𑁬𑁭. 𑀢𑀲𑁆𑀲𑀼𑀤𑁆𑀤𑀸𑀦𑀁

𑁧𑁩𑁧. 𑀯𑀺𑀦𑀬𑀫𑁆𑀳𑀺 𑀫𑀳𑀢𑁆𑀣𑁂𑀲𑀼, 𑀧𑁂𑀲𑀮𑀸𑀦𑀁 𑀲𑀼𑀔𑀸𑀯𑀳𑁂;

𑀦𑀺𑀕𑁆𑀕𑀳𑀸𑀦𑀜𑁆𑀘 𑀧𑀸𑀧𑀺𑀘𑁆𑀙𑁂, 𑀮𑀚𑁆𑀚𑀻𑀦𑀁 𑀧𑀕𑁆𑀕𑀳𑁂𑀲𑀼 𑀘.

𑀲𑀸𑀲𑀦𑀸𑀥𑀸𑀭𑀡𑁂 𑀘𑁂𑀯, 𑀲𑀩𑁆𑀩𑀜𑁆𑀜𑀼𑀚𑀺𑀦𑀕𑁄𑀘𑀭𑁂;

𑀅𑀦𑀜𑁆𑀜𑀯𑀺𑀲𑀬𑁂 𑀔𑁂𑀫𑁂, 𑀲𑀼𑀧𑀜𑁆𑀜𑀢𑁆𑀢𑁂 𑀅𑀲𑀁𑀲𑀬𑁂.

𑀔𑀦𑁆𑀥𑀓𑁂 𑀯𑀺𑀦𑀬𑁂 𑀘𑁂𑀯, 𑀧𑀭𑀺𑀯𑀸𑀭𑁂 𑀘 𑀫𑀸𑀢𑀺𑀓𑁂;

𑀬𑀣𑀸𑀢𑁆𑀣𑀓𑀸𑀭𑀻 𑀓𑀼𑀲𑀮𑁄, 𑀧𑀝𑀺𑀧𑀚𑁆𑀚𑀢𑀺 𑀬𑁄𑀦𑀺𑀲𑁄.

𑀬𑁄 𑀕𑀯𑀁 𑀦 𑀯𑀺𑀚𑀸𑀦𑀸𑀢𑀺, 𑀦 𑀲𑁄 𑀭𑀓𑁆𑀔𑀢𑀺 𑀕𑁄𑀕𑀡𑀁;

𑀏𑀯𑀁 𑀲𑀻𑀮𑀁 𑀅𑀚𑀸𑀦𑀦𑁆𑀢𑁄, 𑀓𑀺𑀁 𑀲𑁄 𑀭𑀓𑁆𑀔𑁂𑀬𑁆𑀬 𑀲𑀁𑀯𑀭𑀁.

𑀧𑀫𑀼𑀝𑁆𑀞𑀫𑁆𑀳𑀺 𑀘 𑀲𑀼𑀢𑁆𑀢𑀦𑁆𑀢𑁂, 𑀅𑀪𑀺𑀥𑀫𑁆𑀫𑁂 𑀘 𑀢𑀸𑀯𑀤𑁂;

𑀯𑀺𑀦𑀬𑁂 𑀅𑀯𑀺𑀦𑀝𑁆𑀞𑀫𑁆𑀳𑀺, 𑀧𑀼𑀦 𑀢𑀺𑀝𑁆𑀞𑀢𑀺 𑀲𑀸𑀲𑀦𑀁.

𑀢𑀲𑁆𑀫𑀸 𑀲𑀗𑁆𑀕𑀸𑀳𑀡𑀸𑀳𑁂𑀢𑀼𑀁 [𑀲𑀗𑁆𑀕𑀸𑀳𑀦𑀸𑀳𑁂𑀢𑀼𑀁 (𑀓.)], 𑀉𑀤𑁆𑀤𑀸𑀦𑀁 𑀅𑀦𑀼𑀧𑀼𑀩𑁆𑀩𑀲𑁄;

𑀧𑀯𑀓𑁆𑀔𑀸𑀫𑀺 𑀬𑀣𑀸𑀜𑀸𑀬𑀁, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑀯𑀢𑁆𑀣𑀼 𑀦𑀺𑀤𑀸𑀦𑀁 𑀆𑀧𑀢𑁆𑀢𑀺, 𑀦𑀬𑀸 𑀧𑁂𑀬𑁆𑀬𑀸𑀮𑀫𑁂𑀯 𑀘;

𑀤𑀼𑀓𑁆𑀓𑀭𑀁 𑀢𑀁 𑀅𑀲𑁂𑀲𑁂𑀢𑀼𑀁, 𑀦𑀬𑀢𑁄 𑀢𑀁 𑀯𑀺𑀚𑀸𑀦𑀣𑀸𑀢𑀺.

𑀩𑁄𑀥𑀺 𑀭𑀸𑀚𑀸𑀬𑀢𑀦𑀜𑁆𑀘, 𑀅𑀚𑀧𑀸𑀮𑁄 𑀲𑀳𑀫𑁆𑀧𑀢𑀺;

𑀩𑁆𑀭𑀳𑁆𑀫𑀸 𑀆𑀴𑀸𑀭𑁄 𑀉𑀤𑀓𑁄, 𑀪𑀺𑀓𑁆𑀔𑀼 𑀘 𑀉𑀧𑀓𑁄 𑀇𑀲𑀺.

𑀓𑁄𑀡𑁆𑀟𑀜𑁆𑀜𑁄 𑀯𑀧𑁆𑀧𑁄 𑀪𑀤𑁆𑀤𑀺𑀬𑁄, 𑀫𑀳𑀸𑀦𑀸𑀫𑁄 𑀘 𑀅𑀲𑁆𑀲𑀚𑀺;

𑀬𑀲𑁄 𑀘𑀢𑁆𑀢𑀸𑀭𑁄 𑀧𑀜𑁆𑀜𑀸𑀲, 𑀲𑀩𑁆𑀩𑁂 𑀧𑁂𑀲𑁂𑀲𑀺 𑀲𑁄 𑀤𑀺𑀲𑀸.

𑀯𑀢𑁆𑀣𑀼 𑀫𑀸𑀭𑁂𑀳𑀺 𑀢𑀺𑀁𑀲𑀸 𑀘, 𑀉𑀭𑀼𑀯𑁂𑀮𑀁 𑀢𑀬𑁄 𑀚𑀝𑀻;

𑀅𑀕𑁆𑀬𑀸𑀕𑀸𑀭𑀁 𑀫𑀳𑀸𑀭𑀸𑀚𑀸, 𑀲𑀓𑁆𑀓𑁄 𑀩𑁆𑀭𑀳𑁆𑀫𑀸 𑀘 𑀓𑁂𑀯𑀮𑀸.

𑀧𑀁𑀲𑀼𑀓𑀽𑀮𑀁 𑀧𑁄𑀓𑁆𑀔𑀭𑀡𑀻, 𑀲𑀺𑀮𑀸 𑀘 𑀓𑀓𑀼𑀥𑁄 𑀲𑀺𑀮𑀸;

𑀚𑀫𑁆𑀩𑀼 𑀅𑀫𑁆𑀩𑁄 𑀘 𑀆𑀫𑀮𑁄, 𑀧𑀸𑀭𑀺𑀧𑀼𑀧𑁆𑀨𑀜𑁆𑀘 𑀆𑀳𑀭𑀺.

𑀨𑀸𑀮𑀺𑀬𑀦𑁆𑀢𑀼 𑀉𑀚𑁆𑀚𑀮𑀦𑁆𑀢𑀼, 𑀯𑀺𑀚𑁆𑀛𑀸𑀬𑀦𑁆𑀢𑀼 𑀘 𑀓𑀲𑁆𑀲𑀧;

𑀦𑀺𑀫𑀼𑀚𑁆𑀚𑀦𑁆𑀢𑀺 𑀫𑀼𑀔𑀻 𑀫𑁂𑀖𑁄, 𑀕𑀬𑀸 𑀮𑀝𑁆𑀞𑀺 𑀘 𑀫𑀸𑀕𑀥𑁄.

𑀉𑀧𑀢𑀺𑀲𑁆𑀲𑁄 𑀓𑁄𑀮𑀺𑀢𑁄 𑀘, 𑀅𑀪𑀺𑀜𑁆𑀜𑀸𑀢𑀸 𑀘 𑀧𑀩𑁆𑀩𑀚𑀼𑀁;

𑀤𑀼𑀦𑁆𑀦𑀺𑀯𑀢𑁆𑀣𑀸 𑀧𑀡𑀸𑀫𑀦𑀸, 𑀓𑀺𑀲𑁄 𑀮𑀽𑀔𑁄 𑀘 𑀩𑁆𑀭𑀸𑀳𑁆𑀫𑀡𑁄.

𑀅𑀦𑀸𑀘𑀸𑀭𑀁 𑀆𑀘𑀭𑀢𑀺, 𑀉𑀤𑀭𑀁 𑀫𑀸𑀡𑀯𑁄 𑀕𑀡𑁄;

𑀯𑀲𑁆𑀲𑀁 𑀩𑀸𑀮𑁂𑀳𑀺 𑀧𑀓𑁆𑀓𑀦𑁆𑀢𑁄, 𑀤𑀲 𑀯𑀲𑁆𑀲𑀸𑀦𑀺 𑀦𑀺𑀲𑁆𑀲𑀬𑁄.

𑀦 𑀯𑀢𑁆𑀢𑀦𑁆𑀢𑀺 𑀧𑀡𑀸𑀫𑁂𑀢𑀼𑀁, 𑀩𑀸𑀮𑀸 𑀧𑀲𑁆𑀲𑀤𑁆𑀥𑀺 𑀧𑀜𑁆𑀘 𑀙;

𑀬𑁄 𑀲𑁄 𑀅𑀜𑁆𑀜𑁄 𑀘 𑀦𑀕𑁆𑀕𑁄 𑀘, 𑀅𑀘𑁆𑀙𑀺𑀦𑁆𑀦𑀚𑀝𑀺𑀮𑀲𑀸𑀓𑀺𑀬𑁄.

𑀫𑀕𑀥𑁂𑀲𑀼 𑀧𑀜𑁆𑀘𑀸𑀩𑀸𑀥𑀸, 𑀏𑀓𑁄 𑀭𑀸𑀚𑀸 [𑀪𑀝𑁄 𑀘𑁄𑀭𑁄 (𑀲𑁆𑀬𑀸.)] 𑀘 𑀅𑀗𑁆𑀕𑀼𑀮𑀺;

𑀫𑀸𑀕𑀥𑁄 𑀘 𑀅𑀦𑀼𑀜𑁆𑀜𑀸𑀲𑀺, 𑀓𑀸𑀭𑀸 𑀮𑀺𑀔𑀺 𑀓𑀲𑀸𑀳𑀢𑁄.

𑀮𑀓𑁆𑀔𑀡𑀸 𑀇𑀡𑀸 𑀤𑀸𑀲𑁄 𑀘, 𑀪𑀡𑁆𑀟𑀼𑀓𑁄 𑀉𑀧𑀸𑀮𑀺 𑀅𑀳𑀺;

𑀲𑀤𑁆𑀥𑀁 𑀓𑀼𑀮𑀁 𑀓𑀡𑁆𑀝𑀓𑁄 𑀘, 𑀆𑀳𑀼𑀦𑁆𑀤𑀭𑀺𑀓𑀫𑁂𑀯 𑀘.

𑀯𑀢𑁆𑀣𑀼𑀫𑁆𑀳𑀺 𑀤𑀸𑀭𑀓𑁄 𑀲𑀺𑀓𑁆𑀔𑀸, 𑀯𑀺𑀳𑀭𑀦𑁆𑀢𑀺 𑀘 𑀓𑀺𑀁 𑀦𑀼 𑀔𑁄;

𑀲𑀩𑁆𑀩𑀁 𑀫𑀼𑀔𑀁 𑀉𑀧𑀚𑁆𑀛𑀸𑀬𑁂, 𑀅𑀧𑀮𑀸𑀴𑀦 𑀓𑀡𑁆𑀝𑀓𑁄.

𑀧𑀡𑁆𑀟𑀓𑁄 𑀣𑁂𑀬𑁆𑀬𑀧𑀓𑁆𑀓𑀦𑁆𑀢𑁄, 𑀅𑀳𑀺 𑀘 𑀫𑀸𑀢𑀭𑀻 𑀧𑀺𑀢𑀸;

𑀅𑀭𑀳𑀦𑁆𑀢𑀪𑀺𑀓𑁆𑀔𑀼𑀦𑀻𑀪𑁂𑀤𑀸, 𑀭𑀼𑀳𑀺𑀭𑁂𑀦 𑀘 𑀩𑁆𑀬𑀜𑁆𑀚𑀦𑀁.

𑀅𑀦𑀼𑀧𑀚𑁆𑀛𑀸𑀬𑀲𑀗𑁆𑀖𑁂𑀦, 𑀕𑀡𑀧𑀡𑁆𑀟𑀓𑀧𑀢𑁆𑀢𑀓𑁄;

𑀅𑀘𑀻𑀯𑀭𑀁 𑀢𑀤𑀼𑀪𑀬𑀁, 𑀬𑀸𑀘𑀺𑀢𑁂𑀦𑀧𑀺 𑀬𑁂 𑀢𑀬𑁄.

𑀳𑀢𑁆𑀣𑀸 𑀧𑀸𑀤𑀸 𑀳𑀢𑁆𑀣𑀧𑀸𑀤𑀸, 𑀓𑀡𑁆𑀡𑀸 𑀦𑀸𑀲𑀸 𑀢𑀤𑀽𑀪𑀬𑀁;

𑀅𑀗𑁆𑀕𑀼𑀮𑀺𑀅𑀴𑀓𑀡𑁆𑀟𑀭𑀁, 𑀨𑀡𑀁 𑀔𑀼𑀚𑁆𑀚𑀜𑁆𑀘 𑀯𑀸𑀫𑀦𑀁.

𑀕𑀮𑀕𑀡𑁆𑀟𑀻 𑀮𑀓𑁆𑀔𑀡𑀸 𑀘𑁂𑀯, 𑀓𑀲𑀸 𑀮𑀺𑀔𑀺𑀢𑀲𑀻𑀧𑀤𑀻;

𑀧𑀸𑀧𑀧𑀭𑀺𑀲𑀤𑀽𑀲𑀻 𑀘, 𑀓𑀸𑀡𑀁 𑀓𑀼𑀡𑀺 𑀢𑀣𑁂𑀯 𑀘.

𑀔𑀜𑁆𑀚𑀁 𑀧𑀓𑁆𑀔𑀳𑀢𑀜𑁆𑀘𑁂𑀯, 𑀲𑀘𑁆𑀙𑀺𑀦𑁆𑀦𑀇𑀭𑀺𑀬𑀸𑀧𑀣𑀁;

𑀚𑀭𑀸𑀦𑁆𑀥𑀫𑀽𑀕𑀩𑀥𑀺𑀭𑀁, 𑀅𑀦𑁆𑀥𑀫𑀽𑀕𑀜𑁆𑀘 𑀬𑀁 𑀢𑀳𑀺𑀁.

𑀅𑀦𑁆𑀥𑀩𑀥𑀺𑀭𑀁 𑀬𑀁 𑀯𑀼𑀢𑁆𑀢𑀁, 𑀫𑀽𑀕𑀩𑀥𑀺𑀭𑀫𑁂𑀯 𑀘;

𑀅𑀦𑁆𑀥𑀫𑀽𑀕𑀩𑀥𑀺𑀭𑀜𑁆𑀘, 𑀅𑀮𑀚𑁆𑀚𑀻𑀦𑀜𑁆𑀘 𑀦𑀺𑀲𑁆𑀲𑀬𑀁.

𑀯𑀢𑁆𑀣𑀩𑁆𑀩𑀜𑁆𑀘 𑀢𑀣𑀸𑀤𑁆𑀥𑀸𑀦𑀁, 𑀬𑀸𑀘𑀫𑀸𑀦𑁂𑀦 𑀮𑀓𑁆𑀔𑀡𑀸 [𑀧𑁂𑀓𑁆𑀔𑀦𑀸 (𑀲𑀩𑁆𑀩𑀢𑁆𑀣)];

𑀆𑀕𑀘𑁆𑀙𑀢𑀼 𑀯𑀺𑀯𑀤𑀦𑁆𑀢𑀺, 𑀏𑀓𑀼𑀧𑀚𑁆𑀛𑀸𑀬𑁂𑀦 𑀓𑀲𑁆𑀲𑀧𑁄.

𑀤𑀺𑀲𑁆𑀲𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀸, 𑀆𑀩𑀸𑀥𑁂𑀳𑀺 𑀘 𑀧𑀻𑀴𑀺𑀢𑀸;

𑀅𑀦𑀦𑀼𑀲𑀺𑀝𑁆𑀞𑀸 𑀯𑀺𑀢𑁆𑀣𑁂𑀦𑁆𑀢𑀺, 𑀢𑀢𑁆𑀣𑁂𑀯 𑀅𑀦𑀼𑀲𑀸𑀲𑀦𑀸.

𑀲𑀗𑁆𑀖𑁂𑀧𑀺 𑀘 𑀅𑀣𑁄 𑀩𑀸𑀮𑀸, 𑀅𑀲𑀫𑁆𑀫𑀢𑀸 𑀘 𑀏𑀓𑀢𑁄;

𑀉𑀮𑁆𑀮𑀼𑀫𑁆𑀧𑀢𑀼𑀧𑀲𑀫𑁆𑀧𑀤𑀸, 𑀦𑀺𑀲𑁆𑀲𑀬𑁄 𑀏𑀓𑀓𑁄 𑀢𑀬𑁄𑀢𑀺.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽𑀦𑀺 𑀏𑀓𑀲𑀢𑀜𑁆𑀘 𑀤𑁆𑀯𑀸𑀲𑀢𑁆𑀢𑀢𑀺.

𑀫𑀳𑀸𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.