 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀥𑀼𑀭𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁧𑁫𑁭. 𑀅𑀦𑀸𑀧𑀢𑁆𑀢𑀺 𑀲𑀢𑀺 𑀅𑀦𑁆𑀢𑀭𑀸𑀬𑁂, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦 𑀮𑀪𑀢𑀺, 𑀕𑀺𑀮𑀸𑀦𑀸𑀬, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁫𑁮. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑀲𑀁𑀲𑀝𑁆𑀞𑀁 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀁 𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 [𑀲𑁄𑀓𑀯𑀲𑁆𑀲𑀁 (𑀲𑀻.) 𑀲𑁄𑀓𑀸𑀯𑀲𑁆𑀲𑀁 (𑀲𑁆𑀬𑀸.)] 𑀘𑀡𑁆𑀟𑀓𑀸𑀴𑀺𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀧𑀼𑀭𑀺𑀲𑀲𑀁𑀲𑀝𑁆𑀞𑀁 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀁 𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 [𑀲𑁄𑀓𑀯𑀲𑁆𑀲𑀁 (𑀲𑀻.) 𑀲𑁄𑀓𑀸𑀯𑀲𑁆𑀲𑀁 (𑀲𑁆𑀬𑀸.)] 𑀘𑀡𑁆𑀟𑀓𑀸𑀴𑀺𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑀲𑀁𑀲𑀝𑁆𑀞𑀁 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀁 𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 [𑀲𑁄𑀓𑀯𑀲𑁆𑀲𑀁 (𑀲𑀻.) 𑀲𑁄𑀓𑀸𑀯𑀲𑁆𑀲𑀁 (𑀲𑁆𑀬𑀸.)] 𑀘𑀡𑁆𑀟𑀓𑀸𑀴𑀺𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀢𑀻𑀢𑀺 [𑀯𑀼𑀝𑁆𑀞𑀸𑀧𑁂𑀲𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑀲𑀁𑀲𑀝𑁆𑀞𑀁 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀁 𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 𑀘𑀡𑁆𑀟𑀓𑀸𑀴𑀺𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁫𑁯. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑀲𑀁𑀲𑀝𑁆𑀞𑀁 𑀓𑀼𑀫𑀸𑀭𑀓𑀲𑀁𑀲𑀝𑁆𑀞𑀁 𑀘𑀡𑁆𑀟𑀺𑀁 𑀲𑁄𑀓𑀸𑀯𑀸𑀲𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁬𑁦. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀼𑀭𑀺𑀲𑁄 𑀦𑀸𑀫 𑀧𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑁄. 𑀓𑀼𑀫𑀸𑀭𑀓𑁄 𑀦𑀸𑀫 𑀅𑀧𑁆𑀧𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑁄. 𑀲𑀁𑀲𑀝𑁆𑀞𑀸 𑀦𑀸𑀫 𑀅𑀦𑀦𑀼𑀮𑁄𑀫𑀺𑀓𑁂𑀦 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀲𑀁𑀲𑀝𑁆𑀞𑀸. 𑀘𑀡𑁆𑀟𑀻 𑀦𑀸𑀫 𑀓𑁄𑀥𑀦𑀸 𑀯𑀼𑀘𑁆𑀘𑀢𑀺.

𑀲𑁄𑀓𑀸𑀯𑀸𑀲𑀸 𑀦𑀸𑀫 𑀧𑀭𑁂𑀲𑀁 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄𑀓𑀁 𑀆𑀯𑀺𑀲𑀢𑀺. 𑀲𑀺𑀓𑁆𑀔𑀫𑀸𑀦𑀸 𑀦𑀸𑀫 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁬𑁧. 𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀻 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁬𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀸𑀫𑀺𑀓𑁂𑀦𑀧𑀺 𑀅𑀦𑀦𑀼𑀜𑁆𑀜𑀸𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀢𑀺. 𑀫𑀸𑀢𑀸𑀧𑀺𑀢𑀭𑁄𑀧𑀺 𑀲𑀸𑀫𑀺𑀓𑁄𑀧𑀺 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀅𑀫𑁆𑀳𑁂𑀳𑀺 𑀅𑀦𑀦𑀼𑀜𑁆𑀜𑀸𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀲𑀸𑀫𑀺𑀓𑀲𑁆𑀲𑀧𑀺 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀸𑀫𑀺𑀓𑁂𑀦𑀧𑀺 𑀅𑀦𑀦𑀼𑀜𑁆𑀜𑀸𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻, 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀸𑀫𑀺𑀓𑁂𑀦𑀧𑀺 𑀅𑀦𑀦𑀼𑀜𑁆𑀜𑀸𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀲𑀸𑀫𑀺𑀓𑁂𑀦𑀧𑀺 𑀅𑀦𑀦𑀼𑀜𑁆𑀜𑀸𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁬𑁩. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀫𑀸𑀢𑀸𑀧𑀺𑀢𑀽𑀳𑀺 𑀯𑀸 𑀲𑀸𑀫𑀺𑀓𑁂𑀦 𑀯𑀸 𑀅𑀦𑀦𑀼𑀜𑁆𑀜𑀸𑀢𑀁 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁬𑁪. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀫𑀸𑀢𑀸𑀧𑀺𑀢𑀭𑁄 𑀦𑀸𑀫 𑀚𑀦𑀓𑀸 𑀯𑀼𑀘𑁆𑀘𑀦𑁆𑀢𑀺. 𑀲𑀸𑀫𑀺𑀓𑁄 𑀦𑀸𑀫 𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀺. 𑀅𑀦𑀦𑀼𑀜𑁆𑀜𑀸𑀢𑀸𑀢𑀺 𑀅𑀦𑀸𑀧𑀼𑀘𑁆𑀙𑀸. 𑀲𑀺𑀓𑁆𑀔𑀫𑀸𑀦𑀸 𑀦𑀸𑀫 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁬𑁫. 𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀻 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀧𑀮𑁄𑀓𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁧𑁧. 𑀏𑀓𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁬𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑁋 ‘‘𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀲𑁆𑀲𑀺𑀢𑁆𑀯𑀸 𑁋 ‘‘𑀦 𑀢𑀸𑀯𑀸𑀳𑀁, 𑀅𑀬𑁆𑀬𑀸, 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀣𑁂𑀭𑁂 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀢𑁆𑀯𑀸 𑀤𑁂𑀯𑀤𑀢𑁆𑀢𑀁 𑀓𑁄𑀓𑀸𑀮𑀺𑀓𑀁 𑀓𑀝𑀫𑁄𑀤𑀓𑀢𑀺𑀲𑁆𑀲𑀓𑀁 𑀔𑀡𑁆𑀟𑀤𑁂𑀯𑀺𑀬𑀸 𑀧𑀼𑀢𑁆𑀢𑀁 𑀲𑀫𑀼𑀤𑁆𑀤𑀤𑀢𑁆𑀢𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀢𑀻𑀢𑀺 [𑀯𑀼𑀝𑁆𑀞𑀸𑀧𑁂𑀲𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁬𑁭. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁬𑁮. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬. 𑀲𑀺𑀓𑁆𑀔𑀫𑀸𑀦𑀸 𑀦𑀸𑀫 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀙𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

𑁧𑁧𑁬𑁯. 𑀅𑀦𑀸𑀧𑀢𑁆𑀢𑀺 𑀅𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀏𑀓𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁧𑁨. 𑀤𑁆𑀯𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁭𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀺, 𑀉𑀧𑀲𑁆𑀲𑀬𑁄 𑀦 𑀲𑀫𑁆𑀫𑀢𑀺. 𑀫𑀦𑀼𑀲𑁆𑀲𑀸 [𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 (𑀲𑀻.)] 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺, 𑀉𑀧𑀲𑁆𑀲𑀬𑁄 𑀦 𑀲𑀫𑁆𑀫𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁭𑁧. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁭𑁨. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀅𑀦𑀼𑀯𑀲𑁆𑀲𑀦𑁆𑀢𑀺 𑀅𑀦𑀼𑀲𑀁𑀯𑀘𑁆𑀙𑀭𑀁. 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

𑁧𑁧𑁭𑁩. 𑀅𑀦𑀸𑀧𑀢𑁆𑀢𑀺 𑀏𑀓𑀦𑁆𑀢𑀭𑀺𑀓𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑁆𑀯𑀸𑀤𑀲𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁧𑁩. 𑀢𑁂𑀭𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁧𑁭𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀉𑀧𑀲𑁆𑀲𑀬𑁄 𑀢𑀣𑁂𑀯 𑀦 𑀲𑀫𑁆𑀫𑀢𑀺. 𑀫𑀦𑀼𑀲𑁆𑀲𑀸 [𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 (𑀲𑀻.)] 𑀢𑀣𑁂𑀯 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀉𑀧𑀲𑁆𑀲𑀬𑁄 𑀢𑀣𑁂𑀯 𑀦 𑀲𑀫𑁆𑀫𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁧𑁧𑁭𑁫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀁 𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁧𑁭𑁬. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀏𑀓𑀁 𑀯𑀲𑁆𑀲𑀦𑁆𑀢𑀺 𑀏𑀓𑀁 𑀲𑀁𑀯𑀘𑁆𑀙𑀭𑀁. 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀤𑁆𑀯𑁂 𑀉𑀧𑀲𑀫𑁆𑀧𑀸𑀤𑁂𑀬𑁆𑀬.

‘‘𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀤𑀼𑀓𑁆𑀓𑀝𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁧𑁧𑁭𑁭. 𑀅𑀦𑀸𑀧𑀢𑁆𑀢𑀺 𑀏𑀓𑀦𑁆𑀢𑀭𑀺𑀓𑀁 𑀏𑀓𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀢𑁂𑀭𑀲𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑀓𑀼𑀫𑀸𑀭𑀻𑀪𑀽𑀢𑀯𑀕𑁆𑀕𑁄 𑀅𑀝𑁆𑀞𑀫𑁄.