𑁧𑁮𑁭. 𑀓𑀣𑀺𑀦𑀸𑀦𑀼𑀚𑀸𑀦𑀦𑀸

𑁩𑁦𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀺𑀁𑀲𑀫𑀢𑁆𑀢𑀸 𑀧𑀸𑀯𑁂𑀬𑁆𑀬𑀓𑀸 [𑀧𑀸𑀞𑁂𑀬𑁆𑀬𑀓𑀸 (𑀲𑀻. 𑀲𑁆𑀬𑀸.)] 𑀪𑀺𑀓𑁆𑀔𑀽, 𑀲𑀩𑁆𑀩𑁂 𑀆𑀭𑀜𑁆𑀜𑀺𑀓𑀸 𑀲𑀩𑁆𑀩𑁂 𑀧𑀺𑀡𑁆𑀟𑀧𑀸𑀢𑀺𑀓𑀸 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸 𑀲𑀩𑁆𑀩𑁂 𑀢𑁂𑀘𑀻𑀯𑀭𑀺𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀦𑀸𑀲𑀓𑁆𑀔𑀺𑀁𑀲𑀼 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀁 𑀲𑀫𑁆𑀪𑀸𑀯𑁂𑀢𑀼𑀁; 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀓𑁂𑀢𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂 𑀉𑀓𑁆𑀓𑀡𑁆𑀞𑀺𑀢𑀭𑀽𑀧𑀸 𑀯𑀲𑁆𑀲𑀁 𑀯𑀲𑀺𑀁𑀲𑀼 𑁋 𑀆𑀲𑀦𑁆𑀦𑁂𑀯 𑀦𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀇𑀢𑁄 𑀙𑀲𑀼 𑀬𑁄𑀚𑀦𑁂𑀲𑀼, 𑀦 𑀘 𑀫𑀬𑀁 𑀮𑀪𑀸𑀫 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀫𑀸𑀲𑀘𑁆𑀘𑀬𑁂𑀦 𑀓𑀢𑀸𑀬 𑀧𑀯𑀸𑀭𑀡𑀸𑀬, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂, 𑀉𑀤𑀓𑀲𑀗𑁆𑀕𑀳𑁂 𑀉𑀤𑀓𑀘𑀺𑀓𑁆𑀔𑀮𑁆𑀮𑁂 𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀺 𑀓𑀺𑀮𑀦𑁆𑀢𑀭𑀽𑀧𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣𑀸’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸; 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀲𑀫𑀕𑁆𑀕𑀸 𑀘 𑀫𑀬𑀁, 𑀪𑀦𑁆𑀢𑁂, 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀫𑁆𑀳𑀸. 𑀇𑀥 𑀫𑀬𑀁, 𑀪𑀦𑁆𑀢𑁂, 𑀢𑀺𑀁𑀲𑀫𑀢𑁆𑀢𑀸 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀦𑀸𑀲𑀓𑁆𑀔𑀺𑀫𑁆𑀳𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀁 𑀲𑀫𑁆𑀪𑀸𑀯𑁂𑀢𑀼𑀁, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀸𑀓𑁂𑀢𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀫𑁆𑀳𑀸. 𑀢𑁂 𑀫𑀬𑀁, 𑀪𑀦𑁆𑀢𑁂, 𑀉𑀓𑁆𑀓𑀡𑁆𑀞𑀺𑀢𑀭𑀽𑀧𑀸 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸 𑁋 ‘𑀆𑀲𑀦𑁆𑀦𑁂𑀯 𑀦𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀇𑀢𑁄 𑀙𑀲𑀼 𑀬𑁄𑀚𑀦𑁂𑀲𑀼, 𑀦 𑀘 𑀫𑀬𑀁 𑀮𑀪𑀸𑀫 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’𑀢𑀺. 𑀅𑀣 𑀔𑁄 𑀫𑀬𑀁, 𑀪𑀦𑁆𑀢𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸, 𑀢𑁂𑀫𑀸𑀲𑀘𑁆𑀘𑀬𑁂𑀦 𑀓𑀢𑀸𑀬 𑀧𑀯𑀸𑀭𑀡𑀸𑀬, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂, 𑀉𑀤𑀓𑀲𑀗𑁆𑀕𑀳𑁂 𑀉𑀤𑀓𑀘𑀺𑀓𑁆𑀔𑀮𑁆𑀮𑁂 𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀺 𑀓𑀺𑀮𑀦𑁆𑀢𑀭𑀽𑀧𑀸 𑀅𑀤𑁆𑀥𑀸𑀦𑀁 𑀆𑀕𑀢𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀣𑀺𑀦𑀁 [𑀓𑀞𑀺𑀦𑀁 (𑀲𑀻. 𑀲𑁆𑀬𑀸.)] 𑀅𑀢𑁆𑀣𑀭𑀺𑀢𑀼𑀁. 𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀺 𑁋 𑀅𑀦𑀸𑀫𑀦𑁆𑀢𑀘𑀸𑀭𑁄, 𑀅𑀲𑀫𑀸𑀤𑀸𑀦𑀘𑀸𑀭𑁄, 𑀕𑀡𑀪𑁄𑀚𑀦𑀁, 𑀬𑀸𑀯𑀤𑀢𑁆𑀣𑀘𑀻𑀯𑀭𑀁, 𑀬𑁄 𑀘 𑀢𑀢𑁆𑀣 𑀘𑀻𑀯𑀭𑀼𑀧𑁆𑀧𑀸𑀤𑁄 𑀲𑁄 𑀦𑁂𑀲𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀇𑀫𑀸𑀦𑀺 𑀧𑀜𑁆𑀘 𑀓𑀧𑁆𑀧𑀺𑀲𑁆𑀲𑀦𑁆𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀩𑁆𑀩𑀁. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩𑁦𑁭. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀤𑁂𑀬𑁆𑀬 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀲𑀗𑁆𑀖𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁. 𑀲𑀗𑁆𑀖𑁄 𑀇𑀫𑀁 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑀲𑁆𑀲 𑀓𑀣𑀺𑀦𑀤𑀼𑀲𑁆𑀲𑀲𑁆𑀲 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀦𑀁 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑀁 𑀇𑀤𑀁 𑀲𑀗𑁆𑀖𑁂𑀦 𑀓𑀣𑀺𑀦𑀤𑀼𑀲𑁆𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀣𑀺𑀦𑀁 𑀅𑀢𑁆𑀣𑀭𑀺𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁩𑁦𑁮. ‘‘𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀏𑀯𑀁 𑀅𑀦𑀢𑁆𑀣𑀢𑀁. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁? 𑀦 𑀉𑀮𑁆𑀮𑀺𑀔𑀺𑀢𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀥𑁄𑀯𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀘𑀻𑀯𑀭𑀯𑀺𑀘𑀸𑀭𑀡𑀫𑀢𑁆𑀢𑁂𑀦 [𑀦 𑀕𑀡𑁆𑀝𑀼𑀲𑀓𑀭𑀡𑀫𑀢𑁆𑀢𑁂𑀦 (𑀓.)] 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀙𑁂𑀤𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀩𑀦𑁆𑀥𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀑𑀯𑀝𑁆𑀝𑀺𑀬𑀓𑀭𑀡𑀫𑀢𑁆𑀢𑁂𑀦 [𑀦 𑀑𑀯𑀝𑁆𑀝𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 (𑀲𑀻. 𑀲𑁆𑀬𑀸.), 𑀦 𑀑𑀯𑀤𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 (𑀓.)] 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀡𑁆𑀟𑀼𑀲𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀤𑀴𑁆𑀳𑀻𑀓𑀫𑁆𑀫𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀦𑀼𑀯𑀸𑀢𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀑𑀯𑀤𑁆𑀥𑁂𑀬𑁆𑀬𑀓𑀭𑀡𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀫𑁆𑀩𑀮𑀫𑀤𑁆𑀤𑀦𑀫𑀢𑁆𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀦𑀺𑀫𑀺𑀢𑁆𑀢𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀧𑀭𑀺𑀓𑀣𑀸𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀓𑀼𑀓𑁆𑀓𑀼𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀲𑀦𑁆𑀦𑀺𑀥𑀺𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀓𑀧𑁆𑀧𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀧𑀜𑁆𑀘𑀓𑁂𑀦 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀓𑁂𑀦 𑀯𑀸 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀻𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀦 𑀅𑀜𑁆𑀜𑀢𑁆𑀭 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁; 𑀲𑀫𑁆𑀫𑀸 𑀘𑁂𑀯 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀢𑀜𑁆𑀘𑁂 𑀦𑀺𑀲𑁆𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺, 𑀏𑀯𑀫𑁆𑀧𑀺 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑁩𑁦𑁯. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁? 𑀅𑀳𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀳𑀢𑀓𑀧𑁆𑀧𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀺𑀮𑁄𑀢𑀺𑀓𑀸𑀬 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀁𑀲𑀼𑀓𑀽𑀮𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀸𑀧𑀡𑀺𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑀺𑀫𑀺𑀢𑁆𑀢𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀧𑀭𑀺𑀓𑀣𑀸𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀓𑀼𑀓𑁆𑀓𑀼𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀲𑀦𑁆𑀦𑀺𑀥𑀺𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀓𑀧𑁆𑀧𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀲𑀗𑁆𑀖𑀸𑀝𑀺𑀬𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀅𑀦𑁆𑀢𑀭𑀯𑀸𑀲𑀓𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀜𑁆𑀘𑀓𑁂𑀦 𑀯𑀸 𑀅𑀢𑀺𑀭𑁂𑀓𑀧𑀜𑁆𑀘𑀓𑁂𑀦 𑀯𑀸 𑀢𑀤𑀳𑁂𑀯 𑀲𑀜𑁆𑀙𑀺𑀦𑁆𑀦𑁂𑀦 𑀲𑀫𑀡𑁆𑀟𑀮𑀻𑀓𑀢𑁂𑀦 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀧𑀼𑀕𑁆𑀕𑀮𑀲𑁆𑀲 𑀅𑀢𑁆𑀣𑀸𑀭𑀸 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁; 𑀲𑀫𑁆𑀫𑀸 𑀘𑁂 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁, 𑀢𑀜𑁆𑀘𑁂 𑀲𑀻𑀫𑀝𑁆𑀞𑁄 𑀅𑀦𑀼𑀫𑁄𑀤𑀢𑀺, 𑀏𑀯𑀫𑁆𑀧𑀺 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀢𑀁 𑀳𑁄𑀢𑀺 𑀓𑀣𑀺𑀦𑀁.

𑁩𑁧𑁦. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀉𑀩𑁆𑀪𑀢𑀁 𑀳𑁄𑀢𑀺 𑀓𑀣𑀺𑀦𑀁? 𑀅𑀝𑁆𑀞𑀺𑀫𑀸, 𑀪𑀺𑀓𑁆𑀔𑀯𑁂, 𑀫𑀸𑀢𑀺𑀓𑀸 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬 𑁋 𑀧𑀓𑁆𑀓𑀫𑀦𑀦𑁆𑀢𑀺𑀓𑀸, 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀸, 𑀦𑀸𑀲𑀦𑀦𑁆𑀢𑀺𑀓𑀸, 𑀲𑀯𑀦𑀦𑁆𑀢𑀺𑀓𑀸, 𑀆𑀲𑀸𑀯𑀘𑁆𑀙𑁂𑀤𑀺𑀓𑀸, 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀸, 𑀲𑀳𑀼𑀩𑁆𑀪𑀸𑀭𑀸’’𑀢𑀺 [𑀲𑀉𑀩𑁆𑀪𑀸𑀭𑀸𑀢𑀺 (𑀓.)].

𑀓𑀣𑀺𑀦𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.