𑁧𑁦. 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁄

𑁨𑁭𑁧. 𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸

𑁪𑁫𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺 [𑀆𑀧𑀢𑁆𑀢𑀺𑀤𑀺𑀝𑁆𑀞𑀻 (𑀲𑀻.)] 𑀳𑁄𑀢𑀺; 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸 𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺; 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀘 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄, 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀣 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’’𑀢𑀺. 𑀅𑀮𑀪𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀚𑀸𑀦𑀧𑀤𑀸𑀦𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀸𑀦𑀁 𑀲𑀫𑁆𑀪𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄, 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’’𑀢𑀺. 𑀅𑀮𑀪𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀚𑀸𑀦𑀧𑀤𑁂𑀧𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀅𑀣 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄, 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀆𑀧𑀢𑁆𑀢𑀺 𑀏𑀲𑀸 𑀆𑀯𑀼𑀲𑁄, 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀫𑀸 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀺𑀢𑁆𑀣 𑀅𑀦𑀼𑀧𑀭𑀺𑀯𑀸𑀭𑁂𑀣𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑁂𑀧𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀺𑀁𑀲𑀼 𑀅𑀦𑀼𑀧𑀭𑀺𑀯𑀸𑀭𑁂𑀲𑀼𑀁.

𑁪𑁫𑁨. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀅𑀳𑁄𑀲𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀅𑀳𑁂𑀲𑀼𑀁. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀅𑀳𑁂𑀲𑀼𑀁. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀆𑀯𑀼𑀲𑁄, 𑀆𑀧𑀦𑁆𑀦𑁄, 𑀧𑀲𑁆𑀲𑀲𑁂𑀢𑀁 𑀆𑀧𑀢𑁆𑀢𑀺’𑀦𑁆𑀢𑀺? ‘‘𑀦𑀢𑁆𑀣𑀺 𑀫𑁂, 𑀆𑀯𑀼𑀲𑁄, 𑀆𑀧𑀢𑁆𑀢𑀺 𑀬𑀫𑀳𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀲𑀸𑀫𑀕𑁆𑀕𑀺𑀁 𑀮𑀪𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀁𑀲𑀼. 𑀲𑁄 𑀘, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀅𑀣 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀣 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’𑀢𑀺. 𑀅𑀮𑀪𑀺 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀚𑀸𑀦𑀧𑀤𑀸𑀦𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀸𑀦𑀁 𑀲𑀫𑁆𑀪𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦. 𑀳𑁄𑀦𑁆𑀢𑀼 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑀸’𑀢𑀺. 𑀅𑀮𑀪𑀺 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀚𑀸𑀦𑀧𑀤𑁂𑀧𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀧𑀓𑁆𑀔𑁂. 𑀅𑀣 𑀔𑁄 𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘𑀅𑀦𑀸𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀆𑀧𑀢𑁆𑀢𑀺. 𑀅𑀦𑀸𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄. 𑀅𑀦𑀼𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑁄. 𑀅𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀓𑀼𑀧𑁆𑀧𑁂𑀦 𑀅𑀝𑁆𑀞𑀸𑀦𑀸𑀭𑀳𑁂𑀦𑀸’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘𑀆𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀫𑀸 𑀔𑁄 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀺𑀢𑁆𑀣 𑀅𑀦𑀼𑀧𑀭𑀺𑀯𑀸𑀭𑁂𑀣𑀸’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀉𑀓𑁆𑀔𑁂𑀧𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑀣𑁂𑀯 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀅𑀦𑀼𑀯𑀢𑁆𑀢𑀦𑁆𑀢𑀺 𑀅𑀦𑀼𑀧𑀭𑀺𑀯𑀸𑀭𑁂𑀦𑁆𑀢𑀻’’𑀢𑀺.

𑁪𑁫𑁩. 𑀅𑀣 𑀔𑁄 𑀪𑀕𑀯𑀸 ‘𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀪𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑁋 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, ‘𑀧𑀝𑀺𑀪𑀸𑀢𑀺 𑀦𑁄, 𑀧𑀝𑀺𑀪𑀸𑀢𑀺 𑀦𑁄’𑀢𑀺 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀪𑀺𑀓𑁆𑀔𑀼𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁 𑀫𑀜𑁆𑀜𑀺𑀢𑁆𑀣’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀘𑁂 𑀫𑀬𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀸𑀫, 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀦 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀢𑁂 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀘𑁂 𑀫𑀬𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀸𑀫, 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀯𑀸𑀭𑁂𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀧𑀯𑀸𑀭𑁂𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀸𑀫. 𑀦 𑀫𑀬𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀯𑀺𑀦𑀸 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫. 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀳𑀺 𑀦 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄’’𑀢𑀺.

𑁪𑁫𑁪. 𑀅𑀣 𑀔𑁄 𑀪𑀕𑀯𑀸 𑀉𑀓𑁆𑀔𑁂𑀧𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀪𑀸𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 ‘𑀦𑀸𑀫𑁆𑀳 𑀆𑀧𑀦𑁆𑀦𑀸, 𑀦𑀸𑀫𑁆𑀳 𑀆𑀧𑀦𑁆𑀦𑀸’𑀢𑀺 𑀆𑀧𑀢𑁆𑀢𑀺𑀁 𑀦 𑀧𑀝𑀺𑀓𑀸𑀢𑀩𑁆𑀩𑀁 𑀫𑀜𑁆𑀜𑀺𑀢𑁆𑀣’’.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑁂 𑀔𑁄 𑀆𑀬𑀲𑁆𑀫𑀦𑁆𑀢𑁄 [𑀆𑀬𑀲𑁆𑀫𑀦𑁆𑀢𑀸 (𑀓.)] 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀦𑀸𑀮𑀁 𑀫𑀫𑀁 𑀯𑀸 𑀓𑀸𑀭𑀡𑀸 𑀅𑀜𑁆𑀜𑁂𑀲𑀁 𑀯𑀸 𑀓𑀸𑀭𑀡𑀸 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁. 𑀲𑀘𑁂 𑀫𑀁 𑀇𑀫𑁂 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀦 𑀫𑀬𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀲𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀤𑀺𑀝𑁆𑀞𑀺𑀦𑁄 𑀳𑁄𑀦𑁆𑀢𑀺. 𑀲𑁄 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂 𑀪𑀺𑀓𑁆𑀔𑀽 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑁂 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀦𑀸𑀮𑀁 𑀫𑀫𑀁 𑀯𑀸 𑀓𑀸𑀭𑀡𑀸 𑀅𑀜𑁆𑀜𑁂𑀲𑀁 𑀯𑀸 𑀓𑀸𑀭𑀡𑀸 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁. 𑀲𑀘𑁂 𑀫𑀁 𑀇𑀫𑁂 𑀪𑀺𑀓𑁆𑀔𑀽 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀦 𑀫𑀬𑀸 𑀲𑀤𑁆𑀥𑀺𑀁 𑀧𑀯𑀸𑀭𑁂𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀧𑀯𑀸𑀭𑁂𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀆𑀲𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀬𑀸𑀕𑀼𑀧𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺 𑀯𑀺𑀦𑀸 𑀫𑀬𑀸 𑀪𑀢𑁆𑀢𑀕𑁆𑀕𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀏𑀓𑀘𑁆𑀙𑀦𑁆𑀦𑁂 𑀯𑀲𑀺𑀲𑁆𑀲𑀦𑁆𑀢𑀺. 𑀦 𑀫𑀬𑀸 𑀲𑀤𑁆𑀥𑀺𑀁 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀫𑀬𑀸 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀪𑁂𑀤𑀕𑀭𑀼𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀲𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀪𑀸𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁪𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀉𑀓𑁆𑀔𑁂𑀧𑀓𑀸 𑀧𑀦 𑀪𑀺𑀓𑁆𑀔𑀽 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀉𑀓𑁆𑀔𑁂𑀧𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀫𑀬𑀁 𑀧𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀦𑀺𑀲𑁆𑀲𑀻𑀫𑀁 𑀕𑀦𑁆𑀢𑁆𑀯𑀸 𑀉𑀧𑁄𑀲𑀣𑀁 𑀓𑀭𑁄𑀫, 𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. ‘‘𑀢𑁂 𑀘𑁂, 𑀪𑀺𑀓𑁆𑀔𑀼, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀬𑀣𑀸 𑀫𑀬𑀸 𑀜𑀢𑁆𑀢𑀺 𑀘 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀧𑀜𑁆𑀜𑀢𑁆𑀢𑀸, 𑀢𑁂𑀲𑀁 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀥𑀫𑁆𑀫𑀺𑀓𑀸𑀦𑀺 𑀓𑀫𑁆𑀫𑀸𑀦𑀺 𑀪𑀯𑀺𑀲𑁆𑀲’’𑀦𑁆𑀢𑀺 𑀅𑀓𑀼𑀧𑁆𑀧𑀸𑀦𑀺 𑀞𑀸𑀦𑀸𑀭𑀳𑀸𑀦𑀺. 𑀢𑀼𑀫𑁆𑀳𑁂 𑀘𑁂, 𑀪𑀺𑀓𑁆𑀔𑀼, 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀣, 𑀲𑀗𑁆𑀖𑀓𑀫𑁆𑀫𑀁 𑀓𑀭𑀺𑀲𑁆𑀲𑀣, 𑀬𑀣𑀸 𑀫𑀬𑀸 𑀜𑀢𑁆𑀢𑀺 𑀘 𑀅𑀦𑀼𑀲𑁆𑀲𑀸𑀯𑀦𑀸 𑀘 𑀧𑀜𑁆𑀜𑀢𑁆𑀢𑀸, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀥𑀫𑁆𑀫𑀺𑀓𑀸𑀦𑀺 𑀓𑀫𑁆𑀫𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺 𑀅𑀓𑀼𑀧𑁆𑀧𑀸𑀦𑀺 𑀞𑀸𑀦𑀸𑀭𑀳𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀸𑀦𑀸𑀲𑀁𑀯𑀸𑀲𑀓𑀸 𑀏𑀢𑁂 [𑀢𑁂 (𑀲𑁆𑀬𑀸.)] 𑀪𑀺𑀓𑁆𑀔𑀽 [𑀪𑀺𑀓𑁆𑀔𑀼 (𑀲𑀻. 𑀲𑁆𑀬𑀸.)] 𑀢𑀼𑀫𑁆𑀳𑁂𑀳𑀺, 𑀢𑀼𑀫𑁆𑀳𑁂 𑀘 𑀢𑁂𑀳𑀺 𑀦𑀸𑀦𑀸𑀲𑀁𑀯𑀸𑀲𑀓𑀸.

‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀼, 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺𑀬𑁄 𑁋 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀁 𑀓𑀭𑁄𑀢𑀺, 𑀲𑀫𑀕𑁆𑀕𑁄 𑀯𑀸 𑀦𑀁 𑀲𑀗𑁆𑀖𑁄 𑀉𑀓𑁆𑀔𑀺𑀧𑀢𑀺 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀼, 𑀤𑁆𑀯𑁂 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺𑀬𑁄. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀼, 𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀬𑁄 𑁋 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀫𑀸𑀦𑀲𑀁𑀯𑀸𑀲𑀁 𑀓𑀭𑁄𑀢𑀺, 𑀲𑀫𑀕𑁆𑀕𑁄 𑀯𑀸 𑀦𑀁 𑀲𑀗𑁆𑀖𑁄 𑀉𑀓𑁆𑀔𑀺𑀢𑁆𑀢𑀁 𑀑𑀲𑀸𑀭𑁂𑀢𑀺 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀼, 𑀤𑁆𑀯𑁂 𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀬𑁄’’𑀢𑀺.

𑁪𑁫𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀦𑁆𑀢𑀺, 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑁄𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀲𑁆𑀲𑀦𑁆𑀢𑀺, 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀲𑁆𑀲𑀦𑁆𑀢𑀺, 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀪𑀡𑁆𑀟𑀦𑀚𑀸𑀢𑀸…𑀧𑁂… 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀦𑁆𑀦𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂 𑀅𑀥𑀫𑁆𑀫𑀺𑀬𑀸𑀬𑀫𑀸𑀦𑁂 [𑀅𑀥𑀫𑁆𑀫𑀺𑀬𑀫𑀸𑀦𑁂 (𑀲𑀻. 𑀲𑁆𑀬𑀸. 𑀓𑀢𑁆𑀣𑀘𑀺) 𑀅𑀥𑀫𑁆𑀫𑀻𑀬𑀫𑀸𑀦𑁂 (𑀓.)] 𑀅𑀲𑀫𑁆𑀫𑁄𑀤𑀺𑀓𑀸𑀬 𑀯𑀢𑁆𑀢𑀫𑀸𑀦𑀸𑀬 [-‘‘𑀅𑀲𑀫𑁆𑀫𑁄𑀤𑀺𑀓𑀸𑀯𑀢𑁆𑀢𑀫𑀸𑀦𑀸𑀬’’ 𑀇𑀢𑀺 𑀅𑀝𑁆𑀞𑀓𑀣𑀸𑀬𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀸𑀞𑁄] ‘𑀏𑀢𑁆𑀢𑀸𑀯𑀢𑀸 𑀦 𑀅𑀜𑁆𑀜𑀫𑀜𑁆𑀜𑀁 𑀅𑀦𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀉𑀧𑀤𑀁𑀲𑁂𑀲𑁆𑀲𑀸𑀫, 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀪𑀺𑀦𑁆𑀦𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂 𑀥𑀫𑁆𑀫𑀺𑀬𑀸𑀬𑀫𑀸𑀦𑁂 𑀲𑀫𑁆𑀫𑁄𑀤𑀺𑀓𑀸𑀬 𑀯𑀢𑁆𑀢𑀫𑀸𑀦𑀸𑀬 𑀆𑀲𑀦𑀦𑁆𑀢𑀭𑀺𑀓𑀸𑀬 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺.

𑁪𑁫𑁭. [𑀫. 𑀦𑀺. 𑁩.𑁨𑁩𑁬 𑀣𑁄𑀓𑀁 𑀯𑀺𑀲𑀤𑀺𑀲𑀁] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀲𑀗𑁆𑀖𑀫𑀚𑁆𑀛𑁂 𑀪𑀡𑁆𑀟𑀦𑀚𑀸𑀢𑀸 𑀓𑀮𑀳𑀚𑀸𑀢𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀅𑀥𑀫𑁆𑀫𑀯𑀸𑀤𑀻 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼. 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀅𑀥𑀫𑁆𑀫𑀯𑀸𑀤𑀻 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼. 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺.

𑀓𑁄𑀲𑀫𑁆𑀩𑀓𑀯𑀺𑀯𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁨. 𑀤𑀻𑀖𑀸𑀯𑀼𑀯𑀢𑁆𑀣𑀼

𑁪𑁫𑁮. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀩𑀸𑀭𑀸𑀡𑀲𑀺𑀬𑀁 [𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀓𑀸𑀲𑀺𑀭𑀸𑀚𑀸 𑀅𑀳𑁄𑀲𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀫𑀳𑀩𑁆𑀩𑀮𑁄 𑀫𑀳𑀸𑀯𑀸𑀳𑀦𑁄 𑀫𑀳𑀸𑀯𑀺𑀚𑀺𑀢𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀤𑀻𑀖𑀻𑀢𑀺 𑀦𑀸𑀫 𑀓𑁄𑀲𑀮𑀭𑀸𑀚𑀸 𑀅𑀳𑁄𑀲𑀺 𑀤𑀮𑀺𑀤𑁆𑀤𑁄 𑀅𑀧𑁆𑀧𑀥𑀦𑁄 𑀅𑀧𑁆𑀧𑀪𑁄𑀕𑁄 𑀅𑀧𑁆𑀧𑀩𑀮𑁄 𑀅𑀧𑁆𑀧𑀯𑀸𑀳𑀦𑁄 𑀅𑀧𑁆𑀧𑀯𑀺𑀚𑀺𑀢𑁄 𑀅𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀅𑀩𑁆𑀪𑀼𑀬𑁆𑀬𑀸𑀲𑀺. 𑀅𑀲𑁆𑀲𑁄𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑁋 ‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀺𑀭 𑀓𑀸𑀲𑀺𑀭𑀸𑀚𑀸 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀫𑀁 𑀅𑀩𑁆𑀪𑀼𑀬𑁆𑀬𑀸𑀢𑁄’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀔𑁄 𑀓𑀸𑀲𑀺𑀭𑀸𑀚𑀸 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀫𑀳𑀩𑁆𑀩𑀮𑁄 𑀫𑀳𑀸𑀯𑀸𑀳𑀦𑁄 𑀫𑀳𑀸𑀯𑀺𑀚𑀺𑀢𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄, 𑀅𑀳𑀁 𑀧𑀦𑀫𑁆𑀳𑀺 𑀤𑀮𑀺𑀤𑁆𑀤𑁄 𑀅𑀧𑁆𑀧𑀥𑀦𑁄 𑀅𑀧𑁆𑀧𑀪𑁄𑀕𑁄 𑀅𑀧𑁆𑀧𑀩𑀮𑁄 𑀅𑀧𑁆𑀧𑀯𑀸𑀳𑀦𑁄 𑀅𑀧𑁆𑀧𑀯𑀺𑀚𑀺𑀢𑁄 𑀅𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄, 𑀦𑀸𑀳𑀁 𑀧𑀝𑀺𑀩𑀮𑁄 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀓𑀸𑀲𑀺𑀭𑀜𑁆𑀜𑀸 𑀏𑀓𑀲𑀗𑁆𑀖𑀸𑀢𑀫𑁆𑀧𑀺 𑀲𑀳𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀫𑀳𑁂𑀲𑀺𑀁 𑀆𑀤𑀸𑀬 𑀧𑀝𑀺𑀓𑀘𑁆𑀘𑁂𑀯 𑀦𑀕𑀭𑀫𑁆𑀳𑀸 𑀦𑀺𑀧𑁆𑀧𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑀜𑁆𑀘 𑀓𑁄𑀲𑀜𑁆𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀲𑀧𑀚𑀸𑀧𑀢𑀺𑀓𑁄 𑀬𑁂𑀦 𑀯𑀸𑀭𑀸𑀡𑀲𑀻 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀲𑀧𑀚𑀸𑀧𑀢𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀑𑀓𑀸𑀲𑁂 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀭𑀺𑀩𑁆𑀩𑀸𑀚𑀓𑀘𑁆𑀙𑀦𑁆𑀦𑁂𑀦 𑀧𑀝𑀺𑀯𑀲𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀦𑀘𑀺𑀭𑀲𑁆𑀲𑁂𑀯 𑀕𑀩𑁆𑀪𑀺𑀦𑀻 𑀅𑀳𑁄𑀲𑀺. 𑀢𑀲𑁆𑀲𑀸 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺 𑁋 ‘‘𑀇𑀘𑁆𑀙𑀢𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼𑀁’’. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀕𑀩𑁆𑀪𑀺𑀦𑀻𑀫𑁆𑀳𑀺, 𑀤𑁂𑀯. 𑀢𑀲𑁆𑀲𑀸 𑀫𑁂 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄 𑁋 𑀇𑀘𑁆𑀙𑀸𑀫𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 [𑀯𑀫𑁆𑀫𑀺𑀢𑀁 (𑀲𑀻.)] 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼’’𑀦𑁆𑀢𑀺. ‘‘𑀓𑀼𑀢𑁄, 𑀤𑁂𑀯𑀺, 𑀅𑀫𑁆𑀳𑀸𑀓𑀁 𑀤𑀼𑀕𑁆𑀕𑀢𑀸𑀦𑀁 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 𑀲𑀦𑁆𑀦𑀤𑁆𑀥𑀸 𑀯𑀫𑁆𑀫𑀺𑀓𑀸 𑀲𑀼𑀪𑀽𑀫𑁂 𑀞𑀺𑀢𑀸, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼’’𑀦𑁆𑀢𑀺 [𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀦𑁆𑀢𑀺 (𑀲𑀻. 𑀲𑁆𑀬𑀸.)] ‘‘𑀲𑀘𑀸𑀳𑀁, 𑀤𑁂𑀯, 𑀦 𑀮𑀪𑀺𑀲𑁆𑀲𑀸𑀫𑀺, 𑀫𑀭𑀺𑀲𑁆𑀲𑀸𑀫𑀻’’𑀢𑀺.

𑁪𑁫𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀲𑀳𑀸𑀬𑁄 𑀳𑁄𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀲𑀔𑀻 𑀢𑁂, 𑀲𑀫𑁆𑀫, 𑀕𑀩𑁆𑀪𑀺𑀦𑀻. 𑀢𑀲𑁆𑀲𑀸 𑀏𑀯𑀭𑀽𑀧𑁄 𑀤𑁄𑀳𑀴𑁄 𑀉𑀧𑁆𑀧𑀦𑁆𑀦𑁄 𑁋 𑀇𑀘𑁆𑀙𑀢𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀤𑁂𑀯, 𑀫𑀬𑀫𑁆𑀧𑀺 𑀤𑁂𑀯𑀺𑀁 𑀧𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀺𑀁, 𑀤𑀺𑀲𑁆𑀯𑀸𑀦 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀓𑁄𑀲𑀮𑀭𑀸𑀚𑀸 𑀯𑀢 𑀪𑁄 𑀓𑀼𑀘𑁆𑀙𑀺𑀕𑀢𑁄, 𑀓𑁄𑀲𑀮𑀭𑀸𑀚𑀸 𑀯𑀢 𑀪𑁄 𑀓𑀼𑀘𑁆𑀙𑀺𑀕𑀢𑁄’’𑀢𑀺. 𑀅𑀢𑁆𑀢𑀫𑀦𑀸 [𑀅𑀯𑀺𑀫𑀦𑀸 (𑀲𑀻. 𑀲𑁆𑀬𑀸. 𑀓𑀢𑁆𑀣𑀘𑀺], 𑀤𑁂𑀯𑀺, 𑀳𑁄𑀳𑀺. 𑀮𑀘𑁆𑀙𑀲𑀺 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼𑀦𑁆𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀢𑀣𑀸, 𑀤𑁂𑀯, 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀲𑁆𑀯𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 𑀲𑀦𑁆𑀦𑀤𑁆𑀥𑀸 𑀯𑀫𑁆𑀫𑀺𑀓𑀸 𑀲𑀼𑀪𑀽𑀫𑁂 𑀢𑀺𑀝𑁆𑀞𑀢𑀼, 𑀔𑀕𑁆𑀕𑀸 𑀘 𑀥𑁄𑀯𑀺𑀬𑀦𑁆𑀢𑀽’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀬𑀣𑀸, 𑀪𑀡𑁂, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀆𑀳 𑀢𑀣𑀸 𑀓𑀭𑁄𑀣𑀸’’𑀢𑀺. 𑀅𑀮𑀪𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀫𑀦𑀓𑀸𑀮𑁂 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀤𑁆𑀥𑀁 𑀯𑀫𑁆𑀫𑀺𑀓𑀁 𑀲𑀼𑀪𑀽𑀫𑁂 𑀞𑀺𑀢𑀁 𑀧𑀲𑁆𑀲𑀺𑀢𑀼𑀁, 𑀔𑀕𑁆𑀕𑀸𑀦𑀜𑁆𑀘 𑀥𑁄𑀯𑀦𑀁 𑀧𑀸𑀢𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀫𑀳𑁂𑀲𑀻 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀲𑁆𑀲 𑀤𑀻𑀖𑀸𑀯𑀽𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀦𑀘𑀺𑀭𑀲𑁆𑀲𑁂𑀯 𑀯𑀺𑀜𑁆𑀜𑀼𑀢𑀁 𑀧𑀸𑀧𑀼𑀡𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄, 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁, 𑀲𑀘𑀸𑀬𑀁 𑀅𑀫𑁆𑀳𑁂 𑀚𑀸𑀦𑀺𑀲𑁆𑀲𑀢𑀺, 𑀲𑀩𑁆𑀩𑁂𑀯 𑀢𑀬𑁄 𑀖𑀸𑀢𑀸𑀧𑁂𑀲𑁆𑀲𑀢𑀺, 𑀬𑀁𑀦𑀽𑀦𑀸𑀳𑀁 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀩𑀳𑀺𑀦𑀕𑀭𑁂 𑀯𑀸𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀯𑁂 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀩𑀳𑀺𑀦𑀕𑀭𑁂 𑀯𑀸𑀲𑁂𑀲𑀺. 𑀅𑀣 𑀔𑁄 𑀪𑀺𑀓𑁆𑀔𑀯𑁂 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑀳𑀺𑀦𑀕𑀭𑁂 𑀧𑀝𑀺𑀯𑀲𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀺.

𑁪𑁬𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀓𑀧𑁆𑀧𑀓𑁄 𑀩𑁆𑀭𑀳𑁆𑀫𑀤𑀢𑁆𑀢𑁂 𑀓𑀸𑀲𑀺𑀭𑀜𑁆𑀜𑁂 𑀧𑀝𑀺𑀯𑀲𑀢𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀓𑀧𑁆𑀧𑀓𑁄 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀑𑀓𑀸𑀲𑁂 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀭𑀺𑀩𑁆𑀩𑀸𑀚𑀓𑀘𑁆𑀙𑀦𑁆𑀦𑁂𑀦 𑀧𑀝𑀺𑀯𑀲𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀤𑀻𑀖𑀻𑀢𑀺, 𑀤𑁂𑀯, 𑀓𑁄𑀲𑀮𑀭𑀸𑀚𑀸 𑀲𑀧𑀚𑀸𑀧𑀢𑀺𑀓𑁄 𑀩𑀸𑀭𑀸𑀡𑀲𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀑𑀓𑀸𑀲𑁂 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀧𑀭𑀺𑀩𑁆𑀩𑀸𑀚𑀓𑀘𑁆𑀙𑀦𑁆𑀦𑁂𑀦 𑀧𑀝𑀺𑀯𑀲𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀆𑀦𑁂𑀣𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀆𑀦𑁂𑀲𑀼𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀘𑀢𑀼𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀩𑀺𑀮𑀸𑀦𑀺 𑀦𑀺𑀓𑁆𑀔𑀺𑀧𑀣𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀦𑁆𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀘𑀺𑀭𑀁𑀤𑀺𑀝𑁆𑀞𑀸 𑀔𑁄 𑀫𑁂 𑀫𑀸𑀢𑀸𑀧𑀺𑀢𑀭𑁄. 𑀬𑀁𑀦𑀽𑀦𑀸𑀳𑀁 𑀫𑀸𑀢𑀸𑀧𑀺𑀢𑀭𑁄 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀤𑁆𑀤𑀲 𑀫𑀸𑀢𑀸𑀧𑀺𑀢𑀭𑁄 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀬𑁂𑀦 𑀫𑀸𑀢𑀸𑀧𑀺𑀢𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀉𑀫𑁆𑀫𑀢𑁆𑀢𑀓𑁄 𑀅𑀬𑀁 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀯𑀺𑀧𑁆𑀧𑀮𑀧𑀢𑀺. 𑀓𑁄 𑀇𑀫𑀲𑁆𑀲 𑀤𑀻𑀖𑀸𑀯𑀼? 𑀓𑀁 𑀅𑀬𑀁 𑀏𑀯𑀫𑀸𑀳 𑁋 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. ‘‘𑀦𑀸𑀳𑀁, 𑀪𑀡𑁂, 𑀉𑀫𑁆𑀫𑀢𑁆𑀢𑀓𑁄 𑀯𑀺𑀧𑁆𑀧𑀮𑀧𑀸𑀫𑀺, 𑀅𑀧𑀺 𑀘 𑀬𑁄 𑀯𑀺𑀜𑁆𑀜𑀽 𑀲𑁄 𑀯𑀺𑀪𑀸𑀯𑁂𑀲𑁆𑀲𑀢𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀉𑀫𑁆𑀫𑀢𑁆𑀢𑀓𑁄 𑀅𑀬𑀁 𑀤𑀻𑀖𑀻𑀢𑀺 𑀓𑁄𑀲𑀮𑀭𑀸𑀚𑀸 𑀯𑀺𑀧𑁆𑀧𑀮𑀧𑀢𑀺. 𑀓𑁄 𑀇𑀫𑀲𑁆𑀲 𑀤𑀻𑀖𑀸𑀯𑀼? 𑀓𑀁 𑀅𑀬𑀁 𑀏𑀯𑀫𑀸𑀳 𑁋 𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. ‘‘𑀦𑀸𑀳𑀁, 𑀪𑀡𑁂, 𑀉𑀫𑁆𑀫𑀢𑁆𑀢𑀓𑁄 𑀯𑀺𑀧𑁆𑀧𑀮𑀧𑀸𑀫𑀺, 𑀅𑀧𑀺 𑀘 𑀬𑁄 𑀯𑀺𑀜𑁆𑀜𑀽 𑀲𑁄 𑀯𑀺𑀪𑀸𑀯𑁂𑀲𑁆𑀲𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀤𑀻𑀖𑀻𑀢𑀺𑀁 𑀓𑁄𑀲𑀮𑀭𑀸𑀚𑀸𑀦𑀁 𑀲𑀧𑀚𑀸𑀧𑀢𑀺𑀓𑀁 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀘𑀢𑀼𑀥𑀸 𑀙𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀸 𑀩𑀺𑀮𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀭𑀁 𑀦𑀻𑀳𑀭𑀺𑀢𑁆𑀯𑀸 𑀕𑀼𑀫𑁆𑀩𑀺𑀬𑁂 𑀧𑀸𑀬𑁂𑀲𑀺. 𑀬𑀤𑀸 𑀢𑁂 𑀫𑀢𑁆𑀢𑀸 𑀅𑀳𑁂𑀲𑀼𑀁 𑀧𑀢𑀺𑀢𑀸, 𑀅𑀣 𑀓𑀝𑁆𑀞𑀸𑀦𑀺 𑀲𑀁𑀓𑀟𑁆𑀠𑀺𑀢𑁆𑀯𑀸 𑀘𑀺𑀢𑀓𑀁 𑀓𑀭𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀭𑀻𑀭𑀁 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀢𑀺𑀓𑁆𑀔𑀢𑁆𑀢𑀼𑀁 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀅𑀓𑀸𑀲𑀺.

𑁪𑁬𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀧𑀜𑁆𑀚𑀮𑀺𑀓𑀁 𑀢𑀺𑀓𑁆𑀔𑀢𑁆𑀢𑀼𑀁 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑀁, 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀲𑁄 𑀫𑀦𑀼𑀲𑁆𑀲𑁄 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀜𑀸𑀢𑀺 𑀯𑀸 𑀲𑀸𑀮𑁄𑀳𑀺𑀢𑁄 𑀯𑀸, 𑀅𑀳𑁄 𑀫𑁂 𑀅𑀦𑀢𑁆𑀣𑀢𑁄, 𑀦 𑀳𑀺 𑀦𑀸𑀫 𑀫𑁂 𑀓𑁄𑀘𑀺 𑀆𑀭𑁄𑀘𑁂𑀲𑁆𑀲𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀔𑀧𑁆𑀧𑀁 [𑀩𑀧𑁆𑀧𑀁 (𑀲𑀻. 𑀲𑁆𑀬𑀸.)] 𑀧𑀼𑀜𑁆𑀙𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀲𑁆𑀲 𑀲𑀸𑀫𑀦𑁆𑀢𑀸 𑀳𑀢𑁆𑀣𑀺𑀲𑀸𑀮𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀸𑀘𑀭𑀺𑀬𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀆𑀘𑀭𑀺𑀬, 𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀡𑁂 𑀫𑀸𑀡𑀯𑀓, 𑀲𑀺𑀓𑁆𑀔𑀲𑁆𑀲𑀽’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀺. 𑀅𑀲𑁆𑀲𑁄𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀻𑀢𑀁 𑀯𑀻𑀡𑀜𑁆𑀘 𑀯𑀸𑀤𑀺𑀢𑀁, 𑀲𑀼𑀢𑁆𑀯𑀸𑀦 𑀫𑀦𑀼𑀲𑁆𑀲𑁂 𑀧𑀼𑀘𑁆𑀙𑀺 𑁋 ‘‘𑀓𑁄, 𑀪𑀡𑁂, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀻’’𑀢𑀺? ‘‘𑀅𑀫𑀼𑀓𑀲𑁆𑀲, 𑀤𑁂𑀯, 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀫𑀸𑀡𑀯𑀓𑁄 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀡𑁂, 𑀢𑀁 𑀫𑀸𑀡𑀯𑀓𑀁 𑀆𑀦𑁂𑀣𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑁂 𑀫𑀦𑀼𑀲𑁆𑀲𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀆𑀦𑁂𑀲𑀼𑀁. ‘‘𑀢𑁆𑀯𑀁 𑀪𑀡𑁂 𑀫𑀸𑀡𑀯𑀓, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀳𑀢𑁆𑀣𑀺𑀲𑀸𑀮𑀸𑀬𑀁 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀻’’𑀢𑀺? ‘‘𑀏𑀯𑀁, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀪𑀡𑁂 𑀫𑀸𑀡𑀯𑀓, 𑀕𑀸𑀬𑀲𑁆𑀲𑀼, 𑀯𑀻𑀡𑀜𑁆𑀘 𑀯𑀸𑀤𑁂𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀭𑀸𑀥𑀸𑀧𑁂𑀓𑁆𑀔𑁄 𑀫𑀜𑁆𑀚𑀼𑀦𑀸 𑀲𑀭𑁂𑀦 𑀕𑀸𑀬𑀺, 𑀯𑀻𑀡𑀜𑁆𑀘 𑀯𑀸𑀤𑁂𑀲𑀺. ‘‘𑀢𑁆𑀯𑀁, 𑀪𑀡𑁂 𑀫𑀸𑀡𑀯𑀓, 𑀫𑀁 𑀉𑀧𑀝𑁆𑀞𑀳𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀅𑀳𑁄𑀲𑀺 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀦𑀘𑀺𑀭𑀲𑁆𑀲𑁂𑀯 𑀅𑀩𑁆𑀪𑀦𑁆𑀢𑀭𑀺𑀫𑁂 𑀯𑀺𑀲𑁆𑀲𑀸𑀲𑀺𑀓𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁪𑁬𑁨. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀢𑁂𑀦 𑀳𑀺, 𑀪𑀡𑁂 𑀫𑀸𑀡𑀯𑀓, 𑀭𑀣𑀁 𑀬𑁄𑀚𑁂𑀳𑀺, 𑀫𑀺𑀕𑀯𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀬𑁄𑀚𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀼𑀢𑁆𑀢𑁄 𑀔𑁄 𑀢𑁂, 𑀤𑁂𑀯, 𑀭𑀣𑁄, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀭𑀣𑀁 𑀅𑀪𑀺𑀭𑀼𑀳𑀺. 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀭𑀣𑀁 𑀧𑁂𑀲𑁂𑀲𑀺. 𑀢𑀣𑀸 𑀢𑀣𑀸 𑀭𑀣𑀁 𑀧𑁂𑀲𑁂𑀲𑀺 𑀬𑀣𑀸 𑀬𑀣𑀸 𑀅𑀜𑁆𑀜𑁂𑀦𑁂𑀯 𑀲𑁂𑀦𑀸 𑀅𑀕𑀫𑀸𑀲𑀺 𑀅𑀜𑁆𑀜𑁂𑀦𑁂𑀯 𑀭𑀣𑁄. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀽𑀭𑀁 𑀕𑀦𑁆𑀢𑁆𑀯𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀢𑁂𑀦 𑀳𑀺, 𑀪𑀡𑁂 𑀫𑀸𑀡𑀯𑀓, 𑀭𑀣𑀁 𑀫𑀼𑀜𑁆𑀘𑀲𑁆𑀲𑀼, 𑀓𑀺𑀮𑀦𑁆𑀢𑁄𑀫𑁆𑀳𑀺, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀉𑀘𑁆𑀙𑀗𑁆𑀕𑁂 𑀲𑀻𑀲𑀁 𑀓𑀢𑁆𑀯𑀸 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀢𑀲𑁆𑀲 𑀓𑀺𑀮𑀦𑁆𑀢𑀲𑁆𑀲 𑀫𑀼𑀳𑀼𑀢𑁆𑀢𑀓𑁂𑀦𑁂𑀯 𑀦𑀺𑀤𑁆𑀤𑀸 𑀑𑀓𑁆𑀓𑀫𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄. 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁. 𑀇𑀫𑀺𑀦𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸. 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁄𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀺𑀢𑀸 𑀔𑁄 𑀫𑀁 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀧𑀺𑀢𑀼𑀯𑀘𑀦𑀁 𑀅𑀢𑀺𑀓𑁆𑀓𑀫𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄, 𑀇𑀫𑀺𑀦𑁄 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁, 𑀇𑀫𑀺𑀦𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸, 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁄𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀺𑀢𑀸 𑀔𑁄 𑀫𑀁 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁, 𑀦 𑀳𑀺 𑀢𑀸𑀢 𑀤𑀻𑀖𑀸𑀯𑀼 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀧𑀺𑀢𑀼𑀯𑀘𑀦𑀁 𑀅𑀢𑀺𑀓𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀧𑀼𑀦𑀤𑁂𑀯 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄. 𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁. 𑀇𑀫𑀺𑀦𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸. 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁄𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀺𑀢𑀸 𑀔𑁄 𑀫𑀁 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀧𑀺𑀢𑀼𑀯𑀘𑀦𑀁 𑀅𑀢𑀺𑀓𑁆𑀓𑀫𑁂𑀬𑁆𑀬’’’𑀦𑁆𑀢𑀺 𑀧𑀼𑀦𑀤𑁂𑀯 𑀓𑁄𑀲𑀺𑀬𑀸 𑀔𑀕𑁆𑀕𑀁 𑀧𑀯𑁂𑀲𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀤𑁂𑀯, 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀻’’𑀢𑀺? 𑀇𑀥 𑀫𑀁, 𑀪𑀡𑁂 𑀫𑀸𑀡𑀯𑀓, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀲𑀼𑀧𑀺𑀦𑀦𑁆𑀢𑁂𑀦 𑀔𑀕𑁆𑀕𑁂𑀦 𑀧𑀭𑀺𑀧𑀸𑀢𑁂𑀲𑀺. 𑀢𑁂𑀦𑀸𑀳𑀁 𑀪𑀻𑀢𑁄 𑀉𑀩𑁆𑀩𑀺𑀕𑁆𑀕𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀲𑁆𑀢𑁄 𑀲𑀳𑀲𑀸 𑀯𑀼𑀝𑁆𑀞𑀸𑀲𑀺𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀲𑀻𑀲𑀁 𑀧𑀭𑀸𑀫𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀔𑀕𑁆𑀕𑀁 𑀦𑀺𑀩𑁆𑀩𑀸𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄 𑀲𑁄, 𑀤𑁂𑀯, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄. 𑀩𑀳𑀼𑀦𑁄 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑁄. 𑀢𑀬𑀸 𑀅𑀫𑁆𑀳𑀸𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀅𑀘𑁆𑀙𑀺𑀦𑁆𑀦𑀁. 𑀢𑀬𑀸 𑀘 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸. 𑀅𑀬𑀁 𑀔𑁆𑀯𑀲𑁆𑀲 𑀓𑀸𑀮𑁄 𑀬𑁆𑀯𑀸𑀳𑀁 𑀯𑁂𑀭𑀁 𑀅𑀧𑁆𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀚𑀻𑀯𑀺𑀢𑀁 𑀫𑁂, 𑀢𑀸𑀢 𑀤𑀻𑀖𑀸𑀯𑀼, 𑀤𑁂𑀳𑀺. 𑀚𑀻𑀯𑀺𑀢𑀁 𑀫𑁂, 𑀢𑀸𑀢 𑀤𑀻𑀖𑀸𑀯𑀼, 𑀤𑁂𑀳𑀻’’𑀢𑀺. ‘‘𑀓𑁆𑀬𑀸𑀳𑀁 𑀉𑀲𑁆𑀲𑀳𑀸𑀫𑀺 𑀤𑁂𑀯𑀲𑁆𑀲 𑀚𑀻𑀯𑀺𑀢𑀁 𑀤𑀸𑀢𑀼𑀁? 𑀤𑁂𑀯𑁄 𑀔𑁄 𑀫𑁂 𑀚𑀻𑀯𑀺𑀢𑀁 𑀤𑀤𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀢𑁆𑀯𑀜𑁆𑀘𑁂𑀯 𑀫𑁂 𑀚𑀻𑀯𑀺𑀢𑀁 𑀤𑁂𑀳𑀺, 𑀅𑀳𑀜𑁆𑀘 𑀢𑁂 𑀚𑀻𑀯𑀺𑀢𑀁 𑀤𑀫𑁆𑀫𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼 𑀘 𑀓𑀼𑀫𑀸𑀭𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀚𑀻𑀯𑀺𑀢𑀁 𑀅𑀤𑀁𑀲𑀼, 𑀧𑀸𑀡𑀺𑀜𑁆𑀘 𑀅𑀕𑁆𑀕𑀳𑁂𑀲𑀼𑀁, 𑀲𑀧𑀣𑀜𑁆𑀘 𑀅𑀓𑀁𑀲𑀼 𑀅𑀤𑁆𑀤𑀽𑀪𑀸𑀬 [𑀅𑀤𑁆𑀭𑀽𑀪𑀸𑀬, 𑀅𑀤𑀼𑀩𑁆𑀪𑀸𑀬 (𑀓.)].

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀢𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀭𑀣𑀁 𑀬𑁄𑀚𑁂𑀳𑀺, 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀸𑀲𑀺𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀬𑁄𑀚𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀓𑀸𑀲𑀺𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀬𑀼𑀢𑁆𑀢𑁄 𑀔𑁄 𑀢𑁂, 𑀤𑁂𑀯, 𑀭𑀣𑁄, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀭𑀣𑀁 𑀅𑀪𑀺𑀭𑀼𑀳𑀺. 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄 𑀭𑀣𑀁 𑀧𑁂𑀲𑁂𑀲𑀺. 𑀢𑀣𑀸 𑀢𑀣𑀸 𑀭𑀣𑀁 𑀧𑁂𑀲𑁂𑀲𑀺 𑀬𑀣𑀸 𑀬𑀣𑀸 𑀦𑀘𑀺𑀭𑀲𑁆𑀲𑁂𑀯 𑀲𑁂𑀦𑀸𑀬 𑀲𑀫𑀸𑀕𑀜𑁆𑀙𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀩𑀸𑀭𑀸𑀡𑀲𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑀘𑁆𑀘𑁂 𑀧𑀸𑀭𑀺𑀲𑀚𑁆𑀚𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁂, 𑀪𑀡𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑀁 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀧𑀲𑁆𑀲𑁂𑀬𑁆𑀬𑀸𑀣, 𑀓𑀺𑀦𑁆𑀢𑀺 𑀦𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺? 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀬𑀁, 𑀤𑁂𑀯, 𑀳𑀢𑁆𑀣𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀧𑀸𑀤𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀳𑀢𑁆𑀣𑀧𑀸𑀤𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀓𑀡𑁆𑀡𑁂 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀦𑀸𑀲𑀁 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀓𑀡𑁆𑀡𑀦𑀸𑀲𑀁 𑀙𑀺𑀦𑁆𑀤𑁂𑀬𑁆𑀬𑀸𑀫. 𑀫𑀬𑀁, 𑀤𑁂𑀯, 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀸𑀫𑀸’’𑀢𑀺. ‘‘𑀅𑀬𑀁 𑀔𑁄, 𑀪𑀡𑁂, 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄. 𑀦𑀸𑀬𑀁 𑀮𑀩𑁆𑀪𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁. 𑀇𑀫𑀺𑀦𑀸 𑀘 𑀫𑁂 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀫𑀬𑀸 𑀘 𑀇𑀫𑀲𑁆𑀲 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺.

𑁪𑁬𑁩. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑀤𑀻𑀖𑀸𑀯𑀼𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀬𑀁 𑀔𑁄 𑀢𑁂, 𑀢𑀸𑀢 𑀤𑀻𑀖𑀸𑀯𑀼, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀔𑁄 𑀢𑁆𑀯𑀁, 𑀢𑀸𑀢 𑀤𑀻𑀖𑀸𑀯𑀼, 𑀤𑀻𑀖𑀁 𑀧𑀲𑁆𑀲, 𑀫𑀸 𑀭𑀲𑁆𑀲𑀁. 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺, 𑀓𑀺𑀁 𑀢𑁂 𑀧𑀺𑀢𑀸 𑀲𑀦𑁆𑀥𑀸𑀬 𑀅𑀯𑀘𑀸’’𑀢𑀺? ‘‘𑀬𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀤𑀻𑀖’𑀦𑁆𑀢𑀺 𑀫𑀸 𑀘𑀺𑀭𑀁 𑀯𑁂𑀭𑀁 𑀅𑀓𑀸𑀲𑀻𑀢𑀺. 𑀇𑀫𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 𑀫𑀸 𑀤𑀻𑀖𑀦𑁆𑀢𑀺. 𑀬𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘𑀫𑀸 𑀭𑀲𑁆𑀲’𑀦𑁆𑀢𑀺 𑀫𑀸 𑀔𑀺𑀧𑁆𑀧𑀁 𑀫𑀺𑀢𑁆𑀢𑁂𑀳𑀺 𑀪𑀺𑀚𑁆𑀚𑀺𑀢𑁆𑀣𑀸’’𑀢𑀺. 𑀇𑀫𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 𑀫𑀸 𑀭𑀲𑁆𑀲𑀦𑁆𑀢𑀺. 𑀬𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 ‘‘𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺, 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺 𑀤𑁂𑀯𑁂𑀦 𑀫𑁂 𑀫𑀸𑀢𑀸𑀧𑀺𑀢𑀭𑁄 𑀳𑀢𑀸𑀢𑀺. 𑀲𑀘𑀸𑀳𑀁 𑀤𑁂𑀯𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀁, 𑀬𑁂 𑀤𑁂𑀯𑀲𑁆𑀲 𑀅𑀢𑁆𑀣𑀓𑀸𑀫𑀸 𑀢𑁂 𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁, 𑀬𑁂 𑀫𑁂 𑀅𑀢𑁆𑀣𑀓𑀸𑀫𑀸 𑀢𑁂 𑀢𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀼𑀁 𑁋 𑀏𑀯𑀁 𑀢𑀁 𑀯𑁂𑀭𑀁 𑀯𑁂𑀭𑁂𑀦 𑀦 𑀯𑀽𑀧𑀲𑀫𑁂𑀬𑁆𑀬. 𑀇𑀤𑀸𑀦𑀺 𑀘 𑀧𑀦 𑀫𑁂 𑀤𑁂𑀯𑁂𑀦 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀫𑀬𑀸 𑀘 𑀤𑁂𑀯𑀲𑁆𑀲 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁. 𑀏𑀯𑀁 𑀢𑀁 𑀯𑁂𑀭𑀁 𑀅𑀯𑁂𑀭𑁂𑀦 𑀯𑀽𑀧𑀲𑀦𑁆𑀢𑀁. 𑀇𑀫𑀁 𑀔𑁄 𑀫𑁂, 𑀤𑁂𑀯, 𑀧𑀺𑀢𑀸 𑀫𑀭𑀡𑀓𑀸𑀮𑁂 𑀅𑀯𑀘 𑁋 𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑁂𑀦 𑀯𑁂𑀭𑀸 𑀲𑀫𑁆𑀫𑀦𑁆𑀢𑀺; 𑀅𑀯𑁂𑀭𑁂𑀦 𑀳𑀺, 𑀢𑀸𑀢 𑀤𑀻𑀖𑀸𑀯𑀼, 𑀯𑁂𑀭𑀸 𑀲𑀫𑁆𑀫𑀦𑁆𑀢𑀻’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀓𑀸𑀲𑀺𑀭𑀸𑀚𑀸 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄! 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀬𑀸𑀯 𑀧𑀡𑁆𑀟𑀺𑀢𑁄 𑀅𑀬𑀁 𑀤𑀻𑀖𑀸𑀯𑀼 𑀓𑀼𑀫𑀸𑀭𑁄, 𑀬𑀢𑁆𑀭 𑀳𑀺 𑀦𑀸𑀫 𑀧𑀺𑀢𑀼𑀦𑁄 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀧𑁂𑀢𑁆𑀢𑀺𑀓𑀁 𑀩𑀮𑀜𑁆𑀘 𑀯𑀸𑀳𑀦𑀜𑁆𑀘 𑀚𑀦𑀧𑀤𑀜𑁆𑀘 𑀓𑁄𑀲𑀜𑁆𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘 𑀧𑀝𑀺𑀧𑀸𑀤𑁂𑀲𑀺, 𑀥𑀻𑀢𑀭𑀜𑁆𑀘 𑀅𑀤𑀸𑀲𑀺. 𑀢𑁂𑀲𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀭𑀸𑀚𑀽𑀦𑀁 𑀆𑀤𑀺𑀦𑁆𑀦𑀤𑀡𑁆𑀟𑀸𑀦𑀁 𑀆𑀤𑀺𑀦𑁆𑀦𑀲𑀢𑁆𑀣𑀸𑀦𑀁 𑀏𑀯𑀭𑀽𑀧𑀁 𑀔𑀦𑁆𑀢𑀺𑀲𑁄𑀭𑀘𑁆𑀘𑀁 𑀪𑀯𑀺𑀲𑁆𑀲𑀢𑀺. 𑀇𑀥 𑀔𑁄 𑀧𑀦 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀔𑀫𑀸 𑀘 𑀪𑀯𑁂𑀬𑁆𑀬𑀸𑀣 𑀲𑁄𑀭𑀢𑀸 𑀘𑀸𑀢𑀺? 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀪𑀺𑀓𑁆𑀔𑀯𑁂, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀅𑀥𑀫𑁆𑀫𑀯𑀸𑀤𑀻 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻; 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼. 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑁋 𑀧𑀭𑀺𑀬𑀸𑀤𑀺𑀦𑁆𑀦𑀭𑀽𑀧𑀸 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸, 𑀦𑀬𑀺𑀫𑁂 𑀲𑀼𑀓𑀭𑀸 𑀲𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑁋 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀤𑀻𑀖𑀸𑀯𑀼𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄 𑀧𑀞𑀫𑁄.

𑁪𑁬𑁪. [𑀫. 𑀦𑀺. 𑁩.𑁨𑁩𑁬] 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑁄𑀲𑀫𑁆𑀩𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀗𑁆𑀖𑀫𑀚𑁆𑀛𑁂 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

[𑀫. 𑀦𑀺. 𑁩.𑁨𑁩𑁭] ‘‘𑀧𑀼𑀣𑀼𑀲𑀤𑁆𑀤𑁄 𑀲𑀫𑀚𑀦𑁄, 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣;

𑀲𑀗𑁆𑀖𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀦𑀸𑀜𑁆𑀜𑀁 𑀪𑀺𑀬𑁆𑀬𑁄 𑀅𑀫𑀜𑁆𑀜𑀭𑀼𑀁.

[𑀫. 𑀦𑀺. 𑁩.𑁨𑁩𑁭] ‘‘𑀧𑀭𑀺𑀫𑀼𑀝𑁆𑀞𑀸 𑀧𑀡𑁆𑀟𑀺𑀢𑀸𑀪𑀸𑀲𑀸, 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄;

𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁, 𑀬𑁂𑀦 𑀦𑀻𑀢𑀸 𑀦 𑀢𑀁 𑀯𑀺𑀤𑀽.

[𑀫. 𑀦𑀺. 𑁩.𑁨𑁩𑁭] ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

[𑀫. 𑀦𑀺. 𑁩.𑁨𑁩𑁭] ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

[𑀫. 𑀦𑀺. 𑁩.𑁨𑁩𑁭] ‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

[𑀫. 𑀦𑀺. 𑁩.𑁨𑁩𑁭] ‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

[𑀫. 𑀦𑀺. 𑁩.𑁨𑁩𑁭] ‘‘𑀅𑀝𑁆𑀞𑀺𑀘𑁆𑀙𑀺𑀦𑁆𑀦𑀸 𑀧𑀸𑀡𑀳𑀭𑀸, 𑀕𑀯𑀸𑀲𑁆𑀲𑀥𑀦𑀳𑀸𑀭𑀺𑀦𑁄;

𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑀸𑀦𑀁, 𑀢𑁂𑀲𑀫𑁆𑀧𑀺 𑀳𑁄𑀢𑀺 𑀲𑀗𑁆𑀕𑀢𑀺.

‘‘𑀓𑀲𑁆𑀫𑀸 𑀢𑀼𑀫𑁆𑀳𑀸𑀓 𑀦𑁄 𑀲𑀺𑀬𑀸;

[𑀫. 𑀦𑀺. 𑁩.𑁨𑁩𑁭] ‘‘𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁;

𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺;

𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

[𑀫. 𑀦𑀺. 𑁩.𑁨𑁩𑁭] ‘‘𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁;

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬;

𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

[𑀫. 𑀦𑀺. 𑁩.𑁨𑁩𑁭] ‘‘𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄;

𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 𑀘𑀭𑁂 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄’’𑀢𑀺.

𑀤𑀻𑀖𑀸𑀯𑀼𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑁨𑁭𑁩. 𑀩𑀸𑀮𑀓𑀮𑁄𑀡𑀓𑀕𑀫𑀦𑀓𑀣𑀸

𑁪𑁬𑁫. 𑀅𑀣 𑀔𑁄 𑀪𑀕𑀯𑀸 𑀲𑀗𑁆𑀖𑀫𑀚𑁆𑀛𑁂 𑀞𑀺𑀢𑀓𑁄𑀯 𑀇𑀫𑀸 𑀕𑀸𑀣𑀸𑀬𑁄 𑀪𑀸𑀲𑀺𑀢𑁆𑀯𑀸 𑀬𑁂𑀦 𑀩𑀸𑀮𑀓𑀮𑁄𑀡𑀓𑀕𑀸𑀫𑁄 [𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑁄 (𑀲𑀻. 𑀲𑁆𑀬𑀸.)] 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀪𑀕𑀼 𑀩𑀸𑀮𑀓𑀮𑁄𑀡𑀓𑀕𑀸𑀫𑁂 𑀯𑀺𑀳𑀭𑀢𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀪𑀕𑀼 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀪𑀕𑀼 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁; 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀲𑀻’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁, 𑀪𑀕𑀯𑀸; 𑀦 𑀘𑀸𑀳𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀸𑀫𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀧𑀸𑀘𑀻𑀦𑀯𑀁𑀲𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀩𑀸𑀮𑀓𑀮𑁄𑀡𑀓𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁪. 𑀧𑀸𑀘𑀻𑀦𑀯𑀁𑀲𑀤𑀸𑀬𑀕𑀫𑀦𑀓𑀣𑀸

𑁪𑁬𑁬. [𑀫. 𑀦𑀺. 𑁧.𑁩𑁨𑁫 𑀆𑀤𑀬𑁄 𑀧𑀲𑁆𑀲𑀺𑀢𑀩𑁆𑀩𑀁] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 [𑀓𑀺𑀫𑁆𑀩𑀺𑀮𑁄 (𑀲𑀻. 𑀲𑁆𑀬𑀸.)] 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀯𑀺𑀳𑀭𑀦𑁆𑀢𑀺. 𑀅𑀤𑁆𑀤𑀲𑀸 𑀔𑁄 𑀤𑀸𑀬𑀧𑀸𑀮𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀲𑀫𑀡, 𑀏𑀢𑀁 𑀤𑀸𑀬𑀁 𑀧𑀸𑀯𑀺𑀲𑀺. 𑀲𑀦𑁆𑀢𑁂𑀢𑁆𑀣 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀅𑀢𑁆𑀢𑀓𑀸𑀫𑀭𑀽𑀧𑀸 𑀯𑀺𑀳𑀭𑀦𑁆𑀢𑀺. 𑀫𑀸 𑀢𑁂𑀲𑀁 𑀅𑀨𑀸𑀲𑀼𑀫𑀓𑀸𑀲𑀻’’𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀸𑀬𑀧𑀸𑀮𑀲𑁆𑀲 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀲𑁆𑀲, 𑀲𑀼𑀢𑁆𑀯𑀸𑀦 𑀤𑀸𑀬𑀧𑀸𑀮𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀯𑀼𑀲𑁄, 𑀤𑀸𑀬𑀧𑀸𑀮, 𑀪𑀕𑀯𑀦𑁆𑀢𑀁 𑀯𑀸𑀭𑁂𑀲𑀺. 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦𑀸𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀦𑁆𑀤𑀺𑀬𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀓𑀺𑀫𑀺𑀮𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀦𑀦𑁆𑀤𑀺𑀬𑁄 𑀆𑀬𑀲𑁆𑀫𑀸 𑀘 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀏𑀓𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀏𑀓𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀏𑀓𑁄 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀢𑁂𑀧𑀺 𑀔𑁄 𑀆𑀬𑀲𑁆𑀫𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁; 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣𑀸’’𑀢𑀺? ‘‘𑀔𑀫𑀦𑀻𑀬𑀁 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸; 𑀦 𑀘 𑀫𑀬𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀸𑀫𑀸’’𑀢𑀺.

‘‘𑀓𑀘𑁆𑀘𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’’’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁… 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘‘‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸, 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢’’𑀦𑁆𑀢𑀺.

𑀆𑀬𑀲𑁆𑀫𑀸𑀧𑀺 𑀔𑁄 𑀦𑀦𑁆𑀤𑀺𑀬𑁄…𑀧𑁂… 𑀆𑀬𑀲𑁆𑀫𑀸𑀧𑀺 𑀔𑁄 𑀓𑀺𑀫𑀺𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 𑁋 ‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑁄𑀳𑀁 𑀏𑀯𑀭𑀽𑀧𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀸𑀫𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀇𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑁂𑀲𑀼 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘; 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀆𑀯𑀺 𑀘𑁂𑀯 𑀭𑀳𑁄 𑀘. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀯𑀁 𑀳𑁄𑀢𑀺 ‘𑀬𑀁𑀦𑀽𑀦𑀸𑀳𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑁂𑀬𑁆𑀬’𑀦𑁆𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀫𑁂𑀲𑀁𑀬𑁂𑀯 𑀆𑀬𑀲𑁆𑀫𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀸𑀫𑀺. 𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸, 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢𑀦𑁆𑀢𑀺. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

‘‘𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀅𑀦𑀼𑀭𑀼𑀤𑁆𑀥𑀸, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’𑀢𑀺? ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺 𑀲𑁄 𑀆𑀲𑀦𑀁 𑀧𑀜𑁆𑀜𑀧𑁂𑀢𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑀘𑁂 𑀳𑁄𑀢𑀺 𑀪𑀼𑀢𑁆𑀢𑀸𑀯𑀲𑁂𑀲𑁄, 𑀲𑀘𑁂 𑀆𑀓𑀗𑁆𑀔𑀢𑀺 𑀪𑀼𑀜𑁆𑀚𑀢𑀺, 𑀦𑁄 𑀘𑁂 𑀆𑀓𑀗𑁆𑀔𑀢𑀺 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀢𑀺. 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀢𑀺. 𑀲𑁄 𑀆𑀲𑀦𑀁 𑀉𑀤𑁆𑀥𑀭𑀢𑀺, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀢𑀺, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺. 𑀬𑁄 𑀧𑀲𑁆𑀲𑀢𑀺 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀲𑁄 𑀉𑀧𑀝𑁆𑀞𑀸𑀧𑁂𑀢𑀺. 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀫, 𑀦 𑀢𑁆𑀯𑁂𑀯 𑀫𑀬𑀁, 𑀪𑀦𑁆𑀢𑁂, 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀁 𑀪𑀺𑀦𑁆𑀤𑀸𑀫. 𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀦𑀺𑀲𑀻𑀤𑀸𑀫. 𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂, 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀸𑀫𑀸’’𑀢𑀺.

𑀧𑀸𑀘𑀺𑀦𑀯𑀁𑀲𑀤𑀸𑀬𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁫. 𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸

𑁪𑁬𑁭. [𑀉𑀤𑀸. 𑁩𑁫 𑀆𑀤𑀬𑁄 𑀣𑁄𑀓𑀁 𑀯𑀺𑀲𑀤𑀺𑀲𑀁] 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀜𑁆𑀘 𑀅𑀦𑀼𑀭𑀼𑀤𑁆𑀥𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀦𑀦𑁆𑀤𑀺𑀬𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀓𑀺𑀫𑀺𑀮𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 [𑀧𑀸𑀭𑀺𑀮𑁂𑀬𑁆𑀬𑀓𑀁 (𑀲𑀻. 𑀲𑁆𑀬𑀸.)] 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑁂 𑀯𑀺𑀳𑀭𑀢𑀺 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀯𑀺𑀳𑀸𑀲𑀺𑀁 𑀢𑁂𑀳𑀺 𑀓𑁄𑀲𑀫𑁆𑀩𑀓𑁂𑀳𑀺 [𑀓𑁄𑀲𑀩𑁆𑀪𑀺𑀓𑁂𑀳𑀺 (𑀲𑁆𑀬𑀸.)] 𑀪𑀺𑀓𑁆𑀔𑀽𑀳𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀓𑀮𑀳𑀓𑀸𑀭𑀓𑁂𑀳𑀺 𑀯𑀺𑀯𑀸𑀤𑀓𑀸𑀭𑀓𑁂𑀳𑀺 𑀪𑀲𑁆𑀲𑀓𑀸𑀭𑀓𑁂𑀳𑀺 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁂𑀳𑀺. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀏𑀓𑁄 𑀅𑀤𑀼𑀢𑀺𑀬𑁄 𑀲𑀼𑀔𑀁 𑀨𑀸𑀲𑀼 𑀯𑀺𑀳𑀭𑀸𑀫𑀺 𑀅𑀜𑁆𑀜𑀢𑁆𑀭𑁂𑀯 𑀢𑁂𑀳𑀺 𑀓𑁄𑀲𑀫𑁆𑀩𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀓𑀮𑀳𑀓𑀸𑀭𑀓𑁂𑀳𑀺 𑀯𑀺𑀯𑀸𑀤𑀓𑀸𑀭𑀓𑁂𑀳𑀺 𑀪𑀲𑁆𑀲𑀓𑀸𑀭𑀓𑁂𑀳𑀺 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁂𑀳𑀻’’𑀢𑀺.

𑀅𑀜𑁆𑀜𑀢𑀭𑁄𑀧𑀺 𑀔𑁄 𑀳𑀢𑁆𑀣𑀺𑀦𑀸𑀕𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀢𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀢𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘𑀲𑁆𑀲 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀢𑀺, 𑀑𑀕𑀸𑀳𑀸 𑀘𑀲𑁆𑀲 𑀑𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀸𑀫𑀺, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀦𑁆𑀢𑀺, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀸𑀫𑀺, 𑀑𑀕𑀸𑀳𑀸 𑀘 𑀫𑁂 𑀑𑀢𑀺𑀡𑁆𑀡𑀲𑁆𑀲 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀕𑀘𑁆𑀙𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀏𑀓𑁄𑀯 𑀕𑀡𑀲𑁆𑀫𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀳𑀢𑁆𑀣𑀺𑀦𑀸𑀕𑁄 𑀬𑀽𑀣𑀸 𑀅𑀧𑀓𑁆𑀓𑀫𑁆𑀫 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁄 𑀪𑀤𑁆𑀤𑀲𑀸𑀮𑀫𑀽𑀮𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁄𑀡𑁆𑀟𑀸𑀬 𑀪𑀕𑀯𑀢𑁄 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀅𑀧𑁆𑀧𑀳𑀭𑀺𑀢𑀜𑁆𑀘 𑀓𑀭𑁄𑀢𑀺. 𑀅𑀣 𑀔𑁄 𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀯𑀺𑀳𑀸𑀲𑀺𑀁 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀺, 𑀙𑀺𑀦𑁆𑀦𑀕𑁆𑀕𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀺𑀁, 𑀑𑀪𑀕𑁆𑀕𑁄𑀪𑀕𑁆𑀕𑀜𑁆𑀘 𑀫𑁂 𑀲𑀸𑀔𑀸𑀪𑀗𑁆𑀕𑀁 𑀔𑀸𑀤𑀺𑀁𑀲𑀼, 𑀆𑀯𑀺𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀅𑀧𑀸𑀬𑀺𑀁 𑀑𑀕𑀸𑀳𑀸 𑀘 𑀫𑁂 𑀑𑀢𑀺𑀡𑁆𑀡𑀲𑁆𑀲 [𑀑𑀕𑀸𑀳𑀜𑁆𑀘𑀲𑁆𑀲 𑀑𑀢𑀺𑀡𑁆𑀡𑀲𑁆𑀲 (𑀲𑁆𑀬𑀸.), 𑀑𑀕𑀸𑀳𑀸 𑀘𑀲𑁆𑀲 𑀉𑀢𑁆𑀢𑀺𑀡𑁆𑀡𑀲𑁆𑀲 (𑀲𑀻.)] 𑀳𑀢𑁆𑀣𑀺𑀦𑀺𑀬𑁄 𑀓𑀸𑀬𑀁 𑀉𑀧𑀦𑀺𑀖𑀁𑀲𑀦𑁆𑀢𑀺𑀬𑁄 𑀅𑀕𑀫𑀁𑀲𑀼. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀏𑀓𑁄 𑀅𑀤𑀼𑀢𑀺𑀬𑁄 𑀲𑀼𑀔𑀁 𑀨𑀸𑀲𑀼 𑀯𑀺𑀳𑀭𑀸𑀫𑀺 𑀅𑀜𑁆𑀜𑀢𑁆𑀭𑁂𑀯 𑀳𑀢𑁆𑀣𑀻𑀳𑀺 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀓𑀴𑀪𑁂𑀳𑀺 𑀳𑀢𑁆𑀣𑀺𑀘𑁆𑀙𑀸𑀧𑁂𑀳𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀘 𑀧𑀯𑀺𑀯𑁂𑀓𑀁 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀘 𑀳𑀢𑁆𑀣𑀺𑀦𑀸𑀕𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀉𑀤𑀸. 𑁩𑁫] ‘‘𑀏𑀢𑀁 [𑀏𑀯𑀁 (𑀓.)] 𑀦𑀸𑀕𑀲𑁆𑀲 𑀦𑀸𑀕𑁂𑀦, 𑀈𑀲𑀸𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑁄;

𑀲𑀫𑁂𑀢𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦, 𑀬𑀤𑁂𑀓𑁄 𑀭𑀫𑀢𑀻 𑀯𑀦𑁂’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀸𑀮𑀺𑀮𑁂𑀬𑁆𑀬𑀓𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀉𑀧𑀸𑀲𑀓𑀸 𑁋 ‘‘𑀇𑀫𑁂 𑀔𑁄 𑀅𑀬𑁆𑀬𑀸 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀩𑀳𑀼𑀦𑁄 𑀅𑀫𑁆𑀳𑀸𑀓𑀁 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑀸. 𑀇𑀫𑁂𑀳𑀺 𑀉𑀩𑁆𑀩𑀸𑀴𑁆𑀳𑁄 𑀪𑀕𑀯𑀸 𑀧𑀓𑁆𑀓𑀦𑁆𑀢𑁄. 𑀳𑀦𑁆𑀤 𑀫𑀬𑀁 𑀅𑀬𑁆𑀬𑁂 𑀓𑁄𑀲𑀫𑁆𑀩𑀓𑁂 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀬𑁆𑀬𑀸𑀫, 𑀦 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀸𑀫, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀭𑁂𑀬𑁆𑀬𑀸𑀫, 𑀦 𑀲𑀓𑁆𑀓𑀭𑁂𑀬𑁆𑀬𑀸𑀫, 𑀦 𑀕𑀭𑀼𑀁 𑀓𑀭𑁂𑀬𑁆𑀬𑀸𑀫, 𑀦 𑀫𑀸𑀦𑁂𑀬𑁆𑀬𑀸𑀫, 𑀦 𑀪𑀚𑁂𑀬𑁆𑀬𑀸𑀫, 𑀦 𑀧𑀽𑀚𑁂𑀬𑁆𑀬𑀸𑀫, 𑀉𑀧𑀕𑀢𑀸𑀦𑀫𑁆𑀧𑀺 𑀧𑀺𑀡𑁆𑀟𑀓𑀁 𑀦 𑀤𑀚𑁆𑀚𑁂𑀬𑁆𑀬𑀸𑀫 𑁋 𑀏𑀯𑀁 𑀇𑀫𑁂 𑀅𑀫𑁆𑀳𑁂𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑀸 𑀅𑀕𑀭𑀼𑀓𑀭𑀺𑀬𑀫𑀸𑀦𑀸 𑀅𑀫𑀸𑀦𑀺𑀬𑀫𑀸𑀦𑀸 𑀅𑀪𑀚𑀺𑀬𑀫𑀸𑀦𑀸 𑀅𑀧𑀽𑀚𑀺𑀬𑀫𑀸𑀦𑀸 𑀅𑀲𑀓𑁆𑀓𑀸𑀭𑀧𑀓𑀢𑀸 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺 𑀯𑀸 𑀯𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺 𑀯𑀸 𑀪𑀕𑀯𑀦𑁆𑀢𑀁 𑀯𑀸 𑀧𑀲𑀸𑀤𑁂𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀉𑀧𑀸𑀲𑀓𑀸 𑀓𑁄𑀲𑀫𑁆𑀩𑀓𑁂 𑀪𑀺𑀓𑁆𑀔𑀽 𑀦𑁂𑀯 𑀅𑀪𑀺𑀯𑀸𑀤𑁂𑀲𑀼𑀁, 𑀦 𑀧𑀘𑁆𑀘𑀼𑀝𑁆𑀞𑁂𑀲𑀼𑀁, 𑀦 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀅𑀓𑀁𑀲𑀼, 𑀦 𑀲𑀓𑁆𑀓𑀭𑀺𑀁𑀲𑀼, 𑀦 𑀕𑀭𑀼𑀁 𑀓𑀭𑀺𑀁𑀲𑀼, 𑀦 𑀫𑀸𑀦𑁂𑀲𑀼𑀁, 𑀦 𑀪𑀚𑁂𑀲𑀼𑀁 𑀦 𑀧𑀽𑀚𑁂𑀲𑀼𑀁, 𑀉𑀧𑀕𑀢𑀸𑀦𑀫𑁆𑀧𑀺 𑀧𑀺𑀡𑁆𑀟𑀓𑀁 𑀦 𑀅𑀤𑀁𑀲𑀼. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀓𑁄𑀲𑀫𑁆𑀩𑀓𑁂𑀳𑀺 𑀉𑀧𑀸𑀲𑀓𑁂𑀳𑀺 𑀅𑀲𑀓𑁆𑀓𑀭𑀺𑀬𑀫𑀸𑀦𑀸 𑀅𑀕𑀭𑀼𑀓𑀭𑀺𑀬𑀫𑀸𑀦𑀸 𑀅𑀫𑀸𑀦𑀺𑀬𑀫𑀸𑀦𑀸 𑀅𑀪𑀚𑀺𑀬𑀫𑀸𑀦𑀸 𑀅𑀧𑀽𑀚𑀺𑀬𑀫𑀸𑀦𑀸 𑀅𑀲𑀓𑁆𑀓𑀸𑀭𑀧𑀓𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸’’𑀢𑀺.

𑀧𑀸𑀮𑀺𑀮𑁂𑀬𑁆𑀬𑀓𑀕𑀫𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁬. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸

𑁪𑁬𑁮. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀢𑀺𑀝𑁆𑀞𑀸𑀳𑀻’’𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀁 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸’’𑀢𑀺?

𑀅𑀝𑁆𑀞𑀸𑀭𑀲𑀳𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄.

𑀅𑀝𑁆𑀞𑀸𑀭𑀲𑀳𑀺 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄𑀢𑀺.

𑁪𑁬𑁯. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄…𑀧𑁂… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 … 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀧𑁆𑀧𑀺𑀦𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀘𑀼𑀦𑁆𑀤𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 … 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄… 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀭𑀸𑀳𑀼𑀮, 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀢𑀺𑀝𑁆𑀞𑀸𑀳𑀻’’𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀁 𑀥𑀫𑁆𑀫𑀁 𑀯𑀸 𑀅𑀥𑀫𑁆𑀫𑀁 𑀯𑀸’’𑀢𑀺?

𑀅𑀝𑁆𑀞𑀸𑀭𑀲𑀳𑀺 𑀔𑁄, 𑀭𑀸𑀳𑀼𑀮, 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀭𑀸𑀳𑀼𑀮, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀭𑀸𑀳𑀼𑀮, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀅𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄.

𑀅𑀝𑁆𑀞𑀸𑀭𑀲𑀳𑀺 𑀘 𑀔𑁄, 𑀭𑀸𑀳𑀼𑀮, 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄. 𑀇𑀥, 𑀭𑀸𑀳𑀼𑀮, 𑀪𑀺𑀓𑁆𑀔𑀼 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑁂𑀢𑀺; 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀤𑀻𑀧𑁂𑀢𑀺; 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀅𑀦𑀸𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀅𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦 𑀧𑀜𑁆𑀜𑀢𑁆𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀺; 𑀅𑀦𑀸𑀧𑀢𑁆𑀢𑀺𑀁 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀮𑀳𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀕𑀭𑀼𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀲𑀸𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺; 𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺, 𑀅𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀭𑀸𑀳𑀼𑀮, 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀥𑀫𑁆𑀫𑀯𑀸𑀤𑀻 𑀚𑀸𑀦𑀺𑀢𑀩𑁆𑀩𑁄𑀢𑀺.

𑁪𑁭𑁦. 𑀅𑀲𑁆𑀲𑁄𑀲𑀺 𑀔𑁄 𑀫𑀳𑀸𑀧𑀚𑀸𑀧𑀢𑀺 [𑀫𑀳𑀸𑀧𑀚𑀸𑀧𑀢𑀻 (𑀲𑀻. 𑀲𑁆𑀬𑀸.)] 𑀕𑁄𑀢𑀫𑀻 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑁄𑀢𑀫𑀺, 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀡. 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄 𑀢𑁂𑀲𑀁 𑀤𑀺𑀝𑁆𑀞𑀺𑀜𑁆𑀘 𑀔𑀦𑁆𑀢𑀺𑀜𑁆𑀘 𑀭𑀼𑀘𑀺𑀜𑁆𑀘 𑀆𑀤𑀸𑀬𑀜𑁆𑀘 𑀭𑁄𑀘𑁂𑀳𑀺. 𑀬𑀜𑁆𑀘 𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀁 𑀲𑀩𑁆𑀩𑀁 𑀢𑀁 𑀥𑀫𑁆𑀫𑀯𑀸𑀤𑀺𑀢𑁄𑀯 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩’’𑀦𑁆𑀢𑀺.

𑁪𑁭𑁧. 𑀅𑀲𑁆𑀲𑁄𑀲𑀺 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀉𑀪𑀬𑀢𑁆𑀣 𑀤𑀸𑀦𑀁 𑀤𑁂𑀳𑀺. 𑀉𑀪𑀬𑀢𑁆𑀣 𑀤𑀸𑀦𑀁 𑀤𑀢𑁆𑀯𑀸 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀡. 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄 𑀢𑁂𑀲𑀁 𑀤𑀺𑀝𑁆𑀞𑀺𑀜𑁆𑀘 𑀔𑀦𑁆𑀢𑀺𑀜𑁆𑀘 𑀭𑀼𑀘𑀺𑀜𑁆𑀘 𑀆𑀤𑀸𑀬𑀜𑁆𑀘 𑀭𑁄𑀘𑁂𑀳𑀻’’𑀢𑀺.

𑁪𑁭𑁨. 𑀅𑀲𑁆𑀲𑁄𑀲𑀺 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑁋 ‘‘𑀢𑁂 𑀓𑀺𑀭 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀣 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑀺. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀯𑀺𑀲𑀸𑀔𑁂, 𑀉𑀪𑀬𑀢𑁆𑀣 𑀤𑀸𑀦𑀁 𑀤𑁂𑀳𑀺. 𑀉𑀪𑀬𑀢𑁆𑀣 𑀤𑀸𑀦𑀁 𑀤𑀢𑁆𑀯𑀸 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀡. 𑀉𑀪𑀬𑀢𑁆𑀣 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀥𑀫𑁆𑀫𑀯𑀸𑀤𑀺𑀦𑁄 𑀢𑁂𑀲𑀁 𑀤𑀺𑀝𑁆𑀞𑀺𑀜𑁆𑀘 𑀔𑀦𑁆𑀢𑀺𑀜𑁆𑀘 𑀭𑀼𑀘𑀺𑀜𑁆𑀘 𑀆𑀤𑀸𑀬𑀜𑁆𑀘 𑀭𑁄𑀘𑁂𑀳𑀻’’𑀢𑀺.

𑁪𑁭𑁩. 𑀅𑀣 𑀔𑁄 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑁂 𑀓𑀺𑀭, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀓𑀸 𑀪𑀺𑀓𑁆𑀔𑀽 𑀪𑀡𑁆𑀟𑀦𑀓𑀸𑀭𑀓𑀸 𑀓𑀮𑀳𑀓𑀸𑀭𑀓𑀸 𑀯𑀺𑀯𑀸𑀤𑀓𑀸𑀭𑀓𑀸 𑀪𑀲𑁆𑀲𑀓𑀸𑀭𑀓𑀸 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑁂𑀦𑀸𑀲𑀦𑁂 [𑀲𑁂𑀦𑀸𑀲𑀦𑁂𑀲𑀼 (𑀓.), 𑀲𑁂𑀦𑀸𑀲𑀦𑀁 (𑀲𑁆𑀬𑀸.)] 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺. ‘‘𑀲𑀘𑁂 𑀧𑀦, 𑀪𑀦𑁆𑀢𑁂, 𑀯𑀺𑀯𑀺𑀢𑁆𑀢𑀁 𑀦 𑀳𑁄𑀢𑀺, 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀯𑀺𑀢𑁆𑀢𑀁 𑀓𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑀁, 𑀦 𑀢𑁆𑀯𑁂𑀯𑀸𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

‘‘𑀆𑀫𑀺𑀲𑁂 𑀧𑀦, 𑀪𑀦𑁆𑀢𑁂, 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀆𑀫𑀺𑀲𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀩𑁆𑀩𑁂𑀲𑀁 𑀲𑀫𑀓𑀁 𑀪𑀸𑀚𑁂𑀢𑀩𑁆𑀩’’𑀦𑁆𑀢𑀺.

𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁭. 𑀑𑀲𑀸𑀭𑀡𑀸𑀦𑀼𑀚𑀸𑀦𑀦𑀸

𑁪𑁭𑁪. 𑀅𑀣 𑀔𑁄 𑀢𑀲𑁆𑀲 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀆𑀧𑀢𑁆𑀢𑀺 𑀏𑀲𑀸, 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦𑀸’’𑀢𑀺. 𑀅𑀣 𑀔𑁄 𑀲𑁄 𑀉𑀓𑁆𑀔𑀺𑀢𑁆𑀢𑀓𑁄 𑀪𑀺𑀓𑁆𑀔𑀼 𑀬𑁂𑀦 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀆𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀏𑀣 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀑𑀲𑀸𑀭𑁂𑀣𑀸’’𑀢𑀺. 𑀅𑀣 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀓𑁄 𑀪𑀺𑀓𑁆𑀔𑀼 𑀏𑀯𑀫𑀸𑀳 𑁋 ‘𑀆𑀧𑀢𑁆𑀢𑀺 𑀏𑀲𑀸, 𑀆𑀯𑀼𑀲𑁄; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄𑀫𑁆𑀳𑀺, 𑀦𑀫𑁆𑀳𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦𑀫𑁆𑀳𑀺 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀏𑀣 𑀫𑀁 𑀆𑀬𑀲𑁆𑀫𑀦𑁆𑀢𑁄 𑀑𑀲𑀸𑀭𑁂𑀣𑀸’𑀢𑀺. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀆𑀧𑀢𑁆𑀢𑀺 𑀏𑀲𑀸, 𑀪𑀺𑀓𑁆𑀔𑀯𑁂; 𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀆𑀧𑀦𑁆𑀦𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀸𑀧𑀦𑁆𑀦𑁄. 𑀉𑀓𑁆𑀔𑀺𑀢𑁆𑀢𑁄 𑀏𑀲𑁄 𑀪𑀺𑀓𑁆𑀔𑀼, 𑀦𑁂𑀲𑁄 𑀪𑀺𑀓𑁆𑀔𑀼 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦 𑀉𑀓𑁆𑀔𑀺𑀢𑁆𑀢𑁄 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦. 𑀬𑀢𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀢𑀺 𑀘, 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀢𑀁 𑀪𑀺𑀓𑁆𑀔𑀼𑀁 𑀑𑀲𑀸𑀭𑁂𑀣𑀸’’𑀢𑀺.

𑀑𑀲𑀸𑀭𑀡𑀸𑀦𑀼𑀚𑀸𑀦𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁮. 𑀲𑀗𑁆𑀖𑀲𑀸𑀫𑀕𑁆𑀕𑀻𑀓𑀣𑀸

𑁪𑁭𑁫. 𑀅𑀣 𑀔𑁄 𑀢𑁂 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀉𑀓𑁆𑀔𑀺𑀢𑁆𑀢𑀓𑀁 𑀪𑀺𑀓𑁆𑀔𑀼𑀁 𑀑𑀲𑀸𑀭𑁂𑀢𑁆𑀯𑀸 𑀬𑁂𑀦 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀓𑁆𑀔𑁂𑀧𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀲𑁆𑀫𑀺𑀁, 𑀆𑀯𑀼𑀲𑁄, 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 [𑀧𑀲𑁆𑀲𑀻 (𑀇𑀢𑀺𑀧𑀺)] 𑀘 𑀑𑀲𑀸𑀭𑀺𑀢𑁄 𑀘. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀫𑀸’’𑀢𑀺.

𑀅𑀣 𑀔𑁄 𑀢𑁂 𑀉𑀓𑁆𑀔𑁂𑀧𑀓𑀸 𑀪𑀺𑀓𑁆𑀔𑀽 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁂, 𑀪𑀦𑁆𑀢𑁂, 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘𑀬𑀲𑁆𑀫𑀺𑀁, 𑀆𑀯𑀼𑀲𑁄, 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀫𑀸’𑀢𑀺. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀬𑀢𑁄 𑀘 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘, 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀼. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀸. 𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁 𑀕𑀺𑀮𑀸𑀦𑁂𑀳𑀺 𑀘 𑀅𑀕𑀺𑀮𑀸𑀦𑁂𑀳𑀺 𑀘. 𑀦 𑀓𑁂𑀳𑀺𑀘𑀺 𑀙𑀦𑁆𑀤𑁄 𑀤𑀸𑀢𑀩𑁆𑀩𑁄. 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑁄𑀲𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑁄 𑀏𑀲𑁄 𑀪𑀺𑀓𑁆𑀔𑀼 𑀆𑀧𑀦𑁆𑀦𑁄 𑀘 𑀉𑀓𑁆𑀔𑀺𑀢𑁆𑀢𑁄 𑀘 𑀧𑀲𑁆𑀲𑀺 𑀘 𑀑𑀲𑀸𑀭𑀺𑀢𑁄 𑀘. 𑀲𑀗𑁆𑀖𑁄 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑀸 𑀓𑀭𑀡𑀁, 𑀲𑁄 𑀢𑀼𑀡𑁆𑀳𑀲𑁆𑀲, 𑀬𑀲𑁆𑀲 𑀦𑀓𑁆𑀔𑀫𑀢𑀺 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀸 𑀲𑀗𑁆𑀖𑁂𑀦 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀯𑀽𑀧𑀲𑀫𑀸𑀬 𑀲𑀗𑁆𑀖𑀲𑀸𑀫𑀕𑁆𑀕𑀻. 𑀦𑀺𑀳𑀢𑁄 𑀲𑀗𑁆𑀖𑀪𑁂𑀤𑁄, 𑀦𑀺𑀳𑀢𑀸 𑀲𑀗𑁆𑀖𑀭𑀸𑀚𑀺, 𑀦𑀺𑀳𑀢𑀁 𑀲𑀗𑁆𑀖𑀯𑀯𑀢𑁆𑀣𑀸𑀦𑀁, 𑀦𑀺𑀳𑀢𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑀸𑀯𑀤𑁂𑀯 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺.

𑀲𑀗𑁆𑀖𑀲𑀸𑀫𑀕𑁆𑀕𑀻𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁭𑁯. 𑀉𑀧𑀸𑀮𑀺𑀲𑀗𑁆𑀖𑀲𑀸𑀫𑀕𑁆𑀕𑀻𑀧𑀼𑀘𑁆𑀙𑀸

𑁪𑁭𑁬. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀲𑁆𑀫𑀺𑀁, 𑀪𑀦𑁆𑀢𑁂, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀥𑀫𑁆𑀫𑀺𑀓𑀸 𑀦𑀼 𑀔𑁄 𑀲𑀸, 𑀪𑀦𑁆𑀢𑁂, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺? ‘‘𑀬𑀲𑁆𑀫𑀺𑀁, 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀅𑀥𑀫𑁆𑀫𑀺𑀓𑀸 𑀲𑀸, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺.

‘‘𑀬𑀲𑁆𑀫𑀺𑀁 𑀧𑀦, 𑀪𑀦𑁆𑀢𑁂, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀥𑀫𑁆𑀫𑀺𑀓𑀸 𑀦𑀼 𑀔𑁄 𑀲𑀸, 𑀪𑀦𑁆𑀢𑁂, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺? ‘‘𑀬𑀲𑁆𑀫𑀺𑀁, 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀥𑀫𑁆𑀫𑀺𑀓𑀸 𑀲𑀸, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻’’𑀢𑀺.

‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂, 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑁄’’𑀢𑀺? ‘‘𑀤𑁆𑀯𑁂𑀫𑀸, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑁄 𑁋 𑀅𑀢𑁆𑀣𑀼𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀸𑀧𑁂𑀢𑀸 𑀩𑁆𑀬𑀜𑁆𑀚𑀦𑀼𑀧𑁂𑀢𑀸; 𑀅𑀢𑁆𑀣𑀼𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀼𑀧𑁂𑀢𑀸 𑀘 𑀩𑁆𑀬𑀜𑁆𑀚𑀦𑀼𑀧𑁂𑀢𑀸 𑀘. 𑀓𑀢𑀫𑀸 𑀘, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀸𑀧𑁂𑀢𑀸 𑀩𑁆𑀬𑀜𑁆𑀚𑀦𑀼𑀧𑁂𑀢𑀸? 𑀬𑀲𑁆𑀫𑀺𑀁, 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀸𑀧𑁂𑀢𑀸 𑀩𑁆𑀬𑀜𑁆𑀚𑀦𑀼𑀧𑁂𑀢𑀸. 𑀓𑀢𑀫𑀸 𑀘, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀼𑀧𑁂𑀢𑀸 𑀘 𑀩𑁆𑀬𑀜𑁆𑀚𑀦𑀼𑀧𑁂𑀢𑀸 𑀘? 𑀬𑀲𑁆𑀫𑀺𑀁, 𑀉𑀧𑀸𑀮𑀺, 𑀯𑀢𑁆𑀣𑀼𑀲𑁆𑀫𑀺𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀫𑀽𑀮𑀸 𑀫𑀽𑀮𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑀸𑀫𑀕𑁆𑀕𑀺𑀁 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀉𑀧𑀸𑀮𑀺, 𑀲𑀗𑁆𑀖𑀲𑀸𑀫𑀕𑁆𑀕𑀻 𑀅𑀢𑁆𑀣𑀼𑀧𑁂𑀢𑀸 𑀘 𑀩𑁆𑀬𑀜𑁆𑀚𑀦𑀼𑀧𑁂𑀢𑀸 𑀘. 𑀇𑀫𑀸 𑀔𑁄, 𑀉𑀧𑀸𑀮𑀺, 𑀤𑁆𑀯𑁂 𑀲𑀗𑁆𑀖𑀲𑀸𑀫𑀕𑁆𑀕𑀺𑀬𑁄’’𑀢𑀺.

𑁪𑁭𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑁂𑀲𑀼 𑀘 𑀫𑀦𑁆𑀢𑀦𑀸𑀲𑀼 𑀘;

𑀅𑀢𑁆𑀣𑁂𑀲𑀼 𑀚𑀸𑀢𑁂𑀲𑀼 𑀯𑀺𑀦𑀺𑀘𑁆𑀙𑀬𑁂𑀲𑀼 𑀘;

𑀓𑀣𑀁𑀧𑀓𑀸𑀭𑁄𑀥 𑀦𑀭𑁄 𑀫𑀳𑀢𑁆𑀣𑀺𑀓𑁄;

𑀪𑀺𑀓𑁆𑀔𑀼 𑀓𑀣𑀁 𑀳𑁄𑀢𑀺𑀥 𑀧𑀕𑁆𑀕𑀳𑀸𑀭𑀳𑁄𑀢𑀺.

‘‘𑀅𑀦𑀸𑀦𑀼𑀯𑀚𑁆𑀚𑁄 𑀧𑀞𑀫𑁂𑀦 𑀲𑀻𑀮𑀢𑁄;

𑀅𑀯𑁂𑀓𑁆𑀔𑀺𑀢𑀸𑀘𑀸𑀭𑁄 𑀲𑀼𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀧𑀘𑁆𑀘𑀢𑁆𑀣𑀺𑀓𑀸 𑀦𑀽𑀧𑀯𑀤𑀦𑁆𑀢𑀺 𑀥𑀫𑁆𑀫𑀢𑁄;

𑀦 𑀳𑀺𑀲𑁆𑀲 𑀢𑀁 𑀳𑁄𑀢𑀺 𑀯𑀤𑁂𑀬𑁆𑀬𑀼 𑀬𑁂𑀦 𑀦𑀁.

‘‘𑀲𑁄 𑀢𑀸𑀤𑀺𑀲𑁄 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄;

𑀯𑀺𑀲𑀸𑀭𑀤𑁄 𑀳𑁄𑀢𑀺 𑀯𑀺𑀲𑀬𑁆𑀳 𑀪𑀸𑀲𑀢𑀺;

𑀦𑀘𑁆𑀙𑀫𑁆𑀪𑀢𑀺 𑀧𑀭𑀺𑀲𑀕𑀢𑁄 𑀦 𑀯𑁂𑀥𑀢𑀺;

𑀅𑀢𑁆𑀣𑀁 𑀦 𑀳𑀸𑀧𑁂𑀢𑀺 𑀅𑀦𑀼𑀬𑁆𑀬𑀼𑀢𑀁 𑀪𑀡𑀁.

‘‘𑀢𑀣𑁂𑀯 𑀧𑀜𑁆𑀳𑀁 𑀧𑀭𑀺𑀲𑀸𑀲𑀼 𑀧𑀼𑀘𑁆𑀙𑀺𑀢𑁄;

𑀦 𑀘𑁂𑀯 𑀧𑀚𑁆𑀛𑀸𑀬𑀢𑀺 𑀦 𑀫𑀗𑁆𑀓𑀼 𑀳𑁄𑀢𑀺;

𑀲𑁄 𑀓𑀸𑀮𑀸𑀕𑀢𑀁 𑀩𑁆𑀬𑀸𑀓𑀭𑀡𑀸𑀭𑀳𑀁 𑀯𑀘𑁄;

𑀭𑀜𑁆𑀚𑁂𑀢𑀺 𑀯𑀺𑀜𑁆𑀜𑀽𑀧𑀭𑀺𑀲𑀁 𑀯𑀺𑀘𑀓𑁆𑀔𑀡𑁄.

‘‘𑀲𑀕𑀸𑀭𑀯𑁄 𑀯𑀼𑀟𑁆𑀠𑀢𑀭𑁂𑀲𑀼 𑀪𑀺𑀓𑁆𑀔𑀼𑀲𑀼;

𑀆𑀘𑁂𑀭𑀓𑀫𑁆𑀳𑀺 𑀘 𑀲𑀓𑁂 𑀯𑀺𑀲𑀸𑀭𑀤𑁄;

𑀅𑀮𑀁 𑀧𑀫𑁂𑀢𑀼𑀁 𑀧𑀕𑀼𑀡𑁄 𑀓𑀣𑁂𑀢𑀯𑁂;

𑀧𑀘𑁆𑀘𑀢𑁆𑀣𑀺𑀓𑀸𑀦𑀜𑁆𑀘 𑀯𑀺𑀭𑀤𑁆𑀥𑀺𑀓𑁄𑀯𑀺𑀤𑁄.

‘‘𑀧𑀘𑁆𑀘𑀢𑁆𑀣𑀺𑀓𑀸 𑀬𑁂𑀦 𑀯𑀚𑀦𑁆𑀢𑀺 𑀦𑀺𑀕𑁆𑀕𑀳𑀁;

𑀫𑀳𑀸𑀚𑀦𑁄 𑀲𑀜𑁆𑀜𑀧𑀦𑀜𑁆𑀘 𑀕𑀘𑁆𑀙𑀢𑀺;

𑀲𑀓𑀜𑁆𑀘 𑀆𑀤𑀸𑀬𑀫𑀬𑀁 𑀦 𑀭𑀺𑀜𑁆𑀘𑀢𑀺;

𑀯𑀺𑀬𑀸𑀓𑀭𑀁 [𑀲𑁄 𑀩𑁆𑀬𑀸𑀓𑀭𑀁 (𑀲𑀻.), 𑀯𑁂𑀬𑁆𑀬𑀸𑀓𑀭𑀁 (𑀲𑁆𑀬𑀸.)] 𑀧𑀜𑁆𑀳𑀫𑀦𑀽𑀧𑀖𑀸𑀢𑀺𑀓𑀁.

‘‘𑀤𑀽𑀢𑁂𑀬𑁆𑀬𑀓𑀫𑁆𑀫𑁂𑀲𑀼 𑀅𑀮𑀁 𑀲𑀫𑀼𑀕𑁆𑀕𑀳𑁄;

𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑁂𑀲𑀼 𑀘 𑀆𑀳𑀼 𑀦𑀁 𑀬𑀣𑀸;

𑀓𑀭𑀁 𑀯𑀘𑁄 𑀪𑀺𑀓𑁆𑀔𑀼𑀕𑀡𑁂𑀦 𑀧𑁂𑀲𑀺𑀢𑁄;

𑀅𑀳𑀁 𑀓𑀭𑁄𑀫𑀻𑀢𑀺 𑀦 𑀢𑁂𑀦 𑀫𑀜𑁆𑀜𑀢𑀺.

‘‘𑀆𑀧𑀚𑁆𑀚𑀢𑀺 𑀬𑀸𑀯𑀢𑀓𑁂𑀲𑀼 𑀯𑀢𑁆𑀣𑀼𑀲𑀼;

𑀆𑀧𑀢𑁆𑀢𑀺𑀬𑀸 𑀳𑁄𑀢𑀺 𑀬𑀣𑀸 𑀘 𑀯𑀼𑀝𑁆𑀞𑀺𑀢𑀺;

𑀏𑀢𑁂 𑀯𑀺𑀪𑀗𑁆𑀕𑀸 𑀉𑀪𑀬𑀲𑁆𑀲 𑀲𑁆𑀯𑀸𑀕𑀢𑀸;

𑀆𑀧𑀢𑁆𑀢𑀺 𑀯𑀼𑀝𑁆𑀞𑀸𑀦𑀧𑀤𑀲𑁆𑀲 𑀓𑁄𑀯𑀺𑀤𑁄.

‘‘𑀦𑀺𑀲𑁆𑀲𑀸𑀭𑀡𑀁 𑀕𑀘𑁆𑀙𑀢𑀺 𑀬𑀸𑀦𑀺 𑀘𑀸𑀘𑀭𑀁;

𑀦𑀺𑀲𑁆𑀲𑀸𑀭𑀺𑀢𑁄 𑀳𑁄𑀢𑀺 𑀬𑀣𑀸 𑀘 𑀯𑀢𑁆𑀢𑀦𑀸 [𑀯𑀢𑁆𑀣𑀼𑀦𑀸 (𑀲𑀻. 𑀲𑁆𑀬𑀸.)];

𑀑𑀲𑀸𑀭𑀡𑀁 𑀢𑀁𑀯𑀼𑀲𑀺𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀏𑀢𑀫𑁆𑀧𑀺 𑀚𑀸𑀦𑀸𑀢𑀺 𑀯𑀺𑀪𑀗𑁆𑀕𑀓𑁄𑀯𑀺𑀤𑁄.

‘‘𑀲𑀕𑀸𑀭𑀯𑁄 𑀯𑀼𑀟𑁆𑀠𑀢𑀭𑁂𑀲𑀼 𑀪𑀺𑀓𑁆𑀔𑀼𑀲𑀼;

𑀦𑀯𑁂𑀲𑀼 𑀣𑁂𑀭𑁂𑀲𑀼 𑀘 𑀫𑀚𑁆𑀛𑀺𑀫𑁂𑀲𑀼 𑀘;

𑀫𑀳𑀸𑀚𑀦𑀲𑁆𑀲𑀢𑁆𑀣𑀘𑀭𑁄𑀥 𑀧𑀡𑁆𑀟𑀺𑀢𑁄;

𑀲𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼 𑀇𑀥 𑀧𑀕𑁆𑀕𑀳𑀸𑀭𑀳𑁄’’𑀢𑀺.

𑀉𑀧𑀸𑀮𑀺𑀲𑀗𑁆𑀖𑀲𑀸𑀫𑀕𑁆𑀕𑀻𑀧𑀼𑀘𑁆𑀙𑀸 𑀦𑀺𑀝𑁆𑀞𑀺𑀢𑀸.

𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁄 𑀤𑀲𑀫𑁄.

𑁨𑁮𑁦. 𑀢𑀲𑁆𑀲𑀼𑀤𑁆𑀤𑀸𑀦𑀁

𑀓𑁄𑀲𑀫𑁆𑀩𑀺𑀬𑀁 𑀚𑀺𑀦𑀯𑀭𑁄, 𑀯𑀺𑀯𑀸𑀤𑀸𑀧𑀢𑁆𑀢𑀺𑀤𑀲𑁆𑀲𑀦𑁂;

𑀦𑀼𑀓𑁆𑀔𑀺𑀧𑁂𑀬𑁆𑀬 𑀬𑀲𑁆𑀫𑀺𑀁 𑀢𑀲𑁆𑀫𑀺𑀁, 𑀲𑀤𑁆𑀥𑀸𑀬𑀸𑀧𑀢𑁆𑀢𑀺 𑀤𑁂𑀲𑀬𑁂.

𑀅𑀦𑁆𑀢𑁄𑀲𑀻𑀫𑀸𑀬𑀁 𑀢𑀢𑁆𑀣𑁂𑀯, 𑀩𑀸𑀮𑀓𑀜𑁆𑀘𑁂𑀯 𑀯𑀁𑀲𑀤𑀸;

𑀧𑀸𑀮𑀺𑀮𑁂𑀬𑁆𑀬𑀸 𑀘 𑀲𑀸𑀯𑀢𑁆𑀣𑀺, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀓𑁄𑀮𑀺𑀢𑁄.

𑀫𑀳𑀸𑀓𑀲𑁆𑀲𑀧𑀓𑀘𑁆𑀘𑀸𑀦𑀸, 𑀓𑁄𑀝𑁆𑀞𑀺𑀓𑁄 𑀓𑀧𑁆𑀧𑀺𑀦𑁂𑀦 𑀘;