𑁧𑁮𑁫. 𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸

𑁩𑁦𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁, 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀢𑀜𑁆𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀦 𑀓𑀧𑁆𑀧𑀢𑀻’𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀢𑀜𑁆𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁 𑀢𑀜𑁆𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀺. 𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 ‘𑀇𑀤𑀁 𑀓𑀧𑁆𑀧𑀢𑀻’𑀢𑀺 𑀅𑀦𑀦𑀼𑀜𑁆𑀜𑀸𑀢𑀁, 𑀢𑀜𑁆𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀫𑀓𑀸𑀮𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀯𑀓𑀸𑀮𑀺𑀓𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀯𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀫𑀓𑀸𑀮𑀺𑀓𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀬𑀸𑀫𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀺? 𑀓𑀧𑁆𑀧𑀢𑀺 𑀦𑀼 𑀔𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀬𑀸𑀯𑀚𑀻𑀯𑀺𑀓𑀁, 𑀦 𑀦𑀼 𑀔𑁄 𑀓𑀧𑁆𑀧𑀢𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀫𑀓𑀸𑀮𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀺. 𑀬𑀸𑀫𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑁂 𑀓𑀧𑁆𑀧𑀢𑀺, 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀺. 𑀬𑀸𑀫𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁, 𑀢𑀤𑀳𑀼 𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀫𑁂 𑀓𑀧𑁆𑀧𑀢𑀺, 𑀬𑀸𑀫𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀺. 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀧𑀝𑀺𑀕𑁆𑀕𑀳𑀺𑀢𑀁, 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀦 𑀓𑀧𑁆𑀧𑀢𑀻’’𑀢𑀺.

𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁄 𑀙𑀝𑁆𑀞𑁄.