𑁧𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑁧. 𑀲𑀗𑁆𑀕𑀻𑀢𑀺𑀦𑀺𑀤𑀸𑀦𑀁

𑁪𑁩𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀓𑀫𑀺𑀤𑀸𑀳𑀁, 𑀆𑀯𑀼𑀲𑁄, 𑀲𑀫𑀬𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀁.

[𑀤𑀻. 𑀦𑀺. 𑁨.𑁨𑁩𑁧] ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀆𑀚𑀻𑀯𑀓𑁄 𑀓𑀼𑀲𑀺𑀦𑀸𑀭𑀸𑀬 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀸𑀯𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀢𑀁 𑀆𑀚𑀻𑀯𑀓𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀢𑀁 𑀆𑀚𑀻𑀯𑀓𑀁 𑀏𑀢𑀤𑀯𑁄𑀘𑀁 𑁋 ‘𑀅𑀧𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀚𑀸𑀦𑀸𑀲𑀻’𑀢𑀺? ‘𑀆𑀫𑀸𑀯𑀼𑀲𑁄, 𑀚𑀸𑀦𑀸𑀫𑀺. 𑀅𑀚𑁆𑀚 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀫𑀡𑁄 𑀕𑁄𑀢𑀫𑁄. 𑀢𑀢𑁄 𑀫𑁂 𑀇𑀤𑀁 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑀺𑀢’𑀦𑁆𑀢𑀺. 𑀢𑀢𑁆𑀭𑀸𑀯𑀼𑀲𑁄, 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀯𑀻𑀢𑀭𑀸𑀕𑀸 𑀅𑀧𑁆𑀧𑁂𑀓𑀘𑁆𑀘𑁂 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺 𑁋 𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑀦𑁆𑀢𑀺. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀯𑀻𑀢𑀭𑀸𑀕𑀸 𑀢𑁂 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀅𑀥𑀺𑀯𑀸𑀲𑁂𑀦𑁆𑀢𑀺 𑁋 𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺.

‘‘𑀅𑀣 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀁 𑁋 ‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣; 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣. 𑀦𑀦𑁆𑀯𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 𑁋 𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄. 𑀢𑀁 𑀓𑀼𑀢𑁂𑀢𑁆𑀣 𑀆𑀯𑀼𑀲𑁄 𑀮𑀩𑁆𑀪𑀸, 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻𑀢𑀺 𑁋 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’𑀢𑀺.

‘‘𑀢𑁂𑀦 𑀔𑁄 𑀧𑀦𑀸𑀯𑀼𑀲𑁄, 𑀲𑀫𑀬𑁂𑀦 𑀲𑀼𑀪𑀤𑁆𑀤𑁄 𑀦𑀸𑀫 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄, 𑀆𑀯𑀼𑀲𑁄, 𑀲𑀼𑀪𑀤𑁆𑀤𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣; 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣. 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦; 𑀉𑀧𑀤𑁆𑀤𑀼𑀢𑀸 𑀘 𑀫𑀬𑀁 𑀳𑁄𑀫 𑁋 𑀇𑀤𑀁 𑀯𑁄 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻𑀢𑀺. 𑀇𑀤𑀸𑀦𑀺 𑀧𑀦 𑀫𑀬𑀁 𑀬𑀁 𑀇𑀘𑁆𑀙𑀺𑀲𑁆𑀲𑀸𑀫 𑀢𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀸𑀫. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺 [𑀤𑀺𑀩𑁆𑀩𑀢𑀺 (𑀓.)], 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀧𑀼𑀭𑁂 𑀅𑀯𑀺𑀦𑀬𑁄 𑀤𑀺𑀧𑁆𑀧𑀢𑀺 𑀯𑀺𑀦𑀬𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺; 𑀧𑀼𑀭𑁂 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀢𑀽’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀏𑀓𑁂𑀦𑀽𑀦𑀧𑀜𑁆𑀘𑀅𑀭𑀳𑀦𑁆𑀢𑀲𑀢𑀸𑀦𑀺 𑀉𑀘𑁆𑀘𑀺𑀦𑀺. 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄, 𑀅𑀪𑀩𑁆𑀩𑁄 𑀙𑀦𑁆𑀤𑀸 𑀤𑁄𑀲𑀸 𑀫𑁄𑀳𑀸 𑀪𑀬𑀸 𑀅𑀕𑀢𑀺𑀁 𑀕𑀦𑁆𑀢𑀼𑀁. 𑀩𑀳𑀼 𑀘 𑀅𑀦𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀧𑀭𑀺𑀬𑀢𑁆𑀢𑁄. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀢𑀽’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀺.

𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀫𑀬𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫𑀸’’𑀢𑀺? 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀭𑀸𑀚𑀕𑀳𑀁 𑀔𑁄 𑀫𑀳𑀸𑀕𑁄𑀘𑀭𑀁 𑀧𑀳𑀽𑀢𑀲𑁂𑀦𑀸𑀲𑀦𑀁, 𑀬𑀁𑀦𑀽𑀦 𑀫𑀬𑀁 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫. 𑀦 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

𑁪𑁩𑁮. ‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀫𑁆𑀫𑀦𑁆𑀦𑁂𑀬𑁆𑀬 𑁋 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩𑀦𑁆𑀢𑀺. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀇𑀫𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀫𑁆𑀫𑀦𑁆𑀦𑀢𑀺 𑁋 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩𑀦𑁆𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀲𑀫𑁆𑀫𑀼𑀢𑀺 𑁋 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩𑀦𑁆𑀢𑀺 𑁋 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑀸𑀦𑀺 𑀲𑀗𑁆𑀖𑁂𑀦 𑀇𑀫𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸𑀦𑀺 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁, 𑀦 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀺𑀢𑀩𑁆𑀩𑀦𑁆𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀭𑀸𑀚𑀕𑀳𑀁 𑀅𑀕𑀫𑀁𑀲𑀼 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀢𑀼𑀁. 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀔𑀡𑁆𑀟𑀨𑀼𑀮𑁆𑀮𑀧𑁆𑀧𑀝𑀺𑀲𑀗𑁆𑀔𑀭𑀡𑀁 𑀯𑀡𑁆𑀡𑀺𑀢𑀁. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀁 𑀧𑀝𑀺𑀲𑀗𑁆𑀔𑀭𑁄𑀫; 𑀫𑀚𑁆𑀛𑀺𑀫𑀁 𑀫𑀸𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀧𑀞𑀫𑀁 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀁 𑀧𑀝𑀺𑀲𑀗𑁆𑀔𑀭𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 𑀲𑁆𑀯𑁂 𑀲𑀦𑁆𑀦𑀺𑀧𑀸𑀢𑁄 [𑀲𑀦𑁆𑀦𑀺𑀧𑀸𑀢𑁄𑀢𑀺 (𑀓.)] 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁄𑀳𑀁 𑀲𑁂𑀓𑁆𑀔𑁄 𑀲𑀫𑀸𑀦𑁄 𑀲𑀦𑁆𑀦𑀺𑀧𑀸𑀢𑀁 𑀕𑀘𑁆𑀙𑁂𑀬𑁆𑀬𑀦𑁆𑀢𑀺 𑁋 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 ‘𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀆𑀯𑀚𑁆𑀚𑁂𑀲𑀺. 𑀅𑀧𑁆𑀧𑀢𑁆𑀢𑀜𑁆𑀘 𑀲𑀻𑀲𑀁 𑀩𑀺𑀩𑁆𑀩𑁄𑀳𑀦𑀁, 𑀪𑀽𑀫𑀺𑀢𑁄 𑀘 𑀧𑀸𑀤𑀸 𑀫𑀼𑀢𑁆𑀢𑀸. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺.

𑁪𑁩𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀭𑀳𑀸 𑀲𑀫𑀸𑀦𑁄 𑀲𑀦𑁆𑀦𑀺𑀧𑀸𑀢𑀁 𑀅𑀕𑀫𑀸𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀆𑀬𑀲𑁆𑀫𑀸 𑀉𑀧𑀸𑀮𑀺 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀏𑀢𑀤𑀯𑁄𑀘 𑁋 ‘‘𑀧𑀞𑀫𑀁, 𑀆𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺? ‘‘𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂’’𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀆𑀭𑀩𑁆𑀪𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫𑁂’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀧𑀞𑀫𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀆𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺. ‘‘𑀤𑀼𑀢𑀺𑀬𑀁 𑀧𑀦𑀸𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺? ‘‘𑀭𑀸𑀚𑀕𑀳𑁂 𑀪𑀦𑁆𑀢𑁂’’𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀥𑀦𑀺𑀬𑀁 𑀓𑀼𑀫𑁆𑀪𑀓𑀸𑀭𑀧𑀼𑀢𑁆𑀢𑀁 𑀆𑀭𑀩𑁆𑀪𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀅𑀤𑀺𑀦𑁆𑀦𑀸𑀤𑀸𑀦𑁂’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀤𑀼𑀢𑀺𑀬𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀆𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺. ‘‘𑀢𑀢𑀺𑀬𑀁 𑀧𑀦𑀸𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺? ‘‘𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂’’𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀢𑀢𑀺𑀬𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀆𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺. ‘‘𑀘𑀢𑀼𑀢𑁆𑀣𑀁 𑀧𑀦𑀸𑀯𑀼𑀲𑁄 𑀉𑀧𑀸𑀮𑀺, 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺? ‘‘𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂’’𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪𑀸’’𑀢𑀺. ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺? ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀘𑀢𑀼𑀢𑁆𑀣𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀆𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺, 𑀅𑀦𑀸𑀧𑀢𑁆𑀢𑀺𑀫𑁆𑀧𑀺 𑀧𑀼𑀘𑁆𑀙𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀉𑀪𑀢𑁄𑀯𑀺𑀪𑀗𑁆𑀕𑁂 𑀧𑀼𑀘𑁆𑀙𑀺. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁪𑁪𑁦. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀦𑀦𑁆𑀤𑀁 𑀥𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀥𑀫𑁆𑀫𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀭𑀳𑁆𑀫𑀚𑀸𑀮𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘‘𑀅𑀦𑁆𑀢𑀭𑀸 𑀘, 𑀪𑀦𑁆𑀢𑁂, 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀭𑀸𑀚𑀸𑀕𑀸𑀭𑀓𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀸’’𑀢𑀺. ‘‘𑀓𑀁 𑀆𑀭𑀩𑁆𑀪𑀸’’𑀢𑀺? ‘‘𑀲𑀼𑀧𑁆𑀧𑀺𑀬𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀁 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀫𑀸𑀡𑀯’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺. ‘‘𑀲𑀸𑀫𑀜𑁆𑀜𑀨𑀮𑀁 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺? ‘‘𑀭𑀸𑀚𑀕𑀳𑁂, 𑀪𑀦𑁆𑀢𑁂, 𑀚𑀻𑀯𑀓𑀫𑁆𑀩𑀯𑀦𑁂’’𑀢𑀺. ‘‘𑀓𑁂𑀦 𑀲𑀤𑁆𑀥𑀺’’𑀦𑁆𑀢𑀺? ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀸𑀫𑀜𑁆𑀜𑀨𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀧𑀼𑀘𑁆𑀙𑀺. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁨. 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀲𑀺𑀓𑁆𑀔𑀸𑀧𑀤𑀓𑀣𑀸

𑁪𑁪𑁧. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀸 𑀫𑀁, 𑀪𑀦𑁆𑀢𑁂, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀏𑀯𑀫𑀸𑀳 𑁋 ‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑁂𑀬𑁆𑀬𑀸’’’𑀢𑀺. ‘‘𑀧𑀼𑀘𑁆𑀙𑀺 𑀧𑀦 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀦𑁆𑀢𑀁 𑁋 ‘𑀓𑀢𑀫𑀸𑀦𑀺 𑀧𑀦, 𑀪𑀦𑁆𑀢𑁂, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’’𑀢𑀺? ‘‘𑀦 𑀔𑁄𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁 𑁋 ‘𑀓𑀢𑀫𑀸𑀦𑀺 𑀧𑀦, 𑀪𑀦𑁆𑀢𑁂, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸, 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸, 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸, 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸, 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸, 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸, 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸, 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸, 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸, 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸, 𑀤𑁆𑀯𑁂𑀦𑀯𑀼𑀢𑀺 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺. 𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸, 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀞𑀧𑁂𑀢𑁆𑀯𑀸, 𑀤𑁆𑀯𑁂 𑀅𑀦𑀺𑀬𑀢𑁂 𑀞𑀧𑁂𑀢𑁆𑀯𑀸, 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑁂 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸, 𑀤𑁆𑀯𑁂𑀦𑀯𑀼𑀢𑀺 𑀧𑀸𑀘𑀺𑀢𑁆𑀢𑀺𑀬𑁂 𑀞𑀧𑁂𑀢𑁆𑀯𑀸, 𑀘𑀢𑁆𑀢𑀸𑀭𑁄 𑀧𑀸𑀝𑀺𑀤𑁂𑀲𑀦𑀻𑀬𑁂 𑀞𑀧𑁂𑀢𑁆𑀯𑀸, 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺.

𑁪𑁪𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀲𑀦𑁆𑀢𑀫𑁆𑀳𑀸𑀓𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀺𑀳𑀺𑀕𑀢𑀸𑀦𑀺. 𑀕𑀺𑀳𑀺𑀦𑁄𑀧𑀺 𑀚𑀸𑀦𑀦𑁆𑀢𑀺 𑁋 ‘𑀇𑀤𑀁 𑀯𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺. 𑀲𑀘𑁂 𑀫𑀬𑀁 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀥𑀽𑀫𑀓𑀸𑀮𑀺𑀓𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀬𑀸𑀯𑀺𑀫𑁂𑀲𑀁 𑀲𑀢𑁆𑀣𑀸 𑀅𑀝𑁆𑀞𑀸𑀲𑀺 𑀢𑀸𑀯𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀁𑀲𑀼. 𑀬𑀢𑁄 𑀇𑀫𑁂𑀲𑀁 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀤𑀸𑀦𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀦𑁆𑀢𑀻’𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀅𑀧𑁆𑀧𑀜𑁆𑀜𑀢𑁆𑀢𑀁 𑀦𑀧𑁆𑀧𑀜𑁆𑀜𑀧𑁂𑀬𑁆𑀬, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀲𑀦𑁆𑀢𑀫𑁆𑀳𑀸𑀓𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀺𑀳𑀺𑀕𑀢𑀸𑀦𑀺. 𑀕𑀺𑀳𑀺𑀦𑁄𑀧𑀺 𑀚𑀸𑀦𑀦𑁆𑀢𑀺 𑁋 ‘𑀇𑀤𑀁 𑀯𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺. 𑀲𑀘𑁂 𑀫𑀬𑀁 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀥𑀽𑀫𑀓𑀸𑀮𑀺𑀓𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀬𑀸𑀯𑀺𑀫𑁂𑀲𑀁 𑀲𑀢𑁆𑀣𑀸 𑀅𑀝𑁆𑀞𑀸𑀲𑀺 𑀢𑀸𑀯𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀁𑀲𑀼. 𑀬𑀢𑁄 𑀇𑀫𑁂𑀲𑀁 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀤𑀸𑀦𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀦𑁆𑀢𑀻’𑀢𑀺. 𑀲𑀗𑁆𑀖𑁄 𑀅𑀧𑁆𑀧𑀜𑁆𑀜𑀢𑁆𑀢𑀁 𑀦𑀧𑁆𑀧𑀜𑁆𑀜𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀧𑁆𑀧𑀜𑁆𑀜𑀢𑁆𑀢𑀲𑁆𑀲 𑀅𑀧𑁆𑀧𑀜𑁆𑀜𑀸𑀧𑀦𑀸, 𑀧𑀜𑁆𑀜𑀢𑁆𑀢𑀲𑁆𑀲 𑀅𑀲𑀫𑀼𑀘𑁆𑀙𑁂𑀤𑁄, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀦𑀸, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀗𑁆𑀖𑁄 𑀅𑀧𑁆𑀧𑀜𑁆𑀜𑀢𑁆𑀢𑀁 𑀦𑀧𑁆𑀧𑀜𑁆𑀜𑀧𑁂𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁪𑁪𑁩. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀤𑀁 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀼𑀓𑁆𑀓𑀝𑀁, 𑀬𑀁 𑀢𑁆𑀯𑀁 𑀪𑀕𑀯𑀦𑁆𑀢𑀁 𑀦 𑀧𑀼𑀘𑁆𑀙𑀺 𑁋 ‘𑀓𑀢𑀫𑀸𑀦𑀺 𑀧𑀦, 𑀪𑀦𑁆𑀢𑁂, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺. 𑀤𑁂𑀲𑁂𑀳𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀅𑀲𑁆𑀲𑀢𑀺𑀬𑀸 𑀪𑀕𑀯𑀦𑁆𑀢𑀁 𑀦 𑀧𑀼𑀘𑁆𑀙𑀺𑀁 𑁋 ‘𑀓𑀢𑀫𑀸𑀦𑀺 𑀧𑀦, 𑀪𑀦𑁆𑀢𑁂, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’𑀢𑀺. 𑀦𑀸𑀳𑀁 𑀢𑀁 𑀤𑀼𑀓𑁆𑀓𑀝𑀁 𑀧𑀲𑁆𑀲𑀸𑀫𑀺, 𑀅𑀧𑀺 𑀘𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀤𑁆𑀥𑀸𑀬 𑀤𑁂𑀲𑁂𑀫𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀇𑀤𑀫𑁆𑀧𑀺 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀼𑀓𑁆𑀓𑀝𑀁, 𑀬𑀁 𑀢𑁆𑀯𑀁 𑀪𑀕𑀯𑀢𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑀺𑀩𑁆𑀩𑁂𑀲𑀺. 𑀤𑁂𑀲𑁂𑀳𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀦 𑀅𑀕𑀸𑀭𑀯𑁂𑀦 𑀪𑀕𑀯𑀢𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀲𑀺𑀩𑁆𑀩𑁂𑀲𑀺𑀁. 𑀦𑀸𑀳𑀁 𑀢𑀁 𑀤𑀼𑀓𑁆𑀓𑀝𑀁 𑀧𑀲𑁆𑀲𑀸𑀫𑀺, 𑀅𑀧𑀺 𑀘𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀤𑁆𑀥𑀸𑀬 𑀤𑁂𑀲𑁂𑀫𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀇𑀤𑀫𑁆𑀧𑀺 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀼𑀓𑁆𑀓𑀝𑀁, 𑀬𑀁 𑀢𑁆𑀯𑀁 𑀫𑀸𑀢𑀼𑀕𑀸𑀫𑁂𑀳𑀺 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀞𑀫𑀁 𑀯𑀦𑁆𑀤𑀸𑀧𑁂𑀲𑀺, 𑀢𑀸𑀲𑀁 𑀭𑁄𑀤𑀦𑁆𑀢𑀻𑀦𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀅𑀲𑁆𑀲𑀼𑀓𑁂𑀦 𑀫𑀓𑁆𑀔𑀺𑀢𑀁. 𑀤𑁂𑀲𑁂𑀳𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. 𑀅𑀳𑀁 𑀔𑁄, 𑀪𑀦𑁆𑀢𑁂 𑁋 𑀫𑀸𑀬𑀺𑀫𑀸𑀲𑀁 [𑀫𑀸𑀬𑀺𑀫𑀸 (𑀲𑀻. 𑀲𑁆𑀬𑀸.)] 𑀯𑀺𑀓𑀸𑀮𑁂 𑀅𑀳𑁂𑀲𑀼𑀦𑁆𑀢𑀺 𑁋 𑀫𑀸𑀢𑀼𑀕𑀸𑀫𑁂𑀳𑀺 𑀪𑀕𑀯𑀢𑁄 𑀲𑀭𑀻𑀭𑀁 𑀧𑀞𑀫𑀁 𑀯𑀦𑁆𑀤𑀸𑀧𑁂𑀲𑀺𑀁. 𑀦𑀸𑀳𑀁 𑀢𑀁 𑀤𑀼𑀓𑁆𑀓𑀝𑀁 𑀧𑀲𑁆𑀲𑀸𑀫𑀺, 𑀅𑀧𑀺 𑀘𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀤𑁆𑀥𑀸𑀬 𑀤𑁂𑀲𑁂𑀫𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀇𑀤𑀫𑁆𑀧𑀺 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀼𑀓𑁆𑀓𑀝𑀁, 𑀬𑀁 𑀢𑁆𑀯𑀁 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂, 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂, 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺 𑁋 ‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁, 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀤𑁂𑀲𑁂𑀳𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺𑀁 𑁋 ‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁, 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀦𑀸𑀳𑀁 𑀢𑀁 𑀤𑀼𑀓𑁆𑀓𑀝𑀁 𑀧𑀲𑁆𑀲𑀸𑀫𑀺, 𑀅𑀧𑀺 𑀘𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀤𑁆𑀥𑀸𑀬 𑀤𑁂𑀲𑁂𑀫𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀇𑀤𑀫𑁆𑀧𑀺 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀼𑀓𑁆𑀓𑀝𑀁 𑀬𑀁 𑀢𑁆𑀯𑀁 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑁆𑀚𑀁 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺. 𑀤𑁂𑀲𑁂𑀳𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺. ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀅𑀬𑀁 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻 𑀪𑀕𑀯𑀢𑁄 𑀫𑀸𑀢𑀼𑀘𑁆𑀙𑀸 𑀆𑀧𑀸𑀤𑀺𑀓𑀸 𑀧𑁄𑀲𑀺𑀓𑀸 𑀔𑀻𑀭𑀲𑁆𑀲 𑀤𑀸𑀬𑀺𑀓𑀸 𑀪𑀕𑀯𑀦𑁆𑀢𑀁 𑀚𑀦𑁂𑀢𑁆𑀢𑀺𑀬𑀸 𑀓𑀸𑀮𑀗𑁆𑀓𑀢𑀸𑀬 𑀣𑀜𑁆𑀜𑀁 𑀧𑀸𑀬𑁂𑀲𑀻𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑁆𑀚𑀁 𑀉𑀲𑁆𑀲𑀼𑀓𑁆𑀓𑀁 𑀅𑀓𑀸𑀲𑀺𑀁. 𑀦𑀸𑀳𑀁 𑀢𑀁 𑀤𑀼𑀓𑁆𑀓𑀝𑀁 𑀧𑀲𑁆𑀲𑀸𑀫𑀺, 𑀅𑀧𑀺 𑀘𑀸𑀬𑀲𑁆𑀫𑀦𑁆𑀢𑀸𑀦𑀁 𑀲𑀤𑁆𑀥𑀸𑀬 𑀤𑁂𑀲𑁂𑀫𑀺 𑀢𑀁 𑀤𑀼𑀓𑁆𑀓𑀝’’𑀦𑁆𑀢𑀺.

𑁪𑁪𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀧𑀼𑀭𑀸𑀡𑁄 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀭𑀸𑀡𑁄 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀥𑀫𑁆𑀫𑁂 𑀘 𑀯𑀺𑀦𑀬𑁂 𑀘 𑀲𑀗𑁆𑀕𑀻𑀢𑁂 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀭𑀸𑀚𑀕𑀳𑀁 𑀬𑁂𑀦 𑀯𑁂𑀴𑀼𑀯𑀦𑀁 𑀓𑀮𑀦𑁆𑀤𑀓𑀦𑀺𑀯𑀸𑀧𑁄 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀧𑀼𑀭𑀸𑀡𑀁 𑀣𑁂𑀭𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘𑀼𑀁 𑁋 ‘‘𑀣𑁂𑀭𑁂𑀳𑀺, 𑀆𑀯𑀼𑀲𑁄 𑀧𑀼𑀭𑀸𑀡, 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀲𑀗𑁆𑀕𑀻𑀢𑁄. 𑀉𑀧𑁂𑀳𑀺 𑀢𑀁 𑀲𑀗𑁆𑀕𑀻𑀢𑀺’’𑀦𑁆𑀢𑀺. ‘‘𑀲𑀼𑀲𑀗𑁆𑀕𑀻𑀢𑀸𑀯𑀼𑀲𑁄, 𑀣𑁂𑀭𑁂𑀳𑀺 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘. 𑀅𑀧𑀺𑀘 𑀬𑀣𑁂𑀯 𑀫𑀬𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀣𑁂𑀯𑀸𑀳𑀁 𑀥𑀸𑀭𑁂𑀲𑁆𑀲𑀸𑀫𑀻’’𑀢𑀺.

𑁩. 𑀩𑁆𑀭𑀳𑁆𑀫𑀤𑀡𑁆𑀟𑀓𑀣𑀸

𑁪𑁪𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀸 𑀫𑀁, 𑀪𑀦𑁆𑀢𑁂, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀏𑀯𑀫𑀸𑀳 𑁋 ‘𑀢𑁂𑀦 𑀳𑀸𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀁 𑀆𑀡𑀸𑀧𑁂𑀢𑀽’’’𑀢𑀺. ‘‘𑀧𑀼𑀘𑁆𑀙𑀺 𑀧𑀦 𑀢𑁆𑀯𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀦𑁆𑀢𑀁 𑁋 ‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀤𑀡𑁆𑀟𑁄’’’𑀢𑀺? ‘‘𑀧𑀼𑀘𑁆𑀙𑀺𑀁 𑀔𑁄𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑁋 ‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀤𑀡𑁆𑀟𑁄’’’𑀢𑀺? ‘‘𑀙𑀦𑁆𑀦𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀬𑀁 𑀇𑀘𑁆𑀙𑁂𑀬𑁆𑀬 𑀢𑀁 𑀯𑀤𑁂𑀬𑁆𑀬. 𑀪𑀺𑀓𑁆𑀔𑀽𑀳𑀺 𑀙𑀦𑁆𑀦𑁄 𑀪𑀺𑀓𑁆𑀔𑀼 𑀦𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀑𑀯𑀤𑀺𑀢𑀩𑁆𑀩𑁄, 𑀦𑀸𑀦𑀼𑀲𑀸𑀲𑀺𑀢𑀩𑁆𑀩𑁄’’𑀢𑀺. ‘‘𑀢𑁂𑀦 𑀳𑀸𑀯𑀼𑀲𑁄 𑀆𑀦𑀦𑁆𑀤, 𑀢𑁆𑀯𑀁𑀬𑁂𑀯 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀁 𑀆𑀡𑀸𑀧𑁂𑀳𑀻’’𑀢𑀺. ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀙𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑀁 𑀆𑀡𑀸𑀧𑁂𑀫𑀺, 𑀘𑀡𑁆𑀟𑁄 𑀲𑁄 𑀪𑀺𑀓𑁆𑀔𑀼 𑀨𑀭𑀼𑀲𑁄’’𑀢𑀺? ‘𑀢𑁂𑀦 𑀳𑀸𑀯𑀼𑀲𑁄 𑀆𑀦𑀦𑁆𑀤, 𑀩𑀳𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀸𑀳𑀻’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀦𑀸𑀯𑀸𑀬 𑀉𑀚𑁆𑀚𑀯𑀦𑀺𑀓𑀸𑀬 𑀓𑁄𑀲𑀫𑁆𑀩𑀺𑀁 𑀉𑀚𑁆𑀚𑀯𑀺, 𑀦𑀸𑀯𑀸𑀬 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 [𑀉𑀢𑁂𑀦𑀲𑁆𑀲 (𑀓.)] 𑀉𑀬𑁆𑀬𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀉𑀤𑁂𑀦𑁄 𑀉𑀬𑁆𑀬𑀸𑀦𑁂 𑀧𑀭𑀺𑀘𑀸𑀭𑁂𑀲𑀺 𑀲𑀤𑁆𑀥𑀺𑀁 𑀑𑀭𑁄𑀥𑁂𑀦. 𑀅𑀲𑁆𑀲𑁄𑀲𑀺 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑁄 𑁋 ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀆𑀘𑀭𑀺𑀬𑁄 𑀅𑀬𑁆𑀬𑁄 𑀆𑀦𑀦𑁆𑀤𑁄 𑀉𑀬𑁆𑀬𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄’’𑀢𑀺. 𑀅𑀣 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑁄 𑀭𑀸𑀚𑀸𑀦𑀁 𑀉𑀤𑁂𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀳𑀸𑀓𑀁 𑀓𑀺𑀭, 𑀤𑁂𑀯, 𑀆𑀘𑀭𑀺𑀬𑁄 𑀅𑀬𑁆𑀬𑁄 𑀆𑀦𑀦𑁆𑀤𑁄 𑀉𑀬𑁆𑀬𑀸𑀦𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄. 𑀇𑀘𑁆𑀙𑀸𑀫 𑀫𑀬𑀁, 𑀤𑁂𑀯, 𑀅𑀬𑁆𑀬𑀁 𑀆𑀦𑀦𑁆𑀤𑀁 𑀧𑀲𑁆𑀲𑀺𑀢𑀼’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂 𑀲𑀫𑀡𑀁 𑀆𑀦𑀦𑁆𑀤𑀁 𑀧𑀲𑁆𑀲𑀣𑀸’’𑀢𑀺.

𑀅𑀣 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑁄 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑀲𑀢𑀸𑀦𑀺 𑀧𑀸𑀤𑀸𑀲𑀺. 𑀅𑀣 𑀔𑁄 𑀭𑀜𑁆𑀜𑁄 𑀉𑀤𑁂𑀦𑀲𑁆𑀲 𑀑𑀭𑁄𑀥𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀉𑀤𑁂𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀭𑀸𑀚𑀸 𑀉𑀤𑁂𑀦𑁄 𑀑𑀭𑁄𑀥𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀑𑀭𑁄𑀥𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑀺 𑀦𑀼 𑀔𑁄 𑀢𑀼𑀫𑁆𑀳𑁂 𑀲𑀫𑀡𑀁 𑀆𑀦𑀦𑁆𑀤𑀁 𑀧𑀲𑁆𑀲𑀺𑀢𑁆𑀣𑀸’’𑀢𑀺? ‘‘𑀅𑀧𑀲𑁆𑀲𑀺𑀫𑁆𑀳𑀸 𑀔𑁄 𑀫𑀬𑀁, 𑀤𑁂𑀯, 𑀅𑀬𑁆𑀬𑀁 𑀆𑀦𑀦𑁆𑀤’’𑀦𑁆𑀢𑀺. ‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂 𑀲𑀫𑀡𑀲𑁆𑀲 𑀆𑀦𑀦𑁆𑀤𑀲𑁆𑀲 𑀓𑀺𑀜𑁆𑀘𑀺 𑀅𑀤𑀢𑁆𑀣𑀸’’𑀢𑀺? ‘‘𑀅𑀤𑀫𑁆𑀳𑀸 𑀔𑁄 𑀫𑀬𑀁, 𑀤𑁂𑀯, 𑀅𑀬𑁆𑀬𑀲𑁆𑀲 𑀆𑀦𑀦𑁆𑀤𑀲𑁆𑀲 𑀧𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑀲𑀢𑀸𑀦𑀻’’𑀢𑀺. 𑀭𑀸𑀚𑀸 𑀉𑀤𑁂𑀦𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑁄 𑀆𑀦𑀦𑁆𑀤𑁄 𑀢𑀸𑀯 𑀩𑀳𑀼𑀁 𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑁆𑀲𑀢𑀺! 𑀤𑀼𑀲𑁆𑀲𑀯𑀸𑀡𑀺𑀚𑁆𑀚𑀁 𑀯𑀸 𑀲𑀫𑀡𑁄 𑀆𑀦𑀦𑁆𑀤𑁄 𑀓𑀭𑀺𑀲𑁆𑀲𑀢𑀺, 𑀧𑀕𑁆𑀕𑀸𑀳𑀺𑀓𑀲𑀸𑀮𑀁 𑀯𑀸 𑀧𑀲𑀸𑀭𑁂𑀲𑁆𑀲𑀢𑀻’’𑀢𑀺!

𑀅𑀣 𑀔𑁄 𑀭𑀸𑀚𑀸 𑀉𑀤𑁂𑀦𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀉𑀤𑁂𑀦𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑀸 𑀦𑀼 𑀔𑁆𑀯𑀺𑀥, 𑀪𑁄 𑀆𑀦𑀦𑁆𑀤, 𑀅𑀫𑁆𑀳𑀸𑀓𑀁 𑀑𑀭𑁄𑀥𑁄’’𑀢𑀺? ‘‘𑀆𑀕𑀫𑀸𑀲𑀺 𑀔𑁄 𑀢𑁂 𑀇𑀥, 𑀫𑀳𑀸𑀭𑀸𑀚, 𑀑𑀭𑁄𑀥𑁄’’𑀢𑀺. ‘‘𑀅𑀧𑀺 𑀧𑀦 𑀪𑁄𑀢𑁄 𑀆𑀦𑀦𑁆𑀤𑀲𑁆𑀲 𑀓𑀺𑀜𑁆𑀘𑀺 𑀅𑀤𑀸𑀲𑀻’’𑀢𑀺? ‘‘𑀅𑀤𑀸𑀲𑀺 𑀔𑁄 𑀫𑁂, 𑀫𑀳𑀸𑀭𑀸𑀚, 𑀧𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑀲𑀢𑀸𑀦𑀻’’𑀢𑀺. ‘‘𑀓𑀺𑀁 𑀧𑀦 𑀪𑀯𑀁 𑀆𑀦𑀦𑁆𑀤𑁄 𑀢𑀸𑀯 𑀩𑀳𑀼𑀁 𑀘𑀻𑀯𑀭𑀁 𑀓𑀭𑀺𑀲𑁆𑀲𑀢𑀻’’𑀢𑀺? ‘‘𑀬𑁂 [𑀬𑁂 𑀧𑀦 (𑀓.)] 𑀢𑁂, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽 𑀤𑀼𑀩𑁆𑀩𑀮𑀘𑀻𑀯𑀭𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀬𑀸𑀦𑀺 𑀔𑁄 𑀧𑀦, 𑀪𑁄 𑀆𑀦𑀦𑁆𑀤, 𑀧𑁄𑀭𑀸𑀡𑀓𑀸𑀦𑀺 𑀤𑀼𑀩𑁆𑀩𑀮𑀘𑀻𑀯𑀭𑀸𑀦𑀺 𑀢𑀸𑀦𑀺 𑀓𑀣𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀸𑀦𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀢𑁆𑀣𑀭𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑀸𑀦𑀺 𑀧𑀦, 𑀪𑁄 𑀆𑀦𑀦𑁆𑀤, 𑀧𑁄𑀭𑀸𑀡𑀓𑀸𑀦𑀺 𑀉𑀢𑁆𑀢𑀭𑀢𑁆𑀣𑀭𑀡𑀸𑀦𑀺 𑀢𑀸𑀦𑀺 𑀓𑀣𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀸𑀦𑀺, 𑀫𑀳𑀸𑀭𑀸𑀚, 𑀪𑀺𑀲𑀺𑀘𑁆𑀙𑀯𑀺𑀬𑁄 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑀸 𑀧𑀦, 𑀪𑁄 𑀆𑀦𑀦𑁆𑀤, 𑀧𑁄𑀭𑀸𑀡𑀓𑀸 𑀪𑀺𑀲𑀺𑀘𑁆𑀙𑀯𑀺𑀬𑁄 𑀢𑀸 𑀓𑀣𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀸, 𑀫𑀳𑀸𑀭𑀸𑀚, 𑀪𑀽𑀫𑀢𑁆𑀣𑀭𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑀸𑀦𑀺 𑀧𑀦, 𑀪𑁄 𑀆𑀦𑀦𑁆𑀤, 𑀧𑁄𑀭𑀸𑀡𑀓𑀸𑀦𑀺 𑀪𑀽𑀫𑀢𑁆𑀣𑀭𑀡𑀸𑀦𑀺 𑀢𑀸𑀦𑀺 𑀓𑀣𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀸𑀦𑀺, 𑀫𑀳𑀸𑀭𑀸𑀚, 𑀧𑀸𑀤𑀧𑀼𑀜𑁆𑀙𑀦𑀺𑀬𑁄 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑀸 𑀧𑀦, 𑀪𑁄 𑀆𑀦𑀦𑁆𑀤, 𑀧𑁄𑀭𑀸𑀡𑀓𑀸 𑀧𑀸𑀤𑀧𑀼𑀜𑁆𑀙𑀦𑀺𑀬𑁄 𑀢𑀸 𑀓𑀣𑀁 𑀓𑀭𑀺𑀲𑁆𑀲𑀣𑀸’’𑀢𑀺?. ‘‘𑀢𑀸, 𑀫𑀳𑀸𑀭𑀸𑀚, 𑀭𑀚𑁄𑀳𑀭𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀬𑀸𑀦𑀺 𑀧𑀦, 𑀪𑁄 𑀆𑀦𑀦𑁆𑀤, 𑀧𑁄𑀭𑀸𑀡𑀓𑀸𑀦𑀺 𑀭𑀚𑁄𑀳𑀭𑀡𑀸𑀦𑀺 𑀢𑀸𑀦𑀺 𑀓𑀣𑀁 𑀓𑀭𑀺𑀲𑁆𑀲𑀣𑀸’’𑀢𑀺? ‘‘𑀢𑀸𑀦𑀺, 𑀫𑀳𑀸𑀭𑀸𑀚, 𑀓𑁄𑀝𑁆𑀝𑁂𑀢𑁆𑀯𑀸 𑀘𑀺𑀓𑁆𑀔𑀮𑁆𑀮𑁂𑀦 𑀫𑀤𑁆𑀤𑀺𑀢𑁆𑀯𑀸 𑀧𑀭𑀺𑀪𑀡𑁆𑀟𑀁 𑀮𑀺𑀫𑁆𑀧𑀺𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀭𑀸𑀚𑀸 𑀉𑀤𑁂𑀦𑁄 𑁋 𑀲𑀩𑁆𑀩𑁂𑀯𑀺𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀬𑁄𑀦𑀺𑀲𑁄 𑀉𑀧𑀦𑁂𑀦𑁆𑀢𑀺, 𑀦 𑀓𑀼𑀮𑀯𑀁 𑀕𑀫𑁂𑀦𑁆𑀢𑀻𑀢𑀺 𑁋 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀜𑁆𑀜𑀸𑀦𑀺𑀧𑀺 𑀧𑀜𑁆𑀘 𑀤𑀼𑀲𑁆𑀲𑀲𑀢𑀸𑀦𑀺 𑀧𑀸𑀤𑀸𑀲𑀺. 𑀅𑀬𑀜𑁆𑀘𑀭𑀳𑀺 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀞𑀫𑀁 𑀘𑀻𑀯𑀭𑀪𑀺𑀓𑁆𑀔𑀸 𑀉𑀧𑁆𑀧𑀚𑁆𑀚𑀺 𑀘𑀻𑀯𑀭𑀲𑀳𑀲𑁆𑀲𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀖𑁄𑀲𑀺𑀢𑀸𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑀤𑀯𑁄𑀘 𑁋 ‘‘𑀲𑀗𑁆𑀖𑁂𑀦 𑀢𑁂, 𑀆𑀯𑀼𑀲𑁄 𑀙𑀦𑁆𑀦, 𑀩𑁆𑀭𑀳𑁆𑀫𑀤𑀡𑁆𑀟𑁄 𑀆𑀡𑀸𑀧𑀺𑀢𑁄’’𑀢𑀺.

‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀤𑀡𑁆𑀟𑁄 𑀆𑀡𑀸𑀧𑀺𑀢𑁄’’𑀢𑀺? ‘‘𑀢𑁆𑀯𑀁, 𑀆𑀯𑀼𑀲𑁄 𑀙𑀦𑁆𑀦, 𑀪𑀺𑀓𑁆𑀔𑀽 𑀬𑀁 𑀇𑀘𑁆𑀙𑁂𑀬𑁆𑀬𑀸𑀲𑀺 𑀢𑀁 𑀯𑀤𑁂𑀬𑁆𑀬𑀸𑀲𑀺. 𑀪𑀺𑀓𑁆𑀔𑀽𑀳𑀺 𑀢𑁆𑀯𑀁 𑀦𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀑𑀯𑀤𑀺𑀢𑀩𑁆𑀩𑁄, 𑀦𑀸𑀦𑀼𑀲𑀸𑀲𑀺𑀢𑀩𑁆𑀩𑁄’’𑀢𑀺. ‘‘𑀦𑀦𑁆𑀯𑀸𑀳𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀳𑀢𑁄 𑀏𑀢𑁆𑀢𑀸𑀯𑀢𑀸, 𑀬𑀢𑁄𑀳𑀁 𑀪𑀺𑀓𑁆𑀔𑀽𑀳𑀺 𑀦𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀑𑀯𑀤𑀺𑀢𑀩𑁆𑀩𑁄, 𑀦𑀸𑀦𑀼𑀲𑀸𑀲𑀺𑀢𑀩𑁆𑀩𑁄’’𑀢𑀺 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑁄 𑀧𑀧𑀢𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀩𑁆𑀭𑀳𑁆𑀫𑀤𑀡𑁆𑀟𑁂𑀦 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀘 𑀧𑀦𑀸𑀬𑀲𑁆𑀫𑀸 𑀙𑀦𑁆𑀦𑁄 𑀅𑀭𑀳𑀢𑀁 𑀅𑀳𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀙𑀦𑁆𑀦𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀳𑀺 𑀤𑀸𑀦𑀺 𑀫𑁂, 𑀪𑀦𑁆𑀢𑁂 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀤𑀡𑁆𑀟’’𑀦𑁆𑀢𑀺. ‘‘𑀬𑀤𑀕𑁆𑀕𑁂𑀦 𑀢𑀬𑀸, 𑀆𑀯𑀼𑀲𑁄 𑀙𑀦𑁆𑀦, 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁 𑀢𑀤𑀕𑁆𑀕𑁂𑀦 𑀢𑁂 𑀩𑁆𑀭𑀳𑁆𑀫𑀤𑀡𑁆𑀟𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄’’𑀢𑀺. 𑀇𑀫𑀸𑀬 𑀔𑁄 𑀧𑀦 𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀅𑀬𑀁 𑀯𑀺𑀦𑀬𑀲𑀗𑁆𑀕𑀻𑀢𑀺 ‘‘𑀧𑀜𑁆𑀘𑀲𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑁄 𑀏𑀓𑀸𑀤𑀲𑀫𑁄.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀢𑁂𑀯𑀻𑀲𑀢𑀺.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀫𑁆𑀩𑀼𑀤𑁆𑀥𑁂, 𑀣𑁂𑀭𑁄 𑀓𑀲𑁆𑀲𑀧𑀲𑀯𑁆𑀳𑀬𑁄;

𑀆𑀫𑀦𑁆𑀢𑀬𑀺 𑀪𑀺𑀓𑁆𑀔𑀼𑀕𑀡𑀁, 𑀲𑀤𑁆𑀥𑀫𑁆𑀫𑀫𑀦𑀼𑀧𑀸𑀮𑀓𑁄;

𑀧𑀸𑀯𑀸𑀬𑀤𑁆𑀥𑀸𑀦𑀫𑀕𑁆𑀕𑀫𑁆𑀳𑀺, 𑀲𑀼𑀪𑀤𑁆𑀤𑁂𑀦 𑀧𑀯𑁂𑀤𑀺𑀢𑀁;

𑀲𑀗𑁆𑀕𑀸𑀬𑀺𑀲𑁆𑀲𑀸𑀫 𑀲𑀤𑁆𑀥𑀫𑁆𑀫𑀁, 𑀅𑀥𑀫𑁆𑀫𑁄 𑀧𑀼𑀭𑁂 𑀤𑀺𑀧𑁆𑀧𑀢𑀺.

𑀏𑀓𑁂𑀦𑀽𑀦 𑀧𑀜𑁆𑀘𑀲𑀢𑀁, 𑀆𑀦𑀦𑁆𑀤𑀫𑁆𑀧𑀺 𑀘 𑀉𑀘𑁆𑀘𑀺𑀦𑀺;

𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀻𑀢𑀺𑀁, 𑀯𑀲𑀦𑁆𑀢𑁄 𑀕𑀼𑀳𑀫𑀼𑀢𑁆𑀢𑀫𑁂.

𑀉𑀧𑀸𑀮𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑀺, 𑀲𑀼𑀢𑁆𑀢𑀦𑁆𑀢𑀸𑀦𑀦𑁆𑀤𑀧𑀡𑁆𑀟𑀺𑀢𑀁;

𑀧𑀺𑀝𑀓𑀁 𑀢𑀻𑀡𑀺 𑀲𑀗𑁆𑀕𑀻𑀢𑀺𑀁, 𑀅𑀓𑀁𑀲𑀼 𑀚𑀺𑀦𑀲𑀸𑀯𑀓𑀸.

𑀦 𑀧𑀼𑀘𑁆𑀙𑀺 𑀅𑀓𑁆𑀓𑀫𑀺𑀢𑁆𑀯𑀸𑀦, 𑀯𑀦𑁆𑀤𑀸𑀧𑁂𑀲𑀺 𑀦 𑀬𑀸𑀘𑀺 𑀘.

𑀧𑀩𑁆𑀩𑀚𑁆𑀚𑀁 𑀫𑀸𑀢𑀼𑀕𑀸𑀫𑀲𑁆𑀲, 𑀲𑀤𑁆𑀥𑀸𑀬 𑀤𑀼𑀓𑁆𑀓𑀝𑀸𑀦𑀺 𑀫𑁂;

𑀧𑀼𑀭𑀸𑀡𑁄 𑀩𑁆𑀭𑀳𑁆𑀫𑀤𑀡𑁆𑀟𑀜𑁆𑀘, 𑀑𑀭𑁄𑀥𑁄 𑀉𑀤𑁂𑀦𑁂𑀦 𑀲𑀳.

𑀢𑀸𑀯 𑀩𑀳𑀼 𑀤𑀼𑀩𑁆𑀩𑀮𑀜𑁆𑀘, 𑀉𑀢𑁆𑀢𑀭𑀢𑁆𑀣𑀭𑀡𑀸 𑀪𑀺𑀲𑀺;

𑀪𑀽𑀫𑀢𑁆𑀣𑀭𑀡𑀸 𑀧𑀼𑀜𑁆𑀙𑀦𑀺𑀬𑁄, 𑀭𑀚𑁄 𑀘𑀺𑀓𑁆𑀔𑀮𑁆𑀮𑀫𑀤𑁆𑀤𑀦𑀸.

𑀲𑀳𑀲𑁆𑀲𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀺, 𑀧𑀞𑀫𑀸𑀦𑀦𑁆𑀤𑀲𑀯𑁆𑀳𑀬𑁄;

𑀢𑀚𑁆𑀚𑀺𑀢𑁄 𑀩𑁆𑀭𑀳𑁆𑀫𑀤𑀡𑁆𑀟𑁂𑀦, 𑀘𑀢𑀼𑀲𑁆𑀲𑀘𑁆𑀘𑀁 𑀅𑀧𑀸𑀧𑀼𑀡𑀺;

𑀯𑀲𑀻𑀪𑀽𑀢𑀸 𑀧𑀜𑁆𑀘𑀲𑀢𑀸, 𑀢𑀲𑁆𑀫𑀸 𑀧𑀜𑁆𑀘𑀲𑀢𑀻 𑀇𑀢𑀺.

𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀁 𑀦𑀺𑀝𑁆𑀞𑀺𑀢𑀁.