𑁫. 𑀪𑀢𑁆𑀢𑀕𑁆𑀕𑀯𑀢𑁆𑀢𑀓𑀣𑀸

𑁩𑁬𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀪𑀢𑁆𑀢𑀕𑁆𑀕𑀁 𑀕𑀘𑁆𑀙𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫𑀧𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀺, 𑀣𑁂𑀭𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀦𑁆𑀢𑀺, 𑀦𑀯𑁂𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀦𑁆𑀢𑀺, 𑀲𑀗𑁆𑀖𑀸𑀝𑀺𑀫𑁆𑀧𑀺 𑀑𑀢𑁆𑀣𑀭𑀺𑀢𑁆𑀯𑀸 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀪𑀢𑁆𑀢𑀕𑁆𑀕𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫𑀧𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀣𑁂𑀭𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀦𑀯𑁂𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦𑀧𑀺 𑀧𑀝𑀺𑀩𑀸𑀳𑀺𑀲𑁆𑀲𑀦𑁆𑀢𑀺, 𑀲𑀗𑁆𑀖𑀸𑀝𑀺𑀫𑁆𑀧𑀺 𑀑𑀢𑁆𑀣𑀭𑀺𑀢𑁆𑀯𑀸 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀪𑀢𑁆𑀢𑀕𑁆𑀕𑀁 𑀕𑀘𑁆𑀙𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫𑀧𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀺, 𑀣𑁂𑀭𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀦𑁆𑀢𑀺, 𑀦𑀯𑁂𑀧𑀺 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀦𑁆𑀢𑀺, 𑀲𑀗𑁆𑀖𑀸𑀝𑀺𑀫𑁆𑀧𑀺 𑀑𑀢𑁆𑀣𑀭𑀺𑀢𑁆𑀯𑀸 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁬𑁪. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀪𑀺𑀓𑁆𑀔𑀽𑀳𑀺 𑀪𑀢𑁆𑀢𑀕𑁆𑀕𑁂 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀲𑀘𑁂 𑀆𑀭𑀸𑀫𑁂 𑀓𑀸𑀮𑁄 𑀆𑀭𑁄𑀘𑀺𑀢𑁄 𑀳𑁄𑀢𑀺, 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀸𑀥𑀼𑀓𑀁 𑀅𑀢𑀭𑀫𑀸𑀦𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄.

‘‘𑀦 𑀯𑁄𑀓𑁆𑀓𑀫𑁆𑀫 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑀩𑁆𑀩𑀁. 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀲𑀼𑀲𑀁𑀯𑀼𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀓𑁆𑀔𑀺𑀢𑁆𑀢𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀚𑁆𑀚𑀕𑁆𑀖𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀅𑀧𑁆𑀧𑀲𑀤𑁆𑀤𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀓𑀸𑀬𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀩𑀸𑀳𑀼𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀲𑀻𑀲𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀔𑀫𑁆𑀪𑀓𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀑𑀕𑀼𑀡𑁆𑀞𑀺𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀓𑁆𑀓𑀼𑀝𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁.

‘‘𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀼𑀲𑀁𑀯𑀼𑀢𑁂𑀦 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀉𑀓𑁆𑀔𑀺𑀢𑁆𑀢𑀓𑀸𑀬 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁 𑀦 𑀉𑀚𑁆𑀚𑀕𑁆𑀖𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀅𑀧𑁆𑀧𑀲𑀤𑁆𑀤𑁂𑀦 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩. 𑀦 𑀓𑀸𑀬𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀩𑀸𑀳𑀼𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀲𑀻𑀲𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀔𑀫𑁆𑀪𑀓𑀢𑁂𑀦 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀑𑀕𑀼𑀡𑁆𑀞𑀺𑀢𑁂𑀦 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀧𑀮𑁆𑀮𑀢𑁆𑀣𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀦 𑀲𑀗𑁆𑀖𑀸𑀝𑀺𑀁 𑀑𑀢𑁆𑀣𑀭𑀺𑀢𑁆𑀯𑀸 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀢𑀩𑁆𑀩𑀁.

‘‘𑀉𑀤𑀓𑁂 𑀤𑀺𑀬𑁆𑀬𑀫𑀸𑀦𑁂 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀤𑀓𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀧𑀢𑁆𑀢𑁄 𑀥𑁄𑀯𑀺𑀢𑀩𑁆𑀩𑁄. 𑀲𑀘𑁂 𑀉𑀤𑀓𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀳𑁄𑀢𑀺, 𑀦𑀻𑀘𑀁 𑀓𑀢𑁆𑀯𑀸 𑀉𑀤𑀓𑀧𑁆𑀧𑀝𑀺𑀕𑁆𑀕𑀳𑁂 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁 𑁋 𑀫𑀸 𑀉𑀤𑀓𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀉𑀤𑀓𑁂𑀦 𑀑𑀲𑀺𑀜𑁆𑀘𑀺 [𑀑𑀲𑀺𑀜𑁆𑀘𑀺𑀬𑁆𑀬𑀻 (𑀓.)], 𑀫𑀸 𑀲𑀸𑀫𑀦𑁆𑀢𑀸 𑀪𑀺𑀓𑁆𑀔𑀽 𑀉𑀤𑀓𑁂𑀦 𑀑𑀲𑀺𑀜𑁆𑀘𑀺𑀁𑀲𑀼 [𑀑𑀲𑀺𑀜𑁆𑀘𑀺𑀬𑁆𑀬𑀺𑀁𑀲𑀼 (𑀓.)], 𑀫𑀸 𑀲𑀗𑁆𑀖𑀸𑀝𑀺 𑀉𑀤𑀓𑁂𑀦 𑀑𑀲𑀺𑀜𑁆𑀘𑀻𑀢𑀺. 𑀲𑀘𑁂 𑀉𑀤𑀓𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀦 𑀳𑁄𑀢𑀺, 𑀦𑀻𑀘𑀁 𑀓𑀢𑁆𑀯𑀸 𑀙𑀫𑀸𑀬 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁 𑁋 𑀫𑀸 𑀲𑀸𑀫𑀦𑁆𑀢𑀸 𑀪𑀺𑀓𑁆𑀔𑀽 𑀉𑀤𑀓𑁂𑀦 𑀑𑀲𑀺𑀜𑁆𑀘𑀺𑀁𑀲𑀼, 𑀫𑀸 𑀲𑀗𑁆𑀖𑀸𑀝𑀺 𑀉𑀤𑀓𑁂𑀦 𑀑𑀲𑀺𑀜𑁆𑀘𑀻𑀢𑀺.

‘‘𑀑𑀤𑀦𑁂 𑀤𑀺𑀬𑁆𑀬𑀫𑀸𑀦𑁂 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀑𑀤𑀦𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄, 𑀲𑀽𑀧𑀲𑁆𑀲 𑀑𑀓𑀸𑀲𑁄 𑀓𑀸𑀢𑀩𑁆𑀩𑁄. 𑀲𑀘𑁂 𑀳𑁄𑀢𑀺 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀉𑀢𑁆𑀢𑀭𑀺𑀪𑀗𑁆𑀕𑀁 𑀯𑀸, 𑀣𑁂𑀭𑁂𑀦 𑀯𑀢𑁆𑀢𑀩𑁆𑀩𑁄 𑁋 ‘𑀲𑀩𑁆𑀩𑁂𑀲𑀁 𑀲𑀫𑀓𑀁 𑀲𑀫𑁆𑀧𑀸𑀤𑁂𑀳𑀻’𑀢𑀺. 𑀲𑀓𑁆𑀓𑀘𑁆𑀘𑀁 𑀧𑀺𑀡𑁆𑀟𑀧𑀸𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄. 𑀧𑀢𑁆𑀢𑀲𑀜𑁆𑀜𑀺𑀦𑀸 𑀧𑀺𑀡𑁆𑀟𑀧𑀸𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄. 𑀲𑀫𑀲𑀽𑀧𑀓𑁄 𑀧𑀺𑀡𑁆𑀟𑀧𑀸𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄. 𑀲𑀫𑀢𑀺𑀢𑁆𑀢𑀺𑀓𑁄 𑀧𑀺𑀡𑁆𑀟𑀧𑀸𑀢𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄.

‘‘𑀦 𑀢𑀸𑀯 𑀣𑁂𑀭𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀁 𑀬𑀸𑀯 𑀦 𑀲𑀩𑁆𑀩𑁂𑀲𑀁 𑀑𑀤𑀦𑁄 𑀲𑀫𑁆𑀧𑀢𑁆𑀢𑁄 𑀳𑁄𑀢𑀺. 𑀲𑀓𑁆𑀓𑀘𑁆𑀘𑀁 𑀧𑀺𑀡𑁆𑀟𑀧𑀸𑀢𑁄 𑀪𑀼𑀜𑁆𑀚𑀺𑀢𑀩𑁆𑀩𑁄. 𑀧𑀢𑁆𑀢𑀲𑀜𑁆𑀜𑀺𑀦𑀸 𑀧𑀺𑀡𑁆𑀟𑀧𑀸𑀢𑁄 𑀪𑀼𑀜𑁆𑀚𑀺𑀢𑀩𑁆𑀩𑁄. 𑀲𑀧𑀤𑀸𑀦𑀁 𑀧𑀺𑀡𑁆𑀟𑀧𑀸𑀢𑁄 𑀪𑀼𑀜𑁆𑀚𑀺𑀢𑀩𑁆𑀩𑁄. 𑀲𑀫𑀲𑀽𑀧𑀓𑁄 𑀧𑀺𑀡𑁆𑀟𑀧𑀸𑀢𑁄 𑀪𑀼𑀜𑁆𑀚𑀺𑀢𑀩𑁆𑀩𑁄. 𑀦 𑀣𑀽𑀧𑀓𑀢𑁄 𑀑𑀫𑀤𑁆𑀤𑀺𑀢𑁆𑀯𑀸 𑀧𑀺𑀡𑁆𑀟𑀺𑀧𑀸𑀢𑁄 𑀪𑀼𑀜𑁆𑀚𑀺𑀢𑀩𑁆𑀩𑁄. 𑀦 𑀲𑀽𑀧𑀁 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸 𑀑𑀤𑀦𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁 𑀪𑀺𑀬𑁆𑀬𑁄𑀓𑀫𑁆𑀬𑀢𑀁 𑀉𑀧𑀸𑀤𑀸𑀬. 𑀦 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑀸 𑀧𑀭𑁂𑀲𑀁 𑀧𑀢𑁆𑀢𑁄 𑀑𑀮𑁄𑀓𑁂𑀢𑀩𑁆𑀩𑁄. 𑀦𑀸𑀢𑀺𑀫𑀳𑀦𑁆𑀢𑁄 𑀓𑀩𑀴𑁄 𑀓𑀸𑀢𑀩𑁆𑀩𑁄. 𑀧𑀭𑀺𑀫𑀡𑁆𑀟𑀮𑁄 𑀆𑀮𑁄𑀧𑁄 𑀓𑀸𑀢𑀩𑁆𑀩𑁄. 𑀦 𑀅𑀦𑀸𑀳𑀝𑁂 𑀓𑀩𑀴𑁂 𑀫𑀼𑀔𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑀩𑁆𑀩𑀁. 𑀦 𑀪𑀼𑀜𑁆𑀚𑀫𑀸𑀦𑁂𑀦 𑀲𑀩𑁆𑀩𑁄 𑀳𑀢𑁆𑀣𑁄 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀲𑀓𑀩𑀴𑁂𑀦 𑀫𑀼𑀔𑁂𑀦 𑀩𑁆𑀬𑀸𑀳𑀭𑀺𑀢𑀩𑁆𑀩𑀁. 𑀦 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀓𑀩𑀴𑀸𑀯𑀘𑁆𑀙𑁂𑀤𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀅𑀯𑀕𑀡𑁆𑀟𑀓𑀸𑀭𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀳𑀢𑁆𑀣𑀦𑀺𑀤𑁆𑀥𑀼𑀦𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀲𑀺𑀢𑁆𑀣𑀸𑀯𑀓𑀸𑀭𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀘𑀧𑀼𑀘𑀧𑀼𑀓𑀸𑀭𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀧𑀢𑁆𑀢𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦 𑀑𑀝𑁆𑀞𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀺𑀢𑀩𑁆𑀩𑀁.

‘‘𑀦 𑀲𑀸𑀫𑀺𑀲𑁂𑀦 𑀳𑀢𑁆𑀣𑁂𑀦 𑀧𑀸𑀦𑀻𑀬𑀣𑀸𑀮𑀓𑁄 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄. 𑀦 𑀢𑀸𑀯 𑀣𑁂𑀭𑁂𑀦 𑀉𑀤𑀓𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁 𑀬𑀸𑀯 𑀦 𑀲𑀩𑁆𑀩𑁂𑀯 𑀪𑀼𑀢𑁆𑀢𑀸𑀯𑀺𑀦𑁄 𑀳𑁄𑀦𑁆𑀢𑀺. 𑀉𑀤𑀓𑁂 𑀤𑀺𑀬𑁆𑀬𑀫𑀸𑀦𑁂 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀉𑀤𑀓𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀧𑀢𑁆𑀢𑁄 𑀥𑁄𑀯𑀺𑀢𑀩𑁆𑀩𑁄. 𑀲𑀘𑁂 𑀉𑀤𑀓𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀳𑁄𑀢𑀺, 𑀦𑀻𑀘𑀁 𑀓𑀢𑁆𑀯𑀸 𑀉𑀤𑀓𑀧𑁆𑀧𑀝𑀺𑀕𑁆𑀕𑀳𑁂 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁 𑁋 𑀫𑀸 𑀉𑀤𑀓𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀉𑀤𑀓𑁂𑀦 𑀑𑀲𑀺𑀜𑁆𑀘𑀺, 𑀫𑀸 𑀲𑀸𑀫𑀦𑁆𑀢𑀸 𑀪𑀺𑀓𑁆𑀔𑀽 𑀉𑀤𑀓𑁂𑀦 𑀑𑀲𑀺𑀜𑁆𑀘𑀺𑀁𑀲𑀼, 𑀫𑀸 𑀲𑀗𑁆𑀖𑀸𑀝𑀺 𑀉𑀤𑀓𑁂𑀦 𑀑𑀲𑀺𑀜𑁆𑀘𑀻𑀢𑀺. 𑀲𑀘𑁂 𑀉𑀤𑀓𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀦 𑀳𑁄𑀢𑀺, 𑀦𑀻𑀘𑀁 𑀓𑀢𑁆𑀯𑀸 𑀙𑀫𑀸𑀬 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁 𑁋 𑀫𑀸 𑀲𑀸𑀫𑀦𑁆𑀢𑀸 𑀪𑀺𑀓𑁆𑀔𑀽 𑀉𑀤𑀓𑁂𑀦 𑀑𑀲𑀺𑀜𑁆𑀘𑀺𑀁𑀲𑀼, 𑀫𑀸 𑀲𑀗𑁆𑀖𑀸𑀝𑀺 𑀉𑀤𑀓𑁂𑀦 𑀑𑀲𑀺𑀜𑁆𑀘𑀻𑀢𑀺. 𑀦 𑀲𑀲𑀺𑀢𑁆𑀣𑀓𑀁 𑀧𑀢𑁆𑀢𑀥𑁄𑀯𑀦𑀁 𑀅𑀦𑁆𑀢𑀭𑀖𑀭𑁂 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀦𑀺𑀯𑀢𑁆𑀢𑀦𑁆𑀢𑁂𑀦 𑀦𑀯𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀞𑀫𑀢𑀭𑀁 𑀦𑀺𑀯𑀢𑁆𑀢𑀺𑀢𑀩𑁆𑀩𑀁. 𑀧𑀘𑁆𑀙𑀸 𑀣𑁂𑀭𑁂𑀳𑀺 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀲𑀼𑀲𑀁𑀯𑀼𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀓𑁆𑀔𑀺𑀢𑁆𑀢𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀚𑁆𑀚𑀕𑁆𑀖𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀅𑀧𑁆𑀧𑀲𑀤𑁆𑀤𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀓𑀸𑀬𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀩𑀸𑀳𑀼𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀲𑀻𑀲𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀔𑀫𑁆𑀪𑀓𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀑𑀕𑀼𑀡𑁆𑀞𑀺𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀓𑁆𑀓𑀼𑀝𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑀁 𑀬𑀣𑀸 𑀪𑀺𑀓𑁆𑀔𑀽𑀳𑀺 𑀪𑀢𑁆𑀢𑀕𑁆𑀕𑁂 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.