𑁧𑁫. 𑀉𑀧𑀚𑁆𑀛𑀸𑀬𑀯𑀢𑁆𑀢𑀓𑀣𑀸

𑁬𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀦𑀼𑀧𑀚𑁆𑀛𑀸𑀬𑀓𑀸 𑀅𑀦𑀸𑀘𑀭𑀺𑀬𑀓𑀸 [𑀇𑀤𑀁 𑀧𑀤𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀅𑀦𑁄𑀯𑀤𑀺𑀬𑀫𑀸𑀦𑀸 𑀅𑀦𑀦𑀼𑀲𑀸𑀲𑀺𑀬𑀫𑀸𑀦𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 [𑀢𑁂 𑀫𑀦𑀼𑀲𑁆𑀲𑀸𑀦𑀁 (𑀓.)] 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀪𑁄𑀚𑀦𑁂’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺; 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺; 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺; 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽…𑀧𑁂… 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺 𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀦𑁆𑀢𑀺, 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀫𑁄𑀖𑀧𑀼𑀭𑀺𑀲𑀸𑀦𑀁 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁 𑀉𑀧𑀭𑀺𑀪𑁄𑀚𑀦𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀔𑀸𑀤𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀲𑀸𑀬𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀉𑀧𑀭𑀺𑀧𑀸𑀦𑀻𑀬𑁂𑀧𑀺 𑀉𑀢𑁆𑀢𑀺𑀝𑁆𑀞𑀧𑀢𑁆𑀢𑀁 𑀉𑀧𑀦𑀸𑀫𑁂𑀲𑁆𑀲𑀦𑁆𑀢𑀺, 𑀲𑀸𑀫𑀁 𑀲𑀽𑀧𑀫𑁆𑀧𑀺 𑀑𑀤𑀦𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀪𑀢𑁆𑀢𑀕𑁆𑀕𑁂𑀧𑀺 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬. 𑀅𑀣 𑀔𑁆𑀯𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘𑁂𑀯 𑀅𑀧𑁆𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬 𑀤𑀼𑀧𑁆𑀧𑁄𑀲𑀢𑀸𑀬 𑀫𑀳𑀺𑀘𑁆𑀙𑀢𑀸𑀬 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀬 [𑀅𑀲𑀦𑁆𑀢𑀼𑀝𑁆𑀞𑀺𑀬𑀸 (𑀲𑀻.), 𑀅𑀲𑀦𑁆𑀢𑀼𑀝𑁆𑀞𑀢𑀸𑀬 (𑀲𑁆𑀬𑀸)] 𑀲𑀗𑁆𑀕𑀡𑀺𑀓𑀸𑀬 𑀓𑁄𑀲𑀚𑁆𑀚𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀼𑀪𑀭𑀢𑀸𑀬 𑀲𑀼𑀧𑁄𑀲𑀢𑀸𑀬 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀮𑁆𑀮𑁂𑀔𑀲𑁆𑀲 𑀥𑀼𑀢𑀲𑁆𑀲 𑀧𑀸𑀲𑀸𑀤𑀺𑀓𑀲𑁆𑀲 𑀅𑀧𑀘𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 [𑀯𑀺𑀭𑀺𑀬𑀸𑀭𑀫𑁆𑀪𑀲𑁆𑀲 (𑀲𑀻. 𑀲𑁆𑀬𑀸.)] 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁬𑁫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑀁. 𑀉𑀧𑀚𑁆𑀛𑀸𑀬𑁄, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀫𑁆𑀳𑀺 𑀧𑀼𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀚𑁆𑀛𑀸𑀬𑀫𑁆𑀳𑀺 𑀧𑀺𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀲𑁆𑀲𑀢𑀺. 𑀏𑀯𑀁 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀯𑀺𑀳𑀭𑀦𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀟𑁆𑀠𑀺𑀁 𑀯𑀺𑀭𑀼𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑁄 𑀕𑀳𑁂𑀢𑀩𑁆𑀩𑁄 𑁋 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺; 𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀺; 𑀉𑀧𑀚𑁆𑀛𑀸𑀬𑁄 𑀫𑁂, 𑀪𑀦𑁆𑀢𑁂, 𑀳𑁄𑀳𑀻’𑀢𑀺. 𑀲𑀸𑀳𑀽𑀢𑀺 𑀯𑀸 𑀮𑀳𑀽𑀢𑀺 𑀯𑀸 𑀑𑀧𑀸𑀬𑀺𑀓𑀦𑁆𑀢𑀺 𑀯𑀸 𑀧𑀢𑀺𑀭𑀽𑀧𑀦𑁆𑀢𑀺 𑀯𑀸 𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀳𑀻𑀢𑀺 𑀯𑀸 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 [𑀦 𑀯𑀸𑀘𑀸𑀬 (𑀓.)] 𑀯𑀺𑀜𑁆𑀜𑀸𑀧𑁂𑀢𑀺, 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄; 𑀦 𑀓𑀸𑀬𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀕𑀳𑀺𑀢𑁄 𑀳𑁄𑀢𑀺 𑀉𑀧𑀚𑁆𑀛𑀸𑀬𑁄.

𑁬𑁬. [𑀘𑀽𑀴𑀯. 𑁩𑁭𑁬 𑀆𑀤𑀬𑁄]‘‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀉𑀧𑀚𑁆𑀛𑀸𑀬𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

‘‘𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸. 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 [𑀲𑀉𑀤𑀓𑁄 (𑀓.)] 𑀤𑀸𑀢𑀩𑁆𑀩𑁄. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀧𑀘𑁆𑀙𑀸𑀲𑀫𑀡𑀁 𑀆𑀓𑀗𑁆𑀔𑀢𑀺, 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁. 𑀦𑀸𑀢𑀺𑀤𑀽𑀭𑁂 𑀕𑀦𑁆𑀢𑀩𑁆𑀩𑀁, 𑀦𑀸𑀘𑁆𑀘𑀸𑀲𑀦𑁆𑀦𑁂 𑀕𑀦𑁆𑀢𑀩𑁆𑀩𑀁, 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀦 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑀫𑀸𑀦𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀸 𑀑𑀧𑀸𑀢𑁂𑀢𑀩𑁆𑀩𑀸. 𑀉𑀧𑀚𑁆𑀛𑀸𑀬𑁄 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀸 𑀪𑀡𑀫𑀸𑀦𑁄 𑀦𑀺𑀯𑀸𑀭𑁂𑀢𑀩𑁆𑀩𑁄.

‘‘𑀦𑀺𑀯𑀢𑁆𑀢𑀦𑁆𑀢𑁂𑀦 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩𑀁; 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁, 𑀘𑀻𑀯𑀭𑀁 𑀲𑀗𑁆𑀖𑀭𑀦𑁆𑀢𑁂𑀦 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁 𑁋 𑀫𑀸 𑀫𑀚𑁆𑀛𑁂 𑀪𑀗𑁆𑀕𑁄 𑀅𑀳𑁄𑀲𑀻𑀢𑀺. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺, 𑀉𑀧𑀚𑁆𑀛𑀸𑀬𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑀸𑀫𑁂𑀢𑀩𑁆𑀩𑁄. 𑀉𑀧𑀚𑁆𑀛𑀸𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑁄, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑁄 𑀦𑀺𑀤𑀳𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀉𑀧𑀚𑁆𑀛𑀸𑀬𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁.

‘‘𑀲𑀘𑁂 𑀉𑀧𑀚𑁆𑀛𑀸𑀬𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀉𑀧𑀚𑁆𑀛𑀸𑀬𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀘𑀼𑀡𑁆𑀡𑀁 𑀤𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑁂 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

‘‘𑀉𑀤𑀓𑁂𑀧𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀉𑀧𑀚𑁆𑀛𑀸𑀬𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑀘𑁂 𑀉𑀤𑁆𑀤𑀺𑀲𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑁆𑀤𑀺𑀲𑀺𑀢𑀩𑁆𑀩𑁄. 𑀲𑀘𑁂 𑀧𑀭𑀺𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀭𑀺𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑀚𑁆𑀛𑀸𑀬𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 [𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀁 (𑀲𑀻. 𑀲𑁆𑀬𑀸.)] 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀫𑀜𑁆𑀘𑁄 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀧𑀻𑀞𑀁 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀔𑁂𑀴𑀫𑀮𑁆𑀮𑀓𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀪𑀽𑀫𑀢𑁆𑀣𑀭𑀡𑀁 𑀬𑀣𑀸𑀧𑀜𑁆𑀜𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸 𑁋 𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 𑀉𑀳𑀜𑁆𑀜𑀻𑀢𑀺. 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀸. 𑀫𑀜𑁆𑀘𑁄 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀧𑀻𑀞𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀔𑁂𑀴𑀫𑀮𑁆𑀮𑀓𑁄 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 𑀞𑀧𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

‘‘𑀲𑀘𑁂 𑀧𑀼𑀭𑀢𑁆𑀣𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀤𑀓𑁆𑀔𑀺𑀡𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀯𑀺𑀯𑀭𑀺𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀯𑀺𑀯𑀭𑀺𑀢𑀩𑁆𑀩𑀸.

‘‘𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀅𑀕𑁆𑀕𑀺𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀽𑀧𑀓𑀸𑀲𑁂𑀢𑀩𑁆𑀩𑁄, 𑀯𑀽𑀧𑀓𑀸𑀲𑀸𑀧𑁂𑀢𑀩𑁆𑀩𑁄, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀯𑀺𑀦𑁄𑀤𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀯𑀺𑀯𑁂𑀘𑁂𑀢𑀩𑁆𑀩𑀁, 𑀯𑀺𑀯𑁂𑀘𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺 𑀧𑀭𑀺𑀯𑀸𑀲𑀸𑀭𑀳𑁄, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀁 𑀅𑀩𑁆𑀪𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 [𑀦𑀺𑀬𑀲𑀁 (𑀓.)] 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀉𑀧𑀚𑁆𑀛𑀸𑀬𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺. 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺.

‘‘𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀥𑁄𑀯𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀓𑀸𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀧𑀘𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸𑀢𑀺. 𑀲𑀘𑁂 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 [𑀭𑀚𑁂𑀢𑀩𑁆𑀩𑀁 (𑀲𑀻. 𑀲𑁆𑀬𑀸.)] 𑀳𑁄𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀦 𑀭𑀚𑀺𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀉𑀧𑀚𑁆𑀛𑀸𑀬𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸𑀢𑀺. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 [𑀭𑀚𑁂𑀦𑁆𑀢𑁂𑀦 (𑀲𑀻. 𑀲𑁆𑀬𑀸.)] 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁, 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀁.

‘‘𑀦 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄, 𑀦 𑀏𑀓𑀘𑁆𑀘𑀲𑁆𑀲 𑀧𑀢𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀦 𑀏𑀓𑀘𑁆𑀘𑀲𑁆𑀲 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀤𑀸𑀢𑀩𑁆𑀩𑁄, 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀓𑁂𑀲𑀸 𑀙𑁂𑀤𑁂𑀢𑀩𑁆𑀩𑀸 [𑀙𑁂𑀢𑁆𑀢𑀩𑁆𑀩𑀸 (𑀲𑀻.), 𑀙𑁂𑀤𑀺𑀢𑀩𑁆𑀩𑀸 (𑀓.)], 𑀦 𑀏𑀓𑀘𑁆𑀘𑁂𑀦 𑀓𑁂𑀲𑀸 𑀙𑁂𑀤𑀸𑀧𑁂𑀢𑀩𑁆𑀩𑀸; 𑀦 𑀏𑀓𑀘𑁆𑀘𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦 𑀏𑀓𑀘𑁆𑀘𑁂𑀦 𑀧𑀭𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑀩𑁆𑀩𑀁; 𑀦 𑀏𑀓𑀘𑁆𑀘𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑁄 [𑀯𑁂𑀬𑁆𑀬𑀸𑀯𑀘𑁆𑀘𑀁 (𑀓𑀢𑁆𑀣𑀘𑀺)] 𑀓𑀸𑀢𑀩𑁆𑀩𑁄, 𑀦 𑀏𑀓𑀘𑁆𑀘𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑁄 𑀓𑀸𑀭𑀸𑀧𑁂𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁, 𑀦 𑀏𑀓𑀘𑁆𑀘𑁄 𑀧𑀘𑁆𑀙𑀸𑀲𑀫𑀡𑁄 𑀆𑀤𑀸𑀢𑀩𑁆𑀩𑁄; 𑀦 𑀏𑀓𑀘𑁆𑀘𑀲𑁆𑀲 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀺𑀢𑀩𑁆𑀩𑁄, 𑀦 𑀏𑀓𑀘𑁆𑀘𑁂𑀦 𑀧𑀺𑀡𑁆𑀟𑀧𑀸𑀢𑁄 𑀦𑀻𑀳𑀭𑀸𑀧𑁂𑀢𑀩𑁆𑀩𑁄; 𑀦 𑀉𑀧𑀚𑁆𑀛𑀸𑀬𑀁 𑀅𑀦𑀸𑀧𑀼𑀘𑁆𑀙𑀸 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄; 𑀦 𑀲𑀼𑀲𑀸𑀦𑀁 𑀕𑀦𑁆𑀢𑀩𑁆𑀩𑀁; 𑀦 𑀤𑀺𑀲𑀸 𑀧𑀓𑁆𑀓𑀫𑀺𑀢𑀩𑁆𑀩𑀸. 𑀲𑀘𑁂 𑀉𑀧𑀚𑁆𑀛𑀸𑀬𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄; 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩’’𑀦𑁆𑀢𑀺.

𑀉𑀧𑀚𑁆𑀛𑀸𑀬𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.