𑁯. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀁

𑁧. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀸

𑁩𑁮𑁩. [𑀉𑀤𑀸. 𑁪𑁫; 𑀅. 𑀦𑀺. 𑁮.𑁨𑁦] 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼 𑀧𑀸𑀲𑀸𑀤𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀢𑀤𑀳𑀼𑀧𑁄𑀲𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑁂 𑀧𑀞𑀫𑁂 𑀬𑀸𑀫𑁂 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑁂 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀫𑀚𑁆𑀛𑀺𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀦𑀺𑀓𑁆𑀔𑀦𑁆𑀢𑁂 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀉𑀤𑁆𑀥𑀲𑁆𑀢𑁂 𑀅𑀭𑀼𑀡𑁂 𑀦𑀦𑁆𑀤𑀺𑀫𑀼𑀔𑀺𑀬𑀸 𑀭𑀢𑁆𑀢𑀺𑀬𑀸 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀘𑁆𑀙𑀺𑀫𑁄 𑀬𑀸𑀫𑁄, 𑀉𑀤𑁆𑀥𑀲𑁆𑀢𑀁 𑀅𑀭𑀼𑀡𑀁 𑀦𑀦𑁆𑀤𑀺𑀫𑀼𑀔𑀺 𑀭𑀢𑁆𑀢𑀺, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺. ‘‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀁 𑀦𑀼 𑀔𑁄 𑀪𑀕𑀯𑀸 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳 𑁋 ‘𑀅𑀧𑀭𑀺𑀲𑀼𑀤𑁆𑀥𑀸, 𑀆𑀦𑀦𑁆𑀤, 𑀧𑀭𑀺𑀲𑀸’’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀩𑁆𑀩𑀸𑀯𑀦𑁆𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀫𑀦𑀲𑀸𑀓𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀤𑀼𑀲𑁆𑀲𑀻𑀮𑀁 𑀧𑀸𑀧𑀥𑀫𑁆𑀫𑀁 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑀁 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑀁 𑀅𑀲𑁆𑀲𑀫𑀡𑀁 𑀲𑀫𑀡𑀧𑀝𑀺𑀜𑁆𑀜𑀁 𑀅𑀩𑁆𑀭𑀳𑁆𑀫𑀘𑀸𑀭𑀺𑀁 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑀁 𑀅𑀦𑁆𑀢𑁄𑀧𑀽𑀢𑀺𑀁 𑀅𑀯𑀲𑁆𑀲𑀼𑀢𑀁 𑀓𑀲𑀫𑁆𑀩𑀼𑀚𑀸𑀢𑀁 [𑀓𑀲𑀫𑁆𑀩𑀼𑀓𑀚𑀸𑀢𑀁 (𑀓.)] 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀬𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀤𑀯𑁄𑀘 𑁋 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄, 𑀤𑀺𑀝𑁆𑀞𑁄𑀲𑀺 𑀪𑀕𑀯𑀢𑀸; 𑀦𑀢𑁆𑀣𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀧𑀼𑀕𑁆𑀕𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀤𑀯𑁄𑀘 𑁋 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄, 𑀤𑀺𑀝𑁆𑀞𑁄𑀲𑀺 𑀪𑀕𑀯𑀢𑀸; 𑀦𑀢𑁆𑀣𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀼𑀕𑁆𑀕𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀏𑀢𑀤𑀯𑁄𑀘 𑁋 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄, 𑀤𑀺𑀝𑁆𑀞𑁄𑀲𑀺 𑀪𑀕𑀯𑀢𑀸; 𑀦𑀢𑁆𑀣𑀺 𑀢𑁂 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑁄’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀧𑀼𑀕𑁆𑀕𑀮𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀁 𑀧𑀼𑀕𑁆𑀕𑀮𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀦𑀺𑀓𑁆𑀔𑀸𑀫𑁂𑀢𑁆𑀯𑀸 𑀲𑀽𑀘𑀺𑀖𑀝𑀺𑀓𑀁 𑀤𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀺𑀓𑁆𑀔𑀸𑀫𑀺𑀢𑁄 𑀲𑁄, 𑀪𑀦𑁆𑀢𑁂, 𑀧𑀼𑀕𑁆𑀕𑀮𑁄 𑀫𑀬𑀸; 𑀲𑀼𑀤𑁆𑀥𑀸 𑀧𑀭𑀺𑀲𑀸; 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀅𑀩𑁆𑀪𑀼𑀢𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀆𑀕𑀫𑁂𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁨. 𑀫𑀳𑀸𑀲𑀫𑀼𑀤𑁆𑀤𑁂𑀅𑀝𑁆𑀞𑀘𑁆𑀙𑀭𑀺𑀬𑀁

𑁩𑁮𑁪. [𑀉𑀤𑀸. 𑁪𑁫; 𑀅. 𑀦𑀺. 𑁮.𑁧𑁯] ‘‘𑀅𑀝𑁆𑀞𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞?

‘‘𑀫𑀳𑀸𑀲𑀫𑀼𑀤𑁆𑀤𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺 𑁋 𑀅𑀬𑀁 [𑀅𑀬𑀫𑁆𑀧𑀺 (𑀲𑁆𑀬𑀸.)], 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀦 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀁𑀯𑀲𑀢𑀺. 𑀬𑀁 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀢𑀁 𑀓𑀼𑀡𑀧𑀁, 𑀢𑀁 𑀔𑀺𑀧𑁆𑀧𑀜𑁆𑀜𑁂𑀯 𑀢𑀻𑀭𑀁 𑀯𑀸𑀳𑁂𑀢𑀺, 𑀣𑀮𑀁 𑀉𑀲𑁆𑀲𑀸𑀭𑁂𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀦 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀁𑀯𑀲𑀢𑀺, 𑀬𑀁 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀢𑀁 𑀓𑀼𑀡𑀧𑀁, 𑀢𑀁 𑀔𑀺𑀧𑁆𑀧𑀜𑁆𑀜𑁂𑀯 𑀢𑀻𑀭𑀁 𑀯𑀸𑀳𑁂𑀢𑀺, 𑀣𑀮𑀁 𑀉𑀲𑁆𑀲𑀸𑀭𑁂𑀢𑀺 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀸 𑀓𑀸𑀘𑀺 𑀫𑀳𑀸𑀦𑀤𑀺𑀬𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻, 𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀢𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, 𑀫𑀳𑀸𑀲𑀫𑀼𑀤𑁆𑀤𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀓𑀸𑀘𑀺 𑀫𑀳𑀸𑀦𑀤𑀺𑀬𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻, 𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀢𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, 𑀫𑀳𑀸𑀲𑀫𑀼𑀤𑁆𑀤𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀬𑀸 𑀘 [𑀬𑀸𑀓𑀸𑀘𑀺 (𑀲𑁆𑀬𑀸.)] 𑀮𑁄𑀓𑁂 𑀲𑀯𑀦𑁆𑀢𑀺𑀬𑁄 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑁆𑀧𑁂𑀦𑁆𑀢𑀺, 𑀬𑀸 𑀘 𑀅𑀦𑁆𑀢𑀮𑀺𑀓𑁆𑀔𑀸 𑀥𑀸𑀭𑀸 𑀧𑀧𑀢𑀦𑁆𑀢𑀺, 𑀦 𑀢𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑀸 𑀘 𑀮𑁄𑀓𑁂 𑀲𑀯𑀦𑁆𑀢𑀺𑀬𑁄 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑁆𑀧𑁂𑀦𑁆𑀢𑀺, 𑀬𑀸 𑀘 𑀅𑀦𑁆𑀢𑀮𑀺𑀓𑁆𑀔𑀸 𑀥𑀸𑀭𑀸 𑀧𑀧𑀢𑀦𑁆𑀢𑀺, 𑀦 𑀢𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀧𑀜𑁆𑀘𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀙𑀝𑁆𑀞𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀩𑀳𑀼𑀭𑀢𑀦𑁄 [𑀩𑀳𑀽𑀢𑀭𑀢𑀦𑁄 (𑀓.)] 𑀅𑀦𑁂𑀓𑀭𑀢𑀦𑁄. 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀼𑀢𑁆𑀢𑀸, 𑀫𑀡𑀺, 𑀯𑁂𑀴𑀼𑀭𑀺𑀬𑁄, 𑀲𑀗𑁆𑀔𑁄, 𑀲𑀺𑀮𑀸, 𑀧𑀯𑀸𑀴𑀁, 𑀭𑀚𑀢𑀁, 𑀚𑀸𑀢𑀭𑀽𑀧𑀁, 𑀮𑁄𑀳𑀺𑀢𑀓𑁄, 𑀫𑀲𑀸𑀭𑀕𑀮𑁆𑀮𑀁. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄, 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀼𑀢𑁆𑀢𑀸, 𑀫𑀡𑀺, 𑀯𑁂𑀴𑀼𑀭𑀺𑀬𑁄, 𑀲𑀗𑁆𑀔𑁄, 𑀲𑀺𑀮𑀸, 𑀧𑀯𑀸𑀴𑀁, 𑀭𑀚𑀢𑀁, 𑀚𑀸𑀢𑀭𑀽𑀧𑀁, 𑀮𑁄𑀳𑀺𑀢𑀓𑁄, 𑀫𑀲𑀸𑀭𑀕𑀮𑁆𑀮𑀁 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀲𑀢𑁆𑀢𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄. 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀢𑀺𑀫𑀺, 𑀢𑀺𑀫𑀺𑀗𑁆𑀕𑀮𑁄, 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄 [𑀢𑀺𑀫𑀺𑀭𑀧𑀺𑀗𑁆𑀕𑀮𑁄 (𑀲𑀻.), 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄 𑀫𑀳𑀸𑀢𑀺𑀫𑀺𑀗𑁆𑀕𑀮𑁄 (𑀲𑁆𑀬𑀸. 𑀓𑀁.)], 𑀅𑀲𑀼𑀭𑀸, 𑀦𑀸𑀕𑀸, 𑀕𑀦𑁆𑀥𑀩𑁆𑀩𑀸. 𑀲𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀢𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀘𑀢𑀼𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄, 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀢𑀺𑀫𑀺, 𑀢𑀺𑀫𑀺𑀗𑁆𑀕𑀮𑁄, 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄, 𑀅𑀲𑀼𑀭𑀸, 𑀦𑀸𑀕𑀸, 𑀕𑀦𑁆𑀥𑀩𑁆𑀩𑀸; 𑀲𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂, 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸…𑀧𑁂… 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀅𑀝𑁆𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫𑀦𑁆𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑁂 𑀅𑀪𑀺𑀭𑀫’’𑀦𑁆𑀢𑀺.

𑁩. 𑀇𑀫𑀲𑁆𑀫𑀺𑀁𑀥𑀫𑁆𑀫𑀯𑀺𑀦𑀬𑁂𑀅𑀝𑁆𑀞𑀘𑁆𑀙𑀭𑀺𑀬𑀁

𑁩𑁮𑁫. ‘‘𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞?

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸 𑀦 𑀆𑀬𑀢𑀓𑁂𑀦𑁂𑀯 𑀅𑀜𑁆𑀜𑀸𑀧𑀝𑀺𑀯𑁂𑀥𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸 𑀦 𑀆𑀬𑀢𑀓𑁂𑀦𑁂𑀯 𑀅𑀜𑁆𑀜𑀸𑀧𑀝𑀺𑀯𑁂𑀥𑁄 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀫𑀬𑀸 𑀫𑀫 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀺 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀤𑀼𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀦 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀁𑀯𑀲𑀢𑀺, 𑀬𑀁 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀫𑀢𑀁 𑀓𑀼𑀡𑀧𑀁 𑀢𑀁 𑀔𑀺𑀧𑁆𑀧𑀫𑁂𑀯 𑀢𑀻𑀭𑀁 𑀯𑀸𑀳𑁂𑀢𑀺, 𑀣𑀮𑀁 𑀉𑀲𑁆𑀲𑀸𑀭𑁂𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁄 𑀲𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄 𑀓𑀲𑀫𑁆𑀩𑀼𑀚𑀸𑀢𑁄, 𑀦 𑀢𑁂𑀦 𑀲𑀗𑁆𑀖𑁄 𑀲𑀁𑀯𑀲𑀢𑀺, 𑀔𑀺𑀧𑁆𑀧𑀫𑁂𑀯 𑀦𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀓𑀺𑀜𑁆𑀘𑀸𑀧𑀺 𑀔𑁄 𑀲𑁄 𑀳𑁄𑀢𑀺 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑁄. 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀗𑁆𑀖𑀫𑁆𑀳𑀸, 𑀲𑀗𑁆𑀖𑁄 𑀘 𑀢𑁂𑀦. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀬𑁄 𑀲𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀅𑀲𑀼𑀘𑀺𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄 𑀧𑀝𑀺𑀘𑁆𑀙𑀦𑁆𑀦𑀓𑀫𑁆𑀫𑀦𑁆𑀢𑁄 𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄 𑀅𑀦𑁆𑀢𑁄𑀧𑀽𑀢𑀺 𑀅𑀯𑀲𑁆𑀲𑀼𑀢𑁄 𑀓𑀲𑀫𑁆𑀩𑀼𑀚𑀸𑀢𑁄, 𑀦 𑀢𑁂𑀦 𑀲𑀗𑁆𑀖𑁄 𑀲𑀁𑀯𑀲𑀢𑀺, 𑀔𑀺𑀧𑁆𑀧𑀫𑁂𑀯 𑀦𑀁 𑀲𑀦𑁆𑀦𑀺𑀧𑀽𑀢𑀺𑀢𑁆𑀯𑀸 𑀉𑀓𑁆𑀔𑀺𑀧𑀢𑀺, 𑀓𑀺𑀜𑁆𑀘𑀸𑀧𑀺 𑀔𑁄 𑀲𑁄 𑀳𑁄𑀢𑀺 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀺𑀦𑁆𑀦𑁄, 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀗𑁆𑀖𑀫𑁆𑀳𑀸, 𑀲𑀗𑁆𑀖𑁄 𑀘 𑀢𑁂𑀦 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀢𑀢𑀺𑀬𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸 𑀓𑀸𑀘𑀺 𑀫𑀳𑀸𑀦𑀤𑀺𑀬𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀕𑀗𑁆𑀕𑀸, 𑀬𑀫𑀼𑀦𑀸, 𑀅𑀘𑀺𑀭𑀯𑀢𑀻, 𑀲𑀭𑀪𑀽, 𑀫𑀳𑀻, 𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀢𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, 𑀫𑀳𑀸𑀲𑀫𑀼𑀤𑁆𑀤𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄𑀫𑁂 𑀯𑀡𑁆𑀡𑀸 𑁋 𑀔𑀢𑁆𑀢𑀺𑀬𑀸, 𑀩𑁆𑀭𑀸𑀳𑁆𑀫𑀡𑀸, 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸. 𑀢𑁂 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 [𑀧𑀩𑁆𑀩𑀚𑀺𑀢𑀸 (𑀲𑀻.)] 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄𑀫𑁂 𑀯𑀡𑁆𑀡𑀸 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸, 𑀢𑁂 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀚𑀳𑀦𑁆𑀢𑀺 𑀧𑀼𑀭𑀺𑀫𑀸𑀦𑀺 𑀦𑀸𑀫𑀕𑁄𑀢𑁆𑀢𑀸𑀦𑀺, 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀘𑀢𑀼𑀢𑁆𑀣𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸 𑀘 𑀮𑁄𑀓𑁂 𑀲𑀯𑀦𑁆𑀢𑀺𑀬𑁄 𑀫𑀳𑀸𑀲𑀫𑀼𑀤𑁆𑀤𑀁 𑀅𑀧𑁆𑀧𑁂𑀦𑁆𑀢𑀺, 𑀬𑀸 𑀘 𑀅𑀦𑁆𑀢𑀮𑀺𑀓𑁆𑀔𑀸 𑀥𑀸𑀭𑀸 𑀧𑀧𑀢𑀦𑁆𑀢𑀺, 𑀦 𑀢𑁂𑀦 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀩𑀳𑀽 𑀘𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀦 𑀢𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀩𑀳𑀽 𑀘𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀦 𑀢𑁂𑀦 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀜𑁆𑀘𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀏𑀓𑀭𑀲𑁄 𑀮𑁄𑀡𑀭𑀲𑁄, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀏𑀓𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀏𑀓𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀙𑀝𑁆𑀞𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄, 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀼𑀢𑁆𑀢𑀸, 𑀫𑀡𑀺, 𑀯𑁂𑀴𑀼𑀭𑀺𑀬𑁄, 𑀲𑀗𑁆𑀔𑁄, 𑀲𑀺𑀮𑀸, 𑀧𑀯𑀸𑀴𑀁, 𑀭𑀚𑀢𑀁, 𑀚𑀸𑀢𑀭𑀽𑀧𑀁, 𑀮𑁄𑀳𑀺𑀢𑀓𑁄, 𑀫𑀲𑀸𑀭𑀕𑀮𑁆𑀮𑀁; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄. 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀩𑀳𑀼𑀭𑀢𑀦𑁄 𑀅𑀦𑁂𑀓𑀭𑀢𑀦𑁄, 𑀢𑀢𑁆𑀭𑀺𑀫𑀸𑀦𑀺 𑀭𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀢𑁆𑀢𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄, 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀢𑀺𑀫𑀺, 𑀢𑀺𑀫𑀺𑀗𑁆𑀕𑀮𑁄, 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑁄, 𑀅𑀲𑀼𑀭𑀸, 𑀦𑀸𑀕𑀸, 𑀕𑀦𑁆𑀥𑀩𑁆𑀩𑀸, 𑀲𑀦𑁆𑀢𑀺 𑀫𑀳𑀸𑀲𑀫𑀼𑀤𑁆𑀤𑁂 𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀢𑀺𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀘𑀢𑀼𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸, 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀸𑀧𑀺 𑀅𑀢𑁆𑀢𑀪𑀸𑀯𑀸; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄. 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄; 𑀲𑀓𑀤𑀸𑀕𑀸𑀫𑀻, 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄; 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄; 𑀅𑀭𑀳𑀸, 𑀅𑀭𑀳𑀢𑁆𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄. 𑀬𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀫𑀳𑀢𑀁 𑀪𑀽𑀢𑀸𑀦𑀁 𑀆𑀯𑀸𑀲𑁄, 𑀢𑀢𑁆𑀭𑀺𑀫𑁂 𑀪𑀽𑀢𑀸 𑁋 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄…𑀧𑁂… 𑀅𑀭𑀳𑀸, 𑀅𑀭𑀳𑀢𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞𑀫𑁄 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄, 𑀬𑀁 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀺. ‘‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸, 𑀬𑁂 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀪𑀺𑀭𑀫𑀦𑁆𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀉𑀤𑀸. 𑁪𑁫] ‘‘𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺 [𑀲𑀼𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺 (𑀓.)], 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀻’’𑀢𑀺.

𑁪. 𑀧𑀸𑀢𑀺𑀫𑁄𑀓𑁆𑀔𑀲𑀯𑀦𑀸𑀭𑀳𑁄

𑁩𑁮𑁬. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀲𑁆𑀲𑀸𑀫𑀺. 𑀢𑀼𑀫𑁆𑀳𑁂𑀯𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬𑀸𑀣, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣. 𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀢𑀣𑀸𑀕𑀢𑁄 𑀅𑀧𑀭𑀺𑀲𑀼𑀤𑁆𑀥𑀸𑀬 𑀧𑀭𑀺𑀲𑀸𑀬 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬. 𑀦 𑀘, 𑀪𑀺𑀓𑁆𑀔𑀯𑁂 [𑀦 𑀘 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀸 (𑀲𑁆𑀬𑀸. 𑀓𑀁.)], 𑀲𑀸𑀧𑀢𑁆𑀢𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩𑀁. 𑀬𑁄 𑀲𑀼𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑁄 𑀲𑀸𑀧𑀢𑁆𑀢𑀺𑀓𑁄 𑀧𑀸𑀢𑀺𑀫𑁄𑀓𑁆𑀔𑀁 𑀲𑀼𑀡𑀸𑀢𑀺, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑀩𑁆𑀩𑀁. 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑀺𑀢𑀩𑁆𑀩𑀁 𑁋

‘𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀲𑀸𑀧𑀢𑁆𑀢𑀺𑀓𑁄, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’𑀦𑁆𑀢𑀺 𑀞𑀧𑀺𑀢𑀁 𑀳𑁄𑀢𑀺 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘𑀦𑀸𑀫𑁆𑀳𑁂 𑀓𑁄𑀘𑀺 𑀚𑀸𑀦𑀸𑀢𑀻’𑀢𑀺 𑀲𑀸𑀧𑀢𑁆𑀢𑀺𑀓𑀸𑀯 𑀧𑀸𑀢𑀺𑀫𑁄𑀓𑁆𑀔𑀁 𑀲𑀼𑀡𑀦𑁆𑀢𑀺. 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀦𑁆𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘, 𑀆𑀯𑀼𑀲𑁄, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘𑀦𑀸𑀫𑁆𑀳𑁂 𑀓𑁄𑀘𑀺 𑀚𑀸𑀦𑀸𑀢𑀻’𑀢𑀺 𑀲𑀸𑀧𑀢𑁆𑀢𑀺𑀓𑀸𑀯 𑀧𑀸𑀢𑀺𑀫𑁄𑀓𑁆𑀔𑀁 𑀲𑀼𑀡𑀦𑁆𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑁋 ‘‘𑀣𑁂𑀭𑀸 𑀓𑀺𑀭 𑀪𑀺𑀓𑁆𑀔𑀽 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄 𑀅𑀫𑁆𑀳𑁂 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀦𑁆𑀢𑀺 𑁋 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘, 𑀆𑀯𑀼𑀲𑁄, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘𑀦𑀸𑀫𑁆𑀳𑁂 𑀓𑁄𑀘𑀺 𑀚𑀸𑀦𑀸𑀢𑀻’𑀢𑀺 𑀲𑀸𑀧𑀢𑁆𑀢𑀺𑀓𑀸𑀯 𑀧𑀸𑀢𑀺𑀫𑁄𑀓𑁆𑀔𑀁 𑀲𑀼𑀡𑀦𑁆𑀢𑀻’’𑀢𑀺.

𑀢𑁂 𑁋 𑀧𑀼𑀭𑀫𑁆𑀳𑀸𑀓𑀁 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀦𑁆𑀢𑀻𑀢𑀺 𑁋 𑀧𑀝𑀺𑀓𑀘𑁆𑀘𑁂𑀯 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀲𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀧𑀢𑁆𑀢𑀺𑀓𑀸𑀦𑀁 𑀅𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀸𑀭𑀡𑁂 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀩𑁆𑀩𑀁. 𑀬𑁄 𑀞𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲’’.

𑁫. 𑀥𑀫𑁆𑀫𑀺𑀓𑀸𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁

𑁩𑁮𑁭. ‘‘𑀏𑀓𑀁, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁, 𑀏𑀓𑀁 𑀥𑀫𑁆𑀫𑀺𑀓𑀁; 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁 [𑀏𑀓𑀁 𑀥𑀫𑁆𑀫𑀺𑀓𑀁 (𑀲𑀻. 𑀲𑁆𑀬𑀸.)], 𑀤𑁆𑀯𑁂 𑀅𑀥𑀫𑁆𑀫𑀺𑀓𑀸𑀦𑀺; 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀤𑁆𑀯𑁂 𑀥𑀫𑁆𑀫𑀺𑀓𑀸𑀦𑀺; 𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀘𑀢𑁆𑀢𑀸𑀭𑀺 𑀥𑀫𑁆𑀫𑀺𑀓𑀸𑀦𑀺; 𑀧𑀜𑁆𑀘 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀧𑀜𑁆𑀘 𑀥𑀫𑁆𑀫𑀺𑀓𑀸𑀦𑀺; 𑀙 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀙 𑀥𑀫𑁆𑀫𑀺𑀓𑀸𑀦𑀺; 𑀲𑀢𑁆𑀢 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀲𑀢𑁆𑀢 𑀥𑀫𑁆𑀫𑀺𑀓𑀸𑀦𑀺; 𑀅𑀝𑁆𑀞 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀅𑀝𑁆𑀞 𑀥𑀫𑁆𑀫𑀺𑀓𑀸𑀦𑀺; 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀦𑀯 𑀥𑀫𑁆𑀫𑀺𑀓𑀸𑀦𑀺; 𑀤𑀲 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀤𑀲 𑀥𑀫𑁆𑀫𑀺𑀓𑀸𑀦𑀺.

‘‘𑀓𑀢𑀫𑀁 𑀏𑀓𑀁 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁? 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀤𑀁 𑀏𑀓𑀁 𑀅𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁. 𑀓𑀢𑀫𑀁 𑀏𑀓𑀁 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁? 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀤𑀁 𑀏𑀓𑀁 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

‘‘𑀓𑀢𑀫𑀸𑀦𑀺 𑀤𑁆𑀯𑁂 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀤𑁆𑀯𑁂 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀤𑁆𑀯𑁂 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀤𑁆𑀯𑁂 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀺𑀓𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀺𑀓𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀺𑀓𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀺𑀓𑀸𑀬 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀺𑀓𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀺𑀓𑀸𑀬 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀧𑀜𑁆𑀘 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦…𑀧𑁂… 𑀅𑀫𑀽𑀮𑀓𑁂𑀦 𑀧𑀸𑀘𑀺𑀢𑁆𑀢𑀺𑀬𑁂𑀦… 𑀅𑀫𑀽𑀮𑀓𑁂𑀦 𑀧𑀸𑀝𑀺𑀤𑁂𑀲𑀦𑀻𑀬𑁂𑀦… 𑀅𑀫𑀽𑀮𑀓𑁂𑀦 𑀤𑀼𑀓𑁆𑀓𑀝𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀧𑀜𑁆𑀘 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦…𑀧𑁂… 𑀧𑀸𑀘𑀺𑀢𑁆𑀢𑀺𑀬𑁂𑀦… 𑀧𑀸𑀝𑀺𑀤𑁂𑀲𑀦𑀻𑀬𑁂𑀦… 𑀤𑀼𑀓𑁆𑀓𑀝𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀧𑀜𑁆𑀘 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀙 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬; 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬; 𑀅𑀫𑀽𑀮𑀺𑀓𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀅𑀫𑀽𑀮𑀺𑀓𑀸𑀬 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬 𑁋 𑀇𑀫𑀸𑀦𑀺 𑀙 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀙 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬; 𑀲𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸…𑀧𑁂… 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬…𑀧𑁂… 𑀓𑀢𑀸𑀬 𑁋 𑀇𑀫𑀸𑀦𑀺 𑀙 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀲𑀢𑁆𑀢 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦…𑀧𑁂… 𑀣𑀼𑀮𑁆𑀮𑀘𑁆𑀘𑀬𑁂𑀦 𑀧𑀸𑀘𑀺𑀢𑁆𑀢𑀺𑀬𑁂𑀦 𑀧𑀸𑀝𑀺𑀤𑁂𑀲𑀦𑀻𑀬𑁂𑀦 𑀤𑀼𑀓𑁆𑀓𑀝𑁂𑀦 𑀤𑀼𑀩𑁆𑀪𑀸𑀲𑀺𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀲𑀢𑁆𑀢 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺, 𑀲𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦…𑀧𑁂… 𑀣𑀼𑀮𑁆𑀮𑀘𑁆𑀘𑀬𑁂𑀦 𑀧𑀸𑀘𑀺𑀢𑁆𑀢𑀺𑀬𑁂𑀦 𑀧𑀸𑀝𑀺𑀤𑁂𑀲𑀦𑀻𑀬𑁂𑀦 𑀤𑀼𑀓𑁆𑀓𑀝𑁂𑀦 𑀤𑀼𑀩𑁆𑀪𑀸𑀲𑀺𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑁋 𑀇𑀫𑀸𑀦𑀺 𑀲𑀢𑁆𑀢 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀅𑀝𑁆𑀞 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬; 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 …𑀧𑁂… 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸…𑀧𑁂… 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬…𑀧𑁂… 𑀓𑀢𑀸𑀬 𑁋 𑀇𑀫𑀸𑀦𑀺 𑀅𑀝𑁆𑀞 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬; 𑀲𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸…𑀧𑁂… 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸…𑀧𑁂… 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬…𑀧𑁂… 𑀓𑀢𑀸𑀬. 𑀇𑀫𑀸𑀦𑀺 𑀅𑀝𑁆𑀞 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬, 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀓𑀢𑀸𑀬; 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸…𑀧𑁂… 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬…𑀧𑁂… 𑀓𑀢𑀸𑀬…𑀧𑁂… 𑀓𑀢𑀸𑀓𑀢𑀸𑀬 𑀇𑀫𑀸𑀦𑀺 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀦𑀯 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬, 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀬, 𑀲𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀓𑀢𑀸𑀓𑀢𑀸𑀬; 𑀲𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸…𑀧𑁂… 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀅𑀓𑀢𑀸𑀬…𑀧𑁂… 𑀓𑀢𑀸𑀬 𑁋 𑀓𑀢𑀸𑀓𑀢𑀸𑀬…𑀧𑁂… 𑀇𑀫𑀸𑀦𑀺 𑀦𑀯 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

‘‘𑀓𑀢𑀫𑀸𑀦𑀺 𑀤𑀲 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀦 𑀧𑀸𑀭𑀸𑀚𑀺𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦 𑀧𑀸𑀭𑀸𑀚𑀺𑀓𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺; 𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺; 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀉𑀧𑁂𑀢𑀺, 𑀦 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀢𑀺, 𑀦 𑀥𑀫𑁆𑀫𑀺𑀓𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀘𑁆𑀘𑀸𑀤𑀸𑀦𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺; 𑀦 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺, 𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺, 𑀦 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 𑁋 𑀇𑀫𑀸𑀦𑀺 𑀤𑀲 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀓𑀢𑀫𑀸𑀦𑀺 𑀤𑀲 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺? 𑀧𑀸𑀭𑀸𑀚𑀺𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺; 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺; 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀢𑀺, 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀢𑀺, 𑀥𑀫𑁆𑀫𑀺𑀓𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀘𑁆𑀘𑀸𑀤𑀸𑀦𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺; 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 𑁋 𑀇𑀫𑀸𑀦𑀺 𑀤𑀲 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.

𑁬. 𑀥𑀫𑁆𑀫𑀺𑀓𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁

𑁩𑁮𑁮. ‘‘𑀓𑀣𑀁 𑀧𑀸𑀭𑀸𑀚𑀺𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀧𑀸𑀭𑀸𑀚𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀚𑁆𑀛𑀸𑀧𑀢𑁆𑀢𑀺 𑀳𑁄𑀢𑀺, 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀁. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀁, 𑀅𑀧𑀺 𑀘 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀁, 𑀦𑀸𑀧𑀺 [𑀦𑀸𑀧𑀺 𑀘 (𑀓.)] 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺, 𑀅𑀧𑀺𑀘 𑀲𑁄𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀳𑀁, 𑀆𑀯𑀼𑀲𑁄, 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄’𑀢𑀺. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁮𑁯. ‘‘𑀪𑀺𑀓𑁆𑀔𑀼𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑁂 𑀞𑀧𑀺𑀢𑁂 𑀧𑀭𑀺𑀲𑀸 𑀯𑀼𑀝𑁆𑀞𑀸𑀢𑀺, 𑀤𑀲𑀦𑁆𑀦𑀁 𑀅𑀦𑁆𑀢𑀭𑀸𑀬𑀸𑀦𑀁 𑀅𑀜𑁆𑀜𑀢𑀭𑁂𑀦 [𑀅𑀜𑁆𑀜𑀢𑀭𑁂𑀦 𑀅𑀦𑁆𑀢𑀭𑀸𑀬𑁂𑀦 (𑀲𑁆𑀬𑀸. 𑀓𑀁.)] 𑁋 𑀭𑀸𑀚𑀦𑁆𑀢𑀭𑀸𑀬𑁂𑀦 𑀯𑀸, 𑀘𑁄𑀭𑀦𑁆𑀢𑀭𑀸𑀬𑁂𑀦 𑀯𑀸, 𑀅𑀕𑁆𑀬𑀦𑁆𑀢𑀭𑀸𑀬𑁂𑀦 𑀯𑀸, 𑀉𑀤𑀓𑀦𑁆𑀢𑀭𑀸𑀬𑁂𑀦 𑀯𑀸, 𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁂𑀦 𑀯𑀸, 𑀅𑀫𑀦𑀼𑀲𑁆𑀲𑀦𑁆𑀢𑀭𑀸𑀬𑁂𑀦 𑀯𑀸, 𑀯𑀸𑀴𑀦𑁆𑀢𑀭𑀸𑀬𑁂𑀦 𑀯𑀸, 𑀲𑀭𑀻𑀲𑀧𑀦𑁆𑀢𑀭𑀸𑀬𑁂𑀦 𑀯𑀸, 𑀚𑀻𑀯𑀺𑀢𑀦𑁆𑀢𑀭𑀸𑀬𑁂𑀦 𑀯𑀸, 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀦 𑀯𑀸. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀯𑀸 𑀆𑀯𑀸𑀲𑁂, 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀆𑀯𑀸𑀲𑁂, 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀸𑀭𑀸𑀚𑀺𑀓𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀢𑀁 𑀯𑀢𑁆𑀣𑀼 𑀅𑀯𑀺𑀦𑀺𑀘𑁆𑀙𑀺𑀢𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑁂𑀬𑁆𑀬𑀸𑀢𑀺.

‘‘𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑀺𑀢𑀩𑁆𑀩𑀁 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀸𑀭𑀸𑀚𑀺𑀓𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀢𑀁 𑀯𑀢𑁆𑀣𑀼 𑀅𑀯𑀺𑀦𑀺𑀘𑁆𑀙𑀺𑀢𑀁. 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁦. ‘‘𑀓𑀣𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺, 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀁. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀁, 𑀅𑀧𑀺𑀘 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁂𑀦, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑀸 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸’𑀢𑀺. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀦𑁆𑀢𑀁, 𑀦𑀸𑀧𑀺 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁂𑀦, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑀸 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸’𑀢𑀺, 𑀅𑀧𑀺𑀘 𑀲𑁄𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀫𑀬𑀸, 𑀆𑀯𑀼𑀲𑁄, 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸’𑀢𑀺. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁂𑀦 𑀧𑀼𑀕𑁆𑀕𑀮𑁂𑀦 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁧. ‘‘𑀪𑀺𑀓𑁆𑀔𑀼𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑁂 𑀞𑀧𑀺𑀢𑁂 𑀧𑀭𑀺𑀲𑀸 𑀯𑀼𑀝𑁆𑀞𑀸𑀢𑀺, 𑀤𑀲𑀦𑁆𑀦𑀁 𑀅𑀦𑁆𑀢𑀭𑀸𑀬𑀸𑀦𑀁 𑀅𑀜𑁆𑀜𑀢𑀭𑁂𑀦 𑁋 𑀭𑀸𑀚𑀦𑁆𑀢𑀭𑀸𑀬𑁂𑀦 𑀯𑀸 …𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀦 𑀯𑀸, 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀯𑀸 𑀆𑀯𑀸𑀲𑁂, 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀆𑀯𑀸𑀲𑁂, 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀣𑀸 [𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑀣𑀸 (𑀲𑀻.)] 𑀯𑀺𑀧𑁆𑀧𑀓𑀢𑀸, 𑀢𑀁 𑀯𑀢𑁆𑀣𑀼 𑀅𑀯𑀺𑀦𑀺𑀘𑁆𑀙𑀺𑀢𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑁂𑀬𑁆𑀬𑀸𑀢𑀺.

‘‘𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑀺𑀢𑀩𑁆𑀩𑀁 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀢𑀁 𑀯𑀢𑁆𑀣𑀼 𑀅𑀯𑀺𑀦𑀺𑀘𑁆𑀙𑀺𑀢𑀁. 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁨. ‘‘𑀓𑀣𑀁 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀢𑀺? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑀸𑀬 𑀲𑀸𑀫𑀕𑁆𑀕𑀺𑀬𑀸𑀦𑀼𑀧𑀕𑀫𑀦𑀁 𑀳𑁄𑀢𑀺, 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀦𑁆𑀢𑀁. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀦𑁆𑀢𑀁, 𑀅𑀧𑀺 𑀘 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀢𑀻’𑀢𑀺. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀦𑁆𑀢𑀁, 𑀦𑀸𑀧𑀺 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀢𑀻’𑀢𑀺, 𑀅𑀧𑀺 𑀘 𑀲𑁄𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀳𑀁, 𑀆𑀯𑀼𑀲𑁄, 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀫𑀻’𑀢𑀺. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀦 𑀉𑀧𑁂𑀢𑀺, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁩. ‘‘𑀓𑀣𑀁 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀥𑀫𑁆𑀫𑀺𑀓𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀘𑁆𑀘𑀸𑀤𑀸𑀦𑀁 𑀳𑁄𑀢𑀺, 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀦𑁆𑀢𑀁 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀦𑁆𑀢𑀁, 𑀅𑀧𑀺 𑀘 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀢𑀻’𑀢𑀺. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀦𑁆𑀢𑀁, 𑀦𑀸𑀧𑀺 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀢𑀻’𑀢𑀺, 𑀅𑀧𑀺 𑀘 𑀲𑁄𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀳𑀁, 𑀆𑀯𑀼𑀲𑁄, 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀸𑀫𑀻’𑀢𑀺. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀺𑀓𑀁 𑀲𑀸𑀫𑀕𑁆𑀕𑀺𑀁 𑀧𑀘𑁆𑀘𑀸𑀤𑀺𑀬𑀢𑀺, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁪. ‘‘𑀪𑀺𑀓𑁆𑀔𑀼𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑁂 𑀞𑀧𑀺𑀢𑁂 𑀧𑀭𑀺𑀲𑀸 𑀯𑀼𑀝𑁆𑀞𑀸𑀢𑀺, 𑀤𑀲𑀦𑁆𑀦𑀁 𑀅𑀦𑁆𑀢𑀭𑀸𑀬𑀸𑀦𑀁 𑀅𑀜𑁆𑀜𑀢𑀭𑁂𑀦 𑁋 𑀭𑀸𑀚𑀦𑁆𑀢𑀭𑀸𑀬𑁂𑀦 𑀯𑀸…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀦 𑀯𑀸. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀯𑀸 𑀆𑀯𑀸𑀲𑁂, 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀆𑀯𑀸𑀲𑁂, 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀥𑀫𑁆𑀫𑀺𑀓𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀘𑁆𑀘𑀸𑀤𑀸𑀦𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀢𑀁 𑀯𑀢𑁆𑀣𑀼 𑀅𑀯𑀺𑀦𑀺𑀘𑁆𑀙𑀺𑀢𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀢𑀁 𑀯𑀢𑁆𑀣𑀼𑀁 𑀯𑀺𑀦𑀺𑀘𑁆𑀙𑀺𑀦𑁂𑀬𑁆𑀬𑀸𑀢𑀺.

‘‘𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑀺𑀢𑀩𑁆𑀩𑀁 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀥𑀫𑁆𑀫𑀺𑀓𑀸𑀬 𑀲𑀸𑀫𑀕𑁆𑀕𑀺𑀬𑀸 𑀧𑀘𑁆𑀘𑀸𑀤𑀸𑀦𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀢𑀁 𑀯𑀢𑁆𑀣𑀼 𑀅𑀯𑀺𑀦𑀺𑀘𑁆𑀙𑀺𑀢𑀁. 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁫. ‘‘𑀓𑀣𑀁 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺, 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀅𑀧𑀺 𑀘 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄’𑀢𑀺. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀦𑀸𑀧𑀺 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄’𑀢𑀺, 𑀅𑀧𑀺 𑀘 𑀲𑁄𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀳𑀁, 𑀆𑀯𑀼𑀲𑁄, 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄𑀫𑁆𑀳𑀻’𑀢𑀺. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄, [𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 (𑀲𑁆𑀬𑀸. 𑀓𑀁.)] 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁬. ‘‘𑀓𑀣𑀁 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀅𑀧𑀺 𑀘 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄’𑀢𑀺. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀦𑀸𑀧𑀺 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄’𑀢𑀺, 𑀅𑀧𑀺 𑀘 𑀲𑁄𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀳𑀁, 𑀆𑀯𑀼𑀲𑁄, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄𑀫𑁆𑀳𑀻’𑀢𑀺. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

𑁩𑁯𑁭. ‘‘𑀓𑀣𑀁 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺? 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺, 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀅𑀧𑀺 𑀘 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄’𑀢𑀺. 𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀦𑀸𑀧𑀺 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄’𑀢𑀺, 𑀅𑀧𑀺 𑀘 𑀲𑁄𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀳𑀁, 𑀆𑀯𑀼𑀲𑁄, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄𑀫𑁆𑀳𑀻’𑀢𑀺. 𑀆𑀓𑀗𑁆𑀔𑀫𑀸𑀦𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑁂𑀦 𑀤𑀺𑀝𑁆𑀞𑁂𑀦 𑀢𑁂𑀦 𑀲𑀼𑀢𑁂𑀦 𑀢𑀸𑀬 𑀧𑀭𑀺𑀲𑀗𑁆𑀓𑀸𑀬 𑀢𑀤𑀳𑀼𑀧𑁄𑀲𑀣𑁂 𑀘𑀸𑀢𑀼𑀤𑁆𑀤𑀲𑁂 𑀯𑀸 𑀧𑀦𑁆𑀦𑀭𑀲𑁂 𑀯𑀸 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀲𑀫𑁆𑀫𑀼𑀔𑀻𑀪𑀽𑀢𑁂 𑀲𑀗𑁆𑀖𑀫𑀚𑁆𑀛𑁂 𑀉𑀤𑀸𑀳𑀭𑁂𑀬𑁆𑀬 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀢𑁆𑀣𑀦𑁆𑀦𑀸𑀫𑁄 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑁄, 𑀢𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀫𑀺, 𑀦 𑀢𑀲𑁆𑀫𑀺𑀁 𑀲𑀫𑁆𑀫𑀼𑀔𑀻𑀪𑀽𑀢𑁂 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑁋 𑀥𑀫𑁆𑀫𑀺𑀓𑀁 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁.

‘‘𑀇𑀫𑀸𑀦𑀺 𑀤𑀲 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀻’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁭. 𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀁

𑁩𑁯𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀸 𑀓𑀢𑀫𑀗𑁆𑀕𑀲𑀫𑀦𑁆𑀦𑀸𑀕𑀢𑀁 [𑀓𑀢𑀗𑁆𑀕𑀲𑀫𑀦𑁆𑀦𑀸𑀕𑀢𑀁 (𑀓.)] 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩’’𑀦𑁆𑀢𑀺?

[𑀧𑀭𑀺. 𑁪𑁪𑁦] ‘‘𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩𑀁. 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁂𑀦, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑀁 𑀔𑁄 𑀅𑀳𑀁 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁄, 𑀓𑀸𑀮𑁄 𑀦𑀼 𑀔𑁄 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀁 𑀉𑀤𑀸𑀳𑀼 𑀦𑁄’𑀢𑀺? 𑀲𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀓𑀸𑀮𑁄 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀁, 𑀦𑁄 𑀓𑀸𑀮𑁄’𑀢𑀺, 𑀦 𑀢𑀁, 𑀉𑀧𑀸𑀮𑀺, 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀓𑀸𑀮𑁄 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀁, 𑀦𑁄 𑀅𑀓𑀸𑀮𑁄’𑀢𑀺, 𑀢𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀉𑀢𑁆𑀢𑀭𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑀁 𑀔𑁄 𑀅𑀳𑀁 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁄, 𑀪𑀽𑀢𑀁 𑀦𑀼 𑀔𑁄 𑀇𑀤𑀁 𑀅𑀢𑁆𑀢𑀸𑀤𑀸𑀦𑀁 𑀉𑀤𑀸𑀳𑀼 𑀦𑁄’𑀢𑀺? 𑀲𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀪𑀽𑀢𑀁 𑀇𑀤𑀁 𑀅𑀢𑁆𑀢𑀸𑀤𑀸𑀦𑀁, 𑀦𑁄 𑀪𑀽𑀢’𑀦𑁆𑀢𑀺, 𑀦 𑀢𑀁, 𑀉𑀧𑀸𑀮𑀺, 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀪𑀽𑀢𑀁 𑀇𑀤𑀁 𑀅𑀢𑁆𑀢𑀸𑀤𑀸𑀦𑀁, 𑀦𑁄 𑀅𑀪𑀽𑀢’𑀦𑁆𑀢𑀺, 𑀢𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀉𑀢𑁆𑀢𑀭𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀬𑀁 𑀔𑁄 𑀅𑀳𑀁 𑀇𑀫𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀼𑀓𑀸𑀫𑁄, 𑀅𑀢𑁆𑀣𑀲𑀜𑁆𑀳𑀺𑀢𑀁 𑀦𑀼 𑀔𑁄 𑀇𑀤𑀁 𑀅𑀢𑁆𑀢𑀸𑀤𑀸𑀦𑀁 𑀉𑀤𑀸𑀳𑀼 𑀦𑁄’𑀢𑀺? 𑀲𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀦𑀢𑁆𑀣𑀲𑀜𑁆𑀳𑀺𑀢𑀁 𑀇𑀤𑀁 𑀅𑀢𑁆𑀢𑀸𑀤𑀸𑀦𑀁, 𑀦𑁄 𑀅𑀢𑁆𑀣𑀲𑀜𑁆𑀳𑀺𑀢’𑀦𑁆𑀢𑀺, 𑀦 𑀢𑀁, 𑀉𑀧𑀸𑀮𑀺, 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀅𑀢𑁆𑀣𑀲𑀜𑁆𑀳𑀺𑀢𑀁 𑀇𑀤𑀁 𑀅𑀢𑁆𑀢𑀸𑀤𑀸𑀦𑀁, 𑀦𑁄 𑀅𑀦𑀢𑁆𑀣𑀲𑀜𑁆𑀳𑀺𑀢’𑀦𑁆𑀢𑀺, 𑀢𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀉𑀢𑁆𑀢𑀭𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀇𑀫𑀁 𑀔𑁄 𑀅𑀳𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀬𑀫𑀸𑀦𑁄 𑀮𑀪𑀺𑀲𑁆𑀲𑀸𑀫𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑁂 𑀉𑀤𑀸𑀳𑀼 𑀦𑁄’𑀢𑀺? 𑀲𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑀁 𑀔𑁄 𑀅𑀳𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀬𑀫𑀸𑀦𑁄 𑀦 𑀮𑀪𑀺𑀲𑁆𑀲𑀸𑀫𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑁂’𑀢𑀺, 𑀦 𑀢𑀁, 𑀉𑀧𑀸𑀮𑀺, 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩𑀁.

‘‘𑀲𑀘𑁂 𑀧𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑀁 𑀔𑁄 𑀅𑀳𑀁 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀬𑀫𑀸𑀦𑁄 𑀮𑀪𑀺𑀲𑁆𑀲𑀸𑀫𑀺 𑀲𑀦𑁆𑀤𑀺𑀝𑁆𑀞𑁂 𑀲𑀫𑁆𑀪𑀢𑁆𑀢𑁂 𑀪𑀺𑀓𑁆𑀔𑀽 𑀥𑀫𑁆𑀫𑀢𑁄 𑀯𑀺𑀦𑀬𑀢𑁄 𑀧𑀓𑁆𑀔𑁂’𑀢𑀺, 𑀢𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀉𑀢𑁆𑀢𑀭𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀇𑀫𑀁 𑀔𑁄 𑀫𑁂 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀬𑀢𑁄 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡𑀁 𑀉𑀤𑀸𑀳𑀼 𑀦𑁄’𑀢𑀺? 𑀲𑀘𑁂 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑀁 𑀔𑁄 𑀫𑁂 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀬𑀢𑁄 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀦 𑀢𑀁, 𑀉𑀧𑀸𑀮𑀺, 𑀅𑀢𑁆𑀢𑀸𑀤𑀸𑀦𑀁 𑀆𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀏𑀯𑀁 𑀚𑀸𑀦𑀸𑀢𑀺 𑁋 ‘𑀇𑀫𑀁 𑀔𑁄 𑀫𑁂 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀬𑀢𑁄 𑀦 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀲𑀗𑁆𑀖𑀪𑁂𑀤𑁄 𑀲𑀗𑁆𑀖𑀭𑀸𑀚𑀺 𑀲𑀗𑁆𑀖𑀯𑀯𑀢𑁆𑀣𑀸𑀦𑀁 𑀲𑀗𑁆𑀖𑀦𑀸𑀦𑀸𑀓𑀭𑀡’𑀦𑁆𑀢𑀺, 𑀆𑀤𑀸𑀢𑀩𑁆𑀩𑀁 𑀢𑀁, 𑀉𑀧𑀸𑀮𑀺, 𑀅𑀢𑁆𑀢𑀸𑀤𑀸𑀦𑀁. 𑀏𑀯𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀔𑁄, 𑀉𑀧𑀸𑀮𑀺, 𑀅𑀢𑁆𑀢𑀸𑀤𑀸𑀦𑀁 𑀆𑀤𑀺𑀦𑁆𑀦𑀁, 𑀧𑀘𑁆𑀙𑀸𑀧𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀁 𑀪𑀯𑀺𑀲𑁆𑀲𑀢𑀻’𑀢𑀺.

𑁮. 𑀘𑁄𑀤𑀓𑁂𑀦𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀥𑀫𑁆𑀫𑀸

𑁩𑁯𑁯. [𑀧𑀭𑀺. 𑁪𑁩𑁬 (𑀅. 𑀦𑀺. 𑁧𑁦.𑁪𑁪 𑀣𑁄𑀓𑀁 𑀯𑀺𑀲𑀤𑀺𑀲𑀁)] ‘‘𑀘𑁄𑀤𑀓𑁂𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀓𑀢𑀺 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺? ‘‘𑀘𑁄𑀤𑀓𑁂𑀦, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄.

‘‘𑀘𑁄𑀤𑀓𑁂𑀦, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄 𑀦𑀼 𑀔𑁄𑀫𑁆𑀳𑀺, 𑀧𑀭𑀺𑀲𑀼𑀤𑁆𑀥𑁂𑀦𑀫𑁆𑀳𑀺 𑀓𑀸𑀬𑀲𑀫𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑁋 𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦? 𑀲𑀁𑀯𑀺𑀚𑁆𑀚𑀢𑀺 𑀦𑀼 𑀔𑁄 𑀫𑁂 𑀏𑀲𑁄 𑀥𑀫𑁆𑀫𑁄 𑀉𑀤𑀸𑀳𑀼 𑀦𑁄’𑀢𑀺? 𑀦𑁄 𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑁂𑀦 𑀓𑀸𑀬𑀲𑀫𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑁋 𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀇𑀗𑁆𑀖 𑀢𑀸𑀯 𑀆𑀬𑀲𑁆𑀫𑀸 𑀓𑀸𑀬𑀺𑀓𑀁 𑀲𑀺𑀓𑁆𑀔𑀲𑁆𑀲𑀽’𑀢𑀺. 𑀇𑀢𑀺𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀘𑁄𑀤𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄 𑀦𑀼 𑀔𑁄𑀫𑁆𑀳𑀺, 𑀧𑀭𑀺𑀲𑀼𑀤𑁆𑀥𑁂𑀦𑀫𑁆𑀳𑀺 𑀯𑀘𑀻𑀲𑀫𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑁋 𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦? 𑀲𑀁𑀯𑀺𑀚𑁆𑀚𑀢𑀺 𑀦𑀼 𑀔𑁄 𑀫𑁂 𑀏𑀲𑁄 𑀥𑀫𑁆𑀫𑁄 𑀉𑀤𑀸𑀳𑀼 𑀦𑁄’𑀢𑀺? 𑀦𑁄 𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄 𑀳𑁄𑀢𑀺, 𑀧𑀭𑀺𑀲𑀼𑀤𑁆𑀥𑁂𑀦 𑀯𑀘𑀻𑀲𑀫𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑁋 𑀅𑀘𑁆𑀙𑀺𑀤𑁆𑀤𑁂𑀦 𑀅𑀧𑁆𑀧𑀝𑀺𑀫𑀁𑀲𑁂𑀦, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀇𑀗𑁆𑀖 𑀢𑀸𑀯 𑀆𑀬𑀲𑁆𑀫𑀸 𑀯𑀸𑀘𑀲𑀺𑀓𑀁 𑀲𑀺𑀓𑁆𑀔𑀲𑁆𑀲𑀽’𑀢𑀺. 𑀇𑀢𑀺𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀘𑁄𑀤𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀫𑁂𑀢𑁆𑀢𑀁 𑀦𑀼 𑀔𑁄 𑀫𑁂 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀅𑀦𑀸𑀖𑀸𑀢𑀁, 𑀲𑀁𑀯𑀺𑀚𑁆𑀚𑀢𑀺 𑀦𑀼 𑀔𑁄 𑀫𑁂 𑀏𑀲𑁄 𑀥𑀫𑁆𑀫𑁄 𑀉𑀤𑀸𑀳𑀼 𑀦𑁄’𑀢𑀺? 𑀦𑁄 𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀅𑀦𑀸𑀖𑀸𑀢𑀁, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀇𑀗𑁆𑀖 𑀢𑀸𑀯 𑀆𑀬𑀲𑁆𑀫𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀳𑀻’𑀢𑀺. 𑀇𑀢𑀺𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀘𑁄𑀤𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀩𑀳𑀼𑀲𑁆𑀲𑀼𑀢𑁄 𑀦𑀼 𑀔𑁄𑀫𑁆𑀳𑀺, 𑀲𑀼𑀢𑀥𑀭𑁄, 𑀲𑀼𑀢𑀲𑀦𑁆𑀦𑀺𑀘𑁆𑀘𑀬𑁄? 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸, 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀸 𑀫𑁂 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸? 𑀲𑀁𑀯𑀺𑀚𑁆𑀚𑀢𑀺 𑀦𑀼 𑀔𑁄 𑀫𑁂 𑀏𑀲𑁄 𑀥𑀫𑁆𑀫𑁄 𑀉𑀤𑀸𑀳𑀼 𑀦𑁄’𑀢𑀺? 𑀦𑁄 𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀲𑀼𑀢𑀥𑀭𑁄, 𑀲𑀼𑀢𑀲𑀦𑁆𑀦𑀺𑀘𑁆𑀘𑀬𑁄; 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸, 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺, 𑀢𑀣𑀸𑀭𑀽𑀧𑀲𑁆𑀲 𑀥𑀫𑁆𑀫𑀸 𑀦 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀇𑀗𑁆𑀖 𑀢𑀸𑀯 𑀆𑀬𑀲𑁆𑀫𑀸 𑀆𑀕𑀫𑀁 𑀧𑀭𑀺𑀬𑀸𑀧𑀼𑀡𑀲𑁆𑀲𑀽’𑀢𑀺. 𑀇𑀢𑀺𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄.

‘‘𑀧𑀼𑀦 𑀘𑀧𑀭𑀁, 𑀉𑀧𑀸𑀮𑀺, 𑀘𑁄𑀤𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘𑀉𑀪𑀬𑀸𑀦𑀺 𑀔𑁄 𑀫𑁂 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀼𑀯𑀺𑀪𑀢𑁆𑀢𑀸𑀦𑀺, 𑀲𑀼𑀧𑁆𑀧𑀯𑀢𑁆𑀢𑀻𑀦𑀺, 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑁋 𑀲𑀼𑀢𑁆𑀢𑀲𑁄, 𑀅𑀦𑀼𑀩𑁆𑀬𑀜𑁆𑀚𑀦𑀲𑁄? 𑀲𑀁𑀯𑀺𑀜𑁆𑀚𑀢𑀺 𑀦𑀼 𑀔𑁄 𑀫𑁂 𑀏𑀲𑁄 𑀥𑀫𑁆𑀫𑁄 𑀉𑀤𑀸𑀳𑀼 𑀦𑁄’𑀢𑀺? 𑀦𑁄 𑀘𑁂, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺, 𑀲𑀼𑀯𑀺𑀪𑀢𑁆𑀢𑀸𑀦𑀺, 𑀲𑀼𑀧𑁆𑀧𑀯𑀢𑁆𑀢𑀻𑀦𑀺, 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑁋 𑀲𑀼𑀢𑁆𑀢𑀲𑁄, 𑀅𑀦𑀼𑀩𑁆𑀬𑀜𑁆𑀚𑀦𑀲𑁄, ‘𑀇𑀤𑀁 𑀧𑀦𑀸𑀯𑀼𑀲𑁄, 𑀓𑀢𑁆𑀣 𑀯𑀼𑀢𑁆𑀢𑀁 𑀪𑀕𑀯𑀢𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀦 𑀲𑀫𑁆𑀧𑀸𑀬𑀢𑀺 [𑀦 𑀲𑀫𑁆𑀧𑀸𑀤𑀬𑀢𑀺 (𑀓.)], 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀇𑀗𑁆𑀖 𑀢𑀸𑀯 𑀆𑀬𑀲𑁆𑀫𑀸, 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀲𑁆𑀲𑀽’𑀢𑀺. 𑀇𑀢𑀺𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄. 𑀘𑁄𑀤𑀓𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺.

𑁯. 𑀘𑁄𑀤𑀓𑁂𑀦𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀥𑀫𑁆𑀫𑀸

𑁪𑁦𑁦. ‘‘𑀘𑁄𑀤𑀓𑁂𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀓𑀢𑀺 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺? ‘‘𑀘𑁄𑀤𑀓𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄 𑁋 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀓𑀸𑀮𑁂𑀦; 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀪𑀽𑀢𑁂𑀦; 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀨𑀭𑀼𑀲𑁂𑀦; 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦; 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺, 𑀦𑁄 𑀤𑁄𑀲𑀦𑁆𑀢𑀭𑁄𑀢𑀺. 𑀘𑁄𑀤𑀓𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺.

𑁧𑁦. 𑀘𑁄𑀤𑀓𑀘𑀼𑀤𑀺𑀢𑀓𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸

𑁪𑁦𑁧. ‘‘𑀅𑀥𑀫𑁆𑀫𑀘𑁄𑀤𑀓𑀲𑁆𑀲, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑀢𑀻𑀳𑀸𑀓𑀸𑀭𑁂𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄’’𑀢𑀺? ‘‘𑀅𑀥𑀫𑁆𑀫𑀘𑁄𑀤𑀓𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄 𑁋 𑀅𑀓𑀸𑀮𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀓𑀸𑀮𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀅𑀪𑀽𑀢𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀪𑀽𑀢𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀨𑀭𑀼𑀲𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀲𑀡𑁆𑀳𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀅𑀦𑀢𑁆𑀣𑀲𑀁𑀳𑀺𑀢𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀅𑀢𑁆𑀣𑀲𑀁𑀳𑀺𑀢𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀤𑁄𑀲𑀦𑁆𑀢𑀭𑁄 𑀆𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬𑀸𑀢𑀺. 𑀅𑀥𑀫𑁆𑀫𑀘𑁄𑀤𑀓𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀦 𑀅𑀜𑁆𑀜𑁄𑀧𑀺 𑀪𑀺𑀓𑁆𑀔𑀼 𑀅𑀪𑀽𑀢𑁂𑀦 𑀘𑁄𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺.

‘‘𑀅𑀥𑀫𑁆𑀫𑀘𑀼𑀤𑀺𑀢𑀲𑁆𑀲 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄’’𑀢𑀺? ‘‘𑀅𑀥𑀫𑁆𑀫𑀘𑀼𑀤𑀺𑀢𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄 𑁋 𑀅𑀓𑀸𑀮𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀓𑀸𑀮𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀅𑀪𑀽𑀢𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀪𑀽𑀢𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀨𑀭𑀼𑀲𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀲𑀡𑁆𑀳𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀅𑀦𑀢𑁆𑀣𑀲𑀁𑀳𑀺𑀢𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀅𑀢𑁆𑀣𑀲𑀁𑀳𑀺𑀢𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀤𑁄𑀲𑀦𑁆𑀢𑀭𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬𑀸𑀢𑀺. 𑀅𑀥𑀫𑁆𑀫𑀘𑀼𑀤𑀺𑀢𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄’’𑀢𑀺.

‘‘𑀥𑀫𑁆𑀫𑀘𑁄𑀤𑀓𑀲𑁆𑀲, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄’’𑀢𑀺? ‘‘𑀥𑀫𑁆𑀫𑀘𑁄𑀤𑀓𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄 𑁋 𑀓𑀸𑀮𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀅𑀓𑀸𑀮𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀪𑀽𑀢𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀅𑀪𑀽𑀢𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀲𑀡𑁆𑀳𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀨𑀭𑀼𑀲𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀅𑀢𑁆𑀣𑀲𑀁𑀳𑀺𑀢𑁂𑀦𑀸𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀫𑁂𑀢𑁆𑀢𑀘𑀺𑀢𑁆𑀢𑁄 𑀆𑀬𑀲𑁆𑀫𑀸 𑀘𑁄𑀤𑁂𑀲𑀺, 𑀦𑁄 𑀤𑁄𑀲𑀦𑁆𑀢𑀭𑁄, 𑀅𑀮𑀁 𑀢𑁂 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀬𑀸𑀢𑀺. 𑀥𑀫𑁆𑀫𑀘𑁄𑀤𑀓𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀅𑀜𑁆𑀜𑁄𑀧𑀺 𑀪𑀺𑀓𑁆𑀔𑀼 𑀪𑀽𑀢𑁂𑀦 𑀘𑁄𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺.

‘‘𑀥𑀫𑁆𑀫𑀘𑀼𑀤𑀺𑀢𑀲𑁆𑀲 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑁄 𑀓𑀢𑀺𑀳𑀸𑀓𑀸𑀭𑁂𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄’’𑀢𑀺? ‘‘𑀥𑀫𑁆𑀫𑀘𑀼𑀤𑀺𑀢𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄 𑁋 𑀓𑀸𑀮𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀅𑀓𑀸𑀮𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀪𑀽𑀢𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀅𑀪𑀽𑀢𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀲𑀡𑁆𑀳𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀨𑀭𑀼𑀲𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀅𑀢𑁆𑀣𑀲𑀁𑀳𑀺𑀢𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬; 𑀫𑁂𑀢𑁆𑀢𑀘𑀺𑀢𑁆𑀢𑁂𑀦𑀸𑀬𑀲𑁆𑀫𑀸 𑀘𑀼𑀤𑀺𑀢𑁄, 𑀦𑁄 𑀤𑁄𑀲𑀦𑁆𑀢𑀭𑁂𑀦, 𑀅𑀮𑀁 𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀸𑀬𑀸𑀢𑀺. 𑀥𑀫𑁆𑀫𑀘𑀼𑀤𑀺𑀢𑀲𑁆𑀲, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑀤𑀳𑀸𑀢𑀩𑁆𑀩𑁄’’𑀢𑀺.

[𑀧𑀭𑀺. 𑁪𑁩𑁮] ‘‘𑀘𑁄𑀤𑀓𑁂𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀓𑀢𑀺 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺? ‘‘𑀘𑁄𑀤𑀓𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄 𑁋 𑀓𑀸𑀭𑀼𑀜𑁆𑀜𑀢𑀸, 𑀳𑀺𑀢𑁂𑀲𑀺𑀢𑀸, 𑀅𑀦𑀼𑀓𑀫𑁆𑀧𑀺𑀢𑀸, [𑀅𑀦𑀼𑀓𑀫𑁆𑀧𑀢𑀸 (𑀓.)] 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑀸, 𑀯𑀺𑀦𑀬𑀧𑀼𑀭𑁂𑀓𑁆𑀔𑀸𑀭𑀢𑀸𑀢𑀺. 𑀘𑁄𑀤𑀓𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀧𑀭𑀁 𑀘𑁄𑀤𑁂𑀢𑀼𑀓𑀸𑀫𑁂𑀦 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀧𑀭𑁄 𑀘𑁄𑀤𑁂𑀢𑀩𑁆𑀩𑁄’’𑀢𑀺.

‘‘𑀘𑀼𑀤𑀺𑀢𑁂𑀦 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀸 𑀓𑀢𑀺𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺? ‘‘𑀘𑀼𑀤𑀺𑀢𑁂𑀦𑀼𑀧𑀸𑀮𑀺, 𑀪𑀺𑀓𑁆𑀔𑀼𑀦𑀸 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀢𑀩𑁆𑀩𑀁 𑁋 𑀲𑀘𑁆𑀘𑁂 𑀘 𑀅𑀓𑀼𑀧𑁆𑀧𑁂 𑀘𑀸’’𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑁄 𑀦𑀯𑀫𑁄.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀢𑀺𑀁𑀲.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀧𑁄𑀲𑀣𑁂 𑀬𑀸𑀯𑀢𑀺𑀓𑀁, 𑀧𑀸𑀧𑀪𑀺𑀓𑁆𑀔𑀼 𑀦 𑀦𑀺𑀓𑁆𑀔𑀫𑀺;

𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀦𑀺𑀘𑁆𑀙𑀼𑀤𑁆𑀥𑁄, 𑀅𑀘𑁆𑀙𑁂𑀭𑀸 𑀚𑀺𑀦𑀲𑀸𑀲𑀦𑁂.

𑀦𑀺𑀦𑁆𑀦𑁄𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀘, 𑀞𑀺𑀢𑀥𑀫𑁆𑀫𑁄 𑀦𑀸𑀢𑀺𑀓𑁆𑀓𑀫𑁆𑀫;

𑀓𑀼𑀡𑀧𑀼𑀓𑁆𑀔𑀺𑀧𑀢𑀺 𑀲𑀗𑁆𑀖𑁄, 𑀲𑀯𑀦𑁆𑀢𑀺𑀬𑁄 𑀚𑀳𑀦𑁆𑀢𑀺 𑀘.

𑀲𑀯𑀦𑁆𑀢𑀺 𑀧𑀭𑀺𑀦𑀺𑀩𑁆𑀩𑀦𑁆𑀢𑀺, 𑀏𑀓𑀭𑀲 𑀯𑀺𑀫𑀼𑀢𑁆𑀢𑀺 𑀘;

𑀩𑀳𑀼 𑀥𑀫𑁆𑀫𑀯𑀺𑀦𑀬𑁄𑀧𑀺, 𑀪𑀽𑀢𑀝𑁆𑀞𑀸𑀭𑀺𑀬𑀧𑀼𑀕𑁆𑀕𑀮𑀸.

𑀲𑀫𑀼𑀤𑁆𑀤𑀁 𑀉𑀧𑀫𑀁 𑀓𑀢𑁆𑀯𑀸, 𑀯𑀸𑀘𑁂𑀲𑀺 [𑀞𑀸𑀧𑁂𑀲𑀺 (𑀓.)] 𑀲𑀸𑀲𑀦𑁂 𑀕𑀼𑀡𑀁;

𑀉𑀧𑁄𑀲𑀣𑁂 𑀧𑀸𑀢𑀺𑀫𑁄𑀓𑁆𑀔𑀁, 𑀦 𑀅𑀫𑁆𑀳𑁂 𑀓𑁄𑀘𑀺 𑀚𑀸𑀦𑀸𑀢𑀺.

𑀧𑀝𑀺𑀓𑀘𑁆𑀘𑁂𑀯 𑀉𑀚𑁆𑀛𑀦𑁆𑀢𑀺, 𑀏𑀓𑁄 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺;

𑀧𑀜𑁆𑀘 𑀙 𑀲𑀢𑁆𑀢 𑀅𑀝𑁆𑀞𑀸𑀦𑀺, 𑀦𑀯𑀸 𑀘 𑀤𑀲𑀫𑀸𑀦𑀺 𑀘.

𑀲𑀻𑀮-𑀆𑀘𑀸𑀭-𑀤𑀺𑀝𑁆𑀞𑀺 𑀘, 𑀆𑀚𑀻𑀯𑀁 𑀘𑀢𑀼𑀪𑀸𑀕𑀺𑀓𑁂;

𑀧𑀸𑀭𑀸𑀚𑀺𑀓𑀜𑁆𑀘 𑀲𑀗𑁆𑀖𑀸𑀤𑀺, 𑀧𑀸𑀘𑀺𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀺.

𑀤𑀼𑀓𑁆𑀓𑀝𑀁 𑀧𑀜𑁆𑀘𑀪𑀸𑀕𑁂𑀲𑀼, 𑀲𑀻𑀮𑀸𑀘𑀸𑀭𑀯𑀺𑀧𑀢𑁆𑀢𑀺 𑀘;

𑀅𑀓𑀢𑀸𑀬 𑀓𑀢𑀸𑀬 𑀘, 𑀙𑀪𑀸𑀕𑁂𑀲𑀼 𑀬𑀣𑀸𑀯𑀺𑀥𑀺.

𑀧𑀸𑀭𑀸𑀚𑀺𑀓𑀜𑁆𑀘 𑀲𑀗𑁆𑀖𑀸𑀤𑀺, 𑀣𑀼𑀮𑁆𑀮𑀁 𑀧𑀸𑀘𑀺𑀢𑁆𑀢𑀺𑀬𑁂𑀦 𑀘;

𑀧𑀸𑀝𑀺𑀤𑁂𑀲𑀦𑀺𑀬𑀜𑁆𑀘𑁂𑀯, 𑀤𑀼𑀓𑁆𑀓𑀝𑀜𑁆𑀘 𑀤𑀼𑀩𑁆𑀪𑀸𑀲𑀺𑀢𑀁.

𑀲𑀻𑀮𑀸𑀘𑀸𑀭𑀯𑀺𑀧𑀢𑁆𑀢𑀺 𑀘, 𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀺;

𑀬𑀸 𑀘 𑀅𑀝𑁆𑀞𑀸 𑀓𑀢𑀸𑀓𑀢𑁂, 𑀢𑁂𑀦𑁂𑀢𑀸 𑀲𑀻𑀮𑀸𑀘𑀸𑀭𑀤𑀺𑀝𑁆𑀞𑀺𑀬𑀸.

𑀅𑀓𑀢𑀸𑀬 𑀓𑀢𑀸𑀬𑀸𑀧𑀺, 𑀓𑀢𑀸𑀓𑀢𑀸𑀬𑀫𑁂𑀯 𑀘;

𑀏𑀯𑀁 𑀦𑀯𑀯𑀺𑀥𑀸 𑀯𑀼𑀢𑁆𑀢𑀸, 𑀬𑀣𑀸𑀪𑀽𑀢𑁂𑀦 𑀜𑀸𑀬𑀢𑁄.

𑀧𑀸𑀭𑀸𑀚𑀺𑀓𑁄 𑀯𑀺𑀧𑁆𑀧𑀓𑀢𑀸, 𑀧𑀘𑁆𑀘𑀓𑁆𑀔𑀸𑀢𑁄 𑀢𑀣𑁂𑀯 𑀘;

𑀉𑀧𑁂𑀢𑀺 𑀧𑀘𑁆𑀘𑀸𑀤𑀺𑀬𑀢𑀺, 𑀧𑀘𑁆𑀘𑀸𑀤𑀸𑀦𑀓𑀣𑀸 𑀘 𑀬𑀸.

𑀲𑀻𑀮𑀸𑀘𑀸𑀭𑀯𑀺𑀧𑀢𑁆𑀢𑀺 𑀘, 𑀢𑀣𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸;

𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁, 𑀤𑀲𑀥𑀸 𑀢𑀁 𑀯𑀺𑀚𑀸𑀦𑀸𑀣.

𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀢𑀺 𑀪𑀺𑀓𑁆𑀔𑀼𑀁, 𑀅𑀜𑁆𑀜𑁄 𑀘𑀸𑀭𑁄𑀘𑀬𑀸𑀢𑀺 𑀢𑀁;

𑀲𑁄 𑀬𑁂𑀯 𑀢𑀲𑁆𑀲 𑀅𑀓𑁆𑀔𑀸𑀢𑀺 [𑀯𑀺𑀧𑀲𑁆𑀲𑀜𑁆𑀜𑁄 𑀘𑀸𑀭𑁄𑀘𑀢𑀺; 𑀢𑀁 𑀲𑀼𑀤𑁆𑀥𑁂𑀯 𑀢𑀲𑁆𑀲 𑀅𑀓𑁆𑀔𑀸𑀢𑀺 (𑀓.)], 𑀧𑀸𑀢𑀺𑀫𑁄𑀓𑁆𑀔𑀁 𑀞𑀧𑁂𑀢𑀺 𑀲𑁄.

𑀯𑀼𑀝𑁆𑀞𑀸𑀢𑀺 𑀅𑀦𑁆𑀢𑀭𑀸𑀬𑁂𑀦, 𑀭𑀸𑀚𑀘𑁄𑀭𑀕𑁆𑀕𑀼𑀤𑀓𑀸 𑀘;

𑀫𑀦𑀼𑀲𑁆𑀲𑀅𑀫𑀦𑀼𑀲𑁆𑀲𑀸 𑀘, 𑀯𑀸𑀴𑀲𑀭𑀻𑀲𑀧𑀸 𑀚𑀻𑀯𑀺𑀩𑁆𑀭𑀳𑁆𑀫𑀁.

𑀤𑀲𑀦𑁆𑀦𑀫𑀜𑁆𑀜𑀢𑀭𑁂𑀦, 𑀢𑀲𑁆𑀫𑀺𑀁 𑀅𑀜𑁆𑀜𑀢𑀭𑁂𑀲𑀼 𑀯𑀸;

𑀥𑀫𑁆𑀫𑀺𑀓𑀸𑀥𑀫𑁆𑀫𑀺𑀓𑀸 𑀘𑁂𑀯, 𑀬𑀣𑀸 𑀫𑀕𑁆𑀕𑁂𑀦 𑀚𑀸𑀦𑀸𑀣.

𑀓𑀸𑀮𑀪𑀽𑀢𑀢𑁆𑀣𑀲𑀁𑀳𑀺𑀢𑀁, 𑀮𑀪𑀺𑀲𑁆𑀲𑀸𑀫𑀺 𑀪𑀯𑀺𑀲𑁆𑀲𑀢𑀺;

𑀓𑀸𑀬𑀯𑀸𑀘𑀲𑀺𑀓𑀸 𑀫𑁂𑀢𑁆𑀢𑀸, 𑀩𑀸𑀳𑀼𑀲𑀘𑁆𑀘𑀁 𑀉𑀪𑀬𑀸𑀦𑀺.

𑀓𑀸𑀮𑀪𑀽𑀢𑁂𑀦 𑀲𑀡𑁆𑀳𑁂𑀦, 𑀅𑀢𑁆𑀣𑀫𑁂𑀢𑁆𑀢𑁂𑀦 𑀘𑁄𑀤𑀬𑁂;

𑀯𑀺𑀧𑁆𑀧𑀝𑀺𑀲𑀸𑀭𑀥𑀫𑁆𑀫𑁂𑀦, 𑀢𑀣𑀸 𑀯𑀸𑀘𑀸 [𑀢𑀣𑁂𑀯𑀸𑀧𑀺 (𑀲𑁆𑀬𑀸.)] 𑀯𑀺𑀦𑁄𑀤𑀬𑁂.

𑀥𑀫𑁆𑀫𑀘𑁄𑀤𑀘𑀼𑀤𑀺𑀢𑀲𑁆𑀲, 𑀯𑀺𑀦𑁄𑀤𑁂𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄;

𑀓𑀭𑀼𑀡𑀸 𑀳𑀺𑀢𑀸𑀦𑀼𑀓𑀫𑁆𑀧𑀺, 𑀯𑀼𑀝𑁆𑀞𑀸𑀦𑀧𑀼𑀭𑁂𑀓𑁆𑀔𑀸𑀭𑀢𑁄.

𑀘𑁄𑀤𑀓𑀲𑁆𑀲 𑀧𑀝𑀺𑀧𑀢𑁆𑀢𑀺, 𑀲𑀫𑁆𑀩𑀼𑀤𑁆𑀥𑁂𑀦 𑀧𑀓𑀸𑀲𑀺𑀢𑀸;

𑀲𑀘𑁆𑀘𑁂 𑀘𑁂𑀯 𑀅𑀓𑀼𑀧𑁆𑀧𑁂 𑀘, 𑀘𑀼𑀤𑀺𑀢𑀲𑁆𑀲𑁂𑀯 𑀥𑀫𑁆𑀫𑀢𑀸𑀢𑀺.

𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀁 𑀦𑀺𑀝𑁆𑀞𑀺𑀢𑀁.