𑀧𑀝𑀺𑀪𑀸𑀦𑀘𑀺𑀢𑁆𑀢𑀧𑀝𑀺𑀓𑁆𑀔𑁂𑀧𑀁

𑁨𑁯𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑁂 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀓𑀸𑀭𑀸𑀧𑁂𑀦𑁆𑀢𑀺 𑁋 𑀇𑀢𑁆𑀣𑀺𑀭𑀽𑀧𑀓𑀁 𑀧𑀼𑀭𑀺𑀲𑀭𑀽𑀧𑀓𑀁. 𑀫𑀦𑀼𑀲𑁆𑀲𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑁆𑀲𑀺𑀢𑁆𑀯𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀕𑀺𑀳𑀻 𑀓𑀸𑀫𑀪𑁄𑀕𑀺𑀦𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀓𑀸𑀭𑀸𑀧𑁂𑀢𑀩𑁆𑀩𑀁 𑁋 𑀇𑀢𑁆𑀣𑀺𑀭𑀽𑀧𑀓𑀁 𑀧𑀼𑀭𑀺𑀲𑀭𑀽𑀧𑀓𑀁. 𑀬𑁄 𑀓𑀸𑀭𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀫𑀸𑀮𑀸𑀓𑀫𑁆𑀫𑀁 𑀮𑀢𑀸𑀓𑀫𑁆𑀫𑀁 𑀫𑀓𑀭𑀤𑀦𑁆𑀢𑀓𑀁 𑀧𑀜𑁆𑀘𑀧𑀝𑀺𑀓’’𑀦𑁆𑀢𑀺.