𑁩. 𑀢𑀢𑀺𑀬𑀪𑀸𑀡𑀯𑀸𑀭𑁄

𑁩𑁧𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀕𑀸𑀫𑀓𑀸𑀯𑀸𑀲𑀁 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀲𑁂𑀦𑀸𑀲𑀦𑀁 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀪𑀡𑁆𑀟𑀦𑀓𑀸𑀭𑀓𑁄 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄. 𑀲𑀘𑀸𑀬𑀁 𑀇𑀥 𑀯𑀲𑁆𑀲𑀁 𑀯𑀲𑀺𑀲𑁆𑀲𑀢𑀺, 𑀲𑀩𑁆𑀩𑁂𑀯 𑀫𑀬𑀁 𑀦 𑀨𑀸𑀲𑀼 𑀪𑀯𑀺𑀲𑁆𑀲𑀸𑀫. 𑀳𑀦𑁆𑀤 𑀦𑀁 𑀧𑀼𑀘𑁆𑀙𑀸𑀫𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀦𑀦𑀼 𑀢𑀬𑀸, 𑀆𑀯𑀼𑀲𑁄 𑀉𑀧𑀦𑀦𑁆𑀤, 𑀲𑀸𑀯𑀢𑁆𑀣𑀺𑀬𑀁 𑀲𑁂𑀦𑀸𑀲𑀦𑀁 𑀕𑀳𑀺𑀢’’𑀦𑁆𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. ‘‘𑀓𑀺𑀁 𑀧𑀦 𑀢𑁆𑀯𑀁, 𑀆𑀯𑀼𑀲𑁄 𑀉𑀧𑀦𑀦𑁆𑀤, 𑀏𑀓𑁄 𑀤𑁆𑀯𑁂 𑀧𑀝𑀺𑀩𑀸𑀳𑀲𑀻’’𑀢𑀺? ‘‘𑀇𑀥𑀤𑀸𑀦𑀸𑀳𑀁 𑀆𑀯𑀼𑀲𑁄, 𑀫𑀼𑀜𑁆𑀘𑀸𑀫𑀺; 𑀢𑀢𑁆𑀣 𑀕𑀡𑁆𑀳𑀸𑀫𑀻’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀏𑀓𑁄 𑀤𑁆𑀯𑁂 𑀧𑀝𑀺𑀩𑀸𑀳𑁂𑀲𑁆𑀲𑀢𑀻’’𑀢𑀺! 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀏𑀓𑁄 𑀤𑁆𑀯𑁂 𑀧𑀝𑀺𑀩𑀸𑀳𑀲𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀏𑀓𑁄 𑀤𑁆𑀯𑁂 𑀧𑀝𑀺𑀩𑀸𑀳𑀺𑀲𑁆𑀲𑀲𑀺? 𑀢𑀢𑁆𑀣 𑀢𑀬𑀸, 𑀫𑁄𑀖𑀧𑀼𑀭𑀺𑀲, 𑀕𑀳𑀺𑀢𑀁 𑀇𑀥 𑀫𑀼𑀢𑁆𑀢𑀁, 𑀇𑀥 𑀢𑀬𑀸 𑀕𑀳𑀺𑀢𑀁 𑀢𑀢𑁆𑀭 𑀫𑀼𑀢𑁆𑀢𑀁. 𑀏𑀯𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀉𑀪𑀬𑀢𑁆𑀣 𑀧𑀭𑀺𑀩𑀸𑀳𑀺𑀭𑁄. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀏𑀓𑁂𑀦 𑀤𑁆𑀯𑁂 𑀧𑀝𑀺𑀩𑀸𑀳𑁂𑀢𑀩𑁆𑀩𑀸. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑁩𑁨𑁦. [𑀧𑀸𑀘𑀺. 𑁪𑁩𑁮] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀦𑀬𑀓𑀣𑀁 𑀓𑀣𑁂𑀢𑀺, 𑀯𑀺𑀦𑀬𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀸 𑀔𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀦𑀬𑀓𑀣𑀁 𑀓𑀣𑁂𑀢𑀺, 𑀯𑀺𑀦𑀬𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀸𑀫𑀸’’𑀢𑀺. 𑀢𑁂𑀥 [𑀢𑁂 𑀘 (𑀲𑁆𑀬𑀸. 𑀓.)] 𑀩𑀳𑀽 𑀪𑀺𑀓𑁆𑀔𑀽 𑀣𑁂𑀭𑀸 𑀘 𑀦𑀯𑀸 𑀘 𑀫𑀚𑁆𑀛𑀺𑀫𑀸 𑀘 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺. 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀞𑀺𑀢𑀓𑁄𑀯 𑀉𑀤𑁆𑀤𑀺𑀲𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀭𑀯𑁂𑀦. 𑀣𑁂𑀭𑀸𑀧𑀺 𑀪𑀺𑀓𑁆𑀔𑀽 𑀞𑀺𑀢𑀓𑀸𑀯 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀺 𑀥𑀫𑁆𑀫𑀕𑀸𑀭𑀯𑁂𑀦. 𑀢𑀢𑁆𑀣 𑀣𑁂𑀭𑀸 𑀘𑁂𑀯 𑀪𑀺𑀓𑁆𑀔𑀽 𑀓𑀺𑀮𑀫𑀦𑁆𑀢𑀺, 𑀆𑀬𑀲𑁆𑀫𑀸 𑀘 𑀉𑀧𑀸𑀮𑀺 𑀓𑀺𑀮𑀫𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀯𑀓𑁂𑀦 𑀪𑀺𑀓𑁆𑀔𑀼𑀦𑀸 𑀉𑀤𑁆𑀤𑀺𑀲𑀦𑁆𑀢𑁂𑀦 𑀲𑀫𑀓𑁂 𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀁, 𑀉𑀘𑁆𑀘𑀢𑀭𑁂 𑀯𑀸 𑀥𑀫𑁆𑀫𑀕𑀸𑀭𑀯𑁂𑀦; 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂𑀦 𑀲𑀫𑀓𑁂 𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀁, 𑀦𑀻𑀘𑀢𑀭𑁂 𑀯𑀸 𑀥𑀫𑁆𑀫𑀕𑀸𑀭𑀯𑁂𑀦𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑀳𑀽 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀓𑀸 𑀉𑀤𑁆𑀤𑁂𑀲𑀁 𑀧𑀝𑀺𑀫𑀸𑀦𑁂𑀦𑁆𑀢𑀸 𑀓𑀺𑀮𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀫𑀸𑀦𑀸𑀲𑀦𑀺𑀓𑁂𑀳𑀺 𑀲𑀳 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀲𑀫𑀸𑀦𑀸𑀲𑀦𑀺𑀓𑁄 𑀳𑁄𑀢𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀯𑀲𑁆𑀲𑀦𑁆𑀢𑀭𑁂𑀦 𑀲𑀳 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑀫𑀸𑀦𑀸𑀲𑀦𑀺𑀓𑀸 𑀫𑀜𑁆𑀘𑁂 [𑀏𑀓𑀫𑀜𑁆𑀘𑁂 (𑀲𑁆𑀬𑀸.)] 𑀦𑀺𑀲𑀻𑀤𑀺𑀢𑁆𑀯𑀸 𑀫𑀜𑁆𑀘𑀁 𑀪𑀺𑀦𑁆𑀤𑀺𑀁𑀲𑀼, 𑀧𑀻𑀞𑁂 [𑀏𑀓𑀧𑀻𑀞𑁂 (𑀲𑁆𑀬𑀸.)] 𑀦𑀺𑀲𑀻𑀤𑀺𑀢𑁆𑀯𑀸 𑀧𑀻𑀞𑀁 𑀪𑀺𑀦𑁆𑀤𑀺𑀁𑀲𑀼. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀯𑀕𑁆𑀕𑀲𑁆𑀲 𑀫𑀜𑁆𑀘𑀁, 𑀢𑀺𑀯𑀕𑁆𑀕𑀲𑁆𑀲 𑀧𑀻𑀞’’𑀦𑁆𑀢𑀺. 𑀢𑀺𑀯𑀕𑁆𑀕𑁄𑀧𑀺 𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀜𑁆𑀘𑀁 𑀪𑀺𑀦𑁆𑀤𑀺, 𑀧𑀻𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀻𑀞𑀁 𑀪𑀺𑀦𑁆𑀤𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀼𑀯𑀕𑁆𑀕𑀲𑁆𑀲 𑀫𑀜𑁆𑀘𑀁, 𑀤𑀼𑀯𑀕𑁆𑀕𑀲𑁆𑀲 𑀧𑀻𑀞’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀲𑀫𑀸𑀦𑀸𑀲𑀦𑀺𑀓𑁂𑀳𑀺 𑀲𑀳 𑀤𑀻𑀖𑀸𑀲𑀦𑁂 𑀦𑀺𑀲𑀻𑀤𑀺𑀢𑀼𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀧𑀡𑁆𑀟𑀓𑀁, 𑀫𑀸𑀢𑀼𑀕𑀸𑀫𑀁, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀁, 𑀅𑀲𑀫𑀸𑀦𑀸𑀲𑀦𑀺𑀓𑁂𑀳𑀺 𑀲𑀳 𑀤𑀻𑀖𑀸𑀲𑀦𑁂 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀢𑁆𑀢𑀓𑀁 𑀧𑀘𑁆𑀙𑀺𑀫𑀁 𑀦𑀼 𑀔𑁄 𑀤𑀻𑀖𑀸𑀲𑀦𑀁 𑀳𑁄𑀢𑀻’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀁 𑀢𑀺𑀡𑁆𑀡𑀁 𑀧𑀳𑁄𑀢𑀺, 𑀏𑀢𑁆𑀢𑀓𑀁 𑀧𑀘𑁆𑀙𑀺𑀫𑀁 𑀤𑀻𑀖𑀸𑀲𑀦’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀲𑀸𑀴𑀺𑀦𑁆𑀤𑀁 𑀧𑀸𑀲𑀸𑀤𑀁 𑀓𑀸𑀭𑀸𑀧𑁂𑀢𑀼𑀓𑀸𑀫𑀸 𑀳𑁄𑀢𑀺 𑀳𑀢𑁆𑀣𑀺𑀦𑀔𑀓𑀁. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀧𑀸𑀲𑀸𑀤𑀧𑀭𑀺𑀪𑁄𑀕𑁄 𑀅𑀦𑀼𑀜𑁆𑀜𑀸𑀢𑁄 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀅𑀬𑁆𑀬𑀺𑀓𑀸 𑀓𑀸𑀮𑀗𑁆𑀓𑀢𑀸 𑀳𑁄𑀢𑀺. 𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸𑀬 𑀲𑀗𑁆𑀖𑀲𑁆𑀲 𑀩𑀳𑀼𑀁 𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺, 𑀧𑀮𑁆𑀮𑀗𑁆𑀓𑁄, 𑀕𑁄𑀦𑀓𑁄, 𑀘𑀺𑀢𑁆𑀢𑀓𑁄, 𑀧𑀝𑀺𑀓𑀸, 𑀧𑀝𑀮𑀺𑀓𑀸, 𑀢𑀽𑀮𑀺𑀓𑀸, 𑀯𑀺𑀓𑀢𑀺𑀓𑀸, 𑀉𑀤𑁆𑀤𑀮𑁄𑀫𑀻, 𑀏𑀓𑀦𑁆𑀢𑀮𑁄𑀫𑀻, 𑀓𑀝𑁆𑀝𑀺𑀲𑁆𑀲𑀁, 𑀓𑁄𑀲𑁂𑀬𑁆𑀬𑀁, 𑀓𑀼𑀢𑁆𑀢𑀓𑀁, 𑀳𑀢𑁆𑀣𑀢𑁆𑀣𑀭𑀁, 𑀅𑀲𑁆𑀲𑀢𑁆𑀣𑀭𑀁, 𑀭𑀣𑀢𑁆𑀣𑀭𑀁, 𑀅𑀚𑀺𑀦𑀧𑁆𑀧𑀯𑁂𑀡𑀺, 𑀓𑀤𑀮𑀺𑀫𑀺𑀕𑀧𑁆𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁, 𑀲𑀉𑀢𑁆𑀢𑀭𑀘𑁆𑀙𑀤𑀁, 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀲𑀦𑁆𑀤𑀺𑀬𑀸 𑀧𑀸𑀤𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀧𑀮𑁆𑀮𑀗𑁆𑀓𑀲𑁆𑀲 𑀯𑀸𑀴𑁂 𑀪𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀢𑀽𑀮𑀺𑀓𑀁 𑀯𑀺𑀚𑀝𑁂𑀢𑁆𑀯𑀸 𑀩𑀺𑀩𑁆𑀩𑁄𑀳𑀦𑀁 𑀓𑀸𑀢𑀼𑀁, 𑀅𑀯𑀲𑁂𑀲𑀁 𑀪𑀽𑀫𑀢𑁆𑀣𑀭𑀡𑀁 [𑀲𑀼𑀫𑁆𑀫𑀢𑁆𑀣𑀭𑀡𑀁 (𑀲𑀻. 𑀲𑁆𑀬𑀸.)] 𑀓𑀸𑀢𑀼’’𑀦𑁆𑀢𑀺.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼

𑁩𑁨𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑀸𑀯𑀸𑀲𑁂 𑀆𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀉𑀧𑀤𑁆𑀤𑀼𑀢𑀸 𑀳𑁄𑀦𑁆𑀢𑀺 𑀆𑀕𑀦𑁆𑀢𑀼𑀓𑀕𑀫𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑀸. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀫𑀬𑀁, 𑀆𑀯𑀼𑀲𑁄, 𑀉𑀧𑀤𑁆𑀤𑀼𑀢𑀸 𑀆𑀕𑀦𑁆𑀢𑀼𑀓𑀕𑀫𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑀸. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀏𑀓𑀲𑁆𑀲 𑀤𑁂𑀫. 𑀢𑀲𑁆𑀲 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀏𑀓𑀲𑁆𑀲 𑀅𑀤𑀁𑀲𑀼. 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀸𑀧𑁂𑀣𑀸’’𑀢𑀺. ‘‘𑀦𑀢𑁆𑀣𑀸𑀯𑀼𑀲𑁄, 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁; 𑀲𑀩𑁆𑀩𑀁 𑀅𑀫𑁆𑀳𑁂𑀳𑀺 𑀏𑀓𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺. ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀣𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀻’’𑀢𑀺 [𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 (𑀓.)]! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺? 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀺, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺 [𑀦 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀸𑀦𑀺 (𑀓.)], 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼 𑁋 𑀇𑀤𑀁 𑀧𑀞𑀫𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀯𑀺𑀳𑀸𑀭𑁄, 𑀯𑀺𑀳𑀸𑀭𑀯𑀢𑁆𑀣𑀼 𑁋 𑀇𑀤𑀁 𑀤𑀼𑀢𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁆𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀫𑀜𑁆𑀘𑁄, 𑀧𑀻𑀞𑀁, 𑀪𑀺𑀲𑀺, 𑀩𑀺𑀩𑁆𑀩𑁄𑀳𑀦𑀁 𑁋 𑀇𑀤𑀁 𑀢𑀢𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀮𑁄𑀳𑀓𑀼𑀫𑁆𑀪𑀻, 𑀮𑁄𑀳𑀪𑀸𑀡𑀓𑀁, 𑀮𑁄𑀳𑀯𑀸𑀭𑀓𑁄, 𑀮𑁄𑀳𑀓𑀝𑀸𑀳𑀁, 𑀯𑀸𑀲𑀺, 𑀧𑀭𑀲𑀼 [𑀨𑀭𑀲𑀼 (𑀲𑀻. 𑀲𑁆𑀬𑀸. 𑀓.)], 𑀓𑀼𑀞𑀸𑀭𑀻 [𑀓𑀼𑀥𑀸𑀭𑀻 (𑀓.)], 𑀓𑀼𑀤𑀸𑀮𑁄, 𑀦𑀺𑀔𑀸𑀤𑀦𑀁 𑁋 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀯𑀮𑁆𑀮𑀺, 𑀯𑁂𑀴𑀼, 𑀫𑀼𑀜𑁆𑀚𑀁, 𑀧𑀩𑁆𑀩𑀚𑀁 [𑀩𑀩𑁆𑀩𑀚𑀁 (𑀲𑀻.)], 𑀢𑀺𑀡𑀁, 𑀫𑀢𑁆𑀢𑀺𑀓𑀸, 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟𑀁 𑁋 𑀇𑀤𑀁 𑀧𑀜𑁆𑀘𑀫𑀁 𑀅𑀯𑀺𑀲𑁆𑀲𑀚𑁆𑀚𑀺𑀬𑀁, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀯𑀺𑀲𑁆𑀲𑀚𑁆𑀚𑀺𑀬𑀸𑀦𑀺, 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸𑀦𑀺, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺𑀧𑀺 𑀅𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀅𑀯𑁂𑀪𑀗𑁆𑀕𑀺𑀬𑀯𑀢𑁆𑀣𑀼

𑁩𑁨𑁨. 𑀅𑀣 𑀔𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀓𑀻𑀝𑀸𑀕𑀺𑀭𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀘. 𑀅𑀲𑁆𑀲𑁄𑀲𑀼𑀁 𑀔𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑁋 ‘‘𑀪𑀕𑀯𑀸 𑀓𑀺𑀭 𑀓𑀻𑀝𑀸𑀕𑀺𑀭𑀺𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀘’’. ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀪𑀸𑀚𑁂𑀫. 𑀧𑀸𑀧𑀺𑀘𑁆𑀙𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸; 𑀦 𑀫𑀬𑀁 𑀢𑁂𑀲𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸’’𑀢𑀺, 𑀢𑁂 𑀲𑀩𑁆𑀩𑀁 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀪𑀸𑀚𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀓𑀻𑀝𑀸𑀕𑀺𑀭𑀺 𑀢𑀤𑀯𑀲𑀭𑀺. 𑀅𑀣 𑀔𑁄 𑀪𑀕𑀯𑀸 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂; 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀣 𑁋 ‘𑀪𑀕𑀯𑀸, 𑀆𑀯𑀼𑀲𑁄, 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀘. 𑀪𑀕𑀯𑀢𑁄 𑀘, 𑀆𑀯𑀼𑀲𑁄, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀣, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀜𑁆𑀘𑀸’’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀪𑀕𑀯𑀸, 𑀆𑀯𑀼𑀲𑁄, 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀘. 𑀪𑀕𑀯𑀢𑁄 𑀘, 𑀆𑀯𑀼𑀲𑁄, 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀣, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀜𑁆𑀘𑀸’’𑀢𑀺. ‘‘𑀦𑀢𑁆𑀣𑀸𑀯𑀼𑀲𑁄, 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁. 𑀲𑀩𑁆𑀩𑀁 𑀅𑀫𑁆𑀳𑁂𑀳𑀺 𑀪𑀸𑀚𑀺𑀢𑀁. 𑀲𑁆𑀯𑀸𑀕𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑁄. 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀕𑀯𑀸 𑀇𑀘𑁆𑀙𑀺𑀲𑁆𑀲𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀲𑁆𑀲𑀢𑀺. 𑀧𑀸𑀧𑀺𑀘𑁆𑀙𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸. 𑀦 𑀫𑀬𑀁 𑀢𑁂𑀲𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸’’𑀢𑀺. ‘‘𑀓𑀺𑀁 𑀧𑀦 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀪𑀸𑀚𑀺𑀢𑁆𑀣𑀸’’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀪𑀸𑀚𑁂𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀲𑀗𑁆𑀖𑀺𑀓𑀁 𑀲𑁂𑀦𑀸𑀲𑀦𑀁 𑀪𑀸𑀚𑁂𑀲𑁆𑀲𑀦𑁆𑀢𑀺? 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀯𑁂𑀪𑀗𑁆𑀕𑀺𑀬𑀸𑀦𑀺 [𑀅𑀯𑁂𑀪𑀗𑁆𑀕𑀺𑀓𑀸𑀦𑀺 (𑀓.)], 𑀦 𑀯𑀺𑀪𑀚𑀺𑀢𑀩𑁆𑀩𑀸𑀦𑀺, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀸𑀦𑀺𑀧𑀺 𑀅𑀯𑀺𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼 𑁋 𑀇𑀤𑀁 𑀧𑀞𑀫𑀁 𑀅𑀯𑁂𑀪𑀗𑁆𑀕𑀺𑀬𑀁, 𑀦 𑀯𑀺𑀪𑀚𑀺𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀫𑁆𑀧𑀺 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀯𑀺𑀳𑀸𑀭𑁄, 𑀯𑀺𑀳𑀸𑀭𑀯𑀢𑁆𑀣𑀼 𑁋 𑀇𑀤𑀁 𑀤𑀼𑀢𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀁, 𑀦 𑀯𑀺𑀪𑀚𑀺𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀫𑁆𑀧𑀺 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀫𑀜𑁆𑀘𑁄, 𑀧𑀻𑀞𑀁, 𑀪𑀺𑀲𑀺, 𑀩𑀺𑀩𑁆𑀩𑁄𑀳𑀦𑀁 𑁋 𑀇𑀤𑀁 𑀢𑀢𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀁, 𑀦 𑀯𑀺𑀪𑀚𑀺𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀫𑁆𑀧𑀺 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀮𑁄𑀳𑀓𑀼𑀫𑁆𑀪𑀻, 𑀮𑁄𑀳𑀪𑀸𑀡𑀓𑀁, 𑀮𑁄𑀳𑀯𑀸𑀭𑀓𑁄, 𑀮𑁄𑀳𑀓𑀝𑀸𑀳𑀁, 𑀯𑀸𑀲𑀻, 𑀧𑀭𑀲𑀼, 𑀓𑀼𑀞𑀸𑀭𑀻, 𑀓𑀼𑀤𑀸𑀮𑁄, 𑀦𑀺𑀔𑀸𑀤𑀦𑀁 𑁋 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀯𑁂𑀪𑀗𑁆𑀕𑀺𑀬𑀁, 𑀦 𑀯𑀺𑀪𑀚𑀺𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀫𑁆𑀧𑀺 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

‘‘𑀯𑀮𑁆𑀮𑀻, 𑀯𑁂𑀴𑀼, 𑀫𑀼𑀜𑁆𑀚𑀁, 𑀧𑀩𑁆𑀩𑀚𑀁, 𑀢𑀺𑀡𑀁, 𑀫𑀢𑁆𑀢𑀺𑀓𑀸, 𑀤𑀸𑀭𑀼𑀪𑀡𑁆𑀟𑀁, 𑀫𑀢𑁆𑀢𑀺𑀓𑀸𑀪𑀡𑁆𑀟𑀁 𑁋 𑀇𑀤𑀁 𑀧𑀜𑁆𑀘𑀫𑀁 𑀅𑀯𑁂𑀪𑀗𑁆𑀕𑀺𑀬𑀁, 𑀦 𑀯𑀺𑀪𑀚𑀺𑀢𑀩𑁆𑀩𑀁, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀫𑁆𑀧𑀺 𑀅𑀯𑀺𑀪𑀢𑁆𑀢𑀁 𑀳𑁄𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀅𑀯𑁂𑀪𑀗𑁆𑀕𑀺𑀬𑀸𑀦𑀺, 𑀦 𑀯𑀺𑀪𑀚𑀺𑀢𑀩𑁆𑀩𑀸𑀦𑀺, 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸. 𑀯𑀺𑀪𑀢𑁆𑀢𑀸𑀦𑀺𑀧𑀺 𑀅𑀯𑀺𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑁄 𑀯𑀺𑀪𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸

𑁩𑁨𑁩. 𑀅𑀣 𑀔𑁄 𑀪𑀕𑀯𑀸 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀆𑀴𑀯𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀆𑀴𑀯𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 [𑀆𑀴𑀯𑀺𑀓𑀸 (𑀲𑁆𑀬𑀸. 𑀓.)] 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀦𑀯𑀓𑀫𑁆𑀫𑀸𑀦𑀺 𑀤𑁂𑀦𑁆𑀢𑀺 𑁋 𑀧𑀺𑀡𑁆𑀟𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀓𑀼𑀝𑁆𑀝𑀮𑁂𑀧𑀦𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀤𑁆𑀯𑀸𑀭𑀝𑁆𑀞𑀧𑀦𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀅𑀕𑁆𑀕𑀴𑀯𑀝𑁆𑀝𑀺𑀓𑀭𑀡𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀆𑀮𑁄𑀓𑀲𑀦𑁆𑀥𑀺𑀓𑀭𑀡𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀲𑁂𑀢𑀯𑀡𑁆𑀡𑀓𑀭𑀡𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀓𑀸𑀴𑀯𑀡𑁆𑀡𑀓𑀭𑀡𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀭𑀡𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀙𑀸𑀤𑀦𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀩𑀦𑁆𑀥𑀦𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀪𑀡𑁆𑀟𑀺𑀓𑀸𑀝𑁆𑀞𑀧𑀦𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀯𑀻𑀲𑀢𑀺𑀯𑀲𑁆𑀲𑀺𑀓𑀫𑁆𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀢𑀺𑀁𑀲𑀯𑀲𑁆𑀲𑀺𑀓𑀫𑁆𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀬𑀸𑀯𑀚𑀻𑀯𑀺𑀓𑀫𑁆𑀧𑀺 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺; 𑀥𑀽𑀫𑀓𑀸𑀮𑀺𑀓𑀫𑁆𑀧𑀺 𑀧𑀭𑀺𑀬𑁄𑀲𑀺𑀢𑀁 𑀯𑀺𑀳𑀸𑀭𑀁 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀦𑀺 𑀦𑀯𑀓𑀫𑁆𑀫𑀸𑀦𑀺 𑀤𑀲𑁆𑀲𑀦𑁆𑀢𑀺 𑁋 𑀧𑀺𑀡𑁆𑀟𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀤𑀲𑁆𑀲𑀦𑁆𑀢𑀺; 𑀓𑀼𑀝𑁆𑀝𑀮𑁂𑀧𑀦𑀫𑀢𑁆𑀢𑁂𑀦𑀧𑀺… 𑀤𑁆𑀯𑀸𑀭𑀝𑁆𑀞𑀧𑀦𑀫𑀢𑁆𑀢𑁂𑀦𑀧𑀺 … 𑀅𑀕𑁆𑀕𑀴𑀯𑀝𑁆𑀝𑀺𑀓𑀭𑀡𑀫𑀢𑁆𑀢𑁂𑀦𑀧𑀺… 𑀆𑀮𑁄𑀓𑀲𑀦𑁆𑀥𑀺𑀓𑀭𑀡𑀫𑀢𑁆𑀢𑁂𑀦𑀧𑀺… 𑀲𑁂𑀢𑀯𑀡𑁆𑀡𑀓𑀭𑀡𑀫𑀢𑁆𑀢𑁂𑀦𑀧𑀺… 𑀓𑀸𑀴𑀯𑀡𑁆𑀡𑀓𑀭𑀡𑀫𑀢𑁆𑀢𑁂𑀦𑀧𑀺… 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀭𑀡𑀫𑀢𑁆𑀢𑁂𑀦𑀧𑀺… 𑀙𑀸𑀤𑁂𑀦𑀫𑀢𑁆𑀢𑁂𑀦𑀧𑀺… 𑀩𑀦𑁆𑀥𑀦𑀫𑀢𑁆𑀢𑁂𑀦𑀧𑀺… 𑀪𑀡𑁆𑀟𑀺𑀓𑀸𑀴𑀧𑀦𑀫𑀢𑁆𑀢𑁂𑀦𑀧𑀺… 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀫𑀢𑁆𑀢𑁂𑀦𑀧𑀺… 𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦𑀧𑀺… 𑀯𑀺𑀲𑀢𑀺𑀯𑀲𑁆𑀲𑀺𑀓𑀫𑁆𑀧𑀺… 𑀢𑀺𑀁𑀲𑀯𑀲𑁆𑀲𑀺𑀓𑀫𑁆𑀧𑀺… 𑀬𑀸𑀯𑀚𑀻𑀯𑀺𑀓𑀫𑁆𑀧𑀺… 𑀥𑀽𑀫𑀓𑀸𑀮𑀺𑀓𑀫𑁆𑀧𑀺 𑀧𑀭𑀺𑀬𑁄𑀲𑀺𑀢𑀁 𑀯𑀺𑀳𑀸𑀭𑀁 𑀦𑀯𑀓𑀫𑁆𑀫𑀁 𑀤𑀲𑁆𑀲𑀦𑁆𑀢𑀻’’𑀢𑀺! 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… 𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂…𑀧𑁂… ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀧𑀺𑀡𑁆𑀟𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁; 𑀦 𑀓𑀼𑀝𑁆𑀝𑀮𑁂𑀧𑀦𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀤𑁆𑀯𑀸𑀭𑀝𑁆𑀞𑀧𑀦𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀅𑀕𑁆𑀕𑀴𑀯𑀝𑁆𑀝𑀺𑀓𑀭𑀡𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀆𑀮𑁄𑀓𑀲𑀦𑁆𑀥𑀺𑀓𑀭𑀡𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀲𑁂𑀢𑀯𑀡𑁆𑀡𑀓𑀭𑀡𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀓𑀸𑀴𑀯𑀡𑁆𑀡𑀓𑀭𑀡𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀭𑀡𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀙𑀸𑀤𑁂𑀦𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀩𑀦𑁆𑀥𑀦𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀪𑀡𑁆𑀟𑀺𑀓𑀸𑀴𑀧𑀦𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀧𑀭𑀺𑀪𑀡𑁆𑀟𑀓𑀭𑀡𑀫𑀢𑁆𑀢𑁂𑀦 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀯𑀺𑀲𑀢𑀺𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀢𑀺𑀁𑀲𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀬𑀸𑀯𑀚𑀻𑀯𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀦 𑀥𑀽𑀫𑀓𑀸𑀮𑀺𑀓𑀫𑁆𑀧𑀺 𑀧𑀭𑀺𑀬𑁄𑀲𑀺𑀢𑀁 𑀯𑀺𑀳𑀸𑀭𑀁 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀓𑀢𑀁 𑀯𑀸 𑀯𑀺𑀧𑁆𑀧𑀓𑀢𑀁 𑀯𑀸 𑀦𑀯𑀓𑀫𑁆𑀫𑀁 𑀤𑀸𑀢𑀼𑀁, 𑀔𑀼𑀤𑁆𑀤𑀓𑁂 𑀯𑀺𑀳𑀸𑀭𑁂 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀙𑀧𑁆𑀧𑀜𑁆𑀘𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀼𑀁, 𑀅𑀟𑁆𑀠𑀬𑁄𑀕𑁂 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀲𑀢𑁆𑀢𑀝𑁆𑀞𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀼𑀁, 𑀫𑀳𑀮𑁆𑀮𑀓𑁂 𑀯𑀺𑀳𑀸𑀭𑁂 𑀧𑀸𑀲𑀸𑀤𑁂 𑀯𑀸 𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀁 𑀦𑀯𑀓𑀫𑁆𑀫𑀁 𑀤𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑁂 𑀯𑀺𑀳𑀸𑀭𑁂 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀏𑀓𑀲𑁆𑀲 𑀤𑁆𑀯𑁂 𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀏𑀓𑀲𑁆𑀲 𑀤𑁆𑀯𑁂 𑀤𑀸𑀢𑀩𑁆𑀩𑀸. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀁 𑀯𑀸𑀲𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑁄 𑀯𑀸𑀲𑁂𑀢𑀩𑁆𑀩𑁄. 𑀬𑁄 𑀯𑀸𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀺𑀓𑀁 𑀧𑀝𑀺𑀩𑀸𑀳𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀲𑀗𑁆𑀖𑀺𑀓𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀁 𑀯𑀭𑀲𑁂𑀬𑁆𑀬𑀁 𑀕𑀳𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦𑀺𑀲𑁆𑀲𑀻𑀫𑁂 𑀞𑀺𑀢𑀲𑁆𑀲 𑀦𑀯𑀓𑀫𑁆𑀫𑀁 𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀻𑀫𑁂 𑀞𑀺𑀢𑀲𑁆𑀲 𑀦𑀯𑀓𑀫𑁆𑀫𑀁 𑀤𑀸𑀢𑀩𑁆𑀩𑀁. 𑀬𑁄 𑀤𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀓𑀸𑀮𑀁 𑀧𑀝𑀺𑀩𑀸𑀳𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀓𑀸𑀮𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀸𑀦𑀁 𑀢𑁂𑀫𑀸𑀲𑀁 𑀧𑀝𑀺𑀩𑀸𑀳𑀺𑀢𑀼𑀁, 𑀉𑀢𑀼𑀓𑀸𑀮𑀁 𑀧𑀦 𑀦 𑀧𑀝𑀺𑀩𑀸𑀳𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀦𑁆𑀢𑀺𑀧𑀺, 𑀓𑀸𑀮𑀫𑁆𑀧𑀺 𑀓𑀭𑁄𑀦𑁆𑀢𑀺; 𑀲𑀸𑀫𑀡𑁂𑀭𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀉𑀫𑁆𑀫𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀔𑀺𑀢𑁆𑀢𑀘𑀺𑀢𑁆𑀢𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀯𑁂𑀤𑀦𑀸𑀝𑁆𑀝𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀧𑀡𑁆𑀟𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀣𑁂𑀬𑁆𑀬𑀲𑀁𑀯𑀸𑀲𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀸𑀧𑀺

𑀧𑀝𑀺𑀚𑀸𑀦𑀦𑁆𑀢𑀺; 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀫𑀸𑀢𑀼𑀖𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀧𑀺𑀢𑀼𑀖𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀅𑀭𑀳𑀦𑁆𑀢𑀖𑀸𑀢𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀲𑀗𑁆𑀖𑀪𑁂𑀤𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺; 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀧𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 𑀫𑀸 𑀲𑀗𑁆𑀖𑀲𑁆𑀲 𑀳𑀸𑀬𑀻𑀢𑀺 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀯𑀺𑀩𑁆𑀪𑀫𑀢𑀺…𑀧𑁂… 𑀓𑀸𑀮𑀗𑁆𑀓𑀭𑁄𑀢𑀺, 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀫𑀸 𑀲𑀗𑁆𑀖𑀲𑁆𑀲 𑀳𑀸𑀬𑀻𑀢𑀺 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀯𑀺𑀧𑁆𑀧𑀓𑀢𑁂 𑀧𑀓𑁆𑀓𑀫𑀢𑀺 𑁋 𑀫𑀸 𑀲𑀗𑁆𑀖𑀲𑁆𑀲 𑀳𑀸𑀬𑀻𑀢𑀺 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀯𑀺𑀧𑁆𑀧𑀓𑀢𑁂 𑀯𑀺𑀩𑁆𑀪𑀫𑀢𑀺…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀫𑀸 𑀲𑀗𑁆𑀖𑀲𑁆𑀲 𑀳𑀸𑀬𑀻𑀢𑀺 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑁂 𑀧𑀓𑁆𑀓𑀫𑀢𑀺 𑁋 𑀢𑀲𑁆𑀲𑁂𑀯𑁂𑀢𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑁂 𑀯𑀺𑀩𑁆𑀪𑀫𑀢𑀺…𑀧𑁂… 𑀓𑀸𑀮𑀗𑁆𑀓𑀭𑁄𑀢𑀺, 𑀲𑀸𑀫𑀡𑁂𑀭𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀦𑁆𑀢𑀺𑀫𑀯𑀢𑁆𑀣𑀼𑀁 𑀅𑀚𑁆𑀛𑀸𑀧𑀦𑁆𑀦𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀲𑀗𑁆𑀖𑁄 𑀲𑀸𑀫𑀻.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑁂 𑀉𑀫𑁆𑀫𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀯𑁂𑀤𑀦𑀸𑀝𑁆𑀝𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀢𑀲𑁆𑀲𑁂𑀯𑁂𑀢𑀁.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀯𑀓𑀫𑁆𑀫𑀁 𑀕𑀳𑁂𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑁂 𑀧𑀡𑁆𑀟𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁄 𑀧𑀝𑀺𑀚𑀸𑀦𑀸𑀢𑀺, 𑀫𑀸𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀧𑀺𑀢𑀼𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀲𑀗𑁆𑀖𑀪𑁂𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀝𑀺𑀚𑀸𑀦𑀸𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀝𑀺𑀚𑀸𑀦𑀸𑀢𑀺 𑁋 𑀲𑀗𑁆𑀖𑁄 𑀲𑀸𑀫𑀻’’𑀢𑀺.

𑀅𑀜𑁆𑀜𑀢𑁆𑀭𑀧𑀭𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑀸𑀤𑀺

𑁩𑁨𑁪. [𑀧𑀸𑀭𑀸. 𑁧𑁫𑁭] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀯𑀺𑀳𑀸𑀭𑀧𑀭𑀺𑀪𑁄𑀕𑀁 𑀲𑁂𑀦𑀸𑀲𑀦𑀁 𑀅𑀜𑁆𑀜𑀢𑁆𑀭 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀪𑀤𑀦𑁆𑀢𑀸 𑀅𑀜𑁆𑀜𑀢𑁆𑀭 𑀧𑀭𑀺𑀪𑁄𑀕𑀁 𑀅𑀜𑁆𑀜𑀢𑁆𑀭 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺! 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑁆𑀭 𑀧𑀭𑀺𑀪𑁄𑀕𑁄 𑀅𑀜𑁆𑀜𑀢𑁆𑀭 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀬𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

[𑀧𑀸𑀭𑀸. 𑁧𑁫𑁭] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀉𑀧𑁄𑀲𑀣𑀕𑁆𑀕𑀫𑁆𑀧𑀺 𑀲𑀦𑁆𑀦𑀺𑀲𑀚𑁆𑀚𑀫𑁆𑀧𑀺 𑀳𑀭𑀺𑀢𑀼𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀙𑀫𑀸𑀬 𑀦𑀺𑀲𑀻𑀤𑀦𑁆𑀢𑀺. 𑀕𑀢𑁆𑀢𑀸𑀦𑀺𑀧𑀺 𑀘𑀻𑀯𑀭𑀸𑀦𑀺𑀧𑀺 𑀧𑀁𑀲𑀼𑀓𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀯𑀓𑀸𑀮𑀺𑀓𑀁 𑀳𑀭𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀫𑀳𑀸𑀯𑀺𑀳𑀸𑀭𑁄 𑀉𑀦𑁆𑀤𑁆𑀭𑀺𑀬𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀲𑁂𑀦𑀸𑀲𑀦𑀁 𑀦𑀸𑀢𑀺𑀳𑀭𑀦𑁆𑀢𑀺 [𑀦𑀸𑀪𑀺𑀳𑀭𑀦𑁆𑀢𑀺 (𑀓.)]. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀼𑀢𑁆𑀢𑀢𑁆𑀣𑀸𑀬 𑀳𑀭𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀺𑀓𑁄 𑀫𑀳𑀕𑁆𑀖𑁄 𑀓𑀫𑁆𑀩𑀮𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀨𑀸𑀢𑀺𑀓𑀫𑁆𑀫𑀢𑁆𑀣𑀸𑀬 𑀧𑀭𑀺𑀯𑀢𑁆𑀢𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀺𑀓𑀁 𑀫𑀳𑀕𑁆𑀖𑀁 𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀨𑀸𑀢𑀺𑀓𑀫𑁆𑀫𑀢𑁆𑀣𑀸𑀬 𑀧𑀭𑀺𑀯𑀢𑁆𑀢𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀅𑀘𑁆𑀙𑀘𑀫𑁆𑀫𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀤𑀧𑀼𑀜𑁆𑀙𑀦𑀺𑀁 𑀓𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀘𑀓𑁆𑀓𑀮𑀺𑀓𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀤𑀧𑀼𑀜𑁆𑀙𑀦𑀺𑀁 𑀓𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀘𑁄𑀴𑀓𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀤𑀧𑀼𑀜𑁆𑀙𑀦𑀺𑀁 𑀓𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀦𑁆𑀢𑀺. 𑀲𑁂𑀦𑀸𑀲𑀦𑀁 𑀤𑀼𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀅𑀥𑁄𑀢𑁂𑀳𑀺 𑀧𑀸𑀤𑁂𑀳𑀺 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀺𑀢𑀩𑁆𑀩𑀁. 𑀬𑁄 𑀅𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀮𑁆𑀮𑁂𑀳𑀺 𑀧𑀸𑀤𑁂𑀳𑀺 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀦𑁆𑀢𑀺. 𑀲𑁂𑀦𑀸𑀲𑀦𑀁 𑀤𑀼𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀅𑀮𑁆𑀮𑁂𑀳𑀺 𑀧𑀸𑀤𑁂𑀳𑀺 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀺𑀢𑀩𑁆𑀩𑀁. 𑀬𑁄 𑀅𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀲𑀉𑀧𑀸𑀳𑀦𑀸 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀦𑁆𑀢𑀺. 𑀲𑁂𑀦𑀸𑀲𑀦𑀁 𑀤𑀼𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀲𑀉𑀧𑀸𑀳𑀦𑁂𑀦 𑀲𑁂𑀦𑀸𑀲𑀦𑀁 𑀅𑀓𑁆𑀓𑀫𑀺𑀢𑀩𑁆𑀩𑀁. 𑀬𑁄 𑀅𑀓𑁆𑀓𑀫𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀺𑀝𑁆𑀞𑀼𑀪𑀦𑁆𑀢𑀺. 𑀯𑀡𑁆𑀡𑁄 𑀤𑀼𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀦𑀺𑀝𑁆𑀞𑀼𑀪𑀺𑀢𑀩𑁆𑀩𑀁. 𑀬𑁄 𑀦𑀺𑀝𑁆𑀞𑀼𑀪𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀔𑁂𑀴𑀫𑀮𑁆𑀮𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀜𑁆𑀘𑀧𑀸𑀤𑀸𑀧𑀺 𑀧𑀻𑀞𑀧𑀸𑀤𑀸𑀧𑀺 𑀧𑀭𑀺𑀓𑀫𑁆𑀫𑀓𑀢𑀁 𑀪𑀽𑀫𑀺𑀁 𑀯𑀺𑀮𑀺𑀔𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑁄𑀴𑀓𑁂𑀦 𑀧𑀮𑀺𑀯𑁂𑀞𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀭𑀺𑀓𑀫𑁆𑀫𑀓𑀢𑀁 𑀪𑀺𑀢𑁆𑀢𑀺𑀁 𑀅𑀧𑀲𑁆𑀲𑁂𑀦𑁆𑀢𑀺. 𑀯𑀡𑁆𑀡𑁄 𑀤𑀼𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺 𑀅𑀧𑀲𑁆𑀲𑁂𑀢𑀩𑁆𑀩𑀸. 𑀬𑁄 𑀅𑀧𑀲𑁆𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀧𑀲𑁆𑀲𑁂𑀦𑀨𑀮𑀓’’𑀦𑁆𑀢𑀺. 𑀅𑀧𑀲𑁆𑀲𑁂𑀦𑀨𑀮𑀓𑀁 𑀳𑁂𑀝𑁆𑀞𑀢𑁄 𑀪𑀽𑀫𑀺𑀁 𑀯𑀺𑀮𑀺𑀔𑀢𑀺, 𑀉𑀧𑀭𑀺𑀢𑁄 𑀪𑀺𑀢𑁆𑀢𑀺𑀜𑁆𑀘. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀳𑁂𑀝𑁆𑀞𑀢𑁄 𑀘 𑀉𑀧𑀭𑀺𑀢𑁄 𑀘 𑀘𑁄𑀴𑀓𑁂𑀦 𑀧𑀮𑀺𑀯𑁂𑀞𑁂𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀥𑁄𑀢𑀧𑀸𑀤𑀓𑀸 𑀦𑀺𑀧𑀚𑁆𑀚𑀺𑀢𑀼𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀁

𑁩𑁨𑁫. 𑀅𑀣 𑀔𑁄 𑀪𑀕𑀯𑀸 𑀆𑀴𑀯𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀭𑀸𑀚𑀕𑀳𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑀁 𑀤𑀼𑀩𑁆𑀪𑀺𑀓𑁆𑀔𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀲𑀗𑁆𑀖𑀪𑀢𑁆𑀢𑀁 𑀓𑀸𑀢𑀼𑀁; 𑀇𑀘𑁆𑀙𑀦𑁆𑀢𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓𑀁 𑀓𑀸𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀪𑀢𑁆𑀢𑀁 𑀉𑀤𑁆𑀤𑁂𑀲𑀪𑀢𑁆𑀢𑀁 𑀦𑀺𑀫𑀦𑁆𑀢𑀦𑀁 𑀲𑀮𑀸𑀓𑀪𑀢𑁆𑀢𑀁 𑀧𑀓𑁆𑀔𑀺𑀓𑀁 𑀉𑀧𑁄𑀲𑀣𑀺𑀓𑀁 𑀧𑀸𑀝𑀺𑀧𑀤𑀺𑀓’’𑀦𑁆𑀢𑀺.

𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑀫𑁆𑀫𑀼𑀢𑀺

𑁩𑁨𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀯𑀭𑀪𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀮𑀸𑀫𑀓𑀸𑀦𑀺 𑀪𑀢𑁆𑀢𑀸𑀦𑀺 𑀪𑀺𑀓𑁆𑀔𑀽𑀦𑀁 𑀤𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀪𑀢𑁆𑀢𑀼𑀤𑁆𑀤𑁂𑀲𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀉𑀤𑁆𑀤𑀺𑀝𑁆𑀞𑀸𑀦𑀼𑀤𑁆𑀤𑀺𑀝𑁆𑀞𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀪𑀢𑁆𑀢𑀼𑀤𑁆𑀤𑁂𑀲𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀪𑀢𑁆𑀢𑀼𑀤𑁆𑀤𑁂𑀲𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀪𑀢𑁆𑀢𑀼𑀤𑁆𑀤𑁂𑀲𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀣 𑀔𑁄 𑀪𑀢𑁆𑀢𑀼𑀤𑁆𑀤𑁂𑀲𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀪𑀢𑁆𑀢𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀮𑀸𑀓𑀸𑀬 𑀯𑀸 𑀧𑀝𑁆𑀝𑀺𑀓𑀸𑀬 𑀯𑀸 [𑀧𑀝𑀺𑀓𑀸𑀬 𑀯𑀸 (𑀲𑁆𑀬𑀸.)] 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀑𑀧𑀼𑀜𑁆𑀚𑀺𑀢𑁆𑀯𑀸 𑀪𑀢𑁆𑀢𑀁 𑀉𑀤𑁆𑀤𑀺𑀲𑀺𑀢𑀼’’𑀦𑁆𑀢𑀺.

𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑀸𑀤𑀺𑀲𑀫𑁆𑀫𑀼𑀢𑀺

𑁩𑁨𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀧𑀜𑁆𑀜𑀸𑀧𑀓𑁄 𑀦 𑀳𑁄𑀢𑀺…𑀧𑁂… 𑀪𑀡𑁆𑀟𑀸𑀕𑀸𑀭𑀺𑀓𑁄 𑀦 𑀳𑁄𑀢𑀺…𑀧𑁂… 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀸𑀳𑀓𑁄 𑀦 𑀳𑁄𑀢𑀺…𑀧𑁂… 𑀘𑀻𑀯𑀭𑀪𑀸𑀚𑀓𑁄 𑀦 𑀳𑁄𑀢𑀺…𑀧𑁂… 𑀬𑀸𑀕𑀼𑀪𑀸𑀚𑀓𑁄 𑀦 𑀳𑁄𑀢𑀺…𑀧𑁂… 𑀨𑀮𑀪𑀸𑀚𑀓𑁄 𑀦 𑀳𑁄𑀢𑀺…𑀧𑁂… 𑀔𑀚𑁆𑀚𑀓𑀪𑀸𑀚𑀓𑁄 𑀦 𑀳𑁄𑀢𑀺. 𑀔𑀚𑁆𑀚𑀓𑀁 𑀅𑀪𑀸𑀚𑀺𑀬𑀫𑀸𑀦𑀁 𑀦𑀲𑁆𑀲𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀔𑀚𑁆𑀚𑀓𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀪𑀸𑀚𑀺𑀢𑀸𑀪𑀸𑀚𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀔𑀚𑁆𑀚𑀓𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀔𑀚𑁆𑀚𑀓𑀪𑀸𑀚𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀔𑀚𑁆𑀚𑀓𑀪𑀸𑀚𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀔𑀚𑁆𑀚𑀓𑀪𑀸𑀚𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑀫𑁆𑀫𑀼𑀢𑀺

𑁩𑁨𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀪𑀡𑁆𑀟𑀸𑀕𑀸𑀭𑁂 𑀅𑀧𑁆𑀧𑀫𑀢𑁆𑀢𑀓𑁄 𑀧𑀭𑀺𑀓𑁆𑀔𑀸𑀭𑁄 𑀉𑀧𑁆𑀧𑀦𑁆𑀦𑁄 [𑀉𑀲𑁆𑀲𑀦𑁆𑀦𑁄 (𑀲𑁆𑀬𑀸.)] 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀯𑀺𑀲𑁆𑀲𑀚𑁆𑀚𑀺𑀢𑀸𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀅𑀧𑁆𑀧𑀫𑀢𑁆𑀢𑀓𑀯𑀺𑀲𑁆𑀲𑀚𑁆𑀚𑀓𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀸 [𑀏𑀓𑁂𑀓𑀸 (𑀲𑀻.)] 𑀲𑀽𑀘𑀺 𑀤𑀸𑀢𑀩𑁆𑀩𑀸, 𑀲𑀢𑁆𑀣𑀓𑀁 𑀤𑀸𑀢𑀩𑁆𑀩𑀁, 𑀉𑀧𑀸𑀳𑀦𑀸 𑀤𑀸𑀢𑀩𑁆𑀩𑀸, 𑀓𑀸𑀬𑀩𑀦𑁆𑀥𑀦𑀁 𑀤𑀸𑀢𑀩𑁆𑀩𑀁, 𑀅𑀁𑀲𑀩𑀦𑁆𑀥𑀓𑁄 𑀤𑀸𑀢𑀩𑁆𑀩𑁄, 𑀧𑀭𑀺𑀲𑁆𑀲𑀸𑀯𑀦𑀁 𑀤𑀸𑀢𑀩𑁆𑀩𑀁, 𑀥𑀫𑁆𑀫𑀓𑀭𑀡𑁄 𑀤𑀸𑀢𑀩𑁆𑀩𑁄, 𑀓𑀼𑀲𑀺 𑀤𑀸𑀢𑀩𑁆𑀩𑀸, 𑀅𑀟𑁆𑀠𑀓𑀼𑀲𑀺 𑀤𑀸𑀢𑀩𑁆𑀩𑀸, 𑀫𑀡𑁆𑀟𑀮𑀁 𑀤𑀸𑀢𑀩𑁆𑀩𑀁, 𑀅𑀟𑁆𑀠𑀫𑀡𑁆𑀟𑀮𑀁 𑀤𑀸𑀢𑀩𑁆𑀩𑀁, 𑀅𑀦𑀼𑀯𑀸𑀢𑁄 𑀤𑀸𑀢𑀩𑁆𑀩𑁄, 𑀧𑀭𑀺𑀪𑀡𑁆𑀟𑀁 𑀤𑀸𑀢𑀩𑁆𑀩𑀁. 𑀲𑀘𑁂 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀲𑀧𑁆𑀧𑀺 𑀯𑀸 𑀢𑁂𑀮𑀁 𑀯𑀸 𑀫𑀥𑀼 𑀯𑀸 𑀨𑀸𑀡𑀺𑀢𑀁 𑀯𑀸, 𑀲𑀓𑀺𑀁 𑀧𑀝𑀺𑀲𑀸𑀬𑀺𑀢𑀼𑀁 𑀤𑀸𑀢𑀩𑁆𑀩𑀁. 𑀲𑀘𑁂 𑀧𑀼𑀦𑀧𑀺 𑀅𑀢𑁆𑀣𑁄 𑀳𑁄𑀢𑀺, 𑀧𑀼𑀦𑀧𑀺 𑀤𑀸𑀢𑀩𑁆𑀩𑀁.

𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑀸𑀤𑀺𑀲𑀫𑁆𑀫𑀼𑀢𑀺

𑁩𑁨𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑀸𑀝𑀺𑀬𑀕𑁆𑀕𑀸𑀳𑀸𑀧𑀓𑁄 𑀦 𑀳𑁄𑀢𑀺…𑀧𑁂… 𑀧𑀢𑁆𑀢𑀕𑁆𑀕𑀸𑀳𑀸𑀧𑀓𑁄 𑀦 𑀳𑁄𑀢𑀺…𑀧𑁂… 𑀆𑀭𑀸𑀫𑀺𑀓𑀧𑁂𑀲𑀓𑁄 𑀦 𑀳𑁄𑀢𑀺…𑀧𑁂… 𑀲𑀸𑀫𑀡𑁂𑀭𑀧𑁂𑀲𑀓𑁄 𑀦 𑀳𑁄𑀢𑀺. 𑀲𑀸𑀫𑀡𑁂𑀭𑀸 𑀅𑀧𑁂𑀲𑀺𑀬𑀫𑀸𑀦𑀸 𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑀸𑀫𑀡𑁂𑀭𑀧𑁂𑀲𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀧𑁂𑀲𑀺𑀢𑀸𑀧𑁂𑀲𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀸𑀫𑀡𑁂𑀭𑀧𑁂𑀲𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀸𑀫𑀡𑁂𑀭𑀧𑁂𑀲𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸𑀫𑀡𑁂𑀭𑀧𑁂𑀲𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑀧𑁂𑀲𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑀢𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀺𑀳𑀸𑀭𑀁 𑀩𑀼𑀤𑁆𑀥𑀲𑁂𑀝𑁆𑀞𑁂𑀦, 𑀅𑀧𑀜𑁆𑀜𑀢𑁆𑀢𑀁 𑀢𑀤𑀸 𑀅𑀳𑀼;

𑀢𑀳𑀁 𑀢𑀳𑀁 𑀦𑀺𑀓𑁆𑀔𑀫𑀦𑁆𑀢𑀺, 𑀯𑀸𑀲𑀸 𑀢𑁂 𑀚𑀺𑀦𑀲𑀸𑀯𑀓𑀸.

𑀲𑁂𑀝𑁆𑀞𑀻 𑀕𑀳𑀧𑀢𑀺 𑀤𑀺𑀲𑁆𑀯𑀸, 𑀪𑀺𑀓𑁆𑀔𑀽𑀦𑀁 𑀇𑀤𑀫𑀩𑁆𑀭𑀯𑀺;

𑀓𑀸𑀭𑀸𑀧𑁂𑀬𑁆𑀬𑀁 𑀯𑀲𑁂𑀬𑁆𑀬𑀸𑀣, 𑀧𑀝𑀺𑀧𑀼𑀘𑁆𑀙𑀺𑀁𑀲𑀼 𑀦𑀸𑀬𑀓𑀁.

𑀯𑀺𑀳𑀸𑀭𑀁 𑀅𑀟𑁆𑀠𑀬𑁄𑀕𑀜𑁆𑀘, 𑀧𑀸𑀲𑀸𑀤𑀁 𑀳𑀫𑁆𑀫𑀺𑀬𑀁 𑀕𑀼𑀳𑀁;

𑀧𑀜𑁆𑀘𑀮𑁂𑀡𑀁 𑀅𑀦𑀼𑀜𑁆𑀜𑀸𑀲𑀺, 𑀯𑀺𑀳𑀸𑀭𑁂 𑀲𑁂𑀝𑁆𑀞𑀺 𑀓𑀸𑀭𑀬𑀺.

𑀚𑀦𑁄 𑀯𑀺𑀳𑀸𑀭𑀁 𑀓𑀸𑀭𑁂𑀢𑀺, 𑀅𑀓𑀯𑀸𑀝𑀁 𑀅𑀲𑀁𑀯𑀼𑀢𑀁;

𑀓𑀯𑀸𑀝𑀁 𑀧𑀺𑀝𑁆𑀞𑀲𑀗𑁆𑀖𑀸𑀝𑀁, 𑀉𑀤𑀼𑀓𑁆𑀔𑀮𑀜𑁆𑀘 𑀉𑀢𑁆𑀢𑀭𑀺.

𑀆𑀯𑀺𑀜𑁆𑀙𑀦𑀘𑁆𑀙𑀺𑀤𑁆𑀤𑀁 𑀭𑀚𑁆𑀚𑀼𑀁, 𑀯𑀝𑁆𑀝𑀺𑀜𑁆𑀘 𑀓𑀧𑀺𑀲𑀻𑀲𑀓𑀁;

𑀲𑀽𑀘𑀺𑀖𑀝𑀺𑀢𑀸𑀴𑀘𑁆𑀙𑀺𑀤𑁆𑀤𑀁, 𑀮𑁄𑀳𑀓𑀝𑁆𑀞𑀯𑀺𑀲𑀸𑀡𑀓𑀁.

𑀬𑀦𑁆𑀢𑀓𑀁 𑀲𑀽𑀘𑀺𑀓𑀜𑁆𑀘𑁂𑀯, 𑀙𑀤𑀦𑀁 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁;

𑀯𑁂𑀤𑀺𑀚𑀸𑀮𑀲𑀮𑀸𑀓𑀜𑁆𑀘, 𑀘𑀓𑁆𑀓𑀮𑀺 𑀲𑀦𑁆𑀣𑀭𑁂𑀦 𑀘.

𑀫𑀺𑀟𑁆𑀠𑀺 𑀩𑀺𑀤𑀮𑀫𑀜𑁆𑀘𑀜𑁆𑀘, 𑀲𑁄𑀲𑀸𑀦𑀺𑀓𑀫𑀲𑀸𑀭𑀓𑁄;

𑀩𑀼𑀦𑁆𑀤𑀺𑀓𑀼𑀴𑀺𑀭𑀧𑀸𑀤𑀜𑁆𑀘, 𑀆𑀳𑀘𑁆𑀘𑀸𑀲𑀦𑁆𑀤𑀺 𑀉𑀘𑁆𑀘𑀓𑁂.

𑀲𑀢𑁆𑀢𑀗𑁆𑀕𑁄 𑀘 𑀪𑀤𑁆𑀤𑀧𑀻𑀞𑀁, 𑀧𑀻𑀞𑀓𑁂𑀴𑀓𑀧𑀸𑀤𑀓𑀁;

𑀆𑀫𑀮𑀸𑀨𑀮𑀓𑀸 𑀓𑁄𑀘𑁆𑀙𑀸, 𑀧𑀮𑀸𑀮𑀧𑀻𑀞𑀫𑁂𑀯 𑀘.

𑀉𑀘𑁆𑀘𑀸𑀳𑀺𑀧𑀝𑀺𑀧𑀸𑀤𑀓𑀸, 𑀅𑀝𑁆𑀞𑀗𑁆𑀕𑀼𑀮𑀺 𑀘 𑀧𑀸𑀤𑀓𑀸;

𑀲𑀼𑀢𑁆𑀢𑀁 𑀅𑀝𑁆𑀞𑀧𑀤𑀁 𑀘𑁄𑀴𑀁, 𑀢𑀽𑀮𑀺𑀓𑀁 𑀅𑀟𑁆𑀠𑀓𑀸𑀬𑀺𑀓𑀁.

𑀕𑀺𑀭𑀕𑁆𑀕𑁄 𑀪𑀺𑀲𑀺𑀬𑁄 𑀘𑀸𑀧𑀺, 𑀤𑀼𑀲𑁆𑀲𑀁 𑀲𑁂𑀦𑀸𑀲𑀦𑀫𑁆𑀧𑀺 𑀘;

𑀑𑀦𑀤𑁆𑀥𑀁 𑀳𑁂𑀝𑁆𑀞𑀸 𑀧𑀢𑀢𑀺, 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀭𑀦𑁆𑀢𑀺 𑀘.

𑀪𑀢𑁆𑀢𑀺𑀜𑁆𑀘 𑀳𑀢𑁆𑀣𑀪𑀢𑁆𑀢𑀺𑀜𑁆𑀘, 𑀅𑀦𑀼𑀜𑁆𑀜𑀸𑀲𑀺 𑀢𑀣𑀸𑀕𑀢𑁄;

𑀢𑀺𑀢𑁆𑀣𑀺𑀬𑀸 𑀯𑀺𑀳𑀸𑀭𑁂 𑀘𑀸𑀧𑀺, 𑀣𑀼𑀲𑀁 𑀲𑀡𑁆𑀳𑀜𑁆𑀘 𑀫𑀢𑁆𑀢𑀺𑀓𑀸.

𑀇𑀓𑁆𑀓𑀸𑀲𑀁 𑀧𑀸𑀡𑀺𑀓𑀁 𑀓𑀼𑀡𑁆𑀟𑀁, 𑀲𑀸𑀲𑀧𑀁 𑀲𑀺𑀢𑁆𑀣𑀢𑁂𑀮𑀓𑀁;

𑀉𑀲𑁆𑀲𑀦𑁆𑀦𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑀼𑀁, 𑀨𑀭𑀼𑀲𑀁 𑀕𑀡𑁆𑀟𑀼𑀫𑀢𑁆𑀢𑀺𑀓𑀁.

𑀇𑀓𑁆𑀓𑀸𑀲𑀁 𑀧𑀝𑀺𑀪𑀸𑀦𑀜𑁆𑀘, 𑀦𑀻𑀘𑀸 𑀘𑀬𑁄 𑀘 𑀆𑀭𑀼𑀳𑀁;

𑀧𑀭𑀺𑀧𑀢𑀦𑁆𑀢𑀺 𑀆𑀴𑀓𑀸, 𑀅𑀟𑁆𑀠𑀓𑀼𑀝𑁆𑀝𑀁 𑀢𑀬𑁄 𑀧𑀼𑀦.

𑀔𑀼𑀤𑁆𑀤𑀓𑁂 𑀓𑀼𑀝𑁆𑀝𑀧𑀸𑀤𑁄 𑀘, 𑀑𑀯𑀲𑁆𑀲𑀢𑀺 𑀲𑀭𑀁 𑀔𑀺𑀮𑀁;

𑀘𑀻𑀯𑀭𑀯𑀁𑀲𑀁 𑀭𑀚𑁆𑀚𑀼𑀜𑁆𑀘, 𑀆𑀴𑀺𑀦𑁆𑀤𑀁 𑀓𑀺𑀝𑀺𑀓𑁂𑀦 𑀘.

𑀆𑀮𑀫𑁆𑀩𑀦𑀁 𑀢𑀺𑀡𑀘𑀼𑀡𑁆𑀡𑀁, 𑀳𑁂𑀝𑁆𑀞𑀸𑀫𑀕𑁆𑀕𑁂 𑀦𑀬𑀁 𑀓𑀭𑁂;

𑀅𑀚𑁆𑀛𑁄𑀓𑀸𑀲𑁂 𑀑𑀢𑀧𑁆𑀧𑀢𑀺, 𑀲𑀸𑀮𑀁 𑀳𑁂𑀝𑁆𑀞𑀸 𑀘 𑀪𑀸𑀚𑀦𑀁.

𑀯𑀺𑀳𑀸𑀭𑁄 𑀓𑁄𑀝𑁆𑀞𑀓𑁄 𑀘𑁂𑀯, 𑀧𑀭𑀺𑀯𑁂𑀡𑀕𑁆𑀕𑀺𑀲𑀸𑀮𑀓𑀁;

𑀆𑀭𑀸𑀫𑁂 𑀘 𑀧𑀼𑀦 𑀓𑁄𑀝𑁆𑀞𑁂, 𑀳𑁂𑀝𑁆𑀞𑀜𑁆𑀜𑁂𑀯 𑀦𑀬𑀁 𑀓𑀭𑁂.

𑀲𑀼𑀥𑀁 𑀅𑀦𑀸𑀣𑀧𑀺𑀡𑁆𑀟𑀺 𑀘, 𑀲𑀤𑁆𑀥𑁄 𑀲𑀻𑀢𑀯𑀦𑀁 𑀅𑀕𑀸;

𑀤𑀺𑀝𑁆𑀞𑀥𑀫𑁆𑀫𑁄 𑀦𑀺𑀫𑀦𑁆𑀢𑁂𑀲𑀺, 𑀲𑀳 𑀲𑀗𑁆𑀖𑁂𑀦 𑀦𑀸𑀬𑀓𑀁.

𑀆𑀡𑀸𑀧𑁂𑀲𑀦𑁆𑀢𑀭𑀸𑀫𑀕𑁆𑀕𑁂, 𑀆𑀭𑀸𑀫𑀁 𑀓𑀸𑀭𑀬𑀻 𑀕𑀡𑁄;

𑀯𑁂𑀲𑀸𑀮𑀺𑀬𑀁 𑀦𑀯𑀓𑀫𑁆𑀫𑀁, 𑀧𑀼𑀭𑀢𑁄 𑀘 𑀧𑀭𑀺𑀕𑁆𑀕𑀳𑀺.

𑀓𑁄 𑀅𑀭𑀳𑀢𑀺 𑀪𑀢𑁆𑀢𑀕𑁆𑀕𑁂, 𑀢𑀺𑀢𑁆𑀢𑀺𑀭𑀜𑁆𑀘 𑀅𑀯𑀦𑁆𑀤𑀺𑀬𑀸;

𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀭𑀖𑀭𑀸, 𑀢𑀽𑀮𑁄 𑀲𑀸𑀯𑀢𑁆𑀣𑀺 𑀑𑀲𑀭𑀺.

𑀧𑀢𑀺𑀝𑁆𑀞𑀸𑀧𑁂𑀲𑀺 𑀆𑀭𑀸𑀫𑀁, 𑀪𑀢𑁆𑀢𑀕𑁆𑀕𑁂 𑀘 𑀓𑁄𑀮𑀸𑀳𑀮𑀁;

𑀕𑀺𑀮𑀸𑀦𑀸 𑀯𑀭𑀲𑁂𑀬𑁆𑀬𑀸 𑀘, 𑀮𑁂𑀲𑀸 𑀲𑀢𑁆𑀢𑀭𑀲𑀸 𑀢𑀳𑀺𑀁.

𑀓𑁂𑀦 𑀦𑀼 𑀔𑁄 𑀓𑀣𑀁 𑀦𑀼 𑀔𑁄, 𑀯𑀺𑀳𑀸𑀭𑀕𑁆𑀕𑁂𑀦 𑀪𑀸𑀚𑀬𑀺;

𑀧𑀭𑀺𑀯𑁂𑀡𑀁 𑀅𑀦𑀼𑀪𑀸𑀕𑀜𑁆𑀘, 𑀅𑀓𑀸𑀫𑀸 𑀪𑀸𑀕𑀁 𑀦𑁄 𑀤𑀤𑁂.

𑀦𑀺𑀲𑁆𑀲𑀻𑀫𑀁 𑀲𑀩𑁆𑀩𑀓𑀸𑀮𑀜𑁆𑀘, 𑀕𑀸𑀳𑀸 𑀲𑁂𑀦𑀸𑀲𑀦𑁂 𑀢𑀬𑁄;

𑀉𑀧𑀦𑀦𑁆𑀤𑁄 𑀘 𑀯𑀡𑁆𑀡𑁂𑀲𑀺, 𑀞𑀺𑀢𑀓𑀸 𑀲𑀫𑀓𑀸𑀲𑀦𑀸.

𑀲𑀫𑀸𑀦𑀸𑀲𑀦𑀺𑀓𑀸 𑀪𑀺𑀦𑁆𑀤𑀺𑀁𑀲𑀼, 𑀢𑀺𑀯𑀕𑁆𑀕𑀸 𑀘 𑀤𑀼𑀯𑀕𑁆𑀕𑀺𑀓𑀁;

𑀅𑀲𑀫𑀸𑀦𑀸𑀲𑀦𑀺𑀓𑀸 𑀤𑀻𑀖𑀁, 𑀲𑀸𑀴𑀺𑀦𑁆𑀤𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁.

𑀅𑀬𑁆𑀬𑀺𑀓𑀸 𑀘 𑀅𑀯𑀺𑀤𑀽𑀭𑁂, 𑀪𑀸𑀚𑀺𑀢𑀜𑁆𑀘 𑀓𑀻𑀝𑀸𑀕𑀺𑀭𑁂;

𑀆𑀴𑀯𑀻 𑀧𑀺𑀡𑁆𑀟𑀓𑀓𑀼𑀝𑁆𑀝𑁂𑀳𑀺, 𑀤𑁆𑀯𑀸𑀭𑀅𑀕𑁆𑀕𑀴𑀯𑀝𑁆𑀝𑀺𑀓𑀸.

𑀆𑀮𑁄𑀓𑀲𑁂𑀢𑀓𑀸𑀴𑀜𑁆𑀘, 𑀕𑁂𑀭𑀼𑀙𑀸𑀤𑀦𑀩𑀦𑁆𑀥𑀦𑀸;

𑀪𑀡𑁆𑀟𑀺𑀔𑀡𑁆𑀟𑀧𑀭𑀺𑀪𑀡𑁆𑀟𑀁, 𑀯𑀻𑀲 𑀢𑀺𑀁𑀲𑀸 𑀘 𑀓𑀸𑀮𑀺𑀓𑀸.

𑀑𑀲𑀺𑀢𑁂 𑀅𑀓𑀢𑀁 𑀯𑀺𑀧𑁆𑀧𑀁, 𑀔𑀼𑀤𑁆𑀤𑁂 𑀙𑀧𑁆𑀧𑀜𑁆𑀘𑀯𑀲𑁆𑀲𑀺𑀓𑀁;

𑀅𑀟𑁆𑀠𑀬𑁄𑀕𑁂 𑀘 𑀲𑀢𑁆𑀢𑀝𑁆𑀞, 𑀫𑀳𑀮𑁆𑀮𑁂 𑀤𑀲 𑀤𑁆𑀯𑀸𑀤𑀲.

𑀲𑀩𑁆𑀩𑀁 𑀯𑀺𑀳𑀸𑀭𑀁 𑀏𑀓𑀲𑁆𑀲, 𑀅𑀜𑁆𑀜𑀁 𑀯𑀸𑀲𑁂𑀦𑁆𑀢𑀺 𑀲𑀗𑁆𑀖𑀺𑀓𑀁;

𑀦𑀺𑀲𑁆𑀲𑀻𑀫𑀁 𑀲𑀩𑁆𑀩𑀓𑀸𑀮𑀜𑁆𑀘, 𑀧𑀓𑁆𑀓𑀫𑀺 𑀯𑀺𑀩𑁆𑀪𑀫𑀦𑁆𑀢𑀺 𑀘.

𑀓𑀸𑀮𑀜𑁆𑀘 𑀲𑀸𑀫𑀡𑁂𑀭𑀜𑁆𑀘, 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀅𑀦𑁆𑀢𑀺𑀫𑀁;

𑀉𑀫𑁆𑀫𑀢𑁆𑀢𑀔𑀺𑀢𑁆𑀢𑀘𑀺𑀢𑁆𑀢𑀸 𑀘, 𑀯𑁂𑀤𑀦𑀸𑀧𑀢𑁆𑀢𑀺𑀤𑀲𑁆𑀲𑀦𑀸.

𑀅𑀧𑁆𑀧𑀝𑀺𑀓𑀫𑁆𑀫𑀤𑀺𑀝𑁆𑀞𑀺𑀬𑀸, 𑀧𑀡𑁆𑀟𑀓𑀸 𑀣𑁂𑀬𑁆𑀬𑀢𑀺𑀢𑁆𑀣𑀺𑀬𑀸;

𑀢𑀺𑀭𑀘𑁆𑀙𑀸𑀦𑀫𑀸𑀢𑀼𑀧𑀺𑀢𑀼, 𑀅𑀭𑀳𑀦𑁆𑀢𑀸 𑀘 𑀤𑀽𑀲𑀓𑀸.

𑀪𑁂𑀤𑀓𑀸 𑀮𑁄𑀳𑀺𑀢𑀼𑀧𑁆𑀧𑀸𑀤𑀸, 𑀉𑀪𑀢𑁄 𑀘𑀸𑀧𑀺 𑀩𑁆𑀬𑀜𑁆𑀚𑀦𑀓𑀸;

𑀫𑀸 𑀲𑀗𑁆𑀖𑀲𑁆𑀲 𑀧𑀭𑀺𑀳𑀸𑀬𑀺, 𑀓𑀫𑁆𑀫𑀁 𑀅𑀜𑁆𑀜𑀲𑁆𑀲 𑀤𑀸𑀢𑀯𑁂.

𑀯𑀺𑀧𑁆𑀧𑀓𑀢𑁂 𑀘 𑀅𑀜𑁆𑀜𑀲𑁆𑀲, 𑀓𑀢𑁂 𑀢𑀲𑁆𑀲𑁂𑀯 𑀧𑀓𑁆𑀓𑀫𑁂;

𑀯𑀺𑀩𑁆𑀪𑀫𑀢𑀺 𑀓𑀸𑀮𑀗𑁆𑀓𑀢𑁄, 𑀲𑀸𑀫𑀡𑁂𑀭𑁄 𑀘 𑀚𑀸𑀬𑀢𑀺.

𑀧𑀘𑁆𑀘𑀓𑁆𑀔𑀸𑀢𑁄 𑀘 𑀲𑀺𑀓𑁆𑀔𑀸𑀬, 𑀅𑀦𑁆𑀢𑀺𑀫𑀚𑁆𑀛𑀸𑀧𑀦𑁆𑀦𑀓𑁄 𑀬𑀤𑀺;

𑀲𑀗𑁆𑀖𑁄𑀯 𑀲𑀸𑀫𑀺𑀓𑁄 𑀳𑁄𑀢𑀺, 𑀉𑀫𑁆𑀫𑀢𑁆𑀢𑀔𑀺𑀢𑁆𑀢𑀯𑁂𑀤𑀦𑀸.

𑀅𑀤𑀲𑁆𑀲𑀦𑀸𑀧𑁆𑀧𑀝𑀺𑀓𑀫𑁆𑀫𑁂, 𑀤𑀺𑀝𑁆𑀞𑀺 𑀢𑀲𑁆𑀲𑁂𑀯 𑀳𑁄𑀢𑀺 𑀢𑀁;

𑀧𑀡𑁆𑀟𑀓𑁄 𑀣𑁂𑀬𑁆𑀬𑀢𑀺𑀢𑁆𑀣𑀻 𑀘, 𑀢𑀺𑀭𑀘𑁆𑀙𑀸𑀦𑀫𑀸𑀢𑀼𑀧𑁂𑀢𑁆𑀢𑀺𑀓𑀁.

𑀖𑀸𑀢𑀓𑁄 𑀤𑀽𑀲𑀓𑁄 𑀘𑀸𑀧𑀺, 𑀪𑁂𑀤𑀮𑁄𑀳𑀺𑀢𑀩𑁆𑀬𑀜𑁆𑀚𑀦𑀸;