𑁭𑁮. 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺

𑁧𑁫𑁦. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀺 𑀦𑀼 𑀔𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸 𑁋 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 𑀧𑀞𑀫𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 𑀤𑀼𑀢𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 𑀢𑀢𑀺𑀬𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁. 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀯𑀺𑀢𑁆𑀣𑀸𑀭𑁂𑀦𑁂𑀯 𑀧𑀜𑁆𑀘𑀫𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑁋 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑁋 𑀲𑀩𑁆𑀩𑀓𑀸𑀮𑀁 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀢𑀤𑀳𑀼𑀧𑁄𑀲𑀣𑁂 𑀲𑀯𑀭𑀪𑀬𑀁 [𑀲𑀁𑀘𑀭𑀪𑀬𑀁 (𑀲𑁆𑀬𑀸.)] 𑀅𑀳𑁄𑀲𑀺. 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀯𑀺𑀢𑁆𑀣𑀸𑀭𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀲𑀢𑀺𑀧𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀁. 𑀬𑁄 𑀉𑀤𑁆𑀤𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑀺 𑀅𑀦𑁆𑀢𑀭𑀸𑀬𑁂 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁. 𑀢𑀢𑁆𑀭𑀺𑀫𑁂 𑀅𑀦𑁆𑀢𑀭𑀸𑀬𑀸 𑁋 𑀭𑀸𑀚𑀦𑁆𑀢𑀭𑀸𑀬𑁄, 𑀘𑁄𑀭𑀦𑁆𑀢𑀭𑀸𑀬𑁄, 𑀅𑀕𑁆𑀬𑀦𑁆𑀢𑀭𑀸𑀬𑁄, 𑀉𑀤𑀓𑀦𑁆𑀢𑀭𑀸𑀬𑁄, 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄, 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁄, 𑀯𑀸𑀴𑀦𑁆𑀢𑀭𑀸𑀬𑁄, 𑀲𑀭𑀻𑀲𑀧𑀦𑁆𑀢𑀭𑀸𑀬𑁄, 𑀚𑀻𑀯𑀺𑀢𑀦𑁆𑀢𑀭𑀸𑀬𑁄, 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀯𑀭𑀽𑀧𑁂𑀲𑀼 𑀅𑀦𑁆𑀢𑀭𑀸𑀬𑁂𑀲𑀼 𑀲𑀁𑀔𑀺𑀢𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀼𑀁, 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 𑀯𑀺𑀢𑁆𑀣𑀸𑀭𑁂𑀦𑀸𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀅𑀦𑀚𑁆𑀛𑀺𑀝𑁆𑀞𑀸 𑀥𑀫𑁆𑀫𑀁 𑀪𑀸𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀫𑀚𑁆𑀛𑁂 𑀅𑀦𑀚𑁆𑀛𑀺𑀝𑁆𑀞𑁂𑀦 𑀥𑀫𑁆𑀫𑁄 𑀪𑀸𑀲𑀺𑀢𑀩𑁆𑀩𑁄. 𑀬𑁄 𑀪𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀥𑀫𑁆𑀫𑀁 𑀪𑀸𑀲𑀺𑀢𑀼𑀁 𑀧𑀭𑀁 𑀯𑀸 𑀅𑀚𑁆𑀛𑁂𑀲𑀺𑀢𑀼𑀦𑁆𑀢𑀺.