𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁

𑁧𑁮𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀬𑀣𑁂𑀯 𑀫𑀬𑀁 𑀲𑀧𑀚𑀸𑀧𑀢𑀺𑀓𑀸 𑀆𑀳𑀺𑀡𑁆𑀟𑀸𑀫, 𑀏𑀯𑀫𑁂𑀯𑀺𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀆𑀳𑀺𑀡𑁆𑀟𑀦𑁆𑀢𑀻’’𑀢𑀺! 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀣𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣.

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀕𑀸𑀫𑀦𑁆𑀢𑀭𑀫𑁆𑀧𑀺, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁧𑁮𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀲𑀸𑀓𑁂𑀢𑀸 𑀲𑀸𑀯𑀢𑁆𑀣𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀬𑀫𑁆𑀧𑀺 𑀅𑀬𑁆𑀬𑁂𑀳𑀺 𑀲𑀤𑁆𑀥𑀺𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀦, 𑀪𑀕𑀺𑀦𑀻, 𑀓𑀧𑁆𑀧𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀢𑀼𑀫𑁆𑀳𑁂 𑀯𑀸 𑀧𑀞𑀫𑀁 𑀕𑀘𑁆𑀙𑀣 𑀫𑀬𑀁 𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀬𑁆𑀬𑀸, 𑀪𑀦𑁆𑀢𑁂, 𑀅𑀕𑁆𑀕𑀧𑀼𑀭𑀺𑀲𑀸. 𑀅𑀬𑁆𑀬𑀸𑀯 𑀧𑀞𑀫𑀁 𑀕𑀘𑁆𑀙𑀦𑁆𑀢𑀽’’𑀢𑀺. 𑀅𑀣 𑀔𑁄 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑀻𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀅𑀘𑁆𑀙𑀺𑀦𑁆𑀤𑀺𑀁𑀲𑀼 𑀘 𑀤𑀽𑀲𑁂𑀲𑀼𑀜𑁆𑀘. 𑀅𑀣 𑀔𑁄 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀕𑀫𑀦𑀻𑀬𑁂 𑀫𑀕𑁆𑀕𑁂 𑀲𑀸𑀲𑀗𑁆𑀓𑀲𑀫𑁆𑀫𑀢𑁂 𑀲𑀧𑁆𑀧𑀝𑀺𑀪𑀬𑁂 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁮𑁨. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀺𑀬𑀸 𑀲𑀤𑁆𑀥𑀺𑀁 𑀲𑀁𑀯𑀺𑀥𑀸𑀬 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬, 𑀅𑀦𑁆𑀢𑀫𑀲𑁄 𑀕𑀸𑀫𑀦𑁆𑀢𑀭𑀫𑁆𑀧𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀧𑀸𑀘𑀺𑀢𑁆𑀢𑀺𑀬𑀁. 𑀢𑀢𑁆𑀣𑀸𑀬𑀁 𑀲𑀫𑀬𑁄 . 𑀲𑀢𑁆𑀣𑀕𑀫𑀦𑀻𑀬𑁄 𑀳𑁄𑀢𑀺 𑀫𑀕𑁆𑀕𑁄 𑀲𑀸𑀲𑀗𑁆𑀓𑀲𑀫𑁆𑀫𑀢𑁄 𑀲𑀧𑁆𑀧𑀝𑀺𑀪𑀬𑁄 𑁋 𑀅𑀬𑀁 𑀢𑀢𑁆𑀣 𑀲𑀫𑀬𑁄’’𑀢𑀺.

𑁧𑁮𑁩. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀪𑀺𑀓𑁆𑀔𑀼𑀦𑀻 𑀦𑀸𑀫 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸.

𑀲𑀤𑁆𑀥𑀺𑀦𑁆𑀢𑀺 𑀏𑀓𑀢𑁄.

𑀲𑀁𑀯𑀺𑀥𑀸𑀬𑀸𑀢𑀺 𑁋 ‘‘𑀕𑀘𑁆𑀙𑀸𑀫, 𑀪𑀕𑀺𑀦𑀺, 𑀕𑀘𑁆𑀙𑀸𑀫𑀸𑀬𑁆𑀬; 𑀕𑀘𑁆𑀙𑀸𑀫𑀸𑀬𑁆𑀬, 𑀕𑀘𑁆𑀙𑀸𑀫, 𑀪𑀕𑀺𑀦𑀺; 𑀅𑀚𑁆𑀚 𑀯𑀸 𑀳𑀺𑀬𑁆𑀬𑁄 𑀯𑀸 𑀧𑀭𑁂 𑀯𑀸 𑀕𑀘𑁆𑀙𑀸𑀫𑀸’’𑀢𑀺 𑀲𑀁𑀯𑀺𑀤𑀳𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀅𑀦𑁆𑀢𑀫𑀲𑁄 𑀕𑀸𑀫𑀦𑁆𑀢𑀭𑀫𑁆𑀧𑀻𑀢𑀺 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑁂 𑀕𑀸𑀫𑁂, 𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂, 𑀅𑀤𑁆𑀥𑀬𑁄𑀚𑀦𑁂 𑀅𑀤𑁆𑀥𑀬𑁄𑀚𑀦𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀅𑀜𑁆𑀜𑀢𑁆𑀭 𑀲𑀫𑀬𑀸𑀢𑀺 𑀞𑀧𑁂𑀢𑁆𑀯𑀸 𑀲𑀫𑀬𑀁.

𑀲𑀢𑁆𑀣𑀕𑀫𑀦𑀻𑀬𑁄 𑀦𑀸𑀫 𑀫𑀕𑁆𑀕𑁄 𑀦 𑀲𑀓𑁆𑀓𑀸 𑀳𑁄𑀢𑀺 𑀯𑀺𑀦𑀸 𑀲𑀢𑁆𑀣𑁂𑀦 𑀕𑀦𑁆𑀢𑀼𑀁.

𑀲𑀸𑀲𑀗𑁆𑀓𑀁 𑀦𑀸𑀫 𑀢𑀲𑁆𑀫𑀺𑀁 𑀫𑀕𑁆𑀕𑁂 [𑀬𑀲𑁆𑀫𑀺𑀁 𑀫𑀕𑁆𑀕𑁂 (?)] 𑀘𑁄𑀭𑀸𑀦𑀁 𑀦𑀺𑀯𑀺𑀝𑁆𑀞𑁄𑀓𑀸𑀲𑁄 𑀤𑀺𑀲𑁆𑀲𑀢𑀺, 𑀪𑀼𑀢𑁆𑀢𑁄𑀓𑀸𑀲𑁄 𑀤𑀺𑀲𑁆𑀲𑀢𑀺, 𑀞𑀺𑀢𑁄𑀓𑀸𑀲𑁄 𑀤𑀺𑀲𑁆𑀲𑀢𑀺, 𑀦𑀺𑀲𑀺𑀦𑁆𑀦𑁄𑀓𑀸𑀲𑁄 𑀤𑀺𑀲𑁆𑀲𑀢𑀺, 𑀦𑀺𑀧𑀦𑁆𑀦𑁄𑀓𑀸𑀲𑁄 𑀤𑀺𑀲𑁆𑀲𑀢𑀺.

𑀲𑀧𑁆𑀧𑀝𑀺𑀪𑀬𑀁 𑀦𑀸𑀫 𑀢𑀲𑁆𑀫𑀺𑀁 𑀫𑀕𑁆𑀕𑁂 𑀘𑁄𑀭𑁂𑀳𑀺 𑀫𑀦𑀼𑀲𑁆𑀲𑀸 𑀳𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀯𑀺𑀮𑀼𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀆𑀓𑁄𑀝𑀺𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀲𑀧𑁆𑀧𑀝𑀺𑀪𑀬𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀝𑀺𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑀸 𑁋 ‘‘𑀕𑀘𑁆𑀙𑀣 𑀪𑀕𑀺𑀦𑀺𑀬𑁄’’𑀢𑀺.

𑁧𑁮𑁪. 𑀲𑀁𑀯𑀺𑀤𑀳𑀺𑀢𑁂 𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺, 𑀅𑀦𑁆𑀢𑀫𑀲𑁄 𑀕𑀸𑀫𑀦𑁆𑀢𑀭𑀫𑁆𑀧𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀁𑀯𑀺𑀤𑀳𑀺𑀢𑁂 𑀯𑁂𑀫𑀢𑀺𑀓𑁄 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺, 𑀅𑀦𑁆𑀢𑀫𑀲𑁄 𑀕𑀸𑀫𑀦𑁆𑀢𑀭𑀫𑁆𑀧𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀁𑀯𑀺𑀤𑀳𑀺𑀢𑁂, 𑀅𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻 𑀏𑀓𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺, 𑀅𑀦𑁆𑀢𑀫𑀲𑁄 𑀕𑀸𑀫𑀦𑁆𑀢𑀭𑀫𑁆𑀧𑀺, 𑀅𑀜𑁆𑀜𑀢𑁆𑀭 𑀲𑀫𑀬𑀸, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑀪𑀺𑀓𑁆𑀔𑀼 𑀲𑀁𑀯𑀺𑀤𑀳𑀢𑀺 𑀪𑀺𑀓𑁆𑀔𑀼𑀦𑀻 𑀦 𑀲𑀁𑀯𑀺𑀤𑀳𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀁𑀯𑀺𑀤𑀳𑀺𑀢𑁂 𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀁𑀯𑀺𑀤𑀳𑀺𑀢𑁂 𑀯𑁂𑀫𑀢𑀺𑀓𑁄, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀲𑀁𑀯𑀺𑀤𑀳𑀺𑀢𑁂 𑀅𑀲𑀁𑀯𑀺𑀤𑀳𑀺𑀢𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀺.

𑁧𑁮𑁫. 𑀅𑀦𑀸𑀧𑀢𑁆𑀢𑀺 𑀲𑀫𑀬𑁂, 𑀅𑀲𑀁𑀯𑀺𑀤𑀳𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀪𑀺𑀓𑁆𑀔𑀼𑀦𑀻 𑀲𑀁𑀯𑀺𑀤𑀳𑀢𑀺, 𑀪𑀺𑀓𑁆𑀔𑀼 𑀦 𑀲𑀁𑀯𑀺𑀤𑀳𑀢𑀺, 𑀯𑀺𑀲𑀗𑁆𑀓𑁂𑀢𑁂𑀦 𑀕𑀘𑁆𑀙𑀦𑁆𑀢𑀺, 𑀆𑀧𑀤𑀸𑀲𑀼, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.