𑁮. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀁

𑁨𑁫𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀉𑀧𑀚𑁆𑀛𑀸𑀬𑁄 𑀆𑀬𑀲𑁆𑀫𑀸 𑀩𑁂𑀮𑀝𑁆𑀞𑀲𑀻𑀲𑁄 [𑀩𑁂𑀮𑀝𑁆𑀞𑀺𑀲𑀻𑀲𑁄 (𑀲𑀻.) 𑀯𑁂𑀴𑀝𑁆𑀞𑀲𑀻𑀲𑁄 (𑀲𑁆𑀬𑀸.)] 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀲𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀼𑀓𑁆𑀔𑀓𑀼𑀭𑀁 𑀆𑀭𑀸𑀫𑀁 𑀳𑀭𑀺𑀢𑁆𑀯𑀸 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀢𑀺. 𑀬𑀤𑀸 𑀆𑀳𑀸𑀭𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀸 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀘𑀺𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀩𑁂𑀮𑀝𑁆𑀞𑀲𑀻𑀲𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀘𑀺𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀲𑀻’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀩𑁂𑀮𑀝𑁆𑀞𑀲𑀻𑀲𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑀲𑀻’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀩𑁂𑀮𑀝𑁆𑀞𑀲𑀻𑀲𑁄 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺…𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀩𑁂𑀮𑀝𑁆𑀞𑀲𑀻𑀲, 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑀲𑀻𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀩𑁂𑀮𑀝𑁆𑀞𑀲𑀻𑀲, 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀲𑁆𑀲𑀲𑀺! 𑀦𑁂𑀢𑀁, 𑀩𑁂𑀮𑀝𑁆𑀞𑀲𑀻𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁫𑁩. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁨𑁫𑁪. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀦𑀸𑀫 𑀅𑀚𑁆𑀚 𑀧𑀝𑀺𑀕𑁆𑀕𑀳𑀺𑀢𑀁 𑀅𑀧𑀭𑀚𑁆𑀚𑀼 𑀔𑀸𑀤𑀺𑀢𑀁 𑀳𑁄𑀢𑀺.

𑀔𑀸𑀤𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀺 𑁋 𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫.

𑀪𑁄𑀚𑀦𑀻𑀬𑀁 𑀦𑀸𑀫 𑀧𑀜𑁆𑀘 𑀪𑁄𑀚𑀦𑀸𑀦𑀺 𑁋 𑀑𑀤𑀦𑁄, 𑀓𑀼𑀫𑁆𑀫𑀸𑀲𑁄, 𑀲𑀢𑁆𑀢𑀼, 𑀫𑀘𑁆𑀙𑁄, 𑀫𑀁𑀲𑀁.

‘‘𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁨𑁫𑁫. 𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀯𑁂𑀫𑀢𑀺𑀓𑁄 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑁂 𑀅𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁨𑁫𑁬. 𑀅𑀦𑀸𑀧𑀢𑁆𑀢𑀺 𑀬𑀸𑀯𑀓𑀸𑀮𑀺𑀓𑀁 𑀬𑀸𑀯𑀓𑀸𑀮𑁂 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀬𑀸𑀫𑀓𑀸𑀮𑀺𑀓𑀁 𑀬𑀸𑀫𑁂 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀁 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀬𑀸𑀯𑀚𑀻𑀯𑀺𑀓𑀁 𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.