𑁧𑁪𑁫. 𑀧𑀯𑀸𑀭𑀡𑀸𑀲𑀗𑁆𑀕𑀳𑁄

𑁨𑁪𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂𑀲𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀔𑁄 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄 𑀳𑁄𑀢𑀺. 𑀢𑀢𑁆𑀭 𑀘𑁂 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀔𑁄 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺, 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀓𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑁄. 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁 𑁋 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀓𑀭𑁂𑀬𑁆𑀬, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁 𑀅𑀯𑀺𑀯𑀤𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 𑀅𑀜𑁆𑀜𑀢𑀭𑁄 𑀨𑀸𑀲𑀼𑀯𑀺𑀳𑀸𑀭𑁄 𑀅𑀥𑀺𑀕𑀢𑁄. 𑀲𑀘𑁂 𑀫𑀬𑀁 𑀇𑀤𑀸𑀦𑀺 𑀧𑀯𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀼𑀁. 𑀏𑀯𑀁 𑀫𑀬𑀁 𑀇𑀫𑀫𑁆𑀳𑀸 𑀨𑀸𑀲𑀼𑀯𑀺𑀳𑀸𑀭𑀸 𑀧𑀭𑀺𑀩𑀸𑀳𑀺𑀭𑀸 𑀪𑀯𑀺𑀲𑁆𑀲𑀸𑀫. 𑀲𑀗𑁆𑀖𑁄 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀓𑀭𑁄𑀢𑀺, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀲𑁆𑀲𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀧𑀯𑀸𑀭𑀡𑀸𑀲𑀗𑁆𑀕𑀳𑀲𑁆𑀲 𑀓𑀭𑀡𑀁, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀲𑁆𑀲𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑁄 𑀲𑀗𑁆𑀖𑁂𑀦 𑀧𑀯𑀸𑀭𑀡𑀸𑀲𑀗𑁆𑀕𑀳𑁄, 𑀇𑀤𑀸𑀦𑀺 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀢𑀺, 𑀆𑀕𑀫𑁂 𑀚𑀼𑀡𑁆𑀳𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀯𑀸𑀭𑁂𑀲𑁆𑀲𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀓𑀢𑁂 𑀧𑀯𑀸𑀭𑀡𑀸𑀲𑀗𑁆𑀕𑀳𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀘𑁆𑀙𑀸𑀫𑀳𑀁, 𑀆𑀯𑀼𑀲𑁄, 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼𑀁; 𑀅𑀢𑁆𑀣𑀺 𑀫𑁂 𑀚𑀦𑀧𑀤𑁂 𑀓𑀭𑀡𑀻𑀬’’𑀦𑁆𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀲𑀸𑀥𑀸𑀯𑀼𑀲𑁄, 𑀧𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑀸𑀳𑀻’’𑀢𑀺. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀯𑀸𑀭𑀬𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀦𑀺𑀲𑁆𑀲𑀭𑁄 𑀔𑁄 𑀫𑁂 𑀢𑁆𑀯𑀁, 𑀆𑀯𑀼𑀲𑁄, 𑀧𑀯𑀸𑀭𑀡𑀸𑀬, 𑀦 𑀢𑀸𑀯𑀸𑀳𑀁 𑀧𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀬𑀫𑀸𑀦𑀲𑁆𑀲 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀉𑀪𑁄 𑀲𑀗𑁆𑀖𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀸. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀦𑀧𑀤𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀧𑀼𑀦𑀤𑁂𑀯 𑀅𑀦𑁆𑀢𑁄 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀢𑀁 𑀆𑀯𑀸𑀲𑀁 𑀆𑀕𑀘𑁆𑀙𑀢𑀺, 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀦𑀺𑀲𑁆𑀲𑀭𑁄 𑀔𑁄 𑀫𑁂 𑀢𑁆𑀯𑀁, 𑀆𑀯𑀼𑀲𑁄, 𑀧𑀯𑀸𑀭𑀡𑀸𑀬; 𑀧𑀯𑀸𑀭𑀺𑀢𑁄 𑀅𑀳’’𑀦𑁆𑀢𑀺. 𑀢𑁂𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀧𑀯𑀸𑀭𑀺𑀬𑀫𑀸𑀦𑁂 𑀲𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀉𑀪𑁄 𑀲𑀗𑁆𑀖𑁂𑀦 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀲𑀫𑀦𑀼𑀕𑀸𑀳𑀺𑀢𑁆𑀯𑀸 𑀬𑀣𑀸𑀥𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺.

𑀧𑀯𑀸𑀭𑀡𑀸𑀲𑀗𑁆𑀕𑀳𑁄 𑀦𑀺𑀝𑁆𑀞𑀺𑀢𑁄.

𑀧𑀯𑀸𑀭𑀡𑀸𑀓𑁆𑀔𑀦𑁆𑀥𑀓𑁄 𑀘𑀢𑀼𑀢𑁆𑀣𑁄.