𑁧𑁨. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀁

𑁧. 𑀧𑀞𑀫𑀪𑀸𑀡𑀯𑀸𑀭𑁄

𑁪𑁪𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑀺 𑁋 𑀓𑀧𑁆𑀧𑀢𑀺 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀕𑀸𑀫𑀦𑁆𑀢𑀭𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀯𑀸𑀲𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀦𑀼𑀫𑀢𑀺𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀘𑀺𑀡𑁆𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀫𑀣𑀺𑀢𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀚𑀴𑁄𑀕𑀺𑀁 𑀧𑀸𑀢𑀼𑀁, 𑀓𑀧𑁆𑀧𑀢𑀺 𑀅𑀤𑀲𑀓𑀁 𑀦𑀺𑀲𑀻𑀤𑀦𑀁, 𑀓𑀧𑁆𑀧𑀢𑀺 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑀚𑁆𑀚𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀤𑀳𑀼𑀧𑁄𑀲𑀣𑁂 𑀓𑀁𑀲𑀧𑀸𑀢𑀺𑀁 [𑀓𑀁𑀲𑀘𑀸𑀝𑀺𑀁 (𑀲𑁆𑀬𑀸.)] 𑀉𑀤𑀓𑁂𑀦 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀞𑀧𑁂𑀢𑁆𑀯𑀸 𑀆𑀕𑀢𑀸𑀕𑀢𑁂 𑀯𑁂𑀲𑀸𑀮𑀺𑀓𑁂 𑀉𑀧𑀸𑀲𑀓𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀤𑁂𑀣𑀸𑀯𑀼𑀲𑁄, 𑀲𑀗𑁆𑀖𑀲𑁆𑀲 𑀓𑀳𑀸𑀧𑀡𑀫𑁆𑀧𑀺 𑀅𑀟𑁆𑀠𑀫𑁆𑀧𑀺 𑀧𑀸𑀤𑀫𑁆𑀧𑀺 𑀫𑀸𑀲𑀓𑀭𑀽𑀧𑀫𑁆𑀧𑀺. 𑀪𑀯𑀺𑀲𑁆𑀲𑀢𑀺 𑀲𑀗𑁆𑀖𑀲𑁆𑀲 𑀧𑀭𑀺𑀓𑁆𑀔𑀸𑀭𑁂𑀦 𑀓𑀭𑀡𑀻𑀬’’𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀓𑁂 𑀉𑀧𑀸𑀲𑀓𑁂 𑀏𑀢𑀤𑀯𑁄𑀘 𑁋 ‘‘𑀫𑀸𑀯𑀼𑀲𑁄, 𑀅𑀤𑀢𑁆𑀣 𑀲𑀗𑁆𑀖𑀲𑁆𑀲 𑀓𑀳𑀸𑀧𑀡𑀫𑁆𑀧𑀺 𑀅𑀟𑁆𑀠𑀫𑁆𑀧𑀺 𑀧𑀸𑀤𑀫𑁆𑀧𑀺 𑀫𑀸𑀲𑀓𑀭𑀽𑀧𑀫𑁆𑀧𑀺. 𑀦 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀲𑀸𑀤𑀺𑀬𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀧𑁂𑀢𑀚𑀸𑀢𑀭𑀽𑀧𑀭𑀚𑀢𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀯𑁂𑀲𑀸𑀮𑀺𑀓𑀸 𑀉𑀧𑀸𑀲𑀓𑀸 𑀆𑀬𑀲𑁆𑀫𑀢𑀸 𑀬𑀲𑁂𑀦 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁂𑀦 𑀯𑀼𑀘𑁆𑀘𑀫𑀸𑀦𑀸 𑀅𑀤𑀁𑀲𑀼𑀬𑁂𑀯 𑀲𑀗𑁆𑀖𑀲𑁆𑀲 𑀓𑀳𑀸𑀧𑀡𑀫𑁆𑀧𑀺 𑀅𑀟𑁆𑀠𑀫𑁆𑀧𑀺 𑀧𑀸𑀤𑀫𑁆𑀧𑀺 𑀫𑀸𑀲𑀓𑀭𑀽𑀧𑀫𑁆𑀧𑀺.

𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀢𑀁 𑀳𑀺𑀭𑀜𑁆𑀜𑀁 𑀪𑀺𑀓𑁆𑀔𑀕𑁆𑀕𑁂𑀦 [𑀪𑀺𑀓𑁆𑀔𑀼𑀕𑁆𑀕𑁂𑀦 (𑀲𑁆𑀬𑀸.)] 𑀧𑀝𑀺𑀯𑀻𑀲𑀁 [𑀧𑀝𑀺𑀯𑀺𑀁𑀲𑀁 (𑀲𑀻.), 𑀧𑀝𑀺𑀯𑀺𑀲𑀁 (𑀲𑁆𑀬𑀸.)] 𑀞𑀧𑁂𑀢𑁆𑀯𑀸 𑀪𑀸𑀚𑁂𑀲𑀼𑀁. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀬𑀲𑀁 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀲𑁄 𑀢𑁂, 𑀆𑀯𑀼𑀲𑁄 𑀬𑀲, 𑀳𑀺𑀭𑀜𑁆𑀜𑀲𑁆𑀲 𑀧𑀝𑀺𑀯𑀻𑀲𑁄’’𑀢𑀺. ‘‘𑀦𑀢𑁆𑀣𑀺, 𑀫𑁂 𑀆𑀯𑀼𑀲𑁄, 𑀳𑀺𑀭𑀜𑁆𑀜𑀲𑁆𑀲 𑀧𑀝𑀺𑀯𑀻𑀲𑁄, 𑀦𑀸𑀳𑀁 𑀳𑀺𑀭𑀜𑁆𑀜𑀁 𑀲𑀸𑀤𑀺𑀬𑀸𑀫𑀻’’𑀢𑀺. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑁋 ‘‘𑀅𑀬𑀁 𑀆𑀯𑀼𑀲𑁄 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀉𑀧𑀸𑀲𑀓𑁂 𑀲𑀤𑁆𑀥𑁂 𑀧𑀲𑀦𑁆𑀦𑁂 𑀅𑀓𑁆𑀓𑁄𑀲𑀢𑀺, 𑀧𑀭𑀺𑀪𑀸𑀲𑀢𑀺, 𑀅𑀧𑁆𑀧𑀲𑀸𑀤𑀁 𑀓𑀭𑁄𑀢𑀺; 𑀳𑀦𑁆𑀤𑀲𑁆𑀲 𑀫𑀬𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺 𑀢𑁂. 𑀢𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀓𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀓𑁂 𑀯𑀚𑁆𑀚𑀺𑀧𑀼𑀢𑁆𑀢𑀓𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀢𑀸, 𑀆𑀯𑀼𑀲𑁄, 𑀧𑀜𑁆𑀜𑀢𑁆𑀢𑀁 𑁋 ‘𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑁄 𑀤𑀸𑀢𑀩𑁆𑀩𑁄’𑀢𑀺. 𑀤𑁂𑀣 𑀫𑁂, 𑀆𑀯𑀼𑀲𑁄, 𑀅𑀦𑀼𑀤𑀽𑀢𑀁 𑀪𑀺𑀓𑁆𑀔𑀼’’𑀦𑁆𑀢𑀺.

𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀲𑁆𑀲 𑀅𑀦𑀼𑀤𑀽𑀢𑀁 𑀅𑀤𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀯𑁂𑀲𑀸𑀮𑀺𑀁 𑀧𑀯𑀺𑀲𑀺𑀢𑁆𑀯𑀸 𑀯𑁂𑀲𑀸𑀮𑀺𑀓𑁂 𑀉𑀧𑀸𑀲𑀓𑁂 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀓𑀺𑀭𑀸𑀬𑀲𑁆𑀫𑀦𑁆𑀢𑁂 𑀉𑀧𑀸𑀲𑀓𑁂 𑀲𑀤𑁆𑀥𑁂 𑀧𑀲𑀦𑁆𑀦𑁂 𑀅𑀓𑁆𑀓𑁄𑀲𑀸𑀫𑀺, 𑀧𑀭𑀺𑀪𑀸𑀲𑀸𑀫𑀺, 𑀅𑀧𑁆𑀧𑀲𑀸𑀤𑀁 𑀓𑀭𑁄𑀫𑀺; 𑀬𑁄𑀳𑀁 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀯𑀤𑀸𑀫𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀯𑀤𑀸𑀫𑀺.

𑁪𑁪𑁭. ‘‘𑀏𑀓𑀫𑀺𑀤𑀁, 𑀆𑀯𑀼𑀲𑁄, 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄, 𑀆𑀯𑀼𑀲𑁄, 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 [𑀅. 𑀦𑀺. 𑁪.𑁫𑁦] ‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀩𑁆𑀪𑀁, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀺. 𑀫𑀳𑀺𑀓𑀸, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺, 𑀥𑀽𑀫𑀭𑀚𑁄, 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀭𑀸𑀳𑀼, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀺𑀦𑁆𑀤𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄𑀫𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀭𑀁 𑀧𑀺𑀯𑀦𑁆𑀢𑀺, 𑀫𑁂𑀭𑀬𑀁 𑀧𑀺𑀯𑀦𑁆𑀢𑀺, 𑀲𑀼𑀭𑀸𑀫𑁂𑀭𑀬𑀧𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀢𑀸 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀺, 𑀫𑁂𑀣𑀼𑀦𑀥𑀫𑁆𑀫𑀸 𑀅𑀧𑁆𑀧𑀝𑀺𑀯𑀺𑀭𑀢𑀸 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀦𑁆𑀢𑀺, 𑀚𑀸𑀢𑀭𑀽𑀧𑀭𑀚𑀢𑀧𑁆𑀧𑀝𑀺𑀕𑁆𑀕𑀳𑀡𑀸 𑀅𑀧𑁆𑀧𑀝𑀺𑀯𑀺𑀭𑀢𑀸 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺; 𑀫𑀺𑀘𑁆𑀙𑀸𑀚𑀻𑀯𑀸 𑀅𑀧𑁆𑀧𑀝𑀺𑀯𑀺𑀭𑀢𑀸 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄, 𑀬𑁂𑀦 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀢𑀧𑀦𑁆𑀢𑀺, 𑀦 𑀪𑀸𑀲𑀦𑁆𑀢𑀺, 𑀦 𑀯𑀺𑀭𑁄𑀘𑀦𑁆𑀢𑀺’. ‘‘𑀇𑀤𑀫𑀯𑁄𑀘𑀸𑀯𑀼𑀲𑁄, 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀭𑀸𑀕𑀤𑁄𑀲𑀧𑀭𑀺𑀓𑁆𑀮𑀺𑀝𑁆𑀞𑀸, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀅𑀯𑀺𑀚𑁆𑀚𑀸𑀦𑀺𑀯𑀼𑀝𑀸 [𑀅𑀯𑀺𑀚𑁆𑀚𑀸𑀦𑀻𑀯𑀼𑀢𑀸 (𑀲𑁆𑀬𑀸.)] 𑀧𑁄𑀲𑀸, 𑀧𑀺𑀬𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑁄.

‘‘𑀲𑀼𑀭𑀁 𑀧𑀺𑀯𑀦𑁆𑀢𑀺 𑀫𑁂𑀭𑀬𑀁, 𑀧𑀝𑀺𑀲𑁂𑀯𑀦𑁆𑀢𑀺 𑀫𑁂𑀣𑀼𑀦𑀁;

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀲𑀸𑀤𑀺𑀬𑀦𑁆𑀢𑀺 𑀅𑀯𑀺𑀤𑁆𑀤𑀲𑀽.

‘‘𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀦𑁆𑀢𑀺, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀏𑀢𑁂 𑀉𑀧𑀓𑁆𑀓𑀺𑀮𑁂𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

‘‘𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀦 𑀢𑀧𑀦𑁆𑀢𑀺 𑀦 𑀪𑀸𑀲𑀦𑁆𑀢𑀺, 𑀅𑀲𑀼𑀤𑁆𑀥𑀸 𑀲𑀭𑀚𑀸 𑀫𑀕𑀸.

‘‘𑀅𑀦𑁆𑀥𑀓𑀸𑀭𑁂𑀦 𑀑𑀦𑀤𑁆𑀥𑀸, 𑀢𑀡𑁆𑀳𑀸𑀤𑀸𑀲𑀸 𑀲𑀦𑁂𑀢𑁆𑀢𑀺𑀓𑀸;

𑀯𑀟𑁆𑀠𑁂𑀦𑁆𑀢𑀺 𑀓𑀝𑀲𑀺𑀁 𑀖𑁄𑀭𑀁, 𑀆𑀤𑀺𑀬𑀦𑁆𑀢𑀺 𑀧𑀼𑀦𑀩𑁆𑀪𑀯𑀦𑁆𑀢𑀺.

‘‘𑀏𑀯𑀁𑀯𑀸𑀤𑀻 𑀓𑀺𑀭𑀸𑀳𑀁 𑀆𑀬𑀲𑁆𑀫𑀦𑁆𑀢𑁂 𑀉𑀧𑀸𑀲𑀓𑁂 𑀲𑀤𑁆𑀥𑁂 𑀧𑀲𑀦𑁆𑀦𑁂 𑀅𑀓𑁆𑀓𑁄𑀲𑀸𑀫𑀺, 𑀧𑀭𑀺𑀪𑀸𑀲𑀸𑀫𑀺, 𑀅𑀧𑁆𑀧𑀲𑀸𑀤𑀁 𑀓𑀭𑁄𑀫𑀺; 𑀬𑁄𑀳𑀁 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀯𑀤𑀸𑀫𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀯𑀤𑀸𑀫𑀺.

𑁪𑁪𑁮. [𑀲𑀁. 𑀦𑀺. 𑁪.𑁩𑁬𑁨 𑀇𑀤𑀁 𑀯𑀢𑁆𑀣𑀼 𑀆𑀕𑀢𑀁] ‘‘𑀏𑀓𑀫𑀺𑀤𑀁, 𑀆𑀯𑀼𑀲𑁄, 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀦𑁆𑀢𑁂𑀧𑀼𑀭𑁂 𑀭𑀸𑀚𑀧𑀭𑀺𑀲𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀓𑀣𑀸 𑀉𑀤𑀧𑀸𑀤𑀺 𑁋 ‘𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀚𑀸𑀢𑀭𑀽𑀧𑀭𑀚𑀢𑀁; 𑀲𑀸𑀤𑀺𑀬𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢’𑀦𑁆𑀢𑀺. 𑀢𑁂𑀦 𑀔𑁄 𑀧𑀦𑀸𑀯𑀼𑀲𑁄 𑀲𑀫𑀬𑁂𑀦, 𑀫𑀡𑀺𑀘𑀽𑀴𑀓𑁄 𑀕𑀸𑀫𑀡𑀻 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄, 𑀆𑀯𑀼𑀲𑁄, 𑀫𑀡𑀺𑀘𑀽𑀴𑀓𑁄 𑀕𑀸𑀫𑀡𑀻 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘 𑁋 ‘𑀫𑀸 𑀅𑀬𑁆𑀬𑀸 𑀏𑀯𑀁 𑀅𑀯𑀘𑀼𑀢𑁆𑀣. 𑀦 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀲𑀸𑀤𑀺𑀬𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀧𑁂𑀢𑀚𑀸𑀢𑀭𑀽𑀧𑀭𑀚𑀢𑀸’𑀢𑀺. 𑀅𑀲𑀓𑁆𑀔𑀺 𑀔𑁄, 𑀆𑀯𑀼𑀲𑁄, 𑀫𑀡𑀺𑀘𑀽𑀴𑀓𑁄 𑀕𑀸𑀫𑀡𑀻 𑀢𑀁 𑀧𑀭𑀺𑀲𑀁 𑀲𑀜𑁆𑀜𑀸𑀧𑁂𑀢𑀼𑀁.

‘‘𑀅𑀣 𑀔𑁄, 𑀆𑀯𑀼𑀲𑁄, 𑀫𑀡𑀺𑀘𑀽𑀴𑀓𑁄 𑀕𑀸𑀫𑀡𑀻 𑀢𑀁 𑀧𑀭𑀺𑀲𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀆𑀯𑀼𑀲𑁄, 𑀫𑀡𑀺𑀘𑀽𑀴𑀓𑁄 𑀕𑀸𑀫𑀡𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘𑀇𑀥, 𑀪𑀦𑁆𑀢𑁂, 𑀭𑀸𑀚𑀦𑁆𑀢𑁂𑀧𑀼𑀭𑁂 𑀭𑀸𑀚𑀧𑀭𑀺𑀲𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀓𑀣𑀸 𑀉𑀤𑀧𑀸𑀤𑀺 𑁋 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀚𑀸𑀢𑀭𑀽𑀧𑀭𑀚𑀢𑀁; 𑀲𑀸𑀤𑀺𑀬𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁 𑀪𑀦𑁆𑀢𑁂, 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘𑀁 𑁋 𑀫𑀸 𑀅𑀬𑁆𑀬𑀸 𑀏𑀯𑀁 𑀅𑀯𑀘𑀼𑀢𑁆𑀣. 𑀦 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀲𑀸𑀤𑀺𑀬𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀧𑁂𑀢𑀚𑀸𑀢𑀭𑀽𑀧𑀭𑀚𑀢𑀸𑀢𑀺. 𑀅𑀲𑀓𑁆𑀔𑀺𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀁 𑀧𑀭𑀺𑀲𑀁 𑀲𑀜𑁆𑀜𑀸𑀧𑁂𑀢𑀼𑀁. 𑀓𑀘𑁆𑀘𑀸𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑀫𑀸𑀦𑁄 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀪𑀕𑀯𑀢𑁄 𑀳𑁄𑀫𑀺, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀸𑀫𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀫𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀻’𑀢𑀺? ‘𑀢𑀕𑁆𑀖 𑀢𑁆𑀯𑀁, 𑀕𑀸𑀫𑀡𑀺, 𑀏𑀯𑀁 𑀩𑁆𑀬𑀸𑀓𑀭𑀫𑀸𑀦𑁄 𑀯𑀼𑀢𑁆𑀢𑀯𑀸𑀤𑀻 𑀘𑁂𑀯 𑀫𑁂 𑀳𑁄𑀲𑀺; 𑀦 𑀘 𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀲𑀺 [𑀧𑀸𑀭𑀸. 𑁫𑁮𑁨], 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀲𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺. 𑀦 𑀳𑀺, 𑀕𑀸𑀫𑀡𑀺, 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀲𑀸𑀤𑀺𑀬𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀚𑀸𑀢𑀭𑀽𑀧𑀭𑀚𑀢𑀁; 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀅𑀧𑁂𑀢𑀚𑀸𑀢𑀭𑀽𑀧𑀭𑀚𑀢𑀸. 𑀬𑀲𑁆𑀲 𑀔𑁄, 𑀕𑀸𑀫𑀡𑀺, 𑀚𑀸𑀢𑀭𑀽𑀧𑀭𑀚𑀢𑀁 𑀓𑀧𑁆𑀧𑀢𑀺, 𑀧𑀜𑁆𑀘𑀧𑀺 𑀢𑀲𑁆𑀲 𑀓𑀸𑀫𑀕𑀼𑀡𑀸 𑀓𑀧𑁆𑀧𑀦𑁆𑀢𑀺. 𑀬𑀲𑁆𑀲 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀧𑁆𑀧𑀦𑁆𑀢𑀺 𑀏𑀓𑀁𑀲𑁂𑀦𑁂𑀢𑀁, 𑀕𑀸𑀫𑀡𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 𑀅𑀲𑁆𑀲𑀫𑀡𑀥𑀫𑁆𑀫𑁄 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀥𑀫𑁆𑀫𑁄𑀢𑀺. 𑀅𑀧𑀺 𑀘𑀸𑀳𑀁, 𑀕𑀸𑀫𑀡𑀺, 𑀏𑀯𑀁 𑀯𑀤𑀸𑀫𑀺 𑀢𑀺𑀡𑀁 𑀢𑀺𑀡𑀢𑁆𑀣𑀺𑀓𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀁; 𑀤𑀸𑀭𑀼 𑀤𑀸𑀭𑀼𑀢𑁆𑀣𑀺𑀓𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀁; 𑀲𑀓𑀝𑀁 𑀲𑀓𑀝𑀢𑁆𑀣𑀺𑀓𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀁; 𑀧𑀼𑀭𑀺𑀲𑁄 𑀧𑀼𑀭𑀺𑀲𑀢𑁆𑀣𑀺𑀓𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀦 𑀢𑁆𑀯𑁂𑀯𑀸𑀳𑀁, 𑀕𑀸𑀫𑀡𑀺, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀢𑀩𑁆𑀩𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻’𑀢𑀺.

‘‘𑀏𑀯𑀁𑀯𑀸𑀤𑀻 𑀓𑀺𑀭𑀸𑀳𑀁 𑀆𑀬𑀲𑁆𑀫𑀦𑁆𑀢𑁂 𑀉𑀧𑀸𑀲𑀓𑁂 𑀲𑀤𑁆𑀥𑁂 𑀧𑀲𑀦𑁆𑀦𑁂 𑀅𑀓𑁆𑀓𑁄𑀲𑀸𑀫𑀺, 𑀧𑀭𑀺𑀪𑀸𑀲𑀸𑀫𑀺, 𑀅𑀧𑁆𑀧𑀲𑀸𑀤𑀁 𑀓𑀭𑁄𑀫𑀺; 𑀬𑁄𑀳𑀁 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀯𑀤𑀸𑀫𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀯𑀤𑀸𑀫𑀺.

𑁪𑁪𑁯. ‘‘𑀏𑀓𑀫𑀺𑀤𑀁, 𑀆𑀯𑀼𑀲𑁄, 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀆𑀬𑀲𑁆𑀫𑀦𑁆𑀢𑀁 𑀉𑀧𑀦𑀦𑁆𑀤𑀁 𑀲𑀓𑁆𑀬𑀧𑀼𑀢𑁆𑀢𑀁 𑀆𑀭𑀩𑁆𑀪 𑀚𑀸𑀢𑀭𑀽𑀧𑀭𑀚𑀢𑀁 𑀧𑀝𑀺𑀓𑁆𑀔𑀺𑀧𑀺, 𑀲𑀺𑀓𑁆𑀔𑀸𑀧𑀤𑀜𑁆𑀘 𑀧𑀜𑁆𑀜𑀧𑁂𑀲𑀺. 𑀏𑀯𑀁𑀯𑀸𑀤𑀻 𑀓𑀺𑀭𑀸𑀳𑀁 𑀆𑀬𑀲𑁆𑀫𑀦𑁆𑀢𑁂 𑀉𑀧𑀸𑀲𑀓𑁂 𑀲𑀤𑁆𑀥𑁂 𑀧𑀲𑀦𑁆𑀦𑁂 𑀅𑀓𑁆𑀓𑁄𑀲𑀸𑀫𑀺, 𑀧𑀭𑀺𑀪𑀸𑀲𑀸𑀫𑀺, 𑀅𑀧𑁆𑀧𑀲𑀸𑀤𑀁 𑀓𑀭𑁄𑀫𑀺; 𑀬𑁄𑀳𑀁 𑀅𑀥𑀫𑁆𑀫𑀁 𑀅𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀯𑀤𑀸𑀫𑀺, 𑀅𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀯𑀤𑀸𑀫𑀺, 𑀯𑀺𑀦𑀬𑀁 𑀯𑀺𑀦𑀬𑁄𑀢𑀺 𑀯𑀤𑀸𑀫𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀯𑁂𑀲𑀸𑀮𑀺𑀓𑀸 𑀉𑀧𑀸𑀲𑀓𑀸 𑀆𑀬𑀲𑁆𑀫𑀦𑁆𑀢𑀁 𑀬𑀲𑀁 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀓𑁄𑀯 𑀪𑀦𑁆𑀢𑁂, 𑀅𑀬𑁆𑀬𑁄 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀲𑀩𑁆𑀩𑁂𑀯𑀺𑀫𑁂 𑀅𑀲𑁆𑀲𑀫𑀡𑀸 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀸. 𑀯𑀲𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁. 𑀫𑀬𑀁 𑀅𑀬𑁆𑀬𑀲𑁆𑀲 𑀬𑀲𑀲𑁆𑀲 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀓𑁂 𑀉𑀧𑀸𑀲𑀓𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀆𑀭𑀸𑀫𑀁 𑀅𑀕𑀫𑀸𑀲𑀺.

𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀅𑀦𑀼𑀤𑀽𑀢𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀔𑀫𑀸𑀧𑀺𑀢𑀸𑀯𑀼𑀲𑁄, 𑀬𑀲𑁂𑀦 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁂𑀦 𑀯𑁂𑀲𑀸𑀮𑀺𑀓𑀸 𑀉𑀧𑀸𑀲𑀓𑀸’’𑀢𑀺? ‘‘𑀉𑀧𑀸𑀲𑀓𑁂𑀳𑀺 𑀧𑀸𑀧𑀺𑀓𑀁 𑀦𑁄, 𑀆𑀯𑀼𑀲𑁄, 𑀓𑀢𑀁. 𑀏𑀓𑁄𑀯 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀓𑀢𑁄. 𑀲𑀩𑁆𑀩𑁂𑀯 𑀫𑀬𑀁 𑀅𑀲𑁆𑀲𑀫𑀡𑀸 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀓𑀢𑀸’’𑀢𑀺. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑁋 ‘‘𑀅𑀬𑀁, 𑀆𑀯𑀼𑀲𑁄, 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀅𑀫𑁆𑀳𑁂𑀳𑀺 𑀅𑀲𑀫𑁆𑀫𑀢𑁄 𑀕𑀺𑀳𑀻𑀦𑀁 𑀧𑀓𑀸𑀲𑁂𑀲𑀺; 𑀳𑀦𑁆𑀤𑀲𑁆𑀲 𑀫𑀬𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀫𑀸’’𑀢𑀺. 𑀢𑁂 𑀢𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀧𑀘𑁆𑀘𑀼𑀝𑁆𑀞𑀸𑀲𑀺.

𑁪𑁫𑁦. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀧𑀸𑀯𑁂𑀬𑁆𑀬𑀓𑀸𑀦𑀜𑁆𑀘 [𑀧𑀸𑀞𑁂𑀬𑁆𑀬𑀓𑀸𑀦𑀜𑁆𑀘 (𑀲𑁆𑀬𑀸.)] 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀆𑀕𑀘𑁆𑀙𑀦𑁆𑀢𑀼 𑀆𑀬𑀲𑁆𑀫𑀦𑁆𑀢𑀸; 𑀇𑀫𑀁 𑀅𑀥𑀺𑀓𑀭𑀡𑀁 𑀆𑀤𑀺𑀬𑀺𑀲𑁆𑀲𑀸𑀫. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀅𑀯𑀺𑀦𑀬𑁄 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺; 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀅𑀳𑁄𑀕𑀗𑁆𑀕𑁂 𑀧𑀩𑁆𑀩𑀢𑁂 𑀧𑀝𑀺𑀯𑀲𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀬𑁂𑀦 𑀅𑀳𑁄𑀕𑀗𑁆𑀕𑁄 𑀧𑀩𑁆𑀩𑀢𑁄, 𑀬𑁂𑀦𑀸𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀫𑁆𑀪𑀽𑀢𑀁 𑀲𑀸𑀡𑀯𑀸𑀲𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀲𑀫𑁆𑀪𑀽𑀢𑀁 𑀲𑀸𑀡𑀯𑀸𑀲𑀺𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑁂, 𑀪𑀦𑁆𑀢𑁂, 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑀺 𑁋 𑀓𑀧𑁆𑀧𑀢𑀺 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀕𑀸𑀫𑀦𑁆𑀢𑀭𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀯𑀸𑀲𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀦𑀼𑀫𑀢𑀺𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀘𑀺𑀡𑁆𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀫𑀣𑀺𑀢𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀚𑀴𑁄𑀕𑀺𑀁 𑀧𑀸𑀢𑀼𑀁, 𑀓𑀧𑁆𑀧𑀢𑀺 𑀅𑀤𑀲𑀓𑀁 𑀦𑀺𑀲𑀻𑀤𑀦𑀁, 𑀓𑀧𑁆𑀧𑀢𑀺 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺. 𑀳𑀦𑁆𑀤 𑀫𑀬𑀁, 𑀪𑀦𑁆𑀢𑁂, 𑀇𑀫𑀁 𑀅𑀥𑀺𑀓𑀭𑀡𑀁 𑀆𑀤𑀺𑀬𑀺𑀲𑁆𑀲𑀸𑀫. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀅𑀯𑀺𑀦𑀬𑁄 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺; 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀲𑀝𑁆𑀞𑀺𑀫𑀢𑁆𑀢𑀸 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽 𑁋 𑀲𑀩𑁆𑀩𑁂 𑀆𑀭𑀜𑁆𑀜𑀺𑀓𑀸, 𑀲𑀩𑁆𑀩𑁂 𑀧𑀺𑀡𑁆𑀟𑀧𑀸𑀢𑀺𑀓𑀸, 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸, 𑀲𑀩𑁆𑀩𑁂 𑀢𑁂𑀘𑀻𑀯𑀭𑀺𑀓𑀸, 𑀲𑀩𑁆𑀩𑁂𑀯 𑀅𑀭𑀳𑀦𑁆𑀢𑁄 𑁋 𑀅𑀳𑁄𑀕𑀗𑁆𑀕𑁂 𑀧𑀩𑁆𑀩𑀢𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀝𑁆𑀞𑀸𑀲𑀻𑀢𑀺𑀫𑀢𑁆𑀢𑀸 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑀓𑀸 𑀪𑀺𑀓𑁆𑀔𑀽 𑁋 𑀅𑀧𑁆𑀧𑁂𑀓𑀘𑁆𑀘𑁂 𑀆𑀭𑀜𑁆𑀜𑀺𑀓𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀺𑀡𑁆𑀟𑀧𑀸𑀢𑀺𑀓𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀁𑀲𑀼𑀓𑀽𑀮𑀺𑀓𑀸, 𑀅𑀧𑁆𑀧𑁂𑀓𑀘𑁆𑀘𑁂 𑀢𑁂𑀘𑀻𑀯𑀭𑀺𑀓𑀸, 𑀲𑀩𑁆𑀩𑁂𑀯 𑀅𑀭𑀳𑀦𑁆𑀢𑁄 𑁋 𑀅𑀳𑁄𑀕𑀗𑁆𑀕𑁂 𑀧𑀩𑁆𑀩𑀢𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀦𑁆𑀢𑀬𑀫𑀸𑀦𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀜𑁆𑀘, 𑀯𑀸𑀴𑀜𑁆𑀘; 𑀓𑀁 𑀦𑀼 𑀔𑁄 𑀫𑀬𑀁 𑀧𑀓𑁆𑀔𑀁 𑀮𑀪𑁂𑀬𑁆𑀬𑀸𑀫, 𑀬𑁂𑀦 𑀫𑀬𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀩𑀮𑀯𑀦𑁆𑀢𑀢𑀭𑀸 𑀅𑀲𑁆𑀲𑀸𑀫𑀸’’𑀢𑀺.

𑁪𑁫𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑁄𑀭𑁂𑀬𑁆𑀬𑁂 𑀧𑀝𑀺𑀯𑀲𑀢𑀺 𑁋 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑁄𑀭𑁂𑀬𑁆𑀬𑁂 𑀧𑀝𑀺𑀯𑀲𑀢𑀺 𑁋 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀘𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀧𑀓𑁆𑀔𑀁 𑀮𑀪𑀺𑀲𑁆𑀲𑀸𑀫, 𑀏𑀯𑀁 𑀫𑀬𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀩𑀮𑀯𑀦𑁆𑀢𑀢𑀭𑀸 𑀅𑀲𑁆𑀲𑀸𑀫𑀸’’𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑁋 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑁋 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀦𑁆𑀢𑀬𑀫𑀸𑀦𑀸𑀦𑀁. 𑀲𑀼𑀢𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀜𑁆𑀘 𑀯𑀸𑀴𑀜𑁆𑀘. 𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁 𑀬𑁄𑀳𑀁 𑀏𑀯𑀭𑀽𑀧𑁂 𑀅𑀥𑀺𑀓𑀭𑀡𑁂 𑀑𑀲𑀓𑁆𑀓𑁂𑀬𑁆𑀬𑀁. 𑀇𑀤𑀸𑀦𑀺 𑀘 𑀧𑀦 𑀢𑁂 𑀪𑀺𑀓𑁆𑀔𑀽 𑀆𑀕𑀘𑁆𑀙𑀺𑀲𑁆𑀲𑀦𑁆𑀢𑀺. 𑀲𑁄𑀳𑀁 𑀢𑁂𑀳𑀺 𑀆𑀓𑀺𑀡𑁆𑀡𑁄 𑀦 𑀨𑀸𑀲𑀼 𑀕𑀫𑀺𑀲𑁆𑀲𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀧𑀝𑀺𑀓𑀘𑁆𑀘𑁂𑀯 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑁄𑀭𑁂𑀬𑁆𑀬𑀸 𑀲𑀗𑁆𑀓𑀲𑁆𑀲𑀁 𑀅𑀕𑀫𑀸𑀲𑀺.

𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀲𑁄𑀭𑁂𑀬𑁆𑀬𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁 𑀆𑀬𑀲𑁆𑀫𑀸 𑀭𑁂𑀯𑀢𑁄’’𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀲𑀸𑀬𑀲𑁆𑀫𑀸 𑀭𑁂𑀯𑀢𑁄 𑀲𑀗𑁆𑀓𑀲𑁆𑀲𑀁 𑀕𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑀗𑁆𑀓𑀲𑁆𑀲𑀸 𑀓𑀡𑁆𑀡𑀓𑀼𑀚𑁆𑀚𑀁 [𑀓𑀦𑁆𑀦𑀓𑀼𑀚𑁆𑀚𑀁 (𑀲𑀻.)] 𑀅𑀕𑀫𑀸𑀲𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀲𑀗𑁆𑀓𑀲𑁆𑀲𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁 𑀆𑀬𑀲𑁆𑀫𑀸 𑀭𑁂𑀯𑀢𑁄’’𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀲𑀸𑀬𑀲𑁆𑀫𑀸 𑀭𑁂𑀯𑀢𑁄 𑀓𑀡𑁆𑀡𑀓𑀼𑀚𑁆𑀚𑀁 𑀕𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀓𑀡𑁆𑀡𑀓𑀼𑀚𑁆𑀚𑀸 𑀉𑀤𑀼𑀫𑁆𑀩𑀭𑀁 𑀅𑀕𑀫𑀸𑀲𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀓𑀡𑁆𑀡𑀓𑀼𑀚𑁆𑀚𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁 𑀆𑀬𑀲𑁆𑀫𑀸 𑀭𑁂𑀯𑀢𑁄’’𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀲𑀸𑀬𑀲𑁆𑀫𑀸 𑀭𑁂𑀯𑀢𑁄 𑀉𑀤𑀼𑀫𑁆𑀩𑀭𑀁 𑀕𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀉𑀤𑀼𑀫𑁆𑀩𑀭𑀸 𑀅𑀕𑁆𑀕𑀴𑀧𑀼𑀭𑀁 𑀅𑀕𑀫𑀸𑀲𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀉𑀤𑀼𑀫𑁆𑀩𑀭𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁 𑀆𑀬𑀲𑁆𑀫𑀸 𑀭𑁂𑀯𑀢𑁄’’𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀲𑀸𑀬𑀲𑁆𑀫𑀸 𑀭𑁂𑀯𑀢𑁄 𑀅𑀕𑁆𑀕𑀴𑀧𑀼𑀭𑀁 𑀕𑀢𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀅𑀕𑁆𑀕𑀴𑀧𑀼𑀭𑀸 𑀲𑀳𑀚𑀸𑀢𑀺𑀁 [𑀲𑀳𑀁𑀚𑀸𑀢𑀺𑀁 (𑀓.)] 𑀅𑀕𑀫𑀸𑀲𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀅𑀕𑁆𑀕𑀴𑀧𑀼𑀭𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀳𑀁 𑀆𑀬𑀲𑁆𑀫𑀸 𑀭𑁂𑀯𑀢𑁄’’𑀢𑀺? 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀏𑀲𑀸𑀬𑀲𑁆𑀫𑀸 𑀭𑁂𑀯𑀢𑁄 𑀲𑀳𑀚𑀸𑀢𑀺𑀁 𑀕𑀢𑁄’’𑀢𑀺. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀲𑀳𑀚𑀸𑀢𑀺𑀬𑀁 𑀲𑀫𑁆𑀪𑀸𑀯𑁂𑀲𑀼𑀁.

𑁪𑁫𑁨. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀆𑀬𑀲𑁆𑀫𑀦𑁆𑀢𑀁 𑀬𑀲𑀁 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀘𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫, 𑀧𑀝𑀺𑀩𑀮𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀏𑀓𑁂𑀦𑁂𑀯 𑀧𑀜𑁆𑀳𑁂𑀦 𑀲𑀓𑀮𑀫𑁆𑀧𑀺 𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑀼𑀁. 𑀇𑀤𑀸𑀦𑀺 𑀘 𑀧𑀦𑀸𑀬𑀲𑁆𑀫𑀸 𑀭𑁂𑀯𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 [𑀅𑀦𑁆𑀢𑁂𑀯𑀸𑀲𑀺𑀁 (𑀲𑁆𑀬𑀸.)] 𑀲𑀭𑀪𑀸𑀡𑀓𑀁 𑀪𑀺𑀓𑁆𑀔𑀼𑀁 𑀅𑀚𑁆𑀛𑁂𑀲𑀺𑀲𑁆𑀲𑀢𑀺. 𑀲𑁄 𑀢𑁆𑀯𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀆𑀬𑀲𑁆𑀫𑀢𑁄 𑀲𑀫𑁆𑀪𑀽𑀢𑀲𑁆𑀲 𑀲𑀸𑀡𑀯𑀸𑀲𑀺𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀲𑀭𑀪𑀸𑀡𑀓𑀁 𑀪𑀺𑀓𑁆𑀔𑀼𑀁 𑀅𑀚𑁆𑀛𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀬𑁂𑀦𑀸𑀬𑀲𑁆𑀫𑀸 𑀭𑁂𑀯𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀲𑀺𑀗𑁆𑀕𑀺𑀦𑀸 𑀮𑁄𑀡𑀁 𑀧𑀭𑀺𑀳𑀭𑀺𑀢𑀼𑀁 𑁋 𑀬𑀢𑁆𑀣 𑀅𑀮𑁄𑀡𑀓𑀁 𑀪𑀯𑀺𑀲𑁆𑀲𑀢𑀺 𑀢𑀢𑁆𑀣 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀤𑁆𑀯𑀗𑁆𑀕𑀼𑀮𑀸𑀬 𑀙𑀸𑀬𑀸𑀬 𑀯𑀻𑀢𑀺𑀯𑀢𑁆𑀢𑀸𑀬, 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀕𑀸𑀫𑀦𑁆𑀢𑀭𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀕𑀸𑀫𑀦𑁆𑀢𑀭𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂 𑁋 𑀇𑀤𑀸𑀦𑀺 𑀕𑀸𑀫𑀦𑁆𑀢𑀭𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑁋 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀆𑀯𑀸𑀲𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀆𑀯𑀸𑀲𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀸 𑀲𑀫𑀸𑀦𑀲𑀻𑀫𑀸 𑀦𑀸𑀦𑀼𑀧𑁄𑀲𑀣𑀁 𑀓𑀸𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀅𑀦𑀼𑀫𑀢𑀺𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀅𑀦𑀼𑀫𑀢𑀺𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀸𑀢𑀼𑀁 𑁋 𑀆𑀕𑀢𑁂 𑀪𑀺𑀓𑁆𑀔𑀽 𑀅𑀦𑀼𑀫𑀸𑀦𑁂𑀲𑁆𑀲𑀸𑀫𑀸’’𑀢𑀺 [𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀸𑀢𑀺, 𑀅𑀦𑀼𑀚𑀸𑀦𑁂𑀲𑁆𑀲𑀸𑀫𑀸𑀢𑀺, 𑀅𑀦𑀼𑀫𑀢𑀺𑀁 𑀆𑀦𑁂𑀲𑁆𑀲𑀸𑀫𑀸𑀢𑀺 (𑀓.)]? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀆𑀘𑀺𑀡𑁆𑀡𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀆𑀘𑀺𑀡𑁆𑀡𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀇𑀤𑀁 𑀫𑁂 𑀉𑀧𑀚𑁆𑀛𑀸𑀬𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑀁, 𑀇𑀤𑀁 𑀫𑁂 𑀆𑀘𑀭𑀺𑀬𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑀁, 𑀢𑀁 𑀅𑀚𑁆𑀛𑀸𑀘𑀭𑀺𑀢𑀼’’𑀦𑁆𑀢𑀺? ‘‘𑀆𑀘𑀺𑀡𑁆𑀡𑀓𑀧𑁆𑀧𑁄 𑀔𑁄, 𑀆𑀯𑀼𑀲𑁄, 𑀏𑀓𑀘𑁆𑀘𑁄 𑀓𑀧𑁆𑀧𑀢𑀺, 𑀏𑀓𑀘𑁆𑀘𑁄 𑀦 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀅𑀫𑀣𑀺𑀢𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀅𑀫𑀣𑀺𑀢𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀬𑀁 𑀢𑀁 𑀔𑀻𑀭𑀁 𑀔𑀻𑀭𑀪𑀸𑀯𑀁 𑀯𑀺𑀚𑀳𑀺𑀢𑀁, 𑀅𑀲𑀫𑁆𑀧𑀢𑁆𑀢𑀁 𑀤𑀥𑀺𑀪𑀸𑀯𑀁, 𑀢𑀁 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀧𑀸𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀚𑀴𑁄𑀕𑀺𑀁 𑀧𑀸𑀢𑀼’’𑀦𑁆𑀢𑀺? ‘‘𑀓𑀸 𑀲𑀸, 𑀆𑀯𑀼𑀲𑁄, 𑀚𑀴𑁄𑀕𑀻’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀬𑀸 𑀲𑀸 𑀲𑀼𑀭𑀸 𑀆𑀲𑀼𑀢𑀸, 𑀅𑀲𑀫𑁆𑀧𑀢𑁆𑀢𑀸 𑀫𑀚𑁆𑀚𑀪𑀸𑀯𑀁, 𑀲𑀸 𑀧𑀸𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀅𑀤𑀲𑀓𑀁 𑀦𑀺𑀲𑀻𑀤𑀦’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀚𑀸𑀢𑀭𑀽𑀧𑀭𑀚𑀢’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. ‘‘𑀇𑀫𑁂, 𑀪𑀦𑁆𑀢𑁂, 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑀺. 𑀳𑀦𑁆𑀤 𑀫𑀬𑀁, 𑀪𑀦𑁆𑀢𑁂, 𑀇𑀫𑀁 𑀅𑀥𑀺𑀓𑀭𑀡𑀁 𑀆𑀤𑀺𑀬𑀺𑀲𑁆𑀲𑀸𑀫. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀅𑀯𑀺𑀦𑀬𑁄 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀺; 𑀧𑀼𑀭𑁂 𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺; 𑀅𑀯𑀺𑀦𑀬𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀆𑀬𑀲𑁆𑀫𑀢𑁄 𑀬𑀲𑀲𑁆𑀲 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁨. 𑀤𑀼𑀢𑀺𑀬𑀪𑀸𑀡𑀯𑀸𑀭𑁄

𑁪𑁫𑁩. 𑀅𑀲𑁆𑀲𑁄𑀲𑀼𑀁 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑁋 ‘‘𑀬𑀲𑁄 𑀓𑀺𑀭 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀇𑀤𑀁 𑀅𑀥𑀺𑀓𑀭𑀡𑀁 𑀆𑀤𑀺𑀬𑀺𑀢𑀼𑀓𑀸𑀫𑁄 𑀧𑀓𑁆𑀔𑀁 𑀧𑀭𑀺𑀬𑁂𑀲𑀢𑀺, 𑀮𑀪𑀢𑀺 𑀘 𑀓𑀺𑀭 𑀧𑀓𑁆𑀔’’𑀦𑁆𑀢𑀺. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸𑀦𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀔𑁄 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀜𑁆𑀘 𑀯𑀸𑀴𑀜𑁆𑀘. 𑀓𑀁 𑀦𑀼 𑀔𑁄 𑀫𑀬𑀁 𑀧𑀓𑁆𑀔𑀁 𑀮𑀪𑁂𑀬𑁆𑀬𑀸𑀫, 𑀬𑁂𑀦 𑀫𑀬𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀩𑀮𑀯𑀦𑁆𑀢𑀢𑀭𑀸 𑀅𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸𑀦𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄. 𑀲𑀘𑁂 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀧𑀓𑁆𑀔𑀁 𑀮𑀪𑁂𑀬𑁆𑀬𑀸𑀫, 𑀏𑀯𑀁 𑀫𑀬𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀩𑀮𑀯𑀦𑁆𑀢𑀢𑀭𑀸 𑀅𑀲𑁆𑀲𑀸𑀫𑀸’’𑀢𑀺.

𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀳𑀽𑀢𑀁 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀬𑀸𑀤𑁂𑀲𑀼𑀁 𑁋 𑀧𑀢𑁆𑀢𑀫𑁆𑀧𑀺, 𑀘𑀻𑀯𑀭𑀫𑁆𑀧𑀺, 𑀦𑀺𑀲𑀻𑀤𑀦𑀫𑁆𑀧𑀺, 𑀲𑀽𑀘𑀺𑀖𑀭𑀫𑁆𑀧𑀺, 𑀓𑀸𑀬𑀩𑀦𑁆𑀥𑀦𑀫𑁆𑀧𑀺, 𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺, 𑀥𑀫𑁆𑀫𑀓𑀭𑀡𑀫𑁆𑀧𑀺. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑀆𑀤𑀸𑀬 𑀦𑀸𑀯𑀸𑀬 𑀲𑀳𑀚𑀸𑀢𑀺𑀁 𑀉𑀚𑁆𑀚𑀯𑀺𑀁𑀲𑀼; 𑀦𑀸𑀯𑀸𑀬 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀓𑀭𑁄𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀴𑁆𑀳𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀓𑁂 𑀦𑀼 𑀔𑁄 𑀥𑀫𑁆𑀫𑀯𑀸𑀤𑀺𑀦𑁄 𑁋 𑀧𑀸𑀘𑀻𑀦𑀓𑀸 𑀯𑀸 𑀪𑀺𑀓𑁆𑀔𑀽, 𑀧𑀸𑀯𑁂𑀬𑁆𑀬𑀓𑀸 𑀯𑀸’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀴𑁆𑀳𑀲𑁆𑀲, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀘𑁂𑀢𑀲𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲, 𑀏𑀢𑀤𑀳𑁄𑀲𑀺 𑁋 ‘‘𑀅𑀥𑀫𑁆𑀫𑀯𑀸𑀤𑀺𑀦𑁄 𑀧𑀸𑀘𑀻𑀦𑀓𑀸 𑀪𑀺𑀓𑁆𑀔𑀽, 𑀥𑀫𑁆𑀫𑀯𑀸𑀤𑀺𑀦𑁄 𑀧𑀸𑀯𑁂𑀬𑁆𑀬𑀓𑀸 [𑀧𑀸𑀞𑁂𑀬𑁆𑀬𑀓𑀸 (𑀲𑁆𑀬𑀸.)] 𑀪𑀺𑀓𑁆𑀔𑀽’’𑀢𑀺.

𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸 𑀤𑁂𑀯𑀢𑀸 𑀆𑀬𑀲𑁆𑀫𑀢𑁄 𑀲𑀸𑀴𑁆𑀳𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑁆𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼 𑀅𑀦𑁆𑀢𑀭𑀳𑀺𑀢𑀸 𑁋 𑀆𑀬𑀲𑁆𑀫𑀢𑁄 𑀲𑀸𑀴𑁆𑀳𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑀸 𑀤𑁂𑀯𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀴𑁆𑀳𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀪𑀦𑁆𑀢𑁂 𑀲𑀸𑀴𑁆𑀳, 𑀅𑀥𑀫𑁆𑀫𑀯𑀸𑀤𑀻 𑀧𑀸𑀘𑀻𑀦𑀓𑀸 𑀪𑀺𑀓𑁆𑀔𑀽, 𑀥𑀫𑁆𑀫𑀯𑀸𑀤𑀻 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽. 𑀢𑁂𑀦 𑀳𑀺, 𑀪𑀦𑁆𑀢𑁂 𑀲𑀸𑀴𑁆𑀳, 𑀬𑀣𑀸𑀥𑀫𑁆𑀫𑁄 𑀢𑀣𑀸 𑀢𑀺𑀝𑁆𑀞𑀸𑀳𑀻’’𑀢𑀺. ‘‘𑀧𑀼𑀩𑁆𑀩𑁂𑀧𑀺 𑀘𑀸𑀳𑀁, 𑀤𑁂𑀯𑀢𑁂, 𑀏𑀢𑀭𑀳𑀺 𑀘 𑀬𑀣𑀸𑀥𑀫𑁆𑀫𑁄 𑀢𑀣𑀸 𑀞𑀺𑀢𑁄; 𑀅𑀧𑀺 𑀘𑀸𑀳𑀁 𑀦 𑀢𑀸𑀯 𑀤𑀺𑀝𑁆𑀞𑀺𑀁 𑀆𑀯𑀺 𑀓𑀭𑁄𑀫𑀺, 𑀅𑀧𑁆𑀧𑁂𑀯 𑀦𑀸𑀫 𑀫𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺.

𑁪𑁫𑁪. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀢𑀁 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑀆𑀤𑀸𑀬 𑀬𑁂𑀦𑀸𑀬𑀲𑁆𑀫𑀸 𑀭𑁂𑀯𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑁋 𑀧𑀢𑁆𑀢𑀫𑁆𑀧𑀺, 𑀘𑀻𑀯𑀭𑀫𑁆𑀧𑀺, 𑀦𑀺𑀲𑀻𑀤𑀦𑀫𑁆𑀧𑀺, 𑀲𑀽𑀘𑀺𑀖𑀭𑀫𑁆𑀧𑀺, 𑀓𑀸𑀬𑀩𑀦𑁆𑀥𑀦𑀫𑁆𑀧𑀺, 𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺, 𑀥𑀫𑁆𑀫𑀓𑀭𑀡𑀫𑁆𑀧𑀻’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀧𑀭𑀺𑀧𑀼𑀡𑁆𑀡𑀁 𑀫𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀦 𑀇𑀘𑁆𑀙𑀺 𑀧𑀝𑀺𑀕𑁆𑀕𑀳𑁂𑀢𑀼𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀢𑁆𑀢𑀭𑁄 𑀦𑀸𑀫 𑀪𑀺𑀓𑁆𑀔𑀼 𑀯𑀻𑀲𑀢𑀺𑀯𑀲𑁆𑀲𑁄 𑀆𑀬𑀲𑁆𑀫𑀢𑁄 𑀭𑁂𑀯𑀢𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑁂𑀦𑀸𑀬𑀲𑁆𑀫𑀸 𑀉𑀢𑁆𑀢𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀢𑁆𑀢𑀭𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀉𑀢𑁆𑀢𑀭𑁄 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑁋 𑀧𑀢𑁆𑀢𑀫𑁆𑀧𑀺, 𑀘𑀻𑀯𑀭𑀫𑁆𑀧𑀺, 𑀦𑀺𑀲𑀻𑀤𑀦𑀫𑁆𑀧𑀺, 𑀲𑀽𑀘𑀺𑀖𑀭𑀫𑁆𑀧𑀺, 𑀓𑀸𑀬𑀩𑀦𑁆𑀥𑀦𑀫𑁆𑀧𑀺, 𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀺, 𑀥𑀫𑁆𑀫𑀓𑀭𑀡𑀫𑁆𑀧𑀻’’𑀢𑀺. ‘‘𑀅𑀮𑀁, 𑀆𑀯𑀼𑀲𑁄, 𑀧𑀭𑀺𑀧𑀼𑀡𑁆𑀡𑀁 𑀫𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀦 𑀇𑀘𑁆𑀙𑀺 𑀧𑀝𑀺𑀕𑁆𑀕𑀳𑁂𑀢𑀼𑀁. ‘‘𑀫𑀦𑀼𑀲𑁆𑀲𑀸 𑀔𑁄, 𑀆𑀯𑀼𑀲𑁄 𑀉𑀢𑁆𑀢𑀭, 𑀪𑀕𑀯𑀢𑁄 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁 𑀉𑀧𑀦𑀸𑀫𑁂𑀦𑁆𑀢𑀺. 𑀲𑀘𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑁂𑀦𑁂𑀯 𑀢𑁂 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀦𑁄 𑀘𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀬𑀲𑁆𑀫𑀢𑁄 [𑀆𑀬𑀲𑁆𑀫𑀢𑁄 𑀘 (𑀲𑁆𑀬𑀸.)] 𑀆𑀦𑀦𑁆𑀤𑀲𑁆𑀲 𑀉𑀧𑀦𑀸𑀫𑁂𑀦𑁆𑀢𑀺 𑁋 𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀣𑁂𑀭𑁄 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁. 𑀬𑀣𑀸 𑀪𑀕𑀯𑀢𑀸 𑀧𑀝𑀺𑀕𑁆𑀕𑀳𑀺𑀢𑁄, 𑀏𑀯𑀫𑁂𑀯 𑀲𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀲𑁆𑀫𑀸 𑀉𑀢𑁆𑀢𑀭𑁄 𑀲𑀸𑀫𑀡𑀓𑀁 𑀧𑀭𑀺𑀓𑁆𑀔𑀸𑀭𑀁. 𑀬𑀣𑀸 𑀣𑁂𑀭𑁂𑀦 𑀧𑀝𑀺𑀕𑁆𑀕𑀳𑀺𑀢𑁄, 𑀏𑀯𑀫𑁂𑀯 𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀢𑁆𑀢𑀭𑁄 𑀯𑁂𑀲𑀸𑀮𑀺𑀓𑁂𑀳𑀺 𑀯𑀚𑁆𑀚𑀺𑀧𑀼𑀢𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀏𑀓𑀁 𑀘𑀻𑀯𑀭𑀁 𑀅𑀕𑁆𑀕𑀳𑁂𑀲𑀺. ‘‘𑀯𑀤𑁂𑀬𑁆𑀬𑀸𑀣, 𑀆𑀯𑀼𑀲𑁄, 𑀬𑁂𑀦 𑀅𑀢𑁆𑀣𑁄’’𑀢𑀺. ‘‘𑀏𑀢𑁆𑀢𑀓𑀁 𑀆𑀬𑀲𑁆𑀫𑀸 𑀉𑀢𑁆𑀢𑀭𑁄 𑀣𑁂𑀭𑀁 𑀯𑀤𑁂𑀢𑀼; 𑀏𑀢𑁆𑀢𑀓𑀜𑁆𑀘, 𑀪𑀦𑁆𑀢𑁂, 𑀣𑁂𑀭𑁄 𑀲𑀗𑁆𑀖𑀫𑀚𑁆𑀛𑁂 𑀯𑀤𑁂𑀢𑀼 𑁋 ‘𑀧𑀼𑀭𑀢𑁆𑀣𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻 𑀧𑀸𑀘𑀻𑀦𑀓𑀸 𑀪𑀺𑀓𑁆𑀔𑀽, 𑀅𑀥𑀫𑁆𑀫𑀯𑀸𑀤𑀻 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽’’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀉𑀢𑁆𑀢𑀭𑁄 𑀯𑁂𑀲𑀸𑀮𑀺𑀓𑀸𑀦𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀭𑁂𑀯𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑁆𑀢𑀓𑀁, 𑀪𑀦𑁆𑀢𑁂, 𑀣𑁂𑀭𑁄 𑀲𑀗𑁆𑀖𑀫𑀚𑁆𑀛𑁂 𑀯𑀤𑁂𑀢𑀼 𑁋 ‘𑀧𑀼𑀭𑀢𑁆𑀣𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻 𑀧𑀸𑀘𑀻𑀦𑀓𑀸 𑀪𑀺𑀓𑁆𑀔𑀽, 𑀅𑀥𑀫𑁆𑀫𑀯𑀸𑀤𑀻 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽’’’𑀢𑀺. ‘‘𑀅𑀥𑀫𑁆𑀫𑁂 𑀫𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀦𑀺𑀬𑁄𑀚𑁂𑀲𑀻’’𑀢𑀺 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀁 𑀉𑀢𑁆𑀢𑀭𑀁 𑀧𑀡𑀸𑀫𑁂𑀲𑀺.

𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀢𑁆𑀢𑀭𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀁, 𑀆𑀯𑀼𑀲𑁄 𑀉𑀢𑁆𑀢𑀭, 𑀣𑁂𑀭𑁄 𑀆𑀳𑀸’’𑀢𑀺? ‘‘𑀧𑀸𑀧𑀺𑀓𑀁 𑀦𑁄, 𑀆𑀯𑀼𑀲𑁄, 𑀓𑀢𑀁. ‘𑀅𑀥𑀫𑁆𑀫𑁂 𑀫𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀦𑀺𑀬𑁄𑀚𑁂𑀲𑀻’’’𑀢𑀺 𑀣𑁂𑀭𑁄 𑀫𑀁 𑀧𑀡𑀸𑀫𑁂𑀲𑀻𑀢𑀺. ‘‘𑀦𑀦𑀼 𑀢𑁆𑀯𑀁, 𑀆𑀯𑀼𑀲𑁄 [𑀆𑀯𑀼𑀲𑁄 𑀉𑀢𑁆𑀢𑀭 (𑀲𑁆𑀬𑀸. 𑀓𑀁.)], 𑀯𑀼𑀟𑁆𑀠𑁄 𑀯𑀻𑀲𑀢𑀺𑀯𑀲𑁆𑀲𑁄𑀲𑀻’’𑀢𑀺? ‘‘𑀆𑀫𑀸𑀯𑀼𑀲𑁄, 𑀅𑀧𑀺 𑀘 𑀫𑀬𑀁 𑀕𑀭𑀼𑀦𑀺𑀲𑁆𑀲𑀬𑀁 𑀕𑀡𑁆𑀳𑀸𑀫𑀸’’𑀢𑀺.

𑁪𑁫𑁫. 𑀅𑀣 𑀔𑁄 𑀲𑀗𑁆𑀖𑁄 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀓𑀸𑀫𑁄 𑀲𑀦𑁆𑀦𑀺𑀧𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀲𑀘𑁂 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀇𑀥 𑀯𑀽𑀧𑀲𑀫𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀫𑀽𑀮𑀸𑀤𑀸𑀬𑀓𑀸 [𑀫𑀽𑀮𑀤𑀸𑀬𑀓𑀸 (𑀲𑀻.)] 𑀪𑀺𑀓𑁆𑀔𑀽 𑀧𑀼𑀦𑀓𑀫𑁆𑀫𑀸𑀬 𑀉𑀓𑁆𑀓𑁄𑀝𑁂𑀬𑁆𑀬𑀼𑀁. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀬𑀢𑁆𑀣𑁂𑀯𑀺𑀫𑀁 𑀅𑀥𑀺𑀓𑀭𑀡𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀲𑀗𑁆𑀖𑁄 𑀢𑀢𑁆𑀣𑁂𑀯𑀺𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀁 𑀅𑀕𑀫𑀁𑀲𑀼 𑁋 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀓𑀸𑀫𑀸.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀩𑁆𑀩𑀓𑀸𑀫𑀻 𑀦𑀸𑀫 𑀧𑀣𑀩𑁆𑀬𑀸 𑀲𑀗𑁆𑀖𑀢𑁆𑀣𑁂𑀭𑁄 𑀯𑀻𑀲𑀯𑀲𑁆𑀲𑀲𑀢𑀺𑀓𑁄 𑀉𑀧𑀲𑀫𑁆𑀧𑀤𑀸𑀬, 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀯𑁂𑀲𑀸𑀮𑀺𑀬𑀁 𑀧𑀝𑀺𑀯𑀲𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀆𑀬𑀲𑁆𑀫𑀦𑁆𑀢𑀁 𑀲𑀫𑁆𑀪𑀽𑀢𑀁 𑀲𑀸𑀡𑀯𑀸𑀲𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀩𑁆𑀩𑀓𑀸𑀫𑀻 𑀣𑁂𑀭𑁄 𑀯𑀺𑀳𑀭𑀢𑀺, 𑀢𑀁 𑀯𑀺𑀳𑀸𑀭𑀁 𑀉𑀧𑀕𑀘𑁆𑀙𑀸𑀫𑀺. 𑀲𑁄 𑀢𑁆𑀯𑀁 𑀓𑀸𑀮𑀲𑁆𑀲𑁂𑀯 𑀆𑀬𑀲𑁆𑀫𑀦𑁆𑀢𑀁 𑀲𑀩𑁆𑀩𑀓𑀸𑀫𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀧𑀼𑀘𑁆𑀙𑁂𑀬𑁆𑀬𑀸𑀲𑀻’’𑀢𑀺.

‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀆𑀬𑀲𑁆𑀫𑀢𑁄 𑀭𑁂𑀯𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄, 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀩𑁆𑀩𑀓𑀸𑀫𑀻 𑀣𑁂𑀭𑁄 𑀯𑀺𑀳𑀭𑀢𑀺, 𑀢𑀁 𑀯𑀺𑀳𑀸𑀭𑀁 𑀉𑀧𑀕𑀘𑁆𑀙𑀺. 𑀕𑀩𑁆𑀪𑁂 𑀆𑀬𑀲𑁆𑀫𑀢𑁄 𑀲𑀩𑁆𑀩𑀓𑀸𑀫𑀺𑀲𑁆𑀲 𑀲𑁂𑀦𑀸𑀲𑀦𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺, 𑀕𑀩𑁆𑀪𑀧𑁆𑀧𑀫𑀼𑀔𑁂 𑀆𑀬𑀲𑁆𑀫𑀢𑁄 𑀭𑁂𑀯𑀢𑀲𑁆𑀲. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑁋 𑀅𑀬𑀁 𑀣𑁂𑀭𑁄 𑀫𑀳𑀮𑁆𑀮𑀓𑁄 𑀦 𑀦𑀺𑀧𑀚𑁆𑀚𑀢𑀻𑀢𑀺 𑁋 𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀆𑀬𑀲𑁆𑀫𑀸 𑀲𑀩𑁆𑀩𑀓𑀸𑀫𑀻 𑁋 𑀅𑀬𑀁 𑀪𑀺𑀓𑁆𑀔𑀼 𑀆𑀕𑀦𑁆𑀢𑀼𑀓𑁄 𑀓𑀺𑀮𑀦𑁆𑀢𑁄 𑀦 𑀦𑀺𑀧𑀚𑁆𑀚𑀢𑀻𑀢𑀺 𑁋 𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀩𑁆𑀩𑀓𑀸𑀫𑀻 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑁂𑀦 𑀢𑁆𑀯𑀁 𑀪𑀽𑀫𑀺 𑀯𑀺𑀳𑀸𑀭𑁂𑀦 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀲𑀻’’𑀢𑀺? ‘‘𑀫𑁂𑀢𑁆𑀢𑀸𑀯𑀺𑀳𑀸𑀭𑁂𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀸𑀫𑀻’’𑀢𑀺. ‘‘𑀓𑀼𑀮𑁆𑀮𑀓𑀯𑀺𑀳𑀸𑀭𑁂𑀦 𑀓𑀺𑀭 𑀢𑁆𑀯𑀁 𑀪𑀽𑀫𑀺 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀲𑀺. 𑀓𑀼𑀮𑁆𑀮𑀓𑀯𑀺𑀳𑀸𑀭𑁄 𑀏𑀲𑁄 [𑀳𑁂𑀲𑁄 (𑀲𑁆𑀬𑀸.)] 𑀪𑀽𑀫𑀺 𑀬𑀤𑀺𑀤𑀁 𑀫𑁂𑀢𑁆𑀢𑀸’’𑀢𑀺. ‘‘𑀧𑀼𑀩𑁆𑀩𑁂𑀧𑀺 𑀫𑁂, 𑀪𑀦𑁆𑀢𑁂, 𑀕𑀺𑀳𑀺𑀪𑀽𑀢𑀲𑁆𑀲 𑀆𑀘𑀺𑀡𑁆𑀡𑀸 𑀫𑁂𑀢𑁆𑀢𑀸. 𑀢𑁂𑀦𑀸𑀳𑀁 𑀏𑀢𑀭𑀳𑀺𑀧𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 𑀯𑀺𑀳𑀭𑀸𑀫𑀺, 𑀅𑀧𑀺 𑀘 𑀔𑁄 𑀫𑀬𑀸 𑀘𑀺𑀭𑀧𑁆𑀧𑀢𑁆𑀢𑀁 𑀅𑀭𑀳𑀢𑁆𑀢’’𑀦𑁆𑀢𑀺. ‘‘𑀣𑁂𑀭𑁄 𑀧𑀦, 𑀪𑀦𑁆𑀢𑁂, 𑀓𑀢𑀫𑁂𑀦 𑀯𑀺𑀳𑀸𑀭𑁂𑀦 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀢𑀻’’𑀢𑀺? ‘‘𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦 𑀔𑁄 𑀅𑀳𑀁 𑀪𑀽𑀫𑀺 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀸𑀫𑀻’’𑀢𑀺. ‘‘𑀫𑀳𑀸𑀧𑀼𑀭𑀺𑀲𑀯𑀺𑀳𑀸𑀭𑁂𑀦 𑀓𑀺𑀭, 𑀪𑀦𑁆𑀢𑁂, 𑀣𑁂𑀭𑁄 𑀏𑀢𑀭𑀳𑀺 𑀩𑀳𑀼𑀮𑀁 𑀯𑀺𑀳𑀭𑀢𑀺. 𑀫𑀳𑀸𑀧𑀼𑀭𑀺𑀲𑀯𑀺𑀳𑀸𑀭𑁄 𑀏𑀲𑁄, 𑀪𑀦𑁆𑀢𑁂, 𑀬𑀤𑀺𑀤𑀁 𑀲𑀼𑀜𑁆𑀜𑀢𑀸’’𑀢𑀺. ‘‘𑀧𑀼𑀩𑁆𑀩𑁂𑀧𑀺 𑀫𑁂 𑀪𑀽𑀫𑀺 𑀕𑀺𑀳𑀺𑀪𑀽𑀢𑀲𑁆𑀲 𑀆𑀘𑀺𑀡𑁆𑀡𑀸 𑀲𑀼𑀜𑁆𑀜𑀢𑀸. 𑀢𑁂𑀦𑀸𑀳𑀁 𑀏𑀢𑀭𑀳𑀺𑀧𑀺 𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦 𑀩𑀳𑀼𑀮𑀁 𑀯𑀺𑀳𑀭𑀸𑀫𑀺, 𑀅𑀧𑀺 𑀘 𑀫𑀬𑀸 𑀘𑀺𑀭𑀧𑁆𑀧𑀢𑁆𑀢𑀁 𑀅𑀭𑀳𑀢𑁆𑀢’’𑀦𑁆𑀢𑀺. 𑀅𑀬𑀜𑁆𑀘𑀭𑀳𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣𑀸𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀢𑀲𑁆𑀫𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀬𑁂𑀦𑀸𑀬𑀲𑁆𑀫𑀸 𑀲𑀩𑁆𑀩𑀓𑀸𑀫𑀻 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀩𑁆𑀩𑀓𑀸𑀫𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻 𑀆𑀬𑀲𑁆𑀫𑀦𑁆𑀢𑀁 𑀲𑀩𑁆𑀩𑀓𑀸𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑁂, 𑀪𑀦𑁆𑀢𑁂, 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀬𑀁 𑀤𑀲 𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑀺 𑁋 𑀓𑀧𑁆𑀧𑀢𑀺 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀕𑀸𑀫𑀦𑁆𑀢𑀭𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀯𑀸𑀲𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀦𑀼𑀫𑀢𑀺𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀆𑀘𑀺𑀡𑁆𑀡𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀅𑀫𑀣𑀺𑀢𑀓𑀧𑁆𑀧𑁄, 𑀓𑀧𑁆𑀧𑀢𑀺 𑀚𑀴𑁄𑀕𑀺𑀁, 𑀧𑀸𑀢𑀼𑀁 𑀓𑀧𑁆𑀧𑀢𑀺 𑀅𑀤𑀲𑀓𑀁 𑀦𑀺𑀲𑀻𑀤𑀦𑀁, 𑀓𑀧𑁆𑀧𑀢𑀺 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺. 𑀣𑁂𑀭𑁂𑀦, 𑀪𑀦𑁆𑀢𑁂, 𑀉𑀧𑀚𑁆𑀛𑀸𑀬𑀲𑁆𑀲 𑀫𑀽𑀮𑁂 𑀩𑀳𑀼𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀧𑀭𑀺𑀬𑀢𑁆𑀢𑁄. 𑀣𑁂𑀭𑀲𑁆𑀲 𑀪𑀦𑁆𑀢𑁂, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀓𑀣𑀁 𑀳𑁄𑀢𑀺? 𑀓𑁂 𑀦𑀼 𑀔𑁄 𑀥𑀫𑁆𑀫𑀯𑀸𑀤𑀺𑀦𑁄 𑁋 𑀧𑀸𑀘𑀻𑀦𑀓𑀸 𑀯𑀸 𑀪𑀺𑀓𑁆𑀔𑀽, 𑀧𑀸𑀯𑁂𑀬𑁆𑀬𑀓𑀸 𑀯𑀸’’𑀢𑀺? ‘‘𑀢𑀬𑀸𑀧𑀺 𑀔𑁄, 𑀆𑀯𑀼𑀲𑁄, 𑀉𑀧𑀚𑁆𑀛𑀸𑀬𑀲𑁆𑀲 𑀫𑀽𑀮𑁂 𑀩𑀳𑀼 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀧𑀭𑀺𑀬𑀢𑁆𑀢𑁄. 𑀢𑀼𑀬𑁆𑀳𑀁 𑀧𑀦, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀓𑀣𑀁 𑀳𑁄𑀢𑀺? 𑀓𑁂 𑀦𑀼 𑀔𑁄 𑀥𑀫𑁆𑀫𑀯𑀸𑀤𑀺𑀦𑁄 𑁋 𑀧𑀸𑀘𑀻𑀦𑀓𑀸 𑀯𑀸 𑀪𑀺𑀓𑁆𑀔𑀽, 𑀧𑀸𑀯𑁂𑀬𑁆𑀬𑀓𑀸 𑀯𑀸’’𑀢𑀺? ‘‘𑀫𑀬𑁆𑀳𑀁 𑀔𑁄, 𑀪𑀦𑁆𑀢𑁂, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀅𑀥𑀫𑁆𑀫𑀯𑀸𑀤𑀻 𑀧𑀸𑀘𑀻𑀦𑀓𑀸 𑀪𑀺𑀓𑁆𑀔𑀽, 𑀥𑀫𑁆𑀫𑀯𑀸𑀤𑀻 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽𑀢𑀺; 𑀅𑀧𑀺 𑀘𑀸𑀳𑀁 𑀦 𑀢𑀸𑀯 𑀤𑀺𑀝𑁆𑀞𑀺𑀁 𑀆𑀯𑀺 𑀓𑀭𑁄𑀫𑀺, 𑀅𑀧𑁆𑀧𑁂𑀯 𑀦𑀸𑀫 𑀫𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺. ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 𑀅𑀥𑀫𑁆𑀫𑀯𑀸𑀤𑀻 𑀧𑀸𑀘𑀻𑀦𑀓𑀸 𑀪𑀺𑀓𑁆𑀔𑀽, 𑀥𑀫𑁆𑀫𑀯𑀸𑀤𑀻 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽𑀢𑀺; 𑀅𑀧𑀺 𑀘𑀸𑀳𑀁 𑀦 𑀢𑀸𑀯 𑀤𑀺𑀝𑁆𑀞𑀺𑀁 𑀆𑀯𑀺 𑀓𑀭𑁄𑀫𑀺, 𑀅𑀧𑁆𑀧𑁂𑀯 𑀦𑀸𑀫 𑀫𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀲𑀫𑁆𑀫𑀦𑁆𑀦𑁂𑀬𑁆𑀬𑀸’’𑀢𑀺.

𑁪𑁫𑁬. 𑀅𑀣 𑀔𑁄 𑀲𑀗𑁆𑀖𑁄 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀓𑀸𑀫𑁄 𑀲𑀦𑁆𑀦𑀺𑀧𑀢𑀺. 𑀢𑀲𑁆𑀫𑀺𑀁 𑀔𑁄 𑀧𑀦 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀅𑀦𑀕𑁆𑀕𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀘𑁂𑀓𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀅𑀦𑀕𑁆𑀕𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀘𑁂𑀓𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀫𑀁 𑀅𑀥𑀺𑀓𑀭𑀡𑀁 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑁂𑀬𑁆𑀬𑀸’’𑀢𑀺. 𑀲𑀗𑁆𑀖𑁄 𑀘𑀢𑁆𑀢𑀸𑀭𑁄 𑀧𑀸𑀘𑀻𑀦𑀓𑁂 𑀪𑀺𑀓𑁆𑀔𑀽, 𑀘𑀢𑁆𑀢𑀸𑀭𑁄 𑀧𑀸𑀯𑁂𑀬𑁆𑀬𑀓𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺. 𑀧𑀸𑀘𑀻𑀦𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑁋 𑀆𑀬𑀲𑁆𑀫𑀦𑁆𑀢𑀜𑁆𑀘 𑀲𑀩𑁆𑀩𑀓𑀸𑀫𑀺𑀁, 𑀆𑀬𑀲𑁆𑀫𑀦𑁆𑀢𑀜𑁆𑀘 𑀲𑀸𑀴𑁆𑀳𑀁, 𑀆𑀬𑀲𑁆𑀫𑀦𑁆𑀢𑀜𑁆𑀘 𑀔𑀼𑀚𑁆𑀚𑀲𑁄𑀪𑀺𑀢𑀁, 𑀆𑀬𑀲𑁆𑀫𑀦𑁆𑀢𑀜𑁆𑀘 𑀯𑀸𑀲𑀪𑀕𑀸𑀫𑀺𑀓𑀁; 𑀧𑀸𑀯𑁂𑀬𑁆𑀬𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑁋 𑀆𑀬𑀲𑁆𑀫𑀦𑁆𑀢𑀜𑁆𑀘 𑀭𑁂𑀯𑀢𑀁, 𑀆𑀬𑀲𑁆𑀫𑀦𑁆𑀢𑀜𑁆𑀘 𑀲𑀫𑁆𑀪𑀽𑀢𑀁 𑀲𑀸𑀡𑀯𑀸𑀲𑀺𑀁, 𑀆𑀬𑀲𑁆𑀫𑀦𑁆𑀢𑀜𑁆𑀘 𑀬𑀲𑀁 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑀁, 𑀆𑀬𑀲𑁆𑀫𑀦𑁆𑀢𑀜𑁆𑀘 𑀲𑀼𑀫𑀦𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀅𑀦𑀕𑁆𑀕𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀘𑁂𑀓𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀘𑀢𑁆𑀢𑀸𑀭𑁄 𑀧𑀸𑀘𑀻𑀦𑀓𑁂 𑀪𑀺𑀓𑁆𑀔𑀽, 𑀘𑀢𑁆𑀢𑀸𑀭𑁄 𑀧𑀸𑀯𑁂𑀬𑁆𑀬𑀓𑁂 𑀪𑀺𑀓𑁆𑀔𑀽 𑀲𑀫𑁆𑀫𑀦𑁆𑀦𑁂𑀬𑁆𑀬 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀺𑀦𑀺𑀘𑁆𑀙𑀺𑀬𑀫𑀸𑀦𑁂 𑀅𑀦𑀕𑁆𑀕𑀸𑀦𑀺 𑀘𑁂𑀯 𑀪𑀲𑁆𑀲𑀸𑀦𑀺 𑀚𑀸𑀬𑀦𑁆𑀢𑀺, 𑀦 𑀘𑁂𑀓𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀲𑀗𑁆𑀖𑁄 𑀘𑀢𑁆𑀢𑀸𑀭𑁄 𑀧𑀸𑀘𑀻𑀦𑀓𑁂 𑀪𑀺𑀓𑁆𑀔𑀽, 𑀘𑀢𑁆𑀢𑀸𑀭𑁄 𑀧𑀸𑀯𑁂𑀬𑁆𑀬𑀓𑁂 𑀪𑀺𑀓𑁆𑀔𑀽 𑀲𑀫𑁆𑀫𑀦𑁆𑀦𑀢𑀺 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀘𑀢𑀼𑀦𑁆𑀦𑀁 𑀧𑀸𑀘𑀻𑀦𑀓𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀘𑀢𑀼𑀦𑁆𑀦𑀁 𑀧𑀸𑀯𑁂𑀬𑁆𑀬𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀢𑀺, 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑀸 𑀲𑀗𑁆𑀖𑁂𑀦 𑀘𑀢𑁆𑀢𑀸𑀭𑁄 𑀧𑀸𑀘𑀻𑀦𑀓𑀸 𑀪𑀺𑀓𑁆𑀔𑀽, 𑀘𑀢𑁆𑀢𑀸𑀭𑁄 𑀧𑀸𑀯𑁂𑀬𑁆𑀬𑀓𑀸 𑀪𑀺𑀓𑁆𑀔𑀽, 𑀉𑀩𑁆𑀩𑀸𑀳𑀺𑀓𑀸𑀬 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀚𑀺𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀤𑀲𑀯𑀲𑁆𑀲𑁄 𑀲𑀗𑁆𑀖𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀳𑁄𑀢𑀺. 𑀅𑀣 𑀔𑁄 𑀲𑀗𑁆𑀖𑁄 𑀆𑀬𑀲𑁆𑀫𑀦𑁆𑀢𑀫𑁆𑀧𑀺 𑀅𑀚𑀺𑀢𑀁 𑀲𑀫𑁆𑀫𑀦𑁆𑀦𑀢𑀺 𑁋 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀲𑀦𑀧𑀜𑁆𑀜𑀸𑀧𑀓𑀁. 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑁆𑀣 𑀦𑀼 𑀔𑁄 𑀫𑀬𑀁 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸’’𑀢𑀺? 𑀅𑀣 𑀔𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀯𑀸𑀮𑀺𑀓𑀸𑀭𑀸𑀫𑁄 𑀭𑀫𑀡𑀻𑀬𑁄 𑀅𑀧𑁆𑀧𑀲𑀤𑁆𑀤𑁄 𑀅𑀧𑁆𑀧𑀦𑀺𑀕𑁆𑀖𑁄𑀲𑁄. 𑀬𑀁𑀦𑀽𑀦 𑀫𑀬𑀁 𑀯𑀸𑀮𑀺𑀓𑀸𑀭𑀸𑀫𑁂 𑀇𑀫𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀬𑁆𑀬𑀸𑀫𑀸’’𑀢𑀺.

𑁪𑁫𑁭. 𑀅𑀣 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀸𑀮𑀺𑀓𑀸𑀭𑀸𑀫𑀁 𑀅𑀕𑀫𑀁𑀲𑀼 𑁋 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑀼𑀓𑀸𑀫𑀸. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀲𑀩𑁆𑀩𑀓𑀸𑀫𑀺𑀁 𑀯𑀺𑀦𑀬𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑀆𑀬𑀲𑁆𑀫𑀸 𑀲𑀩𑁆𑀩𑀓𑀸𑀫𑀻 𑀲𑀗𑁆𑀖𑀁 𑀜𑀸𑀧𑁂𑀲𑀺 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀅𑀳𑀁 𑀭𑁂𑀯𑀢𑁂𑀦 𑀯𑀺𑀦𑀬𑀁 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀆𑀬𑀲𑁆𑀫𑀦𑁆𑀢𑀁 𑀲𑀩𑁆𑀩𑀓𑀸𑀫𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀲𑀺𑀗𑁆𑀕𑀺𑀮𑁄𑀡𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀲𑀺𑀗𑁆𑀕𑀺𑀦𑀸 𑀮𑁄𑀡𑀁 𑀧𑀭𑀺𑀳𑀭𑀺𑀢𑀼𑀁 𑁋 𑀬𑀢𑁆𑀣 𑀅𑀮𑁄𑀡𑀓𑀁 𑀪𑀯𑀺𑀲𑁆𑀲𑀢𑀺 𑀢𑀢𑁆𑀣 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺. [𑀧𑀸𑀘𑀺. 𑁨𑁫𑁪 𑀆𑀤𑀬𑁄] ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀲𑀸𑀯𑀢𑁆𑀣𑀺𑀬𑀁, 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀧𑀞𑀫𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀧𑀞𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀤𑁆𑀯𑀗𑁆𑀕𑀼𑀮𑀸𑀬 𑀙𑀸𑀬𑀸𑀬 𑀯𑀻𑀢𑀺𑀯𑀢𑁆𑀢𑀸𑀬 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀧𑀸𑀘𑀺. 𑁨𑁪𑁫]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀭𑀸𑀚𑀕𑀳𑁂, 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? 𑀯𑀺𑀓𑀸𑀮𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀤𑀼𑀢𑀺𑀬𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀤𑀼𑀢𑀺𑀬𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀕𑀸𑀫𑀦𑁆𑀢𑀭𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀕𑀸𑀫𑀦𑁆𑀢𑀭𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂 𑁋 𑀇𑀤𑀸𑀦𑀺 𑀕𑀸𑀫𑀦𑁆𑀢𑀭𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑁋 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀧𑀸𑀘𑀺. 𑁨𑁩𑁪]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀲𑀸𑀯𑀢𑁆𑀣𑀺𑀬𑀁, 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀢𑀢𑀺𑀬𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀢𑀢𑀺𑀬𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀆𑀯𑀸𑀲𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀆𑀯𑀸𑀲𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀆𑀯𑀸𑀲𑀸 𑀲𑀫𑀸𑀦𑀲𑀻𑀫𑀸 𑀦𑀸𑀦𑀼𑀧𑁄𑀲𑀣𑀁 𑀓𑀸𑀢𑀼’’𑀦𑁆𑀢𑀺. ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀫𑀳𑀸𑀯. 𑁧𑁪𑁧 𑀆𑀤𑀬𑁄]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀭𑀸𑀚𑀕𑀳𑁂, 𑀉𑀧𑁄𑀲𑀣𑀲𑀁𑀬𑀼𑀢𑁆𑀢𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀯𑀺𑀦𑀬𑀸𑀢𑀺𑀲𑀸𑀭𑁂 𑀤𑀼𑀓𑁆𑀓𑀝’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀘𑀢𑀼𑀢𑁆𑀣𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀅𑀦𑀼𑀫𑀢𑀺𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀅𑀦𑀼𑀫𑀢𑀺𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀸𑀢𑀼𑀁 𑁋 𑀆𑀕𑀢𑁂 𑀪𑀺𑀓𑁆𑀔𑀽 𑀅𑀦𑀼𑀫𑀸𑀦𑁂𑀲𑁆𑀲𑀸𑀫𑀸’’𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀫𑀳𑀸𑀯. 𑁩𑁮𑁩 𑀆𑀤𑀬𑁄]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀘𑀫𑁆𑀧𑁂𑀬𑁆𑀬𑀓𑁂, 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀯𑀺𑀦𑀬𑀸𑀢𑀺𑀲𑀸𑀭𑁂 𑀤𑀼𑀓𑁆𑀓𑀝’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀧𑀜𑁆𑀘𑀫𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀧𑀜𑁆𑀘𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀆𑀘𑀺𑀡𑁆𑀡𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀆𑀘𑀺𑀡𑁆𑀡𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂 𑁋 𑀇𑀤𑀁 𑀫𑁂 𑀉𑀧𑀚𑁆𑀛𑀸𑀬𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑀁, 𑀇𑀤𑀁 𑀫𑁂 𑀆𑀘𑀭𑀺𑀬𑁂𑀦 𑀅𑀚𑁆𑀛𑀸𑀘𑀺𑀡𑁆𑀡𑀁 𑁋 𑀢𑀁 𑀅𑀚𑁆𑀛𑀸𑀘𑀭𑀺𑀢𑀼’’𑀦𑁆𑀢𑀺? ‘‘𑀆𑀘𑀺𑀡𑁆𑀡𑀓𑀧𑁆𑀧𑁄 𑀔𑁄, 𑀆𑀯𑀼𑀲𑁄, 𑀏𑀓𑀘𑁆𑀘𑁄 𑀓𑀧𑁆𑀧𑀢𑀺, 𑀏𑀓𑀘𑁆𑀘𑁄 𑀦 𑀓𑀧𑁆𑀧𑀢𑀻’’𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀙𑀝𑁆𑀞𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀙𑀝𑁆𑀞𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀅𑀫𑀣𑀺𑀢𑀓𑀧𑁆𑀧𑁄’’𑀢𑀺? ‘‘𑀓𑁄 𑀲𑁄, 𑀆𑀯𑀼𑀲𑁄, 𑀅𑀫𑀣𑀺𑀢𑀓𑀧𑁆𑀧𑁄’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀬𑀁 𑀢𑀁 𑀔𑀻𑀭𑀁 𑀔𑀻𑀭𑀪𑀸𑀯𑀁 𑀯𑀺𑀚𑀳𑀺𑀢𑀁, 𑀅𑀲𑀫𑁆𑀧𑀢𑁆𑀢𑀁 𑀤𑀥𑀺𑀪𑀸𑀯𑀁, 𑀢𑀁 𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀅𑀦𑀢𑀺𑀭𑀺𑀢𑁆𑀢𑀁 𑀧𑀸𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀧𑀸𑀘𑀺. 𑁨𑁩𑁪]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀲𑀸𑀯𑀢𑁆𑀣𑀺𑀬𑀁, 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀲𑀢𑁆𑀢𑀫𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀲𑀢𑁆𑀢𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀚𑀴𑁄𑀕𑀺𑀁 𑀧𑀸𑀢𑀼’’𑀦𑁆𑀢𑀺? ‘‘𑀓𑀸 𑀲𑀸, 𑀆𑀯𑀼𑀲𑁄, 𑀚𑀴𑁄𑀕𑀻’’𑀢𑀺? ‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀬𑀸 𑀲𑀸 𑀲𑀼𑀭𑀸 𑀆𑀲𑀼𑀢𑀸 𑀅𑀲𑀫𑁆𑀧𑀢𑁆𑀢𑀸 𑀫𑀚𑁆𑀚𑀪𑀸𑀯𑀁, 𑀲𑀸 𑀧𑀸𑀢𑀼’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀧𑀸𑀘𑀺. 𑁩𑁨𑁬]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀓𑁄𑀲𑀫𑁆𑀩𑀺𑀬𑀁, 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺. ‘‘𑀲𑀼𑀭𑀸𑀫𑁂𑀭𑀬𑀧𑀸𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀅𑀝𑁆𑀞𑀫𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀅𑀝𑁆𑀞𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀅𑀤𑀲𑀓𑀁 𑀦𑀺𑀲𑀻𑀤𑀦’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀧𑀸𑀘𑀺. 𑁫𑁩𑁧 𑀆𑀤𑀬𑁄]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺? ‘‘𑀲𑀸𑀯𑀢𑁆𑀣𑀺𑀬𑀁, 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀙𑁂𑀤𑀦𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀦𑀯𑀫𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀦𑀯𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺’’.

‘‘𑀓𑀧𑁆𑀧𑀢𑀺, 𑀪𑀦𑁆𑀢𑁂, 𑀚𑀸𑀢𑀭𑀽𑀧𑀭𑀚𑀢’’𑀦𑁆𑀢𑀺? ‘‘𑀦𑀸𑀯𑀼𑀲𑁄, 𑀓𑀧𑁆𑀧𑀢𑀻’’𑀢𑀺 [𑀧𑀸𑀭𑀸. 𑁫𑁮𑁦 𑀆𑀤𑀬𑁄]. ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺. ‘‘𑀭𑀸𑀚𑀕𑀳𑁂, 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺. ‘‘𑀓𑀺𑀁 𑀆𑀧𑀚𑁆𑀚𑀢𑀻’’𑀢𑀺? ‘‘𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀤𑀁 𑀤𑀲𑀫𑀁 𑀯𑀢𑁆𑀣𑀼 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀁. 𑀇𑀢𑀺𑀧𑀺𑀤𑀁 𑀯𑀢𑁆𑀣𑀼 𑀉𑀤𑁆𑀥𑀫𑁆𑀫𑀁, 𑀉𑀩𑁆𑀩𑀺𑀦𑀬𑀁, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀁. 𑀇𑀤𑀁 𑀤𑀲𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀲𑀗𑁆𑀖𑁂𑀦 𑀯𑀺𑀦𑀺𑀘𑁆𑀙𑀺𑀢𑀸𑀦𑀺. 𑀇𑀢𑀺𑀧𑀺𑀫𑀸𑀦𑀺 𑀤𑀲𑀯𑀢𑁆𑀣𑀽𑀦𑀺 𑀉𑀤𑁆𑀥𑀫𑁆𑀫𑀸𑀦𑀺, 𑀉𑀩𑁆𑀩𑀺𑀦𑀬𑀸𑀦𑀺, 𑀅𑀧𑀕𑀢𑀲𑀢𑁆𑀣𑀼𑀲𑀸𑀲𑀦𑀸𑀦𑀻’’𑀢𑀺.

𑁪𑁫𑁮. ‘‘𑀦𑀺𑀳𑀢𑀫𑁂𑀢𑀁, 𑀆𑀯𑀼𑀲𑁄, 𑀅𑀥𑀺𑀓𑀭𑀡𑀁, 𑀲𑀦𑁆𑀢𑀁 𑀯𑀽𑀧𑀲𑀦𑁆𑀢𑀁 𑀲𑀼𑀯𑀽𑀧𑀲𑀦𑁆𑀢𑀁. 𑀅𑀧𑀺 𑀘 𑀫𑀁 𑀢𑁆𑀯𑀁, 𑀆𑀯𑀼𑀲𑁄, 𑀲𑀗𑁆𑀖𑀫𑀚𑁆𑀛𑁂𑀧𑀺 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀧𑀼𑀘𑁆𑀙𑁂𑀬𑁆𑀬𑀸𑀲𑀺 𑁋 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀬𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀆𑀬𑀲𑁆𑀫𑀦𑁆𑀢𑀁 𑀲𑀩𑁆𑀩𑀓𑀸𑀫𑀺𑀁 𑀲𑀗𑁆𑀖𑀫𑀚𑁆𑀛𑁂𑀧𑀺 𑀇𑀫𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀧𑀼𑀘𑁆𑀙𑀺. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀆𑀬𑀲𑁆𑀫𑀸 𑀲𑀩𑁆𑀩𑀓𑀸𑀫𑀻 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀇𑀫𑀸𑀬 𑀔𑁄 𑀧𑀦 𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸 𑀲𑀢𑁆𑀢 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀦𑀽𑀦𑀸𑀦𑀺 𑀅𑀦𑀥𑀺𑀓𑀸𑀦𑀺 𑀅𑀳𑁂𑀲𑀼𑀁, 𑀢𑀲𑁆𑀫𑀸𑀬𑀁 𑀯𑀺𑀦𑀬𑀲𑀗𑁆𑀕𑀻𑀢𑀺 ‘‘𑀲𑀢𑁆𑀢𑀲𑀢𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁄 𑀤𑁆𑀯𑀸𑀤𑀲𑀫𑁄.

𑀇𑀫𑀫𑁆𑀳𑀺 𑀔𑀦𑁆𑀥𑀓𑁂 𑀯𑀢𑁆𑀣𑀽 𑀧𑀜𑁆𑀘𑀯𑀻𑀲𑀢𑀺.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀲 𑀯𑀢𑁆𑀣𑀽𑀦𑀺 𑀧𑀽𑀭𑁂𑀢𑁆𑀯𑀸, 𑀓𑀫𑁆𑀫𑀁 𑀤𑀽𑀢𑁂𑀦 𑀧𑀸𑀯𑀺𑀲𑀺;

𑀘𑀢𑁆𑀢𑀸𑀭𑁄 𑀧𑀼𑀦 𑀭𑀽𑀧𑀜𑁆𑀘, 𑀓𑁄𑀲𑀫𑁆𑀩𑀺 𑀘 𑀧𑀸𑀯𑁂𑀬𑁆𑀬𑀓𑁄.

𑀫𑀕𑁆𑀕𑁄 𑀲𑁄𑀭𑁂𑀬𑁆𑀬𑀁 𑀲𑀗𑁆𑀓𑀲𑁆𑀲𑀁, 𑀓𑀡𑁆𑀡𑀓𑀼𑀚𑁆𑀚𑀁 𑀉𑀤𑀼𑀫𑁆𑀩𑀭𑀁;

𑀲𑀳𑀚𑀸𑀢𑀺 𑀘 𑀫𑀚𑁆𑀛𑁂𑀲𑀺, 𑀅𑀲𑁆𑀲𑁄𑀲𑀺 𑀓𑀁 𑀦𑀼 𑀔𑁄 𑀫𑀬𑀁.

𑀧𑀢𑁆𑀢𑀦𑀸𑀯𑀸𑀬 𑀉𑀚𑁆𑀚𑀯𑀺, 𑀭𑀳𑁄𑀲𑀺 𑀉𑀧𑀦𑀸𑀫𑀬𑀁 [𑀤𑀽𑀭𑀢𑁄𑀧𑀺 𑀉𑀤𑀧𑀸𑀤𑀺 (𑀓.)];

𑀕𑀭𑀼 [𑀤𑀸𑀭𑀼𑀡𑀁 (𑀲𑁆𑀬𑀸.)] 𑀲𑀗𑁆𑀖𑁄 𑀘 𑀯𑁂𑀲𑀸𑀮𑀺𑀁, 𑀫𑁂𑀢𑁆𑀢𑀸 𑀲𑀗𑁆𑀖𑁄 𑀉𑀩𑁆𑀩𑀸𑀳𑀺𑀓𑀸𑀢𑀺.

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁄 𑀦𑀺𑀝𑁆𑀞𑀺𑀢𑁄.