𑁧. 𑀮𑀲𑀼𑀡𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀁

𑀇𑀫𑁂 𑀔𑁄 𑀧𑀦𑀸𑀬𑁆𑀬𑀸𑀬𑁄 𑀙𑀲𑀝𑁆𑀞𑀺𑀲𑀢𑀸 𑀧𑀸𑀘𑀺𑀢𑁆𑀢𑀺𑀬𑀸

𑀥𑀫𑁆𑀫𑀸 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺.

𑁭𑁯𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀉𑀧𑀸𑀲𑀓𑁂𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀮𑀲𑀼𑀡𑁂𑀦 𑀧𑀯𑀸𑀭𑀺𑀢𑁄 𑀳𑁄𑀢𑀺 𑁋 ‘‘𑀬𑀸𑀲𑀁 𑀅𑀬𑁆𑀬𑀸𑀦𑀁 𑀮𑀲𑀼𑀡𑁂𑀦 𑀅𑀢𑁆𑀣𑁄, 𑀅𑀳𑀁 𑀮𑀲𑀼𑀡𑁂𑀦𑀸’’𑀢𑀺. 𑀔𑁂𑀢𑁆𑀢𑀧𑀸𑀮𑁄 𑀘 𑀆𑀡𑀢𑁆𑀢𑁄 𑀳𑁄𑀢𑀺 𑁋 ‘‘𑀲𑀘𑁂 𑀪𑀺𑀓𑁆𑀔𑀼𑀦𑀺𑀬𑁄 𑀆𑀕𑀘𑁆𑀙𑀦𑁆𑀢𑀺, 𑀏𑀓𑀫𑁂𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑁆𑀯𑁂𑀢𑀬𑁄 𑀪𑀡𑁆𑀟𑀺𑀓𑁂 𑀤𑁂𑀳𑀻’’𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀉𑀲𑁆𑀲𑀯𑁄 𑀳𑁄𑀢𑀺. 𑀬𑀣𑀸𑀪𑀢𑀁 𑀮𑀲𑀼𑀡𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀉𑀧𑀸𑀲𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀲𑀼𑀡𑁂𑀦, 𑀆𑀯𑀼𑀲𑁄, 𑀅𑀢𑁆𑀣𑁄’’𑀢𑀺. ‘‘𑀦𑀢𑁆𑀣𑀸𑀬𑁆𑀬𑁂. 𑀬𑀣𑀸𑀪𑀢𑀁 𑀮𑀲𑀼𑀡𑀁 𑀧𑀭𑀺𑀓𑁆𑀔𑀻𑀡𑀁. 𑀔𑁂𑀢𑁆𑀢𑀁 𑀕𑀘𑁆𑀙𑀣𑀸’’𑀢𑀺. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀮𑀲𑀼𑀡𑀁 𑀳𑀭𑀸𑀧𑁂𑀲𑀺. 𑀔𑁂𑀢𑁆𑀢𑀧𑀸𑀮𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀮𑀲𑀼𑀡𑀁 𑀳𑀭𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑀲𑁆𑀲 𑀔𑁂𑀢𑁆𑀢𑀧𑀸𑀮𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀮𑀲𑀼𑀡𑀁 𑀳𑀭𑀸𑀧𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀮𑀲𑀼𑀡𑀁 𑀳𑀭𑀸𑀧𑁂𑀢𑀻𑀢𑀺 [𑀳𑀭𑀸𑀧𑁂𑀲𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀦 𑀫𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀩𑀳𑀼𑀁 𑀮𑀲𑀼𑀡𑀁 𑀳𑀭𑀸𑀧𑁂𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀚𑀸𑀧𑀢𑀺 𑀅𑀳𑁄𑀲𑀺. 𑀢𑀺𑀲𑁆𑀲𑁄 𑀘 𑀥𑀻𑀢𑀭𑁄 𑁋 𑀦𑀦𑁆𑀤𑀸, 𑀦𑀦𑁆𑀤𑀯𑀢𑀻, 𑀲𑀼𑀦𑁆𑀤𑀭𑀻𑀦𑀦𑁆𑀤𑀸. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀸𑀮𑀗𑁆𑀓𑀢𑁆𑀯𑀸 𑀅𑀜𑁆𑀜𑀢𑀭𑀁 𑀳𑀁𑀲𑀬𑁄𑀦𑀺𑀁 𑀉𑀧𑀧𑀚𑁆𑀚𑀺. 𑀢𑀲𑁆𑀲 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀸 𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀲𑁄 𑀢𑀸𑀲𑀁 𑀏𑀓𑁂𑀓𑀁 𑀧𑀢𑁆𑀢𑀁 𑀤𑁂𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 ‘‘𑀅𑀬𑀁 𑀳𑀁𑀲𑁄 𑀅𑀫𑁆𑀳𑀸𑀓𑀁 𑀏𑀓𑁂𑀓𑀁 𑀧𑀢𑁆𑀢𑀁 𑀤𑁂𑀢𑀻’’𑀢𑀺 𑀢𑀁 𑀳𑀁𑀲𑀭𑀸𑀚𑀁 𑀕𑀳𑁂𑀢𑁆𑀯𑀸 𑀦𑀺𑀧𑁆𑀧𑀢𑁆𑀢𑀁 𑀅𑀓𑀸𑀲𑀺. 𑀢𑀲𑁆𑀲 𑀧𑀼𑀦 𑀚𑀸𑀬𑀫𑀸𑀦𑀸 𑀧𑀢𑁆𑀢𑀸 𑀲𑁂𑀢𑀸 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀢𑀤𑀸𑀧𑀺, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀢𑀺𑀮𑁄𑀪𑁂𑀦 𑀲𑀼𑀯𑀡𑁆𑀡𑀸 𑀧𑀭𑀺𑀳𑀻𑀦𑀸. 𑀇𑀤𑀸𑀦𑀺 𑀮𑀲𑀼𑀡𑀸 𑀧𑀭𑀺𑀳𑀸𑀬𑀺𑀲𑁆𑀲𑀢𑀻’’𑀢𑀺.

[𑀚𑀸. 𑁧.𑁧.𑁧𑁩𑁬 𑀲𑀼𑀯𑀡𑁆𑀡𑀳𑀁𑀲𑀚𑀸𑀢𑀓𑁂𑀧𑀺] ‘‘𑀬𑀁 𑀮𑀤𑁆𑀥𑀁 𑀢𑁂𑀦 𑀢𑀼𑀝𑁆𑀞𑀩𑁆𑀩𑀁, 𑀅𑀢𑀺𑀮𑁄𑀪𑁄 𑀳𑀺 𑀧𑀸𑀧𑀓𑁄;

𑀳𑀁𑀲𑀭𑀸𑀚𑀁 𑀕𑀳𑁂𑀢𑁆𑀯𑀸𑀦, 𑀲𑀼𑀯𑀡𑁆𑀡𑀸 𑀧𑀭𑀺𑀳𑀸𑀬𑀣𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀣𑀼𑀮𑁆𑀮𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁭𑁯𑁪. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀮𑀲𑀼𑀡𑀁 𑀔𑀸𑀤𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁭𑁯𑁫. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀮𑀲𑀼𑀡𑀁 𑀦𑀸𑀫 𑀫𑀸𑀕𑀥𑀓𑀁 𑀯𑀼𑀘𑁆𑀘𑀢𑀺.

‘‘𑀔𑀸𑀤𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀸’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁭𑁯𑁬. 𑀮𑀲𑀼𑀡𑁂 𑀮𑀲𑀼𑀡𑀲𑀜𑁆𑀜𑀸 𑀔𑀸𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀮𑀲𑀼𑀡𑁂 𑀯𑁂𑀫𑀢𑀺𑀓𑀸 𑀔𑀸𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀮𑀲𑀼𑀡𑁂 𑀅𑀮𑀲𑀼𑀡𑀲𑀜𑁆𑀜𑀸 𑀔𑀸𑀤𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀮𑀲𑀼𑀡𑁂 𑀮𑀲𑀼𑀡𑀲𑀜𑁆𑀜𑀸 𑀔𑀸𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀮𑀲𑀼𑀡𑁂 𑀯𑁂𑀫𑀢𑀺𑀓𑀸 𑀔𑀸𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀮𑀲𑀼𑀡𑁂 𑀅𑀮𑀲𑀼𑀡𑀲𑀜𑁆𑀜𑀸 𑀔𑀸𑀤𑀢𑀺, 𑀅𑀦𑀸𑀧𑀢𑁆𑀢𑀺.

𑁭𑁯𑁭. 𑀅𑀦𑀸𑀧𑀢𑁆𑀢𑀺 𑀧𑀮𑀡𑁆𑀟𑀼𑀓𑁂, 𑀪𑀜𑁆𑀚𑀦𑀓𑁂, 𑀳𑀭𑀻𑀢𑀓𑁂, 𑀘𑀸𑀧𑀮𑀲𑀼𑀡𑁂, 𑀲𑀽𑀧𑀲𑀫𑁆𑀧𑀸𑀓𑁂, 𑀫𑀁𑀲𑀲𑀫𑁆𑀧𑀸𑀓𑁂, 𑀢𑁂𑀮𑀲𑀫𑁆𑀧𑀸𑀓𑁂, 𑀲𑀸𑀴𑀯𑁂, 𑀉𑀢𑁆𑀢𑀭𑀺𑀪𑀗𑁆𑀕𑁂, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁭𑁯𑁮. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑁆𑀯𑀸 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀯𑁂𑀲𑀺𑀬𑀸𑀳𑀺 𑀲𑀤𑁆𑀥𑀺𑀁 𑀦𑀕𑁆𑀕𑀸 𑀏𑀓𑀢𑀺𑀢𑁆𑀣𑁂 𑀦𑀳𑀸𑀬𑀦𑁆𑀢𑀺. 𑀯𑁂𑀲𑀺𑀬𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀺𑀦𑀺𑀬𑁄 𑀓𑀸𑀫𑀪𑁄𑀕𑀺𑀦𑀺𑀬𑁄’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑀸𑀲𑀁 𑀯𑁂𑀲𑀺𑀬𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀻𑀦𑀁 𑀔𑀺𑀬𑁆𑀬𑀦𑁆𑀢𑀻𑀦𑀁 𑀯𑀺𑀧𑀸𑀘𑁂𑀦𑁆𑀢𑀻𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁭𑁯𑁯. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀫𑁆𑀩𑀸𑀥𑁂 𑀮𑁄𑀫𑀁 𑀲𑀁𑀳𑀭𑀸𑀧𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁦𑁦. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀲𑀫𑁆𑀩𑀸𑀥𑁄 𑀦𑀸𑀫 𑀉𑀪𑁄 𑀉𑀧𑀓𑀘𑁆𑀙𑀓𑀸, 𑀫𑀼𑀢𑁆𑀢𑀓𑀭𑀡𑀁.

𑀲𑀁𑀳𑀭𑀸𑀧𑁂𑀬𑁆𑀬𑀸𑀢𑀺 𑀏𑀓𑀫𑁆𑀧𑀺 𑀮𑁄𑀫𑀁 𑀲𑀁𑀳𑀭𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀩𑀳𑀼𑀓𑁂𑀧𑀺 𑀮𑁄𑀫𑁂 𑀲𑀁𑀳𑀭𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁦𑁧. 𑀅𑀦𑀸𑀧𑀢𑁆𑀢𑀺 𑀆𑀩𑀸𑀥𑀧𑀘𑁆𑀘𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁮𑁦𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑀸 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀢𑀮𑀖𑀸𑀢𑀓𑀁 𑀓𑀭𑁄𑀦𑁆𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀦 𑀲𑀤𑁆𑀤𑁂𑀦 𑀉𑀧𑀥𑀸𑀯𑀺𑀢𑁆𑀯𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀅𑀬𑁆𑀬𑁂, 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀤𑀼𑀲𑁆𑀲𑀣𑀸’’𑀢𑀺? ‘‘𑀦 𑀫𑀬𑀁, 𑀅𑀬𑁆𑀬𑁂, 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀤𑀼𑀲𑁆𑀲𑀸𑀫𑀸’’𑀢𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀢𑀮𑀖𑀸𑀢𑀓𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀢𑀮𑀖𑀸𑀢𑀓𑀁 𑀓𑀭𑁄𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀢𑀮𑀖𑀸𑀢𑀓𑀁 𑀓𑀭𑀺𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁦𑁩. ‘‘𑀢𑀮𑀖𑀸𑀢𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁦𑁪. 𑀢𑀮𑀖𑀸𑀢𑀓𑀁 𑀦𑀸𑀫 𑀲𑀫𑁆𑀨𑀲𑁆𑀲𑀁 𑀲𑀸𑀤𑀺𑀬𑀦𑁆𑀢𑀻 𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑁂𑀦𑀧𑀺 𑀫𑀼𑀢𑁆𑀢𑀓𑀭𑀡𑁂 𑀧𑀳𑀸𑀭𑀁 𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁦𑁫. 𑀅𑀦𑀸𑀧𑀢𑁆𑀢𑀺 𑀆𑀩𑀸𑀥𑀧𑀘𑁆𑀘𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀢𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁪. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁

𑁮𑁦𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀧𑀼𑀭𑀸𑀡𑀭𑀸𑀚𑁄𑀭𑁄𑀥𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸 [𑀅𑀜𑁆𑀜𑀢𑀭𑁄 𑀧𑀼𑀭𑀸𑀡𑀭𑀸𑀚𑁄𑀭𑁄𑀥𑁄 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑁄 (𑀲𑁆𑀬𑀸.)] 𑀳𑁄𑀢𑀺. 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑀸 𑀬𑁂𑀦 𑀲𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀭𑀸𑀚𑀸 𑀔𑁄, 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀘𑀺𑀭𑀸𑀘𑀺𑀭𑀁 𑀕𑀘𑁆𑀙𑀢𑀺. 𑀓𑀣𑀁 𑀢𑀼𑀫𑁆𑀳𑁂 𑀥𑀸𑀭𑁂𑀣𑀸’’𑀢𑀺? ‘‘𑀚𑀢𑀼𑀫𑀝𑁆𑀞𑀓𑁂𑀦, 𑀅𑀬𑁆𑀬𑁂’’𑀢𑀺. ‘‘𑀓𑀺𑀁 𑀏𑀢𑀁, 𑀅𑀬𑁆𑀬𑁂, 𑀚𑀢𑀼𑀫𑀝𑁆𑀞𑀓’’𑀦𑁆𑀢𑀺? 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀚𑀢𑀼𑀫𑀝𑁆𑀞𑀓𑀁 𑀆𑀘𑀺𑀓𑁆𑀔𑀺. 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀚𑀢𑀼𑀫𑀝𑁆𑀞𑀓𑀁 𑀆𑀤𑀺𑀬𑀺𑀢𑁆𑀯𑀸 𑀥𑁄𑀯𑀺𑀢𑀼𑀁 𑀯𑀺𑀲𑁆𑀲𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀫𑀓𑁆𑀔𑀺𑀓𑀸𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀲𑁆𑀲𑀺𑀤𑀁 𑀓𑀫𑁆𑀫’’𑀦𑁆𑀢𑀺? 𑀲𑀸 𑀏𑀯𑀫𑀸𑀳 𑁋 ‘‘𑀫𑀬𑁆𑀳𑀺𑀤𑀁 𑀓𑀫𑁆𑀫’’𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀚𑀢𑀼𑀫𑀝𑁆𑀞𑀓𑀁 𑀆𑀤𑀺𑀬𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀚𑀢𑀼𑀫𑀝𑁆𑀞𑀓𑀁 𑀆𑀤𑀺𑀬𑀢𑀻𑀢𑀺 [𑀆𑀤𑀺𑀬𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀚𑀢𑀼𑀫𑀝𑁆𑀞𑀓𑀁 𑀆𑀤𑀺𑀬𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁦𑁭. ‘‘𑀚𑀢𑀼𑀫𑀝𑁆𑀞𑀓𑁂 [𑀚𑀢𑀼𑀫𑀝𑁆𑀝𑀓𑁂 (𑀲𑀻.)] 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁦𑁮. 𑀚𑀢𑀼𑀫𑀝𑁆𑀞𑀓𑀁 𑀦𑀸𑀫 𑀚𑀢𑀼𑀫𑀬𑀁 𑀓𑀝𑁆𑀞𑀫𑀬𑀁 𑀧𑀺𑀝𑁆𑀞𑀫𑀬𑀁 𑀫𑀢𑁆𑀢𑀺𑀓𑀸𑀫𑀬𑀁.

𑀆𑀤𑀺𑀬𑁂𑀬𑁆𑀬𑀸𑀢𑀺 𑀲𑀫𑁆𑀨𑀲𑁆𑀲𑀁 𑀲𑀸𑀤𑀺𑀬𑀦𑁆𑀢𑀻 𑀅𑀦𑁆𑀢𑀫𑀲𑁄 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀫𑀼𑀢𑁆𑀢𑀓𑀭𑀡𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁦𑁯. 𑀅𑀦𑀸𑀧𑀢𑁆𑀢𑀺 𑀆𑀩𑀸𑀥𑀧𑀘𑁆𑀘𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁

𑁮𑁧𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀅𑀥𑁄𑀯𑀸𑀢𑁂 𑀅𑀝𑁆𑀞𑀸𑀲𑀺 𑁋 ‘‘𑀤𑀼𑀕𑁆𑀕𑀦𑁆𑀥𑁄, 𑀪𑀕𑀯𑀸, 𑀫𑀸𑀢𑀼𑀕𑀸𑀫𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑁋 ‘‘𑀆𑀤𑀺𑀬𑀦𑁆𑀢𑀼 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑀓𑀲𑀼𑀤𑁆𑀥𑀺𑀓’’𑀦𑁆𑀢𑀺, 𑀫𑀳𑀸𑀧𑀚𑀸𑀧𑀢𑀺𑀁 𑀕𑁄𑀢𑀫𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀦𑀁 𑀉𑀤𑀓𑀲𑀼𑀤𑁆𑀥𑀺𑀓’’𑀦𑁆𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻 𑁋 ‘‘𑀪𑀕𑀯𑀢𑀸 𑀉𑀤𑀓𑀲𑀼𑀤𑁆𑀥𑀺𑀓𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀦𑁆𑀢𑀻 𑀫𑀼𑀢𑁆𑀢𑀓𑀭𑀡𑁂 𑀯𑀡𑀁 𑀅𑀓𑀸𑀲𑀺. 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀺𑀲𑁆𑀲𑀢𑀻𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀢𑀻’’𑀢𑀺 [𑀆𑀤𑀺𑀬𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀅𑀢𑀺𑀕𑀫𑁆𑀪𑀻𑀭𑀁 𑀉𑀤𑀓𑀲𑀼𑀤𑁆𑀥𑀺𑀓𑀁 𑀆𑀤𑀺𑀬𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁧𑁧. ‘‘𑀉𑀤𑀓𑀲𑀼𑀤𑁆𑀥𑀺𑀓𑀁 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀆𑀤𑀺𑀬𑀫𑀸𑀦𑀸𑀬 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀸𑀢𑀩𑁆𑀩𑀁. 𑀢𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁧𑁨. 𑀉𑀤𑀓𑀲𑀼𑀤𑁆𑀥𑀺𑀓𑀁 𑀦𑀸𑀫 𑀫𑀼𑀢𑁆𑀢𑀓𑀭𑀡𑀲𑁆𑀲 𑀥𑁄𑀯𑀦𑀸 𑀯𑀼𑀘𑁆𑀘𑀢𑀺.

𑀆𑀤𑀺𑀬𑀫𑀸𑀦𑀸𑀬𑀸𑀢𑀺 𑀥𑁄𑀯𑀦𑁆𑀢𑀺𑀬𑀸.

𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀸𑀢𑀩𑁆𑀩𑀦𑁆𑀢𑀺 𑀤𑁆𑀯𑀻𑀲𑀼 𑀅𑀗𑁆𑀕𑀼𑀮𑁂𑀲𑀼 𑀤𑁆𑀯𑁂 𑀧𑀩𑁆𑀩𑀧𑀭𑀫𑀸 𑀆𑀤𑀸𑀢𑀩𑁆𑀩𑀸.

𑀢𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸𑀢𑀺 𑀲𑀫𑁆𑀨𑀲𑁆𑀲𑀁 𑀲𑀸𑀤𑀺𑀬𑀦𑁆𑀢𑀻 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁧𑁩. 𑀅𑀢𑀺𑀭𑁂𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀅𑀢𑀺𑀭𑁂𑀓𑀲𑀜𑁆𑀜𑀸 𑀆𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀢𑀺𑀭𑁂𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀯𑁂𑀫𑀢𑀺𑀓𑀸 𑀆𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀢𑀺𑀭𑁂𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀊𑀦𑀓𑀲𑀜𑁆𑀜𑀸 𑀆𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀊𑀦𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀅𑀢𑀺𑀭𑁂𑀓𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀊𑀦𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑁂 𑀊𑀦𑀓𑀲𑀜𑁆𑀜𑀸, 𑀅𑀦𑀸𑀧𑀢𑁆𑀢𑀺.

𑁮𑁧𑁪. 𑀅𑀦𑀸𑀧𑀢𑁆𑀢𑀺 𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀺𑀬𑀢𑀺, 𑀊𑀦𑀓𑀤𑁆𑀯𑀗𑁆𑀕𑀼𑀮𑀧𑀩𑁆𑀩𑀧𑀭𑀫𑀁 𑀆𑀤𑀺𑀬𑀢𑀺, 𑀆𑀩𑀸𑀥𑀧𑀘𑁆𑀘𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁

𑁮𑁧𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀭𑁄𑀳𑀦𑁆𑀢𑁄 𑀦𑀸𑀫 𑀫𑀳𑀸𑀫𑀢𑁆𑀢𑁄 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺. 𑀢𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸 𑀳𑁄𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀺𑀓𑁂 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀓𑀭𑁄𑀢𑀺. 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀦𑀻𑀬𑁂𑀦 𑀘 𑀯𑀺𑀥𑀽𑀧𑀦𑁂𑀦 𑀘 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀅𑀘𑁆𑀘𑀸𑀯𑀤𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀅𑀧𑀲𑀸𑀤𑁂𑀢𑀺 𑁋 ‘‘𑀫𑀸, 𑀪𑀕𑀺𑀦𑀺, 𑀏𑀯𑀭𑀽𑀧𑀁 𑀅𑀓𑀸𑀲𑀺. 𑀦𑁂𑀢𑀁 𑀓𑀧𑁆𑀧𑀢𑀻’’𑀢𑀺. ‘‘𑀧𑀼𑀩𑁆𑀩𑁂 𑀫𑀁 𑀢𑁆𑀯𑀁 𑀏𑀯𑀜𑁆𑀘 𑀏𑀯𑀜𑁆𑀘 𑀓𑀭𑁄𑀲𑀺, 𑀇𑀤𑀸𑀦𑀺 𑀏𑀢𑁆𑀢𑀓𑀁 𑀦 𑀲𑀳𑀲𑀻’’𑀢𑀺 𑁋 𑀧𑀸𑀦𑀻𑀬𑀣𑀸𑀮𑀓𑀁 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺𑀢𑁆𑀯𑀸 𑀯𑀺𑀥𑀽𑀧𑀦𑁂𑀦 𑀧𑀳𑀸𑀭𑀁 𑀅𑀤𑀸𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀲𑁆𑀲 𑀧𑀳𑀸𑀭𑀁 𑀤𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀲𑁆𑀲 𑀧𑀳𑀸𑀭𑀁 𑀅𑀤𑀸𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀲𑁆𑀲 𑀧𑀳𑀸𑀭𑀁 𑀤𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁧𑁬. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁧𑁭. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲.

𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀢𑀺 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲.

𑀧𑀸𑀦𑀻𑀬𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀧𑀸𑀦𑀻𑀬𑀁.

𑀯𑀺𑀥𑀽𑀧𑀦𑀁 𑀦𑀸𑀫 𑀬𑀸 𑀓𑀸𑀘𑀺 𑀩𑀻𑀚𑀦𑀻.

𑀉𑀧𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀳𑀢𑁆𑀣𑀧𑀸𑀲𑁂 𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁧𑁮. 𑀉𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀧𑀲𑀫𑁆𑀧𑀦𑁆𑀦𑁂 𑀯𑁂𑀫𑀢𑀺𑀓𑀸 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀉𑀧𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀔𑀸𑀤𑀦𑀻𑀬𑀁 𑀔𑀸𑀤𑀦𑁆𑀢𑀲𑁆𑀲 𑀉𑀧𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀉𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁮𑁧𑁯. 𑀅𑀦𑀸𑀧𑀢𑁆𑀢𑀺 𑀤𑁂𑀢𑀺, 𑀤𑀸𑀧𑁂𑀢𑀺, 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀆𑀡𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁

𑁮𑁨𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀲𑀲𑁆𑀲𑀓𑀸𑀮𑁂 𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀦𑀕𑀭𑀁 𑀅𑀢𑀺𑀳𑀭𑀦𑁆𑀢𑀺 𑀤𑁆𑀯𑀸𑀭𑀝𑁆𑀞𑀸𑀦𑁂 𑁋 ‘‘𑀤𑁂𑀣𑀸𑀬𑁆𑀬𑁂, 𑀪𑀸𑀕’’𑀦𑁆𑀢𑀺. 𑀧𑀮𑀺𑀩𑀼𑀦𑁆𑀥𑁂𑀢𑁆𑀯𑀸 𑀫𑀼𑀜𑁆𑀘𑀺𑀁𑀲𑀼. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁨𑁧. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀆𑀫𑀓𑀥𑀜𑁆𑀜𑀁 𑀯𑀺𑀜𑁆𑀜𑀢𑁆𑀯𑀸 𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀸 𑀪𑀚𑁆𑀚𑀺𑀢𑁆𑀯𑀸 𑀯𑀸 𑀪𑀚𑁆𑀚𑀸𑀧𑁂𑀢𑁆𑀯𑀸 𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀯𑀸 𑀓𑁄𑀝𑁆𑀝𑀸𑀧𑁂𑀢𑁆𑀯𑀸 𑀯𑀸 𑀧𑀘𑀺𑀢𑁆𑀯𑀸 𑀯𑀸 𑀧𑀘𑀸𑀧𑁂𑀢𑁆𑀯𑀸 𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁨𑁨. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀆𑀫𑀓𑀥𑀜𑁆𑀜𑀁 𑀦𑀸𑀫 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀕𑁄𑀥𑀼𑀫𑁄 𑀓𑀗𑁆𑀕𑀼 𑀯𑀭𑀓𑁄 𑀓𑀼𑀤𑁆𑀭𑀼𑀲𑀓𑁄.

𑀯𑀺𑀜𑁆𑀜𑀢𑁆𑀯𑀸𑀢𑀺 𑀲𑀬𑀁 𑀯𑀺𑀜𑁆𑀜𑀢𑁆𑀯𑀸. 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸.

𑀪𑀚𑁆𑀚𑀺𑀢𑁆𑀯𑀸𑀢𑀺 𑀲𑀬𑀁 𑀪𑀚𑁆𑀚𑀺𑀢𑁆𑀯𑀸. 𑀪𑀚𑁆𑀚𑀸𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀁 𑀪𑀚𑁆𑀚𑀸𑀧𑁂𑀢𑁆𑀯𑀸.

𑀓𑁄𑀝𑁆𑀝𑁂𑀢𑁆𑀯𑀸𑀢𑀺 𑀲𑀬𑀁 𑀓𑁄𑀝𑁆𑀝𑁂𑀢𑁆𑀯𑀸. 𑀓𑁄𑀝𑁆𑀝𑀸𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀁 𑀓𑁄𑀝𑁆𑀝𑀸𑀧𑁂𑀢𑁆𑀯𑀸.

𑀧𑀘𑀺𑀢𑁆𑀯𑀸𑀢𑀺 𑀲𑀬𑀁 𑀧𑀘𑀺𑀢𑁆𑀯𑀸. 𑀧𑀘𑀸𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀁 𑀧𑀘𑀸𑀧𑁂𑀢𑁆𑀯𑀸.

‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁨𑁩. 𑀅𑀦𑀸𑀧𑀢𑁆𑀢𑀺 𑀆𑀩𑀸𑀥𑀧𑀘𑁆𑀘𑀬𑀸, 𑀅𑀧𑀭𑀡𑁆𑀡𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁

𑁮𑁨𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀦𑀺𑀩𑁆𑀩𑀺𑀝𑁆𑀞𑀭𑀸𑀚𑀪𑀝𑁄 ‘‘𑀢𑀜𑁆𑀜𑁂𑀯 𑀪𑀝𑀧𑀣𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀦𑀺𑀲𑁆𑀲𑀸𑀬 𑀭𑀸𑀚𑀓𑀼𑀮𑀁 𑀕𑀘𑁆𑀙𑀢𑀺. 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻 𑀓𑀝𑀸𑀳𑁂 𑀯𑀘𑁆𑀘𑀁 𑀓𑀢𑁆𑀯𑀸 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀦𑁆𑀢𑀻 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀅𑀲𑁆𑀲𑀫𑀡𑀺𑀬𑁄 𑀇𑀫𑀸 𑀫𑀼𑀡𑁆𑀟𑀸 𑀩𑀦𑁆𑀥𑀓𑀺𑀦𑀺𑀬𑁄. 𑀓𑀣𑀜𑁆𑀳𑀺 𑀦𑀸𑀫 𑀕𑀽𑀣𑀓𑀝𑀸𑀳𑀁 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺𑀲𑁆𑀲𑀦𑁆𑀢𑀺! 𑀇𑀫𑀸𑀲𑀁 𑀉𑀧𑀲𑁆𑀲𑀬𑀁 𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺! 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑁆𑀲𑀬𑀁 𑀧𑀯𑀺𑀲𑀢𑀺. 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀉𑀧𑀲𑁆𑀲𑀬𑀸 𑀦𑀺𑀓𑁆𑀔𑀫𑀦𑁆𑀢𑁄 𑀅𑀤𑁆𑀤𑀲 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑁆𑀲𑀬𑀁 𑀧𑀯𑀺𑀲𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀪𑁄, 𑀉𑀫𑁆𑀫𑀼𑀓𑀁 𑀕𑀳𑁂𑀢𑁆𑀯𑀸 𑀉𑀧𑀲𑁆𑀲𑀬𑀁 𑀧𑀯𑀺𑀲𑀲𑀻’’𑀢𑀺? ‘‘𑀇𑀫𑀸 𑀫𑀁, 𑀪𑁄, 𑀫𑀼𑀡𑁆𑀟𑀸 𑀩𑀦𑁆𑀥𑀓𑀺𑀦𑀺𑀬𑁄 𑀕𑀽𑀣𑀓𑀝𑀸𑀳𑀁 𑀫𑀢𑁆𑀣𑀓𑁂 𑀆𑀲𑀼𑀫𑁆𑀪𑀺𑀁𑀲𑀼. 𑀇𑀫𑀸𑀲𑀁 𑀉𑀧𑀲𑁆𑀲𑀬𑀁 𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺. ‘‘𑀕𑀘𑁆𑀙, 𑀪𑁄 𑀩𑁆𑀭𑀸𑀳𑁆𑀫𑀡, 𑀫𑀗𑁆𑀕𑀮𑀁 𑀏𑀢𑀁. 𑀲𑀳𑀲𑁆𑀲𑀁 𑀮𑀘𑁆𑀙𑀲𑀺 𑀢𑀜𑁆𑀘 𑀪𑀝𑀧𑀣’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 𑀲𑀳𑀲𑁆𑀲𑀁 𑀅𑀮𑀢𑁆𑀣 𑀢𑀜𑁆𑀘 𑀪𑀝𑀧𑀣𑀁. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀉𑀧𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀧𑀭𑀺𑀪𑀸𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀁 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀁 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀁 𑀢𑀺𑀭𑁄𑀓𑀼𑀝𑁆𑀝𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁨𑁫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀲𑀗𑁆𑀓𑀸𑀭𑀁 𑀯𑀸 𑀯𑀺𑀖𑀸𑀲𑀁 𑀯𑀸 𑀢𑀺𑀭𑁄𑀓𑀼𑀝𑁆𑀝𑁂 𑀯𑀸 𑀢𑀺𑀭𑁄𑀧𑀸𑀓𑀸𑀭𑁂 𑀯𑀸 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁨𑁬. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀉𑀘𑁆𑀘𑀸𑀭𑁄 𑀦𑀸𑀫 𑀕𑀽𑀣𑁄 𑀯𑀼𑀘𑁆𑀘𑀢𑀺. 𑀧𑀲𑁆𑀲𑀸𑀯𑁄 𑀦𑀸𑀫 𑀫𑀼𑀢𑁆𑀢𑀁 𑀯𑀼𑀘𑁆𑀘𑀢𑀺.

𑀲𑀗𑁆𑀓𑀸𑀭𑀁 𑀦𑀸𑀫 𑀓𑀘𑀯𑀭𑀁 𑀯𑀼𑀘𑁆𑀘𑀢𑀺.

𑀯𑀺𑀖𑀸𑀲𑀁 𑀦𑀸𑀫 𑀘𑀮𑀓𑀸𑀦𑀺 𑀯𑀸 𑀅𑀝𑁆𑀞𑀺𑀓𑀸𑀦𑀺 𑀯𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀁 𑀯𑀸.

𑀓𑀼𑀝𑁆𑀝𑁄 𑀦𑀸𑀫 𑀢𑀬𑁄 𑀓𑀼𑀝𑁆𑀝𑀸 𑁋 𑀇𑀝𑁆𑀞𑀓𑀸𑀓𑀼𑀝𑁆𑀝𑁄, 𑀲𑀺𑀮𑀸𑀓𑀼𑀝𑁆𑀝𑁄, 𑀤𑀸𑀭𑀼𑀓𑀼𑀝𑁆𑀝𑁄.

𑀧𑀸𑀓𑀸𑀭𑁄 𑀦𑀸𑀫 𑀢𑀬𑁄 𑀧𑀸𑀓𑀸𑀭𑀸 𑁋 𑀇𑀝𑁆𑀞𑀓𑀸𑀧𑀸𑀓𑀸𑀭𑁄, 𑀲𑀺𑀮𑀸𑀧𑀸𑀓𑀸𑀭𑁄, 𑀤𑀸𑀭𑀼𑀧𑀸𑀓𑀸𑀭𑁄.

𑀢𑀺𑀭𑁄𑀓𑀼𑀝𑁆𑀝𑁂𑀢𑀺 𑀓𑀼𑀝𑁆𑀝𑀲𑁆𑀲 𑀧𑀭𑀢𑁄. 𑀢𑀺𑀭𑁄𑀧𑀸𑀓𑀸𑀭𑁂𑀢𑀺 𑀧𑀸𑀓𑀸𑀭𑀲𑁆𑀲 𑀧𑀭𑀢𑁄.

𑀙𑀟𑁆𑀟𑁂𑀬𑁆𑀬𑀸𑀢𑀺 𑀲𑀬𑀁 𑀙𑀟𑁆𑀟𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀙𑀟𑁆𑀟𑀸𑀧𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀓𑀺𑀁 𑀆𑀡𑀢𑁆𑀢𑀸 𑀩𑀳𑀼𑀓𑀫𑁆𑀧𑀺 𑀙𑀟𑁆𑀟𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁨𑁭. 𑀅𑀦𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀅𑀯𑀴𑀜𑁆𑀚𑁂 𑀙𑀟𑁆𑀟𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀁

𑁮𑁨𑁮. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀺𑀓𑁆𑀔𑀼𑀦𑀽𑀧𑀲𑁆𑀲𑀬𑀁 𑀦𑀺𑀲𑁆𑀲𑀸𑀬 𑀬𑀯𑀔𑁂𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀲𑀗𑁆𑀓𑀸𑀭𑀫𑁆𑀧𑀺 𑀯𑀺𑀖𑀸𑀲𑀫𑁆𑀧𑀺 𑀔𑁂𑀢𑁆𑀢𑁂 𑀙𑀟𑁆𑀟𑁂𑀦𑁆𑀢𑀺. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀅𑀫𑁆𑀳𑀸𑀓𑀁 𑀬𑀯𑀔𑁂𑀢𑁆𑀢𑀁 𑀤𑀽𑀲𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀲𑀗𑁆𑀓𑀸𑀭𑀫𑁆𑀧𑀺 𑀯𑀺𑀖𑀸𑀲𑀫𑁆𑀧𑀺 𑀳𑀭𑀺𑀢𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀲𑀗𑁆𑀓𑀸𑀭𑀫𑁆𑀧𑀺 𑀯𑀺𑀖𑀸𑀲𑀫𑁆𑀧𑀺 𑀳𑀭𑀺𑀢𑁂 𑀙𑀟𑁆𑀟𑁂𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀉𑀘𑁆𑀘𑀸𑀭𑀫𑁆𑀧𑀺 𑀧𑀲𑁆𑀲𑀸𑀯𑀫𑁆𑀧𑀺 𑀲𑀗𑁆𑀓𑀸𑀭𑀫𑁆𑀧𑀺 𑀯𑀺𑀖𑀸𑀲𑀫𑁆𑀧𑀺 𑀳𑀭𑀺𑀢𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁨𑁯. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀲𑀗𑁆𑀓𑀸𑀭𑀁 𑀯𑀸 𑀯𑀺𑀖𑀸𑀲𑀁 𑀯𑀸 𑀳𑀭𑀺𑀢𑁂 𑀙𑀟𑁆𑀟𑁂𑀬𑁆𑀬 𑀯𑀸 𑀙𑀟𑁆𑀟𑀸𑀧𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁩𑁦. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀉𑀘𑁆𑀘𑀸𑀭𑁄 𑀦𑀸𑀫 𑀕𑀽𑀣𑁄 𑀯𑀼𑀘𑁆𑀘𑀢𑀺. 𑀧𑀲𑁆𑀲𑀸𑀯𑁄 𑀦𑀸𑀫 𑀫𑀼𑀢𑁆𑀢𑀁 𑀯𑀼𑀘𑁆𑀘𑀢𑀺.

𑀲𑀗𑁆𑀓𑀸𑀭𑀁 𑀦𑀸𑀫 𑀓𑀘𑀯𑀭𑀁 𑀯𑀼𑀘𑁆𑀘𑀢𑀺.

𑀯𑀺𑀖𑀸𑀲𑀁 𑀦𑀸𑀫 𑀘𑀮𑀓𑀸𑀦𑀺 𑀯𑀸 𑀅𑀝𑁆𑀞𑀺𑀓𑀸𑀦𑀺 𑀯𑀸 𑀉𑀘𑁆𑀙𑀺𑀝𑁆𑀞𑁄𑀤𑀓𑀁 𑀯𑀸.

𑀳𑀭𑀺𑀢𑀁 𑀦𑀸𑀫 𑀧𑀼𑀩𑁆𑀩𑀡𑁆𑀡𑀁 𑀅𑀧𑀭𑀡𑁆𑀡𑀁 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀭𑁄𑀧𑀺𑀫𑀁.

𑀙𑀟𑁆𑀟𑁂𑀬𑁆𑀬𑀸𑀢𑀺 𑀲𑀬𑀁 𑀙𑀟𑁆𑀟𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀙𑀟𑁆𑀟𑀸𑀧𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀓𑀺𑀁 𑀆𑀡𑀢𑁆𑀢𑀸 𑀩𑀳𑀼𑀓𑀫𑁆𑀧𑀺 𑀙𑀟𑁆𑀟𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁩𑁧. 𑀳𑀭𑀺𑀢𑁂 𑀳𑀭𑀺𑀢𑀲𑀜𑁆𑀜𑀸 𑀙𑀟𑁆𑀟𑁂𑀢𑀺 𑀯𑀸 𑀙𑀟𑁆𑀟𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀳𑀭𑀺𑀢𑁂 𑀯𑁂𑀫𑀢𑀺𑀓𑀸 𑀙𑀟𑁆𑀟𑁂𑀢𑀺 𑀯𑀸 𑀙𑀟𑁆𑀟𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀳𑀭𑀺𑀢𑁂 𑀅𑀳𑀭𑀺𑀢𑀲𑀜𑁆𑀜𑀸 𑀙𑀟𑁆𑀟𑁂𑀢𑀺 𑀯𑀸 𑀙𑀟𑁆𑀟𑀸𑀧𑁂𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀳𑀭𑀺𑀢𑁂 𑀳𑀭𑀺𑀢𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀳𑀭𑀺𑀢𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀳𑀭𑀺𑀢𑁂 𑀅𑀳𑀭𑀺𑀢𑀲𑀜𑁆𑀜𑀸, 𑀅𑀦𑀸𑀧𑀢𑁆𑀢𑀺.

𑁮𑁩𑁨. 𑀅𑀦𑀸𑀧𑀢𑁆𑀢𑀺 𑀑𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀔𑁂𑀢𑁆𑀢𑀫𑀭𑀺𑀬𑀸𑀤𑁂 [𑀙𑀟𑁆𑀟𑀺𑀢𑀔𑁂𑀢𑁆𑀢𑁂 (?) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀙𑀟𑁆𑀟𑁂𑀢𑀺 𑀲𑀸𑀫𑀺𑀓𑁂 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀧𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀦𑀯𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁮𑁩𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀕𑀺𑀭𑀕𑁆𑀕𑀲𑀫𑀚𑁆𑀚𑁄 𑀳𑁄𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀕𑀺𑀭𑀕𑁆𑀕𑀲𑀫𑀚𑁆𑀚𑀁 𑀤𑀲𑁆𑀲𑀦𑀸𑀬 𑀅𑀕𑀫𑀁𑀲𑀼. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀦𑀘𑁆𑀘𑀫𑁆𑀧𑀺 𑀕𑀻𑀢𑀫𑁆𑀧𑀺 𑀯𑀸𑀤𑀺𑀢𑀫𑁆𑀧𑀺 𑀤𑀲𑁆𑀲𑀦𑀸𑀬 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀺𑀦𑀺𑀬𑁄 𑀓𑀸𑀫𑀪𑁄𑀕𑀺𑀦𑀺𑀬𑁄’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀘𑁆𑀘𑀫𑁆𑀧𑀺 𑀕𑀻𑀢𑀫𑁆𑀧𑀺 𑀯𑀸𑀤𑀺𑀢𑀫𑁆𑀧𑀺 𑀤𑀲𑁆𑀲𑀦𑀸𑀬 𑀕𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀘𑁆𑀘𑀫𑁆𑀧𑀺 𑀕𑀻𑀢𑀫𑁆𑀧𑀺 𑀯𑀸𑀤𑀺𑀢𑀫𑁆𑀧𑀺 𑀤𑀲𑁆𑀲𑀦𑀸𑀬 𑀕𑀘𑁆𑀙𑀦𑁆𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀘𑁆𑀘𑀫𑁆𑀧𑀺 𑀕𑀻𑀢𑀫𑁆𑀧𑀺 𑀯𑀸𑀤𑀺𑀢𑀫𑁆𑀧𑀺 𑀤𑀲𑁆𑀲𑀦𑀸𑀬 𑀕𑀘𑁆𑀙𑀺𑀲𑁆𑀲𑀦𑁆𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁮𑁩𑁪. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁮𑁩𑁫. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀦𑀘𑁆𑀘𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀦𑀘𑁆𑀘𑀁. 𑀕𑀻𑀢𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀕𑀻𑀢𑀁. 𑀯𑀸𑀤𑀺𑀢𑀁 𑀦𑀸𑀫 𑀬𑀁 𑀓𑀺𑀜𑁆𑀘𑀺 𑀯𑀸𑀤𑀺𑀢𑀁.

𑁮𑁩𑁬. 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀬𑀢𑁆𑀣 𑀞𑀺𑀢𑀸 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀏𑀓𑀫𑁂𑀓𑀁 𑀤𑀲𑁆𑀲𑀦𑀸𑀬 𑀕𑀘𑁆𑀙𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀬𑀢𑁆𑀣 𑀞𑀺𑀢𑀸 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀺𑀚𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁮𑁩𑁭. 𑀅𑀦𑀸𑀧𑀢𑁆𑀢𑀺 𑀆𑀭𑀸𑀫𑁂 𑀞𑀺𑀢𑀸 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀪𑀺𑀓𑁆𑀔𑀼𑀦𑀺𑀬𑀸 𑀞𑀺𑀢𑁄𑀓𑀸𑀲𑀁 𑀯𑀸 𑀦𑀺𑀲𑀺𑀦𑁆𑀦𑁄𑀓𑀸𑀲𑀁 𑀯𑀸 𑀦𑀺𑀧𑀦𑁆𑀦𑁄𑀓𑀸𑀲𑀁 𑀯𑀸 𑀆𑀕𑀦𑁆𑀢𑁆𑀯𑀸 𑀦𑀘𑁆𑀘𑀦𑁆𑀢𑀺 𑀯𑀸 𑀕𑀸𑀬𑀦𑁆𑀢𑀺 𑀯𑀸 𑀯𑀸𑀤𑁂𑀦𑁆𑀢𑀺 𑀯𑀸, 𑀧𑀝𑀺𑀧𑀣𑀁 𑀕𑀘𑁆𑀙𑀦𑁆𑀢𑀻 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀲𑀢𑀺 𑀓𑀭𑀡𑀻𑀬𑁂 𑀕𑀦𑁆𑀢𑁆𑀯𑀸 𑀧𑀲𑁆𑀲𑀢𑀺 𑀯𑀸 𑀲𑀼𑀡𑀸𑀢𑀺 𑀯𑀸, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀲𑀫𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑀮𑀲𑀼𑀡𑀯𑀕𑁆𑀕𑁄 𑀧𑀞𑀫𑁄.