𑁧𑁦. 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀓𑀣𑀸

𑁩𑁭𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄 𑀯𑀘𑁆𑀘𑀁 𑀓𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀘𑀫𑁂𑀢𑀼𑀁 𑁋 𑀓𑁄 𑀇𑀫𑀁 𑀯𑀲𑀮𑀁 𑀤𑀼𑀕𑁆𑀕𑀦𑁆𑀥𑀁 𑀆𑀫𑀲𑀺𑀲𑁆𑀲𑀢𑀻𑀢𑀺 [𑀆𑀘𑀫𑀺𑀲𑁆𑀲𑀢𑀻𑀢𑀺 (𑀓.)]. 𑀢𑀲𑁆𑀲 𑀯𑀘𑁆𑀘𑀫𑀕𑁆𑀕𑁂 𑀓𑀺𑀫𑀺 𑀲𑀡𑁆𑀞𑀸𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄, 𑀯𑀘𑁆𑀘𑀁 𑀓𑀢𑁆𑀯𑀸 𑀦 𑀆𑀘𑀫𑁂𑀲𑀻’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀼 𑀯𑀘𑁆𑀘𑀁 𑀓𑀢𑁆𑀯𑀸 𑀦 𑀆𑀘𑀫𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀯𑀘𑁆𑀘𑀁 𑀓𑀢𑁆𑀯𑀸 𑀦 𑀆𑀘𑀫𑁂𑀲𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀯𑀘𑁆𑀘𑀁 𑀓𑀢𑁆𑀯𑀸 𑀲𑀢𑀺 𑀉𑀤𑀓𑁂 𑀦𑀸𑀘𑀫𑁂𑀢𑀩𑁆𑀩𑀁. 𑀬𑁄 𑀦𑀸𑀘𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀯𑀘𑁆𑀘𑀓𑀼𑀝𑀺𑀬𑀸 𑀬𑀣𑀸𑀯𑀼𑀟𑁆𑀠𑀁 𑀯𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀦𑀯𑀓𑀸 𑀪𑀺𑀓𑁆𑀔𑀽 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀯𑀘𑁆𑀘𑀺𑀢𑀸 𑀆𑀕𑀫𑁂𑀦𑁆𑀢𑀺. 𑀢𑁂 𑀯𑀘𑁆𑀘𑀁 𑀲𑀦𑁆𑀥𑀸𑀭𑁂𑀦𑁆𑀢𑀸 𑀫𑀼𑀘𑁆𑀙𑀺𑀢𑀸 𑀧𑀧𑀢𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… ‘‘𑀦, 𑀪𑀺𑀓𑁆𑀔𑀯𑁂, 𑀯𑀘𑁆𑀘𑀓𑀼𑀝𑀺𑀬𑀸 𑀬𑀣𑀸𑀯𑀼𑀟𑁆𑀠𑀁 𑀯𑀘𑁆𑀘𑁄 𑀓𑀸𑀢𑀩𑁆𑀩𑁄. 𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀯𑀘𑁆𑀘𑀁 𑀓𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀲𑀳𑀲𑀸𑀧𑀺 𑀯𑀘𑁆𑀘𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑀺, 𑀉𑀩𑁆𑀪𑀚𑀺𑀢𑁆𑀯𑀸𑀧𑀺 [𑀉𑀩𑁆𑀪𑀼𑀚𑁆𑀚𑀺𑀢𑁆𑀯𑀸𑀧𑀺 (𑀲𑀻.), 𑀉𑀩𑁆𑀪𑀼𑀚𑀺𑀢𑁆𑀯𑀸 (𑀲𑁆𑀬𑀸.)] 𑀧𑀯𑀺𑀲𑀦𑁆𑀢𑀺, 𑀦𑀺𑀢𑁆𑀣𑀼𑀦𑀦𑁆𑀢𑀸𑀧𑀺 𑀯𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑀸𑀧𑀺 𑀯𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀯𑀘𑁆𑀘𑀤𑁄𑀡𑀺𑀓𑀸𑀬 𑀯𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀧𑀲𑁆𑀲𑀸𑀯𑀤𑁄𑀡𑀺𑀓𑀸𑀬 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺, 𑀧𑀲𑁆𑀲𑀸𑀯𑀤𑁄𑀡𑀺𑀓𑀸𑀬𑀧𑀺 𑀔𑁂𑀴𑀁 𑀓𑀭𑁄𑀦𑁆𑀢𑀺, 𑀨𑀭𑀼𑀲𑁂𑀦𑀧𑀺 𑀓𑀝𑁆𑀞𑁂𑀦 𑀅𑀯𑀮𑁂𑀔𑀦𑁆𑀢𑀺, 𑀅𑀯𑀮𑁂𑀔𑀦𑀓𑀝𑁆𑀞𑀫𑁆𑀧𑀺 𑀯𑀘𑁆𑀘𑀓𑀽𑀧𑀫𑁆𑀳𑀺 𑀧𑀸𑀢𑁂𑀦𑁆𑀢𑀺, 𑀅𑀢𑀺𑀲𑀳𑀲𑀸𑀧𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀉𑀩𑁆𑀪𑀚𑀺𑀢𑁆𑀯𑀸𑀧𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀘𑀧𑀼𑀘𑀧𑀼𑀓𑀸𑀭𑀓𑀫𑁆𑀧𑀺 𑀆𑀘𑀫𑁂𑀦𑁆𑀢𑀺, 𑀆𑀘𑀫𑀦𑀲𑀭𑀸𑀯𑀓𑁂𑀧𑀺 𑀉𑀤𑀓𑀁 𑀲𑁂𑀲𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀲𑀳𑀲𑀸𑀧𑀺 𑀯𑀘𑁆𑀘𑀓𑀼𑀝𑀺𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀉𑀩𑁆𑀪𑀚𑀺𑀢𑁆𑀯𑀸𑀧𑀺 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀦𑀺𑀢𑁆𑀣𑀼𑀦𑀦𑁆𑀢𑀸𑀧𑀺 𑀯𑀘𑁆𑀘𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑀸𑀧𑀺 𑀯𑀘𑁆𑀘𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀯𑀘𑁆𑀘𑀤𑁄𑀡𑀺𑀓𑀸𑀬 𑀯𑀘𑁆𑀘𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀧𑀲𑁆𑀲𑀸𑀯𑀤𑁄𑀡𑀺𑀓𑀸𑀬 𑀧𑀲𑁆𑀲𑀸𑀯𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀧𑀲𑁆𑀲𑀸𑀯𑀤𑁄𑀡𑀺𑀓𑀸𑀬𑀧𑀺 𑀔𑁂𑀴𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀨𑀭𑀼𑀲𑁂𑀦𑀧𑀺 𑀓𑀝𑁆𑀞𑁂𑀦 𑀅𑀯𑀮𑁂𑀔𑀺𑀲𑁆𑀲𑀦𑁆𑀢𑀺, 𑀅𑀯𑀮𑁂𑀔𑀦𑀓𑀝𑁆𑀞𑀫𑁆𑀧𑀺 𑀯𑀘𑁆𑀘𑀓𑀽𑀧𑀫𑁆𑀳𑀺 𑀧𑀸𑀢𑁂𑀲𑁆𑀲𑀦𑁆𑀢𑀺, 𑀅𑀢𑀺𑀲𑀳𑀲𑀸𑀧𑀺 𑀦𑀺𑀓𑁆𑀔𑀫𑀺𑀲𑁆𑀲𑀦𑁆𑀢𑀺, 𑀉𑀩𑁆𑀪𑀚𑀺𑀢𑁆𑀯𑀸𑀧𑀺 𑀦𑀺𑀓𑁆𑀔𑀫𑀺𑀲𑁆𑀲𑀦𑁆𑀢𑀺, 𑀘𑀧𑀼𑀘𑀧𑀼𑀓𑀸𑀭𑀓𑀫𑁆𑀧𑀺 𑀆𑀘𑀫𑁂𑀲𑁆𑀲𑀦𑁆𑀢𑀺, 𑀆𑀘𑀫𑀦𑀲𑀭𑀸𑀯𑀓𑁂𑀧𑀺 𑀉𑀤𑀓𑀁 𑀲𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁭𑁪. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀪𑀺𑀓𑁆𑀔𑀽𑀳𑀺 𑀯𑀘𑁆𑀘𑀓𑀼𑀝𑀺𑀬𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀬𑁄 𑀯𑀘𑁆𑀘𑀓𑀼𑀝𑀺𑀁 𑀕𑀘𑁆𑀙𑀢𑀺 𑀢𑁂𑀦 𑀩𑀳𑀺 𑀞𑀺𑀢𑁂𑀦 [𑀩𑀳𑀺 𑀞𑀺𑀢𑁂𑀦 (𑀲𑀻. 𑀓.)] 𑀉𑀓𑁆𑀓𑀸𑀲𑀺𑀢𑀩𑁆𑀩𑀁. 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑁂𑀦𑀧𑀺 𑀉𑀓𑁆𑀓𑀸𑀲𑀺𑀢𑀩𑁆𑀩𑀁. 𑀘𑀻𑀯𑀭𑀯𑀁𑀲𑁂 𑀯𑀸 𑀘𑀻𑀯𑀭𑀭𑀚𑁆𑀚𑀼𑀬𑀸 𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀸𑀥𑀼𑀓𑀁 𑀅𑀢𑀭𑀫𑀸𑀦𑁂𑀦 𑀯𑀘𑁆𑀘𑀓𑀼𑀝𑀻 𑀧𑀯𑀺𑀲𑀺𑀢𑀩𑁆𑀩𑀸. 𑀦𑀸𑀢𑀺𑀲𑀳𑀲𑀸 𑀧𑀯𑀺𑀲𑀺𑀢𑀩𑁆𑀩𑀸. 𑀦 𑀉𑀩𑁆𑀪𑀚𑀺𑀢𑁆𑀯𑀸 𑀧𑀯𑀺𑀲𑀺𑀢𑀩𑁆𑀩𑀸. 𑀯𑀘𑁆𑀘𑀧𑀸𑀤𑀼𑀓𑀸𑀬 𑀞𑀺𑀢𑁂𑀦 𑀉𑀩𑁆𑀪𑀚𑀺𑀢𑀩𑁆𑀩𑀁. 𑀦 𑀦𑀺𑀢𑁆𑀣𑀼𑀦𑀦𑁆𑀢𑁂𑀦 𑀯𑀘𑁆𑀘𑁄 𑀓𑀸𑀢𑀩𑁆𑀩𑁄. 𑀦 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑁂𑀦 𑀯𑀘𑁆𑀘𑁄 𑀓𑀸𑀢𑀩𑁆𑀩𑁄. 𑀦 𑀩𑀳𑀺𑀤𑁆𑀥𑀸 𑀯𑀘𑁆𑀘𑀤𑁄𑀡𑀺𑀓𑀸𑀬 𑀯𑀘𑁆𑀘𑁄 𑀓𑀸𑀢𑀩𑁆𑀩𑁄. 𑀦 𑀩𑀳𑀺𑀤𑁆𑀥𑀸 𑀧𑀲𑁆𑀲𑀸𑀯𑀤𑁄𑀡𑀺𑀓𑀸𑀬 𑀧𑀲𑁆𑀲𑀸𑀯𑁄 𑀓𑀸𑀢𑀩𑁆𑀩𑁄. 𑀦 𑀧𑀲𑁆𑀲𑀸𑀯𑀤𑁄𑀡𑀺𑀓𑀸𑀬 𑀔𑁂𑀴𑁄 𑀓𑀸𑀢𑀩𑁆𑀩𑁄. 𑀦 𑀨𑀭𑀼𑀲𑁂𑀦 𑀓𑀝𑁆𑀞𑁂𑀦 𑀅𑀯𑀮𑁂𑀔𑀺𑀢𑀩𑁆𑀩𑀁. 𑀦 𑀅𑀯𑀮𑁂𑀔𑀦𑀓𑀝𑁆𑀞𑀁 𑀯𑀘𑁆𑀘𑀓𑀽𑀧𑀫𑁆𑀳𑀺 𑀧𑀸𑀢𑁂𑀢𑀩𑁆𑀩𑀁. 𑀯𑀘𑁆𑀘𑀧𑀸𑀤𑀼𑀓𑀸𑀬 𑀞𑀺𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁. 𑀦𑀸𑀢𑀺𑀲𑀳𑀲𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁. 𑀦 𑀉𑀩𑁆𑀪𑀚𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁. 𑀆𑀘𑀫𑀦𑀧𑀸𑀤𑀼𑀓𑀸𑀬 𑀞𑀺𑀢𑁂𑀦 𑀉𑀩𑁆𑀪𑀚𑀺𑀢𑀩𑁆𑀩𑀁. 𑀦 𑀘𑀧𑀼𑀘𑀧𑀼𑀓𑀸𑀭𑀓𑀁 𑀆𑀘𑀫𑁂𑀢𑀩𑁆𑀩𑀁. 𑀦 𑀆𑀘𑀫𑀦𑀲𑀭𑀸𑀯𑀓𑁂 𑀉𑀤𑀓𑀁 𑀲𑁂𑀲𑁂𑀢𑀩𑁆𑀩𑀁. 𑀆𑀘𑀫𑀦𑀧𑀸𑀤𑀼𑀓𑀸𑀬 𑀞𑀺𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁.

‘‘𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀳𑀢𑀸 [𑀊𑀳𑀢𑀸 (𑀲𑀻. 𑀲𑁆𑀬𑀸.)] 𑀳𑁄𑀢𑀺, 𑀥𑁄𑀯𑀺𑀢𑀩𑁆𑀩𑀸. 𑀲𑀘𑁂 𑀅𑀯𑀮𑁂𑀔𑀦𑀧𑀺𑀥𑀭𑁄 𑀧𑀽𑀭𑁄 𑀳𑁄𑀢𑀺, 𑀅𑀯𑀮𑁂𑀔𑀦𑀓𑀝𑁆𑀞𑀁 𑀙𑀟𑁆𑀟𑁂𑀢𑀩𑁆𑀩𑀁. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀭𑀺𑀪𑀡𑁆𑀟𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀪𑀡𑁆𑀟𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀯𑀘𑁆𑀘𑀓𑀼𑀝𑀺𑀯𑀢𑁆𑀢𑀁 𑀬𑀣𑀸 𑀪𑀺𑀓𑁆𑀔𑀽𑀳𑀺 𑀯𑀘𑁆𑀘𑀓𑀼𑀝𑀺𑀬𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.