𑁯. 𑀚𑀦𑁆𑀢𑀸𑀖𑀭𑀯𑀢𑁆𑀢𑀓𑀣𑀸

𑁩𑁭𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀚𑀦𑁆𑀢𑀸𑀖𑀭𑁂 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀯𑀸𑀭𑀺𑀬𑀫𑀸𑀦𑀸 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀧𑀳𑀽𑀢𑀁 𑀓𑀝𑁆𑀞𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀤𑁆𑀯𑀸𑀭𑁂 𑀦𑀺𑀲𑀻𑀤𑀦𑁆𑀢𑀺. 𑀪𑀺𑀓𑁆𑀔𑀽 [𑀣𑁂𑀭𑀸 𑀘 𑀪𑀺𑀓𑁆𑀔𑀽 (𑀲𑁆𑀬𑀸. 𑀓𑀁.)] 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀤𑁆𑀯𑀸𑀭𑀁 𑀅𑀮𑀪𑀫𑀸𑀦𑀸 𑀫𑀼𑀘𑁆𑀙𑀺𑀢𑀸 𑀧𑀧𑀢𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀚𑀦𑁆𑀢𑀸𑀖𑀭𑁂 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀯𑀸𑀭𑀺𑀬𑀫𑀸𑀦𑀸 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀧𑀳𑀽𑀢𑀁 𑀓𑀝𑁆𑀞𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺! 𑀪𑀺𑀓𑁆𑀔𑀽 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀤𑁆𑀯𑀸𑀭𑀁 𑀅𑀮𑀪𑀫𑀸𑀦𑀸 𑀫𑀼𑀘𑁆𑀙𑀺𑀢𑀸 𑀧𑀧𑀢𑀦𑁆𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀚𑀦𑁆𑀢𑀸𑀖𑀭𑁂 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀯𑀸𑀭𑀺𑀬𑀫𑀸𑀦𑀸 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀧𑀳𑀽𑀢𑀁 𑀓𑀝𑁆𑀞𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀤𑁆𑀯𑀸𑀭𑁂 𑀦𑀺𑀲𑀻𑀤𑀦𑁆𑀢𑀺; 𑀪𑀺𑀓𑁆𑀔𑀽 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀤𑁆𑀯𑀸𑀭𑀁 𑀅𑀮𑀪𑀫𑀸𑀦𑀸 𑀫𑀼𑀘𑁆𑀙𑀺𑀢𑀸 𑀧𑀧𑀢𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀚𑀦𑁆𑀢𑀸𑀖𑀭𑁂 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀯𑀸𑀭𑀺𑀬𑀫𑀸𑀦𑁂𑀦 𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀧𑀳𑀽𑀢𑀁 𑀓𑀝𑁆𑀞𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺 𑀤𑀸𑀢𑀩𑁆𑀩𑁄. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀦, 𑀪𑀺𑀓𑁆𑀔𑀯𑁂, 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀬𑁄 𑀦𑀺𑀲𑀻𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑁩𑁭𑁨. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀚𑀦𑁆𑀢𑀸𑀖𑀭𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀪𑀺𑀓𑁆𑀔𑀽𑀳𑀺 𑀚𑀦𑁆𑀢𑀸𑀖𑀭𑁂 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀬𑁄 𑀧𑀞𑀫𑀁 𑀚𑀦𑁆𑀢𑀸𑀖𑀭𑀁 𑀕𑀘𑁆𑀙𑀢𑀺, 𑀲𑀘𑁂 𑀙𑀸𑀭𑀺𑀓𑀸 𑀉𑀲𑁆𑀲𑀦𑁆𑀦𑀸 𑀳𑁄𑀢𑀺, 𑀙𑀸𑀭𑀺𑀓𑀸 𑀙𑀟𑁆𑀟𑁂𑀢𑀩𑁆𑀩𑀸. 𑀲𑀘𑁂 𑀚𑀦𑁆𑀢𑀸𑀖𑀭𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀚𑀦𑁆𑀢𑀸𑀖𑀭𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑀡𑁆𑀟𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀪𑀡𑁆𑀟𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀚𑀦𑁆𑀢𑀸𑀖𑀭𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀚𑀦𑁆𑀢𑀸𑀖𑀭𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸.

‘‘𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀉𑀤𑀓𑀤𑁄𑀡𑀺𑀓𑀸𑀬 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺, 𑀚𑀦𑁆𑀢𑀸𑀖𑀭𑁂 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁. 𑀲𑀘𑁂 𑀉𑀲𑁆𑀲𑀳𑀢𑀺, 𑀉𑀤𑀓𑁂𑀧𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄𑀧𑀺 𑀦𑀳𑀸𑀬𑀺𑀢𑀩𑁆𑀩𑀁, 𑀦 𑀉𑀧𑀭𑀺𑀢𑁄𑀧𑀺 𑀦𑀳𑀸𑀬𑀺𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀉𑀢𑁆𑀢𑀭𑀦𑁆𑀢𑁂𑀦 𑀑𑀢𑀭𑀦𑁆𑀢𑀸𑀦𑀁 𑀫𑀕𑁆𑀕𑁄 𑀤𑀸𑀢𑀩𑁆𑀩𑁄. 𑀬𑁄 𑀧𑀘𑁆𑀙𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀢𑀺, 𑀲𑀘𑁂 𑀚𑀦𑁆𑀢𑀸𑀖𑀭𑀁 𑀘𑀺𑀓𑁆𑀔𑀮𑁆𑀮𑀁 𑀳𑁄𑀢𑀺, 𑀥𑁄𑀯𑀺𑀢𑀩𑁆𑀩𑀁. 𑀫𑀢𑁆𑀢𑀺𑀓𑀸𑀤𑁄𑀡𑀺𑀓𑀁 𑀥𑁄𑀯𑀺𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀅𑀕𑁆𑀕𑀺𑀁 𑀯𑀺𑀚𑁆𑀛𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀚𑀦𑁆𑀢𑀸𑀖𑀭𑀯𑀢𑁆𑀢𑀁 𑀬𑀣𑀸 𑀪𑀺𑀓𑁆𑀔𑀽𑀳𑀺 𑀚𑀦𑁆𑀢𑀸𑀖𑀭𑁂 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.