𑁨𑁩𑁪. 𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼

𑁩𑁮𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀸𑀲𑀻𑀲𑀼 𑀚𑀦𑀧𑀤𑁂 𑀯𑀸𑀲𑀪𑀕𑀸𑀫𑁄 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀓𑀲𑁆𑀲𑀧𑀕𑁄𑀢𑁆𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀆𑀯𑀸𑀲𑀺𑀓𑁄 𑀳𑁄𑀢𑀺 𑀢𑀦𑁆𑀢𑀺𑀩𑀤𑁆𑀥𑁄 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑁋 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀬𑀜𑁆𑀘 𑀆𑀯𑀸𑀲𑁄 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀬𑁂𑀦 𑀯𑀸𑀲𑀪𑀕𑀸𑀫𑁄 𑀢𑀤𑀯𑀲𑀭𑀼𑀁. 𑀅𑀤𑁆𑀤𑀲𑀸 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑁄 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀧𑀸𑀦𑀻𑀬𑁂𑀦 𑀆𑀧𑀼𑀘𑁆𑀙𑀺, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀅𑀣 𑀔𑁄 𑀢𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀤𑁆𑀤𑀓𑁄 𑀔𑁄 𑀅𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀇𑀥𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀼𑀁.

𑀅𑀣 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀬𑁄 𑀔𑁄 𑀇𑀫𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀓𑀺𑀮𑀫𑀣𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄. 𑀬𑁂𑀧𑀺𑀫𑁂 𑀕𑁄𑀘𑀭𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑁄 𑀢𑁂𑀤𑀸𑀦𑀺𑀫𑁂 𑀕𑁄𑀘𑀭𑁂 𑀧𑀓𑀢𑀜𑁆𑀜𑀼𑀦𑁄. 𑀤𑀼𑀓𑁆𑀓𑀭𑀁 𑀔𑁄 𑀧𑀦 𑀧𑀭𑀓𑀼𑀮𑁂𑀲𑀼 𑀬𑀸𑀯𑀚𑀻𑀯𑀁 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀼𑀁, 𑀯𑀺𑀜𑁆𑀜𑀢𑁆𑀢𑀺 𑀘 𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀸𑀧𑀸. 𑀬𑀁𑀦𑀽𑀦𑀸𑀳𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺’’𑀦𑁆𑀢𑀺. 𑀲𑁄 𑀦 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀅𑀣 𑀔𑁄 𑀢𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀧𑀼𑀩𑁆𑀩𑁂 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀸𑀬𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀤𑀼𑀝𑁆𑀞𑁄𑀤𑀸𑀦𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑀁 [𑀇𑀫𑀁 𑀆𑀯𑀸𑀲𑀺𑀓𑀁 (𑀲𑁆𑀬𑀸.)] 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀲𑁆𑀲𑀧𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀼𑀩𑁆𑀩𑁂 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀺 𑀢𑁆𑀯𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄. 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺, 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀓𑀲𑁆𑀲𑀧𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼.

𑀅𑀣 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀏𑀢𑀁 𑀦 𑀚𑀸𑀦𑀸𑀫𑀺 ‘𑀆𑀧𑀢𑁆𑀢𑀺 𑀯𑀸 𑀏𑀲𑀸 𑀅𑀦𑀸𑀧𑀢𑁆𑀢𑀺 𑀯𑀸, 𑀆𑀧𑀦𑁆𑀦𑁄 𑀘𑀫𑁆𑀳𑀺 [𑀯𑀫𑁆𑀳𑀺 (?)] 𑀅𑀦𑀸𑀧𑀦𑁆𑀦𑁄 𑀯𑀸, 𑀉𑀓𑁆𑀔𑀺𑀢𑁆𑀢𑁄 𑀘𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄 𑀯𑀸, 𑀥𑀫𑁆𑀫𑀺𑀓𑁂𑀦 𑀯𑀸 𑀅𑀥𑀫𑁆𑀫𑀺𑀓𑁂𑀦 𑀯𑀸, 𑀓𑀼𑀧𑁆𑀧𑁂𑀦 𑀯𑀸 𑀅𑀓𑀼𑀧𑁆𑀧𑁂𑀦 𑀯𑀸, 𑀞𑀸𑀦𑀸𑀭𑀳𑁂𑀦 𑀯𑀸 𑀅𑀝𑁆𑀞𑀸𑀦𑀸𑀭𑀳𑁂𑀦 𑀯𑀸’. 𑀬𑀁𑀦𑀽𑀦𑀸𑀳𑀁 𑀘𑀫𑁆𑀧𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀫𑁆𑀧𑀸 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀘𑀫𑁆𑀧𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀓𑀲𑁆𑀲𑀧𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄, 𑀓𑀼𑀢𑁄 𑀘 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀕𑀘𑁆𑀙𑀲𑀻’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸; 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘𑀸𑀳𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑁄. 𑀅𑀢𑁆𑀣𑀺, 𑀪𑀦𑁆𑀢𑁂, 𑀓𑀸𑀲𑀻𑀲𑀼 𑀚𑀦𑀧𑀤𑁂 𑀯𑀸𑀲𑀪𑀕𑀸𑀫𑁄 𑀦𑀸𑀫. 𑀢𑀢𑁆𑀣𑀸𑀳𑀁, 𑀪𑀕𑀯𑀸, 𑀆𑀯𑀸𑀲𑀺𑀓𑁄 𑀢𑀦𑁆𑀢𑀺𑀩𑀤𑁆𑀥𑁄 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑁋 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀬𑀜𑁆𑀘 𑀆𑀯𑀸𑀲𑁄 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀸’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀬𑁂𑀦 𑀯𑀸𑀲𑀪𑀕𑀸𑀫𑁄 𑀢𑀤𑀯𑀲𑀭𑀼𑀁. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺𑀁, 𑀧𑀸𑀦𑀻𑀬𑁂𑀦 𑀅𑀧𑀼𑀘𑁆𑀙𑀺𑀁, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺𑀁, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀅𑀓𑀸𑀲𑀺𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀅𑀣 𑀔𑁄 𑀢𑁂𑀲𑀁, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘𑀪𑀤𑁆𑀤𑀓𑁄 𑀔𑁄 𑀅𑀬𑀁 𑀆𑀯𑀼𑀲𑁄 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀇𑀥𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀫𑀸’𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀬𑁄 𑀔𑁄 𑀇𑀫𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀦𑁆𑀢𑀼𑀓𑀓𑀺𑀮𑀫𑀣𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄. 𑀬𑁂𑀧𑀺𑀫𑁂 𑀕𑁄𑀘𑀭𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑁄 𑀢𑁂𑀤𑀸𑀦𑀺𑀫𑁂 𑀕𑁄𑀘𑀭𑁂 𑀧𑀓𑀢𑀜𑁆𑀜𑀼𑀦𑁄. 𑀤𑀼𑀓𑁆𑀓𑀭𑀁 𑀔𑁄 𑀧𑀦 𑀧𑀭𑀓𑀼𑀮𑁂𑀲𑀼 𑀬𑀸𑀯𑀚𑀻𑀯𑀁 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀼𑀁, 𑀯𑀺𑀜𑁆𑀜𑀢𑁆𑀢𑀺 𑀘 𑀫𑀦𑀼𑀲𑁆𑀲𑀸𑀦𑀁 𑀅𑀫𑀦𑀸𑀧𑀸. 𑀬𑀁𑀦𑀽𑀦𑀸𑀳𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁂𑀬𑁆𑀬𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀦 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺𑀁 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀅𑀣 𑀔𑁄 𑀢𑁂𑀲𑀁, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘𑀧𑀼𑀩𑁆𑀩𑁂 𑀔𑁆𑀯𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀸𑀬𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀢𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀤𑀼𑀝𑁆𑀞𑁄𑀤𑀸𑀦𑀸𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀆𑀯𑀸𑀲𑀺𑀓𑀁 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀸𑀫𑀸’𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀧𑀼𑀩𑁆𑀩𑁂 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀦𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺, 𑀉𑀲𑁆𑀲𑀼𑀓𑁆𑀓𑀫𑁆𑀧𑀺 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀲𑁄𑀤𑀸𑀦𑀺 𑀢𑁆𑀯𑀁 𑀦 𑀉𑀲𑁆𑀲𑀼𑀓𑁆𑀓𑀁 𑀓𑀭𑁄𑀲𑀺 𑀬𑀸𑀕𑀼𑀬𑀸 𑀔𑀸𑀤𑀦𑀻𑀬𑁂 𑀪𑀢𑁆𑀢𑀲𑁆𑀫𑀺𑀁. 𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄. 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’𑀦𑁆𑀢𑀺? ‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀫𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀳𑀁 𑀔𑁄 𑀏𑀢𑀁 𑀦 𑀚𑀸𑀦𑀸𑀫𑀺 ‘𑀆𑀧𑀢𑁆𑀢𑀺 𑀯𑀸 𑀏𑀲𑀸 𑀅𑀦𑀸𑀧𑀢𑁆𑀢𑀺 𑀯𑀸, 𑀆𑀧𑀦𑁆𑀦𑁄 𑀘𑀫𑁆𑀳𑀺 𑀅𑀦𑀸𑀧𑀦𑁆𑀦𑁄 𑀯𑀸, 𑀉𑀓𑁆𑀔𑀺𑀢𑁆𑀢𑁄 𑀘𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄 𑀯𑀸, 𑀥𑀫𑁆𑀫𑀺𑀓𑁂𑀦 𑀯𑀸 𑀅𑀥𑀫𑁆𑀫𑀺𑀓𑁂𑀦 𑀯𑀸, 𑀓𑀼𑀧𑁆𑀧𑁂𑀦 𑀯𑀸 𑀅𑀓𑀼𑀧𑁆𑀧𑁂𑀦 𑀯𑀸, 𑀞𑀸𑀦𑀸𑀭𑀳𑁂𑀦 𑀯𑀸 𑀅𑀝𑁆𑀞𑀸𑀦𑀸𑀭𑀳𑁂𑀦 𑀯𑀸’. 𑀬𑀁𑀦𑀽𑀦𑀸𑀳𑀁 𑀘𑀫𑁆𑀧𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀢𑀢𑁄 𑀅𑀳𑀁, 𑀪𑀕𑀯𑀸, 𑀆𑀕𑀘𑁆𑀙𑀸𑀫𑀻’’𑀢𑀺. ‘‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀪𑀺𑀓𑁆𑀔𑀼, 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀲𑀺, 𑀦𑀲𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀲𑀺, 𑀦𑀲𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀸𑀲𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀕𑀘𑁆𑀙 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑀢𑁆𑀣𑁂𑀯 𑀯𑀸𑀲𑀪𑀕𑀸𑀫𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀓𑀲𑁆𑀲𑀧𑀕𑁄𑀢𑁆𑀢𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀯𑀸𑀲𑀪𑀕𑀸𑀫𑁄 𑀢𑁂𑀦 𑀧𑀓𑁆𑀓𑀸𑀫𑀺.

𑁩𑁮𑁧. 𑀅𑀣 𑀔𑁄 𑀢𑁂𑀲𑀁 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘‘𑀅𑀮𑀸𑀪𑀸 𑀯𑀢 𑀦𑁄, 𑀦 𑀯𑀢 𑀦𑁄 𑀮𑀸𑀪𑀸, 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀦𑁄, 𑀦 𑀯𑀢 𑀦𑁄 𑀲𑀼𑀮𑀤𑁆𑀥𑀁, 𑀬𑁂 𑀫𑀬𑀁 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀫𑁆𑀳𑀸. 𑀳𑀦𑁆𑀤, 𑀫𑀬𑀁, 𑀆𑀯𑀼𑀲𑁄, 𑀘𑀫𑁆𑀧𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑁂𑀲𑁂𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀫𑁆𑀧𑀸 𑀢𑁂𑀦 𑀧𑀓𑁆𑀓𑀫𑀺𑀁𑀲𑀼. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀘𑀫𑁆𑀧𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺𑀢𑁆𑀣 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑀸, 𑀓𑀼𑀢𑁄 𑀘 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀕𑀘𑁆𑀙𑀣𑀸’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸; 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘 𑀫𑀬𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑀸. 𑀅𑀢𑁆𑀣𑀺, 𑀪𑀦𑁆𑀢𑁂, 𑀓𑀸𑀲𑀻𑀲𑀼 𑀚𑀦𑀧𑀤𑁂 𑀯𑀸𑀲𑀪𑀕𑀸𑀫𑁄 𑀦𑀸𑀫. 𑀢𑀢𑁄 𑀫𑀬𑀁, 𑀪𑀕𑀯𑀸, 𑀆𑀕𑀘𑁆𑀙𑀸𑀫𑀸’’𑀢𑀺. ‘‘𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀁 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀺𑀢𑁆𑀣𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀭𑀡𑁂’’𑀢𑀺? ‘‘𑀅𑀯𑀢𑁆𑀣𑀼𑀲𑁆𑀫𑀺𑀁, 𑀪𑀕𑀯𑀸, 𑀅𑀓𑀸𑀭𑀡𑁂’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀲𑁆𑀲𑀣. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂…’’ 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑁄 𑀪𑀺𑀓𑁆𑀔𑀼 𑀅𑀦𑀸𑀧𑀢𑁆𑀢𑀺𑀓𑁄 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄. 𑀬𑁄 𑀉𑀓𑁆𑀔𑀺𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀘𑁆𑀘𑀬𑁄 𑀦𑁄, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑁂 𑀬𑀣𑀸𑀫𑀽𑀴𑁆𑀳𑁂 𑀬𑀣𑀸𑀅𑀓𑀼𑀲𑀮𑁂, 𑀬𑁂 𑀫𑀬𑀁 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀫𑁆𑀳𑀸. 𑀢𑁂𑀲𑀁 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺. ‘‘𑀢𑀕𑁆𑀖, 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑁂 𑀬𑀣𑀸𑀫𑀽𑀴𑁆𑀳𑁂 𑀬𑀣𑀸𑀅𑀓𑀼𑀲𑀮𑁂, 𑀬𑁂 𑀢𑀼𑀫𑁆𑀳𑁂 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀢𑁆𑀢𑀺𑀓𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀉𑀓𑁆𑀔𑀺𑀧𑀺𑀢𑁆𑀣. 𑀬𑀢𑁄 𑀘 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀣, 𑀢𑀁 𑀯𑁄 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀤𑁆𑀥𑀺𑀳𑁂𑀲𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀁 [𑀆𑀬𑀢𑀺𑀁 𑀘 (𑀲𑀻.)] 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺.

𑀓𑀲𑁆𑀲𑀧𑀕𑁄𑀢𑁆𑀢𑀪𑀺𑀓𑁆𑀔𑀼𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.