𑁨. 𑀆𑀯𑀸𑀲𑀺𑀓𑀯𑀢𑁆𑀢𑀓𑀣𑀸

𑁩𑁫𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀦𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀦 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀦𑁆𑀢𑀺, 𑀦 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀦𑁆𑀢𑀺 [𑀦 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀦𑁆𑀢𑀺, 𑀦 𑀧𑀭𑀺𑀪𑁄𑀚𑀦𑀻𑀬𑁂𑀦 𑀧𑀼𑀘𑁆𑀙𑀦𑁆𑀢𑀺 (𑀲𑁆𑀬𑀸. 𑀓𑀁.)], 𑀦 𑀯𑀼𑀟𑁆𑀠𑀢𑀭𑁂𑀧𑀺 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀦 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀦𑁂𑀯 𑀆𑀲𑀦𑀁 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺, 𑀦 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀦 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑀺𑀲𑁆𑀲𑀦𑁆𑀢𑀺, 𑀦 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀯𑀼𑀟𑁆𑀠𑀢𑀭𑁂𑀧𑀺 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀦 𑀅𑀪𑀺𑀯𑀸𑀤𑁂𑀲𑁆𑀲𑀦𑁆𑀢𑀺, 𑀦 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀲𑀘𑁆𑀘𑀁 𑀪𑀕𑀯𑀸𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁫𑁯. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀬𑀣𑀸 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀆𑀯𑀸𑀲𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀆𑀕𑀦𑁆𑀢𑀼𑀓𑀁 𑀪𑀺𑀓𑁆𑀔𑀼𑀁 𑀯𑀼𑀟𑁆𑀠𑀢𑀭𑀁 𑀤𑀺𑀲𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁, 𑀧𑀸𑀤𑁄𑀤𑀓𑀁 𑀧𑀸𑀤𑀧𑀻𑀞𑀁 𑀧𑀸𑀤𑀓𑀣𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄 [𑀧𑀸𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀧𑀭𑀺𑀪𑁄𑀚𑀦𑀻𑀬𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑁄 (𑀲𑁆𑀬𑀸.)]. 𑀲𑀘𑁂 𑀉𑀲𑁆𑀲𑀳𑀢𑀺, 𑀉𑀧𑀸𑀳𑀦𑀸 𑀧𑀼𑀜𑁆𑀙𑀺𑀢𑀩𑁆𑀩𑀸. 𑀉𑀧𑀸𑀳𑀦𑀸 𑀧𑀼𑀜𑁆𑀙𑀦𑁆𑀢𑁂𑀦 𑀧𑀞𑀫𑀁 𑀲𑀼𑀓𑁆𑀔𑁂𑀦 𑀘𑁄𑀴𑀓𑁂𑀦 𑀧𑀼𑀜𑁆𑀙𑀺𑀢𑀩𑁆𑀩𑀸, 𑀧𑀘𑁆𑀙𑀸 𑀅𑀮𑁆𑀮𑁂𑀦. 𑀉𑀧𑀸𑀳𑀦𑀸𑀧𑀼𑀜𑁆𑀙𑀦𑀘𑁄𑀴𑀓𑀁 𑀥𑁄𑀯𑀺𑀢𑁆𑀯𑀸 [𑀥𑁄𑀯𑀺𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 (𑀲𑁆𑀬𑀸.)] 𑀏𑀓𑀫𑀦𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁.

‘‘𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀯𑀼𑀟𑁆𑀠𑀢𑀭𑁄 𑀅𑀪𑀺𑀯𑀸𑀤𑁂𑀢𑀩𑁆𑀩𑁄. 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀩𑁆𑀩𑀁 𑁋 ‘𑀏𑀢𑀁 𑀢𑁂 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’𑀢𑀺. 𑀅𑀚𑁆𑀛𑀸𑀯𑀼𑀝𑁆𑀞𑀁 𑀯𑀸 𑀅𑀦𑀚𑁆𑀛𑀸𑀯𑀼𑀝𑁆𑀞𑀁 𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀕𑁄𑀘𑀭𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀅𑀕𑁄𑀘𑀭𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀲𑁂𑀓𑁆𑀔𑀲𑀫𑁆𑀫𑀢𑀸𑀦𑀺 𑀓𑀼𑀮𑀸𑀦𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀦𑀺. 𑀯𑀘𑁆𑀘𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀸𑀦𑀻𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀭𑀺𑀪𑁄𑀚𑀦𑀻𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀓𑀢𑁆𑀢𑀭𑀤𑀡𑁆𑀟𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀲𑀗𑁆𑀖𑀲𑁆𑀲 𑀓𑀢𑀺𑀓𑀲𑀡𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀇𑀫𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀇𑀫𑀁 𑀓𑀸𑀮𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’𑀦𑁆𑀢𑀺.

‘‘𑀲𑀘𑁂 𑀦𑀯𑀓𑁄 𑀳𑁄𑀢𑀺, 𑀦𑀺𑀲𑀺𑀦𑁆𑀦𑀓𑁂𑀦𑁂𑀯 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀅𑀢𑁆𑀭 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀸𑀳𑀺, 𑀅𑀢𑁆𑀭 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀸𑀳𑀺, 𑀇𑀤𑀁 𑀆𑀲𑀦𑀁 𑀦𑀺𑀲𑀻𑀤𑀸𑀳𑀻’𑀢𑀺. 𑀧𑀸𑀦𑀻𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀭𑀺𑀪𑁄𑀚𑀦𑀻𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀉𑀧𑀸𑀳𑀦𑀸𑀧𑀼𑀜𑁆𑀙𑀦𑀘𑁄𑀴𑀓𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀆𑀕𑀦𑁆𑀢𑀼𑀓𑁄 𑀪𑀺𑀓𑁆𑀔𑀼 𑀦𑀯𑀓𑁄 𑀅𑀪𑀺𑀯𑀸𑀤𑀸𑀧𑁂𑀢𑀩𑁆𑀩𑁄. 𑀲𑁂𑀦𑀸𑀲𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀏𑀢𑀁 𑀢𑁂 𑀲𑁂𑀦𑀸𑀲𑀦𑀁 𑀧𑀸𑀧𑀼𑀡𑀸𑀢𑀻’𑀢𑀺. 𑀅𑀚𑁆𑀛𑀸𑀯𑀼𑀝𑁆𑀞𑀁 𑀯𑀸 𑀅𑀦𑀚𑁆𑀛𑀸𑀯𑀼𑀝𑁆𑀞𑀁 𑀯𑀸 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀕𑁄𑀘𑀭𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀅𑀕𑁄𑀘𑀭𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀲𑁂𑀓𑁆𑀔𑀲𑀫𑁆𑀫𑀢𑀸𑀦𑀺 𑀓𑀼𑀮𑀸𑀦𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀦𑀺. 𑀯𑀘𑁆𑀘𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀸𑀦𑀻𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀧𑀭𑀺𑀪𑁄𑀚𑀦𑀻𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀓𑀢𑁆𑀢𑀭𑀤𑀡𑁆𑀟𑁄 𑀆𑀘𑀺𑀓𑁆𑀔𑀺𑀢𑀩𑁆𑀩𑁄. 𑀲𑀗𑁆𑀖𑀲𑁆𑀲 𑀓𑀢𑀺𑀓𑀲𑀡𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁 𑁋 ‘𑀇𑀫𑀁 𑀓𑀸𑀮𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀇𑀫𑀁 𑀓𑀸𑀮𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’𑀦𑁆𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀆𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀬𑀣𑀸 𑀆𑀯𑀸𑀲𑀺𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺.