𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀁 (𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁄)

𑁧. 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑀇𑀫𑁂 𑀔𑁄 𑀧𑀦𑀸𑀬𑁆𑀬𑀸𑀬𑁄 𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸

𑀥𑀫𑁆𑀫𑀸 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺.

𑁬𑁭𑁮. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀉𑀤𑁄𑀲𑀺𑀢𑀁 [𑀉𑀤𑁆𑀤𑁄𑀲𑀺𑀢𑀁 (𑀲𑀻. 𑀲𑁆𑀬𑀸.)] 𑀤𑀢𑁆𑀯𑀸 𑀓𑀸𑀮𑀗𑁆𑀓𑀢𑁄 𑀳𑁄𑀢𑀺. 𑀢𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑀸 𑀳𑁄𑀦𑁆𑀢𑀺 𑁋 𑀏𑀓𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄, 𑀏𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄. 𑀢𑁂 𑀧𑁂𑀢𑁆𑀢𑀺𑀓𑀁 𑀲𑀸𑀧𑀢𑁂𑀬𑁆𑀬𑀁 𑀯𑀺𑀪𑀚𑀺𑀁𑀲𑀼. 𑀅𑀣 𑀔𑁄 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀢𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀳𑀸𑀓𑀁 𑀉𑀤𑁄𑀲𑀺𑀢𑁄, 𑀢𑀁 𑀪𑀸𑀚𑁂𑀫𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀢𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀬𑁆𑀬𑁄, 𑀏𑀯𑀁 𑀅𑀯𑀘. 𑀅𑀫𑁆𑀳𑀸𑀓𑀁 𑀧𑀺𑀢𑀼𑀦𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀢𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀳𑀸𑀓𑀁 𑀉𑀤𑁄𑀲𑀺𑀢𑁄, 𑀢𑀁 𑀪𑀸𑀚𑁂𑀫𑀸’’𑀢𑀺. 𑀅𑀣 𑀔𑁄 𑀲𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀢𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀬𑁆𑀬𑁄, 𑀏𑀯𑀁 𑀅𑀯𑀘. 𑀅𑀫𑁆𑀳𑀸𑀓𑀁 𑀧𑀺𑀢𑀼𑀦𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀢𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀳𑀸𑀓𑀁 𑀉𑀤𑁄𑀲𑀺𑀢𑁄, 𑀢𑀁 𑀪𑀸𑀚𑁂𑀫𑀸’’𑀢𑀺. 𑀅𑀣 𑀔𑁄 𑀲𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑁋 ‘‘𑀲𑀘𑁂 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀅𑀳𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑁋 𑀢𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀪𑀸𑀚𑁂𑀫𑀸’’𑀢𑀺. 𑀅𑀣 𑀔𑁄 𑀲𑁄 𑀉𑀤𑁄𑀲𑀺𑀢𑁄 𑀢𑁂𑀳𑀺 𑀪𑀸𑀚𑀻𑀬𑀫𑀸𑀦𑁄 𑀢𑀲𑁆𑀲 𑀅𑀲𑁆𑀲𑀤𑁆𑀥𑀲𑁆𑀲 𑀅𑀧𑁆𑀧𑀲𑀦𑁆𑀦𑀲𑁆𑀲 𑀧𑀸𑀧𑀼𑀡𑀸𑀢𑀺 [𑀧𑀸𑀧𑀼𑀡𑀺 (𑀲𑁆𑀬𑀸.)]. 𑀅𑀣 𑀔𑁄 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀫𑀣𑀸𑀬𑁆𑀬𑁂, 𑀅𑀫𑁆𑀳𑀸𑀓𑀁 𑀉𑀤𑁄𑀲𑀺𑀢𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀢𑀁 𑀧𑀼𑀭𑀺𑀲𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀬𑁆𑀬𑁄, 𑀏𑀯𑀁 𑀅𑀯𑀘, 𑀢𑀼𑀫𑁆𑀳𑀸𑀓𑀁 𑀧𑀺𑀢𑀼𑀦𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄’’𑀢𑀺. ‘‘𑀤𑀺𑀦𑁆𑀦𑁄 𑀦 𑀤𑀺𑀦𑁆𑀦𑁄’’𑀢𑀺 𑀯𑁄𑀳𑀸𑀭𑀺𑀓𑁂 𑀫𑀳𑀸𑀫𑀢𑁆𑀢𑁂 𑀧𑀼𑀘𑁆𑀙𑀺𑀁𑀲𑀼. 𑀫𑀳𑀸𑀫𑀢𑁆𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑁄, 𑀅𑀬𑁆𑀬𑁂, 𑀚𑀸𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁄’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀢𑁂 𑀫𑀳𑀸𑀫𑀢𑁆𑀢𑁂 𑀏𑀢𑀤𑀯𑁄𑀘 𑁋 ‘‘𑀅𑀧𑀺 𑀦𑀸𑀬𑁆𑀬𑁄 [𑀅𑀧𑀺 𑀦𑁆𑀯𑀬𑁆𑀬𑀸 (𑀲𑁆𑀬𑀸.), 𑀅𑀧𑀺 𑀦𑀸𑀬𑁆𑀬𑁄 (𑀓.)] 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀁 𑀯𑀸 𑀲𑀼𑀢𑀁 𑀯𑀸 𑀲𑀓𑁆𑀔𑀺𑀁 𑀞𑀧𑀬𑀺𑀢𑁆𑀯𑀸 𑀤𑀸𑀦𑀁 𑀤𑀺𑀬𑁆𑀬𑀫𑀸𑀦’’𑀦𑁆𑀢𑀺? 𑀅𑀣 𑀔𑁄 𑀢𑁂 𑀫𑀳𑀸𑀫𑀢𑁆𑀢𑀸 𑁋 ‘‘𑀲𑀘𑁆𑀘𑀁 𑀔𑁄 𑀅𑀬𑁆𑀬𑀸 𑀆𑀳𑀸’’𑀢𑀺 𑀢𑀁 𑀉𑀤𑁄𑀲𑀺𑀢𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀓𑀁𑀲𑀼. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀭𑀸𑀚𑀺𑀢𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀅𑀲𑁆𑀲𑀫𑀡𑀺𑀬𑁄 𑀇𑀫𑀸 𑀫𑀼𑀡𑁆𑀟𑀸 𑀩𑀦𑁆𑀥𑀓𑀺𑀦𑀺𑀬𑁄. 𑀓𑀣𑀜𑁆𑀳𑀺 𑀦𑀸𑀫 𑀅𑀫𑁆𑀳𑀸𑀓𑀁 𑀉𑀤𑁄𑀲𑀺𑀢𑀁 𑀅𑀘𑁆𑀙𑀺𑀦𑁆𑀤𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀫𑀳𑀸𑀫𑀢𑁆𑀢𑀸𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀫𑀳𑀸𑀫𑀢𑁆𑀢𑀸 𑀢𑀁 𑀧𑀼𑀭𑀺𑀲𑀁 𑀤𑀡𑁆𑀟𑀸𑀧𑁂𑀲𑀼𑀁. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀤𑀡𑁆𑀟𑀺𑀢𑁄 𑀪𑀺𑀓𑁆𑀔𑀼𑀦𑀽𑀧𑀲𑁆𑀲𑀬𑀲𑁆𑀲 𑀅𑀯𑀺𑀤𑀽𑀭𑁂 𑀆𑀚𑀻𑀯𑀓𑀲𑁂𑀬𑁆𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀆𑀚𑀻𑀯𑀓𑁂 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀏𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀘𑁆𑀘𑀸𑀯𑀤𑀣𑀸’’𑀢𑀺.

𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀫𑀳𑀸𑀫𑀢𑁆𑀢𑀸𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀫𑀳𑀸𑀫𑀢𑁆𑀢𑀸 𑀢𑀁 𑀧𑀼𑀭𑀺𑀲𑀁 𑀩𑀦𑁆𑀥𑀸𑀧𑁂𑀲𑀼𑀁. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀧𑀞𑀫𑀁 𑀪𑀺𑀓𑁆𑀔𑀼𑀦𑀺𑀬𑁄 𑀉𑀤𑁄𑀲𑀺𑀢𑀁 𑀅𑀘𑁆𑀙𑀺𑀦𑁆𑀤𑀸𑀧𑁂𑀲𑀼𑀁, 𑀤𑀼𑀢𑀺𑀬𑀁 𑀤𑀡𑁆𑀟𑀸𑀧𑁂𑀲𑀼𑀁, 𑀢𑀢𑀺𑀬𑀁 𑀩𑀦𑁆𑀥𑀸𑀧𑁂𑀲𑀼𑀁. 𑀇𑀤𑀸𑀦𑀺 𑀖𑀸𑀢𑀸𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀉𑀲𑁆𑀲𑀬𑀯𑀸𑀤𑀺𑀓𑀸 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀉𑀲𑁆𑀲𑀬𑀯𑀸𑀤𑀺𑀓𑀸 𑀯𑀺𑀳𑀭𑀢𑀻𑀢𑀺. ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀉𑀲𑁆𑀲𑀬𑀯𑀸𑀤𑀺𑀓𑀸 𑀯𑀺𑀳𑀭𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁬𑁭𑁯. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀉𑀲𑁆𑀲𑀬𑀯𑀸𑀤𑀺𑀓𑀸 𑀯𑀺𑀳𑀭𑁂𑀬𑁆𑀬 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀤𑀸𑀲𑁂𑀦 𑀯𑀸 𑀓𑀫𑁆𑀫𑀓𑀸𑀭𑁂𑀦 [𑀓𑀫𑁆𑀫𑀓𑀭𑁂𑀦 (𑀲𑀻. 𑀲𑁆𑀬𑀸.)] 𑀯𑀸 𑀅𑀦𑁆𑀢𑀫𑀲𑁄 𑀲𑀫𑀡𑀧𑀭𑀺𑀩𑁆𑀩𑀸𑀚𑀓𑁂𑀦𑀸𑀧𑀺, 𑀅𑀬𑀁 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁬𑁮𑁦. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀉𑀲𑁆𑀲𑀬𑀯𑀸𑀤𑀺𑀓𑀸 𑀦𑀸𑀫 𑀅𑀟𑁆𑀟𑀓𑀸𑀭𑀺𑀓𑀸 𑀯𑀼𑀘𑁆𑀘𑀢𑀺.

𑀕𑀳𑀧𑀢𑀺 𑀦𑀸𑀫 𑀬𑁄 𑀓𑁄𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺.

𑀕𑀳𑀧𑀢𑀺𑀧𑀼𑀢𑁆𑀢𑁄 𑀦𑀸𑀫 𑀬𑁂 𑀓𑁂𑀘𑀺 𑀧𑀼𑀢𑁆𑀢𑀪𑀸𑀢𑀭𑁄.

𑀤𑀸𑀲𑁄 𑀦𑀸𑀫 𑀅𑀦𑁆𑀢𑁄𑀚𑀸𑀢𑁄 𑀥𑀦𑀓𑁆𑀓𑀻𑀢𑁄 𑀓𑀭𑀫𑀭𑀸𑀦𑀻𑀢𑁄.

𑀓𑀫𑁆𑀫𑀓𑀸𑀭𑁄 𑀦𑀸𑀫 𑀪𑀝𑀓𑁄 𑀆𑀳𑀢𑀓𑁄.

𑀲𑀫𑀡𑀧𑀭𑀺𑀩𑁆𑀩𑀸𑀚𑀓𑁄 𑀦𑀸𑀫 𑀪𑀺𑀓𑁆𑀔𑀼𑀜𑁆𑀘 𑀪𑀺𑀓𑁆𑀔𑀼𑀦𑀺𑀜𑁆𑀘 𑀲𑀺𑀓𑁆𑀔𑀫𑀸𑀦𑀜𑁆𑀘 𑀲𑀸𑀫𑀡𑁂𑀭𑀜𑁆𑀘 𑀲𑀸𑀫𑀡𑁂𑀭𑀺𑀜𑁆𑀘 𑀞𑀧𑁂𑀢𑁆𑀯𑀸 𑀬𑁄 𑀓𑁄𑀘𑀺 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄.

𑀅𑀟𑁆𑀟𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀢𑀺𑀬𑀁 𑀯𑀸 𑀧𑀭𑀺𑀬𑁂𑀲𑀢𑀺 𑀕𑀘𑁆𑀙𑀢𑀺 𑀯𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀏𑀓𑀲𑁆𑀲 𑀆𑀭𑁄𑀘𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀼𑀢𑀺𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀅𑀟𑁆𑀟𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀞𑀫𑀸𑀧𑀢𑁆𑀢𑀺𑀓𑀦𑁆𑀢𑀺 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀆𑀧𑀚𑁆𑀚𑀢𑀺 𑀅𑀲𑀫𑀦𑀼𑀪𑀸𑀲𑀦𑀸𑀬.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺 𑀲𑀗𑁆𑀖𑁄𑀯 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀫𑀸𑀦𑀢𑁆𑀢𑀁 𑀤𑁂𑀢𑀺 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺 𑀅𑀩𑁆𑀪𑁂𑀢𑀺, 𑀦 𑀲𑀫𑁆𑀩𑀳𑀼𑀮𑀸 𑀦 𑀏𑀓𑀸 𑀪𑀺𑀓𑁆𑀔𑀼𑀦𑀻. 𑀢𑁂𑀦 𑀯𑀼𑀘𑁆𑀘𑀢𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺. 𑀢𑀲𑁆𑀲𑁂𑀯 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀦𑀸𑀫𑀓𑀫𑁆𑀫𑀁 𑀅𑀥𑀺𑀯𑀘𑀦𑀁. 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑁬𑁮𑁧. 𑀅𑀦𑀸𑀧𑀢𑁆𑀢𑀺 𑀫𑀦𑀼𑀲𑁆𑀲𑁂𑀳𑀺 𑀆𑀓𑀟𑁆𑀠𑀻𑀬𑀫𑀸𑀦𑀸 𑀕𑀘𑁆𑀙𑀢𑀺, 𑀆𑀭𑀓𑁆𑀔𑀁 𑀬𑀸𑀘𑀢𑀺, 𑀅𑀦𑁄𑀤𑀺𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬…𑀧𑁂… 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁨. 𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁬𑁮𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀁 𑀅𑀜𑁆𑀜𑀢𑀭𑀲𑁆𑀲 𑀮𑀺𑀘𑁆𑀙𑀯𑀺𑀲𑁆𑀲 𑀧𑀚𑀸𑀧𑀢𑀺 𑀅𑀢𑀺𑀘𑀸𑀭𑀺𑀦𑀻 𑀳𑁄𑀢𑀺. 𑀅𑀣 𑀔𑁄 𑀲𑁄 𑀮𑀺𑀘𑁆𑀙𑀯𑀺 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀯𑀺𑀭𑀫𑀸𑀳𑀺, 𑀅𑀦𑀢𑁆𑀣𑀁 𑀔𑁄 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀫𑁆𑀧𑀺 𑀲𑀸 𑀯𑀼𑀘𑁆𑀘𑀫𑀸𑀦𑀸 𑀦𑀸𑀤𑀺𑀬𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀺𑀕𑀡𑁄 𑀲𑀦𑁆𑀦𑀺𑀧𑀢𑀺𑀢𑁄 𑀳𑁄𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀲𑁄 𑀮𑀺𑀘𑁆𑀙𑀯𑀺 𑀢𑁂 𑀮𑀺𑀘𑁆𑀙𑀯𑀬𑁄 𑀏𑀢𑀤𑀯𑁄𑀘 𑁋 ‘‘𑀏𑀓𑀁 𑀫𑁂, 𑀅𑀬𑁆𑀬𑁄, 𑀇𑀢𑁆𑀣𑀺𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺. ‘‘𑀓𑀸 𑀦𑀸𑀫 𑀲𑀸’’𑀢𑀺? ‘‘𑀫𑀬𑁆𑀳𑀁 𑀧𑀚𑀸𑀧𑀢𑀺 𑀅𑀢𑀺𑀘𑀭𑀢𑀺, 𑀢𑀁 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺. ‘‘𑀚𑀸𑀦𑀸𑀳𑀻’’𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀲𑀸 𑀇𑀢𑁆𑀣𑀻 𑁋 ‘‘𑀲𑀸𑀫𑀺𑀓𑁄 𑀓𑀺𑀭 𑀫𑀁 𑀖𑀸𑀢𑁂𑀢𑀼𑀓𑀸𑀫𑁄’’𑀢𑀺. 𑀯𑀭𑀪𑀡𑁆𑀟𑀁 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀺𑀢𑁆𑀣𑀺𑀬𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀺𑀢𑁆𑀣𑀺𑀬𑀸 𑀦 𑀇𑀘𑁆𑀙𑀺𑀁𑀲𑀼 𑀧𑀩𑁆𑀩𑀸𑀚𑁂𑀢𑀼𑀁. 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀦 𑀇𑀘𑁆𑀙𑀺𑀁𑀲𑀼 𑀧𑀩𑁆𑀩𑀸𑀚𑁂𑀢𑀼𑀁. 𑀣𑀼𑀮𑁆𑀮𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀡𑁆𑀟𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺.

𑀅𑀣 𑀔𑁄 𑀲𑁄 𑀮𑀺𑀘𑁆𑀙𑀯𑀺 𑀢𑀁 𑀇𑀢𑁆𑀣𑀺𑀁 𑀕𑀯𑁂𑀲𑀦𑁆𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀁 𑀤𑀺𑀲𑁆𑀯𑀸𑀦 𑀬𑁂𑀦 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀏𑀢𑀤𑀯𑁄𑀘 𑁋 ‘‘𑀧𑀚𑀸𑀧𑀢𑀺 𑀫𑁂, 𑀤𑁂𑀯, 𑀯𑀭𑀪𑀡𑁆𑀟𑀁 𑀆𑀤𑀸𑀬 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀢𑀁 𑀤𑁂𑀯𑁄 𑀅𑀦𑀼𑀚𑀸𑀦𑀸𑀢𑀽’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂, 𑀯𑀺𑀘𑀺𑀦𑀺𑀢𑁆𑀯𑀸 𑀆𑀘𑀺𑀓𑁆𑀔𑀸’’𑀢𑀺. ‘‘𑀤𑀺𑀝𑁆𑀞𑀸, 𑀤𑁂𑀯, 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸’’𑀢𑀺. ‘‘𑀲𑀘𑁂, 𑀪𑀡𑁂, 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸, 𑀦 𑀲𑀸 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁. 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄, 𑀘𑀭𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀅𑀣 𑀔𑁄 𑀲𑁄 𑀮𑀺𑀘𑁆𑀙𑀯𑀺 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑁄 𑀘𑁄𑀭𑀺𑀁 𑀧𑀩𑁆𑀩𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀼𑀦𑀺𑀬𑁄 𑀢𑀲𑁆𑀲 𑀮𑀺𑀘𑁆𑀙𑀯𑀺𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀘𑁄𑀭𑀺𑀁 𑀧𑀩𑁆𑀩𑀸𑀚𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀘𑁄𑀭𑀺𑀁 𑀧𑀩𑁆𑀩𑀸𑀚𑁂𑀢𑀻𑀢𑀺 [𑀧𑀩𑁆𑀩𑀸𑀚𑁂𑀲𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀘𑁄𑀭𑀺𑀁 𑀧𑀩𑁆𑀩𑀸𑀚𑁂𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁬𑁮𑁩. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀚𑀸𑀦𑀁 𑀘𑁄𑀭𑀺𑀁 𑀯𑀚𑁆𑀛𑀁 𑀯𑀺𑀤𑀺𑀢𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀭𑀸𑀚𑀸𑀦𑀁 𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀽𑀕𑀁 𑀯𑀸 𑀲𑁂𑀡𑀺𑀁 𑀯𑀸 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁬𑁮𑁪. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀚𑀸𑀦𑀸𑀢𑀺 𑀦𑀸𑀫 𑀲𑀸𑀫𑀁 𑀯𑀸 𑀚𑀸𑀦𑀸𑀢𑀺 𑀅𑀜𑁆𑀜𑁂 𑀯𑀸 𑀢𑀲𑁆𑀲𑀸 𑀆𑀭𑁄𑀘𑁂𑀦𑁆𑀢𑀺, 𑀲𑀸 𑀯𑀸 𑀆𑀭𑁄𑀘𑁂𑀢𑀺.

𑀘𑁄𑀭𑀻 𑀦𑀸𑀫 𑀬𑀸 𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀫𑀸𑀲𑀓𑀁 𑀯𑀸 𑀅𑀕𑁆𑀖𑀦𑀓𑀁 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀺𑀬𑀢𑀺, 𑀏𑀲𑀸 𑀘𑁄𑀭𑀻 𑀦𑀸𑀫.

𑀯𑀚𑁆𑀛𑀸 𑀦𑀸𑀫 𑀬𑀁 𑀓𑀢𑁆𑀯𑀸 𑀯𑀚𑁆𑀛𑀧𑁆𑀧𑀢𑁆𑀢𑀸 𑀳𑁄𑀢𑀺.

𑀯𑀺𑀤𑀺𑀢𑀸 𑀦𑀸𑀫 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀜𑀸𑀢𑀸 𑀳𑁄𑀢𑀺 ‘‘𑀯𑀚𑁆𑀛𑀸 𑀏𑀲𑀸’’𑀢𑀺.

𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀦𑀸𑀧𑀼𑀘𑁆𑀙𑀸.

𑀭𑀸𑀚𑀸 𑀦𑀸𑀫 𑀬𑀢𑁆𑀣 𑀭𑀸𑀚𑀸 𑀅𑀦𑀼𑀲𑀸𑀲𑀢𑀺, 𑀭𑀸𑀚𑀸 𑀅𑀧𑀮𑁄𑀓𑁂𑀢𑀩𑁆𑀩𑁄.

𑀲𑀗𑁆𑀖𑁄 𑀦𑀸𑀫 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀅𑀧𑀮𑁄𑀓𑁂𑀢𑀩𑁆𑀩𑁄.

𑀕𑀡𑁄 𑀦𑀸𑀫 𑀬𑀢𑁆𑀣 𑀕𑀡𑁄 𑀅𑀦𑀼𑀲𑀸𑀲𑀢𑀺, 𑀕𑀡𑁄 𑀅𑀧𑀮𑁄𑀓𑁂𑀢𑀩𑁆𑀩𑁄.

𑀧𑀽𑀕𑁄 𑀦𑀸𑀫 𑀬𑀢𑁆𑀣 𑀧𑀽𑀕𑁄 𑀅𑀦𑀼𑀲𑀸𑀲𑀢𑀺, 𑀧𑀽𑀕𑁄 𑀅𑀧𑀮𑁄𑀓𑁂𑀢𑀩𑁆𑀩𑁄.

𑀲𑁂𑀡𑀺 𑀦𑀸𑀫 𑀬𑀢𑁆𑀣 𑀲𑁂𑀡𑀺 𑀅𑀦𑀼𑀲𑀸𑀲𑀢𑀺, 𑀲𑁂𑀡𑀺 𑀅𑀧𑀮𑁄𑀓𑁂𑀢𑀩𑁆𑀩𑁄.

𑀅𑀜𑁆𑀜𑀢𑁆𑀭 𑀓𑀧𑁆𑀧𑀸𑀢𑀺 𑀞𑀧𑁂𑀢𑁆𑀯𑀸 𑀓𑀧𑁆𑀧𑀁. 𑀓𑀧𑁆𑀧𑀁 𑀦𑀸𑀫 𑀤𑁆𑀯𑁂 𑀓𑀧𑁆𑀧𑀸𑀦𑀺 𑁋 𑀢𑀺𑀢𑁆𑀣𑀺𑀬𑁂𑀲𑀼 𑀯𑀸 𑀧𑀩𑁆𑀩𑀚𑀺𑀢𑀸 𑀳𑁄𑀢𑀺 𑀅𑀜𑁆𑀜𑀸𑀲𑀼 𑀯𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸. 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸 ‘‘𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀆𑀘𑀭𑀺𑀦𑀺𑀁 𑀯𑀸 𑀧𑀢𑁆𑀢𑀁 𑀯𑀸 𑀘𑀻𑀯𑀭𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀉𑀧𑀚𑁆𑀛𑀸𑀬𑀸𑀬 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀕𑀡𑀲𑁆𑀲 𑀘 𑀆𑀘𑀭𑀺𑀦𑀺𑀬𑀸 𑀘 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀧𑀞𑀫𑀸𑀧𑀢𑁆𑀢𑀺𑀓𑀦𑁆𑀢𑀺 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀆𑀧𑀚𑁆𑀚𑀢𑀺 𑀅𑀲𑀫𑀦𑀼𑀪𑀸𑀲𑀦𑀸𑀬.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑀦𑁆𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁬𑁮𑁫. 𑀘𑁄𑀭𑀺𑀬𑀸 𑀘𑁄𑀭𑀺𑀲𑀜𑁆𑀜𑀸 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀘𑁄𑀭𑀺𑀬𑀸 𑀯𑁂𑀫𑀢𑀺𑀓𑀸 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀘𑁄𑀭𑀺𑀬𑀸 𑀅𑀘𑁄𑀭𑀺𑀲𑀜𑁆𑀜𑀸 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀅𑀘𑁄𑀭𑀺𑀬𑀸 𑀘𑁄𑀭𑀺𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀘𑁄𑀭𑀺𑀬𑀸 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀘𑁄𑀭𑀺𑀬𑀸 𑀅𑀘𑁄𑀭𑀺𑀲𑀜𑁆𑀜𑀸, 𑀅𑀦𑀸𑀧𑀢𑁆𑀢𑀺.

𑁬𑁮𑁬. 𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀻 𑀯𑀼𑀝𑁆𑀞𑀸𑀧𑁂𑀢𑀺, 𑀅𑀧𑀮𑁄𑀓𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀢𑀺, 𑀓𑀧𑁆𑀧𑀓𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁩. 𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁬𑁮𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀤𑁆𑀤𑀸𑀬 𑀓𑀸𑀧𑀺𑀮𑀸𑀦𑀺𑀬𑀸 𑀅𑀦𑁆𑀢𑁂𑀯𑀸𑀲𑀺𑀦𑀻 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 𑀕𑀸𑀫𑀓𑀁 [𑀕𑀸𑀫𑀓𑁂 (𑀲𑁆𑀬𑀸.)] 𑀜𑀸𑀢𑀺𑀓𑀼𑀮𑀁 𑀅𑀕𑀫𑀸𑀲𑀺. 𑀪𑀤𑁆𑀤𑀸 𑀓𑀸𑀧𑀺𑀮𑀸𑀦𑀻 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀅𑀧𑀲𑁆𑀲𑀦𑁆𑀢𑀻 𑀪𑀺𑀓𑁆𑀔𑀼𑀦𑀺𑀬𑁄 𑀧𑀼𑀘𑁆𑀙𑀺 𑁋 ‘‘𑀓𑀳𑀁 𑀇𑀢𑁆𑀣𑀦𑁆𑀦𑀸𑀫𑀸, 𑀦 𑀤𑀺𑀲𑁆𑀲𑀢𑀻’’𑀢𑀺! ‘‘𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁, 𑀅𑀬𑁆𑀬𑁂, 𑀪𑀡𑁆𑀟𑀺𑀢𑁆𑀯𑀸 𑀦 𑀤𑀺𑀲𑁆𑀲𑀢𑀻’’𑀢𑀺. ‘‘𑀅𑀫𑁆𑀫𑀸, 𑀅𑀫𑀼𑀓𑀲𑁆𑀫𑀺𑀁 𑀕𑀸𑀫𑀓𑁂 𑀏𑀢𑀺𑀲𑁆𑀲𑀸 𑀜𑀸𑀢𑀺𑀓𑀼𑀮𑀁. 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀘𑀺𑀦𑀣𑀸’’𑀢𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀧𑀲𑁆𑀲𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀅𑀬𑁆𑀬𑁂, 𑀏𑀓𑀺𑀓𑀸 𑀆𑀕𑀢𑀸, 𑀓𑀘𑁆𑀘𑀺𑀲𑀺 𑀅𑀧𑁆𑀧𑀥𑀁𑀲𑀺𑀢𑀸’’𑀢𑀺? ‘‘𑀅𑀧𑁆𑀧𑀥𑀁𑀲𑀺𑀢𑀸𑀫𑁆𑀳𑀺, 𑀅𑀬𑁆𑀬𑁂’’𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁬𑁮𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀓𑁂𑀢𑀸 𑀲𑀸𑀯𑀢𑁆𑀣𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀤𑀻 𑀢𑀭𑀺𑀢𑀩𑁆𑀩𑀸 𑀳𑁄𑀢𑀺. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦𑀸𑀯𑀺𑀓𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀸𑀥𑀼 𑀦𑁄, 𑀆𑀯𑀼𑀲𑁄, 𑀢𑀸𑀭𑁂𑀣𑀸’’𑀢𑀺. ‘‘𑀦𑀸𑀬𑁆𑀬𑁂, 𑀲𑀓𑁆𑀓𑀸 𑀉𑀪𑁄 𑀲𑀓𑀺𑀁 𑀢𑀸𑀭𑁂𑀢𑀼’’𑀦𑁆𑀢𑀺. 𑀏𑀓𑁄 𑀏𑀓𑀁 𑀉𑀢𑁆𑀢𑀸𑀭𑁂𑀲𑀺. 𑀉𑀢𑁆𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑀁 𑀤𑀽𑀲𑁂𑀲𑀺. 𑀅𑀦𑀼𑀢𑁆𑀢𑀺𑀡𑁆𑀡𑁄 𑀅𑀦𑀼𑀢𑁆𑀢𑀺𑀡𑁆𑀡𑀁 𑀤𑀽𑀲𑁂𑀲𑀺. 𑀢𑀸 𑀧𑀘𑁆𑀙𑀸 𑀲𑀫𑀸𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀘𑁆𑀘𑀺𑀲𑀺, 𑀅𑀬𑁆𑀬𑁂, 𑀅𑀧𑁆𑀧𑀥𑀁𑀲𑀺𑀢𑀸’’𑀢𑀺? ‘‘𑀧𑀥𑀁𑀲𑀺𑀢𑀸𑀫𑁆𑀳𑀺, 𑀅𑀬𑁆𑀬𑁂! 𑀢𑁆𑀯𑀁 𑀧𑀦, 𑀅𑀬𑁆𑀬𑁂, 𑀅𑀧𑁆𑀧𑀥𑀁𑀲𑀺𑀢𑀸’’𑀢𑀺? ‘‘𑀧𑀥𑀁𑀲𑀺𑀢𑀸𑀫𑁆𑀳𑀺, 𑀅𑀬𑁆𑀬𑁂’’𑀢𑀺. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀯𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂𑀬𑁆𑀬, 𑀏𑀓𑀸 𑀯𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁬𑁮𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀸 [𑀕𑀦𑁆𑀢𑁆𑀯𑀸 (𑀓.)] 𑀲𑀸𑀬𑀁 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑀢𑁆𑀣 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀲𑀳 𑀤𑀲𑁆𑀲𑀦𑁂𑀦 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑁂𑀬𑁆𑀬𑀁 𑀧𑀜𑁆𑀜𑀧𑁂𑀦𑁆𑀢𑁄 𑀢𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀲𑁂𑀬𑁆𑀬𑀁 𑀏𑀓𑀫𑀦𑁆𑀢𑀁 𑀧𑀜𑁆𑀜𑀸𑀧𑁂𑀲𑀺. 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑁋 ‘‘𑀧𑀭𑀺𑀬𑀼𑀝𑁆𑀞𑀺𑀢𑁄 𑀅𑀬𑀁 𑀧𑀼𑀭𑀺𑀲𑁄; 𑀲𑀘𑁂 𑀭𑀢𑁆𑀢𑀺𑀁 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀯𑀺𑀲𑁆𑀲𑀭𑁄 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺, 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀸𑀧𑀼𑀘𑁆𑀙𑀸 𑀅𑀜𑁆𑀜𑀢𑀭𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀅𑀣 𑀔𑁄 𑀲𑁄 𑀧𑀼𑀭𑀺𑀲𑁄 𑀭𑀢𑁆𑀢𑀺𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀕𑀯𑁂𑀲𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀬𑁄 𑀖𑀝𑁆𑀝𑁂𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀅𑀧𑀲𑁆𑀲𑀦𑁆𑀢𑀺𑀬𑁄 𑀏𑀯𑀫𑀸𑀳𑀁𑀲𑀼 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸’’𑀢𑀺.

𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀬𑁂𑀦 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀅𑀬𑁆𑀬𑁂, 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸’’𑀢𑀺? ‘‘𑀦𑀸𑀳𑀁, 𑀅𑀬𑁆𑀬𑁂, 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑀸’’𑀢𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑀻𑀢𑀺 [𑀯𑀺𑀧𑁆𑀧𑀯𑀲𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀯𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂𑀬𑁆𑀬, 𑀏𑀓𑀸 𑀯𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀏𑀓𑀸 𑀯𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁬𑁯𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀼𑀦𑀺𑀬𑁄 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀲𑀸𑀯𑀢𑁆𑀣𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀜𑁆𑀜𑀢𑀭𑀸 𑀪𑀺𑀓𑁆𑀔𑀼𑀦𑀻 𑀯𑀘𑁆𑀘𑁂𑀦 𑀧𑀻𑀴𑀺𑀢𑀸 𑀏𑀓𑀺𑀓𑀸 𑀑𑀳𑀻𑀬𑀺𑀢𑁆𑀯𑀸 [𑀑𑀳𑀺𑀬𑀺𑀢𑁆𑀯𑀸 (𑀓.)] 𑀧𑀘𑁆𑀙𑀸 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀧𑀲𑁆𑀲𑀺𑀢𑁆𑀯𑀸 𑀤𑀽𑀲𑁂𑀲𑀼𑀁. 𑀅𑀣 𑀔𑁄 𑀲𑀸 𑀪𑀺𑀓𑁆𑀔𑀼𑀦𑀻 𑀬𑁂𑀦 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀅𑀬𑁆𑀬𑁂, 𑀏𑀓𑀺𑀓𑀸 𑀑𑀳𑀻𑀦𑀸, 𑀓𑀘𑁆𑀘𑀺𑀲𑀺 𑀅𑀧𑁆𑀧𑀥𑀁𑀲𑀺𑀢𑀸’’𑀢𑀺? ‘‘𑀧𑀥𑀁𑀲𑀺𑀢𑀸𑀫𑁆𑀳𑀺, 𑀅𑀬𑁆𑀬𑁂’’𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀡𑀫𑁆𑀳𑀸 𑀑𑀳𑀻𑀬𑀺𑀲𑁆𑀲𑀢𑀻𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀡𑀫𑁆𑀳𑀸 𑀑𑀳𑀻𑀬𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀕𑀡𑀫𑁆𑀳𑀸 𑀑𑀳𑀻𑀬𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁬𑁯𑁧. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀸 𑀯𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂𑀬𑁆𑀬, 𑀏𑀓𑀸 𑀯𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑁂𑀬𑁆𑀬, 𑀏𑀓𑀸 𑀯𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑁂𑀬𑁆𑀬, 𑀏𑀓𑀸 𑀯𑀸 𑀕𑀡𑀫𑁆𑀳𑀸 𑀑𑀳𑀻𑀬𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁬𑁯𑁨. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀏𑀓𑀸 𑀯𑀸 𑀕𑀸𑀫𑀦𑁆𑀢𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀁 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀸 𑀯𑀸 𑀦𑀤𑀻𑀧𑀸𑀭𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀦𑀤𑀻 𑀦𑀸𑀫 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀢𑁆𑀢𑀭𑀦𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀯𑀸𑀲𑀓𑁄 𑀢𑁂𑀫𑀺𑀬𑀢𑀺. 𑀧𑀞𑀫𑀁 𑀧𑀸𑀤𑀁 𑀉𑀢𑁆𑀢𑀭𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀉𑀢𑁆𑀢𑀭𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀸 𑀯𑀸 𑀭𑀢𑁆𑀢𑀺𑀁 𑀯𑀺𑀧𑁆𑀧𑀯𑀲𑁂𑀬𑁆𑀬𑀸𑀢𑀺 𑀲𑀳 𑀅𑀭𑀼𑀡𑀼𑀕𑁆𑀕𑀫𑀦𑀸 𑀤𑀼𑀢𑀺𑀬𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀯𑀺𑀚𑀳𑀺𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀸 𑀯𑀸 𑀕𑀡𑀫𑁆𑀳𑀸 𑀑𑀳𑀻𑀬𑁂𑀬𑁆𑀬𑀸𑀢𑀺 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀤𑀼𑀢𑀺𑀬𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀸 𑀲𑀯𑀦𑀽𑀧𑀘𑀸𑀭𑀁 𑀯𑀸 𑀯𑀺𑀚𑀳𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀯𑀺𑀚𑀳𑀺𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀸𑀬𑁄 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀧𑀞𑀫𑀸𑀧𑀢𑁆𑀢𑀺𑀓𑀦𑁆𑀢𑀺 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀆𑀧𑀚𑁆𑀚𑀢𑀺 𑀅𑀲𑀫𑀦𑀼𑀪𑀸𑀲𑀦𑀸𑀬.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁬𑁯𑁩. 𑀅𑀦𑀸𑀧𑀢𑁆𑀢𑀺 𑀤𑀼𑀢𑀺𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀧𑀓𑁆𑀓𑀦𑁆𑀢𑀸 𑀯𑀸 𑀳𑁄𑀢𑀺 𑀯𑀺𑀩𑁆𑀪𑀦𑁆𑀢𑀸 𑀯𑀸 𑀓𑀸𑀮𑀗𑁆𑀓𑀢𑀸 𑀯𑀸 𑀧𑀓𑁆𑀔𑀲𑀗𑁆𑀓𑀦𑁆𑀢𑀸 𑀯𑀸, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁪. 𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁬𑁯𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀪𑀡𑁆𑀟𑀦𑀓𑀸𑀭𑀺𑀓𑀸 𑀳𑁄𑀢𑀺 𑀓𑀮𑀳𑀓𑀸𑀭𑀺𑀓𑀸 𑀯𑀺𑀯𑀸𑀤𑀓𑀸𑀭𑀺𑀓𑀸 𑀪𑀲𑁆𑀲𑀓𑀸𑀭𑀺𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀺𑀓𑀸. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀢𑀲𑁆𑀲𑀸 𑀓𑀫𑁆𑀫𑁂 𑀓𑀭𑀻𑀬𑀫𑀸𑀦𑁂 𑀧𑀝𑀺𑀓𑁆𑀓𑁄𑀲𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀕𑀸𑀫𑀓𑀁 𑀅𑀕𑀫𑀸𑀲𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑁋 ‘‘𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀧𑀓𑁆𑀓𑀦𑁆𑀢𑀸’’𑀢𑀺, 𑀘𑀡𑁆𑀟𑀓𑀸𑀴𑀺𑀁 𑀪𑀺𑀓𑁆𑀔𑀼𑀦𑀺𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 [𑀅𑀤𑀲𑁆𑀲𑀦𑁂𑀦 (𑀓.)] 𑀉𑀓𑁆𑀔𑀺𑀧𑀺. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀕𑀸𑀫𑀓𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀘𑁆𑀙𑀺. 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀣𑀼𑀮𑁆𑀮𑀦𑀦𑁆𑀤𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀆𑀕𑀘𑁆𑀙𑀦𑁆𑀢𑀺𑀬𑀸 𑀦𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺 𑀦 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀞𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺 𑀦 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺 𑀦 𑀧𑀸𑀦𑀻𑀬𑁂𑀦 𑀆𑀧𑀼𑀘𑁆𑀙𑀺. 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀘𑀡𑁆𑀟𑀓𑀸𑀴𑀺𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀅𑀬𑁆𑀬𑁂, 𑀫𑀬𑀺 𑀆𑀕𑀘𑁆𑀙𑀦𑁆𑀢𑀺𑀬𑀸 𑀦𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺 𑀦 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀞𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺 𑀦 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺 𑀦 𑀧𑀸𑀦𑀻𑀬𑁂𑀦 𑀆𑀧𑀼𑀘𑁆𑀙𑀻’’𑀢𑀺? ‘‘𑀏𑀯𑀜𑁆𑀳𑁂𑀢𑀁, 𑀅𑀬𑁆𑀬𑁂, 𑀳𑁄𑀢𑀺 𑀬𑀣𑀸 𑀢𑀁 𑀅𑀦𑀸𑀣𑀸𑀬𑀸’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀅𑀬𑁆𑀬𑁂, 𑀅𑀦𑀸𑀣𑀸’’𑀢𑀺? ‘‘𑀇𑀫𑀸 𑀫𑀁, 𑀅𑀬𑁆𑀬𑁂, 𑀪𑀺𑀓𑁆𑀔𑀼𑀦𑀺𑀬𑁄 𑁋 ‘‘𑀅𑀬𑀁 𑀅𑀦𑀸𑀣𑀸 𑀅𑀧𑁆𑀧𑀜𑁆𑀜𑀸𑀢𑀸, 𑀦𑀢𑁆𑀣𑀺 𑀇𑀫𑀺𑀲𑁆𑀲𑀸 𑀓𑀸𑀘𑀺 𑀧𑀝𑀺𑀯𑀢𑁆𑀢𑀸’’𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 [𑀅𑀤𑀲𑁆𑀲𑀦𑁂𑀦 (𑀓.)] 𑀉𑀓𑁆𑀔𑀺𑀧𑀺𑀁𑀲𑀽’’𑀢𑀺.

𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑁋 ‘‘𑀩𑀸𑀮𑀸 𑀏𑀢𑀸 𑀅𑀩𑁆𑀬𑀢𑁆𑀢𑀸 𑀏𑀢𑀸, 𑀦𑁂𑀯 𑀚𑀸𑀦𑀦𑁆𑀢𑀺 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀤𑁄𑀲𑀁 𑀯𑀸 𑀓𑀫𑁆𑀫𑀯𑀺𑀧𑀢𑁆𑀢𑀺𑀁 𑀯𑀸 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀁 𑀯𑀸. 𑀫𑀬𑀁 𑀔𑁄 𑀚𑀸𑀦𑀸𑀫 𑀓𑀫𑁆𑀫𑀫𑁆𑀧𑀺 𑀓𑀫𑁆𑀫𑀤𑁄𑀲𑀫𑁆𑀧𑀺 𑀓𑀫𑁆𑀫𑀯𑀺𑀧𑀢𑁆𑀢𑀺𑀫𑁆𑀧𑀺 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀫𑁆𑀧𑀺. 𑀫𑀬𑀁 𑀔𑁄 𑀅𑀓𑀢𑀁 𑀯𑀸 𑀓𑀫𑁆𑀫𑀁 𑀓𑀸𑀭𑁂𑀬𑁆𑀬𑀸𑀫 𑀓𑀢𑀁 𑀯𑀸 𑀓𑀫𑁆𑀫𑀁 𑀓𑁄𑀧𑁂𑀬𑁆𑀬𑀸𑀫𑀸’’𑀢𑀺, 𑀮𑀳𑀼𑀁 𑀮𑀳𑀼𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀘𑀡𑁆𑀟𑀓𑀸𑀴𑀺𑀁 𑀪𑀺𑀓𑁆𑀔𑀼𑀦𑀺𑀁 𑀑𑀲𑀸𑀭𑁂𑀲𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀣𑀼𑀮𑁆𑀮𑀦𑀦𑁆𑀤𑀸 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀅𑀦𑀧𑀮𑁄𑀓𑁂𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀁 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀁 𑀑𑀲𑀸𑀭𑁂𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀅𑀦𑀧𑀮𑁄𑀓𑁂𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀁 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀁 𑀑𑀲𑀸𑀭𑁂𑀢𑀻𑀢𑀺 [𑀑𑀲𑀸𑀭𑁂𑀲𑀻𑀢𑀺 (𑀓.)]? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀅𑀦𑀧𑀮𑁄𑀓𑁂𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀁 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀁 𑀑𑀲𑀸𑀭𑁂𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁬𑁯𑁫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀉𑀓𑁆𑀔𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀥𑀫𑁆𑀫𑁂𑀦 𑀯𑀺𑀦𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀅𑀦𑀧𑀮𑁄𑀓𑁂𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀁 𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀁 𑀑𑀲𑀸𑀭𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁬𑁯𑁬. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀲𑀫𑀕𑁆𑀕𑁄 𑀦𑀸𑀫 𑀲𑀗𑁆𑀖𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄.

𑀉𑀓𑁆𑀔𑀺𑀢𑁆𑀢𑀸 𑀦𑀸𑀫 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 [𑀅𑀤𑀲𑁆𑀲𑀦𑁂𑀦 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂𑀦 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀯𑀸 (𑀓.), 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸 (?)] 𑀉𑀓𑁆𑀔𑀺𑀢𑁆𑀢𑀸.

𑀥𑀫𑁆𑀫𑁂𑀦 𑀯𑀺𑀦𑀬𑁂𑀦𑀸𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦.

𑀲𑀢𑁆𑀣𑀼𑀲𑀸𑀲𑀦𑁂𑀦𑀸𑀢𑀺 𑀚𑀺𑀦𑀲𑀸𑀲𑀦𑁂𑀦 𑀩𑀼𑀤𑁆𑀥𑀲𑀸𑀲𑀦𑁂𑀦.

𑀅𑀦𑀧𑀮𑁄𑀓𑁂𑀢𑁆𑀯𑀸 𑀓𑀸𑀭𑀓𑀲𑀗𑁆𑀖𑀦𑁆𑀢𑀺 𑀓𑀫𑁆𑀫𑀓𑀸𑀭𑀓𑀲𑀗𑁆𑀖𑀁 𑀅𑀦𑀸𑀧𑀼𑀘𑁆𑀙𑀸.

𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀦𑁆𑀢𑀺 𑀕𑀡𑀲𑁆𑀲 𑀙𑀦𑁆𑀤𑀁 𑀅𑀚𑀸𑀦𑀺𑀢𑁆𑀯𑀸.

‘‘𑀑𑀲𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀡𑀁 𑀯𑀸 𑀧𑀭𑀺𑀬𑁂𑀲𑀢𑀺, 𑀲𑀻𑀫𑀁 𑀯𑀸 𑀲𑀫𑁆𑀫𑀦𑁆𑀦𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀸𑀬𑁄 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀧𑀞𑀫𑀸𑀧𑀢𑁆𑀢𑀺𑀓𑀦𑁆𑀢𑀺 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀆𑀧𑀚𑁆𑀚𑀢𑀺 𑀅𑀲𑀫𑀦𑀼𑀪𑀸𑀲𑀦𑀸𑀬.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁬𑁯𑁭. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀑𑀲𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀑𑀲𑀸𑀭𑁂𑀢𑀺 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀑𑀲𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁬𑁯𑁮. 𑀅𑀦𑀸𑀧𑀢𑁆𑀢𑀺 𑀓𑀫𑁆𑀫𑀓𑀸𑀭𑀓𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑁆𑀯𑀸 𑀑𑀲𑀸𑀭𑁂𑀢𑀺, 𑀕𑀡𑀲𑁆𑀲 𑀙𑀦𑁆𑀤𑀁 𑀚𑀸𑀦𑀺𑀢𑁆𑀯𑀸 𑀑𑀲𑀸𑀭𑁂𑀢𑀺, 𑀯𑀢𑁆𑀢𑁂 𑀯𑀢𑁆𑀢𑀦𑁆𑀢𑀺𑀁 𑀑𑀲𑀸𑀭𑁂𑀢𑀺, 𑀅𑀲𑀦𑁆𑀢𑁂 𑀓𑀫𑁆𑀫𑀓𑀸𑀭𑀓𑀲𑀗𑁆𑀖𑁂 𑀑𑀲𑀸𑀭𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁫. 𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁬𑁯𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀫𑀦𑀼𑀲𑁆𑀲𑀸 𑀪𑀢𑁆𑀢𑀕𑁆𑀕𑁂 𑀲𑀼𑀦𑁆𑀤𑀭𑀻𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀧𑀲𑁆𑀲𑀺𑀢𑁆𑀯𑀸 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀸𑀬 𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀕𑁆𑀕𑀫𑀕𑁆𑀕𑀸𑀦𑀺 𑀪𑁄𑀚𑀦𑀸𑀦𑀺 𑀤𑁂𑀦𑁆𑀢𑀺. 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀢𑀺; 𑀅𑀜𑁆𑀜𑀸 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀘𑀺𑀢𑁆𑀢𑀭𑀽𑀧𑀁 𑀮𑀪𑀦𑁆𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀢𑀺 𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤𑀢𑀺 𑀪𑀼𑀜𑁆𑀚𑀢𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀢𑀺 𑀪𑀼𑀜𑁆𑀚𑀺𑀲𑁆𑀲𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁭𑁦𑁦. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁭𑁦𑁧. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀅𑀯𑀲𑁆𑀲𑀼𑀢𑀸 𑀦𑀸𑀫 𑀲𑀸𑀭𑀢𑁆𑀢𑀸 𑀅𑀧𑁂𑀓𑁆𑀔𑀯𑀢𑀻 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸.

𑀅𑀯𑀲𑁆𑀲𑀼𑀢𑁄 𑀦𑀸𑀫 𑀲𑀸𑀭𑀢𑁆𑀢𑁄 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄.

𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀦𑀸𑀫 𑀫𑀦𑀼𑀲𑁆𑀲𑀧𑀼𑀭𑀺𑀲𑁄, 𑀦 𑀬𑀓𑁆𑀔𑁄 𑀦 𑀧𑁂𑀢𑁄 𑀦 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀯𑀺𑀜𑁆𑀜𑀽 𑀧𑀝𑀺𑀩𑀮𑁄 𑀲𑀸𑀭𑀚𑁆𑀚𑀺𑀢𑀼𑀁.

𑀔𑀸𑀤𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀺 𑁋 𑀉𑀤𑀓𑀤𑀦𑁆𑀢𑀧𑁄𑀦𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫.

𑀪𑁄𑀚𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀺 𑁋 𑀑𑀤𑀦𑁄, 𑀓𑀼𑀫𑁆𑀫𑀸𑀲𑁄, 𑀲𑀢𑁆𑀢𑀼, 𑀫𑀘𑁆𑀙𑁄, 𑀫𑀁𑀲𑀁.

‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀸𑀬𑁄 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀧𑀞𑀫𑀸𑀧𑀢𑁆𑀢𑀺𑀓𑀦𑁆𑀢𑀺 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀆𑀧𑀚𑁆𑀚𑀢𑀺 𑀅𑀲𑀫𑀦𑀼𑀪𑀸𑀲𑀦𑀸𑀬.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀉𑀤𑀓𑀤𑀦𑁆𑀢𑀧𑁄𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀏𑀓𑀢𑁄𑀅𑀯𑀲𑁆𑀲𑀼𑀢𑁂 ‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁭𑁦𑁨. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀉𑀤𑀓𑀤𑀦𑁆𑀢𑀧𑁄𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀉𑀪𑀢𑁄𑀅𑀯𑀲𑁆𑀲𑀼𑀢𑁂 𑀬𑀓𑁆𑀔𑀲𑁆𑀲 𑀯𑀸 𑀧𑁂𑀢𑀲𑁆𑀲 𑀯𑀸 𑀧𑀡𑁆𑀟𑀓𑀲𑁆𑀲 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲 𑀯𑀸 𑀳𑀢𑁆𑀣𑀢𑁄 ‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀉𑀤𑀓𑀤𑀦𑁆𑀢𑀧𑁄𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀏𑀓𑀢𑁄𑀅𑀯𑀲𑁆𑀲𑀼𑀢𑁂 ‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀉𑀤𑀓𑀤𑀦𑁆𑀢𑀧𑁄𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁭𑁦𑁩. 𑀅𑀦𑀸𑀧𑀢𑁆𑀢𑀺 𑀉𑀪𑀢𑁄𑀅𑀦𑀯𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, ‘‘𑀅𑀦𑀯𑀲𑁆𑀲𑀼𑀢𑁄’’𑀢𑀺 𑀚𑀸𑀦𑀦𑁆𑀢𑀻 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁬. 𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁦𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀫𑀦𑀼𑀲𑁆𑀲𑀸 𑀪𑀢𑁆𑀢𑀕𑁆𑀕𑁂 𑀲𑀼𑀦𑁆𑀤𑀭𑀻𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀧𑀲𑁆𑀲𑀺𑀢𑁆𑀯𑀸 𑀅𑀯𑀲𑁆𑀲𑀼𑀢𑀸 𑀲𑀼𑀦𑁆𑀤𑀭𑀻𑀦𑀦𑁆𑀤𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀕𑁆𑀕𑀫𑀕𑁆𑀕𑀸𑀦𑀺 𑀪𑁄𑀚𑀦𑀸𑀦𑀺 𑀤𑁂𑀦𑁆𑀢𑀺. 𑀲𑀼𑀦𑁆𑀤𑀭𑀻𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀻 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀅𑀦𑀦𑁆𑀢𑀭𑀺𑀓𑀸 𑀪𑀺𑀓𑁆𑀔𑀼𑀦𑀻 𑀲𑀼𑀦𑁆𑀤𑀭𑀻𑀦𑀦𑁆𑀤𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀅𑀬𑁆𑀬𑁂, 𑀦 𑀧𑀝𑀺𑀕𑁆𑀕𑀡𑁆𑀳𑀸𑀲𑀻’’𑀢𑀺? ‘‘𑀅𑀯𑀲𑁆𑀲𑀼𑀢𑀸, 𑀅𑀬𑁆𑀬𑁂’’𑀢𑀺. ‘‘𑀢𑁆𑀯𑀁 𑀧𑀦, 𑀅𑀬𑁆𑀬𑁂, 𑀅𑀯𑀲𑁆𑀲𑀼𑀢𑀸’’𑀢𑀺? ‘‘𑀦𑀸𑀳𑀁, 𑀅𑀬𑁆𑀬𑁂, 𑀅𑀯𑀲𑁆𑀲𑀼𑀢𑀸’’𑀢𑀺. ‘‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀺 𑀅𑀯𑀲𑁆𑀲𑀼𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁄 𑀯𑀸, 𑀬𑀢𑁄 𑀢𑁆𑀯𑀁 𑀅𑀦𑀯𑀲𑁆𑀲𑀼𑀢𑀸. 𑀇𑀗𑁆𑀖𑀁, 𑀅𑀬𑁆𑀬𑁂, 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀢𑀁 𑀢𑁆𑀯𑀁 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤 𑀯𑀸, 𑀪𑀼𑀜𑁆𑀚 𑀯𑀸’’𑀢𑀺.

𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀓𑁆𑀔𑀢𑀺 𑁋 ‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀺 𑀅𑀯𑀲𑁆𑀲𑀼𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁄 𑀯𑀸, 𑀬𑀢𑁄 𑀢𑁆𑀯𑀁 𑀅𑀦𑀯𑀲𑁆𑀲𑀼𑀢𑀸. 𑀇𑀗𑁆𑀖, 𑀅𑀬𑁆𑀬𑁂, 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀢𑀁 𑀢𑁆𑀯𑀁 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀤𑁂𑀢𑀺 𑁋 ‘‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀺 𑀅𑀯𑀲𑁆𑀲𑀼𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁄 𑀯𑀸 𑀬𑀢𑁄 𑀢𑁆𑀯𑀁 𑀅𑀦𑀯𑀲𑁆𑀲𑀼𑀢𑀸! 𑀇𑀗𑁆𑀖, 𑀅𑀬𑁆𑀬𑁂, 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀢𑀁 𑀢𑁆𑀯𑀁 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀓𑁆𑀔𑀢𑀺 𑁋 ‘‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀺 𑀅𑀯𑀲𑁆𑀲𑀼𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁄 𑀯𑀸 𑀬𑀢𑁄 𑀢𑁆𑀯𑀁 𑀅𑀦𑀯𑀲𑁆𑀲𑀼𑀢𑀸; 𑀇𑀗𑁆𑀖, 𑀅𑀬𑁆𑀬𑁂, 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀢𑀁 𑀢𑁆𑀯𑀁 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁭𑁦𑁫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀺 𑀅𑀯𑀲𑁆𑀲𑀼𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁄 𑀯𑀸, 𑀬𑀢𑁄 𑀢𑁆𑀯𑀁 𑀅𑀦𑀯𑀲𑁆𑀲𑀼𑀢𑀸. 𑀇𑀗𑁆𑀖, 𑀅𑀬𑁆𑀬𑁂, 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀢𑀁 𑀢𑁆𑀯𑀁 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’𑀢𑀺, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀧𑀞𑀫𑀸𑀧𑀢𑁆𑀢𑀺𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁭𑁦𑁬. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑁋 ‘‘𑀓𑀺𑀁 𑀢𑁂, 𑀅𑀬𑁆𑀬𑁂, 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀭𑀺𑀲𑁆𑀲𑀢𑀺 𑀅𑀯𑀲𑁆𑀲𑀼𑀢𑁄 𑀯𑀸 𑀅𑀦𑀯𑀲𑁆𑀲𑀼𑀢𑁄 𑀯𑀸, 𑀬𑀢𑁄 𑀢𑁆𑀯𑀁 𑀅𑀦𑀯𑀲𑁆𑀲𑀼𑀢𑀸. 𑀇𑀗𑁆𑀖, 𑀅𑀬𑁆𑀬𑁂, 𑀬𑀁 𑀢𑁂 𑀏𑀲𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀤𑁂𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀢𑀁 𑀢𑁆𑀯𑀁 𑀲𑀳𑀢𑁆𑀣𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲𑀸 𑀯𑀘𑀦𑁂𑀦 ‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀸𑀬𑁄 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀧𑀞𑀫𑀸𑀧𑀢𑁆𑀢𑀺𑀓𑀦𑁆𑀢𑀺 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸 𑀆𑀧𑀚𑁆𑀚𑀢𑀺 𑀅𑀲𑀫𑀦𑀼𑀪𑀸𑀲𑀦𑀸𑀬.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀉𑀤𑀓𑀤𑀦𑁆𑀢𑀧𑁄𑀦𑀁 ‘‘𑀧𑀝𑀺𑀕𑁆𑀕𑀡𑁆𑀳𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲𑀸 𑀯𑀘𑀦𑁂𑀦 𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁭𑁦𑁭. 𑀏𑀓𑀢𑁄𑀅𑀯𑀲𑁆𑀲𑀼𑀢𑁂 𑀬𑀓𑁆𑀔𑀲𑁆𑀲 𑀯𑀸 𑀧𑁂𑀢𑀲𑁆𑀲 𑀯𑀸 𑀧𑀡𑁆𑀟𑀓𑀲𑁆𑀲 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲 𑀯𑀸 𑀳𑀢𑁆𑀣𑀢𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 ‘‘𑀔𑀸𑀤 𑀯𑀸 𑀪𑀼𑀜𑁆𑀚 𑀯𑀸’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲𑀸 𑀯𑀘𑀦𑁂𑀦 ‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀉𑀤𑀓𑀤𑀦𑁆𑀢𑀧𑁄𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀲𑁆𑀲𑀸 𑀯𑀘𑀦𑁂𑀦 ‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁭𑁦𑁮. 𑀅𑀦𑀸𑀧𑀢𑁆𑀢𑀺 ‘‘𑀅𑀦𑀯𑀲𑁆𑀲𑀼𑀢𑁄’’𑀢𑀺 𑀚𑀸𑀦𑀦𑁆𑀢𑀻 𑀉𑀬𑁆𑀬𑁄𑀚𑁂𑀢𑀺, ‘‘𑀓𑀼𑀧𑀺𑀢𑀸 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, ‘‘𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁭. 𑀲𑀢𑁆𑀢𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁦𑁯. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄, 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀘𑀡𑁆𑀟𑀓𑀸𑀴𑀻 [𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 (𑀓.)] 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀓𑁆𑀔𑀢𑀺 𑁋 𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄, 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄, 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀓𑁆𑀔𑀢𑀺 𑁋 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄, 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁭𑁧𑁦. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄! 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’𑀢𑀺, 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀏𑀯𑀫𑀲𑁆𑀲 𑀯𑀘𑀦𑀻𑀬𑀸 𑁋 ‘𑀫𑀸𑀬𑁆𑀬𑁂, 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀅𑀯𑀘 𑁋 𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄! 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻𑀢𑀺, 𑀅𑀪𑀺𑀭𑀫𑀸𑀬𑁆𑀬𑁂, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄; 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’𑀢𑀺. 𑀏𑀯𑀜𑁆𑀘 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀧𑀕𑁆𑀕𑀡𑁆𑀳𑁂𑀬𑁆𑀬, 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀬𑀸𑀯𑀢𑀢𑀺𑀬𑀜𑁆𑀘𑁂 𑀲𑀫𑀦𑀼𑀪𑀸𑀲𑀻𑀬𑀫𑀸𑀦𑀸 𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀬𑀸𑀯𑀢𑀢𑀺𑀬𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁭𑁧𑁧. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸𑀢𑀺 𑀅𑀦𑀪𑀺𑀭𑀤𑁆𑀥𑀸 𑀆𑀳𑀢𑀘𑀺𑀢𑁆𑀢𑀸 𑀔𑀺𑀮𑀚𑀸𑀢𑀸.

𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑁋 ‘‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄! 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’’𑀢𑀺.

𑀲𑀸 𑀪𑀺𑀓𑁆𑀔𑀼𑀦𑀻𑀢𑀺 𑀬𑀸 𑀲𑀸 𑀏𑀯𑀁𑀯𑀸𑀤𑀺𑀦𑀻 𑀪𑀺𑀓𑁆𑀔𑀼𑀦𑀻. 𑀪𑀺𑀓𑁆𑀔𑀼𑀦𑀻𑀳𑀻𑀢𑀺 𑀅𑀜𑁆𑀜𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺.

𑀬𑀸 𑀧𑀲𑁆𑀲𑀦𑁆𑀢𑀺 𑀬𑀸 𑀲𑀼𑀡𑀦𑁆𑀢𑀺 𑀢𑀸𑀳𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸𑀬𑁆𑀬𑁂, 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀅𑀯𑀘 𑁋 ‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄! 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’𑀢𑀺. 𑀅𑀪𑀺𑀭𑀫𑀸𑀬𑁆𑀬𑁂, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄; 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀲𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀫𑀚𑁆𑀛𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸 𑁋 ‘‘𑀫𑀸𑀬𑁆𑀬𑁂, 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀅𑀯𑀘 𑁋 ‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄! 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’𑀢𑀺. 𑀅𑀪𑀺𑀭𑀫𑀸𑀬𑁆𑀬𑁂, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄; 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀯𑀢𑁆𑀢𑀩𑁆𑀩𑀸. 𑀲𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁, 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀮𑀸𑀬 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁭𑁧𑁨. ‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀢𑀺 𑁋 ‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀥𑀫𑁆𑀫𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀗𑁆𑀖𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄! 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’𑀢𑀺. 𑀲𑀸 𑀢𑀁 𑀯𑀢𑁆𑀣𑀼𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀦𑀺𑀁 𑀲𑀫𑀦𑀼𑀪𑀸𑀲𑁂𑀬𑁆𑀬 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀅𑀬𑁆𑀬𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀢𑀺 𑁋 ‘𑀩𑀼𑀤𑁆𑀥𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺…𑀧𑁂… 𑀲𑀺𑀓𑁆𑀔𑀁 𑀧𑀘𑁆𑀘𑀸𑀘𑀺𑀓𑁆𑀔𑀸𑀫𑀺. 𑀓𑀺𑀦𑁆𑀦𑀼𑀫𑀸𑀯 𑀲𑀫𑀡𑀺𑀬𑁄 𑀬𑀸 𑀲𑀫𑀡𑀺𑀬𑁄 𑀲𑀓𑁆𑀬𑀥𑀻𑀢𑀭𑁄! 𑀲𑀦𑁆𑀢𑀜𑁆𑀜𑀸𑀧𑀺 𑀲𑀫𑀡𑀺𑀬𑁄 𑀮𑀚𑁆𑀚𑀺𑀦𑀺𑀬𑁄 𑀓𑀼𑀓𑁆𑀓𑀼𑀘𑁆𑀘𑀺𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻’𑀢𑀺. 𑀲𑀸 𑀢𑀁 𑀯𑀢𑁆𑀣𑀼𑀁 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀦𑀺𑀁 𑀲𑀫𑀦𑀼𑀪𑀸𑀲𑀢𑀺 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀬𑀲𑁆𑀲𑀸 𑀅𑀬𑁆𑀬𑀸𑀬 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀫𑀦𑀼𑀪𑀸𑀲𑀦𑀸 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬, 𑀲𑀸 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲𑀸 𑀦𑀓𑁆𑀔𑀫𑀢𑀺 𑀲𑀸, 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂….

‘‘𑀲𑀫𑀦𑀼𑀪𑀝𑁆𑀞𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀸 𑀪𑀺𑀓𑁆𑀔𑀼𑀦𑀻 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸. 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀺𑀬𑀸 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁, 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑀸𑀬𑁄 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀬𑀸𑀯𑀢𑀢𑀺𑀬𑀓𑀦𑁆𑀢𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀆𑀧𑀚𑁆𑀚𑀢𑀺, 𑀦 𑀲𑀳 𑀯𑀢𑁆𑀣𑀼𑀚𑁆𑀛𑀸𑀘𑀸𑀭𑀸.

𑀦𑀺𑀲𑁆𑀲𑀸𑀭𑀡𑀻𑀬𑀦𑁆𑀢𑀺 𑀲𑀗𑁆𑀖𑀫𑁆𑀳𑀸 𑀦𑀺𑀲𑁆𑀲𑀸𑀭𑀻𑀬𑀢𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁭𑁧𑁩. 𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀥𑀫𑁆𑀫𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁭𑁧𑁪. 𑀅𑀦𑀸𑀧𑀢𑁆𑀢𑀺 𑀅𑀲𑀫𑀦𑀼𑀪𑀸𑀲𑀦𑁆𑀢𑀺𑀬𑀸, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺𑀬𑀸, 𑀉𑀫𑁆𑀫𑀢𑁆𑀢𑀺𑀓𑀸𑀬, 𑀆𑀤𑀺𑀓𑀫𑁆𑀫𑀺𑀓𑀸𑀬𑀸𑀢𑀺.

𑀲𑀢𑁆𑀢𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁.

𑁮. 𑀅𑀝𑁆𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀁

𑁭𑁧𑁫. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄, 𑀤𑁄𑀲𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄, 𑀫𑁄𑀳𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄, 𑀪𑀬𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺. 𑀬𑀸 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑀸 𑀘𑀡𑁆𑀟𑀓𑀸𑀴𑀻 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀓𑁆𑀔𑀢𑀺 𑁋 𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀪𑀬𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀪𑀬𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀘𑀡𑁆𑀟𑀓𑀸𑀴𑀻 𑀪𑀺𑀓𑁆𑀔𑀼𑀦𑀻 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀓𑁆𑀔𑀢𑀺 𑁋 ‘‘𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀪𑀬𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑀦𑁆𑀢𑀼 𑁋

𑁭𑁧𑁬. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄, 𑀤𑁄𑀲𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄, 𑀫𑁄𑀳𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄, 𑀪𑀬𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄’𑀢𑀺, 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀏𑀯𑀫𑀲𑁆𑀲 𑀯𑀘𑀦𑀻𑀬𑀸 𑁋 ‘𑀫𑀸𑀬𑁆𑀬𑁂, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂 𑀧𑀘𑁆𑀘𑀸𑀓𑀢𑀸 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀏𑀯𑀁 𑀅𑀯𑀘 𑁋 𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀤𑁄𑀲𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀫𑁄𑀳𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀪𑀬𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄𑀢𑀺. 𑀅𑀬𑁆𑀬𑀸 𑀔𑁄 𑀙𑀦𑁆𑀤𑀸𑀧𑀺 𑀕𑀘𑁆𑀙𑁂𑀬𑁆𑀬, 𑀤𑁄𑀲𑀸𑀧𑀺 𑀕𑀘𑁆𑀙𑁂𑀬𑁆𑀬, 𑀫𑁄𑀳𑀸𑀧𑀺 𑀕𑀘𑁆𑀙𑁂𑀬𑁆𑀬, 𑀪𑀬𑀸𑀧𑀺 𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀏𑀯𑀜𑁆𑀘 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀧𑀕𑁆𑀕𑀡𑁆𑀳𑁂𑀬𑁆𑀬, 𑀲𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀳𑀺 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸 𑀢𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬. 𑀬𑀸𑀯𑀢𑀢𑀺𑀬𑀜𑁆𑀘𑁂 𑀲𑀫𑀦𑀼𑀪𑀸𑀲𑀻𑀬𑀫𑀸𑀦𑀸 𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁; 𑀦𑁄 𑀘𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀬𑁆𑀬, 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼𑀦𑀻 𑀬𑀸𑀯𑀢𑀢𑀺𑀬𑀓𑀁 𑀥𑀫𑁆𑀫𑀁 𑀆𑀧𑀦𑁆𑀦𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑁭𑁧𑁭. 𑀬𑀸 𑀧𑀦𑀸𑀢𑀺 𑀬𑀸 𑀬𑀸𑀤𑀺𑀲𑀸…𑀧𑁂… 𑀪𑀺𑀓𑁆𑀔𑀼𑀦𑀻𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀼𑀦𑀻𑀢𑀺.

𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀥𑀺𑀓𑀭𑀡𑁂𑀢𑀺 𑀅𑀥𑀺𑀓𑀭𑀡𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁.

𑀧𑀘𑁆𑀘𑀸𑀓𑀢𑀸 𑀦𑀸𑀫 𑀧𑀭𑀸𑀚𑀺𑀢𑀸 𑀯𑀼𑀘𑁆𑀘𑀢𑀺.

𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸𑀢𑀺 𑀅𑀦𑀪𑀺𑀭𑀤𑁆𑀥𑀸 𑀆𑀳𑀢𑀘𑀺𑀢𑁆𑀢𑀸 𑀔𑀺𑀮𑀚𑀸𑀢𑀸.

𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑁋 ‘‘𑀙𑀦𑁆𑀤𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄…𑀧𑁂… 𑀪𑀬𑀕𑀸𑀫𑀺𑀦𑀺𑀬𑁄 𑀘 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺.