𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁

𑁮𑁨𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀦𑀺𑀩𑁆𑀩𑀺𑀝𑁆𑀞𑀭𑀸𑀚𑀪𑀝𑁄 ‘‘𑀢𑀜𑁆𑀜𑁂𑀯 𑀪𑀝𑀧𑀣𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑀺𑀲𑁆𑀲𑀸𑀬 𑀭𑀸𑀚𑀓𑀼𑀮𑀁 𑀕𑀘𑁆𑀙𑀢𑀺. 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻 𑀓𑀝𑀸𑀳𑁂 𑀯𑀘𑁆𑀘𑀁 𑀓𑀢𑁆𑀯𑀸 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀦𑁆𑀢𑀻 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀅𑀲𑁆𑀲𑀫𑀡𑀺𑀬𑁄 𑀇𑀫𑀸 𑀫𑀼𑀡𑁆𑀟𑀸 𑀩𑀦𑁆𑀥𑀓𑀺𑀦𑀺𑀬𑁄. 𑀓𑀣𑀜𑁆𑀳𑀺 𑀦𑀸𑀫 𑀕𑀽𑀣𑀓𑀝𑀸𑀳𑀁 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺𑀲𑁆𑀲𑀦𑁆𑀢𑀺! 𑀇𑀫𑀸𑀲𑀁 𑀉𑀧𑀲𑁆𑀲𑀬𑀁 𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺! 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑁆𑀲𑀬𑀁 𑀧𑀯𑀺𑀲𑀢𑀺. 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀉𑀧𑀲𑁆𑀲𑀬𑀸 𑀦𑀺𑀓𑁆𑀔𑀫𑀦𑁆𑀢𑁄 𑀅𑀤𑁆𑀤𑀲 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑁆𑀲𑀬𑀁 𑀧𑀯𑀺𑀲𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀪𑁄, 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑁆𑀲𑀬𑀁 𑀧𑀯𑀺𑀲𑀲𑀻’’𑀢𑀺? ‘‘𑀇𑀫𑀸 𑀫𑀁, 𑀪𑁄, 𑀫𑀼𑀡𑁆𑀟𑀸 𑀩𑀦𑁆𑀥𑀓𑀺𑀦𑀺𑀬𑁄 𑀕𑀽𑀣𑀓𑀝𑀸𑀳𑀁 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺𑀁𑀲𑀼. 𑀇𑀫𑀸𑀲𑀁 𑀉𑀧𑀲𑁆𑀲𑀬𑀁 𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀕𑀘𑁆𑀙, 𑀪𑁄 𑀩𑁆𑀭𑀸𑀳𑁆𑀫𑀡, 𑀫𑀗𑁆𑀕𑀮𑀁 𑀏𑀢𑀁. 𑀲𑀳𑀲𑁆𑀲𑀁 𑀮𑀘𑁆𑀙𑀲𑀺 𑀢𑀜𑁆𑀘 𑀪𑀝𑀧𑀣’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀲𑀳𑀲𑁆𑀲𑀁 𑀅𑀮𑀢𑁆𑀣 𑀢𑀜𑁆𑀘 𑀪𑀝𑀧𑀣𑀁. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀉𑀧𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀧𑀭𑀺𑀪𑀸𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀁 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀁 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀁 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁨𑁫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀲𑀗𑁆𑀓𑀸𑀭𑀁 𑀯𑀸 𑀯𑀺𑀖𑀸𑀲𑀁 𑀯𑀸 𑀢𑀺𑀭𑁄𑀓𑀼𑀝𑁆𑀝𑁂 𑀯𑀸 𑀢𑀺𑀭𑁄𑀧𑀸𑀓𑀸𑀭𑁂 𑀯𑀸 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁨𑁬. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀉𑀘𑁆𑀘𑀸𑀭𑁄 𑀦𑀸𑀫 𑀕𑀽𑀣𑁄 𑀯𑀼𑀘𑁆𑀘𑀢𑀺. 𑀧𑀲𑁆𑀲𑀸𑀯𑁄 𑀦𑀸𑀫 𑀫𑀼𑀢𑁆𑀢𑀁 𑀯𑀼𑀘𑁆𑀘𑀢𑀺.

𑀲𑀗𑁆𑀓𑀸𑀭𑀁 𑀦𑀸𑀫 𑀓𑀘𑀯𑀭𑀁 𑀯𑀼𑀘𑁆𑀘𑀢𑀺.

𑀯𑀺𑀖𑀸𑀲𑀁 𑀦𑀸𑀫 𑀘𑀮𑀓𑀸𑀦𑀺 𑀯𑀸 𑀅𑀝𑁆𑀞𑀺𑀓𑀸𑀦𑀺 𑀯𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀁 𑀯𑀸.

𑀓𑀼𑀝𑁆𑀝𑁄 𑀦𑀸𑀫 𑀢𑀬𑁄 𑀓𑀼𑀝𑁆𑀝𑀸 𑁋 𑀇𑀝𑁆𑀞𑀓𑀸𑀓𑀼𑀝𑁆𑀝𑁄, 𑀲𑀺𑀮𑀸𑀓𑀼𑀝𑁆𑀝𑁄, 𑀤𑀸𑀭𑀼𑀓𑀼𑀝𑁆𑀝𑁄.

𑀧𑀸𑀓𑀸𑀭𑁄 𑀦𑀸𑀫 𑀢𑀬𑁄 𑀧𑀸𑀓𑀸𑀭𑀸 𑁋 𑀇𑀝𑁆𑀞𑀓𑀸𑀧𑀸𑀓𑀸𑀭𑁄, 𑀲𑀺𑀮𑀸𑀧𑀸𑀓𑀸𑀭𑁄, 𑀤𑀸𑀭𑀼𑀧𑀸𑀓𑀸𑀭𑁄.

𑀢𑀺𑀭𑁄𑀓𑀼𑀝𑁆𑀝𑁂𑀢𑀺 𑀓𑀼𑀝𑁆𑀝𑀲𑁆𑀲 𑀧𑀭𑀢𑁄. 𑀢𑀺𑀭𑁄𑀧𑀸𑀓𑀸𑀭𑁂𑀢𑀺 𑀧𑀸𑀓𑀸𑀭𑀲𑁆𑀲 𑀧𑀭𑀢𑁄.

𑀙𑀟𑁆𑀟𑁂𑀬𑁆𑀬𑀸𑀢𑀺 𑀲𑀬𑀁 𑀙𑀟𑁆𑀟𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀙𑀟𑁆𑀟𑀸𑀧𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀓𑀺𑀁 𑀆𑀡𑀢𑁆𑀢𑀸 𑀩𑀳𑀼𑀓𑀫𑁆𑀧𑀺 𑀙𑀟𑁆𑀟𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁨𑁭. 𑀅𑀦𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀅𑀯𑀴𑀜𑁆𑀚𑁂 𑀙𑀟𑁆𑀟𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.