𑁬. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀁

𑁧. 𑀧𑀞𑀫𑀪𑀸𑀡𑀯𑀸𑀭𑁄

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀁

𑁨𑁯𑁪. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑁂𑀦𑀸𑀲𑀦𑀁 𑀅𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀪𑀺𑀓𑁆𑀔𑀽 𑀢𑀳𑀁 𑀢𑀳𑀁 𑀯𑀺𑀳𑀭𑀦𑁆𑀢𑀺 𑁋 𑀅𑀭𑀜𑁆𑀜𑁂, 𑀭𑀼𑀓𑁆𑀔𑀫𑀽𑀮𑁂, 𑀧𑀩𑁆𑀩𑀢𑁂, 𑀓𑀦𑁆𑀤𑀭𑀸𑀬𑀁, 𑀕𑀺𑀭𑀺𑀕𑀼𑀳𑀸𑀬𑀁, 𑀲𑀼𑀲𑀸𑀦𑁂, 𑀯𑀦𑀧𑀢𑁆𑀣𑁂, 𑀅𑀚𑁆𑀛𑁄𑀓𑀸𑀲𑁂, 𑀧𑀮𑀸𑀮𑀧𑀼𑀜𑁆𑀚𑁂. 𑀢𑁂 𑀓𑀸𑀮𑀲𑁆𑀲𑁂𑀯 𑀢𑀢𑁄 𑀢𑀢𑁄 𑀉𑀧𑀦𑀺𑀓𑁆𑀔𑀫𑀦𑁆𑀢𑀺 𑁋 𑀅𑀭𑀜𑁆𑀜𑀸 𑀭𑀼𑀓𑁆𑀔𑀫𑀽𑀮𑀸 𑀧𑀩𑁆𑀩𑀢𑀸 𑀓𑀦𑁆𑀤𑀭𑀸 𑀕𑀺𑀭𑀺𑀕𑀼𑀳𑀸 𑀲𑀼𑀲𑀸𑀦𑀸 𑀯𑀦𑀧𑀢𑁆𑀣𑀸 𑀅𑀚𑁆𑀛𑁄𑀓𑀸𑀲𑀸 𑀧𑀮𑀸𑀮𑀧𑀼𑀜𑁆𑀚𑀸, 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦, 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦, 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦, 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽, 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀸. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 [𑀲𑁂𑀝𑁆𑀞𑀺 (𑀓.)] 𑀓𑀸𑀮𑀲𑁆𑀲𑁂𑀯 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀅𑀤𑁆𑀤𑀲𑀸 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀢𑁂 𑀪𑀺𑀓𑁆𑀔𑀽 𑀓𑀸𑀮𑀲𑁆𑀲𑁂𑀯 𑀢𑀢𑁄 𑀢𑀢𑁄 𑀉𑀧𑀦𑀺𑀓𑁆𑀔𑀫𑀦𑁆𑀢𑁂 𑁋 𑀅𑀭𑀜𑁆𑀜𑀸 𑀭𑀼𑀓𑁆𑀔𑀫𑀽𑀮𑀸 𑀧𑀩𑁆𑀩𑀢𑀸 𑀓𑀦𑁆𑀤𑀭𑀸 𑀕𑀺𑀭𑀺𑀕𑀼𑀳𑀸 𑀲𑀼𑀲𑀸𑀦𑀸 𑀯𑀦𑀧𑀢𑁆𑀣𑀸 𑀅𑀚𑁆𑀛𑁄𑀓𑀸𑀲𑀸 𑀧𑀮𑀸𑀮𑀧𑀼𑀜𑁆𑀚𑀸, 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦, 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦, 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦, 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽, 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁂. 𑀤𑀺𑀲𑁆𑀯𑀸𑀦𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀲𑀘𑀸𑀳𑀁, 𑀪𑀦𑁆𑀢𑁂, 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀬𑁆𑀬𑀁, 𑀯𑀲𑁂𑀬𑁆𑀬𑀸𑀣 𑀫𑁂 𑀯𑀺𑀳𑀸𑀭𑁂𑀲𑀽’’𑀢𑀺? ‘‘𑀦 𑀔𑁄, 𑀕𑀳𑀧𑀢𑀺, 𑀪𑀕𑀯𑀢𑀸 𑀯𑀺𑀳𑀸𑀭𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀫𑀫 𑀆𑀭𑁄𑀘𑁂𑀬𑁆𑀬𑀸𑀣𑀸’’𑀢𑀺. ‘‘𑀏𑀯𑀁 𑀕𑀳𑀧𑀢𑀻’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀭𑀸𑀚𑀕𑀳𑀓𑁄, 𑀪𑀦𑁆𑀢𑁂, 𑀲𑁂𑀝𑁆𑀞𑀻 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀢𑀼𑀓𑀸𑀫𑁄. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 [𑀪𑀦𑁆𑀢𑁂 (𑀲𑀻. 𑀓.)] 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀮𑁂𑀡𑀸𑀦𑀺 [𑀧𑀜𑁆𑀘 𑀲𑁂𑀦𑀸𑀲𑀦𑀸𑀦𑀺 (𑀲𑁆𑀬𑀸.)] 𑁋 𑀯𑀺𑀳𑀸𑀭𑀁, 𑀅𑀟𑁆𑀠𑀬𑁄𑀕𑀁, 𑀧𑀸𑀲𑀸𑀤𑀁, 𑀳𑀫𑁆𑀫𑀺𑀬𑀁, 𑀕𑀼𑀳’’𑀦𑁆𑀢𑀺.

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀕𑀳𑀓𑀁 𑀲𑁂𑀝𑁆𑀞𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀦𑀼𑀜𑁆𑀜𑀸𑀢𑀸 𑀔𑁄, 𑀕𑀳𑀧𑀢𑀺, 𑀪𑀕𑀯𑀢𑀸 𑀯𑀺𑀳𑀸𑀭𑀸; 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀏𑀓𑀸𑀳𑁂𑀦𑁂𑀯 𑀲𑀝𑁆𑀞𑀺𑀯𑀺𑀳𑀸𑀭𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀢𑁂 𑀲𑀝𑁆𑀞𑀺𑀯𑀺𑀳𑀸𑀭𑁂 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑁂 𑀫𑁂, 𑀪𑀦𑁆𑀢𑁂, 𑀲𑀝𑁆𑀞𑀺𑀯𑀺𑀳𑀸𑀭𑀸 𑀧𑀼𑀜𑁆𑀜𑀢𑁆𑀣𑀺𑀓𑁂𑀦 𑀲𑀕𑁆𑀕𑀢𑁆𑀣𑀺𑀓𑁂𑀦 𑀓𑀸𑀭𑀸𑀧𑀺𑀢𑀸. 𑀓𑀣𑀸𑀳𑀁, 𑀪𑀦𑁆𑀢𑁂, 𑀢𑁂𑀲𑀼 𑀯𑀺𑀳𑀸𑀭𑁂𑀲𑀼 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀢𑁂 𑀲𑀝𑁆𑀞𑀺𑀯𑀺𑀳𑀸𑀭𑁂 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑁂 𑀲𑀝𑁆𑀞𑀺𑀯𑀺𑀳𑀸𑀭𑁂 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀸𑀧𑁂𑀲𑀺.

𑁨𑁯𑁫. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑀓𑀁 𑀲𑁂𑀝𑁆𑀞𑀺𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺 [𑀧𑀝𑀺𑀳𑀦𑀢𑀺 (𑀓.)], 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀭𑀻𑀲𑀧𑁂 𑀘 𑀫𑀓𑀲𑁂, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

‘‘𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁂, 𑀲𑀜𑁆𑀚𑀸𑀢𑁄 [𑀯𑀸𑀢𑀸𑀢𑀧𑁂 𑀖𑁄𑀭𑁂, 𑀲𑀜𑁆𑀚𑀸𑀢𑁂 (𑀓. 𑀲𑀤𑁆𑀤𑀦𑀻𑀢𑀺)] 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

‘‘𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 [𑀩𑀼𑀤𑁆𑀥𑁂𑀳𑀺 (𑀲𑁆𑀬𑀸.)] 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄, 𑀧𑁄𑀲𑁄 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

‘‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀢𑁂𑀲𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑀓𑀁 𑀲𑁂𑀝𑁆𑀞𑀺𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁨𑁯𑁬. 𑀅𑀲𑁆𑀲𑁄𑀲𑀼𑀁 𑀔𑁄 𑀫𑀦𑀼𑀲𑁆𑀲𑀸 𑁋 ‘‘𑀪𑀕𑀯𑀢𑀸 𑀓𑀺𑀭 𑀯𑀺𑀳𑀸𑀭𑀸 𑀅𑀦𑀼𑀜𑁆𑀜𑀸𑀢𑀸’’𑀢𑀺 𑀲𑀓𑁆𑀓𑀘𑁆𑀘𑀁 [𑀢𑁂 𑀲𑀓𑁆𑀓𑀘𑁆𑀘𑀁 (𑀲𑁆𑀬𑀸. 𑀓𑀁.)] 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀦𑁆𑀢𑀺. 𑀢𑁂 𑀯𑀺𑀳𑀸𑀭𑀸 𑀅𑀓𑀯𑀸𑀝𑀓𑀸 𑀳𑁄𑀦𑁆𑀢𑀺; 𑀅𑀳𑀻𑀧𑀺 𑀯𑀺𑀘𑁆𑀙𑀺𑀓𑀸𑀧𑀺 𑀲𑀢𑀧𑀤𑀺𑀬𑁄𑀧𑀺 𑀧𑀯𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀯𑀸𑀝’’𑀦𑁆𑀢𑀺. 𑀪𑀺𑀢𑁆𑀢𑀺𑀙𑀺𑀤𑁆𑀤𑀁 𑀓𑀭𑀺𑀢𑁆𑀯𑀸 𑀯𑀮𑁆𑀮𑀺𑀬𑀸𑀧𑀺 𑀭𑀚𑁆𑀚𑀼𑀬𑀸𑀧𑀺 𑀓𑀯𑀸𑀝𑀁 𑀩𑀦𑁆𑀥𑀦𑁆𑀢𑀺. 𑀉𑀦𑁆𑀤𑀽𑀭𑁂𑀳𑀺𑀧𑀺 𑀉𑀧𑀘𑀺𑀓𑀸𑀳𑀺𑀧𑀺 𑀔𑀚𑁆𑀚𑀦𑁆𑀢𑀺. 𑀔𑀬𑀺𑀢𑀩𑀦𑁆𑀥𑀦𑀸𑀦𑀺 𑀓𑀯𑀸𑀝𑀸𑀦𑀺 𑀧𑀢𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀺𑀝𑁆𑀞𑀲𑀗𑁆𑀖𑀸𑀝𑀁 𑀉𑀤𑀼𑀓𑁆𑀔𑀮𑀺𑀓𑀁 𑀉𑀢𑁆𑀢𑀭𑀧𑀸𑀲𑀓’’𑀦𑁆𑀢𑀺. 𑀓𑀯𑀸𑀝𑀸 𑀦 𑀨𑀼𑀲𑀻𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀯𑀺𑀜𑁆𑀙𑀦𑀘𑁆𑀙𑀺𑀤𑁆𑀤𑀁 𑀆𑀯𑀺𑀜𑁆𑀙𑀦𑀭𑀚𑁆𑀚𑀼’’𑀦𑁆𑀢𑀺. 𑀓𑀯𑀸𑀝𑀸 𑀦 𑀣𑀓𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀴𑀯𑀝𑁆𑀝𑀺𑀁 𑀓𑀧𑀺𑀲𑀻𑀲𑀓𑀁 𑀲𑀽𑀘𑀺𑀓𑀁 𑀖𑀝𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀦 𑀲𑀓𑁆𑀓𑁄𑀦𑁆𑀢𑀺 𑀓𑀯𑀸𑀝𑀁 𑀅𑀧𑀸𑀧𑀼𑀭𑀺𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀸𑀴𑀘𑁆𑀙𑀺𑀤𑁆𑀤𑀁. 𑀢𑀻𑀡𑀺 𑀢𑀸𑀴𑀸𑀦𑀺 𑁋 𑀮𑁄𑀳𑀢𑀸𑀴𑀁, 𑀓𑀝𑁆𑀞𑀢𑀸𑀴𑀁, 𑀯𑀺𑀲𑀸𑀡𑀢𑀸𑀴’’𑀦𑁆𑀢𑀺. 𑀬𑁂𑀳𑀺 [𑀬𑁂𑀧𑀺 (𑀲𑀻. 𑀲𑁆𑀬𑀸.)] 𑀢𑁂 𑀉𑀕𑁆𑀖𑀸𑀝𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀺 [𑀯𑀺𑀲𑀸𑀡𑀢𑀸𑀴𑀁, 𑀬𑁂𑀳𑀺 𑀢𑁂 𑀉𑀕𑁆𑀖𑀸𑀝𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀻𑀢𑀺 (𑀓.)], 𑀯𑀺𑀳𑀸𑀭𑀸 𑀅𑀕𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀦𑁆𑀢𑀓𑀁 𑀲𑀽𑀘𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀢𑀺𑀡𑀘𑁆𑀙𑀤𑀦𑀸 𑀳𑁄𑀦𑁆𑀢𑀺; 𑀲𑀻𑀢𑀓𑀸𑀮𑁂 𑀲𑀻𑀢𑀸, 𑀉𑀡𑁆𑀳𑀓𑀸𑀮𑁂 𑀉𑀡𑁆𑀳𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀅𑀯𑀸𑀢𑀧𑀸𑀦𑀓𑀸 𑀳𑁄𑀦𑁆𑀢𑀺 𑀅𑀘𑀓𑁆𑀔𑀼𑀲𑁆𑀲𑀸 𑀤𑀼𑀕𑁆𑀕𑀦𑁆𑀥𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀡𑀺 𑀯𑀸𑀢𑀧𑀸𑀦𑀸𑀦𑀺 𑁋 𑀯𑁂𑀤𑀺𑀓𑀸𑀯𑀸𑀢𑀧𑀸𑀦𑀁, 𑀚𑀸𑀮𑀯𑀸𑀢𑀧𑀸𑀦𑀁, 𑀲𑀮𑀸𑀓𑀯𑀸𑀢𑀧𑀸𑀦’’𑀦𑁆𑀢𑀺. 𑀯𑀸𑀢𑀧𑀸𑀦𑀦𑁆𑀢𑀭𑀺𑀓𑀸𑀬 𑀓𑀸𑀴𑀓𑀸𑀧𑀺 𑀯𑀕𑁆𑀕𑀼𑀮𑀺𑀬𑁄𑀧𑀺 𑀧𑀯𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀸𑀢𑀧𑀸𑀦𑀘𑀓𑁆𑀓𑀮𑀺𑀓’’𑀦𑁆𑀢𑀺. 𑀘𑀓𑁆𑀓𑀮𑀺𑀓𑀦𑁆𑀢𑀭𑀺𑀓𑀸𑀬𑀧𑀺 𑀓𑀸𑀴𑀓𑀸𑀧𑀺 𑀯𑀕𑁆𑀕𑀼𑀮𑀺𑀬𑁄𑀧𑀺 𑀧𑀯𑀺𑀲𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀸𑀢𑀧𑀸𑀦𑀓𑀯𑀸𑀝𑀓𑀁 𑀯𑀸𑀢𑀧𑀸𑀦𑀪𑀺𑀲𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀙𑀫𑀸𑀬𑀁 𑀲𑀬𑀦𑁆𑀢𑀺. 𑀕𑀢𑁆𑀢𑀸𑀦𑀺𑀧𑀺 𑀘𑀻𑀯𑀭𑀸𑀦𑀺𑀧𑀺 𑀧𑀁𑀲𑀼𑀓𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑀲𑀦𑁆𑀣𑀸𑀭𑀓’’𑀦𑁆𑀢𑀺. 𑀢𑀺𑀡𑀲𑀦𑁆𑀣𑀸𑀭𑀓𑁄 𑀉𑀦𑁆𑀤𑀽𑀭𑁂𑀳𑀺𑀧𑀺 𑀉𑀧𑀘𑀺𑀓𑀸𑀳𑀺𑀧𑀺 𑀔𑀚𑁆𑀚𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀺𑀟𑁆𑀠𑀺’’𑀦𑁆𑀢𑀺 [𑀫𑀻𑀠𑀦𑁆𑀢𑀺 (𑀲𑀻.), 𑀫𑀺𑀠𑀺𑀦𑁆𑀢𑀺 (𑀲𑁆𑀬𑀸.)]. 𑀫𑀺𑀟𑁆𑀠𑀺𑀬𑀸 𑀕𑀢𑁆𑀢𑀸𑀦𑀺 𑀤𑀼𑀓𑁆𑀔𑀸 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑀺𑀤𑀮𑀫𑀜𑁆𑀘𑀓’’𑀦𑁆𑀢𑀺.

𑀫𑀜𑁆𑀘𑀧𑀻𑀞𑀸𑀤𑀺𑀅𑀦𑀼𑀚𑀸𑀦𑀦𑀁

𑁨𑁯𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁄𑀲𑀸𑀦𑀺𑀓𑁄 𑀫𑀲𑀸𑀭𑀓𑁄 𑀫𑀜𑁆𑀘𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀲𑀸𑀭𑀓𑀁 𑀫𑀜𑁆𑀘’’𑀦𑁆𑀢𑀺. 𑀫𑀲𑀸𑀭𑀓𑀁 𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀲𑀸𑀭𑀓𑀁 𑀧𑀻𑀞’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁄𑀲𑀸𑀦𑀺𑀓𑁄 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄 𑀫𑀜𑁆𑀘𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑀁 𑀫𑀜𑁆𑀘’’𑀦𑁆𑀢𑀺. 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑀁 𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑀁 𑀧𑀻𑀞’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁄𑀲𑀸𑀦𑀺𑀓𑁄 𑀓𑀼𑀴𑀻𑀭𑀧𑀸𑀤𑀓𑁄 𑀫𑀜𑁆𑀘𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀼𑀴𑀻𑀭𑀧𑀸𑀤𑀓𑀁 𑀫𑀜𑁆𑀘’’𑀦𑁆𑀢𑀺. 𑀓𑀼𑀴𑀻𑀭𑀧𑀸𑀤𑀓𑀁 𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀼𑀴𑀻𑀭𑀧𑀸𑀤𑀓𑀁 𑀧𑀻𑀞’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁄𑀲𑀸𑀦𑀺𑀓𑁄 𑀆𑀳𑀘𑁆𑀘𑀧𑀸𑀤𑀓𑁄 𑀫𑀜𑁆𑀘𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀑𑀭𑀸𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀳𑀘𑁆𑀘𑀧𑀸𑀤𑀓𑀁 𑀫𑀜𑁆𑀘’’𑀦𑁆𑀢𑀺. 𑀆𑀳𑀘𑁆𑀘𑀧𑀸𑀤𑀓𑀁 𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀳𑀘𑁆𑀘𑀧𑀸𑀤𑀓𑀁 𑀧𑀻𑀞’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀆𑀲𑀦𑁆𑀤𑀺𑀓𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀲𑀦𑁆𑀤𑀺𑀓’’𑀦𑁆𑀢𑀺. 𑀉𑀘𑁆𑀘𑀓𑁄 𑀆𑀲𑀦𑁆𑀤𑀺𑀓𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀓𑀫𑁆𑀧𑀺 𑀆𑀲𑀦𑁆𑀤𑀺𑀓’’𑀦𑁆𑀢𑀺. 𑀲𑀢𑁆𑀢𑀗𑁆𑀕𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀗𑁆𑀕’’𑀦𑁆𑀢𑀺. 𑀉𑀘𑁆𑀘𑀓𑁄 𑀲𑀢𑁆𑀢𑀗𑁆𑀕𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀓𑀫𑁆𑀧𑀺 𑀲𑀢𑁆𑀢𑀗𑁆𑀕’’𑀦𑁆𑀢𑀺. 𑀪𑀤𑁆𑀤𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀧𑀻𑀞’’𑀦𑁆𑀢𑀺. 𑀧𑀻𑀞𑀺𑀓𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀻𑀞𑀺𑀓’’𑀦𑁆𑀢𑀺. 𑀏𑀴𑀓𑀧𑀸𑀤𑀓𑀁 𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀴𑀓𑀧𑀸𑀤𑀓𑀁 𑀧𑀻𑀞’’𑀦𑁆𑀢𑀺. 𑀆𑀫𑀮𑀓𑀯𑀝𑁆𑀝𑀺𑀓𑀁 [𑀆𑀫𑀮𑀓𑀯𑀡𑁆𑀝𑀺𑀓𑀁 (𑀲𑁆𑀬𑀸.)] 𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀫𑀮𑀓𑀯𑀝𑁆𑀝𑀺𑀓𑀁 𑀧𑀻𑀞’’𑀦𑁆𑀢𑀺. 𑀨𑀮𑀓𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀨𑀮𑀓’’𑀦𑁆𑀢𑀺. 𑀓𑁄𑀘𑁆𑀙𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀘𑁆𑀙’’𑀦𑁆𑀢𑀺. 𑀧𑀮𑀸𑀮𑀧𑀻𑀞𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀮𑀸𑀮𑀧𑀻𑀞’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑁂 𑀫𑀜𑁆𑀘𑁂 𑀲𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑁂 𑀫𑀜𑁆𑀘𑁂 𑀲𑀬𑀺𑀢𑀩𑁆𑀩𑀁. 𑀬𑁄 𑀲𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀦𑀻𑀘𑁂 𑀫𑀜𑁆𑀘𑁂 𑀲𑀬𑀦𑁆𑀢𑁄 𑀅𑀳𑀺𑀦𑀸 𑀤𑀝𑁆𑀞𑁄 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀜𑁆𑀘𑀧𑀝𑀺𑀧𑀸𑀤𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀘𑁆𑀘𑁂 𑀫𑀜𑁆𑀘𑀧𑀝𑀺𑀧𑀸𑀤𑀓𑁂 𑀥𑀸𑀭𑁂𑀦𑁆𑀢𑀺, 𑀲𑀳 𑀫𑀜𑁆𑀘𑀧𑀝𑀺𑀧𑀸𑀤𑀓𑁂𑀳𑀺 𑀧𑀯𑁂𑀥𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀸 𑀫𑀜𑁆𑀘𑀧𑀝𑀺𑀧𑀸𑀤𑀓𑀸 𑀥𑀸𑀭𑁂𑀢𑀩𑁆𑀩𑀸. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀗𑁆𑀕𑀼𑀮𑀧𑀭𑀫𑀁 𑀫𑀜𑁆𑀘𑀧𑀝𑀺𑀧𑀸𑀤𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑀼𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀼𑀢𑁆𑀢𑀁 𑀫𑀜𑁆𑀘𑀁 𑀯𑁂𑀞𑁂𑀢𑀼’’𑀦𑁆𑀢𑀺 [𑀯𑁂𑀢𑀼𑀦𑁆𑀢𑀺 (𑀲𑀻.)]. 𑀅𑀗𑁆𑀕𑀸𑀦𑀺 𑀩𑀳𑀼𑀲𑀼𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂 𑀯𑀺𑀚𑁆𑀛𑀺𑀢𑁆𑀯𑀸 𑀅𑀝𑁆𑀞𑀧𑀤𑀓𑀁 𑀯𑁂𑀞𑁂𑀢𑀼’’𑀦𑁆𑀢𑀺. 𑀘𑁄𑀴𑀓𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀺𑀫𑀺𑀮𑀺𑀓𑀁 𑀓𑀸𑀢𑀼’’𑀦𑁆𑀢𑀺. 𑀢𑀽𑀮𑀺𑀓𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀚𑀝𑁂𑀢𑁆𑀯𑀸 𑀩𑀺𑀩𑁆𑀩𑁄𑀳𑀦𑀁 [𑀩𑀺𑀫𑁆𑀩𑁄𑀳𑀦𑀁 (𑀲𑀻. 𑀲𑁆𑀬𑀸. 𑀩𑀺𑀫𑁆𑀩 + 𑀑𑀳𑀦𑀁)] 𑀓𑀸𑀢𑀼𑀁. 𑀢𑀻𑀡𑀺 𑀢𑀽𑀮𑀸𑀦𑀺 𑁋 𑀭𑀼𑀓𑁆𑀔𑀢𑀽𑀮𑀁, 𑀮𑀢𑀸𑀢𑀽𑀮𑀁, 𑀧𑁄𑀝𑀓𑀺𑀢𑀽𑀮’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀤𑁆𑀥𑀓𑀸𑀬𑀺𑀓𑀸𑀦𑀺 [𑀅𑀟𑁆𑀠𑀓𑀸𑀬𑀺𑀓𑀸𑀦𑀺 (𑀓.)] 𑀩𑀺𑀩𑁆𑀩𑁄𑀳𑀦𑀸𑀦𑀺 𑀥𑀸𑀭𑁂𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀓𑀸𑀬𑀺𑀓𑀸𑀦𑀺 𑀩𑀺𑀩𑁆𑀩𑁄𑀳𑀦𑀸𑀦𑀺 𑀥𑀸𑀭𑁂𑀢𑀩𑁆𑀩𑀸𑀦𑀺. 𑀬𑁄 𑀥𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀻𑀲𑀧𑁆𑀧𑀫𑀸𑀡𑀁 𑀩𑀺𑀩𑁆𑀩𑁄𑀳𑀦𑀁 𑀓𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑁂 𑀕𑀺𑀭𑀕𑁆𑀕𑀲𑀫𑀚𑁆𑀚𑁄 𑀳𑁄𑀢𑀺. 𑀫𑀦𑀼𑀲𑁆𑀲𑀸 𑀫𑀳𑀸𑀫𑀢𑁆𑀢𑀸𑀦𑀁 𑀅𑀢𑁆𑀣𑀸𑀬 𑀪𑀺𑀲𑀺𑀬𑁄 𑀧𑀝𑀺𑀬𑀸𑀤𑁂𑀦𑁆𑀢𑀺 𑁋 𑀉𑀡𑁆𑀡𑀪𑀺𑀲𑀺𑀁, 𑀘𑁄𑀴𑀪𑀺𑀲𑀺𑀁, 𑀯𑀸𑀓𑀪𑀺𑀲𑀺𑀁, 𑀢𑀺𑀡𑀪𑀺𑀲𑀺𑀁, 𑀧𑀡𑁆𑀡𑀪𑀺𑀲𑀺𑀁. 𑀢𑁂 𑀯𑀻𑀢𑀺𑀯𑀢𑁆𑀢𑁂 𑀲𑀫𑀚𑁆𑀚𑁂 𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀭𑀦𑁆𑀢𑀺. 𑀅𑀤𑁆𑀤𑀲𑀸𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀲𑀫𑀚𑁆𑀚𑀝𑁆𑀞𑀸𑀦𑁂 𑀩𑀳𑀼𑀁 𑀉𑀡𑁆𑀡𑀫𑁆𑀧𑀺 𑀘𑁄𑀴𑀓𑀫𑁆𑀧𑀺 𑀯𑀸𑀓𑀫𑁆𑀧𑀺 𑀢𑀺𑀡𑀫𑁆𑀧𑀺 𑀧𑀡𑁆𑀡𑀫𑁆𑀧𑀺 𑀙𑀝𑁆𑀝𑀺𑀢𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀪𑀺𑀲𑀺𑀬𑁄 𑁋 𑀉𑀡𑁆𑀡𑀪𑀺𑀲𑀺𑀁, 𑀘𑁄𑀴𑀪𑀺𑀲𑀺𑀁, 𑀯𑀸𑀓𑀪𑀺𑀲𑀺𑀁, 𑀢𑀺𑀡𑀪𑀺𑀲𑀺𑀁, 𑀧𑀡𑁆𑀡𑀪𑀺𑀲𑀺’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀺𑀓𑀁 𑀤𑀼𑀲𑁆𑀲𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀲𑀺𑀁 𑀑𑀦𑀦𑁆𑀥𑀺𑀢𑀼’’𑀦𑁆𑀢𑀺 [𑀑𑀦𑀤𑁆𑀥𑀺𑀢𑀼𑀁 (𑀲𑁆𑀬𑀸.)].

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀫𑀜𑁆𑀘𑀪𑀺𑀲𑀺𑀁 𑀧𑀻𑀞𑁂 𑀲𑀦𑁆𑀣𑀭𑀦𑁆𑀢𑀺, 𑀧𑀻𑀞𑀪𑀺𑀲𑀺𑀁 𑀫𑀜𑁆𑀘𑁂 𑀲𑀦𑁆𑀣𑀭𑀦𑁆𑀢𑀺. 𑀪𑀺𑀲𑀺𑀬𑁄 𑀧𑀭𑀺𑀪𑀺𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀦𑀤𑁆𑀥𑀫𑀜𑁆𑀘𑀁 [𑀑𑀦𑀤𑁆𑀥𑀫𑀜𑁆𑀘𑀁 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀑𑀦𑀤𑁆𑀥𑀧𑀻𑀞’’𑀦𑁆𑀢𑀺. 𑀉𑀮𑁆𑀮𑁄𑀓𑀁 𑀅𑀓𑀭𑀺𑀢𑁆𑀯𑀸 𑀲𑀦𑁆𑀣𑀭𑀦𑁆𑀢𑀺, 𑀳𑁂𑀝𑁆𑀞𑀢𑁄 𑀦𑀺𑀧𑀢𑀦𑁆𑀢𑀺 [𑀦𑀺𑀧𑀝𑀦𑁆𑀢𑀺 (𑀓.), 𑀦𑀺𑀧𑁆𑀨𑀝𑀦𑁆𑀢𑀺 (𑀲𑀻.), 𑀦𑀺𑀧𑁆𑀧𑀸𑀝𑁂𑀦𑁆𑀢𑀺 (𑀲𑁆𑀬𑀸.)] …𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀮𑁆𑀮𑁄𑀓𑀁 𑀓𑀭𑀺𑀢𑁆𑀯𑀸 𑀲𑀦𑁆𑀣𑀭𑀺𑀢𑁆𑀯𑀸 𑀪𑀺𑀲𑀺𑀁 𑀑𑀦𑀦𑁆𑀥𑀺𑀢𑀼’’𑀦𑁆𑀢𑀺. 𑀙𑀯𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀳𑀭𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀨𑁄𑀲𑀺𑀢𑀼’’𑀦𑁆𑀢𑀺. 𑀳𑀭𑀦𑁆𑀢𑀺𑀬𑁂𑀯…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀢𑁆𑀢𑀺𑀓𑀫𑁆𑀫’’𑀦𑁆𑀢𑀺. 𑀳𑀭𑀦𑁆𑀢𑀺𑀬𑁂𑀯…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀪𑀢𑁆𑀢𑀺𑀓𑀫𑁆𑀫’’𑀦𑁆𑀢𑀺. 𑀳𑀭𑀦𑁆𑀢𑀺𑀬𑁂𑀯…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀳𑀢𑁆𑀣𑀪𑀢𑁆𑀢𑀺’’𑀦𑁆𑀢𑀺.

𑀲𑁂𑀢𑀯𑀡𑁆𑀡𑀸𑀤𑀺𑀅𑀦𑀼𑀚𑀸𑀦𑀦𑀁

𑁨𑁯𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀺𑀢𑁆𑀣𑀺𑀬𑀸𑀦𑀁 𑀲𑁂𑀬𑁆𑀬𑀸𑀬𑁄 𑀲𑁂𑀢𑀯𑀡𑁆𑀡𑀸 𑀳𑁄𑀦𑁆𑀢𑀺, 𑀓𑀸𑀴𑀯𑀡𑁆𑀡𑀓𑀢𑀸 𑀪𑀽𑀫𑀺, 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀓𑀢𑀸 𑀪𑀺𑀢𑁆𑀢𑀺. 𑀩𑀳𑀽 𑀫𑀦𑀼𑀲𑁆𑀲𑀸 𑀲𑁂𑀬𑁆𑀬𑀸𑀧𑁂𑀓𑁆𑀔𑀓𑀸 𑀕𑀘𑁆𑀙𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑁂 𑀲𑁂𑀢𑀯𑀡𑁆𑀡𑀁 𑀓𑀸𑀴𑀯𑀡𑁆𑀡𑀁 𑀕𑁂𑀭𑀼𑀓𑀧𑀭𑀺𑀓𑀫𑁆𑀫’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀨𑀭𑀼𑀲𑀸𑀬 𑀪𑀺𑀢𑁆𑀢𑀺𑀬𑀸 𑀲𑁂𑀢𑀯𑀡𑁆𑀡𑁄 𑀦 𑀦𑀺𑀧𑀢𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑀼𑀲𑀧𑀺𑀡𑁆𑀟𑀁 𑀤𑀢𑁆𑀯𑀸 𑀧𑀸𑀡𑀺𑀓𑀸𑀬 𑀧𑀝𑀺𑀩𑀸𑀳𑁂𑀢𑁆𑀯𑀸 𑀲𑁂𑀢𑀯𑀡𑁆𑀡𑀁 𑀦𑀺𑀧𑀸𑀢𑁂𑀢𑀼’’𑀦𑁆𑀢𑀺. 𑀲𑁂𑀢𑀯𑀡𑁆𑀡𑁄 𑀅𑀦𑀺𑀩𑀦𑁆𑀥𑀦𑀻𑀬𑁄 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀡𑁆𑀳𑀫𑀢𑁆𑀢𑀺𑀓𑀁 𑀤𑀢𑁆𑀯𑀸 𑀧𑀸𑀡𑀺𑀓𑀸𑀬 𑀧𑀝𑀺𑀩𑀸𑀳𑁂𑀢𑁆𑀯𑀸 𑀲𑁂𑀢𑀯𑀡𑁆𑀡𑀁 𑀦𑀺𑀧𑀸𑀢𑁂𑀢𑀼’’𑀦𑁆𑀢𑀺. 𑀲𑁂𑀢𑀯𑀡𑁆𑀡𑁄 𑀅𑀦𑀺𑀩𑀦𑁆𑀥𑀦𑀻𑀬𑁄 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀓𑁆𑀓𑀸𑀲𑀁 𑀧𑀺𑀝𑁆𑀞𑀫𑀤𑁆𑀤’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀨𑀭𑀼𑀲𑀸𑀬 𑀪𑀺𑀢𑁆𑀢𑀺𑀬𑀸 𑀕𑁂𑀭𑀼𑀓𑀸 𑀦 𑀦𑀺𑀧𑀢𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑀼𑀲𑀧𑀺𑀡𑁆𑀟𑀁 𑀤𑀢𑁆𑀯𑀸 𑀧𑀸𑀡𑀺𑀓𑀸𑀬 𑀧𑀝𑀺𑀩𑀸𑀳𑁂𑀢𑁆𑀯𑀸 𑀕𑁂𑀭𑀼𑀓𑀁 𑀦𑀺𑀧𑀸𑀢𑁂𑀢𑀼’’𑀦𑁆𑀢𑀺. 𑀕𑁂𑀭𑀼𑀓𑀸 𑀅𑀦𑀺𑀩𑀦𑁆𑀥𑀦𑀻𑀬𑀸 𑀳𑁄𑀢𑀺 …𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀼𑀡𑁆𑀟𑀓𑀫𑀢𑁆𑀢𑀺𑀓𑀁 𑀤𑀢𑁆𑀯𑀸 𑀧𑀸𑀡𑀺𑀓𑀸𑀬 𑀧𑀝𑀺𑀩𑀸𑀳𑁂𑀢𑁆𑀯𑀸 𑀕𑁂𑀭𑀼𑀓𑀁 𑀦𑀺𑀧𑀸𑀢𑁂𑀢𑀼’’𑀦𑁆𑀢𑀺. 𑀕𑁂𑀭𑀼𑀓𑀸 𑀅𑀦𑀺𑀩𑀦𑁆𑀥𑀦𑀻𑀬𑀸 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀸𑀲𑀧𑀓𑀼𑀝𑁆𑀝𑀁 𑀲𑀺𑀢𑁆𑀣𑀢𑁂𑀮𑀓’’𑀦𑁆𑀢𑀺. 𑀅𑀘𑁆𑀘𑀼𑀲𑁆𑀲𑀦𑁆𑀦𑀁 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑁄𑀴𑀓𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀨𑀭𑀼𑀲𑀸𑀬 𑀪𑀽𑀫𑀺𑀬𑀸 𑀓𑀸𑀴𑀯𑀡𑁆𑀡𑁄 𑀦 𑀦𑀺𑀧𑀢𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀣𑀼𑀲𑀧𑀺𑀡𑁆𑀟𑀁 𑀤𑀢𑁆𑀯𑀸 𑀧𑀸𑀡𑀺𑀓𑀸𑀬 𑀧𑀝𑀺𑀩𑀸𑀳𑁂𑀢𑁆𑀯𑀸 𑀓𑀸𑀴𑀯𑀡𑁆𑀡𑀁 𑀦𑀺𑀧𑀸𑀢𑁂𑀢𑀼’’𑀦𑁆𑀢𑀺. 𑀓𑀸𑀴𑀯𑀡𑁆𑀡𑁄 𑀅𑀦𑀺𑀩𑀦𑁆𑀥𑀦𑀻𑀬𑁄 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀡𑁆𑀟𑀼𑀫𑀢𑁆𑀢𑀺𑀓𑀁 𑀤𑀢𑁆𑀯𑀸 𑀧𑀸𑀡𑀺𑀓𑀸𑀬 𑀧𑀝𑀺𑀩𑀸𑀳𑁂𑀢𑁆𑀯𑀸 𑀓𑀸𑀴𑀯𑀡𑁆𑀡𑀁 𑀦𑀺𑀧𑀸𑀢𑁂𑀢𑀼’’𑀦𑁆𑀢𑀺. 𑀓𑀸𑀴𑀯𑀡𑁆𑀡𑁄 𑀅𑀦𑀺𑀩𑀦𑁆𑀥𑀦𑀻𑀬𑁄 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀓𑁆𑀓𑀸𑀲𑀁 𑀓𑀲𑀸𑀯’’𑀦𑁆𑀢𑀺.

𑀧𑀝𑀺𑀪𑀸𑀦𑀘𑀺𑀢𑁆𑀢𑀧𑀝𑀺𑀓𑁆𑀔𑁂𑀧𑀁

𑁨𑁯𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑁂 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀓𑀸𑀭𑀸𑀧𑁂𑀦𑁆𑀢𑀺 𑁋 𑀇𑀢𑁆𑀣𑀺𑀭𑀽𑀧𑀓𑀁 𑀧𑀼𑀭𑀺𑀲𑀭𑀽𑀧𑀓𑀁. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑀩𑁆𑀩𑀁 𑁋 𑀇𑀢𑁆𑀣𑀺𑀭𑀽𑀧𑀓𑀁 𑀧𑀼𑀭𑀺𑀲𑀭𑀽𑀧𑀓𑀁. 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓’’𑀦𑁆𑀢𑀺.

𑀇𑀝𑁆𑀞𑀓𑀸𑀘𑀬𑀸𑀤𑀺𑀅𑀦𑀼𑀚𑀸𑀦𑀦𑀁

𑁩𑁦𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀦𑀻𑀘𑀯𑀢𑁆𑀣𑀼𑀓𑀸 𑀳𑁄𑀦𑁆𑀢𑀺, 𑀉𑀤𑀓𑁂𑀦 𑀑𑀢𑁆𑀣𑀭𑀺𑀬𑁆𑀬𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀯𑀢𑁆𑀣𑀼𑀓𑀁 𑀓𑀸𑀢𑀼’’𑀦𑁆𑀢𑀺. 𑀘𑀬𑁄 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀺𑀦𑀺𑀢𑀼𑀁 𑀢𑀬𑁄 𑀘𑀬𑁂 𑁋 𑀇𑀝𑁆𑀞𑀓𑀸𑀘𑀬𑀁, 𑀲𑀺𑀮𑀸𑀘𑀬𑀁, 𑀤𑀸𑀭𑀼𑀘𑀬’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀯𑀺𑀳𑀜𑁆𑀜𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀬𑁄 𑀲𑁄𑀧𑀸𑀦𑁂 𑁋 𑀇𑀝𑁆𑀞𑀓𑀸𑀲𑁄𑀧𑀸𑀦𑀁, 𑀲𑀺𑀮𑀸𑀲𑁄𑀧𑀸𑀦𑀁, 𑀤𑀸𑀭𑀼𑀲𑁄𑀧𑀸𑀦’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀧𑀭𑀺𑀧𑀢𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀮𑀫𑁆𑀩𑀦𑀩𑀸𑀳’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀆𑀴𑀓𑀫𑀦𑁆𑀤𑀸 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀽 𑀳𑀺𑀭𑀺𑀬𑀦𑁆𑀢𑀺 𑀦𑀺𑀧𑀚𑁆𑀚𑀺𑀢𑀼𑀁. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀭𑁄𑀓𑀭𑀡𑀺’’𑀦𑁆𑀢𑀺. 𑀢𑀺𑀭𑁄𑀓𑀭𑀡𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀓𑀼𑀝𑁆𑀝𑀓’’𑀦𑁆𑀢𑀺. 𑀅𑀟𑁆𑀠𑀓𑀼𑀝𑁆𑀝𑀓𑀸 𑀉𑀧𑀭𑀺𑀢𑁄 𑀑𑀮𑁄𑀓𑁂𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀬𑁄 𑀕𑀩𑁆𑀪𑁂 𑁋 𑀲𑀺𑀯𑀺𑀓𑀸𑀕𑀩𑁆𑀪𑀁, 𑀦𑀸𑀴𑀺𑀓𑀸𑀕𑀩𑁆𑀪𑀁, 𑀳𑀫𑁆𑀫𑀺𑀬𑀕𑀩𑁆𑀪’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀔𑀼𑀤𑁆𑀤𑀓𑁂 𑀯𑀺𑀳𑀸𑀭𑁂 𑀫𑀚𑁆𑀛𑁂 𑀕𑀩𑁆𑀪𑀁 𑀓𑀭𑁄𑀦𑁆𑀢𑀺. 𑀉𑀧𑀘𑀸𑀭𑁄 𑀦 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀔𑀼𑀤𑁆𑀤𑀓𑁂 𑀯𑀺𑀳𑀸𑀭𑁂 𑀏𑀓𑀫𑀦𑁆𑀢𑀁 𑀕𑀩𑁆𑀪𑀁 𑀓𑀸𑀢𑀼𑀁, 𑀫𑀳𑀮𑁆𑀮𑀓𑁂 𑀫𑀚𑁆𑀛𑁂’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀲𑁆𑀲 𑀓𑀼𑀝𑁆𑀝𑀧𑀸𑀤𑁄 𑀚𑀻𑀭𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀼𑀮𑀗𑁆𑀓𑀧𑀸𑀤𑀓’’𑀦𑁆𑀢𑀺 [𑀓𑀼𑀴𑀼𑀗𑁆𑀓𑀧𑀸𑀤𑀓𑀦𑁆𑀢𑀺 (𑀲𑀻.)]. 𑀯𑀺𑀳𑀸𑀭𑀲𑁆𑀲 𑀓𑀼𑀝𑁆𑀝𑁄 𑀑𑀯𑀲𑁆𑀲𑀢𑀺…𑀧𑁂…‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀢𑁆𑀢𑀸𑀡𑀓𑀺𑀝𑀺𑀓𑀁 𑀉𑀤𑁆𑀤𑀲𑀼𑀥’’𑀦𑁆𑀢𑀺 [𑀉𑀤𑁆𑀥𑀸𑀲𑀼𑀥𑀦𑁆𑀢𑀺 (𑀲𑁆𑀬𑀸.)].

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀡𑀘𑁆𑀙𑀤𑀦𑀸 𑀅𑀳𑀺 𑀔𑀦𑁆𑀥𑁂 𑀧𑀢𑀢𑀺. 𑀲𑁄 𑀪𑀻𑀢𑁄 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀪𑀺𑀓𑁆𑀔𑀽 𑀉𑀧𑀥𑀸𑀯𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀯𑀺𑀲𑁆𑀲𑀭𑀫𑀓𑀸𑀲𑀻’’𑀢𑀺? 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀢𑀸𑀦’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀫𑀜𑁆𑀘𑀧𑀸𑀤𑁂𑀧𑀺 𑀧𑀻𑀞𑀧𑀸𑀤𑁂𑀧𑀺 𑀣𑀯𑀺𑀓𑀸𑀬𑁄 𑀮𑀕𑁆𑀕𑁂𑀦𑁆𑀢𑀺. 𑀉𑀦𑁆𑀤𑀽𑀭𑁂𑀳𑀺𑀧𑀺 𑀉𑀧𑀘𑀺𑀓𑀸𑀳𑀺𑀧𑀺 𑀔𑀚𑁆𑀚𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑀺𑀢𑁆𑀢𑀺𑀔𑀺𑀮𑀁 𑀦𑀸𑀕𑀤𑀦𑁆𑀢𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀫𑀜𑁆𑀘𑁂𑀧𑀺 𑀧𑀻𑀞𑁂𑀧𑀺 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑀺. 𑀘𑀻𑀯𑀭𑀁 𑀧𑀭𑀺𑀪𑀺𑀚𑁆𑀚𑀺𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑁂 𑀘𑀻𑀯𑀭𑀯𑀁𑀲𑀁 𑀘𑀻𑀯𑀭𑀭𑀚𑁆𑀚𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀅𑀦𑀸𑀴𑀺𑀦𑁆𑀤𑀓𑀸 𑀳𑁄𑀦𑁆𑀢𑀺 𑀅𑀧𑁆𑀧𑀝𑀺𑀲𑁆𑀲𑀭𑀡𑀸. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀴𑀺𑀦𑁆𑀤𑀁 𑀧𑀖𑀦𑀁 𑀧𑀓𑀼𑀝𑁆𑀝𑀁 [𑀧𑀓𑀼𑀟𑁆𑀟𑀁 (𑀲𑀻.)] 𑀑𑀲𑀸𑀭𑀓’’𑀦𑁆𑀢𑀺. 𑀆𑀴𑀺𑀦𑁆𑀤𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀽 𑀳𑀺𑀭𑀺𑀬𑀦𑁆𑀢𑀺 𑀦𑀺𑀧𑀚𑁆𑀚𑀺𑀢𑀼𑀁…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑀁𑀲𑀭𑀡𑀓𑀺𑀝𑀺𑀓𑀁 𑀉𑀕𑁆𑀖𑀸𑀝𑀦𑀓𑀺𑀝𑀺𑀓’’𑀦𑁆𑀢𑀺.

𑀉𑀧𑀝𑁆𑀞𑀸𑀦𑀲𑀸𑀮𑀸𑀅𑀦𑀼𑀚𑀸𑀦𑀦𑀁

𑁩𑁦𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀚𑁆𑀛𑁄𑀓𑀸𑀲𑁂 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀓𑀭𑁄𑀦𑁆𑀢𑀸 𑀲𑀻𑀢𑁂𑀦𑀧𑀺 𑀉𑀡𑁆𑀳𑁂𑀦𑀧𑀺 𑀓𑀺𑀮𑀫𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀧𑀝𑁆𑀞𑀸𑀦𑀲𑀸𑀮’’𑀦𑁆𑀢𑀺. 𑀉𑀧𑀝𑁆𑀞𑀸𑀦𑀲𑀸𑀮𑀸 𑀦𑀻𑀘𑀯𑀢𑁆𑀣𑀼𑀓𑀸 𑀳𑁄𑀢𑀺, 𑀉𑀤𑀓𑁂𑀦 𑀑𑀢𑁆𑀣𑀭𑀺𑀬𑁆𑀬𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀯𑀢𑁆𑀣𑀼𑀓𑀁 𑀓𑀸𑀢𑀼’’𑀦𑁆𑀢𑀺. 𑀘𑀬𑁄 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀺𑀦𑀺𑀢𑀼𑀁 𑀢𑀬𑁄 𑀘𑀬𑁂 𑁋 𑀇𑀝𑁆𑀞𑀓𑀸𑀘𑀬𑀁, 𑀲𑀺𑀮𑀸𑀘𑀬𑀁, 𑀤𑀸𑀭𑀼𑀘𑀬’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀯𑀺𑀳𑀜𑁆𑀜𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀬𑁄 𑀲𑁄𑀧𑀸𑀦𑁂 𑁋 𑀇𑀝𑁆𑀞𑀓𑀸𑀲𑁄𑀧𑀸𑀦𑀁, 𑀲𑀺𑀮𑀸𑀲𑁄𑀧𑀸𑀦𑀁, 𑀤𑀸𑀭𑀼𑀲𑁄𑀧𑀸𑀦’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀧𑀭𑀺𑀧𑀢𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀮𑀫𑁆𑀩𑀦𑀩𑀸𑀳’’𑀦𑁆𑀢𑀺. 𑀉𑀧𑀝𑁆𑀞𑀸𑀦𑀲𑀸𑀮𑀸𑀬 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀁 𑁋 𑀲𑁂𑀢𑀯𑀡𑁆𑀡𑀁 𑀓𑀸𑀴𑀯𑀡𑁆𑀡𑀁 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓𑀁 𑀘𑀻𑀯𑀭𑀯𑀁𑀲𑀁 𑀘𑀻𑀯𑀭𑀭𑀚𑁆𑀚𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀚𑁆𑀛𑁄𑀓𑀸𑀲𑁂 𑀙𑀫𑀸𑀬 𑀘𑀻𑀯𑀭𑀁 𑀧𑀢𑁆𑀣𑀭𑀦𑁆𑀢𑀺. 𑀘𑀻𑀯𑀭𑀁 𑀧𑀁𑀲𑀼𑀓𑀺𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑁄𑀓𑀸𑀲𑁂 𑀘𑀻𑀯𑀭𑀯𑀁𑀲𑀁 𑀘𑀻𑀯𑀭𑀭𑀚𑁆𑀚𑀼’’𑀦𑁆𑀢𑀺. 𑀧𑀸𑀦𑀻𑀬𑀁 𑀑𑀢𑀧𑁆𑀧𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀦𑀻𑀬𑀲𑀸𑀮𑀁 𑀧𑀸𑀦𑀻𑀬𑀫𑀡𑁆𑀟𑀧’’𑀦𑁆𑀢𑀺. 𑀧𑀸𑀦𑀻𑀬𑀲𑀸𑀮𑀸 𑀦𑀻𑀘𑀯𑀢𑁆𑀣𑀼𑀓𑀸 𑀳𑁄𑀢𑀺, 𑀉𑀤𑀓𑁂𑀦 𑀑𑀢𑁆𑀣𑀭𑀺𑀬𑁆𑀬𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀯𑀢𑁆𑀣𑀼𑀓𑀁 𑀓𑀸𑀢𑀼’’𑀦𑁆𑀢𑀺. 𑀘𑀬𑁄 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀺𑀦𑀺𑀢𑀼𑀁 𑀢𑀬𑁄 𑀘𑀬𑁂 𑁋 𑀇𑀝𑁆𑀞𑀓𑀸𑀘𑀬𑀁, 𑀲𑀺𑀮𑀸𑀘𑀬𑀁, 𑀤𑀸𑀭𑀼𑀘𑀬’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀯𑀺𑀳𑀜𑁆𑀜𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀬𑁄 𑀲𑁄𑀧𑀸𑀦𑁂 𑁋 𑀇𑀝𑁆𑀞𑀓𑀸𑀲𑁄𑀧𑀸𑀦𑀁, 𑀲𑀺𑀮𑀸𑀲𑁄𑀧𑀸𑀦𑀁, 𑀤𑀸𑀭𑀼𑀲𑁄𑀧𑀸𑀦’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀧𑀭𑀺𑀧𑀢𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀮𑀫𑁆𑀩𑀦𑀩𑀸𑀳’’𑀦𑁆𑀢𑀺. 𑀧𑀸𑀦𑀻𑀬𑀲𑀸𑀮𑀸𑀬 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀁 𑁋 𑀲𑁂𑀢𑀯𑀡𑁆𑀡𑀁 𑀓𑀸𑀴𑀯𑀡𑁆𑀡𑀁 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓𑀁 𑀘𑀻𑀯𑀭𑀯𑀁𑀲𑀁 𑀘𑀻𑀯𑀭𑀭𑀚𑁆𑀚𑀼’’𑀦𑁆𑀢𑀺. 𑀧𑀸𑀦𑀻𑀬𑀪𑀸𑀚𑀦𑀁 𑀦 𑀲𑀁𑀯𑀺𑀚𑁆𑀚𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀸𑀦𑀻𑀬𑀲𑀗𑁆𑀔𑀁 𑀧𑀸𑀦𑀻𑀬𑀲𑀭𑀸𑀯𑀓’’𑀦𑁆𑀢𑀺.

𑀧𑀸𑀓𑀸𑀭𑀸𑀤𑀺𑀅𑀦𑀼𑀚𑀸𑀦𑀦𑀁

𑁩𑁦𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀳𑀸𑀭𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀺𑀧𑀺𑀢𑀼𑀁 𑀢𑀬𑁄 𑀧𑀸𑀓𑀸𑀭𑁂 𑁋 𑀇𑀝𑁆𑀞𑀓𑀸𑀧𑀸𑀓𑀸𑀭𑀁, 𑀲𑀺𑀮𑀸𑀧𑀸𑀓𑀸𑀭𑀁, 𑀤𑀸𑀭𑀼𑀧𑀸𑀓𑀸𑀭’’𑀦𑁆𑀢𑀺. 𑀓𑁄𑀝𑁆𑀞𑀓𑁄 𑀦 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀝𑁆𑀞𑀓’’𑀦𑁆𑀢𑀺. 𑀓𑁄𑀝𑁆𑀞𑀓𑁄 𑀦𑀻𑀘𑀯𑀢𑁆𑀣𑀼𑀓𑁄 𑀳𑁄𑀢𑀺, 𑀉𑀤𑀓𑁂𑀦 𑀑𑀢𑁆𑀣𑀭𑀺𑀬𑁆𑀬𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀯𑀢𑁆𑀣𑀼𑀓𑀁 𑀓𑀸𑀢𑀼’’𑀦𑁆𑀢𑀺. 𑀓𑁄𑀝𑁆𑀞𑀓𑀲𑁆𑀲 𑀓𑀯𑀸𑀝𑀁 𑀦 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀯𑀸𑀝𑀁 𑀧𑀺𑀝𑁆𑀞𑀲𑀗𑁆𑀖𑀸𑀝𑀁 𑀉𑀤𑀼𑀓𑁆𑀔𑀮𑀺𑀓𑀁 𑀉𑀢𑁆𑀢𑀭𑀧𑀸𑀲𑀓𑀁 𑀅𑀕𑁆𑀕𑀴𑀯𑀝𑁆𑀝𑀺𑀁 𑀓𑀧𑀺𑀲𑀻𑀲𑀓𑀁 𑀲𑀽𑀘𑀺𑀓𑀁 𑀖𑀝𑀺𑀓𑀁 𑀢𑀸𑀴𑀘𑁆𑀙𑀺𑀤𑁆𑀤𑀁 𑀆𑀯𑀺𑀜𑁆𑀙𑀦𑀘𑁆𑀙𑀺𑀤𑁆𑀤𑀁 𑀆𑀯𑀺𑀜𑁆𑀙𑀦𑀭𑀚𑁆𑀚𑀼’’𑀦𑁆𑀢𑀺. 𑀓𑁄𑀝𑁆𑀞𑀓𑁂 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀁 𑁋 𑀲𑁂𑀢𑀯𑀡𑁆𑀡𑀁 𑀓𑀸𑀴𑀯𑀡𑁆𑀡𑀁 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀭𑀺𑀯𑁂𑀡𑀁 𑀘𑀺𑀓𑁆𑀔𑀮𑁆𑀮𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀭𑀼𑀫𑁆𑀩𑀁 𑀉𑀧𑀓𑀺𑀭𑀺𑀢𑀼’’𑀦𑁆𑀢𑀺. 𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀤𑀭𑀲𑀺𑀮𑀁 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺. 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑀦𑀺𑀤𑁆𑀥𑀫𑀦’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀧𑀭𑀺𑀯𑁂𑀡𑁂 𑀢𑀳𑀁 𑀢𑀳𑀁 𑀅𑀕𑁆𑀕𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺. 𑀧𑀭𑀺𑀯𑁂𑀡𑀁 𑀉𑀓𑁆𑀮𑀸𑀧𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀏𑀓𑀫𑀦𑁆𑀢𑀁 𑀅𑀕𑁆𑀕𑀺𑀲𑀸𑀮𑀁 𑀓𑀸𑀢𑀼’’𑀦𑁆𑀢𑀺. 𑀅𑀕𑁆𑀕𑀺𑀲𑀸𑀮𑀸 𑀦𑀻𑀘𑀯𑀢𑁆𑀣𑀼𑀓𑀸 𑀳𑁄𑀢𑀺, 𑀉𑀤𑀓𑁂𑀦 𑀑𑀢𑁆𑀣𑀭𑀺𑀬𑁆𑀬𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀘𑀯𑀢𑁆𑀣𑀼𑀓𑀁 𑀓𑀸𑀢𑀼’’𑀦𑁆𑀢𑀺. 𑀘𑀬𑁄 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀺𑀦𑀺𑀢𑀼𑀁 𑀢𑀬𑁄 𑀘𑀬𑁂 𑁋 𑀇𑀝𑁆𑀞𑀓𑀸𑀘𑀬𑀁, 𑀲𑀺𑀮𑀸𑀘𑀬𑀁, 𑀤𑀸𑀭𑀼𑀘𑀬’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀯𑀺𑀳𑀜𑁆𑀜𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀬𑁄 𑀲𑁄𑀧𑀸𑀦𑁂 𑁋 𑀇𑀝𑁆𑀞𑀓𑀸𑀲𑁄𑀧𑀸𑀦𑀁, 𑀲𑀺𑀮𑀸𑀲𑁄𑀧𑀸𑀦𑀁, 𑀤𑀸𑀭𑀼𑀲𑁄𑀧𑀸𑀦’’𑀦𑁆𑀢𑀺. 𑀆𑀭𑁄𑀳𑀦𑁆𑀢𑀸 𑀧𑀭𑀺𑀧𑀢𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀆𑀮𑀫𑁆𑀩𑀦𑀩𑀸𑀳’’𑀦𑁆𑀢𑀺. 𑀅𑀕𑁆𑀕𑀺𑀲𑀸𑀮𑀸𑀬 𑀓𑀯𑀸𑀝𑀁 𑀦 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑀯𑀸𑀝𑀁 𑀧𑀺𑀝𑁆𑀞𑀲𑀗𑁆𑀖𑀸𑀝𑀁 𑀉𑀤𑀼𑀓𑁆𑀔𑀮𑀺𑀓𑀁 𑀉𑀢𑁆𑀢𑀭𑀧𑀸𑀲𑀓𑀁 𑀅𑀕𑁆𑀕𑀴𑀯𑀝𑁆𑀝𑀺𑀁 𑀓𑀧𑀺𑀲𑀻𑀲𑀓𑀁 𑀲𑀽𑀘𑀺𑀓𑀁 𑀖𑀝𑀺𑀓𑀁 𑀢𑀸𑀴𑀘𑁆𑀙𑀺𑀤𑁆𑀤𑀁 𑀆𑀯𑀺𑀜𑁆𑀙𑀦𑀘𑁆𑀙𑀺𑀤𑁆𑀤𑀁 𑀆𑀯𑀺𑀜𑁆𑀙𑀦𑀭𑀚𑁆𑀚𑀼’’𑀦𑁆𑀢𑀺. 𑀅𑀕𑁆𑀕𑀺𑀲𑀸𑀮𑀸𑀬 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀁 𑁋 𑀲𑁂𑀢𑀯𑀡𑁆𑀡𑀁 𑀓𑀸𑀴𑀯𑀡𑁆𑀡𑀁 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓𑀁 𑀘𑀻𑀯𑀭𑀯𑀁𑀲𑀁 𑀘𑀻𑀯𑀭𑀭𑀚𑁆𑀚𑀼’’𑀦𑁆𑀢𑀺.

𑀆𑀭𑀸𑀫𑀧𑀭𑀺𑀓𑁆𑀔𑁂𑀧𑀅𑀦𑀼𑀚𑀸𑀦𑀦𑀁

𑁩𑁦𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀭𑀸𑀫𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀅𑀚𑀓𑀸𑀧𑀺 𑀧𑀲𑀼𑀓𑀸𑀧𑀺 𑀉𑀧𑀭𑁄𑀧𑁂 𑀯𑀺𑀳𑁂𑀞𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀺𑀧𑀺𑀢𑀼𑀁 𑀢𑀬𑁄 𑀯𑀸𑀝𑁂 𑁋 𑀯𑁂𑀴𑀼𑀯𑀸𑀝𑀁, 𑀓𑀡𑁆𑀟𑀓𑀯𑀸𑀝𑀁 [𑀯𑀝𑁂 𑀯𑁂𑀴𑀼𑀯𑀝𑀁 𑀓𑀡𑁆𑀟𑀓𑀯𑀝𑀁 (𑀲𑁆𑀬𑀸.)], 𑀧𑀭𑀺𑀔’’𑀦𑁆𑀢𑀺. 𑀓𑁄𑀝𑁆𑀞𑀓𑁄 𑀦 𑀳𑁄𑀢𑀺. 𑀢𑀣𑁂𑀯 𑀅𑀚𑀓𑀸𑀧𑀺 𑀧𑀲𑀼𑀓𑀸𑀧𑀺 𑀉𑀧𑀭𑁄𑀧𑁂 𑀯𑀺𑀳𑁂𑀞𑁂𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀝𑁆𑀞𑀓𑀁 𑀅𑀧𑁂𑀲𑀺𑀁 𑀬𑀫𑀓𑀓𑀯𑀸𑀝𑀁 𑀢𑁄𑀭𑀡𑀁 𑀧𑀮𑀺𑀖’’𑀦𑁆𑀢𑀺. 𑀓𑁄𑀝𑁆𑀞𑀓𑁂 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀁 𑁋 𑀲𑁂𑀢𑀯𑀡𑁆𑀡𑀁 𑀓𑀸𑀴𑀯𑀡𑁆𑀡𑀁 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓’’𑀦𑁆𑀢𑀺. 𑀆𑀭𑀸𑀫𑁄 𑀘𑀺𑀓𑁆𑀔𑀮𑁆𑀮𑁄 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀭𑀼𑀫𑁆𑀩𑀁 𑀉𑀧𑀓𑀺𑀭𑀺𑀢𑀼’’𑀦𑁆𑀢𑀺. 𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀤𑀭𑀲𑀺𑀮𑀁 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺. 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑀦𑀺𑀤𑁆𑀥𑀫𑀦’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀲𑀼𑀥𑀸𑀫𑀢𑁆𑀢𑀺𑀓𑀸𑀮𑁂𑀧𑀦𑀁 𑀧𑀸𑀲𑀸𑀤𑀁 𑀓𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀙𑀤𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀙𑀤𑀦𑀸𑀦𑀺 𑁋 𑀇𑀝𑁆𑀞𑀓𑀸𑀙𑀤𑀦𑀁, 𑀲𑀺𑀮𑀸𑀙𑀤𑀦𑀁, 𑀲𑀼𑀥𑀸𑀙𑀤𑀦𑀁, 𑀢𑀺𑀡𑀘𑁆𑀙𑀤𑀦𑀁, 𑀧𑀡𑁆𑀡𑀘𑁆𑀙𑀤𑀦’’𑀦𑁆𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨. 𑀤𑀼𑀢𑀺𑀬𑀪𑀸𑀡𑀯𑀸𑀭𑁄

𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀢𑁆𑀣𑀼

𑁩𑁦𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀪𑀕𑀺𑀦𑀺𑀧𑀢𑀺𑀓𑁄 𑀳𑁄𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀕𑀳𑀓𑁂𑀦 𑀲𑁂𑀝𑁆𑀞𑀺𑀦𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀤𑀸𑀲𑁂 𑀘 𑀓𑀫𑁆𑀫𑀓𑀸𑀭𑁂 [𑀓𑀫𑁆𑀫𑀓𑀭𑁂 (𑀲𑀻. 𑀲𑁆𑀬𑀸.)] 𑀘 𑀆𑀡𑀸𑀧𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀬𑀸𑀕𑀼𑀬𑁄 𑀧𑀘𑀣, 𑀪𑀢𑁆𑀢𑀸𑀦𑀺 𑀧𑀘𑀣, 𑀲𑀽𑀧𑀸𑀦𑀺 𑀲𑀫𑁆𑀧𑀸𑀤𑁂𑀣, 𑀉𑀢𑁆𑀢𑀭𑀺𑀪𑀗𑁆𑀕𑀸𑀦𑀺 𑀲𑀫𑁆𑀧𑀸𑀤𑁂𑀣𑀸’’𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀼𑀩𑁆𑀩𑁂 𑀔𑁆𑀯𑀸𑀬𑀁 𑀕𑀳𑀧𑀢𑀺 𑀫𑀬𑀺 𑀆𑀕𑀢𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀫𑀜𑁆𑀜𑁂𑀯 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀢𑀺. 𑀲𑁄𑀤𑀸𑀦𑀸𑀬𑀁 𑀯𑀺𑀓𑁆𑀔𑀺𑀢𑁆𑀢𑀭𑀽𑀧𑁄 𑀤𑀸𑀲𑁂 𑀘 𑀓𑀫𑁆𑀫𑀓𑀸𑀭𑁂 𑀘 𑀆𑀡𑀸𑀧𑁂𑀲𑀺 𑁋 ‘𑀢𑁂𑀦 𑀳𑀺, 𑀪𑀡𑁂, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀬𑀸𑀕𑀼𑀬𑁄 𑀧𑀘𑀣, 𑀪𑀢𑁆𑀢𑀸𑀦𑀺 𑀧𑀘𑀣, 𑀲𑀽𑀧𑀸𑀦𑀺 𑀲𑀫𑁆𑀧𑀸𑀤𑁂𑀣, 𑀉𑀢𑁆𑀢𑀭𑀺𑀪𑀗𑁆𑀕𑀸𑀦𑀺 𑀲𑀫𑁆𑀧𑀸𑀤𑁂𑀣𑀸’𑀢𑀺. 𑀓𑀺𑀁 𑀦𑀼 𑀔𑁄 𑀇𑀫𑀲𑁆𑀲 𑀕𑀳𑀧𑀢𑀺𑀲𑁆𑀲 𑀆𑀯𑀸𑀳𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀯𑀺𑀯𑀸𑀳𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀬𑀜𑁆𑀜𑁄 𑀯𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀭𑀸𑀚𑀸 𑀯𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦𑀸’’𑀢𑀺?

𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀤𑀸𑀲𑁂 𑀘 𑀓𑀫𑁆𑀫𑀓𑀸𑀭𑁂 𑀘 𑀆𑀡𑀸𑀧𑁂𑀢𑁆𑀯𑀸 𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑀸𑀚𑀕𑀳𑀓𑀁 𑀲𑁂𑀝𑁆𑀞𑀺𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀏𑀢𑀤𑀯𑁄𑀘 𑁋 ‘‘𑀧𑀼𑀩𑁆𑀩𑁂 𑀔𑁄 𑀢𑁆𑀯𑀁, 𑀕𑀳𑀧𑀢𑀺, 𑀫𑀬𑀺 𑀆𑀕𑀢𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀫𑀜𑁆𑀜𑁂𑀯 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀲𑀺. 𑀲𑁄𑀤𑀸𑀦𑀺 𑀢𑁆𑀯𑀁 𑀯𑀺𑀓𑁆𑀔𑀺𑀢𑁆𑀢𑀭𑀽𑀧𑁄 𑀤𑀸𑀲𑁂 𑀘 𑀓𑀫𑁆𑀫𑀓𑀸𑀭𑁂 𑀘 𑀆𑀡𑀸𑀧𑁂𑀲𑀺 𑁋 ‘𑀢𑁂𑀦 𑀳𑀺, 𑀪𑀡𑁂, 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀬𑀸𑀕𑀼𑀬𑁄 𑀧𑀘𑀣, 𑀪𑀢𑁆𑀢𑀸𑀦𑀺 𑀧𑀘𑀣, 𑀲𑀽𑀧𑀸𑀦𑀺 𑀲𑀫𑁆𑀧𑀸𑀤𑁂𑀣, 𑀉𑀢𑁆𑀢𑀭𑀺𑀪𑀗𑁆𑀕𑀸𑀦𑀺 𑀲𑀫𑁆𑀧𑀸𑀤𑁂𑀣𑀸’𑀢𑀺. 𑀓𑀺𑀁 𑀦𑀼 𑀔𑁄 𑀢𑁂, 𑀕𑀳𑀧𑀢𑀺, 𑀆𑀯𑀸𑀳𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀯𑀺𑀯𑀸𑀳𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀬𑀜𑁆𑀜𑁄 𑀯𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀭𑀸𑀚𑀸 𑀯𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦𑀸’’𑀢𑀺? ‘‘𑀦 𑀫𑁂, 𑀕𑀳𑀧𑀢𑀺, 𑀆𑀯𑀸𑀳𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀦𑀸𑀧𑀺 𑀯𑀺𑀯𑀸𑀳𑁄 𑀯𑀸 𑀪𑀯𑀺𑀲𑁆𑀲𑀢𑀺, 𑀦𑀸𑀧𑀺 𑀭𑀸𑀚𑀸 𑀯𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀲𑀤𑁆𑀥𑀺𑀁 𑀩𑀮𑀓𑀸𑀬𑁂𑀦; 𑀅𑀧𑀺 𑀘 𑀫𑁂 𑀫𑀳𑀸𑀬𑀜𑁆𑀜𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄; 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄’’𑀢𑀺. ‘‘𑀩𑀼𑀤𑁆𑀥𑁄𑀢𑀺 𑀢𑁆𑀯𑀁, 𑀕𑀳𑀧𑀢𑀺, 𑀯𑀤𑁂𑀲𑀻’’𑀢𑀺? ‘‘𑀩𑀼𑀤𑁆𑀥𑁄 𑀢𑁆𑀬𑀸𑀳𑀁, 𑀕𑀳𑀧𑀢𑀺, 𑀯𑀤𑀸𑀫𑀻’’𑀢𑀺. ‘‘𑀩𑀼𑀤𑁆𑀥𑁄𑀢𑀺 𑀢𑁆𑀯𑀁, 𑀕𑀳𑀧𑀢𑀺, 𑀯𑀤𑁂𑀲𑀻’’𑀢𑀺? ‘‘𑀩𑀼𑀤𑁆𑀥𑁄 𑀢𑁆𑀬𑀸𑀳𑀁, 𑀕𑀳𑀧𑀢𑀺, 𑀯𑀤𑀸𑀫𑀻’’𑀢𑀺. ‘‘𑀩𑀼𑀤𑁆𑀥𑁄𑀢𑀺 𑀢𑁆𑀯𑀁, 𑀕𑀳𑀧𑀢𑀺, 𑀯𑀤𑁂𑀲𑀻’’𑀢𑀺? ‘‘𑀩𑀼𑀤𑁆𑀥𑁄 𑀢𑁆𑀬𑀸𑀳𑀁, 𑀕𑀳𑀧𑀢𑀺, 𑀯𑀤𑀸𑀫𑀻’’𑀢𑀺. ‘‘𑀖𑁄𑀲𑁄𑀧𑀺 𑀔𑁄 𑀏𑀲𑁄, 𑀕𑀳𑀧𑀢𑀺, 𑀤𑀼𑀮𑁆𑀮𑀪𑁄 𑀮𑁄𑀓𑀲𑁆𑀫𑀺𑀁 𑀬𑀤𑀺𑀤𑀁 𑁋 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺. 𑀲𑀓𑁆𑀓𑀸 𑀦𑀼 𑀔𑁄, 𑀕𑀳𑀧𑀢𑀺, 𑀇𑀫𑀁 𑀓𑀸𑀮𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺? ‘‘𑀅𑀓𑀸𑀮𑁄 𑀔𑁄, 𑀕𑀳𑀧𑀢𑀺, 𑀇𑀫𑀁 𑀓𑀸𑀮𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀲𑁆𑀯𑁂𑀤𑀸𑀦𑀺 𑀢𑁆𑀯𑀁 𑀓𑀸𑀮𑁂𑀦 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀲𑀺 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑁋 𑀲𑁆𑀯𑁂𑀤𑀸𑀦𑀸𑀳𑀁 𑀓𑀸𑀮𑁂𑀦 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀺 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑁋 𑀩𑀼𑀤𑁆𑀥𑀕𑀢𑀸𑀬 𑀲𑀢𑀺𑀬𑀸 𑀦𑀺𑀧𑀚𑁆𑀚𑀺𑀢𑁆𑀯𑀸 𑀭𑀢𑁆𑀢𑀺𑀬𑀸 𑀲𑀼𑀤𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀼𑀝𑁆𑀞𑀸𑀲𑀺 𑀧𑀪𑀸𑀢𑀁 𑀫𑀜𑁆𑀜𑀫𑀸𑀦𑁄.

𑁩𑁦𑁫. [𑀲𑀁. 𑀦𑀺. 𑁧.𑁨𑁪𑁨] 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀲𑀺𑀯𑀓𑀤𑁆𑀯𑀸𑀭𑀁 [𑀲𑀻𑀯𑀤𑁆𑀯𑀸𑀭𑀁 (𑀲𑀻.), 𑀲𑀻𑀢𑀯𑀦𑀤𑁆𑀯𑀸𑀭𑀁 (𑀲𑁆𑀬𑀸.)] 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀫𑀦𑀼𑀲𑁆𑀲𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀁𑀲𑀼. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀕𑀭𑀫𑁆𑀳𑀸 𑀦𑀺𑀓𑁆𑀔𑀦𑁆𑀢𑀲𑁆𑀲 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺, 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀭𑀳𑁄𑀲𑀺, 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀉𑀤𑀧𑀸𑀤𑀺; 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀅𑀣 𑀔𑁄 𑀲𑀺𑀯𑀓𑁄 [𑀲𑀻𑀯𑀓𑁄 (𑀲𑀻. 𑀲𑁆𑀬𑀸.)] 𑀬𑀓𑁆𑀔𑁄 𑀅𑀦𑁆𑀢𑀭𑀳𑀺𑀢𑁄 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋

‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀲𑁆𑀲 𑀧𑀤𑀯𑀻𑀢𑀺𑀳𑀸𑀭𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁 [𑀲𑁄𑀴𑀲𑀺𑀦𑁆𑀢𑀺 (𑀲𑀻. 𑀓.)].

‘‘𑀅𑀪𑀺𑀓𑁆𑀓𑀫 𑀕𑀳𑀧𑀢𑀺 𑀅𑀪𑀺𑀓𑁆𑀓𑀫 𑀕𑀳𑀧𑀢𑀺;

𑀅𑀪𑀺𑀓𑁆𑀓𑀦𑁆𑀢𑀁 𑀢𑁂 𑀲𑁂𑀬𑁆𑀬𑁄 𑀦𑁄 𑀧𑀝𑀺𑀓𑁆𑀓𑀦𑁆𑀢’’𑀦𑁆𑀢𑀺.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀺, 𑀆𑀮𑁄𑀓𑁄 𑀧𑀸𑀢𑀼𑀭𑀳𑁄𑀲𑀺. 𑀬𑀁 𑀅𑀳𑁄𑀲𑀺 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀆𑀮𑁄𑀓𑁄 𑀅𑀦𑁆𑀢𑀭𑀥𑀸𑀬𑀺, 𑀅𑀦𑁆𑀥𑀓𑀸𑀭𑁄 𑀧𑀸𑀢𑀼𑀭𑀳𑁄𑀲𑀺, 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄 𑀉𑀤𑀧𑀸𑀤𑀺, 𑀢𑀢𑁄𑀯 𑀧𑀼𑀦 𑀦𑀺𑀯𑀢𑁆𑀢𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀺𑀯𑀓𑁄 𑀬𑀓𑁆𑀔𑁄 𑀅𑀦𑁆𑀢𑀭𑀳𑀺𑀢𑁄 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋

‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸;

𑀏𑀓𑀲𑁆𑀲 𑀧𑀤𑀯𑀻𑀢𑀺𑀳𑀸𑀭𑀲𑁆𑀲, 𑀓𑀮𑀁 𑀦𑀸𑀕𑁆𑀖𑀦𑁆𑀢𑀺 𑀲𑁄𑀴𑀲𑀺𑀁.

‘‘𑀅𑀪𑀺𑀓𑁆𑀓𑀫 𑀕𑀳𑀧𑀢𑀺 𑀅𑀪𑀺𑀓𑁆𑀓𑀫 𑀕𑀳𑀧𑀢𑀺,

𑀅𑀪𑀺𑀓𑁆𑀓𑀦𑁆𑀢𑀁 𑀢𑁂 𑀲𑁂𑀬𑁆𑀬𑁄 𑀦𑁄 𑀧𑀝𑀺𑀓𑁆𑀓𑀦𑁆𑀢’’𑀦𑁆𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀦𑁆𑀥𑀓𑀸𑀭𑁄 𑀅𑀦𑁆𑀢𑀭𑀥𑀸𑀬𑀺, 𑀆𑀮𑁄𑀓𑁄 𑀧𑀸𑀢𑀼𑀭𑀳𑁄𑀲𑀺, 𑀬𑀁 𑀅𑀳𑁄𑀲𑀺 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑁄, 𑀲𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀲𑀻𑀢𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀅𑀚𑁆𑀛𑁄𑀓𑀸𑀲𑁂 𑀘𑀗𑁆𑀓𑀫𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀺 𑀲𑀼𑀤𑀢𑁆𑀢𑀸’’𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑁋 𑀦𑀸𑀫𑁂𑀦 𑀫𑀁 𑀪𑀕𑀯𑀸 𑀆𑀮𑀧𑀢𑀻𑀢𑀺 𑁋 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀪𑀕𑀯𑀸 𑀲𑀼𑀔𑀁 𑀲𑀬𑀺𑀢𑁆𑀣𑀸’’𑀢𑀺?

[𑀲𑀁. 𑀦𑀺. 𑁧.𑁨𑁪𑁨] ‘‘𑀲𑀩𑁆𑀩𑀤𑀸 𑀯𑁂 𑀲𑀼𑀔𑀁 𑀲𑁂𑀢𑀺, 𑀩𑁆𑀭𑀸𑀳𑁆𑀫𑀡𑁄 𑀧𑀭𑀺𑀦𑀺𑀩𑁆𑀩𑀼𑀢𑁄;

𑀬𑁄 𑀦 𑀮𑀺𑀫𑁆𑀧𑀢𑀺 𑀓𑀸𑀫𑁂𑀲𑀼, 𑀲𑀻𑀢𑀺𑀪𑀽𑀢𑁄 𑀦𑀺𑀭𑀽𑀧𑀥𑀺.

‘‘𑀲𑀩𑁆𑀩𑀸 𑀆𑀲𑀢𑁆𑀢𑀺𑀬𑁄 𑀙𑁂𑀢𑁆𑀯𑀸, 𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭𑀁;

𑀉𑀧𑀲𑀦𑁆𑀢𑁄 𑀲𑀼𑀔𑀁 𑀲𑁂𑀢𑀺, 𑀲𑀦𑁆𑀢𑀺𑀁 𑀧𑀧𑁆𑀧𑀼𑀬𑁆𑀬 𑀘𑁂𑀢𑀲𑀸’’𑀢𑀺 [𑀘𑁂𑀢𑀲𑁄𑀢𑀺 (𑀲𑀻. 𑀲𑁆𑀬𑀸.)].

𑀅𑀣 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 [𑀆𑀦𑀼𑀧𑀼𑀩𑁆𑀩𑀺𑀓𑀣𑀁 (𑀲𑀻.)] 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁, 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁, 𑀲𑀫𑀼𑀤𑀬𑀁, 𑀦𑀺𑀭𑁄𑀥𑀁, 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺 𑁋 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁. 𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑁋 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀺𑀭 𑀕𑀳𑀧𑀢𑀺𑀦𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄’’𑀢𑀺.

𑁩𑁦𑁬. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀲𑁂𑀝𑁆𑀞𑀻 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀢𑀬𑀸 𑀓𑀺𑀭, 𑀕𑀳𑀧𑀢𑀺, 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄. 𑀢𑁆𑀯𑀜𑁆𑀘𑀸𑀲𑀺 𑀆𑀕𑀦𑁆𑀢𑀼𑀓𑁄. 𑀤𑁂𑀫𑀺 𑀢𑁂, 𑀕𑀳𑀧𑀢𑀺, 𑀯𑁂𑀬𑁆𑀬𑀸𑀬𑀺𑀓𑀁 𑀬𑁂𑀦 𑀢𑁆𑀯𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺. ‘‘𑀅𑀮𑀁, 𑀕𑀳𑀧𑀢𑀺 𑀅𑀢𑁆𑀣𑀺 𑀫𑁂 𑀯𑁂𑀬𑁆𑀬𑀸𑀬𑀺𑀓𑀁 𑀬𑁂𑀦𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑁋 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀺𑀭 𑀕𑀳𑀧𑀢𑀺𑀦𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄’’𑀢𑀺. 𑀅𑀣 𑀔𑁄 𑀭𑀸𑀚𑀕𑀳𑀓𑁄 𑀦𑁂𑀕𑀫𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀢𑀬𑀸 𑀓𑀺𑀭, 𑀕𑀳𑀧𑀢𑀺, 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄. 𑀢𑁆𑀯𑀜𑁆𑀘𑀸𑀲𑀺 𑀆𑀕𑀦𑁆𑀢𑀼𑀓𑁄. 𑀤𑁂𑀫𑀺 𑀢𑁂, 𑀕𑀳𑀧𑀢𑀺, 𑀯𑁂𑀬𑁆𑀬𑀸𑀬𑀺𑀓𑀁 𑀬𑁂𑀦 𑀢𑁆𑀯𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺. ‘‘𑀅𑀮𑀁 𑀅𑀬𑁆𑀬; 𑀅𑀢𑁆𑀣𑀺 𑀫𑁂 𑀯𑁂𑀬𑁆𑀬𑀸𑀬𑀺𑀓𑀁 𑀬𑁂𑀦𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑁋 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀺𑀭 𑀕𑀳𑀧𑀢𑀺𑀦𑀸 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀢𑀬𑀸 𑀓𑀺𑀭, 𑀕𑀳𑀧𑀢𑀺, 𑀲𑁆𑀯𑀸𑀢𑀦𑀸𑀬 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀦𑀺𑀫𑀦𑁆𑀢𑀺𑀢𑁄. 𑀢𑁆𑀯𑀜𑁆𑀘𑀸𑀲𑀺 𑀆𑀕𑀦𑁆𑀢𑀼𑀓𑁄. 𑀤𑁂𑀫𑀺 𑀢𑁂, 𑀕𑀳𑀧𑀢𑀺, 𑀯𑁂𑀬𑁆𑀬𑀸𑀬𑀺𑀓𑀁 𑀬𑁂𑀦 𑀢𑁆𑀯𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺. ‘‘𑀅𑀮𑀁 𑀤𑁂𑀯; 𑀅𑀢𑁆𑀣𑀺 𑀫𑁂 𑀯𑁂𑀬𑁆𑀬𑀸𑀬𑀺𑀓𑀁 𑀬𑁂𑀦𑀸𑀳𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀭𑀸𑀚𑀕𑀳𑀓𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀸𑀯𑀸𑀲𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄, 𑀕𑀳𑀧𑀢𑀺, 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺. ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸, 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁩𑁦𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀩𑀳𑀼𑀫𑀺𑀢𑁆𑀢𑁄 𑀳𑁄𑀢𑀺 𑀩𑀳𑀼𑀲𑀳𑀸𑀬𑁄 𑀆𑀤𑁂𑀬𑁆𑀬𑀯𑀸𑀘𑁄. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀭𑀸𑀚𑀕𑀳𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀆𑀭𑀸𑀫𑁂, 𑀅𑀬𑁆𑀬𑀸, 𑀓𑀭𑁄𑀣, 𑀯𑀺𑀳𑀸𑀭𑁂 𑀧𑀢𑀺𑀝𑁆𑀞𑀸𑀧𑁂𑀣, 𑀤𑀸𑀦𑀸𑀦𑀺 𑀧𑀝𑁆𑀞𑀧𑁂𑀣. 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄. 𑀲𑁄 𑀘 𑀫𑀬𑀸 𑀪𑀕𑀯𑀸 𑀦𑀺𑀫𑀦𑁆𑀢𑀺𑀢𑁄 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀉𑀬𑁆𑀬𑁄𑀚𑀺𑀢𑀸 𑀆𑀭𑀸𑀫𑁂 𑀅𑀓𑀁𑀲𑀼, 𑀯𑀺𑀳𑀸𑀭𑁂 𑀧𑀢𑀺𑀝𑁆𑀞𑀸𑀧𑁂𑀲𑀼𑀁, 𑀤𑀸𑀦𑀸𑀦𑀺 𑀧𑀝𑁆𑀞𑀧𑁂𑀲𑀼𑀁.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀲𑀫𑀦𑁆𑀢𑀸 𑀲𑀸𑀯𑀢𑁆𑀣𑀺𑀁 𑀅𑀦𑀼𑀯𑀺𑀮𑁄𑀓𑁂𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀪𑀕𑀯𑀸 𑀯𑀺𑀳𑀭𑁂𑀬𑁆𑀬? 𑀬𑀁 𑀅𑀲𑁆𑀲 𑀕𑀸𑀫𑀢𑁄 𑀦𑁂𑀯 𑀅𑀢𑀺𑀤𑀽𑀭𑁂 𑀦 𑀅𑀘𑁆𑀘𑀸𑀲𑀦𑁆𑀦𑁂, 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀪𑀺𑀓𑁆𑀓𑀫𑀦𑀻𑀬𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁, 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁, 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀯𑀺𑀚𑀦𑀯𑀸𑀢𑀁, 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀁, 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧’’𑀦𑁆𑀢𑀺.

𑀅𑀤𑁆𑀤𑀲𑀸 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀚𑁂𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 [𑀭𑀸𑀚𑀓𑀼𑀫𑀸𑀭𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁.)] 𑀉𑀬𑁆𑀬𑀸𑀦𑀁 𑁋 𑀕𑀸𑀫𑀢𑁄 𑀦𑁂𑀯 𑀅𑀢𑀺𑀤𑀽𑀭𑁂 𑀦 𑀅𑀘𑁆𑀘𑀸𑀲𑀦𑁆𑀦𑁂, 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁, 𑀅𑀢𑁆𑀣𑀺𑀓𑀸𑀦𑀁 𑀅𑀢𑁆𑀣𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀪𑀺𑀓𑁆𑀓𑀫𑀦𑀻𑀬𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁, 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁, 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀯𑀺𑀚𑀦𑀯𑀸𑀢𑀁, 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀁, 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀁. 𑀤𑀺𑀲𑁆𑀯𑀸𑀦 𑀬𑁂𑀦 𑀚𑁂𑀢𑁄 𑀓𑀼𑀫𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑁂𑀢𑀁 𑀓𑀼𑀫𑀸𑀭𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀳𑀺 𑀫𑁂, 𑀅𑀬𑁆𑀬𑀧𑀼𑀢𑁆𑀢, 𑀉𑀬𑁆𑀬𑀸𑀦𑀁 𑀆𑀭𑀸𑀫𑀁 𑀓𑀸𑀢𑀼’’𑀦𑁆𑀢𑀺 [𑀓𑁂𑀢𑀼𑀁 (𑀯𑀚𑀻𑀭𑀩𑀼𑀤𑁆𑀥𑀺𑀝𑀻𑀓𑀸𑀬𑀁)]. ‘‘𑀅𑀤𑁂𑀬𑁆𑀬𑁄, 𑀕𑀳𑀧𑀢𑀺, 𑀆𑀭𑀸𑀫𑁄 𑀅𑀧𑀺 𑀓𑁄𑀝𑀺𑀲𑀦𑁆𑀣𑀭𑁂𑀦𑀸’’𑀢𑀺. ‘‘𑀕𑀳𑀺𑀢𑁄, 𑀅𑀬𑁆𑀬𑀧𑀼𑀢𑁆𑀢, 𑀆𑀭𑀸𑀫𑁄’’𑀢𑀺. ‘‘𑀦, 𑀕𑀳𑀧𑀢𑀺, 𑀕𑀳𑀺𑀢𑁄 𑀆𑀭𑀸𑀫𑁄’’𑀢𑀺. 𑀕𑀳𑀺𑀢𑁄 𑀦 𑀕𑀳𑀺𑀢𑁄𑀢𑀺 𑀯𑁄𑀳𑀸𑀭𑀺𑀓𑁂 𑀫𑀳𑀸𑀫𑀢𑁆𑀢𑁂 𑀧𑀼𑀘𑁆𑀙𑀺𑀁𑀲𑀼. 𑀫𑀳𑀸𑀫𑀢𑁆𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑀢𑁄 𑀢𑀬𑀸, 𑀅𑀬𑁆𑀬𑀧𑀼𑀢𑁆𑀢, 𑀅𑀕𑁆𑀖𑁄 𑀓𑀢𑁄, 𑀕𑀳𑀺𑀢𑁄 𑀆𑀭𑀸𑀫𑁄’’𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀲𑀓𑀝𑁂𑀳𑀺 𑀳𑀺𑀭𑀜𑁆𑀜𑀁 𑀦𑀺𑀩𑁆𑀩𑀸𑀳𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀁 𑀓𑁄𑀝𑀺𑀲𑀦𑁆𑀣𑀭𑀁 𑀲𑀦𑁆𑀣𑀭𑀸𑀧𑁂𑀲𑀺. 𑀲𑀓𑀺𑀁 𑀦𑀻𑀳𑀝𑀁 𑀳𑀺𑀭𑀜𑁆𑀜𑀁 𑀣𑁄𑀓𑀲𑁆𑀲 𑀑𑀓𑀸𑀲𑀲𑁆𑀲 𑀓𑁄𑀝𑁆𑀞𑀓𑀲𑀸𑀫𑀦𑁆𑀢𑀸 𑀦𑀧𑁆𑀧𑀳𑁄𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙𑀣, 𑀪𑀡𑁂, 𑀳𑀺𑀭𑀜𑁆𑀜𑀁 𑀆𑀳𑀭𑀣; 𑀇𑀫𑀁 𑀑𑀓𑀸𑀲𑀁 𑀲𑀦𑁆𑀣𑀭𑀺𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀚𑁂𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀇𑀤𑀁 𑀑𑀭𑀓𑀁 𑀪𑀯𑀺𑀲𑁆𑀲𑀢𑀺, 𑀬𑀣𑀸𑀬𑀁 𑀕𑀳𑀧𑀢𑀺 𑀢𑀸𑀯 𑀩𑀳𑀼𑀁 𑀳𑀺𑀭𑀜𑁆𑀜𑀁 𑀧𑀭𑀺𑀘𑁆𑀘𑀚𑀢𑀻’’𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀕𑀳𑀧𑀢𑀺; 𑀫𑀸 𑀢𑀁 𑀑𑀓𑀸𑀲𑀁 𑀲𑀦𑁆𑀣𑀭𑀸𑀧𑁂𑀲𑀺. 𑀤𑁂𑀳𑀺 𑀫𑁂 𑀏𑀢𑀁 𑀑𑀓𑀸𑀲𑀁. 𑀫𑀫𑁂𑀢𑀁 𑀤𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑁋 𑀅𑀬𑀁 𑀔𑁄 𑀚𑁂𑀢𑁄 𑀓𑀼𑀫𑀸𑀭𑁄 𑀅𑀪𑀺𑀜𑁆𑀜𑀸𑀢𑁄 𑀜𑀸𑀢𑀫𑀦𑀼𑀲𑁆𑀲𑁄; 𑀫𑀳𑀢𑁆𑀣𑀺𑀓𑁄 𑀔𑁄 𑀧𑀦 𑀏𑀯𑀭𑀽𑀧𑀸𑀦𑀁 𑀜𑀸𑀢𑀫𑀦𑀼𑀲𑁆𑀲𑀸𑀦𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀸𑀤𑁄𑀢𑀺 𑁋 𑀢𑀁 𑀑𑀓𑀸𑀲𑀁 𑀚𑁂𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀸𑀤𑀸𑀲𑀺 [𑀅𑀤𑀸𑀲𑀺 (𑀲𑁆𑀬𑀸.)]. 𑀅𑀣 𑀔𑁄 𑀚𑁂𑀢𑁄 𑀓𑀼𑀫𑀸𑀭𑁄 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀓𑁄𑀝𑁆𑀞𑀓𑀁 𑀫𑀸𑀧𑁂𑀲𑀺.

𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂 𑀓𑀸𑀭𑀸𑀧𑁂𑀲𑀺, 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑀸𑀧𑁂𑀲𑀺, 𑀓𑁄𑀝𑁆𑀞𑀓𑁂 𑀓𑀸𑀭𑀸𑀧𑁂𑀲𑀺, 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀲𑀺, 𑀅𑀕𑁆𑀕𑀺𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀲𑀺, 𑀓𑀧𑁆𑀧𑀺𑀬𑀓𑀼𑀝𑀺𑀬𑁄 𑀓𑀸𑀭𑀸𑀧𑁂𑀲𑀺, 𑀯𑀘𑁆𑀘𑀓𑀼𑀝𑀺𑀬𑁄 𑀓𑀸𑀭𑀸𑀧𑁂𑀲𑀺, 𑀘𑀗𑁆𑀓𑀫𑁂 𑀓𑀸𑀭𑀸𑀧𑁂𑀲𑀺, 𑀘𑀗𑁆𑀓𑀫𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀲𑀺, 𑀉𑀤𑀧𑀸𑀦𑁂 𑀓𑀸𑀭𑀸𑀧𑁂𑀲𑀺, 𑀉𑀤𑀧𑀸𑀦𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀲𑀺, 𑀚𑀦𑁆𑀢𑀸𑀖𑀭𑁂 𑀓𑀸𑀭𑀸𑀧𑁂𑀲𑀺, 𑀚𑀦𑁆𑀢𑀸𑀖𑀭𑀲𑀸𑀮𑀸𑀬𑁄 𑀓𑀸𑀭𑀸𑀧𑁂𑀲𑀺, 𑀧𑁄𑀓𑁆𑀔𑀭𑀡𑀺𑀬𑁄 𑀓𑀸𑀭𑀸𑀧𑁂𑀲𑀺, 𑀫𑀡𑁆𑀟𑀧𑁂 𑀓𑀸𑀭𑀸𑀧𑁂𑀲𑀺.

𑀦𑀯𑀓𑀫𑁆𑀫𑀤𑀸𑀦𑀁

𑁩𑁦𑁮. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀲𑀓𑁆𑀓𑀘𑁆𑀘𑀁 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀬𑁂𑀧𑀺 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑁂𑀦𑁆𑀢𑀺 𑀢𑁂𑀧𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦. 𑀅𑀣 𑀔𑁄 𑀅𑀜𑁆𑀜𑀢𑀭𑀲𑁆𑀲 𑀤𑀮𑀺𑀤𑁆𑀤𑀲𑁆𑀲 𑀢𑀼𑀦𑁆𑀦𑀯𑀸𑀬𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀇𑀤𑀁 𑀑𑀭𑀓𑀁 𑀪𑀯𑀺𑀲𑁆𑀲𑀢𑀺, 𑀬𑀣𑀬𑀺𑀫𑁂 𑀫𑀦𑀼𑀲𑁆𑀲𑀸 𑀲𑀓𑁆𑀓𑀘𑁆𑀘𑀁 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀺; 𑀬𑀁𑀦𑀽𑀦𑀸𑀳𑀫𑁆𑀧𑀺 𑀦𑀯𑀓𑀫𑁆𑀫𑀁 𑀓𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀤𑀮𑀺𑀤𑁆𑀤𑁄 𑀢𑀼𑀦𑁆𑀦𑀯𑀸𑀬𑁄 𑀲𑀸𑀫𑀁 𑀘𑀺𑀓𑁆𑀔𑀮𑁆𑀮𑀁 𑀫𑀤𑁆𑀤𑀺𑀢𑁆𑀯𑀸 𑀇𑀝𑁆𑀞𑀓𑀸𑀬𑁄 𑀘𑀺𑀦𑀺𑀢𑁆𑀯𑀸 𑀓𑀼𑀝𑁆𑀝𑀁 𑀉𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀅𑀓𑀼𑀲𑀮𑀓𑁂𑀦 𑀘𑀺𑀢𑀸 𑀯𑀗𑁆𑀓𑀸 𑀪𑀺𑀢𑁆𑀢𑀺 𑀧𑀭𑀺𑀧𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀤𑀮𑀺𑀤𑁆𑀤𑁄 𑀢𑀼𑀦𑁆𑀦𑀯𑀸𑀬𑁄 𑀲𑀸𑀫𑀁 𑀘𑀺𑀓𑁆𑀔𑀮𑁆𑀮𑀁 𑀫𑀤𑁆𑀤𑀺𑀢𑁆𑀯𑀸 𑀇𑀝𑁆𑀞𑀓𑀸𑀬𑁄 𑀘𑀺𑀦𑀺𑀢𑁆𑀯𑀸 𑀓𑀼𑀝𑁆𑀝𑀁 𑀉𑀝𑁆𑀞𑀸𑀧𑁂𑀲𑀺. 𑀢𑁂𑀦 𑀅𑀓𑀼𑀲𑀮𑀓𑁂𑀦 𑀘𑀺𑀢𑀸 𑀯𑀗𑁆𑀓𑀸 𑀪𑀺𑀢𑁆𑀢𑀺 𑀧𑀭𑀺𑀧𑀢𑀺. 𑀅𑀣 𑀔𑁄 𑀲𑁄 𑀤𑀮𑀺𑀤𑁆𑀤𑁄 𑀢𑀼𑀦𑁆𑀦𑀯𑀸𑀬𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀬𑁂 𑀇𑀫𑁂𑀲𑀁 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀤𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑁂 𑀇𑀫𑁂 𑀑𑀯𑀤𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀦𑀯𑀓𑀫𑁆𑀫𑀁 𑀅𑀥𑀺𑀝𑁆𑀞𑁂𑀦𑁆𑀢𑀺. 𑀅𑀳𑀁 𑀧𑀦𑀫𑁆𑀳𑀺 𑀤𑀮𑀺𑀤𑁆𑀤𑁄. 𑀦 𑀫𑀁 𑀓𑁄𑀘𑀺 𑀑𑀯𑀤𑀢𑀺 𑀯𑀸 𑀅𑀦𑀼𑀲𑀸𑀲𑀢𑀺 𑀯𑀸 𑀦𑀯𑀓𑀫𑁆𑀫𑀁 𑀯𑀸 𑀅𑀥𑀺𑀝𑁆𑀞𑁂𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀤𑀮𑀺𑀤𑁆𑀤𑀲𑁆𑀲 𑀢𑀼𑀦𑁆𑀦𑀯𑀸𑀬𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀦𑀯𑀓𑀫𑁆𑀫𑀁 𑀤𑀸𑀢𑀼𑀁. 𑀦𑀯𑀓𑀫𑁆𑀫𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀺𑀲𑁆𑀲𑀢𑀺 𑁋 ‘𑀓𑀺𑀦𑁆𑀢𑀺 𑀦𑀼 𑀔𑁄 𑀯𑀺𑀳𑀸𑀭𑁄 𑀔𑀺𑀧𑁆𑀧𑀁 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑁂𑀬𑁆𑀬𑀸’𑀢𑀺; 𑀔𑀡𑁆𑀟𑀁 𑀨𑀼𑀮𑁆𑀮𑀁 𑀧𑀝𑀺𑀲𑀗𑁆𑀔𑀭𑀺𑀲𑁆𑀲𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀤𑀸𑀢𑀩𑁆𑀩𑀁. 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩𑁦𑁯. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀕𑀳𑀧𑀢𑀺𑀦𑁄 𑀯𑀺𑀳𑀸𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀯𑀓𑀫𑁆𑀫𑀁 𑀤𑀤𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀕𑀳𑀧𑀢𑀺𑀦𑁄 𑀯𑀺𑀳𑀸𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀯𑀓𑀫𑁆𑀫𑀁 𑀤𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀕𑀳𑀧𑀢𑀺𑀦𑁄 𑀯𑀺𑀳𑀸𑀭𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀯𑀓𑀫𑁆𑀫𑀲𑁆𑀲 𑀤𑀸𑀦𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀕𑀳𑀧𑀢𑀺𑀦𑁄 𑀯𑀺𑀳𑀸𑀭𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀯𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀕𑁆𑀕𑀸𑀲𑀦𑀸𑀤𑀺𑀅𑀦𑀼𑀚𑀸𑀦𑀦𑀁

𑁩𑁧𑁦. 𑀅𑀣 𑀔𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀲𑁂𑀬𑁆𑀬𑀸𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑁋 𑀇𑀤𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂𑀲𑀼 𑀧𑀭𑀺𑀕𑁆𑀕𑀳𑀺𑀢𑁂𑀲𑀼, 𑀲𑁂𑀬𑁆𑀬𑀸𑀲𑀼 𑀧𑀭𑀺𑀕𑁆𑀕𑀳𑀺𑀢𑀸𑀲𑀼, 𑀲𑁂𑀬𑁆𑀬𑀁 𑀅𑀮𑀪𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀉𑀓𑁆𑀓𑀸𑀲𑀺. 𑀆𑀬𑀲𑁆𑀫𑀸𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 𑀉𑀓𑁆𑀓𑀸𑀲𑀺. ‘‘𑀓𑁄 𑀏𑀢𑁆𑀣𑀸’’𑀢𑀺? ‘‘𑀅𑀳𑀁, 𑀪𑀕𑀯𑀸, 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺. ‘‘𑀓𑀺𑀲𑁆𑀲 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢𑀁, 𑀇𑀥 𑀦𑀺𑀲𑀺𑀦𑁆𑀦𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀲𑁂𑀬𑁆𑀬𑀸𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑁋 𑀇𑀤𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑁂 𑀧𑀭𑀺𑀕𑁆𑀕𑀳𑁂𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀸𑀬𑁄 𑀧𑀭𑀺𑀕𑁆𑀕𑀳𑁂𑀲𑁆𑀲𑀦𑁆𑀢𑀺 𑁋 𑀇𑀤𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻𑀢𑀺! 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺?

𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀔𑀢𑁆𑀢𑀺𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀕𑀳𑀧𑀢𑀺𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀲𑀼𑀢𑁆𑀢𑀦𑁆𑀢𑀺𑀓𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀯𑀺𑀦𑀬𑀥𑀭𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀥𑀫𑁆𑀫𑀓𑀣𑀺𑀓𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀲𑁄𑀢𑀸𑀧𑀦𑁆𑀦𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀲𑀓𑀤𑀸𑀕𑀸𑀫𑀻…𑀧𑁂… 𑀬𑁄, 𑀪𑀕𑀯𑀸, 𑀅𑀦𑀸𑀕𑀸𑀫𑀻…𑀧𑁂… 𑀬𑁄, 𑀪𑀕𑀯𑀸, 𑀅𑀭𑀳𑀸 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀢𑁂𑀯𑀺𑀚𑁆𑀚𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑁄, 𑀪𑀕𑀯𑀸, 𑀙𑀴𑀪𑀺𑀜𑁆𑀜𑁄 𑀲𑁄 𑀅𑀭𑀳𑀢𑀺 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀧𑀺𑀡𑁆𑀟’’𑀦𑁆𑀢𑀺.

𑁩𑁧𑁧. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 [𑀳𑀺𑀫𑀯𑀦𑁆𑀢𑀧𑀲𑁆𑀲𑁂 (𑀲𑀻. 𑀲𑁆𑀬𑀸.)] 𑀫𑀳𑀸𑀦𑀺𑀕𑁆𑀭𑁄𑀥𑁄 𑀅𑀳𑁄𑀲𑀺. 𑀢𑀁 𑀢𑀬𑁄 𑀲𑀳𑀸𑀬𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀁𑀲𑀼 𑁋 𑀢𑀺𑀢𑁆𑀢𑀺𑀭𑁄 𑀘, 𑀫𑀓𑁆𑀓𑀝𑁄 𑀘, 𑀳𑀢𑁆𑀣𑀺𑀦𑀸𑀕𑁄 𑀘. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀲𑀳𑀸𑀬𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀳𑁄 𑀦𑀽𑀦 𑀫𑀬𑀁 𑀚𑀸𑀦𑁂𑀬𑁆𑀬𑀸𑀫 𑀬𑀁 𑀅𑀫𑁆𑀳𑀸𑀓𑀁 𑀚𑀸𑀢𑀺𑀬𑀸 𑀫𑀳𑀦𑁆𑀢𑀢𑀭𑀁 𑀢𑀁 𑀫𑀬𑀁 𑀲𑀓𑁆𑀓𑀭𑁂𑀬𑁆𑀬𑀸𑀫 𑀕𑀭𑀼𑀁 𑀓𑀭𑁂𑀬𑁆𑀬𑀸𑀫 𑀫𑀸𑀦𑁂𑀬𑁆𑀬𑀸𑀫 𑀧𑀽𑀚𑁂𑀬𑁆𑀬𑀸𑀫, 𑀢𑀲𑁆𑀲 𑀘 𑀫𑀬𑀁 𑀑𑀯𑀸𑀤𑁂 𑀢𑀺𑀝𑁆𑀞𑁂𑀬𑁆𑀬𑀸𑀫𑀸’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀢𑀺𑀭𑁄 𑀘 𑀫𑀓𑁆𑀓𑀝𑁄 𑀘 𑀳𑀢𑁆𑀣𑀺𑀦𑀸𑀕𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘𑀢𑁆𑀯𑀁, 𑀲𑀫𑁆𑀫, 𑀓𑀺𑀁 𑀧𑁄𑀭𑀸𑀡𑀁 𑀲𑀭𑀲𑀻’𑀢𑀺? ‘𑀬𑀤𑀸𑀳𑀁, 𑀲𑀫𑁆𑀫𑀸, 𑀧𑁄𑀢𑁄 𑀳𑁄𑀫𑀺, 𑀇𑀫𑀁 𑀦𑀺𑀕𑁆𑀭𑁄𑀥𑀁 𑀅𑀦𑁆𑀢𑀭𑀸 𑀲𑀢𑁆𑀣𑀻𑀦𑀁 [𑀅𑀦𑁆𑀢𑀭𑀸𑀲𑀢𑁆𑀣𑀺𑀓𑀁 (𑀲𑀻.)] 𑀓𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀸𑀫𑀺, 𑀅𑀕𑁆𑀕𑀗𑁆𑀓𑀼𑀭𑀓𑀁 𑀫𑁂 𑀉𑀤𑀭𑀁 𑀙𑀼𑀧𑀢𑀺. 𑀇𑀫𑀸𑀳𑀁, 𑀲𑀫𑁆𑀫𑀸, 𑀧𑁄𑀭𑀸𑀡𑀁 𑀲𑀭𑀸𑀫𑀻’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀢𑀺𑀭𑁄 𑀘 𑀳𑀢𑁆𑀣𑀺𑀦𑀸𑀕𑁄 𑀘 𑀫𑀓𑁆𑀓𑀝𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘𑀢𑁆𑀯𑀁, 𑀲𑀫𑁆𑀫, 𑀓𑀺𑀁 𑀧𑁄𑀭𑀸𑀡𑀁 𑀲𑀭𑀲𑀻’𑀢𑀺? ‘𑀬𑀤𑀸𑀳𑀁, 𑀲𑀫𑁆𑀫𑀸, 𑀙𑀸𑀧𑁄 𑀳𑁄𑀫𑀺, 𑀙𑀫𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀲𑁆𑀲 𑀦𑀺𑀕𑁆𑀭𑁄𑀥𑀲𑁆𑀲 𑀅𑀕𑁆𑀕𑀗𑁆𑀓𑀼𑀭𑀓𑀁 𑀔𑀸𑀤𑀸𑀫𑀺. 𑀇𑀫𑀸𑀳𑀁, 𑀲𑀫𑁆𑀫𑀸, 𑀧𑁄𑀭𑀸𑀡𑀁 𑀲𑀭𑀸𑀫𑀻’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀓𑁆𑀓𑀝𑁄 𑀘 𑀳𑀢𑁆𑀣𑀺𑀦𑀸𑀕𑁄 𑀘 𑀢𑀺𑀢𑁆𑀢𑀺𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘𑀢𑁆𑀯𑀁, 𑀲𑀫𑁆𑀫, 𑀓𑀺𑀁 𑀧𑁄𑀭𑀸𑀡𑀁 𑀲𑀭𑀲𑀻’𑀢𑀺? ‘𑀅𑀫𑀼𑀓𑀲𑁆𑀫𑀺𑀁, 𑀲𑀫𑁆𑀫𑀸, 𑀑𑀓𑀸𑀲𑁂 𑀫𑀳𑀸𑀦𑀺𑀕𑁆𑀭𑁄𑀥𑁄 𑀅𑀳𑁄𑀲𑀺. 𑀢𑀢𑁄 𑀅𑀳𑀁 𑀨𑀮𑀁 𑀪𑀓𑁆𑀔𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀯𑀘𑁆𑀘𑀁 𑀅𑀓𑀸𑀲𑀺𑀁; 𑀢𑀲𑁆𑀲𑀸𑀬𑀁 𑀦𑀺𑀕𑁆𑀭𑁄𑀥𑁄 𑀚𑀸𑀢𑁄. 𑀢𑀤𑀸𑀳𑀁, 𑀲𑀫𑁆𑀫𑀸, 𑀚𑀸𑀢𑀺𑀬𑀸 𑀫𑀳𑀦𑁆𑀢𑀢𑀭𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀓𑁆𑀓𑀝𑁄 𑀘 𑀳𑀢𑁆𑀣𑀺𑀦𑀸𑀕𑁄 𑀘 𑀢𑀺𑀢𑁆𑀢𑀺𑀭𑀁 𑀏𑀢𑀤𑀯𑁄𑀘𑀼𑀁 𑁋 ‘𑀢𑁆𑀯𑀁, 𑀲𑀫𑁆𑀫, 𑀅𑀫𑁆𑀳𑀸𑀓𑀁 𑀚𑀸𑀢𑀺𑀬𑀸 𑀫𑀳𑀦𑁆𑀢𑀢𑀭𑁄. 𑀢𑀁 𑀫𑀬𑀁 𑀲𑀓𑁆𑀓𑀭𑀺𑀲𑁆𑀲𑀸𑀫 𑀕𑀭𑀼𑀁 𑀓𑀭𑀺𑀲𑁆𑀲𑀸𑀫 𑀫𑀸𑀦𑁂𑀲𑁆𑀲𑀸𑀫 𑀧𑀽𑀚𑁂𑀲𑁆𑀲𑀸𑀫, 𑀢𑀼𑀬𑁆𑀳𑀜𑁆𑀘 𑀫𑀬𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀺𑀲𑁆𑀲𑀸𑀫𑀸’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀢𑀺𑀭𑁄 𑀫𑀓𑁆𑀓𑀝𑀜𑁆𑀘 𑀳𑀢𑁆𑀣𑀺𑀦𑀸𑀕𑀜𑁆𑀘 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀲𑀫𑀸𑀤𑀧𑁂𑀲𑀺, 𑀅𑀢𑁆𑀢𑀦𑀸 𑀘 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀏𑀯𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀢𑀺𑀢𑁆𑀢𑀺𑀭𑀺𑀬𑀁 𑀦𑀸𑀫 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀳𑁄𑀲𑀺.

[𑀚𑀸. 𑁧.𑁧.𑁩𑁭] ‘‘𑀬𑁂 𑀯𑀼𑀟𑁆𑀠𑀫𑀧𑀘𑀸𑀬𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻’’𑀢𑀺.

‘‘𑀢𑁂 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀇𑀥 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑁄𑀪𑁂𑀣 𑀬𑀁 𑀢𑀼𑀫𑁆𑀳𑁂 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸 𑀅𑀲𑀪𑀸𑀕𑀯𑀼𑀢𑁆𑀢𑀺𑀓𑀸 𑀯𑀺𑀳𑀭𑁂𑀬𑁆𑀬𑀸𑀣? 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀬𑀣𑀸𑀯𑀼𑀟𑁆𑀠𑀁 𑀅𑀪𑀺𑀯𑀸𑀤𑀦𑀁, 𑀧𑀘𑁆𑀘𑀼𑀝𑁆𑀞𑀸𑀦𑀁, 𑀅𑀜𑁆𑀚𑀮𑀺𑀓𑀫𑁆𑀫𑀁, 𑀲𑀸𑀫𑀻𑀘𑀺𑀓𑀫𑁆𑀫𑀁, 𑀅𑀕𑁆𑀕𑀸𑀲𑀦𑀁, 𑀅𑀕𑁆𑀕𑁄𑀤𑀓𑀁, 𑀅𑀕𑁆𑀕𑀧𑀺𑀡𑁆𑀟𑀁. 𑀦 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀺𑀓𑀁 𑀬𑀣𑀸𑀯𑀼𑀟𑁆𑀠𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀅𑀯𑀦𑁆𑀤𑀺𑀬𑀸𑀤𑀺𑀧𑀼𑀕𑁆𑀕𑀮𑀸

𑁩𑁧𑁨. ‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀯𑀦𑁆𑀤𑀺𑀬𑀸 𑁋 𑀧𑀼𑀭𑁂 𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀘𑁆𑀙𑀸 𑀉𑀧𑀲𑀫𑁆𑀧𑀦𑁆𑀦𑁄 𑀅𑀯𑀦𑁆𑀤𑀺𑀬𑁄, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀅𑀯𑀦𑁆𑀤𑀺𑀬𑁄, 𑀦𑀸𑀦𑀸𑀲𑀁𑀯𑀸𑀲𑀓𑁄 𑀯𑀼𑀟𑁆𑀠𑀢𑀭𑁄 𑀅𑀥𑀫𑁆𑀫𑀯𑀸𑀤𑀻 𑀅𑀯𑀦𑁆𑀤𑀺𑀬𑁄, 𑀫𑀸𑀢𑀼𑀕𑀸𑀫𑁄 𑀅𑀯𑀦𑁆𑀤𑀺𑀬𑁄, 𑀧𑀡𑁆𑀟𑀓𑁄 𑀅𑀯𑀦𑁆𑀤𑀺𑀬𑁄, 𑀧𑀸𑀭𑀺𑀯𑀸𑀲𑀺𑀓𑁄 𑀅𑀯𑀦𑁆𑀤𑀺𑀬𑁄, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁄 𑀅𑀯𑀦𑁆𑀤𑀺𑀬𑁄, 𑀫𑀸𑀦𑀢𑁆𑀢𑀸𑀭𑀳𑁄 𑀅𑀯𑀦𑁆𑀤𑀺𑀬𑁄, 𑀫𑀸𑀦𑀢𑁆𑀢𑀘𑀸𑀭𑀺𑀓𑁄 𑀅𑀯𑀦𑁆𑀤𑀺𑀬𑁄, 𑀅𑀩𑁆𑀪𑀸𑀦𑀸𑀭𑀳𑁄 𑀅𑀯𑀦𑁆𑀤𑀺𑀬𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀅𑀯𑀦𑁆𑀤𑀺𑀬𑀸.

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀯𑀦𑁆𑀤𑀺𑀬𑀸 𑁋 𑀧𑀘𑁆𑀙𑀸 𑀉𑀧𑀲𑀫𑁆𑀧𑀦𑁆𑀦𑁂𑀦 𑀧𑀼𑀭𑁂 𑀉𑀧𑀲𑀫𑁆𑀧𑀦𑁆𑀦𑁄 𑀯𑀦𑁆𑀤𑀺𑀬𑁄, 𑀦𑀸𑀦𑀸𑀲𑀁𑀯𑀸𑀲𑀓𑁄 𑀯𑀼𑀟𑁆𑀠𑀢𑀭𑁄 𑀥𑀫𑁆𑀫𑀯𑀸𑀤𑀻 𑀯𑀦𑁆𑀤𑀺𑀬𑁄, 𑀲𑀤𑁂𑀯𑀓𑁂 𑀪𑀺𑀓𑁆𑀔𑀯𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀦𑁆𑀤𑀺𑀬𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀯𑀦𑁆𑀤𑀺𑀬𑀸’’𑀢𑀺.

𑀆𑀲𑀦𑀧𑁆𑀧𑀝𑀺𑀩𑀸𑀳𑀦𑀧𑀝𑀺𑀓𑁆𑀔𑁂𑀧𑀁

𑁩𑁧𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀫𑀡𑁆𑀟𑀧𑁂 𑀧𑀝𑀺𑀬𑀸𑀤𑁂𑀦𑁆𑀢𑀺, 𑀲𑀦𑁆𑀣𑀭𑁂 𑀧𑀝𑀺𑀬𑀸𑀤𑁂𑀦𑁆𑀢𑀺, 𑀑𑀓𑀸𑀲𑁂 𑀧𑀝𑀺𑀬𑀸𑀤𑁂𑀦𑁆𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑁋 ‘𑀲𑀗𑁆𑀖𑀺𑀓𑀜𑁆𑀜𑁂𑀯 𑀪𑀕𑀯𑀢𑀸 𑀬𑀣𑀸𑀯𑀼𑀟𑁆𑀠𑀁 𑀅𑀦𑀼𑀜𑁆𑀜𑀸𑀢𑀁, 𑀦𑁄 𑀉𑀤𑁆𑀤𑀺𑀲𑁆𑀲𑀓𑀢’𑀦𑁆𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑁂𑀧𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀲𑀦𑁆𑀣𑀭𑁂𑀧𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀑𑀓𑀸𑀲𑁂𑀧𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑁋 𑀇𑀤𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑁂𑀲𑀼 𑀧𑀭𑀺𑀕𑁆𑀕𑀳𑀺𑀢𑁂𑀲𑀼, 𑀲𑀦𑁆𑀣𑀭𑁂𑀲𑀼 𑀧𑀭𑀺𑀕𑁆𑀕𑀳𑀺𑀢𑁂𑀲𑀼, 𑀑𑀓𑀸𑀲𑁂𑀲𑀼 𑀧𑀭𑀺𑀕𑁆𑀕𑀳𑀺𑀢𑁂𑀲𑀼, 𑀑𑀓𑀸𑀲𑀁 𑀅𑀮𑀪𑀫𑀸𑀦𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀉𑀓𑁆𑀓𑀸𑀲𑀺. 𑀆𑀬𑀲𑁆𑀫𑀸𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 𑀉𑀓𑁆𑀓𑀸𑀲𑀺. ‘‘𑀓𑁄 𑀏𑀢𑁆𑀣𑀸’’𑀢𑀺? ‘‘𑀅𑀳𑀁, 𑀪𑀕𑀯𑀸, 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺. ‘‘𑀓𑀺𑀲𑁆𑀲 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀥 𑀦𑀺𑀲𑀺𑀦𑁆𑀦𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑁋 ‘𑀲𑀗𑁆𑀖𑀺𑀓𑀜𑁆𑀜𑁂𑀯 𑀪𑀕𑀯𑀢𑀸 𑀬𑀣𑀸𑀯𑀼𑀟𑁆𑀠𑀁 𑀅𑀦𑀼𑀜𑁆𑀜𑀸𑀢𑀁, 𑀦𑁄 𑀉𑀤𑁆𑀤𑀺𑀲𑁆𑀲𑀓𑀢’𑀦𑁆𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀡𑁆𑀟𑀧𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀲𑀦𑁆𑀣𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀑𑀓𑀸𑀲𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑁋 𑀇𑀤𑀁 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀉𑀤𑁆𑀤𑀺𑀲𑁆𑀲𑀓𑀢𑀫𑁆𑀧𑀺 𑀬𑀣𑀸𑀯𑀼𑀟𑁆𑀠𑀁 𑀧𑀝𑀺𑀩𑀸𑀳𑁂𑀢𑀩𑁆𑀩𑀁. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀕𑀺𑀳𑀺𑀯𑀺𑀓𑀢𑀅𑀦𑀼𑀚𑀸𑀦𑀦𑀁

𑁩𑁧𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺𑀁, 𑀧𑀮𑁆𑀮𑀗𑁆𑀓𑀁, 𑀕𑁄𑀦𑀓𑀁, 𑀘𑀺𑀢𑁆𑀢𑀓𑀁, 𑀧𑀝𑀺𑀓𑀁, 𑀧𑀝𑀮𑀺𑀓𑀁, 𑀢𑀽𑀮𑀺𑀓𑀁, 𑀯𑀺𑀓𑀢𑀺𑀓𑀁, 𑀉𑀤𑁆𑀤𑀮𑁄𑀫𑀺𑀁, 𑀏𑀓𑀦𑁆𑀢𑀮𑁄𑀫𑀺𑀁, 𑀓𑀝𑁆𑀝𑀺𑀲𑁆𑀲𑀁, 𑀓𑁄𑀲𑁂𑀬𑁆𑀬𑀁 [𑀓𑁄𑀲𑁂𑀬𑁆𑀬𑀁 𑀓𑀫𑁆𑀩𑀮𑀁 (𑀲𑀻. 𑀲𑁆𑀬𑀸.)], 𑀓𑀼𑀢𑁆𑀢𑀓𑀁, 𑀳𑀢𑁆𑀣𑀢𑁆𑀣𑀭𑀁, 𑀅𑀲𑁆𑀲𑀢𑁆𑀣𑀭𑀁, 𑀭𑀣𑀢𑁆𑀣𑀭𑀁, 𑀅𑀚𑀺𑀦𑀧𑀯𑁂𑀡𑀺𑀁, 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁, 𑀲𑀉𑀢𑁆𑀢𑀭𑀘𑁆𑀙𑀤𑀁, 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀪𑀺𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀢𑀻𑀡𑀺 𑁋 𑀆𑀲𑀦𑁆𑀤𑀺𑀁, 𑀧𑀮𑁆𑀮𑀗𑁆𑀓𑀁, 𑀢𑀽𑀮𑀺𑀓𑀁 𑁋 𑀕𑀺𑀳𑀺𑀯𑀺𑀓𑀢𑀁 [𑀕𑀺𑀳𑀺𑀯𑀺𑀓𑀝𑀁 (𑀲𑀻. 𑀓.), 𑀅𑀯𑀲𑁂𑀲𑀁 𑀕𑀺𑀳𑀺𑀯𑀺𑀓𑀝𑀁 (𑀲𑁆𑀬𑀸.)] 𑀅𑀪𑀺𑀦𑀺𑀲𑀻𑀤𑀺𑀢𑀼𑀁, 𑀦𑀢𑁆𑀯𑁂𑀯 𑀅𑀪𑀺𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀢𑀽𑀮𑁄𑀦𑀤𑁆𑀥𑀁 𑀫𑀜𑁆𑀘𑀫𑁆𑀧𑀺 𑀧𑀻𑀞𑀫𑁆𑀧𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀪𑀺𑀓𑁆𑀔𑀽 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑀸 𑀦𑀸𑀪𑀺𑀦𑀺𑀲𑀻𑀤𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀳𑀺𑀯𑀺𑀓𑀢𑀁 𑀅𑀪𑀺𑀦𑀺𑀲𑀻𑀤𑀺𑀢𑀼𑀁, 𑀦𑀢𑁆𑀯𑁂𑀯 𑀅𑀪𑀺𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺.

𑀚𑁂𑀢𑀯𑀦𑀯𑀺𑀳𑀸𑀭𑀸𑀦𑀼𑀫𑁄𑀤𑀦𑀸

𑁩𑁧𑁫. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀲𑀸𑀯𑀢𑁆𑀣𑀺 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀚𑁂𑀢𑀯𑀦𑁂 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀚𑁂𑀢𑀯𑀦𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀧𑁂𑀳𑀻’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀚𑁂𑀢𑀯𑀦𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀅𑀣 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺, 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀭𑀻𑀲𑀧𑁂 𑀘 𑀫𑀓𑀲𑁂, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

‘‘𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁄, 𑀲𑀜𑁆𑀚𑀸𑀢𑁄 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

‘‘𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

‘‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀢𑁂𑀲𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

‘‘𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀆𑀲𑀦𑀧𑁆𑀧𑀝𑀺𑀩𑀸𑀳𑀦𑀸𑀤𑀺

𑁩𑁧𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀆𑀚𑀻𑀯𑀓𑀲𑀸𑀯𑀓𑀲𑁆𑀲 𑀫𑀳𑀸𑀫𑀢𑁆𑀢𑀲𑁆𑀲 𑀲𑀗𑁆𑀖𑀪𑀢𑁆𑀢𑀁 𑀳𑁄𑀢𑀺. 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀓𑀢𑀪𑁄𑀚𑀦𑀁 𑀆𑀦𑀦𑁆𑀢𑀭𑀺𑀓𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀲𑀺. 𑀪𑀢𑁆𑀢𑀕𑁆𑀕𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀅𑀣 𑀔𑁄 𑀲𑁄 𑀫𑀳𑀸𑀫𑀢𑁆𑀢𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀓𑀢𑀪𑁄𑀚𑀦𑀁 𑀆𑀦𑀦𑁆𑀢𑀭𑀺𑀓𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺! 𑀪𑀢𑁆𑀢𑀕𑁆𑀕𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀦𑀦𑀼 𑀦𑀸𑀫 𑀮𑀩𑁆𑀪𑀸 𑀅𑀜𑁆𑀜𑀢𑁆𑀭𑀸𑀧𑀺 𑀦𑀺𑀲𑀺𑀦𑁆𑀦𑁂𑀦 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺? 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀫𑀳𑀸𑀫𑀢𑁆𑀢𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀓𑀢𑀪𑁄𑀚𑀦𑀁 𑀆𑀦𑀦𑁆𑀢𑀭𑀺𑀓𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺! 𑀪𑀢𑁆𑀢𑀕𑁆𑀕𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀧𑀦𑀦𑁆𑀤, 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀓𑀢𑀪𑁄𑀚𑀦𑀁 𑀆𑀦𑀦𑁆𑀢𑀭𑀺𑀓𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀲𑀺, 𑀪𑀢𑁆𑀢𑀕𑁆𑀕𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀯𑀺𑀧𑁆𑀧𑀓𑀢𑀪𑁄𑀚𑀦𑀁 𑀆𑀦𑀦𑁆𑀢𑀭𑀺𑀓𑀁 𑀪𑀺𑀓𑁆𑀔𑀼𑀁 𑀯𑀼𑀝𑁆𑀞𑀸𑀧𑁂𑀲𑁆𑀲𑀲𑀺? 𑀪𑀢𑁆𑀢𑀕𑁆𑀕𑀁 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑁆𑀧𑀓𑀢𑀪𑁄𑀚𑀦𑁄 [𑀪𑁄𑀚𑀦𑁄 𑀆𑀦𑀦𑁆𑀢𑀭𑀺𑀓𑁄 (𑀲𑁆𑀬𑀸.)] 𑀪𑀺𑀓𑁆𑀔𑀼 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀬𑁄 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀘𑁂 𑀯𑀼𑀝𑁆𑀞𑀸𑀧𑁂𑀢𑀺, 𑀧𑀯𑀸𑀭𑀺𑀢𑁄 𑀘 𑀳𑁄𑀢𑀺, ‘𑀕𑀘𑁆𑀙 𑀉𑀤𑀓𑀁 𑀆𑀳𑀭𑀸’𑀢𑀺 𑀯𑀢𑁆𑀢𑀩𑁆𑀩𑁄. 𑀏𑀯𑀜𑁆𑀘𑁂𑀢𑀁 𑀮𑀪𑁂𑀣, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀮𑀪𑁂𑀣, 𑀲𑀸𑀥𑀼𑀓𑀁 𑀲𑀺𑀢𑁆𑀣𑀸𑀦𑀺 𑀕𑀺𑀮𑀺𑀢𑁆𑀯𑀸 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀦𑀁 𑀤𑀸𑀢𑀩𑁆𑀩𑀁. 𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀲𑀦𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺’’.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀕𑀺𑀮𑀸𑀦𑁂 𑀪𑀺𑀓𑁆𑀔𑀽 𑀯𑀼𑀝𑁆𑀞𑀸𑀧𑁂𑀦𑁆𑀢𑀺. 𑀕𑀺𑀮𑀸𑀦𑀸 𑀏𑀯𑀁 𑀯𑀤𑁂𑀦𑁆𑀢𑀺 𑁋 ‘‘𑀦 𑀫𑀬𑀁, 𑀆𑀯𑀼𑀲𑁄, 𑀲𑀓𑁆𑀓𑁄𑀫 𑀯𑀼𑀝𑁆𑀞𑀸𑀢𑀼𑀁, 𑀕𑀺𑀮𑀸𑀦𑀸𑀫𑁆𑀳𑀸’’𑀢𑀺. ‘‘𑀫𑀬𑀁 𑀆𑀬𑀲𑁆𑀫𑀦𑁆𑀢𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀞𑀺𑀢𑀓𑁂 𑀫𑀼𑀜𑁆𑀘𑀦𑁆𑀢𑀺. 𑀕𑀺𑀮𑀸𑀦𑀸 𑀫𑀼𑀘𑁆𑀙𑀺𑀢𑀸 𑀧𑀧𑀢𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑁄 𑀯𑀼𑀝𑁆𑀞𑀸𑀧𑁂𑀢𑀩𑁆𑀩𑁄. 𑀬𑁄 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 ‘𑀕𑀺𑀮𑀸𑀦𑀸 𑀫𑀬𑀫𑁆𑀳𑀸 𑀅𑀯𑀼𑀝𑁆𑀞𑀸𑀧𑀦𑀻𑀬𑀸’𑀢𑀺 𑀯𑀭𑀲𑁂𑀬𑁆𑀬𑀸𑀬𑁄 𑀧𑀮𑀺𑀩𑀼𑀤𑁆𑀥𑁂𑀦𑁆𑀢𑀺 [𑀧𑀮𑀺𑀩𑀼𑀦𑁆𑀥𑀦𑁆𑀢𑀺 (𑀓.)]. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀕𑀺𑀮𑀸𑀦𑀲𑁆𑀲 𑀧𑀢𑀺𑀭𑀽𑀧𑀁 𑀲𑁂𑀬𑁆𑀬𑀁 𑀤𑀸𑀢𑀼’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀮𑁂𑀲𑀓𑀧𑁆𑀧𑁂𑀦 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀮𑁂𑀲𑀓𑀧𑁆𑀧𑁂𑀦 𑀲𑁂𑀦𑀸𑀲𑀦𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁. 𑀬𑁄 𑀧𑀝𑀺𑀩𑀸𑀳𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

[𑀧𑀸𑀘𑀺. 𑁧𑁨𑁨] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀺𑀫𑀁 𑀫𑀳𑀸𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺 𑁋 ‘𑀇𑀥 𑀫𑀬𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫𑀸’𑀢𑀺. 𑀅𑀤𑁆𑀤𑀲𑀁𑀲𑀼 [𑀅𑀤𑁆𑀤𑀲𑀸𑀲𑀼𑀁 (𑀓.)] 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 [𑀅𑀜𑁆𑀜𑀢𑀭𑀁 𑀯𑀺𑀳𑀸𑀭𑀁 (𑀓.)] 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀫𑁂, 𑀆𑀯𑀼𑀲𑁄, 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺. 𑀳𑀦𑁆𑀤 𑀦𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀕𑀫𑁂𑀣𑀸𑀯𑀼𑀲𑁄, 𑀬𑀸𑀯 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺, 𑀧𑀝𑀺𑀲𑀗𑁆𑀔𑀢𑁂 𑀯𑀼𑀝𑁆𑀞𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀉𑀝𑁆𑀞𑁂𑀣𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀦𑀦𑀼, 𑀆𑀯𑀼𑀲𑁄, 𑀧𑀝𑀺𑀓𑀘𑁆𑀘𑁂𑀯 𑀆𑀘𑀺𑀓𑁆𑀔𑀺𑀢𑀩𑁆𑀩𑀁? 𑀫𑀬𑀜𑁆𑀘𑀜𑁆𑀜𑀁 𑀧𑀝𑀺𑀲𑀗𑁆𑀔𑀭𑁂𑀬𑁆𑀬𑀸𑀫𑀸’’𑀢𑀺. ‘‘𑀦𑀦𑀼, 𑀆𑀯𑀼𑀲𑁄, 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄’’𑀢𑀺? ‘‘𑀆𑀫𑀸𑀯𑀼𑀲𑁄, 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄’’𑀢𑀺. ‘‘𑀉𑀝𑁆𑀞𑁂𑀣𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺. ‘‘𑀫𑀳𑀮𑁆𑀮𑀓𑁄, 𑀆𑀯𑀼𑀲𑁄, 𑀯𑀺𑀳𑀸𑀭𑁄; 𑀢𑀼𑀫𑁆𑀳𑁂𑀧𑀺 𑀯𑀲𑀣, 𑀫𑀬𑀫𑁆𑀧𑀺 𑀯𑀲𑀺𑀲𑁆𑀲𑀸𑀫𑀸’’𑀢𑀺. ‘‘𑀉𑀝𑁆𑀞𑁂𑀣𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁄 𑀧𑀸𑀧𑀼𑀡𑀸𑀢𑀻’’𑀢𑀺 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀦𑁆𑀢𑀺. 𑀢𑁂 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑀸 𑀭𑁄𑀤𑀦𑁆𑀢𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀆𑀯𑀼𑀲𑁄, 𑀭𑁄𑀤𑀣𑀸’’𑀢𑀺? ‘‘𑀇𑀫𑁂, 𑀆𑀯𑀼𑀲𑁄, 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀅𑀫𑁆𑀳𑁂 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀦𑁆𑀢𑀻’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀪𑀺𑀓𑁆𑀔𑀽 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀦𑁆𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂, 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀪𑀺𑀓𑁆𑀔𑀽 𑀦𑀺𑀓𑁆𑀓𑀟𑁆𑀠𑀣𑀸’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀓𑀼𑀧𑀺𑀢𑁂𑀦 𑀅𑀦𑀢𑁆𑀢𑀫𑀦𑁂𑀦 𑀪𑀺𑀓𑁆𑀔𑀼 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀢𑀩𑁆𑀩𑁄. 𑀬𑁄 𑀦𑀺𑀓𑁆𑀓𑀟𑁆𑀠𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀕𑀸𑀳𑁂𑀢𑀼’’𑀦𑁆𑀢𑀺.

𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑀫𑁆𑀫𑀼𑀢𑀺

𑁩𑁧𑁭. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘𑀓𑁂𑀦 𑀦𑀼 𑀔𑁄 𑀲𑁂𑀦𑀸𑀲𑀦𑀁 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 …𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑁋 𑀬𑁄 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀕𑀳𑀺𑀢𑀸𑀕𑀳𑀺𑀢𑀜𑁆𑀘 𑀚𑀸𑀦𑁂𑀬𑁆𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 𑁋

‘‘𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀁 𑀲𑀫𑁆𑀫𑀦𑁆𑀦𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀲𑁆𑀲 𑀲𑀫𑁆𑀫𑀼𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑁄. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁩𑁧𑁮. 𑀅𑀣 𑀔𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀣𑀁 𑀦𑀼 𑀔𑁄 𑀲𑁂𑀦𑀸𑀲𑀦𑀁 𑀕𑀸𑀳𑁂𑀢𑀩𑁆𑀩’’𑀦𑁆𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀪𑀺𑀓𑁆𑀔𑀽 𑀕𑀡𑁂𑀢𑀼𑀁, 𑀪𑀺𑀓𑁆𑀔𑀽 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀸 𑀕𑀡𑁂𑀢𑀼𑀁, 𑀲𑁂𑀬𑁆𑀬𑀸 𑀕𑀡𑁂𑀢𑁆𑀯𑀸 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺. 𑀲𑁂𑀬𑁆𑀬𑀕𑁆𑀕𑁂𑀦 𑀕𑀸𑀳𑁂𑀦𑁆𑀢𑀸 𑀲𑁂𑀬𑁆𑀬𑀸 𑀉𑀲𑁆𑀲𑀸𑀭𑀬𑀺𑀁𑀲𑀼…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀯𑀺𑀳𑀸𑀭𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺. 𑀯𑀺𑀳𑀸𑀭𑀕𑁆𑀕𑁂𑀦 𑀕𑀸𑀳𑁂𑀦𑁆𑀢𑀸 𑀯𑀺𑀳𑀸𑀭𑀸 𑀉𑀲𑁆𑀲𑀸𑀭𑀬𑀺𑀁𑀲𑀼…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀯𑁂𑀡𑀕𑁆𑀕𑁂𑀦 𑀕𑀸𑀳𑁂𑀢𑀼’’𑀦𑁆𑀢𑀺. 𑀧𑀭𑀺𑀯𑁂𑀡𑀕𑁆𑀕𑁂𑀦 𑀕𑀸𑀳𑁂𑀦𑁆𑀢𑀸 𑀧𑀭𑀺𑀯𑁂𑀡𑀸 𑀉𑀲𑁆𑀲𑀸𑀭𑀬𑀺𑀁𑀲𑀼…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑀼𑀪𑀸𑀕𑀫𑁆𑀧𑀺 𑀤𑀸𑀢𑀼𑀁. 𑀕𑀳𑀺𑀢𑁂 𑀅𑀦𑀼𑀪𑀸𑀕𑁂 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀺, 𑀦 𑀅𑀓𑀸𑀫𑀸 𑀤𑀸𑀢𑀩𑁆𑀩𑁄’’𑀢𑀺.