𑁯. 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁

𑁨𑁫𑁭. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺! 𑀓𑀲𑁆𑀲 𑀲𑀫𑁆𑀧𑀦𑁆𑀦𑀁 𑀦 𑀫𑀦𑀸𑀧𑀁, 𑀓𑀲𑁆𑀲 𑀲𑀸𑀤𑀼𑀁 𑀦 𑀭𑀼𑀘𑁆𑀘𑀢𑀻’’𑀢𑀺!! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 …𑀧𑁂… 𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀣𑀸𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 …𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁 𑀫𑀘𑁆𑀙𑁄 𑀫𑀁𑀲𑀁 𑀔𑀻𑀭𑀁 𑀤𑀥𑀺. 𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀯𑀭𑀽𑀧𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁨𑁫𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀕𑀺𑀮𑀸𑀦𑀸 𑀳𑁄𑀦𑁆𑀢𑀺. 𑀕𑀺𑀮𑀸𑀦𑀧𑀼𑀘𑁆𑀙𑀓𑀸 𑀪𑀺𑀓𑁆𑀔𑀽 𑀕𑀺𑀮𑀸𑀦𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀘𑁆𑀘𑀸𑀯𑀼𑀲𑁄 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺? ‘‘𑀧𑀼𑀩𑁆𑀩𑁂 𑀫𑀬𑀁, 𑀆𑀯𑀼𑀲𑁄, 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀸𑀫, 𑀢𑁂𑀦 𑀦𑁄 𑀨𑀸𑀲𑀼 𑀳𑁄𑀢𑀺; 𑀇𑀤𑀸𑀦𑀺 𑀧𑀦 ‘‘𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦 𑀯𑀺𑀜𑁆𑀜𑀸𑀧𑁂𑀫, 𑀢𑁂𑀦 𑀦𑁄 𑀦 𑀨𑀸𑀲𑀼 𑀳𑁄𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁫𑁯. ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀧𑁆𑀧𑀺 𑀦𑀯𑀦𑀻𑀢𑀁 𑀢𑁂𑀮𑀁 𑀫𑀥𑀼 𑀨𑀸𑀡𑀺𑀢𑀁 𑀫𑀘𑁆𑀙𑁄 𑀫𑀁𑀲𑀁 𑀔𑀻𑀭𑀁 𑀤𑀥𑀺. 𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀯𑀭𑀽𑀧𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁨𑁬𑁦. 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀻𑀢𑀺 𑀲𑀧𑁆𑀧𑀺 𑀦𑀸𑀫 𑀕𑁄𑀲𑀧𑁆𑀧𑀺 𑀯𑀸 𑀅𑀚𑀺𑀓𑀸𑀲𑀧𑁆𑀧𑀺 𑀯𑀸 𑀫𑀳𑀺𑀁𑀲𑀲𑀧𑁆𑀧𑀺 𑀯𑀸, 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺 𑀢𑁂𑀲𑀁 𑀲𑀧𑁆𑀧𑀺.

𑀦𑀯𑀦𑀻𑀢𑀁 𑀦𑀸𑀫 𑀢𑁂𑀲𑀜𑁆𑀜𑁂𑀯 𑀦𑀯𑀦𑀻𑀢𑀁.

𑀢𑁂𑀮𑀁 𑀦𑀸𑀫 𑀢𑀺𑀮𑀢𑁂𑀮𑀁 𑀲𑀸𑀲𑀧𑀢𑁂𑀮𑀁 𑀫𑀥𑀼𑀓𑀢𑁂𑀮𑀁 𑀏𑀭𑀡𑁆𑀟𑀢𑁂𑀮𑀁 𑀯𑀲𑀸𑀢𑁂𑀮𑀁.

𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀼.

𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀁.

𑀫𑀘𑁆𑀙𑁄 𑀦𑀸𑀫 𑀉𑀤𑀓𑁄 [𑀉𑀤𑀓𑀘𑀭𑁄 (𑀲𑁆𑀬𑀸. 𑀓.)] 𑀯𑀼𑀘𑁆𑀘𑀢𑀺.

𑀫𑀁𑀲𑀁 𑀦𑀸𑀫 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀫𑀁𑀲𑀁.

𑀔𑀻𑀭𑀁 𑀦𑀸𑀫 𑀕𑁄𑀔𑀻𑀭𑀁 𑀯𑀸 𑀅𑀚𑀺𑀓𑀸𑀔𑀻𑀭𑀁 𑀯𑀸 𑀫𑀳𑀺𑀁𑀲𑀔𑀻𑀭𑀁 𑀯𑀸, 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀔𑀻𑀭𑀁.

𑀤𑀥𑀺 𑀦𑀸𑀫 𑀢𑁂𑀲𑀜𑁆𑀜𑁂𑀯 𑀤𑀥𑀺.

𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀏𑀯𑀭𑀽𑀧𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀻𑀢𑀺 𑀢𑀣𑀸𑀭𑀽𑀧𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀺.

𑀅𑀕𑀺𑀮𑀸𑀦𑁄 𑀦𑀸𑀫 𑀬𑀲𑁆𑀲 𑀯𑀺𑀦𑀸 𑀧𑀡𑀻𑀢𑀪𑁄𑀚𑀦𑀸𑀦𑀺 𑀨𑀸𑀲𑀼 𑀳𑁄𑀢𑀺.

𑀕𑀺𑀮𑀸𑀦𑁄 𑀦𑀸𑀫 𑀬𑀲𑁆𑀲 𑀯𑀺𑀦𑀸 𑀧𑀡𑀻𑀢𑀪𑁄𑀚𑀦𑀸𑀦𑀺 𑀦 𑀨𑀸𑀲𑀼 𑀳𑁄𑀢𑀺.

𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀧𑀬𑁄𑀕𑁂 [𑀧𑀬𑁄𑀕𑁂 𑀧𑀬𑁄𑀕𑁂 (𑀓.)] 𑀤𑀼𑀓𑁆𑀓𑀝𑀁. 𑀧𑀝𑀺𑀮𑀸𑀪𑁂𑀦 ‘‘𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁨𑁬𑁧. 𑀅𑀕𑀺𑀮𑀸𑀦𑁄 𑀅𑀕𑀺𑀮𑀸𑀦𑀲𑀜𑁆𑀜𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀕𑀺𑀮𑀸𑀦𑁄 𑀯𑁂𑀫𑀢𑀺𑀓𑁄 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀕𑀺𑀮𑀸𑀦𑁄 𑀕𑀺𑀮𑀸𑀦𑀲𑀜𑁆𑀜𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀕𑀺𑀮𑀸𑀦𑁄 𑀅𑀕𑀺𑀮𑀸𑀦𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀕𑀺𑀮𑀸𑀦𑁄 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀕𑀺𑀮𑀸𑀦𑁄 𑀕𑀺𑀮𑀸𑀦𑀲𑀜𑁆𑀜𑀻 𑀅𑀦𑀸𑀧𑀢𑁆𑀢𑀺.

𑁨𑁬𑁨. 𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲, 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀅𑀕𑀺𑀮𑀸𑀦𑁄 𑀪𑀼𑀜𑁆𑀚𑀢𑀺, 𑀕𑀺𑀮𑀸𑀦𑀲𑁆𑀲 𑀲𑁂𑀲𑀓𑀁 𑀪𑀼𑀜𑁆𑀚𑀢𑀺, 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀅𑀢𑁆𑀢𑀦𑁄 𑀥𑀦𑁂𑀦, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.