𑁧𑁮. 𑀆𑀘𑀭𑀺𑀬𑀯𑀢𑁆𑀢𑀓𑀣𑀸

𑁭𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀫𑀸𑀡𑀯𑀓𑁄 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀧𑀝𑀺𑀓𑀘𑁆𑀘𑁂𑀯 𑀦𑀺𑀲𑁆𑀲𑀬𑁂 𑀆𑀘𑀺𑀓𑁆𑀔𑀺𑀁𑀲𑀼. 𑀲𑁄 𑀏𑀯𑀫𑀸𑀳 𑁋 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑁂 𑀦𑀺𑀲𑁆𑀲𑀬𑁂 𑀆𑀘𑀺𑀓𑁆𑀔𑁂𑀬𑁆𑀬𑀸𑀣, 𑀅𑀪𑀺𑀭𑀫𑁂𑀬𑁆𑀬𑀸𑀫𑀳𑀁 [𑀅𑀪𑀺𑀭𑀫𑁂𑀬𑁆𑀬𑀜𑁆𑀘𑀸𑀳𑀁 (𑀲𑀻.), 𑀅𑀪𑀺𑀭𑀫𑁂𑀬𑁆𑀬𑀁 𑀲𑁆𑀯𑀸𑀳𑀁 (𑀓.)]. 𑀦 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀲𑁆𑀲𑀸𑀫𑀺; 𑀚𑁂𑀕𑀼𑀘𑁆𑀙𑀸 𑀫𑁂 𑀦𑀺𑀲𑁆𑀲𑀬𑀸 𑀧𑀝𑀺𑀓𑀽𑀮𑀸’’𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀓𑀘𑁆𑀘𑁂𑀯 𑀦𑀺𑀲𑁆𑀲𑀬𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀸. 𑀬𑁄 𑀆𑀘𑀺𑀓𑁆𑀔𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀸 𑀦𑀺𑀲𑁆𑀲𑀬𑁂 𑀆𑀘𑀺𑀓𑁆𑀔𑀺𑀢𑀼𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀤𑀼𑀯𑀕𑁆𑀕𑁂𑀦𑀧𑀺 𑀢𑀺𑀯𑀕𑁆𑀕𑁂𑀦𑀧𑀺 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀦, 𑀪𑀺𑀓𑁆𑀔𑀯𑁂, 𑀊𑀦𑀤𑀲𑀯𑀕𑁆𑀕𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀕𑁆𑀕𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀕𑁆𑀕𑁂𑀦 𑀯𑀸 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺.

𑁭𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀏𑀓𑀯𑀲𑁆𑀲𑀸𑀧𑀺 𑀤𑀼𑀯𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀆𑀬𑀲𑁆𑀫𑀸𑀧𑀺 𑀉𑀧𑀲𑁂𑀦𑁄 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁄 𑀏𑀓𑀯𑀲𑁆𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀲𑁄 𑀯𑀲𑁆𑀲𑀁𑀯𑀼𑀝𑁆𑀞𑁄 𑀤𑀼𑀯𑀲𑁆𑀲𑁄 𑀏𑀓𑀯𑀲𑁆𑀲𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀲𑁂𑀦𑀁 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀢𑁆𑀯𑀁 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁, 𑀪𑀕𑀯𑀸. 𑀅𑀧𑁆𑀧𑀓𑀺𑀮𑀫𑀣𑁂𑀦 𑀫𑀬𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑀸’’𑀢𑀺. 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀢𑁆𑀣𑀲𑀁𑀳𑀺𑀢𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺; 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫, 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀲𑁂𑀦𑀁 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀤𑀼𑀯𑀲𑁆𑀲𑁄𑀳𑀁, 𑀪𑀕𑀯𑀸’’𑀢𑀺. ‘‘𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀓𑀢𑀺𑀯𑀲𑁆𑀲𑁄’’𑀢𑀺? ‘‘𑀏𑀓𑀯𑀲𑁆𑀲𑁄, 𑀪𑀕𑀯𑀸’’𑀢𑀺. ‘‘𑀓𑀺𑀁 𑀢𑀸𑀬𑀁 𑀪𑀺𑀓𑁆𑀔𑀼 𑀳𑁄𑀢𑀻’’𑀢𑀺? ‘‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀫𑁂, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀜𑁆𑀜𑁂𑀳𑀺 𑀑𑀯𑀤𑀺𑀬𑁄 𑀅𑀦𑀼𑀲𑀸𑀲𑀺𑀬𑁄 𑀅𑀜𑁆𑀜𑀁 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼𑀁 𑀫𑀜𑁆𑀜𑀺𑀲𑁆𑀲𑀲𑀺. 𑀅𑀢𑀺𑀮𑀳𑀼𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄, 𑀬𑀤𑀺𑀤𑀁 𑀕𑀡𑀩𑀦𑁆𑀥𑀺𑀓𑀁. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬’’…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀤𑀲𑀯𑀲𑁆𑀲𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺.

𑁭𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀜𑀯𑀦𑁆𑀢𑁄. 𑀅𑀜𑁆𑀜𑀢𑀭𑁄𑀧𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀉𑀧𑀚𑁆𑀛𑀸𑀬𑁂𑀦 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁𑀬𑁂𑀯 𑀢𑀺𑀢𑁆𑀣𑀸𑀬𑀢𑀦𑀁 𑀲𑀗𑁆𑀓𑀫𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀜𑀯𑀦𑁆𑀢𑁄𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀜𑀯𑀦𑁆𑀢𑁄’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑁋 𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸𑀢𑀺 𑁋 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀦𑁆𑀢𑀺. 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀩𑀸𑀮𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀡𑁆𑀟𑀺𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀩𑁆𑀬𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑁆𑀬𑀢𑁆𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀅𑀧𑁆𑀧𑀲𑁆𑀲𑀼𑀢𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀩𑀳𑀼𑀲𑁆𑀲𑀼𑀢𑀸, 𑀤𑀺𑀲𑁆𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀤𑀼𑀧𑁆𑀧𑀜𑁆𑀜𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀜𑁆𑀜𑀯𑀦𑁆𑀢𑁄. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺.

𑁭𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀉𑀧𑀚𑁆𑀛𑀸𑀬𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼𑀧𑀺 𑀯𑀺𑀩𑁆𑀪𑀦𑁆𑀢𑁂𑀲𑀼𑀧𑀺 𑀓𑀸𑀮𑀗𑁆𑀓𑀢𑁂𑀲𑀼𑀧𑀺 𑀧𑀓𑁆𑀔𑀲𑀗𑁆𑀓𑀦𑁆𑀢𑁂𑀲𑀼𑀧𑀺 𑀅𑀦𑀸𑀘𑀭𑀺𑀬𑀓𑀸 𑀅𑀦𑁄𑀯𑀤𑀺𑀬𑀫𑀸𑀦𑀸 𑀅𑀦𑀦𑀼𑀲𑀸𑀲𑀺𑀬𑀫𑀸𑀦𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑁋 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑁋 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑁋 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑁋 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀪𑁄𑀚𑀦𑁂’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁 …𑀧𑁂… 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁, 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀁. 𑀆𑀘𑀭𑀺𑀬𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀧𑀼𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀫𑁆𑀳𑀺 𑀧𑀺𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀢𑀺. 𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀯𑀺𑀳𑀭𑀦𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀯𑀲𑁆𑀲𑀁 𑀦𑀺𑀲𑁆𑀲𑀸𑀬 𑀯𑀢𑁆𑀣𑀼𑀁, 𑀤𑀲𑀯𑀲𑁆𑀲𑁂𑀦 𑀦𑀺𑀲𑁆𑀲𑀬𑀁 𑀤𑀸𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑁄 𑀕𑀳𑁂𑀢𑀩𑁆𑀩𑁄. 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀺; 𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀺; 𑀆𑀘𑀭𑀺𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺, 𑀆𑀬𑀲𑁆𑀫𑀢𑁄 𑀦𑀺𑀲𑁆𑀲𑀸𑀬 𑀯𑀘𑁆𑀙𑀸𑀫𑀻’𑀢𑀺. ‘𑀲𑀸𑀳𑀽𑀢𑀺’ 𑀯𑀸 ‘𑀮𑀳𑀽𑀢𑀺’ 𑀯𑀸 ‘𑀑𑀧𑀸𑀬𑀺𑀓’𑀦𑁆𑀢𑀺 𑀯𑀸 ‘𑀧𑀢𑀺𑀭𑀽𑀧’𑀦𑁆𑀢𑀺 𑀯𑀸 ‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻’𑀢𑀺 𑀯𑀸 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀆𑀘𑀭𑀺𑀬𑁄; 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀕𑀳𑀺𑀢𑁄 𑀳𑁄𑀢𑀺 𑀆𑀘𑀭𑀺𑀬𑁄.

𑁭𑁮. [𑀘𑀽𑀴𑀯. 𑁩𑁮𑁦 𑀆𑀤𑀬𑁄] ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

‘‘𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀉𑀧𑀸𑀳𑀦𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸. 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀆𑀘𑀭𑀺𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀆𑀘𑀭𑀺𑀬𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 𑀤𑀸𑀢𑀩𑁆𑀩𑁄. 𑀲𑀘𑁂 𑀆𑀘𑀭𑀺𑀬𑁄 𑀧𑀘𑁆𑀙𑀸𑀲𑀫𑀡𑀁 𑀆𑀓𑀗𑁆𑀔𑀢𑀺, 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁. 𑀦𑀸𑀢𑀺𑀤𑀽𑀭𑁂 𑀕𑀦𑁆𑀢𑀩𑁆𑀩𑀁, 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑀦𑁆𑀢𑀩𑁆𑀩𑀁, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀦 𑀆𑀘𑀭𑀺𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸. 𑀆𑀘𑀭𑀺𑀬𑁄 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑁄 𑀦𑀺𑀯𑀸𑀭𑁂𑀢𑀩𑁆𑀩𑁄.

‘‘𑀦𑀺𑀯𑀢𑁆𑀢𑀦𑁆𑀢𑁂𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀦𑁆𑀢𑁂𑀦 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁 𑁋 𑀫𑀸 𑀫𑀚𑁆𑀛𑁂 𑀪𑀗𑁆𑀕𑁄 𑀅𑀳𑁄𑀲𑀻𑀢𑀺. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺, 𑀆𑀘𑀭𑀺𑀬𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑀸𑀫𑁂𑀢𑀩𑁆𑀩𑁄. 𑀆𑀘𑀭𑀺𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑁄, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑁄 𑀦𑀺𑀤𑀳𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀆𑀘𑀭𑀺𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀆𑀘𑀭𑀺𑀬𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁.

‘‘𑀲𑀘𑁂 𑀆𑀘𑀭𑀺𑀬𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀆𑀘𑀭𑀺𑀬𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀘𑀼𑀡𑁆𑀡𑀁 𑀤𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑁂 𑀆𑀘𑀭𑀺𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

‘‘𑀉𑀤𑀓𑁂𑀧𑀺 𑀆𑀘𑀭𑀺𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀆𑀘𑀭𑀺𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 𑀉𑀤𑁆𑀤𑀺𑀲𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑁆𑀤𑀺𑀲𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀧𑀭𑀺𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀆𑀘𑀭𑀺𑀬𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑁄 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀧𑀻𑀞𑀁 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸; 𑀔𑁂𑀴𑀫𑀮𑁆𑀮𑀓𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀅𑀧𑀲𑁆𑀲𑁂𑀦𑀨𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀪𑀽𑀫𑀢𑁆𑀣𑀭𑀡𑀁 𑀬𑀣𑀸𑀧𑀜𑁆𑀜𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸 𑁋 𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 𑀉𑀳𑀜𑁆𑀜𑀻𑀢𑀺. 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀸. 𑀫𑀜𑁆𑀘𑁄 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀧𑀻𑀞𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀔𑁂𑀴𑀫𑀮𑁆𑀮𑀓𑁄 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

‘‘𑀲𑀘𑁂 𑀧𑀼𑀭𑀢𑁆𑀣𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀤𑀓𑁆𑀔𑀺𑀡𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀯𑀺𑀯𑀭𑀺𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀯𑀺𑀯𑀭𑀺𑀢𑀩𑁆𑀩𑀸.

‘‘𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀅𑀕𑁆𑀕𑀺𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀁 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

‘‘𑀲𑀘𑁂 𑀆𑀘𑀭𑀺𑀬𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀯𑀽𑀧𑀓𑀸𑀲𑁂𑀢𑀩𑁆𑀩𑁄, 𑀯𑀽𑀧𑀓𑀸𑀲𑀸𑀧𑁂𑀢𑀩𑁆𑀩𑁄, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀯𑀺𑀦𑁄𑀤𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀯𑀺𑀯𑁂𑀘𑁂𑀢𑀩𑁆𑀩𑀁, 𑀯𑀺𑀯𑁂𑀘𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀆𑀘𑀭𑀺𑀬𑁄 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺. 𑀲𑀘𑁂 𑀆𑀘𑀭𑀺𑀬𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀆𑀘𑀭𑀺𑀬𑁄 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀁 𑀅𑀩𑁆𑀪𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀆𑀘𑀭𑀺𑀬𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺. 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺.

‘‘𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀥𑁄𑀯𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀓𑀸𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀧𑀘𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀭𑀚𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸𑀢𑀺. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀁.

‘‘𑀦 𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀸 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄, 𑀦 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀤𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀓𑁂𑀲𑀸 𑀙𑁂𑀤𑁂𑀢𑀩𑁆𑀩𑀸; 𑀦 𑀏𑀓𑀘𑁆𑀘𑁂𑀦 𑀓𑁂𑀲𑀸 𑀙𑁂𑀤𑀸𑀧𑁂𑀢𑀩𑁆𑀩𑀸; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁; 𑀦 𑀏𑀓𑀘𑁆𑀘𑁂𑀦 𑀧𑀭𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑁄 𑀓𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑁄 𑀓𑀸𑀭𑀸𑀧𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁; 𑀦 𑀏𑀓𑀘𑁆𑀘𑁄 𑀧𑀘𑁆𑀙𑀸𑀲𑀫𑀡𑁄 𑀆𑀤𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀺𑀢𑀩𑁆𑀩𑁄; 𑀦 𑀏𑀓𑀘𑁆𑀘𑁂𑀦 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄. 𑀦 𑀆𑀘𑀭𑀺𑀬𑀁 𑀅𑀦𑀸𑀧𑀼𑀘𑁆𑀙𑀸 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄, 𑀦 𑀲𑀼𑀲𑀸𑀦𑀁 𑀕𑀦𑁆𑀢𑀩𑁆𑀩𑀁, 𑀦 𑀤𑀺𑀲𑀸 𑀧𑀓𑁆𑀓𑀫𑀺𑀢𑀩𑁆𑀩𑀸. 𑀲𑀘𑁂 𑀆𑀘𑀭𑀺𑀬𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩’’𑀦𑁆𑀢𑀺.

𑀆𑀘𑀭𑀺𑀬𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.