𑁧𑁦. 𑀤𑀲𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁨𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻𑀲𑀗𑁆𑀖𑁂𑀦 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀸𑀘𑀸𑀭𑀸 𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀢𑀸 𑀲𑀗𑁆𑀖𑁄 𑀦 𑀓𑀺𑀜𑁆𑀘𑀺 𑀆𑀳. 𑀢𑀼𑀫𑁆𑀳𑀜𑁆𑀜𑁂𑀯 [𑀢𑀼𑀫𑁆𑀳𑁂𑀬𑁂𑀯 (𑀲𑁆𑀬𑀸.)] 𑀲𑀗𑁆𑀖𑁄 𑀉𑀜𑁆𑀜𑀸𑀬 𑀧𑀭𑀺𑀪𑀯𑁂𑀦 𑀅𑀓𑁆𑀔𑀦𑁆𑀢𑀺𑀬𑀸 𑀯𑁂𑀪𑀲𑁆𑀲𑀺𑀬𑀸 [𑀯𑁂𑀪𑀲𑁆𑀲𑀸 (𑀲𑀻. 𑀲𑁆𑀬𑀸.)] 𑀤𑀼𑀩𑁆𑀩𑀮𑁆𑀬𑀸 𑀏𑀯𑀫𑀸𑀳 𑁋 ‘𑀪𑀕𑀺𑀦𑀺𑀬𑁄 𑀔𑁄 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀺 𑀧𑀸𑀧𑀸𑀘𑀸𑀭𑀸 𑀧𑀸𑀧𑀲𑀤𑁆𑀤𑀸 𑀧𑀸𑀧𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’’’𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑁂𑀦 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀓𑁆𑀔𑀢𑀺 𑁋 𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑁂𑀦 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀤𑁂𑀢𑀺 𑁋 𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀸𑀘𑀸𑀭𑀸 𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀢𑀸 𑀲𑀗𑁆𑀖𑁄 𑀦 𑀓𑀺𑀜𑁆𑀘𑀺 𑀆𑀳. 𑀢𑀼𑀫𑁆𑀳𑀜𑁆𑀜𑁂𑀯 𑀲𑀗𑁆𑀖𑁄 𑀉𑀜𑁆𑀜𑀸𑀬 𑀧𑀭𑀺𑀪𑀯𑁂𑀦 𑀅𑀓𑁆𑀔𑀦𑁆𑀢𑀺𑀬𑀸 𑀯𑁂𑀪𑀲𑁆𑀲𑀺𑀬𑀸 𑀤𑀼𑀩𑁆𑀩𑀮𑁆𑀬𑀸 𑀏𑀯𑀫𑀸𑀳 𑁋 𑀪𑀕𑀺𑀦𑀺𑀬𑁄 𑀔𑁄 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀺 𑀧𑀸𑀧𑀸𑀘𑀸𑀭𑀸 𑀧𑀸𑀧𑀲𑀤𑁆𑀤𑀸 𑀧𑀸𑀧𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑁂𑀦 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀓𑁆𑀔𑀢𑀺 𑁋 𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁭𑁨𑁮. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀸𑀘𑀸𑀭𑀸 𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀢𑀸 𑀲𑀗𑁆𑀖𑁄 𑀦 𑀓𑀺𑀜𑁆𑀘𑀺 𑀆𑀳. 𑀢𑀼𑀫𑁆𑀳𑀜𑁆𑀜𑁂𑀯 𑀲𑀗𑁆𑀖𑁄 𑀉𑀜𑁆𑀜𑀸𑀬 𑀧𑀭𑀺𑀪𑀯𑁂𑀦 𑀅𑀓𑁆𑀔𑀦𑁆𑀢𑀺𑀬𑀸 𑀯𑁂𑀪𑀲𑁆𑀲𑀺𑀬𑀸 𑀤𑀼𑀩𑁆𑀩𑀮𑁆𑀬𑀸 𑀏𑀯𑀫𑀸𑀳 𑁋 𑀪𑀕𑀺𑀦𑀺𑀬𑁄 𑀔𑁄 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀺 𑀧𑀸𑀧𑀸𑀘𑀸𑀭𑀸 𑀧𑀸𑀧𑀲𑀤𑁆𑀤𑀸 𑀧𑀸𑀧𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’𑀢𑀺. 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀏𑀯𑀫𑀲𑁆𑀲 𑀯𑀘𑀦𑀻𑀬𑀸 𑁋 ‘𑀫𑀸, 𑀅𑀬𑁆𑀬𑁂, 𑀏𑀯𑀁 𑀅𑀯𑀘 𑁋 𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀸𑀘𑀸𑀭𑀸 𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀢𑀸 𑀲𑀗𑁆𑀖𑁄 𑀦 𑀓𑀺𑀜𑁆𑀘𑀺 𑀆𑀳. 𑀢𑀼𑀫𑁆𑀳𑀜𑁆𑀜𑁂𑀯 𑀲𑀗𑁆𑀖𑁄 𑀉𑀜𑁆𑀜𑀸𑀬 𑀧𑀭𑀺𑀪𑀯𑁂𑀦 𑀅𑀓𑁆𑀔𑀦𑁆𑀢𑀺𑀬𑀸 𑀯𑁂𑀪𑀲𑁆𑀲𑀺𑀬𑀸 𑀤𑀼𑀩𑁆𑀩𑀮𑁆𑀬𑀸 𑀏𑀯𑀫𑀸𑀳 𑁋 𑀪𑀕𑀺𑀦𑀺𑀬𑁄 𑀔𑁄 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀺 𑀧𑀸𑀧𑀸𑀘𑀸𑀭𑀸 𑀧𑀸𑀧𑀲𑀤𑁆𑀤𑀸 𑀧𑀸𑀧𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’𑀢𑀺. 𑀏𑀯𑀜𑁆𑀘 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀧𑀕𑁆𑀕𑀡𑁆𑀳𑁂𑀬𑁆𑀬, 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀬𑀸𑀯𑀢𑀢𑀺𑀬𑀜𑁆𑀘𑁂 𑀲𑀫𑀦𑀼𑀪𑀸𑀲𑀻𑀬𑀫𑀸𑀦𑀸 𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀬𑀸𑀯𑀢𑀢𑀺𑀬𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁭𑁨𑁯. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑁋 ‘‘𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀸𑀘𑀸𑀭𑀸 𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀢𑀸 𑀲𑀗𑁆𑀖𑁄 𑀦 𑀓𑀺𑀜𑁆𑀘𑀺 𑀆𑀳’’.

𑀢𑀼𑀫𑁆𑀳𑀜𑁆𑀜𑁂𑀯 𑀲𑀗𑁆𑀖𑁄 𑀉𑀜𑁆𑀜𑀸𑀬𑀸𑀢𑀺 𑀅𑀯𑀜𑁆𑀜𑀸𑀬.

𑀧𑀭𑀺𑀪𑀯𑁂𑀦𑀸𑀢𑀺 𑀧𑀸𑀭𑀺𑀪𑀩𑁆𑀬𑀢𑀸.

𑀅𑀓𑁆𑀔𑀦𑁆𑀢𑀺𑀬𑀸𑀢𑀺 𑀓𑁄𑀧𑁂𑀦.

𑀯𑁂𑀪𑀲𑁆𑀲𑀺𑀬𑀸𑀢𑀺 𑀯𑀺𑀪𑀲𑁆𑀲𑀻𑀓𑀢𑀸 [𑀯𑀺𑀪𑀲𑁆𑀲𑀺𑀓𑀢𑀸𑀬 (𑀲𑀻.)].

𑀤𑀼𑀩𑁆𑀩𑀮𑁆𑀬𑀸𑀢𑀺 𑀅𑀧𑀓𑁆𑀔𑀢𑀸.

𑀏𑀯𑀫𑀸𑀳 𑁋 ‘‘𑀪𑀕𑀺𑀦𑀺𑀬𑁄 𑀔𑁄 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀺 𑀧𑀸𑀧𑀸𑀘𑀸𑀭𑀸 𑀧𑀸𑀧𑀲𑀤𑁆𑀤𑀸 𑀧𑀸𑀧𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀯𑀺𑀘𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’’𑀢𑀺.

𑀲𑀸 𑀪𑀺𑀓𑁆𑀔𑀼𑀦𑀻𑀢𑀺 𑀬𑀸 𑀲𑀸 𑀏𑀯𑀁𑀯𑀸𑀤𑀺𑀦𑀻 𑀪𑀺𑀓𑁆𑀔𑀼𑀦𑀻.

𑀪𑀺𑀓𑁆𑀔𑀼𑀦𑀻𑀳𑀻𑀢𑀺 𑀅𑀜𑁆𑀜𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺.

𑀬𑀸 𑀧𑀲𑁆𑀲𑀦𑁆𑀢𑀺 𑀬𑀸 𑀲𑀼𑀡𑀦𑁆𑀢𑀺 𑀢𑀸𑀳𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸𑀬𑁆𑀬𑁂, 𑀏𑀯𑀁 𑀅𑀯𑀘 𑁋 ‘𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀲𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀫𑀚𑁆𑀛𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸𑀬𑁆𑀬𑁂, 𑀏𑀯𑀁 𑀅𑀯𑀘 𑁋 ‘𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀲𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁭𑁩𑁦. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑁂𑀦 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀸𑀘𑀸𑀭𑀸 𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀢𑀸 𑀲𑀗𑁆𑀖𑁄 𑀦 𑀓𑀺𑀜𑁆𑀘𑀺 𑀆𑀳. 𑀢𑀼𑀫𑁆𑀳𑀜𑁆𑀜𑁂𑀯 𑀲𑀗𑁆𑀖𑁄 𑀉𑀜𑁆𑀜𑀸𑀬 𑀧𑀭𑀺𑀪𑀯𑁂𑀦 𑀅𑀓𑁆𑀔𑀦𑁆𑀢𑀺𑀬𑀸 𑀯𑁂𑀪𑀲𑁆𑀲𑀺𑀬𑀸 𑀤𑀼𑀩𑁆𑀩𑀮𑁆𑀬𑀸 𑀏𑀯𑀫𑀸𑀳 𑁋 𑀪𑀕𑀺𑀦𑀺𑀬𑁄 𑀔𑁄 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀺 𑀧𑀸𑀧𑀸𑀘𑀸𑀭𑀸 𑀧𑀸𑀧𑀲𑀤𑁆𑀤𑀸 𑀧𑀸𑀧𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’𑀢𑀺. 𑀲𑀸 𑀢𑀁 𑀯𑀢𑁆𑀣𑀼𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀦𑀺𑀁 𑀲𑀫𑀦𑀼𑀪𑀸𑀲𑁂𑀬𑁆𑀬 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑁂𑀦 𑀲𑀫𑀦𑀼𑀪𑀝𑁆𑀞𑀸 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀁 𑀯𑀤𑁂𑀢𑀺 𑁋 ‘𑀲𑀁𑀲𑀝𑁆𑀞𑀸𑀯 𑀅𑀬𑁆𑀬𑁂, 𑀢𑀼𑀫𑁆𑀳𑁂 𑀯𑀺𑀳𑀭𑀣. 𑀫𑀸 𑀢𑀼𑀫𑁆𑀳𑁂 𑀦𑀸𑀦𑀸 𑀯𑀺𑀳𑀭𑀺𑀢𑁆𑀣. 𑀲𑀦𑁆𑀢𑀺 𑀲𑀗𑁆𑀖𑁂 𑀅𑀜𑁆𑀜𑀸𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀏𑀯𑀸𑀘𑀸𑀭𑀸 𑀏𑀯𑀁𑀲𑀤𑁆𑀤𑀸 𑀏𑀯𑀁𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀢𑀸 𑀲𑀗𑁆𑀖𑁄 𑀦 𑀓𑀺𑀜𑁆𑀘𑀺 𑀆𑀳. 𑀢𑀼𑀫𑁆𑀳𑀜𑁆𑀜𑁂𑀯 𑀲𑀗𑁆𑀖𑁄 𑀉𑀜𑁆𑀜𑀸𑀬 𑀧𑀭𑀺𑀪𑀯𑁂𑀦 𑀅𑀓𑁆𑀔𑀦𑁆𑀢𑀺𑀬𑀸 𑀯𑁂𑀪𑀲𑁆𑀲𑀺𑀬𑀸 𑀤𑀼𑀩𑁆𑀩𑀮𑁆𑀬𑀸 𑀏𑀯𑀫𑀸𑀳 𑁋 𑀪𑀕𑀺𑀦𑀺𑀬𑁄 𑀔𑁄 𑀲𑀁𑀲𑀝𑁆𑀞𑀸 𑀯𑀺𑀳𑀭𑀦𑁆𑀢𑀺 𑀧𑀸𑀧𑀸𑀘𑀸𑀭𑀸 𑀧𑀸𑀧𑀲𑀤𑁆𑀤𑀸 𑀧𑀸𑀧𑀲𑀺𑀮𑁄𑀓𑀸, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀯𑀺𑀳𑁂𑀲𑀺𑀓𑀸, 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀺𑀓𑀸. 𑀯𑀺𑀯𑀺𑀘𑁆𑀘𑀣𑀸𑀬𑁆𑀬𑁂. 𑀯𑀺𑀯𑁂𑀓𑀜𑁆𑀜𑁂𑀯 𑀪𑀕𑀺𑀦𑀻𑀦𑀁 𑀲𑀗𑁆𑀖𑁄 𑀯𑀡𑁆𑀡𑁂𑀢𑀻’𑀢𑀺. 𑀲𑀸 𑀢𑀁 𑀯𑀢𑁆𑀣𑀼𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀦𑀺𑀁 𑀲𑀫𑀦𑀼𑀪𑀸𑀲𑀢𑀺 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀫𑀦𑀼𑀪𑀸𑀲𑀦𑀸 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺, 𑀲𑀸 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀲𑀫𑀦𑀼𑀪𑀝𑁆𑀞𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀺𑀬𑀸 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀸𑀬𑁄 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀬𑀸𑀯𑀢𑀢𑀺𑀬𑀓𑀦𑁆𑀢𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀆𑀧𑀚𑁆𑀚𑀢𑀺, 𑀦 𑀲𑀳𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀲𑀗𑁆𑀖𑁄𑀯 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀅𑀩𑁆𑀪𑁂𑀢𑀺, 𑀦 𑀲𑀫𑁆𑀩𑀳𑀼𑀮𑀸 𑀦 𑀏𑀓𑀸 𑀪𑀺𑀓𑁆𑀔𑀼𑀦𑀻. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺. 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀦𑀸𑀫𑀓𑀫𑁆𑀫𑀁 𑀅𑀥𑀺𑀯𑀘𑀦𑀁, 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑁭𑁩𑁧. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁭𑁩𑁨. 𑀅𑀦𑀸𑀧𑀢𑁆𑀢𑀺 𑀅𑀲𑀫𑀦𑀼𑀪𑀸𑀲𑀦𑁆𑀢𑀺𑀬𑀸, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀲𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑀉𑀤𑁆𑀤𑀺𑀝𑁆𑀞𑀸 𑀔𑁄, 𑀅𑀬𑁆𑀬𑀸𑀬𑁄, 𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀥𑀫𑁆𑀫𑀸 𑁋 𑀦𑀯 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀸. 𑀬𑁂𑀲𑀁 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀢𑀭𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀆𑀧𑀚𑁆𑀚𑀢𑀺, 𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀉𑀪𑀢𑁄𑀲𑀗𑁆𑀖𑁂 𑀧𑀓𑁆𑀔𑀫𑀸𑀦𑀢𑁆𑀢𑀁 𑀘𑀭𑀺𑀢𑀩𑁆𑀩𑀁. 𑀘𑀺𑀡𑁆𑀡𑀫𑀸𑀦𑀢𑁆𑀢𑀸 𑀪𑀺𑀓𑁆𑀔𑀼𑀦𑀻 𑀬𑀢𑁆𑀣 𑀲𑀺𑀬𑀸 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀢𑀢𑁆𑀣 (𑀲𑀸 𑀪𑀺𑀓𑁆𑀔𑀼𑀦𑀻) [( ) (𑀓𑀢𑁆𑀣𑀧𑀺 𑀦𑀢𑁆𑀣𑀺)] 𑀅𑀩𑁆𑀪𑁂𑀢𑀩𑁆𑀩𑀸. 𑀏𑀓𑀸𑀬𑀧𑀺 𑀘𑁂 𑀊𑀦𑁄 𑀯𑀻𑀲𑀢𑀺𑀕𑀡𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀅𑀩𑁆𑀪𑁂𑀬𑁆𑀬. 𑀲𑀸 𑀘 𑀪𑀺𑀓𑁆𑀔𑀼𑀦𑀻 𑀅𑀦𑀩𑁆𑀪𑀺𑀢𑀸, 𑀢𑀸 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀕𑀸𑀭𑀬𑁆𑀳𑀸, 𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀺.

𑀢𑀢𑁆𑀣𑀸𑀬𑁆𑀬𑀸𑀬𑁄 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’? 𑀤𑀼𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’? 𑀢𑀢𑀺𑀬𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀘𑁆𑀘𑀺𑀢𑁆𑀣 𑀧𑀭𑀺𑀲𑀼𑀤𑁆𑀥𑀸’’? 𑀧𑀭𑀺𑀲𑀼𑀤𑁆𑀥𑁂𑀢𑁆𑀣𑀸𑀬𑁆𑀬𑀸𑀬𑁄, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻𑀢𑀺.

𑀲𑀢𑁆𑀢𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.