𑁧. 𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸

𑁩𑁫𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀉𑀧𑀸𑀳𑀦𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀙𑀢𑁆𑀢𑀧𑀕𑁆𑀕𑀳𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀑𑀕𑀼𑀡𑁆𑀞𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀲𑀻𑀲𑁂𑀧𑀺 𑀘𑀻𑀯𑀭𑀁 𑀓𑀭𑀺𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀧𑀸𑀦𑀻𑀬𑁂𑀦𑀧𑀺 𑀧𑀸𑀤𑁂 𑀥𑁄𑀯𑀦𑁆𑀢𑀺, 𑀯𑀼𑀟𑁆𑀠𑀢𑀭𑁂𑀧𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀦𑀧𑀺 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀅𑀜𑁆𑀜𑀢𑀭𑁄𑀧𑀺 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀅𑀦𑀚𑁆𑀛𑀸𑀯𑀼𑀝𑁆𑀞𑀁 𑀯𑀺𑀳𑀸𑀭𑀁 𑀖𑀝𑀺𑀓𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀓𑀯𑀸𑀝𑀁 𑀧𑀡𑀸𑀫𑁂𑀢𑁆𑀯𑀸 𑀲𑀳𑀲𑀸 𑀧𑀸𑀯𑀺𑀲𑀺. 𑀢𑀲𑁆𑀲 𑀉𑀧𑀭𑀺𑀧𑀺𑀝𑁆𑀞𑀺𑀢𑁄 [𑀉𑀧𑀭𑀺𑀧𑀺𑀝𑁆𑀞𑀢𑁄 (?)] 𑀅𑀳𑀺 𑀔𑀦𑁆𑀥𑁂 𑀧𑀧𑀢𑀺. 𑀲𑁄 𑀪𑀻𑀢𑁄 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀪𑀺𑀓𑁆𑀔𑀽 𑀉𑀧𑀥𑀸𑀯𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀯𑀺𑀲𑁆𑀲𑀭𑀫𑀓𑀸𑀲𑀻’’𑀢𑀺? 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀉𑀧𑀸𑀳𑀦𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀙𑀢𑁆𑀢𑀧𑀕𑁆𑀕𑀳𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀑𑀕𑀼𑀡𑁆𑀞𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀲𑀻𑀲𑁂𑀧𑀺 𑀘𑀻𑀯𑀭𑀁 𑀓𑀭𑀺𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀧𑀸𑀦𑀻𑀬𑁂𑀦𑀧𑀺 𑀧𑀸𑀤𑁂 𑀥𑁄𑀯𑀺𑀲𑁆𑀲𑀦𑁆𑀢𑀺, 𑀯𑀼𑀟𑁆𑀠𑀢𑀭𑁂𑀧𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀦 𑀅𑀪𑀺𑀯𑀸𑀤𑁂𑀲𑁆𑀲𑀦𑁆𑀢𑀺, 𑀦𑀧𑀺 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, ‘‘𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀉𑀧𑀸𑀳𑀦𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀙𑀢𑁆𑀢𑀧𑀕𑁆𑀕𑀳𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀑𑀕𑀼𑀡𑁆𑀞𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀲𑀻𑀲𑁂𑀧𑀺 𑀘𑀻𑀯𑀭𑀁 𑀓𑀭𑀺𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀧𑀸𑀦𑀻𑀬𑁂𑀦𑀺𑀧𑀺 𑀧𑀸𑀤𑁂 𑀥𑁄𑀯𑀦𑁆𑀢𑀺, 𑀯𑀼𑀟𑁆𑀠𑀢𑀭𑁂𑀧𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀦𑀧𑀺 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀲𑀘𑁆𑀘𑀁 𑀪𑀕𑀯𑀸𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀯𑁂 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀲𑀉𑀧𑀸𑀳𑀦𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀙𑀢𑁆𑀢𑀧𑀕𑁆𑀕𑀳𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀑𑀕𑀼𑀡𑁆𑀞𑀺𑀢𑀸𑀧𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀲𑀻𑀲𑁂𑀧𑀺 𑀘𑀻𑀯𑀭𑀁 𑀓𑀭𑀺𑀢𑁆𑀯𑀸 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀦𑁆𑀢𑀺, 𑀧𑀸𑀦𑀻𑀬𑁂𑀦𑀧𑀺 𑀧𑀸𑀤𑁂 𑀥𑁄𑀯𑀺𑀲𑁆𑀲𑀦𑁆𑀢𑀺, 𑀯𑀼𑀟𑁆𑀠𑀢𑀭𑁂𑀧𑀺 𑀆𑀯𑀸𑀲𑀺𑀓𑁂 𑀪𑀺𑀓𑁆𑀔𑀽 𑀦 𑀅𑀪𑀺𑀯𑀸𑀤𑁂𑀲𑁆𑀲𑀦𑁆𑀢𑀺, 𑀦𑀧𑀺 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀦𑁂𑀢𑀁 𑀪𑀺𑀓𑁆𑀔𑀯𑁂 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁫𑁭. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀆𑀕𑀦𑁆𑀢𑀼𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀇𑀤𑀸𑀦𑀺 𑀆𑀭𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’𑀢𑀺 𑀉𑀧𑀸𑀳𑀦𑀸 𑀑𑀫𑀼𑀜𑁆𑀘𑀺𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀙𑀢𑁆𑀢𑀁 𑀅𑀧𑀦𑀸𑀫𑁂𑀢𑁆𑀯𑀸 𑀲𑀻𑀲𑀁 𑀯𑀺𑀯𑀭𑀺𑀢𑁆𑀯𑀸 𑀲𑀻𑀲𑁂 𑀘𑀻𑀯𑀭𑀁 [𑀯𑀺𑀯𑀭𑀺𑀢𑁆𑀯𑀸 𑀘𑀻𑀯𑀭𑀁 (𑀓.)] 𑀔𑀦𑁆𑀥𑁂 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀢𑀭𑀫𑀸𑀦𑁂𑀦 𑀆𑀭𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄. 𑀆𑀭𑀸𑀫𑀁 𑀧𑀯𑀺𑀲𑀦𑁆𑀢𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁 𑁋 ‘𑀓𑀢𑁆𑀣 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀻’𑀢𑀺? 𑀬𑀢𑁆𑀣 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀺 𑁋 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀯𑀸 𑀫𑀡𑁆𑀟𑀧𑁂 𑀯𑀸 𑀭𑀼𑀓𑁆𑀔𑀫𑀽𑀮𑁂 𑀯𑀸 𑁋 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀏𑀓𑀫𑀦𑁆𑀢𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀧𑀢𑀺𑀭𑀽𑀧𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀧𑀸𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀧𑀭𑀺𑀪𑁄𑀚𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑁋 ‘𑀓𑀢𑀫𑀁 𑀧𑀸𑀦𑀻𑀬𑀁, 𑀓𑀢𑀫𑀁 𑀧𑀭𑀺𑀪𑁄𑀚𑀦𑀻𑀬’𑀦𑁆𑀢𑀺? 𑀲𑀘𑁂 𑀧𑀸𑀦𑀻𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀧𑀸𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀕𑀳𑁂𑀢𑁆𑀯𑀸 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸. 𑀧𑀸𑀤𑁂 𑀥𑁄𑀯𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁, 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸. 𑀢𑁂𑀦𑁂𑀯 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁 [𑀬𑁂𑀦 𑀳𑀢𑁆𑀣𑁂𑀦 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁 (𑀲𑁆𑀬𑀸.)] 𑀦 𑀢𑁂𑀦𑁂𑀯 𑀳𑀢𑁆𑀣𑁂𑀦 𑀧𑀸𑀤𑀸 𑀥𑁄𑀯𑀺𑀢𑀩𑁆𑀩𑀸. 𑀉𑀧𑀸𑀳𑀦𑀧𑀼𑀜𑁆𑀙𑀦𑀘𑁄𑀴𑀓𑀁 𑀧𑀼𑀘𑁆𑀙𑀺𑀢𑁆𑀯𑀸 𑀉𑀧𑀸𑀳𑀦𑀸 𑀧𑀼𑀜𑁆𑀙𑀺𑀢𑀩𑁆𑀩𑀸. 𑀉𑀧𑀸𑀳𑀦𑀸 𑀧𑀼𑀜𑁆𑀙𑀦𑁆𑀢𑁂𑀦 𑀧𑀞𑀫𑀁 𑀲𑀼𑀓𑁆𑀔𑁂𑀦 𑀘𑁄𑀴𑀓𑁂𑀦 𑀧𑀼𑀜𑁆𑀙𑀺𑀢𑀩𑁆𑀩𑀸, 𑀧𑀘𑁆𑀙𑀸 𑀅𑀮𑁆𑀮𑁂𑀦. 𑀉𑀧𑀸𑀳𑀦𑀸𑀧𑀼𑀜𑁆𑀙𑀦𑀘𑁄𑀴𑀓𑀁 𑀥𑁄𑀯𑀺𑀢𑁆𑀯𑀸 [𑀧𑀻𑀴𑁂𑀢𑁆𑀯𑀸 (𑀲𑁆𑀬𑀸.)] 𑀏𑀓𑀫𑀦𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁.

‘‘𑀲𑀘𑁂 𑀆𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀯𑀼𑀟𑁆𑀠𑁄 𑀳𑁄𑀢𑀺, 𑀅𑀪𑀺𑀯𑀸𑀤𑁂𑀢𑀩𑁆𑀩𑁄. 𑀲𑀘𑁂 𑀦𑀯𑀓𑁄 𑀳𑁄𑀢𑀺, 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑁄. 𑀲𑁂𑀦𑀸𑀲𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑁋 ‘𑀓𑀢𑀫𑀁 𑀫𑁂 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’𑀢𑀺? 𑀅𑀚𑁆𑀛𑀸𑀯𑀼𑀝𑁆𑀞𑀁 𑀯𑀸 𑀅𑀦𑀚𑁆𑀛𑀸𑀯𑀼𑀝𑁆𑀞𑀁 𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀕𑁄𑀘𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀅𑀕𑁄𑀘𑀭𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀲𑁂𑀓𑁆𑀔𑀲𑀫𑁆𑀫𑀢𑀸𑀦𑀺 [𑀲𑁂𑀔𑀲𑀫𑁆𑀫𑀢𑀸𑀦𑀺 (𑀓.)] 𑀓𑀼𑀮𑀸𑀦𑀺 𑀧𑀼𑀘𑁆𑀙𑀺𑀢𑀩𑁆𑀩𑀸𑀦𑀺, 𑀯𑀘𑁆𑀘𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀧𑀸𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀧𑀭𑀺𑀪𑁄𑀚𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀓𑀢𑁆𑀢𑀭𑀤𑀡𑁆𑀟𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀲𑀗𑁆𑀖𑀲𑁆𑀲 𑀓𑀢𑀺𑀓𑀲𑀡𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑀩𑁆𑀩𑀁 𑁋 ‘𑀓𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀓𑀁 𑀓𑀸𑀮𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’𑀦𑁆𑀢𑀺? 𑀲𑀘𑁂 𑀯𑀺𑀳𑀸𑀭𑁄 𑀅𑀦𑀚𑁆𑀛𑀸𑀯𑀼𑀝𑁆𑀞𑁄 𑀳𑁄𑀢𑀺, 𑀓𑀯𑀸𑀝𑀁 𑀆𑀓𑁄𑀝𑁂𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀆𑀕𑀫𑁂𑀢𑁆𑀯𑀸 𑀖𑀝𑀺𑀓𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀓𑀯𑀸𑀝𑀁 𑀧𑀡𑀸𑀫𑁂𑀢𑁆𑀯𑀸 𑀩𑀳𑀺 𑀞𑀺𑀢𑁂𑀦 𑀦𑀺𑀮𑁆𑀮𑁄𑀓𑁂𑀢𑀩𑁆𑀩𑁄.

‘‘𑀲𑀘𑁂 𑀯𑀺𑀳𑀸𑀭𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀫𑀜𑁆𑀘𑁂 𑀯𑀸 𑀫𑀜𑁆𑀘𑁄 𑀆𑀭𑁄𑀧𑀺𑀢𑁄 𑀳𑁄𑀢𑀺, 𑀧𑀻𑀞𑁂 𑀯𑀸 𑀧𑀻𑀞𑀁 𑀆𑀭𑁄𑀧𑀺𑀢𑀁 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀉𑀧𑀭𑀺 𑀧𑀼𑀜𑁆𑀚𑀻𑀓𑀢𑀁 [𑀧𑀼𑀜𑁆𑀚𑀓𑀺𑀢𑀁 (𑀓.)] 𑀳𑁄𑀢𑀺, 𑀲𑀘𑁂 𑀉𑀲𑁆𑀲𑀳𑀢𑀺, 𑀲𑁄𑀥𑁂𑀢𑀩𑁆𑀩𑁄. [𑀫𑀳𑀸𑀯. 𑁬𑁬-𑁬𑁭 (𑀣𑁄𑀓𑀁 𑀯𑀺𑀲𑀤𑀺𑀲𑀁)] 𑀯𑀺𑀳𑀸𑀭𑀁 𑀲𑁄𑀥𑁂𑀦𑁆𑀢𑁂𑀦 𑀧𑀞𑀫𑀁 𑀪𑀽𑀫𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀸; 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀫𑀜𑁆𑀘𑁄 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀧𑀻𑀞𑀁 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁; 𑀔𑁂𑀴𑀫𑀮𑁆𑀮𑀓𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄; 𑀅𑀧𑀲𑁆𑀲𑁂𑀦𑀨𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀲𑀘𑁂 𑀯𑀺𑀳𑀸𑀭𑁂 𑀲𑀦𑁆𑀢𑀸𑀦𑀓𑀁 𑀳𑁄𑀢𑀺, 𑀉𑀮𑁆𑀮𑁄𑀓𑀸 𑀧𑀞𑀫𑀁 𑀑𑀳𑀸𑀭𑁂𑀢𑀩𑁆𑀩𑀁, 𑀆𑀮𑁄𑀓𑀲𑀦𑁆𑀥𑀺𑀓𑀡𑁆𑀡𑀪𑀸𑀕𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺 𑀓𑀡𑁆𑀡𑀓𑀺𑀢𑀸 𑀳𑁄𑀢𑀺, 𑀘𑁄𑀴𑀓𑀁 𑀢𑁂𑀫𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀓𑀢𑀸 𑀳𑁄𑀢𑀺 𑀪𑀽𑀫𑀺, 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀺𑀢𑁆𑀯𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸 𑁋 𑀫𑀸 𑀯𑀺𑀳𑀸𑀭𑁄 𑀭𑀚𑁂𑀦 𑀉𑀳𑀜𑁆𑀜𑀻𑀢𑀺 [𑀊𑀳𑀜𑁆𑀜𑀻𑀢𑀺 (𑀲𑀻. 𑀲𑁆𑀬𑀸.)]. 𑀲𑀗𑁆𑀓𑀸𑀭𑀁 𑀯𑀺𑀘𑀺𑀦𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀙𑀟𑁆𑀟𑁂𑀢𑀩𑁆𑀩𑀁.

‘‘𑀪𑀽𑀫𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 [𑀬𑀣𑀸𑀧𑀜𑁆𑀜𑀢𑁆𑀢𑀁 (𑀲𑀻. 𑀲𑁆𑀬𑀸.), 𑀬𑀣𑀸𑀪𑀸𑀕𑀁 (𑀓.)] 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 [𑀬𑀣𑀸𑀪𑀸𑀕𑀁 (𑀲𑁆𑀬𑀸. 𑀓.)] 𑀞𑀧𑁂𑀢𑀩𑁆𑀩𑀸. 𑀫𑀜𑁆𑀘𑁄 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 [𑀬𑀣𑀸𑀪𑀸𑀕𑀁 (𑀲𑁆𑀬𑀸. 𑀓.)] 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀧𑀻𑀞𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀦𑀻𑀘𑀁 𑀓𑀢𑁆𑀯𑀸 𑀲𑀸𑀥𑀼𑀓𑀁 𑀅𑀧𑁆𑀧𑀝𑀺𑀖𑀁𑀲𑀦𑁆𑀢𑁂𑀦, 𑀅𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀦 𑀓𑀯𑀸𑀝𑀧𑀺𑀝𑁆𑀞𑀁, 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀞𑀸𑀦𑁂 [𑀬𑀣𑀸𑀪𑀸𑀕𑀁 (𑀲𑁆𑀬𑀸. 𑀓.)] 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀪𑀸𑀕𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑀁 𑀑𑀢𑀸𑀧𑁂𑀢𑁆𑀯𑀸 𑀲𑁄𑀥𑁂𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀪𑀸𑀕𑀁 𑀧𑀜𑁆𑀜𑀧𑁂𑀢𑀩𑁆𑀩𑀁. 𑀔𑁂𑀴𑀫𑀮𑁆𑀮𑀓𑁄 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀪𑀸𑀕𑀁 𑀞𑀧𑁂𑀢𑀩𑁆𑀩𑁄. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀑𑀢𑀸𑀧𑁂𑀢𑁆𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀅𑀢𑀺𑀳𑀭𑀺𑀢𑁆𑀯𑀸 𑀬𑀣𑀸𑀪𑀸𑀕𑀁 𑀞𑀧𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀳𑁂𑀝𑁆𑀞𑀸𑀫𑀜𑁆𑀘𑀁 𑀯𑀸 𑀳𑁂𑀝𑁆𑀞𑀸𑀧𑀻𑀞𑀁 𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀦 𑀘 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑁄 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄. 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀘𑀻𑀯𑀭𑀯𑀁𑀲𑀁 𑀯𑀸 𑀘𑀻𑀯𑀭𑀭𑀚𑁆𑀚𑀼𑀁 𑀯𑀸 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀭𑀢𑁄 𑀅𑀦𑁆𑀢𑀁 𑀑𑀭𑀢𑁄 𑀪𑁄𑀕𑀁 𑀓𑀢𑁆𑀯𑀸 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁.

‘‘𑀲𑀘𑁂 𑀧𑀼𑀭𑀢𑁆𑀣𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀧𑀘𑁆𑀙𑀺𑀫𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀢𑁆𑀢𑀭𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀉𑀢𑁆𑀢𑀭𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀤𑀓𑁆𑀔𑀺𑀡𑀸 𑀲𑀭𑀚𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀤𑀓𑁆𑀔𑀺𑀡𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀲𑀻𑀢𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀯𑀺𑀯𑀭𑀺𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀣𑀓𑁂𑀢𑀩𑁆𑀩𑀸. 𑀲𑀘𑁂 𑀉𑀡𑁆𑀳𑀓𑀸𑀮𑁄 𑀳𑁄𑀢𑀺, 𑀤𑀺𑀯𑀸 𑀯𑀸𑀢𑀧𑀸𑀦𑀸 𑀣𑀓𑁂𑀢𑀩𑁆𑀩𑀸, 𑀭𑀢𑁆𑀢𑀺𑀁 𑀯𑀺𑀯𑀭𑀺𑀢𑀩𑁆𑀩𑀸.

‘‘𑀲𑀘𑁂 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀁. 𑀲𑀘𑁂 𑀓𑁄𑀝𑁆𑀞𑀓𑁄 𑀉𑀓𑁆𑀮𑀸𑀧𑁄 𑀳𑁄𑀢𑀺, 𑀓𑁄𑀝𑁆𑀞𑀓𑁄 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑁄. 𑀲𑀘𑁂 𑀉𑀧𑀝𑁆𑀞𑀸𑀦𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀅𑀕𑁆𑀕𑀺𑀲𑀸𑀮𑀸 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀅𑀕𑁆𑀕𑀺𑀲𑀸𑀮𑀸 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀯𑀘𑁆𑀘𑀓𑀼𑀝𑀺 𑀉𑀓𑁆𑀮𑀸𑀧𑀸 𑀳𑁄𑀢𑀺, 𑀯𑀘𑁆𑀘𑀓𑀼𑀝𑀺 𑀲𑀫𑁆𑀫𑀚𑁆𑀚𑀺𑀢𑀩𑁆𑀩𑀸. 𑀲𑀘𑁂 𑀧𑀸𑀦𑀻𑀬𑀁 𑀦 𑀳𑁄𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀭𑀺𑀪𑁄𑀚𑀦𑀻𑀬𑀁 𑀦 𑀳𑁄𑀢𑀺, 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀁. 𑀲𑀘𑁂 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀦 𑀳𑁄𑀢𑀺, 𑀆𑀘𑀫𑀦𑀓𑀼𑀫𑁆𑀪𑀺𑀬𑀸 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑀩𑁆𑀩𑀁. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀕𑀦𑁆𑀢𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀬𑀣𑀸 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.