𑁮𑁩. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑀅𑀚𑁆𑀛𑁂𑀲𑀦𑀸𑀤𑀺

𑁧𑁫𑁫. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀘𑁄𑀤𑀦𑀸𑀯𑀢𑁆𑀣𑀼 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀘𑁄𑀤𑀦𑀸𑀯𑀢𑁆𑀣𑀼 𑀢𑀤𑀯𑀲𑀭𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺. 𑀢𑀢𑁆𑀣 𑀣𑁂𑀭𑁄 𑀪𑀺𑀓𑁆𑀔𑀼 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄. 𑀲𑁄 𑀦 𑀚𑀸𑀦𑀸𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 ‘𑀣𑁂𑀭𑀸𑀥𑀺𑀓𑀁 𑀧𑀸𑀢𑀺𑀫𑁄𑀓𑁆𑀔’𑀦𑁆𑀢𑀺, 𑀅𑀬𑀜𑁆𑀘 𑀅𑀫𑁆𑀳𑀸𑀓𑀁 𑀣𑁂𑀭𑁄 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄, 𑀦 𑀚𑀸𑀦𑀸𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁄 𑀢𑀢𑁆𑀣 𑀪𑀺𑀓𑁆𑀔𑀼 𑀩𑁆𑀬𑀢𑁆𑀢𑁄 𑀧𑀝𑀺𑀩𑀮𑁄 𑀢𑀲𑁆𑀲𑀸𑀥𑁂𑀬𑁆𑀬𑀁 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀢𑁂 𑀣𑁂𑀭𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀤𑀼𑀢𑀺𑀬𑀁 𑀣𑁂𑀭𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀢𑀢𑀺𑀬𑀁 𑀣𑁂𑀭𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀲𑀗𑁆𑀖𑀦𑀯𑀓𑀁 𑀅𑀚𑁆𑀛𑁂𑀲𑀺𑀁𑀲𑀼 𑁋 ‘‘𑀉𑀤𑁆𑀤𑀺𑀲𑀢𑀼 𑀆𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀫𑀸𑀳 𑁋 ‘‘𑀦 𑀫𑁂, 𑀪𑀦𑁆𑀢𑁂, 𑀯𑀢𑁆𑀢𑀢𑀻’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸. 𑀢𑁂 𑀦 𑀚𑀸𑀦𑀦𑁆𑀢𑀺 𑀉𑀧𑁄𑀲𑀣𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸, 𑀧𑀸𑀢𑀺𑀫𑁄𑀓𑁆𑀔𑀁 𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀯𑀸. 𑀢𑁂 𑀣𑁂𑀭𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀤𑀼𑀢𑀺𑀬𑀁 𑀣𑁂𑀭𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀢𑀢𑀺𑀬𑀁 𑀣𑁂𑀭𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀆𑀯𑀼𑀲𑁄, 𑀯𑀢𑁆𑀢𑀢𑀻’’𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀬𑀸𑀯 𑀲𑀗𑁆𑀖𑀦𑀯𑀓𑀁 𑀅𑀚𑁆𑀛𑁂𑀲𑀦𑁆𑀢𑀺 𑁋 ‘‘𑀉𑀤𑁆𑀤𑀺𑀲𑀢𑀼 𑀆𑀬𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀲𑁄𑀧𑀺 𑀏𑀯𑀁 𑀯𑀤𑁂𑀢𑀺 𑁋 ‘‘𑀦 𑀫𑁂, 𑀪𑀦𑁆𑀢𑁂, 𑀯𑀢𑁆𑀢𑀢𑀻’’𑀢𑀺. 𑀢𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀏𑀓𑁄 𑀪𑀺𑀓𑁆𑀔𑀼 𑀲𑀸𑀫𑀦𑁆𑀢𑀸 𑀆𑀯𑀸𑀲𑀸 𑀲𑀚𑁆𑀚𑀼𑀓𑀁 𑀧𑀸𑀳𑁂𑀢𑀩𑁆𑀩𑁄 𑁋 𑀕𑀘𑁆𑀙𑀸𑀯𑀼𑀲𑁄, 𑀲𑀁𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀦 𑀆𑀕𑀘𑁆𑀙𑀸𑀳𑀻𑀢𑀺.

𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑁂𑀦 𑀦𑀼 𑀔𑁄 𑀧𑀸𑀳𑁂𑀢𑀩𑁆𑀩𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀦𑀯𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀼𑀦𑁆𑀢𑀺. 𑀣𑁂𑀭𑁂𑀦 𑀆𑀡𑀢𑁆𑀢𑀸 𑀦𑀯𑀸 𑀪𑀺𑀓𑁆𑀔𑀽 𑀦 𑀕𑀘𑁆𑀙𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀆𑀡𑀢𑁆𑀢𑁂𑀦 𑀅𑀕𑀺𑀮𑀸𑀦𑁂𑀦 𑀦 𑀕𑀦𑁆𑀢𑀩𑁆𑀩𑀁. 𑀬𑁄 𑀦 𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.