𑁮. 𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀁

𑁧𑁮𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 [𑀏𑀓𑀦𑀸𑀯𑀁 (𑀲𑁆𑀬𑀸.)] 𑀅𑀪𑀺𑀭𑀼𑀳𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀬𑀣𑁂𑀯 𑀫𑀬𑀁 𑀲𑀧𑀚𑀸𑀧𑀢𑀺𑀓𑀸 𑀦𑀸𑀯𑀸𑀬 [𑀏𑀓𑀦𑀸𑀯𑀸𑀬 (𑀲𑁆𑀬𑀸.)] 𑀓𑀻𑀴𑀸𑀫, 𑀏𑀯𑀫𑁂𑀯𑀺𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀦𑀸𑀯𑀸𑀬 𑀓𑀻𑀴𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀣𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 [𑀏𑀓𑀦𑀸𑀯𑀁 (𑀲𑁆𑀬𑀸.)] 𑀅𑀪𑀺𑀭𑀼𑀳𑁂𑀬𑁆𑀬, 𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁧𑁮𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀲𑀸𑀓𑁂𑀢𑀸 𑀲𑀸𑀯𑀢𑁆𑀣𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀤𑀻 𑀢𑀭𑀺𑀢𑀩𑁆𑀩𑀸 [𑀉𑀢𑁆𑀢𑀭𑀺𑀢𑀩𑁆𑀩𑀸 (𑀲𑁆𑀬𑀸.)] 𑀳𑁄𑀢𑀺. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀬𑀫𑁆𑀧𑀺 𑀅𑀬𑁆𑀬𑁂𑀳𑀺 𑀲𑀤𑁆𑀥𑀺𑀁 𑀉𑀢𑁆𑀢𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀦, 𑀪𑀕𑀺𑀦𑀻, 𑀓𑀧𑁆𑀧𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑀼𑀁; 𑀢𑀼𑀫𑁆𑀳𑁂 𑀯𑀸 𑀧𑀞𑀫𑀁 𑀉𑀢𑁆𑀢𑀭𑀣 𑀫𑀬𑀁 𑀯𑀸 𑀉𑀢𑁆𑀢𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀬𑁆𑀬𑀸, 𑀪𑀦𑁆𑀢𑁂, 𑀅𑀕𑁆𑀕𑀧𑀼𑀭𑀺𑀲𑀸. 𑀅𑀬𑁆𑀬𑀸𑀯 𑀧𑀞𑀫𑀁 𑀉𑀢𑁆𑀢𑀭𑀦𑁆𑀢𑀽’’𑀢𑀺. 𑀅𑀣 𑀔𑁄 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀘𑁆𑀙𑀸 𑀉𑀢𑁆𑀢𑀭𑀦𑁆𑀢𑀻𑀦𑀁 𑀘𑁄𑀭𑀸 𑀅𑀘𑁆𑀙𑀺𑀦𑁆𑀤𑀺𑀁𑀲𑀼 𑀘 𑀤𑀽𑀲𑁂𑀲𑀼𑀜𑁆𑀘. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑀺𑀬𑀁 𑀢𑀭𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁮𑁮. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑁂𑀬𑁆𑀬 𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸, 𑀅𑀜𑁆𑀜𑀢𑁆𑀭 𑀢𑀺𑀭𑀺𑀬𑀁 𑀢𑀭𑀡𑀸𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁮𑁯. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸.

𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄.

𑀲𑀁𑀯𑀺𑀥𑀸𑀬𑀸𑀢𑀺 ‘‘𑀅𑀪𑀺𑀭𑀼𑀳𑀸𑀫, 𑀪𑀕𑀺𑀦𑀺, 𑀅𑀪𑀺𑀭𑀼𑀳𑀸𑀫𑀸𑀬𑁆𑀬; 𑀅𑀪𑀺𑀭𑀼𑀳𑀸𑀫𑀸𑀬𑁆𑀬, 𑀅𑀪𑀺𑀭𑀼𑀳𑀸𑀫, 𑀪𑀕𑀺𑀦𑀺; 𑀅𑀚𑁆𑀚 𑀯𑀸 𑀳𑀺𑀬𑁆𑀬𑁄 𑀯𑀸 𑀧𑀭𑁂 𑀯𑀸 𑀅𑀪𑀺𑀭𑀼𑀳𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀢𑀺 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀺𑀭𑀼𑀴𑁆𑀳𑁂 𑀪𑀺𑀓𑁆𑀔𑀼 𑀅𑀪𑀺𑀭𑀼𑀳𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀪𑀺𑀓𑁆𑀔𑀼𑀫𑁆𑀳𑀺 𑀅𑀪𑀺𑀭𑀼𑀴𑁆𑀳𑁂 𑀪𑀺𑀓𑁆𑀔𑀼𑀦𑀻 𑀅𑀪𑀺𑀭𑀼𑀳𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀉𑀪𑁄 𑀯𑀸 𑀅𑀪𑀺𑀭𑀼𑀳𑀦𑁆𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀉𑀤𑁆𑀥𑀁𑀕𑀸𑀫𑀺𑀦𑀺𑀦𑁆𑀢𑀺 𑀉𑀚𑁆𑀚𑀯𑀦𑀺𑀓𑀸𑀬.

𑀅𑀥𑁄𑀕𑀸𑀫𑀺𑀦𑀺𑀦𑁆𑀢𑀺 𑀑𑀚𑀯𑀦𑀺𑀓𑀸𑀬.

𑀅𑀜𑁆𑀜𑀢𑁆𑀭 𑀢𑀺𑀭𑀺𑀬𑀁 𑀢𑀭𑀡𑀸𑀬𑀸𑀢𑀺 𑀞𑀧𑁂𑀢𑁆𑀯𑀸 𑀢𑀺𑀭𑀺𑀬𑀁 𑀢𑀭𑀡𑀁.

𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑁂 𑀕𑀸𑀫𑁂, 𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂, 𑀅𑀟𑁆𑀠𑀬𑁄𑀚𑀦𑁂 𑀅𑀟𑁆𑀠𑀬𑁄𑀚𑀦𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁯𑁦. 𑀲𑀁𑀯𑀺𑀤𑀳𑀺𑀢𑁂 𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀢𑀺 𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸, 𑀅𑀜𑁆𑀜𑀢𑁆𑀭 𑀢𑀺𑀭𑀺𑀬𑀁 𑀢𑀭𑀡𑀸𑀬, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀁𑀯𑀺𑀤𑀳𑀺𑀢𑁂 𑀯𑁂𑀫𑀢𑀺𑀓𑁄 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀢𑀺 𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸, 𑀅𑀜𑁆𑀜𑀢𑁆𑀭 𑀢𑀺𑀭𑀺𑀬𑀁 𑀢𑀭𑀡𑀸𑀬, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀁𑀯𑀺𑀤𑀳𑀺𑀢𑁂 𑀅𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻 𑀏𑀓𑀁 𑀦𑀸𑀯𑀁 𑀅𑀪𑀺𑀭𑀼𑀳𑀢𑀺 𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸, 𑀅𑀜𑁆𑀜𑀢𑁆𑀭 𑀢𑀺𑀭𑀺𑀬𑀁 𑀢𑀭𑀡𑀸𑀬, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀪𑀺𑀓𑁆𑀔𑀼 𑀲𑀁𑀯𑀺𑀤𑀳𑀢𑀺, 𑀪𑀺𑀓𑁆𑀔𑀼𑀦𑀻 𑀦 𑀲𑀁𑀯𑀺𑀤𑀳𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀁𑀯𑀺𑀤𑀳𑀺𑀢𑁂 𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀁𑀯𑀺𑀤𑀳𑀺𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀁𑀯𑀺𑀤𑀳𑀺𑀢𑁂, 𑀅𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁧𑁯𑁧. 𑀅𑀦𑀸𑀧𑀢𑁆𑀢𑀺 𑀢𑀺𑀭𑀺𑀬𑀁 𑀢𑀭𑀡𑀸𑀬, 𑀅𑀲𑀁𑀯𑀺𑀤𑀳𑀺𑀢𑁆𑀯𑀸 𑀅𑀪𑀺𑀭𑀼𑀳𑀦𑁆𑀢𑀺, 𑀪𑀺𑀓𑁆𑀔𑀼𑀦𑀻 𑀲𑀁𑀯𑀺𑀤𑀳𑀢𑀺, 𑀪𑀺𑀓𑁆𑀔𑀼 𑀦 𑀲𑀁𑀯𑀺𑀤𑀳𑀢𑀺, 𑀯𑀺𑀲𑀗𑁆𑀓𑁂𑀢𑁂𑀦 𑀅𑀪𑀺𑀭𑀼𑀳𑀦𑁆𑀢𑀺, 𑀆𑀧𑀤𑀸𑀲𑀼 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀲𑁆𑀲𑀸𑀢𑀺.

𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.