𑀆𑀭𑀸𑀫𑀧𑀭𑀺𑀓𑁆𑀔𑁂𑀧𑀅𑀦𑀼𑀚𑀸𑀦𑀦𑀁

𑁩𑁦𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀭𑀸𑀫𑁄 𑀅𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀅𑀚𑀓𑀸𑀧𑀺 𑀧𑀲𑀼𑀓𑀸𑀧𑀺 𑀉𑀧𑀭𑁄𑀧𑁂 𑀯𑀺𑀳𑁂𑀞𑁂𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀺𑀧𑀺𑀢𑀼𑀁 𑀢𑀬𑁄 𑀯𑀸𑀝𑁂 𑁋 𑀯𑁂𑀴𑀼𑀯𑀸𑀝𑀁, 𑀓𑀡𑁆𑀟𑀓𑀯𑀸𑀝𑀁 [𑀯𑀝𑁂 𑀯𑁂𑀴𑀼𑀯𑀝𑀁 𑀓𑀡𑁆𑀟𑀓𑀯𑀝𑀁 (𑀲𑁆𑀬𑀸.)], 𑀧𑀭𑀺𑀔’’𑀦𑁆𑀢𑀺. 𑀓𑁄𑀝𑁆𑀞𑀓𑁄 𑀦 𑀳𑁄𑀢𑀺. 𑀢𑀣𑁂𑀯 𑀅𑀚𑀓𑀸𑀧𑀺 𑀧𑀲𑀼𑀓𑀸𑀧𑀺 𑀉𑀧𑀭𑁄𑀧𑁂 𑀯𑀺𑀳𑁂𑀞𑁂𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀓𑁄𑀝𑁆𑀞𑀓𑀁 𑀅𑀧𑁂𑀲𑀺𑀁 𑀬𑀫𑀓𑀓𑀯𑀸𑀝𑀁 𑀢𑁄𑀭𑀡𑀁 𑀧𑀮𑀺𑀖’’𑀦𑁆𑀢𑀺. 𑀓𑁄𑀝𑁆𑀞𑀓𑁂 𑀢𑀺𑀡𑀘𑀼𑀡𑁆𑀡𑀁 𑀧𑀭𑀺𑀧𑀢𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀑𑀕𑀼𑀫𑁆𑀨𑁂𑀢𑁆𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀁 𑀓𑀸𑀢𑀼𑀁 𑁋 𑀲𑁂𑀢𑀯𑀡𑁆𑀡𑀁 𑀓𑀸𑀴𑀯𑀡𑁆𑀡𑀁 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓’’𑀦𑁆𑀢𑀺. 𑀆𑀭𑀸𑀫𑁄 𑀘𑀺𑀓𑁆𑀔𑀮𑁆𑀮𑁄 𑀳𑁄𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀭𑀼𑀫𑁆𑀩𑀁 𑀉𑀧𑀓𑀺𑀭𑀺𑀢𑀼’’𑀦𑁆𑀢𑀺. 𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀤𑀭𑀲𑀺𑀮𑀁 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺. 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺…𑀧𑁂… ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀤𑀓𑀦𑀺𑀤𑁆𑀥𑀫𑀦’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀲𑀼𑀥𑀸𑀫𑀢𑁆𑀢𑀺𑀓𑀸𑀮𑁂𑀧𑀦𑀁 𑀧𑀸𑀲𑀸𑀤𑀁 𑀓𑀸𑀭𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀙𑀤𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀙𑀤𑀦𑀸𑀦𑀺 𑁋 𑀇𑀝𑁆𑀞𑀓𑀸𑀙𑀤𑀦𑀁, 𑀲𑀺𑀮𑀸𑀙𑀤𑀦𑀁, 𑀲𑀼𑀥𑀸𑀙𑀤𑀦𑀁, 𑀢𑀺𑀡𑀘𑁆𑀙𑀤𑀦𑀁, 𑀧𑀡𑁆𑀡𑀘𑁆𑀙𑀤𑀦’’𑀦𑁆𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.