𑁧𑁪. 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀓𑀣𑀸

𑁩𑁮𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀘𑀭𑀺𑀬𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀘𑀭𑀺𑀬𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁮𑁨. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀆𑀘𑀭𑀺𑀬𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. [𑀫𑀳𑀸𑀯. 𑁭𑁯] 𑀆𑀘𑀭𑀺𑀬𑁂𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋

‘‘𑀆𑀘𑀭𑀺𑀬𑁂𑀦, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀲𑀗𑁆𑀕𑀳𑁂𑀢𑀩𑁆𑀩𑁄 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄 𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀑𑀯𑀸𑀤𑁂𑀦 𑀅𑀦𑀼𑀲𑀸𑀲𑀦𑀺𑀬𑀸. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀧𑀢𑁆𑀢𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀢𑁆𑀢𑁄 𑀦 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀢𑁆𑀢𑁄 𑀤𑀸𑀢𑀩𑁆𑀩𑁄, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀢𑁆𑀢𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀘𑀻𑀯𑀭𑀁 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀦 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀤𑀸𑀢𑀩𑁆𑀩𑀁, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺. 𑀲𑀘𑁂 𑀆𑀘𑀭𑀺𑀬𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀦 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀤𑀸𑀢𑀩𑁆𑀩𑁄, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀺𑀬𑁂𑀣𑀸𑀢𑀺.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀤𑀦𑁆𑀢𑀓𑀝𑁆𑀞𑀁 𑀤𑀸𑀢𑀩𑁆𑀩𑀁, 𑀫𑀼𑀔𑁄𑀤𑀓𑀁 𑀤𑀸𑀢𑀩𑁆𑀩𑀁, 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀲𑀘𑁂 𑀬𑀸𑀕𑀼 𑀳𑁄𑀢𑀺, 𑀪𑀸𑀚𑀦𑀁 𑀥𑁄𑀯𑀺𑀢𑁆𑀯𑀸 𑀬𑀸𑀕𑀼 𑀉𑀧𑀦𑀸𑀫𑁂𑀢𑀩𑁆𑀩𑀸. 𑀬𑀸𑀕𑀼𑀁 𑀧𑀻𑀢𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀪𑀸𑀚𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀯𑀼𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑁄 𑀲𑁄𑀤𑀓𑁄 𑀤𑀸𑀢𑀩𑁆𑀩𑁄.

‘‘𑀏𑀢𑁆𑀢𑀸𑀯𑀢𑀸 𑀦𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀝𑀺𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀘𑀻𑀯𑀭𑀁 𑀲𑀺𑀦𑁆𑀦𑀁 𑀳𑁄𑀢𑀺, 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑀁, 𑀦 𑀘 𑀉𑀡𑁆𑀳𑁂 𑀘𑀻𑀯𑀭𑀁 𑀦𑀺𑀤𑀳𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁. 𑀘𑀻𑀯𑀭𑀁 𑀲𑀗𑁆𑀖𑀭𑀦𑁆𑀢𑁂𑀦 𑀘𑀢𑀼𑀭𑀗𑁆𑀕𑀼𑀮𑀁 𑀓𑀡𑁆𑀡𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀘𑀻𑀯𑀭𑀁 𑀲𑀗𑁆𑀖𑀭𑀺𑀢𑀩𑁆𑀩𑀁 𑁋 𑀫𑀸 𑀫𑀚𑁆𑀛𑁂 𑀪𑀗𑁆𑀕𑁄 𑀅𑀳𑁄𑀲𑀻𑀢𑀺. 𑀑𑀪𑁄𑀕𑁂 𑀓𑀸𑀬𑀩𑀦𑁆𑀥𑀦𑀁 𑀓𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀺𑀡𑁆𑀟𑀧𑀸𑀢𑁄 𑀳𑁄𑀢𑀺, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀘 𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀤𑀓𑀁 𑀤𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁄 𑀉𑀧𑀦𑀸𑀫𑁂𑀢𑀩𑁆𑀩𑁄. 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀪𑀼𑀢𑁆𑀢𑀸𑀯𑀺𑀲𑁆𑀲 𑀉𑀤𑀓𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀉𑀡𑁆𑀳𑁂 𑀑𑀢𑀸𑀧𑁂𑀢𑀩𑁆𑀩𑁄, 𑀦 𑀘 𑀉𑀡𑁆𑀳𑁂 𑀧𑀢𑁆𑀢𑁄 𑀦𑀺𑀤𑀳𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦…𑀧𑁂… 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦…𑀧𑁂… 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀳𑀺 𑀉𑀝𑁆𑀞𑀺𑀢𑁂 𑀆𑀲𑀦𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀧𑀝𑀺𑀲𑀸𑀫𑁂𑀢𑀩𑁆𑀩𑀁. 𑀲𑀘𑁂 𑀲𑁄 𑀤𑁂𑀲𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑁄 𑀤𑁂𑀲𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀳𑀸𑀦𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀲𑀻𑀢𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀲𑀻𑀢𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁. 𑀲𑀘𑁂 𑀉𑀡𑁆𑀳𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀉𑀡𑁆𑀳𑀁 𑀧𑀝𑀺𑀬𑀸𑀤𑁂𑀢𑀩𑁆𑀩𑀁.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀘𑀼𑀡𑁆𑀡𑀁 𑀲𑀦𑁆𑀦𑁂𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀢𑁂𑀫𑁂𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 [𑀆𑀤𑀸𑀬 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 (𑀓.)] 𑀕𑀦𑁆𑀢𑁆𑀯𑀸 𑀚𑀦𑁆𑀢𑀸𑀖𑀭𑀧𑀻𑀞𑀁 𑀤𑀢𑁆𑀯𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀘𑀼𑀡𑁆𑀡𑀁 𑀤𑀸𑀢𑀩𑁆𑀩𑀁, 𑀫𑀢𑁆𑀢𑀺𑀓𑀸 𑀤𑀸𑀢𑀩𑁆𑀩𑀸. 𑀲𑀘𑁂 𑀉𑀲𑁆𑀲𑀳𑀢𑀺 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀦𑁆𑀢𑁂𑀦 𑀫𑀢𑁆𑀢𑀺𑀓𑀸𑀬 𑀫𑀼𑀔𑀁 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀦 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀦 𑀦𑀯𑀸 𑀪𑀺𑀓𑁆𑀔𑀽 𑀆𑀲𑀦𑁂𑀦 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀚𑀦𑁆𑀢𑀸𑀖𑀭𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀦𑁆𑀢𑁂𑀦 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀚𑀦𑁆𑀢𑀸𑀖𑀭𑀸 𑀦𑀺𑀓𑁆𑀔𑀫𑀺𑀢𑀩𑁆𑀩𑀁.

‘‘𑀉𑀤𑀓𑁂𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀦𑀳𑀸𑀢𑁂𑀦 𑀧𑀞𑀫𑀢𑀭𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀢𑁆𑀢𑀁 𑀯𑁄𑀤𑀓𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀕𑀢𑁆𑀢𑀢𑁄 𑀉𑀤𑀓𑀁 𑀧𑀫𑀚𑁆𑀚𑀺𑀢𑀩𑁆𑀩𑀁, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀚𑀦𑁆𑀢𑀸𑀖𑀭𑀧𑀻𑀞𑀁 𑀆𑀤𑀸𑀬 𑀧𑀞𑀫𑀢𑀭𑀁 𑀆𑀕𑀦𑁆𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄.

‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀺𑀳𑀭𑀢𑀺, 𑀲𑀘𑁂 𑀲𑁄 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁…𑀧𑁂… 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀯𑀽𑀧𑀓𑀸𑀲𑁂𑀢𑀩𑁆𑀩𑁄, 𑀯𑀽𑀧𑀓𑀸𑀲𑀸𑀧𑁂𑀢𑀩𑁆𑀩𑁄, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀯𑀺𑀦𑁄𑀤𑁂𑀢𑀩𑁆𑀩𑀁, 𑀯𑀺𑀦𑁄𑀤𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀯𑀺𑀯𑁂𑀘𑁂𑀢𑀩𑁆𑀩𑀁, 𑀯𑀺𑀯𑁂𑀘𑀸𑀧𑁂𑀢𑀩𑁆𑀩𑀁, 𑀥𑀫𑁆𑀫𑀓𑀣𑀸 𑀯𑀸𑀲𑁆𑀲 𑀓𑀸𑀢𑀩𑁆𑀩𑀸. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀭𑀼𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄 𑀳𑁄𑀢𑀺, 𑀧𑀭𑀺𑀯𑀸𑀲𑀸𑀭𑀳𑁄, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀧𑀭𑀺𑀯𑀸𑀲𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀫𑀸𑀦𑀢𑁆𑀢𑀸𑀭𑀳𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀫𑀸𑀦𑀢𑁆𑀢𑀁 𑀤𑀤𑁂𑀬𑁆𑀬𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀅𑀩𑁆𑀪𑀸𑀦𑀸𑀭𑀳𑁄 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀅𑀩𑁆𑀪𑁂𑀬𑁆𑀬𑀸𑀢𑀺. 𑀲𑀘𑁂 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀲𑀗𑁆𑀖𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀫𑁆𑀫𑀁 𑀦 𑀓𑀭𑁂𑀬𑁆𑀬, 𑀮𑀳𑀼𑀓𑀸𑀬 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬𑀸𑀢𑀺. 𑀓𑀢𑀁 𑀯𑀸 𑀧𑀦𑀲𑁆𑀲 𑀳𑁄𑀢𑀺, 𑀲𑀗𑁆𑀖𑁂𑀦 𑀓𑀫𑁆𑀫𑀁, 𑀢𑀚𑁆𑀚𑀦𑀻𑀬𑀁 𑀯𑀸 𑀦𑀺𑀬𑀲𑁆𑀲𑀁 𑀯𑀸 𑀧𑀩𑁆𑀩𑀸𑀚𑀦𑀻𑀬𑀁 𑀯𑀸 𑀧𑀝𑀺𑀲𑀸𑀭𑀡𑀻𑀬𑀁 𑀯𑀸 𑀉𑀓𑁆𑀔𑁂𑀧𑀦𑀻𑀬𑀁 𑀯𑀸, 𑀆𑀘𑀭𑀺𑀬𑁂𑀦 𑀉𑀲𑁆𑀲𑀼𑀓𑁆𑀓𑀁 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀲𑀫𑁆𑀫𑀸 𑀯𑀢𑁆𑀢𑁂𑀬𑁆𑀬, 𑀮𑁄𑀫𑀁 𑀧𑀸𑀢𑁂𑀬𑁆𑀬, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑁂𑀬𑁆𑀬, 𑀲𑀗𑁆𑀖𑁄 𑀢𑀁 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺.

‘‘𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 𑀏𑀯𑀁 𑀥𑁄𑀯𑁂𑀬𑁆𑀬𑀸𑀲𑀻𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀥𑁄𑀯𑀺𑀬𑁂𑀣𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀓𑀸𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 𑀏𑀯𑀁 𑀓𑀭𑁂𑀬𑁆𑀬𑀸𑀲𑀻𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀓𑀭𑀺𑀬𑁂𑀣𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀭𑀚𑀦𑀁 𑀧𑀘𑀺𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 𑀏𑀯𑀁 𑀧𑀘𑁂𑀬𑁆𑀬𑀸𑀲𑀻𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀭𑀚𑀦𑀁 𑀧𑀘𑀺𑀬𑁂𑀣𑀸𑀢𑀺. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀭𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀆𑀘𑀭𑀺𑀬𑁂𑀦 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 𑀏𑀯𑀁 𑀭𑀚𑁂𑀬𑁆𑀬𑀸𑀲𑀻𑀢𑀺, 𑀉𑀲𑁆𑀲𑀼𑀓𑁆𑀓𑀁 𑀯𑀸 𑀓𑀸𑀢𑀩𑁆𑀩𑀁 𑁋 𑀓𑀺𑀦𑁆𑀢𑀺 𑀦𑀼 𑀔𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀘𑀻𑀯𑀭𑀁 𑀭𑀚𑀺𑀬𑁂𑀣𑀸𑀢𑀺. 𑀘𑀻𑀯𑀭𑀁 𑀭𑀚𑀦𑁆𑀢𑁂𑀦 𑀲𑀸𑀥𑀼𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀭𑀚𑀺𑀢𑀩𑁆𑀩𑀁. 𑀦 𑀘 𑀅𑀘𑁆𑀙𑀺𑀦𑁆𑀦𑁂 𑀣𑁂𑀯𑁂 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀲𑀘𑁂 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺, 𑀬𑀸𑀯𑀚𑀻𑀯𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀯𑀼𑀝𑁆𑀞𑀸𑀦𑀫𑀲𑁆𑀲 𑀆𑀕𑀫𑁂𑀢𑀩𑁆𑀩𑀁. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀬𑀣𑀸 𑀆𑀘𑀭𑀺𑀬𑁂𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.

𑀯𑀢𑁆𑀢𑀓𑁆𑀔𑀦𑁆𑀥𑀓𑁄 𑀅𑀝𑁆𑀞𑀫𑁄.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀏𑀓𑀽𑀦𑀯𑀻𑀲𑀢𑀺, 𑀯𑀢𑁆𑀢𑀸 𑀘𑀼𑀤𑁆𑀤𑀲.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀉𑀧𑀸𑀳𑀦𑀸 𑀙𑀢𑁆𑀢𑀸 𑀘, 𑀑𑀕𑀼𑀡𑁆𑀞𑀺 𑀲𑀻𑀲𑀁 𑀧𑀸𑀦𑀻𑀬𑀁;

𑀦𑀸𑀪𑀺𑀯𑀸𑀤𑁂 𑀦 𑀧𑀼𑀘𑁆𑀙𑀦𑁆𑀢𑀺, 𑀅𑀳𑀺 𑀉𑀚𑁆𑀛𑀦𑁆𑀢𑀺 𑀧𑁂𑀲𑀮𑀸.

𑀑𑀫𑀼𑀜𑁆𑀘𑀺 𑀙𑀢𑁆𑀢𑀁 𑀔𑀦𑁆𑀥𑁂 𑀘, 𑀅𑀢𑀭𑀜𑁆𑀘 𑀧𑀝𑀺𑀓𑁆𑀓𑀫𑀁;

𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀸, 𑀧𑀢𑀺𑀭𑀽𑀧𑀜𑁆𑀘 𑀧𑀼𑀘𑁆𑀙𑀺𑀢𑀸.

𑀆𑀲𑀺𑀜𑁆𑀘𑁂𑀬𑁆𑀬 𑀥𑁄𑀯𑀺𑀢𑁂𑀦, 𑀲𑀼𑀓𑁆𑀔𑁂𑀦𑀮𑁆𑀮𑁂𑀦𑀼𑀧𑀸𑀳𑀦𑀸;

𑀯𑀼𑀟𑁆𑀠𑁄 𑀦𑀯𑀓𑁄 𑀧𑀼𑀘𑁆𑀙𑁂𑀬𑁆𑀬, 𑀅𑀚𑁆𑀛𑀸𑀯𑀼𑀝𑁆𑀞𑀜𑁆𑀘 𑀕𑁄𑀘𑀭𑀸.

𑀲𑁂𑀓𑁆𑀔𑀸 𑀯𑀘𑁆𑀘𑀸 𑀧𑀸𑀦𑀻 𑀧𑀭𑀺, 𑀓𑀢𑁆𑀢𑀭𑀁 𑀓𑀢𑀺𑀓𑀁 𑀢𑀢𑁄;

𑀓𑀸𑀮𑀁 𑀫𑀼𑀳𑀼𑀢𑁆𑀢𑀁 𑀉𑀓𑁆𑀮𑀸𑀧𑁄, 𑀪𑀽𑀫𑀢𑁆𑀣𑀭𑀡𑀁 𑀦𑀻𑀳𑀭𑁂.

𑀧𑀝𑀺𑀧𑀸𑀤𑁄 𑀪𑀺𑀲𑀺𑀩𑀺𑀩𑁆𑀩𑁄, 𑀫𑀜𑁆𑀘𑀧𑀻𑀞𑀜𑁆𑀘 𑀫𑀮𑁆𑀮𑀓𑀁;

𑀅𑀧𑀲𑁆𑀲𑁂𑀦𑀼𑀮𑁆𑀮𑁄𑀓𑀓𑀡𑁆𑀡𑀸, 𑀕𑁂𑀭𑀼𑀓𑀸 𑀓𑀸𑀴 𑀅𑀓𑀢𑀸.

𑀲𑀗𑁆𑀓𑀸𑀭𑀜𑁆𑀘 𑀪𑀽𑀫𑀢𑁆𑀣𑀭𑀡𑀁, 𑀧𑀝𑀺𑀧𑀸𑀤𑀓𑀁 𑀫𑀜𑁆𑀘𑀧𑀻𑀞𑀁;

𑀪𑀺𑀲𑀺 𑀦𑀺𑀲𑀻𑀤𑀦𑀫𑁆𑀧𑀺, 𑀫𑀮𑁆𑀮𑀓𑀁 𑀅𑀧𑀲𑁆𑀲𑁂𑀦 𑀘.

𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺 𑀘, 𑀧𑀸𑀭𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁;

𑀧𑀼𑀭𑀢𑁆𑀣𑀺𑀫𑀸 𑀧𑀘𑁆𑀙𑀺𑀫𑀸 𑀘, 𑀉𑀢𑁆𑀢𑀭𑀸 𑀅𑀣 𑀤𑀓𑁆𑀔𑀺𑀡𑀸.

𑀲𑀻𑀢𑀼𑀡𑁆𑀳𑁂 𑀘 𑀤𑀺𑀯𑀸𑀭𑀢𑁆𑀢𑀺𑀁, 𑀧𑀭𑀺𑀯𑁂𑀡𑀜𑁆𑀘 𑀓𑁄𑀝𑁆𑀞𑀓𑁄;

𑀉𑀧𑀝𑁆𑀞𑀸𑀦𑀕𑁆𑀕𑀺 𑀲𑀸𑀮𑀸 𑀘, 𑀯𑀢𑁆𑀢𑀁 𑀯𑀘𑁆𑀘𑀓𑀼𑀝𑀻𑀲𑀼 𑀘.

𑀧𑀸𑀦𑀻 𑀧𑀭𑀺𑀪𑁄𑀚𑀦𑀺𑀬𑀸, 𑀓𑀼𑀫𑁆𑀪𑀺 𑀆𑀘𑀫𑀦𑁂𑀲𑀼 𑀘;

𑀅𑀦𑁄𑀧𑀫𑁂𑀦 𑀧𑀜𑁆𑀜𑀢𑁆𑀢𑀁, 𑀯𑀢𑁆𑀢𑀁 𑀆𑀕𑀦𑁆𑀢𑀼𑀓𑁂𑀳𑀺𑀫𑁂 [𑀯𑁂 (𑀓. 𑀏𑀯𑀫𑀼𑀧𑀭𑀺𑀧𑀺)].

𑀦𑁂𑀯𑀸𑀲𑀦𑀁 𑀦 𑀉𑀤𑀓𑀁, 𑀦 𑀧𑀘𑁆𑀘𑀼 𑀦 𑀘 𑀧𑀸𑀦𑀺𑀬𑀁;

𑀦𑀸𑀪𑀺𑀯𑀸𑀤𑁂 𑀦𑀧𑀜𑁆𑀜𑀧𑁂, 𑀉𑀚𑁆𑀛𑀸𑀬𑀦𑁆𑀢𑀺 𑀘 𑀧𑁂𑀲𑀮𑀸.

𑀯𑀼𑀟𑁆𑀠𑀸𑀲𑀦𑀜𑁆𑀘 𑀉𑀤𑀓𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀘 𑀧𑀸𑀦𑀺𑀬𑀁;

𑀉𑀧𑀸𑀳𑀦𑁂 𑀏𑀓𑀫𑀦𑁆𑀢𑀁, 𑀅𑀪𑀺𑀯𑀸𑀤𑁂 𑀘 𑀧𑀜𑁆𑀜𑀧𑁂.

𑀯𑀼𑀢𑁆𑀣𑀁 𑀕𑁄𑀘𑀭𑀲𑁂𑀓𑁆𑀔𑁄 𑀘, 𑀞𑀸𑀦𑀁 𑀧𑀸𑀦𑀺𑀬𑀪𑁄𑀚𑀦𑀁;

𑀓𑀢𑁆𑀢𑀭𑀁 𑀓𑀢𑀺𑀓𑀁 𑀓𑀸𑀮𑀁, 𑀦𑀯𑀓𑀲𑁆𑀲 𑀦𑀺𑀲𑀺𑀦𑁆𑀦𑀓𑁂.

𑀅𑀪𑀺𑀯𑀸𑀤𑀬𑁂 𑀆𑀘𑀺𑀓𑁆𑀔𑁂, 𑀬𑀣𑀸 𑀳𑁂𑀝𑁆𑀞𑀸 𑀢𑀣𑀸 𑀦𑀬𑁂;

𑀦𑀺𑀤𑁆𑀤𑀺𑀝𑁆𑀞𑀁 𑀲𑀢𑁆𑀣𑀯𑀸𑀳𑁂𑀦 𑀯𑀢𑁆𑀢𑀁 𑀆𑀯𑀸𑀲𑀺𑀓𑁂𑀳𑀺𑀫𑁂.

𑀕𑀫𑀺𑀓𑀸 𑀤𑀸𑀭𑀼𑀫𑀢𑁆𑀢𑀺 𑀘, 𑀯𑀺𑀯𑀭𑀺𑀢𑁆𑀯𑀸 𑀦 𑀧𑀼𑀘𑁆𑀙𑀺𑀬;

𑀦𑀲𑁆𑀲𑀦𑁆𑀢𑀺 𑀘 𑀅𑀕𑀼𑀢𑁆𑀢𑀜𑁆𑀘, 𑀉𑀚𑁆𑀛𑀸𑀬𑀦𑁆𑀢𑀺 𑀘 𑀧𑁂𑀲𑀮𑀸.

𑀧𑀝𑀺𑀲𑀸𑀫𑁂𑀢𑁆𑀯𑀸 𑀣𑀓𑁂𑀢𑁆𑀯𑀸, 𑀆𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀓𑁆𑀓𑀫𑁂;

𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸, 𑀆𑀭𑀸𑀫𑀺𑀓𑁄 𑀉𑀧𑀸𑀲𑀓𑁄.

𑀧𑀸𑀲𑀸𑀡𑀓𑁂𑀲𑀼 𑀘 𑀧𑀼𑀜𑁆𑀚𑀁, 𑀧𑀝𑀺𑀲𑀸𑀫𑁂 𑀣𑀓𑁂𑀬𑁆𑀬 𑀘;

𑀲𑀘𑁂 𑀉𑀲𑁆𑀲𑀳𑀢𑀺 𑀉𑀲𑁆𑀲𑀼𑀓𑁆𑀓𑀁, 𑀅𑀦𑁄𑀯𑀲𑁆𑀲𑁂 𑀢𑀣𑁂𑀯 𑀘.

𑀲𑀩𑁆𑀩𑁄 𑀑𑀯𑀲𑁆𑀲𑀢𑀺 𑀕𑀸𑀫𑀁, 𑀅𑀚𑁆𑀛𑁄𑀓𑀸𑀲𑁂 𑀢𑀣𑁂𑀯 𑀘;

𑀅𑀧𑁆𑀧𑁂𑀯𑀗𑁆𑀕𑀸𑀦𑀺 𑀲𑁂𑀲𑁂𑀬𑁆𑀬𑀼𑀁, 𑀯𑀢𑁆𑀢𑀁 𑀕𑀫𑀺𑀓𑀪𑀺𑀓𑁆𑀔𑀼𑀦𑀸.

𑀦𑀸𑀦𑀼𑀫𑁄𑀤𑀦𑁆𑀢𑀺 𑀣𑁂𑀭𑁂𑀦, 𑀑𑀳𑀸𑀬 𑀘𑀢𑀼𑀧𑀜𑁆𑀘𑀳𑀺;

𑀯𑀘𑁆𑀘𑀺𑀢𑁄 𑀫𑀼𑀘𑁆𑀙𑀺𑀢𑁄 𑀆𑀲𑀺, 𑀯𑀢𑁆𑀢𑀸𑀦𑀼𑀫𑁄𑀤𑀦𑁂𑀲𑀼𑀫𑁂.

𑀙𑀩𑁆𑀩𑀕𑁆𑀕𑀺𑀬𑀸 𑀤𑀼𑀦𑁆𑀦𑀺𑀯𑀢𑁆𑀣𑀸, 𑀅𑀣𑁄𑀧𑀺 𑀘 𑀤𑀼𑀧𑁆𑀧𑀸𑀭𑀼𑀢𑀸;

𑀅𑀦𑀸𑀓𑀧𑁆𑀧𑀸 𑀘 𑀯𑁄𑀓𑁆𑀓𑀫𑁆𑀫, 𑀣𑁂𑀭𑁂 𑀅𑀦𑀼𑀧𑀔𑀚𑁆𑀚𑀦𑁂.

𑀦𑀯𑁂 𑀪𑀺𑀓𑁆𑀔𑀽 𑀘 𑀲𑀗𑁆𑀖𑀸𑀝𑀺, 𑀉𑀚𑁆𑀛𑀸𑀬𑀦𑁆𑀢𑀺 𑀘 𑀧𑁂𑀲𑀮𑀸;

𑀢𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀓𑀸𑀬𑀲𑀕𑀼𑀡𑀕𑀡𑁆𑀞𑀺𑀓𑀸.

𑀦 𑀯𑁄𑀓𑁆𑀓𑀫𑁆𑀫 𑀧𑀝𑀺𑀘𑁆𑀙𑀦𑁆𑀦𑀁, 𑀲𑀼𑀲𑀁𑀯𑀼𑀢𑁄𑀓𑁆𑀔𑀺𑀢𑁆𑀢𑀘𑀓𑁆𑀔𑀼;

𑀉𑀓𑁆𑀔𑀺𑀢𑁆𑀢𑁄𑀚𑁆𑀚𑀕𑁆𑀖𑀺𑀓𑀸𑀲𑀤𑁆𑀤𑁄, 𑀢𑀬𑁄 𑀘𑁂𑀯 𑀧𑀘𑀸𑀮𑀦𑀸.

𑀔𑀫𑁆𑀪𑁄𑀕𑀼𑀡𑁆𑀞𑀺𑀉𑀓𑁆𑀓𑀼𑀝𑀺𑀓𑀸, 𑀧𑀝𑀺𑀘𑁆𑀙𑀦𑁆𑀦𑀁 𑀲𑀼𑀲𑀁𑀯𑀼𑀢𑁄;

𑀑𑀓𑁆𑀔𑀺𑀢𑁆𑀢𑀼𑀓𑁆𑀔𑀺𑀢𑁆𑀢𑀉𑀚𑁆𑀚𑀕𑁆𑀖𑀺, 𑀅𑀧𑁆𑀧𑀲𑀤𑁆𑀤𑁄 𑀢𑀬𑁄 𑀘𑀮𑀸.

𑀔𑀫𑁆𑀪𑁄𑀕𑀼𑀡𑁆𑀞𑀺𑀧𑀮𑁆𑀮𑀢𑁆𑀣𑀺 𑀘, 𑀅𑀦𑀼𑀧𑀔𑀚𑁆𑀚 𑀦𑀸𑀲𑀦𑁂;

𑀑𑀢𑁆𑀣𑀭𑀺𑀢𑁆𑀯𑀸𑀦 𑀉𑀤𑀓𑁂, 𑀦𑀻𑀘𑀁 𑀓𑀢𑁆𑀯𑀸𑀦 𑀲𑀺𑀜𑁆𑀘𑀺𑀬𑀸.

𑀧𑀝𑀺 𑀲𑀸𑀫𑀦𑁆𑀢𑀸 𑀲𑀗𑁆𑀖𑀸𑀝𑀺, 𑀑𑀤𑀦𑁂 𑀘 𑀧𑀝𑀺𑀕𑁆𑀕𑀳𑁂;

𑀲𑀽𑀧𑀁 𑀉𑀢𑁆𑀢𑀭𑀺𑀪𑀗𑁆𑀕𑁂𑀦, 𑀲𑀩𑁆𑀩𑁂𑀲𑀁 𑀲𑀫𑀢𑀺𑀢𑁆𑀣𑀺 𑀘.

𑀲𑀓𑁆𑀓𑀘𑁆𑀘𑀁 𑀧𑀢𑁆𑀢𑀲𑀜𑁆𑀜𑀻 𑀘, 𑀲𑀧𑀤𑀸𑀦𑀜𑁆𑀘 𑀲𑀽𑀧𑀓𑀁;

𑀦 𑀣𑀽𑀧𑀢𑁄 𑀧𑀝𑀺𑀘𑁆𑀙𑀸𑀤𑁂, 𑀯𑀺𑀜𑁆𑀜𑀢𑁆𑀢𑀼𑀚𑁆𑀛𑀸𑀦𑀲𑀜𑁆𑀜𑀺𑀦𑀸.

𑀫𑀳𑀦𑁆𑀢𑀫𑀡𑁆𑀟𑀮𑀤𑁆𑀯𑀸𑀭𑀁, 𑀲𑀩𑁆𑀩𑀳𑀢𑁆𑀣𑁄 𑀦 𑀩𑁆𑀬𑀸𑀳𑀭𑁂;

𑀉𑀓𑁆𑀔𑁂𑀧𑁄 𑀙𑁂𑀤𑀦𑀸𑀕𑀡𑁆𑀟, 𑀥𑀼𑀦𑀁 𑀲𑀺𑀢𑁆𑀣𑀸𑀯𑀓𑀸𑀭𑀓𑀁.

𑀚𑀺𑀯𑁆𑀳𑀸𑀦𑀺𑀘𑁆𑀙𑀸𑀭𑀓𑀜𑁆𑀘𑁂𑀯, 𑀘𑀧𑀼𑀘𑀧𑀼 𑀲𑀼𑀭𑀼𑀲𑀼𑀭𑀼;

𑀳𑀢𑁆𑀣𑀧𑀢𑁆𑀢𑁄𑀝𑁆𑀞𑀦𑀺𑀮𑁆𑀮𑁂𑀳𑀁, 𑀲𑀸𑀫𑀺𑀲𑁂𑀦 𑀧𑀝𑀺𑀕𑁆𑀕𑀳𑁂.

𑀬𑀸𑀯 𑀦 𑀲𑀩𑁆𑀩𑁂 𑀉𑀤𑀓𑁂, 𑀦𑀻𑀘𑀁 𑀓𑀢𑁆𑀯𑀸𑀦 𑀲𑀺𑀜𑁆𑀘𑀺𑀬𑀁;

𑀧𑀝𑀺 𑀲𑀸𑀫𑀦𑁆𑀢𑀸 𑀲𑀗𑁆𑀖𑀸𑀝𑀺, 𑀦𑀻𑀘𑀁 𑀓𑀢𑁆𑀯𑀸 𑀙𑀫𑀸𑀬 𑀘.

𑀲𑀲𑀺𑀢𑁆𑀣𑀓𑀁 𑀦𑀺𑀯𑀢𑁆𑀢𑀦𑁆𑀢𑁂, 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀼𑀓𑁆𑀓𑀼𑀝𑀺;

𑀥𑀫𑁆𑀫𑀭𑀸𑀚𑁂𑀦 𑀧𑀜𑁆𑀜𑀢𑁆𑀢𑀁, 𑀇𑀤𑀁 𑀪𑀢𑁆𑀢𑀕𑁆𑀕𑀯𑀢𑁆𑀢𑀦𑀁.

𑀤𑀼𑀦𑁆𑀦𑀺𑀯𑀢𑁆𑀣𑀸 𑀅𑀦𑀸𑀓𑀧𑁆𑀧𑀸, 𑀅𑀲𑀮𑁆𑀮𑁂𑀓𑁆𑀔𑁂𑀢𑁆𑀯𑀸 𑀘 𑀲𑀳𑀲𑀸;

𑀤𑀽𑀭𑁂 𑀅𑀘𑁆𑀘 𑀘𑀺𑀭𑀁 𑀮𑀳𑀼𑀁, 𑀢𑀣𑁂𑀯 𑀧𑀺𑀡𑁆𑀟𑀘𑀸𑀭𑀺𑀓𑁄.

𑀧𑀝𑀺𑀘𑁆𑀙𑀦𑁆𑀦𑁄𑀯 𑀕𑀘𑁆𑀙𑁂𑀬𑁆𑀬, 𑀲𑀼𑀁𑀲𑀯𑀼𑀢𑁄𑀓𑁆𑀔𑀺𑀢𑁆𑀢𑀘𑀓𑁆𑀔𑀼;

𑀉𑀓𑁆𑀔𑀺𑀢𑁆𑀢𑁄𑀚𑁆𑀚𑀕𑁆𑀖𑀺𑀓𑀸𑀲𑀤𑁆𑀤𑁄, 𑀢𑀬𑁄 𑀘𑁂𑀯 𑀧𑀘𑀸𑀮𑀦𑀸.

𑀔𑀫𑁆𑀪𑁄𑀕𑀼𑀡𑁆𑀞𑀺𑀉𑀓𑁆𑀓𑀼𑀝𑀺𑀓𑀸, 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘 𑀲𑀳𑀲𑀸;

𑀤𑀽𑀭𑁂 𑀅𑀘𑁆𑀘 𑀘𑀺𑀭𑀁 𑀮𑀳𑀼𑀁, 𑀆𑀲𑀦𑀓𑀁 𑀓𑀝𑀘𑁆𑀙𑀼𑀓𑀸.

𑀪𑀸𑀚𑀦𑀁 𑀯𑀸 𑀞𑀧𑁂𑀢𑀺 𑀘, 𑀉𑀘𑁆𑀘𑀸𑀭𑁂𑀢𑁆𑀯𑀸 𑀧𑀡𑀸𑀫𑁂𑀢𑁆𑀯𑀸;

𑀧𑀝𑀺𑀕𑁆𑀕𑀳𑁂 𑀦 𑀉𑀮𑁆𑀮𑁄𑀓𑁂, 𑀲𑀽𑀧𑁂𑀲𑀼𑀧𑀺 𑀢𑀣𑁂𑀯 𑀢𑀁.

𑀪𑀺𑀓𑁆𑀔𑀼 𑀲𑀗𑁆𑀖𑀸𑀝𑀺𑀬𑀸 𑀙𑀸𑀤𑁂, 𑀧𑀝𑀺𑀘𑁆𑀙𑀦𑁆𑀦𑁂𑀯 𑀕𑀘𑁆𑀙𑀺𑀬𑀁;

𑀲𑀁𑀯𑀼𑀢𑁄𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀘, 𑀉𑀓𑁆𑀔𑀺𑀢𑁆𑀢𑁄𑀚𑁆𑀚𑀕𑁆𑀖𑀺𑀓𑀸𑀬 𑀘;

𑀅𑀧𑁆𑀧𑀲𑀤𑁆𑀤𑁄 𑀢𑀬𑁄 𑀘𑀸𑀮𑀸, 𑀔𑀫𑁆𑀪𑁄𑀕𑀼𑀡𑁆𑀞𑀺𑀓𑀉𑀓𑁆𑀓𑀼𑀝𑀺.

𑀧𑀞𑀫𑀸𑀲𑀦𑀯𑀓𑁆𑀓𑀸𑀭, 𑀧𑀸𑀦𑀺𑀬𑀁 𑀧𑀭𑀺𑀪𑁄𑀚𑀦𑀻;

𑀧𑀘𑁆𑀙𑀸𑀓𑀗𑁆𑀔𑀢𑀺 𑀪𑀼𑀜𑁆𑀚𑁂𑀬𑁆𑀬, 𑀑𑀧𑀺𑀮𑀸𑀧𑁂𑀬𑁆𑀬 𑀉𑀤𑁆𑀥𑀭𑁂.

𑀧𑀝𑀺𑀲𑀸𑀫𑁂𑀬𑁆𑀬 𑀲𑀫𑁆𑀫𑀚𑁆𑀚𑁂, 𑀭𑀺𑀢𑁆𑀢𑀁 𑀢𑀼𑀘𑁆𑀙𑀁 𑀉𑀧𑀝𑁆𑀞𑀧𑁂;

𑀳𑀢𑁆𑀣𑀯𑀺𑀓𑀸𑀭𑁂 𑀪𑀺𑀦𑁆𑀤𑁂𑀬𑁆𑀬, 𑀯𑀢𑁆𑀢𑀺𑀤𑀁 𑀧𑀺𑀡𑁆𑀟𑀘𑀸𑀭𑀺𑀓𑁂.

𑀧𑀸𑀦𑀻 𑀧𑀭𑀺 𑀅𑀕𑁆𑀕𑀺𑀭𑀡𑀺, 𑀦𑀓𑁆𑀔𑀢𑁆𑀢𑀤𑀺𑀲𑀘𑁄𑀭𑀸 𑀘;

𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀓𑁄𑀝𑁆𑀝𑁂𑀢𑁆𑀯𑀸, 𑀧𑀢𑁆𑀢𑀁𑀲𑁂 𑀘𑀻𑀯𑀭𑀁 𑀢𑀢𑁄.

𑀇𑀤𑀸𑀦𑀺 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸, 𑀢𑀺𑀫𑀡𑁆𑀟𑀮𑀁 𑀧𑀭𑀺𑀫𑀡𑁆𑀟𑀮𑀁;

𑀬𑀣𑀸 𑀧𑀺𑀡𑁆𑀟𑀘𑀸𑀭𑀺𑀯𑀢𑁆𑀢𑀁, 𑀦𑀬𑁂 𑀆𑀭𑀜𑁆𑀜𑀓𑁂𑀲𑀼𑀧𑀺.

𑀧𑀢𑁆𑀢𑀁𑀲𑁂 𑀘𑀻𑀯𑀭𑀁 𑀲𑀻𑀲𑁂, 𑀆𑀭𑁄𑀳𑀺𑀢𑁆𑀯𑀸 𑀘 𑀧𑀸𑀦𑀺𑀬𑀁;

𑀧𑀭𑀺𑀪𑁄𑀚𑀦𑀺𑀬𑀁 𑀅𑀕𑁆𑀕𑀺, 𑀅𑀭𑀡𑀻 𑀘𑀸𑀧𑀺 𑀓𑀢𑁆𑀢𑀭𑀁.

𑀦𑀓𑁆𑀔𑀢𑁆𑀢𑀁 𑀲𑀧𑁆𑀧𑀤𑁂𑀲𑀁 𑀯𑀸, 𑀤𑀺𑀲𑀸𑀧𑀺 𑀓𑀼𑀲𑀮𑁄 𑀪𑀯𑁂;

𑀲𑀢𑁆𑀢𑀼𑀢𑁆𑀢𑀫𑁂𑀦 𑀧𑀜𑁆𑀜𑀢𑁆𑀢𑀁, 𑀯𑀢𑁆𑀢𑀁 𑀆𑀭𑀜𑁆𑀜𑀓𑁂𑀲𑀼𑀫𑁂.

𑀅𑀚𑁆𑀛𑁄𑀓𑀸𑀲𑁂 𑀑𑀓𑀺𑀭𑀺𑀁𑀲𑀼, 𑀉𑀚𑁆𑀛𑀸𑀬𑀦𑁆𑀢𑀺 𑀘 𑀧𑁂𑀲𑀮𑀸;

𑀲𑀘𑁂 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄, 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁.

𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀫𑀜𑁆𑀘𑀁, 𑀧𑀻𑀞𑀜𑁆𑀘 𑀔𑁂𑀴𑀫𑀮𑁆𑀮𑀓𑀁;

𑀅𑀧𑀲𑁆𑀲𑁂𑀦𑀼𑀮𑁆𑀮𑁄𑀓𑀓𑀡𑁆𑀡𑀸, 𑀕𑁂𑀭𑀼𑀓𑀸 𑀓𑀸𑀴 𑀅𑀓𑀢𑀸.

𑀲𑀗𑁆𑀓𑀸𑀭𑀁 𑀪𑀺𑀓𑁆𑀔𑀼𑀲𑀸𑀫𑀦𑁆𑀢𑀸, 𑀲𑁂𑀦𑀸𑀯𑀺𑀳𑀸𑀭𑀧𑀸𑀦𑀺𑀬𑀁;

𑀧𑀭𑀺𑀪𑁄𑀚𑀦𑀲𑀸𑀫𑀦𑁆𑀢𑀸, 𑀧𑀝𑀺𑀯𑀸𑀢𑁂 𑀘 𑀅𑀗𑁆𑀕𑀡𑁂.

𑀅𑀥𑁄𑀯𑀸𑀢𑁂 𑀅𑀢𑁆𑀣𑀭𑀡𑀁, 𑀧𑀝𑀺𑀧𑀸𑀤𑀓𑀫𑀜𑁆𑀘𑁄 𑀘;

𑀧𑀻𑀞𑀁 𑀪𑀺𑀲𑀺 𑀦𑀺𑀲𑀻𑀤𑀦𑀁, 𑀫𑀮𑁆𑀮𑀓𑀁 𑀅𑀧𑀲𑁆𑀲𑁂𑀦 𑀘.

𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺 𑀘, 𑀧𑀸𑀭𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁;

𑀧𑀼𑀭𑀢𑁆𑀣𑀺𑀫𑀸 𑀘 𑀧𑀘𑁆𑀙𑀺𑀫𑀸, 𑀉𑀢𑁆𑀢𑀭𑀸 𑀅𑀣 𑀤𑀓𑁆𑀔𑀺𑀡𑀸.

𑀲𑀻𑀢𑀼𑀡𑁆𑀳𑁂 𑀘 𑀤𑀺𑀯𑀸 𑀭𑀢𑁆𑀢𑀺𑀁, 𑀧𑀭𑀺𑀯𑁂𑀡𑀜𑁆𑀘 𑀓𑁄𑀝𑁆𑀞𑀓𑁄;

𑀉𑀧𑀝𑁆𑀞𑀸𑀦𑀕𑁆𑀕𑀺𑀲𑀸𑀮𑀸 𑀘, 𑀯𑀘𑁆𑀘𑀓𑀼𑀝𑀻 𑀘 𑀧𑀸𑀦𑀺𑀬𑀁.

𑀆𑀘𑀫𑀦𑀓𑀼𑀫𑁆𑀪𑀺 𑀯𑀼𑀟𑁆𑀠𑁂 𑀘, 𑀉𑀤𑁆𑀤𑁂𑀲𑀧𑀼𑀘𑁆𑀙𑀦𑀸 𑀲𑀚𑁆𑀛𑀸;

𑀥𑀫𑁆𑀫𑁄 𑀧𑀤𑀻𑀧𑀁 𑀯𑀺𑀚𑁆𑀛𑀸𑀧𑁂, 𑀦 𑀯𑀺𑀯𑀭𑁂 𑀦𑀧𑀺 𑀣𑀓𑁂.

𑀬𑁂𑀦 𑀯𑀼𑀟𑁆𑀠𑁄 𑀧𑀭𑀺𑀯𑀢𑁆𑀢𑀺, 𑀓𑀡𑁆𑀡𑁂𑀦𑀧𑀺 𑀦 𑀖𑀝𑁆𑀝𑀬𑁂;

𑀧𑀜𑁆𑀜𑀧𑁂𑀲𑀺 𑀫𑀳𑀸𑀯𑀻𑀭𑁄, 𑀯𑀢𑁆𑀢𑀁 𑀲𑁂𑀦𑀸𑀲𑀦𑁂𑀲𑀼 𑀢𑀁.

𑀦𑀺𑀯𑀸𑀭𑀺𑀬𑀫𑀸𑀦𑀸 𑀤𑁆𑀯𑀸𑀭𑀁, 𑀫𑀼𑀘𑁆𑀙𑀺𑀢𑀼𑀚𑁆𑀛𑀦𑁆𑀢𑀺 𑀧𑁂𑀲𑀮𑀸;

𑀙𑀸𑀭𑀺𑀓𑀁 𑀙𑀟𑁆𑀟𑀬𑁂 𑀚𑀦𑁆𑀢𑀸, 𑀧𑀭𑀺𑀪𑀡𑁆𑀟𑀁 𑀢𑀣𑁂𑀯 𑀘.

𑀧𑀭𑀺𑀯𑁂𑀡𑀁 𑀓𑁄𑀝𑁆𑀞𑀓𑁄 𑀲𑀸𑀮𑀸, 𑀘𑀼𑀡𑁆𑀡𑀫𑀢𑁆𑀢𑀺𑀓𑀤𑁄𑀡𑀺𑀓𑀸;

𑀫𑀼𑀔𑀁 𑀧𑀼𑀭𑀢𑁄 𑀦 𑀣𑁂𑀭𑁂, 𑀦 𑀦𑀯𑁂 𑀉𑀲𑁆𑀲𑀳𑀢𑀺 𑀲𑀘𑁂.

𑀧𑀼𑀭𑀢𑁄 𑀉𑀧𑀭𑀺𑀫𑀕𑁆𑀕𑁄, 𑀘𑀺𑀓𑁆𑀔𑀮𑁆𑀮𑀁 𑀫𑀢𑁆𑀢𑀺 𑀧𑀻𑀞𑀓𑀁;

𑀯𑀺𑀚𑁆𑀛𑀸𑀧𑁂𑀢𑁆𑀯𑀸 𑀣𑀓𑁂𑀢𑁆𑀯𑀸 𑀘, 𑀯𑀢𑁆𑀢𑀁 𑀚𑀦𑁆𑀢𑀸𑀖𑀭𑁂𑀲𑀼𑀫𑁂.

𑀦𑀸𑀘𑀫𑁂𑀢𑀺 𑀬𑀣𑀸𑀯𑀼𑀟𑁆𑀠𑀁, 𑀧𑀝𑀺𑀧𑀸𑀝𑀺 𑀘 𑀲𑀳𑀲𑀸;

𑀉𑀩𑁆𑀪𑀚𑀺 𑀦𑀺𑀢𑁆𑀣𑀼𑀦𑁄 𑀓𑀝𑁆𑀞𑀁, 𑀯𑀘𑁆𑀘𑀁 𑀧𑀲𑁆𑀲𑀸𑀯 𑀔𑁂𑀴𑀓𑀁.

𑀨𑀭𑀼𑀲𑀸 𑀓𑀽𑀧 𑀲𑀳𑀲𑀸, 𑀉𑀩𑁆𑀪𑀚𑀺 𑀘𑀧𑀼 𑀲𑁂𑀲𑁂𑀦;

𑀩𑀳𑀺 𑀅𑀦𑁆𑀢𑁄 𑀘 𑀉𑀓𑁆𑀓𑀸𑀲𑁂, 𑀭𑀚𑁆𑀚𑀼 𑀅𑀢𑀭𑀫𑀸𑀦𑀜𑁆𑀘.

𑀲𑀳𑀲𑀸 𑀉𑀩𑁆𑀪𑀚𑀺 𑀞𑀺𑀢𑁂, 𑀦𑀺𑀢𑁆𑀣𑀼𑀦𑁂 𑀓𑀝𑁆𑀞 𑀯𑀘𑁆𑀘𑀜𑁆𑀘;

𑀧𑀲𑁆𑀲𑀸𑀯 𑀔𑁂𑀴 𑀨𑀭𑀼𑀲𑀸, 𑀓𑀽𑀧𑀜𑁆𑀘 𑀯𑀘𑁆𑀘𑀧𑀸𑀤𑀼𑀓𑁂.

𑀦𑀸𑀢𑀺𑀲𑀳𑀲𑀸 𑀉𑀩𑁆𑀪𑀚𑀺, 𑀧𑀸𑀤𑀼𑀓𑀸𑀬 𑀘𑀧𑀼𑀘𑀧𑀼;

𑀦 𑀲𑁂𑀲𑀬𑁂 𑀧𑀝𑀺𑀘𑁆𑀙𑀸𑀤𑁂, 𑀉𑀳𑀢𑀧𑀺𑀥𑀭𑁂𑀦 𑀘.

𑀯𑀘𑁆𑀘𑀓𑀼𑀝𑀻 𑀧𑀭𑀺𑀪𑀡𑁆𑀟𑀁, 𑀧𑀭𑀺𑀯𑁂𑀡𑀜𑁆𑀘 𑀓𑁄𑀝𑁆𑀞𑀓𑁄;

𑀆𑀘𑀫𑀦𑁂 𑀘 𑀉𑀤𑀓𑀁, 𑀯𑀢𑁆𑀢𑀁 𑀯𑀘𑁆𑀘𑀓𑀼𑀝𑀻𑀲𑀼𑀫𑁂.

𑀉𑀧𑀸𑀳𑀦𑀸 𑀤𑀦𑁆𑀢𑀓𑀝𑁆𑀞𑀁, 𑀫𑀼𑀔𑁄𑀤𑀓𑀜𑁆𑀘 𑀆𑀲𑀦𑀁;

𑀬𑀸𑀕𑀼 𑀉𑀤𑀓𑀁 𑀥𑁄𑀯𑀺𑀢𑁆𑀯𑀸, 𑀉𑀤𑁆𑀥𑀸𑀭𑀼𑀓𑁆𑀮𑀸𑀧 𑀕𑀸𑀫 𑀘.

𑀦𑀺𑀯𑀸𑀲𑀦𑀸 𑀓𑀸𑀬𑀩𑀦𑁆𑀥𑀸, 𑀲𑀕𑀼𑀡𑀁 𑀧𑀢𑁆𑀢𑀲𑁄𑀤𑀓𑀁;

𑀧𑀘𑁆𑀙𑀸 𑀢𑀺𑀫𑀡𑁆𑀟𑀮𑁄 𑀘𑁂𑀯, 𑀧𑀭𑀺𑀫𑀡𑁆𑀟𑀮 𑀩𑀦𑁆𑀥𑀦𑀁.

𑀲𑀕𑀼𑀡𑀁 𑀥𑁄𑀯𑀺𑀢𑁆𑀯𑀸 𑀧𑀘𑁆𑀙𑀸, 𑀦𑀸𑀢𑀺𑀤𑀽𑀭𑁂 𑀧𑀝𑀺𑀕𑁆𑀕𑀳𑁂;

𑀪𑀡𑀫𑀸𑀦𑀲𑁆𑀲 𑀆𑀧𑀢𑁆𑀢𑀺, 𑀧𑀞𑀫𑀸𑀕𑀦𑁆𑀢𑁆𑀯𑀸𑀦 𑀆𑀲𑀦𑀁.

𑀉𑀤𑀓𑀁 𑀧𑀻𑀞𑀓𑀣𑀮𑀺, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀦𑀺𑀯𑀸𑀲𑀦𑀁;

𑀑𑀢𑀸𑀧𑁂 𑀦𑀺𑀤𑀳𑀺 𑀪𑀗𑁆𑀕𑁄, 𑀑𑀪𑁄𑀕𑁂 𑀪𑀼𑀜𑁆𑀚𑀺𑀢𑀼 𑀦𑀫𑁂.

𑀧𑀸𑀦𑀻𑀬𑀁 𑀉𑀤𑀓𑀁 𑀦𑀻𑀘𑀁, 𑀫𑀼𑀳𑀼𑀢𑁆𑀢𑀁 𑀦 𑀘 𑀦𑀺𑀤𑀳𑁂;

𑀧𑀢𑁆𑀢𑀘𑀻𑀯𑀭𑀁 𑀪𑀽𑀫𑀺 𑀘, 𑀧𑀸𑀭𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁.

𑀉𑀤𑁆𑀥𑀭𑁂 𑀧𑀝𑀺𑀲𑀸𑀫𑁂 𑀘, 𑀉𑀓𑁆𑀮𑀸𑀧𑁄 𑀘 𑀦𑀳𑀸𑀬𑀺𑀢𑀼𑀁;

𑀲𑀻𑀢𑀁 𑀉𑀡𑁆𑀳𑀁 𑀚𑀦𑁆𑀢𑀸𑀖𑀭𑀁, 𑀘𑀼𑀡𑁆𑀡𑀁 𑀫𑀢𑁆𑀢𑀺𑀓 𑀧𑀺𑀝𑁆𑀞𑀺𑀢𑁄.

𑀧𑀻𑀞𑀜𑁆𑀘 𑀘𑀻𑀯𑀭𑀁 𑀘𑀼𑀡𑁆𑀡𑀁, 𑀫𑀢𑁆𑀢𑀺𑀓𑀼𑀲𑁆𑀲𑀳𑀢𑀺 𑀫𑀼𑀔𑀁;

𑀧𑀼𑀭𑀢𑁄 𑀣𑁂𑀭𑁂 𑀦𑀯𑁂 𑀘, 𑀧𑀭𑀺𑀓𑀫𑁆𑀫𑀜𑁆𑀘 𑀦𑀺𑀓𑁆𑀔𑀫𑁂.

𑀧𑀼𑀭𑀢𑁄 𑀉𑀤𑀓𑁂 𑀦𑁆𑀳𑀸𑀢𑁂, 𑀦𑀺𑀯𑀸𑀲𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀁;

𑀦𑀺𑀯𑀸𑀲𑀦𑀜𑁆𑀘 𑀲𑀗𑁆𑀖𑀸𑀝𑀺, 𑀧𑀻𑀞𑀓𑀁 𑀆𑀲𑀦𑁂𑀦 𑀘.

𑀧𑀸𑀤𑁄 𑀧𑀻𑀞𑀁 𑀓𑀣𑀮𑀺𑀜𑁆𑀘, 𑀧𑀸𑀦𑀻𑀬𑀼𑀤𑁆𑀤𑁂𑀲𑀧𑀼𑀘𑁆𑀙𑀦𑀸;

𑀉𑀓𑁆𑀮𑀸𑀧𑀁 𑀲𑀼𑀲𑁄𑀥𑁂𑀬𑁆𑀬, 𑀧𑀞𑀫𑀁 𑀧𑀢𑁆𑀢𑀘𑀻𑀯𑀭𑀁.

𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁, 𑀪𑀺𑀲𑀺 𑀩𑀺𑀩𑁆𑀩𑁄𑀳𑀦𑀸𑀦𑀺 𑀘;

𑀫𑀜𑁆𑀘𑁄 𑀧𑀻𑀞𑀁 𑀧𑀝𑀺𑀧𑀸𑀤𑀁, 𑀫𑀮𑁆𑀮𑀓𑀁 𑀅𑀧𑀲𑁆𑀲𑁂𑀦 𑀘.