𑁯. 𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀁

𑁧𑁯𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀓𑀼𑀮𑀽𑀧𑀺𑀓𑀸 𑀳𑁄𑀢𑀺 𑀦𑀺𑀘𑁆𑀘𑀪𑀢𑁆𑀢𑀺𑀓𑀸. 𑀢𑁂𑀦 𑀘 𑀕𑀳𑀧𑀢𑀺𑀦𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑀺𑀢𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀢𑀁 𑀓𑀼𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀫𑀺𑀤𑀁, 𑀕𑀳𑀧𑀢𑀺, 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢’’𑀦𑁆𑀢𑀺? ‘‘𑀣𑁂𑀭𑀸 𑀫𑀬𑀸, 𑀅𑀬𑁆𑀬𑁂, 𑀦𑀺𑀫𑀦𑁆𑀢𑀺𑀢𑀸’’𑀢𑀺. ‘‘𑀓𑁂 𑀧𑀦 𑀢𑁂, 𑀕𑀳𑀧𑀢𑀺, 𑀣𑁂𑀭𑀸’’𑀢𑀺? ‘‘𑀅𑀬𑁆𑀬𑁄 𑀲𑀸𑀭𑀺𑀧𑀼𑀢𑁆𑀢𑁄 𑀅𑀬𑁆𑀬𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀬𑁆𑀬𑁄 𑀫𑀳𑀸𑀓𑀘𑁆𑀘𑀸𑀦𑁄 𑀅𑀬𑁆𑀬𑁄 𑀫𑀳𑀸𑀓𑁄𑀝𑁆𑀞𑀺𑀓𑁄 𑀅𑀬𑁆𑀬𑁄 𑀫𑀳𑀸𑀓𑀧𑁆𑀧𑀺𑀦𑁄 𑀅𑀬𑁆𑀬𑁄 𑀫𑀳𑀸𑀘𑀼𑀦𑁆𑀤𑁄 𑀅𑀬𑁆𑀬𑁄 𑀅𑀦𑀼𑀭𑀼𑀤𑁆𑀥𑁄 𑀅𑀬𑁆𑀬𑁄 𑀭𑁂𑀯𑀢𑁄 𑀅𑀬𑁆𑀬𑁄 𑀉𑀧𑀸𑀮𑀺 𑀅𑀬𑁆𑀬𑁄 𑀆𑀦𑀦𑁆𑀤𑁄 𑀅𑀬𑁆𑀬𑁄 𑀭𑀸𑀳𑀼𑀮𑁄’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀕𑀳𑀧𑀢𑀺, 𑀫𑀳𑀸𑀦𑀸𑀕𑁂 𑀢𑀺𑀝𑁆𑀞𑀫𑀸𑀦𑁂 𑀘𑁂𑀝𑀓𑁂 𑀦𑀺𑀫𑀦𑁆𑀢𑁂𑀲𑀻’’𑀢𑀺?

‘‘𑀓𑁂 𑀧𑀦 𑀢𑁂, 𑀅𑀬𑁆𑀬𑁂, 𑀫𑀳𑀸𑀦𑀸𑀕𑀸’’𑀢𑀺? ‘‘𑀅𑀬𑁆𑀬𑁄 𑀤𑁂𑀯𑀤𑀢𑁆𑀢𑁄 𑀅𑀬𑁆𑀬𑁄 𑀓𑁄𑀓𑀸𑀮𑀺𑀓𑁄 𑀅𑀬𑁆𑀬𑁄 𑀓𑀝𑀫𑁄𑀤𑀓𑀢𑀺𑀲𑁆𑀲𑀓𑁄 [𑀓𑀝𑀫𑁄𑀭𑀓𑀢𑀺𑀲𑁆𑀲𑀓𑁄 (𑀲𑀻.) 𑀓𑀢𑀫𑁄𑀭𑀓𑀢𑀺𑀲𑁆𑀲𑀓𑁄 (𑀲𑁆𑀬𑀸.)] 𑀅𑀬𑁆𑀬𑁄 𑀔𑀡𑁆𑀟𑀤𑁂𑀯𑀺𑀬𑀸 𑀧𑀼𑀢𑁆𑀢𑁄 𑀅𑀬𑁆𑀬𑁄 𑀲𑀫𑀼𑀤𑁆𑀤𑀤𑀢𑁆𑀢𑁄’’𑀢𑀺. 𑀅𑀬𑀁 𑀘𑀭𑀳𑀺 𑀣𑀼𑀮𑁆𑀮𑀦𑀦𑁆𑀤𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑁆𑀢𑀭𑀸 𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣 𑀢𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀯𑀺𑀲𑀺𑀁𑀲𑀼. ‘‘𑀲𑀘𑁆𑀘𑀁 𑀫𑀳𑀸𑀦𑀸𑀕𑀸 𑀔𑁄 𑀢𑀬𑀸, 𑀕𑀳𑀧𑀢𑀺, 𑀦𑀺𑀫𑀦𑁆𑀢𑀺𑀢𑀸’’𑀢𑀺. ‘‘𑀇𑀤𑀸𑀦𑁂𑀯 𑀔𑁄 𑀢𑁆𑀯𑀁, 𑀅𑀬𑁆𑀬𑁂, 𑀘𑁂𑀝𑀓𑁂 𑀅𑀓𑀸𑀲𑀺; 𑀇𑀤𑀸𑀦𑀺 𑀫𑀳𑀸𑀦𑀸𑀕𑁂’’𑀢𑀺. 𑀖𑀭𑀢𑁄 𑀘 𑀦𑀺𑀓𑁆𑀓𑀟𑁆𑀠𑀺, 𑀦𑀺𑀘𑁆𑀘𑀪𑀢𑁆𑀢𑀜𑁆𑀘 𑀧𑀘𑁆𑀙𑀺𑀦𑁆𑀤𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀤𑁂𑀯𑀤𑀢𑁆𑀢𑁄 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀤𑁂𑀯𑀤𑀢𑁆𑀢, 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀲𑁆𑀲𑀲𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁧𑁯𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀭𑀸𑀚𑀕𑀳𑀸 𑀧𑀩𑁆𑀩𑀚𑀺𑀢𑁄 𑀜𑀸𑀢𑀺𑀓𑀼𑀮𑀁 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑁋 ‘‘𑀘𑀺𑀭𑀲𑁆𑀲𑀫𑁆𑀧𑀺 𑀪𑀤𑀦𑁆𑀢𑁄 𑀆𑀕𑀢𑁄’’𑀢𑀺 𑀲𑀓𑁆𑀓𑀘𑁆𑀘𑀁 𑀪𑀢𑁆𑀢𑀁 𑀅𑀓𑀁𑀲𑀼. 𑀢𑀲𑁆𑀲 𑀓𑀼𑀮𑀲𑁆𑀲 𑀓𑀼𑀮𑀽𑀧𑀺𑀓𑀸 𑀪𑀺𑀓𑁆𑀔𑀼𑀦𑀻 𑀢𑁂 𑀫𑀦𑀼𑀲𑁆𑀲𑁂 𑀏𑀢𑀤𑀯𑁄𑀘 𑁋 ‘‘𑀤𑁂𑀣𑀬𑁆𑀬𑀲𑁆𑀲, 𑀆𑀯𑀼𑀲𑁄, 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑁋 ‘‘𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀦 𑀧𑀝𑀺𑀕𑁆𑀕𑀳𑁂𑀲𑀺. 𑀦𑀸𑀲𑀓𑁆𑀔𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁, 𑀙𑀺𑀦𑁆𑀦𑀪𑀢𑁆𑀢𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑁂 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁯𑁪. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀚𑀸𑀦𑀁 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑁧𑁯𑁫. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀚𑀸𑀦𑀸𑀢𑀺 𑀦𑀸𑀫 𑀲𑀸𑀫𑀁 𑀯𑀸 𑀚𑀸𑀦𑀸𑀢𑀺 𑀅𑀜𑁆𑀜𑁂 𑀯𑀸 𑀢𑀲𑁆𑀲 𑀆𑀭𑁄𑀘𑁂𑀦𑁆𑀢𑀺 𑀲𑀸 𑀯𑀸 𑀆𑀭𑁄𑀘𑁂𑀢𑀺.

𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸.

𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀧𑀼𑀩𑁆𑀩𑁂 𑀅𑀤𑀸𑀢𑀼𑀓𑀸𑀫𑀸𑀦𑀁 𑀅𑀓𑀢𑁆𑀢𑀼𑀓𑀸𑀫𑀸𑀦𑀁 𑁋 ‘‘𑀅𑀬𑁆𑀬𑁄 𑀪𑀸𑀡𑀓𑁄, 𑀅𑀬𑁆𑀬𑁄 𑀩𑀳𑀼𑀲𑁆𑀲𑀼𑀢𑁄, 𑀅𑀬𑁆𑀬𑁄 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀅𑀬𑁆𑀬𑁄 𑀯𑀺𑀦𑀬𑀥𑀭𑁄, 𑀅𑀬𑁆𑀬𑁄 𑀥𑀫𑁆𑀫𑀓𑀣𑀺𑀓𑁄, 𑀤𑁂𑀣 𑀅𑀬𑁆𑀬𑀲𑁆𑀲, 𑀓𑀭𑁄𑀣 𑀅𑀬𑁆𑀬𑀲𑁆𑀲𑀸’’𑀢𑀺 𑀏𑀲𑀸 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫.

𑀧𑀺𑀡𑁆𑀟𑀧𑀸𑀢𑁄 𑀦𑀸𑀫 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁 𑀅𑀜𑁆𑀜𑀢𑀭𑀁 𑀪𑁄𑀚𑀦𑀁.

𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸𑀢𑀺 𑀞𑀧𑁂𑀢𑁆𑀯𑀸 𑀕𑀺𑀳𑀺𑀲𑀫𑀸𑀭𑀫𑁆𑀪𑀁.

𑀕𑀺𑀳𑀺𑀲𑀫𑀸𑀭𑀫𑁆𑀪𑁄 𑀦𑀸𑀫 𑀜𑀸𑀢𑀓𑀸 𑀯𑀸 𑀳𑁄𑀦𑁆𑀢𑀺 𑀧𑀯𑀸𑀭𑀺𑀢𑀸 𑀯𑀸 𑀧𑀓𑀢𑀺𑀧𑀝𑀺𑀬𑀢𑁆𑀢𑀁 𑀯𑀸.

𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁯𑁬. 𑀧𑀭𑀺𑀧𑀸𑀘𑀺𑀢𑁂 𑀧𑀭𑀺𑀧𑀸𑀘𑀺𑀢𑀲𑀜𑁆𑀜𑀻 𑀪𑀼𑀜𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀧𑀭𑀺𑀧𑀸𑀘𑀺𑀢𑁂 𑀯𑁂𑀫𑀢𑀺𑀓𑁄 𑀪𑀼𑀜𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀭𑀺𑀧𑀸𑀘𑀺𑀢𑁂 𑀅𑀧𑀭𑀺𑀧𑀸𑀘𑀺𑀢𑀲𑀜𑁆𑀜𑀻 𑀪𑀼𑀜𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸, 𑀅𑀦𑀸𑀧𑀢𑁆𑀢𑀺. 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀭𑀺𑀧𑀸𑀘𑀺𑀢𑀁 𑀪𑀼𑀜𑁆𑀚𑀢𑀺, 𑀅𑀜𑁆𑀜𑀢𑁆𑀭 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀧𑀭𑀺𑀧𑀸𑀘𑀺𑀢𑁂 𑀧𑀭𑀺𑀧𑀸𑀘𑀺𑀢𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀧𑀭𑀺𑀧𑀸𑀘𑀺𑀢𑁆𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀧𑀭𑀺𑀧𑀸𑀘𑀺𑀢𑁂 𑀅𑀧𑀭𑀺𑀧𑀸𑀘𑀺𑀢𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁧𑁯𑁭. 𑀅𑀦𑀸𑀧𑀢𑁆𑀢𑀺 𑀧𑀼𑀩𑁆𑀩𑁂 𑀕𑀺𑀳𑀺𑀲𑀫𑀸𑀭𑀫𑁆𑀪𑁂, 𑀲𑀺𑀓𑁆𑀔𑀫𑀸𑀦𑀸 𑀧𑀭𑀺𑀧𑀸𑀘𑁂𑀢𑀺, 𑀲𑀸𑀫𑀡𑁂𑀭𑀻 𑀧𑀭𑀺𑀧𑀸𑀘𑁂𑀢𑀺, 𑀧𑀜𑁆𑀘 𑀪𑁄𑀚𑀦𑀸𑀦𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.