𑁬. 𑀧𑀺𑀡𑁆𑀟𑀘𑀸𑀭𑀺𑀓𑀯𑀢𑁆𑀢𑀓𑀣𑀸

𑁩𑁬𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀺𑀡𑁆𑀟𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀧𑀺 𑀦𑀺𑀯𑁂𑀲𑀦𑀁 𑀧𑀯𑀺𑀲𑀦𑁆𑀢𑀺, 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀧𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀅𑀢𑀺𑀲𑀳𑀲𑀸𑀧𑀺 𑀧𑀯𑀺𑀲𑀦𑁆𑀢𑀺, 𑀅𑀢𑀺𑀲𑀳𑀲𑀸𑀧𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀅𑀢𑀺𑀤𑀽𑀭𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀅𑀘𑁆𑀘𑀸𑀲𑀦𑁆𑀦𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀅𑀢𑀺𑀘𑀺𑀭𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀅𑀢𑀺𑀮𑀳𑀼𑀫𑁆𑀧𑀺 𑀦𑀺𑀯𑀢𑁆𑀢𑀦𑁆𑀢𑀺. 𑀅𑀜𑁆𑀜𑀢𑀭𑁄𑀧𑀺 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀯𑁂𑀲𑀦𑀁 𑀧𑀸𑀯𑀺𑀲𑀺. 𑀲𑁄 𑀘 𑀤𑁆𑀯𑀸𑀭𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀢𑀭𑀁 𑀑𑀯𑀭𑀓𑀁 𑀧𑀸𑀯𑀺𑀲𑀺. 𑀢𑀲𑁆𑀫𑀺𑀫𑁆𑀧𑀺 𑀑𑀯𑀭𑀓𑁂 𑀇𑀢𑁆𑀣𑀻 𑀦𑀕𑁆𑀕𑀸 𑀉𑀢𑁆𑀢𑀸𑀦𑀸 𑀦𑀺𑀧𑀦𑁆𑀦𑀸 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀁 𑀇𑀢𑁆𑀣𑀺𑀁 𑀦𑀕𑁆𑀕𑀁 𑀉𑀢𑁆𑀢𑀸𑀦𑀁 𑀦𑀺𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑁋 ‘‘𑀦𑀬𑀺𑀤𑀁 𑀤𑁆𑀯𑀸𑀭𑀁, 𑀑𑀯𑀭𑀓𑀁 𑀇𑀤’’𑀦𑁆𑀢𑀺 𑀢𑀫𑁆𑀳𑀸 𑀑𑀯𑀭𑀓𑀸 𑀦𑀺𑀓𑁆𑀔𑀫𑀺. 𑀅𑀤𑁆𑀤𑀲𑀸 𑀔𑁄 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀸𑀫𑀺𑀓𑁄 𑀢𑀁 𑀇𑀢𑁆𑀣𑀺𑀁 𑀦𑀕𑁆𑀕𑀁 𑀉𑀢𑁆𑀢𑀸𑀦𑀁 𑀦𑀺𑀧𑀦𑁆𑀦𑀁. 𑀤𑀺𑀲𑁆𑀯𑀸𑀦 𑁋 ‘‘𑀇𑀫𑀺𑀦𑀸 𑀫𑁂 𑀪𑀺𑀓𑁆𑀔𑀼𑀦𑀸 𑀧𑀚𑀸𑀧𑀢𑀻 𑀤𑀽𑀲𑀺𑀢𑀸’’𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀆𑀓𑁄𑀝𑁂𑀲𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀢𑁂𑀦 𑀲𑀤𑁆𑀤𑁂𑀦 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀅𑀬𑁆𑀬, 𑀇𑀫𑀁 𑀪𑀺𑀓𑁆𑀔𑀼𑀁 𑀆𑀓𑁄𑀝𑁂𑀲𑀻’’𑀢𑀺? ‘‘𑀇𑀫𑀺𑀦𑀸𑀲𑀺 𑀢𑁆𑀯𑀁 𑀪𑀺𑀓𑁆𑀔𑀼𑀦𑀸 𑀤𑀽𑀲𑀺𑀢𑀸’’𑀢𑀺? ‘‘𑀦𑀸𑀳𑀁, 𑀅𑀬𑁆𑀬, 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀤𑀽𑀲𑀺𑀢𑀸; 𑀅𑀓𑀸𑀭𑀓𑁄 𑀲𑁄 𑀪𑀺𑀓𑁆𑀔𑀽’’𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀫𑀼𑀜𑁆𑀘𑀸𑀧𑁂𑀲𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀧𑀺𑀡𑁆𑀟𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀤𑀼𑀦𑁆𑀦𑀺𑀯𑀢𑁆𑀣𑀸 𑀤𑀼𑀧𑁆𑀧𑀸𑀭𑀼𑀢𑀸 𑀅𑀦𑀸𑀓𑀧𑁆𑀧𑀲𑀫𑁆𑀧𑀦𑁆𑀦𑀸 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀦𑁆𑀢𑀺, 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀧𑀺 𑀦𑀺𑀯𑁂𑀲𑀦𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀧𑀺 𑀦𑀺𑀓𑁆𑀔𑀫𑀺𑀲𑁆𑀲𑀦𑁆𑀢𑀺, 𑀅𑀢𑀺𑀲𑀳𑀲𑀸𑀧𑀺 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀅𑀢𑀺𑀲𑀳𑀲𑀸𑀧𑀺 𑀦𑀺𑀓𑁆𑀔𑀫𑀺𑀲𑁆𑀲𑀦𑁆𑀢𑀺, 𑀅𑀢𑀺𑀤𑀽𑀭𑁂𑀧𑀺 𑀢𑀺𑀝𑁆𑀞𑀺𑀲𑁆𑀲𑀦𑁆𑀢𑀺, 𑀅𑀘𑁆𑀘𑀸𑀲𑀦𑁆𑀦𑁂𑀧𑀺 𑀢𑀺𑀝𑁆𑀞𑀺𑀲𑁆𑀲𑀦𑁆𑀢𑀺, 𑀅𑀢𑀺𑀘𑀺𑀭𑀫𑁆𑀧𑀺 𑀢𑀺𑀝𑁆𑀞𑀺𑀲𑁆𑀲𑀦𑁆𑀢𑀺, 𑀅𑀢𑀺𑀮𑀳𑀼𑀫𑁆𑀧𑀺 𑀦𑀺𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁬𑁬. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀧𑀺𑀡𑁆𑀟𑀘𑀸𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀺 𑀬𑀣𑀸 𑀧𑀺𑀡𑁆𑀟𑀘𑀸𑀭𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀧𑀺𑀡𑁆𑀟𑀘𑀸𑀭𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑁋 ‘𑀇𑀤𑀸𑀦𑀺 𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’𑀢𑀺 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁂𑀦 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀧𑀸𑀭𑀼𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀸𑀥𑀼𑀓𑀁 𑀅𑀢𑀭𑀫𑀸𑀦𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄.

‘‘𑀦𑀺𑀯𑁂𑀲𑀦𑀁 𑀧𑀯𑀺𑀲𑀦𑁆𑀢𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁 𑁋 ‘𑀇𑀫𑀺𑀦𑀸 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀇𑀫𑀺𑀦𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’𑀢𑀺. 𑀦𑀸𑀢𑀺𑀲𑀳𑀲𑀸 𑀧𑀯𑀺𑀲𑀺𑀢𑀩𑁆𑀩𑀁. 𑀦𑀸𑀢𑀺𑀲𑀳𑀲𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁. 𑀦𑀸𑀢𑀺𑀤𑀽𑀭𑁂 𑀞𑀸𑀢𑀩𑁆𑀩𑀁. 𑀦𑀸𑀘𑁆𑀘𑀸𑀲𑀦𑁆𑀦𑁂 𑀞𑀸𑀢𑀩𑁆𑀩𑀁. 𑀦𑀸𑀢𑀺𑀘𑀺𑀭𑀁 𑀞𑀸𑀢𑀩𑁆𑀩𑀁. 𑀦𑀸𑀢𑀺𑀮𑀳𑀼𑀁 𑀦𑀺𑀯𑀢𑁆𑀢𑀺𑀢𑀩𑁆𑀩𑀁. 𑀞𑀺𑀢𑀓𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁 𑁋 ‘𑀪𑀺𑀓𑁆𑀔𑀁 𑀤𑀸𑀢𑀼𑀓𑀸𑀫𑀸 𑀯𑀸 𑀅𑀤𑀸𑀢𑀼𑀓𑀸𑀫𑀸 𑀯𑀸’𑀢𑀺. 𑀲𑀘𑁂 𑀓𑀫𑁆𑀫𑀁 𑀯𑀸 𑀦𑀺𑀓𑁆𑀔𑀺𑀧𑀢𑀺, 𑀆𑀲𑀦𑀸 𑀯𑀸 𑀯𑀼𑀝𑁆𑀞𑀸𑀢𑀺, 𑀓𑀝𑀘𑁆𑀙𑀼𑀁 𑀯𑀸 𑀧𑀭𑀸𑀫𑀲𑀢𑀺, 𑀪𑀸𑀚𑀦𑀁 𑀯𑀸 𑀧𑀭𑀸𑀫𑀲𑀢𑀺, 𑀞𑀧𑁂𑀢𑀺 [𑀞𑀸𑀧𑁂𑀢𑀺 (𑀓.)] 𑀯𑀸 𑁋 𑀤𑀸𑀢𑀼𑀓𑀸𑀫𑀲𑁆𑀲𑀸𑀢𑀺 [𑀤𑀸𑀢𑀼𑀓𑀸𑀫𑀺𑀬𑀸𑀢𑀺 (𑀲𑁆𑀬𑀸.), 𑀤𑀸𑀢𑀼𑀓𑀸𑀫𑀸 𑀯𑀺𑀬𑀸𑀢𑀺 (𑀲𑀻.)] 𑀞𑀸𑀢𑀩𑁆𑀩𑀁. 𑀪𑀺𑀓𑁆𑀔𑀸𑀬 𑀤𑀺𑀬𑁆𑀬𑀫𑀸𑀦𑀸𑀬 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀲𑀗𑁆𑀖𑀸𑀝𑀺𑀁 𑀉𑀘𑁆𑀘𑀸𑀭𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀧𑀡𑀸𑀫𑁂𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀦 𑀘 𑀪𑀺𑀓𑁆𑀔𑀸𑀤𑀸𑀬𑀺𑀓𑀸𑀬 𑀫𑀼𑀔𑀁 𑀉𑀮𑁆𑀮𑁄𑀓𑁂𑀢𑀩𑁆𑀩𑀁 [𑀑𑀮𑁄𑀓𑁂𑀢𑀩𑁆𑀩𑀁 (𑀲𑁆𑀬𑀸.)]. 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁 𑁋 ‘𑀲𑀽𑀧𑀁 𑀤𑀸𑀢𑀼𑀓𑀸𑀫𑀸 𑀯𑀸 𑀅𑀤𑀸𑀢𑀼𑀓𑀸𑀫𑀸 𑀯𑀸’𑀢𑀺. 𑀲𑀘𑁂 𑀓𑀝𑀘𑁆𑀙𑀼𑀁 𑀯𑀸 𑀧𑀭𑀸𑀫𑀲𑀢𑀺, 𑀪𑀸𑀚𑀦𑀁 𑀯𑀸 𑀧𑀭𑀸𑀫𑀲𑀢𑀺, 𑀞𑀧𑁂𑀢𑀺 𑀯𑀸 𑁋 𑀤𑀸𑀢𑀼𑀓𑀸𑀫𑀲𑁆𑀲𑀸𑀢𑀺 𑀞𑀸𑀢𑀩𑁆𑀩𑀁. 𑀪𑀺𑀓𑁆𑀔𑀸𑀬 𑀤𑀺𑀦𑁆𑀦𑀸𑀬 𑀲𑀗𑁆𑀖𑀸𑀝𑀺𑀬𑀸 𑀧𑀢𑁆𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀲𑀸𑀥𑀼𑀓𑀁 𑀅𑀢𑀭𑀫𑀸𑀦𑁂𑀦 𑀦𑀺𑀯𑀢𑁆𑀢𑀺𑀢𑀩𑁆𑀩𑀁.

‘‘𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀲𑀼𑀲𑀁𑀯𑀼𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀓𑁆𑀔𑀺𑀢𑁆𑀢𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀚𑁆𑀚𑀕𑁆𑀖𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀅𑀧𑁆𑀧𑀲𑀤𑁆𑀤𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀓𑀸𑀬𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀩𑀸𑀳𑀼𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀲𑀻𑀲𑀧𑁆𑀧𑀘𑀸𑀮𑀓𑀁 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀔𑀫𑁆𑀪𑀓𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀑𑀕𑀼𑀡𑁆𑀞𑀺𑀢𑁂𑀦 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀦 𑀉𑀓𑁆𑀓𑀼𑀝𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀦𑁆𑀢𑀩𑁆𑀩𑀁. 𑀬𑁄 𑀧𑀞𑀫𑀁 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀢𑁂𑀦 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀅𑀯𑀓𑁆𑀓𑀸𑀭𑀧𑀸𑀢𑀺 𑀥𑁄𑀯𑀺𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀬𑁄 𑀧𑀘𑁆𑀙𑀸 𑀕𑀸𑀫𑀢𑁄 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀺, 𑀲𑀘𑁂 𑀳𑁄𑀢𑀺 𑀪𑀼𑀢𑁆𑀢𑀸𑀯𑀲𑁂𑀲𑁄, 𑀲𑀘𑁂 𑀆𑀓𑀗𑁆𑀔𑀢𑀺, 𑀪𑀼𑀜𑁆𑀚𑀺𑀢𑀩𑁆𑀩𑀁. 𑀦𑁄 𑀘𑁂 𑀆𑀓𑀗𑁆𑀔𑀢𑀺, 𑀅𑀧𑁆𑀧𑀳𑀭𑀺𑀢𑁂 𑀯𑀸 𑀙𑀟𑁆𑀟𑁂𑀢𑀩𑁆𑀩𑀁, 𑀅𑀧𑁆𑀧𑀸𑀡𑀓𑁂 𑀯𑀸 𑀉𑀤𑀓𑁂 𑀑𑀧𑀺𑀮𑀸𑀧𑁂𑀢𑀩𑁆𑀩𑀁. 𑀢𑁂𑀦 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁, 𑀅𑀯𑀓𑁆𑀓𑀸𑀭𑀧𑀸𑀢𑀺 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀸, 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁, 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀬𑁄 𑀧𑀲𑁆𑀲𑀢𑀺 𑀧𑀸𑀦𑀻𑀬𑀖𑀝𑀁 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑀁 𑀯𑀸 𑀯𑀘𑁆𑀘𑀖𑀝𑀁 𑀯𑀸 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀢𑁂𑀦 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑀲𑁆𑀲 𑀳𑁄𑀢𑀺 𑀅𑀯𑀺𑀲𑀬𑁆𑀳𑀁, 𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁, 𑀦 𑀘 𑀢𑀧𑁆𑀧𑀘𑁆𑀘𑀬𑀸 𑀯𑀸𑀘𑀸 𑀪𑀺𑀦𑁆𑀤𑀺𑀢𑀩𑁆𑀩𑀸. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀺𑀡𑁆𑀟𑀘𑀸𑀭𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀬𑀣𑀸 𑀧𑀺𑀡𑁆𑀟𑀘𑀸𑀭𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.