𑁩. 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁

𑁨𑁧. [𑀇𑀤𑀁 𑀯𑀢𑁆𑀣𑀼 𑀧𑀸𑀭𑀸. 𑁪𑁩𑁧 𑀆𑀤𑀬𑁄] 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 [𑀦𑀸𑀫 𑀪𑀺𑀓𑁆𑀔𑀽 (𑀓.)] 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀳𑁄𑀦𑁆𑀢𑀺 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽. 𑀢𑁂 [𑀘𑀽𑀴𑀯. 𑁨𑁯𑁨 𑀆𑀤𑀬𑁄] 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺, 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀺, 𑀑𑀘𑀺𑀦𑀦𑁆𑀢𑀺𑀧𑀺 𑀑𑀘𑀺𑀦𑀸𑀧𑁂𑀦𑁆𑀢𑀺𑀧𑀺, 𑀕𑀦𑁆𑀣𑁂𑀦𑁆𑀢𑀺𑀧𑀺 𑀕𑀦𑁆𑀣𑀸𑀧𑁂𑀦𑁆𑀢𑀺𑀧𑀺, 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 [𑀯𑀺𑀥𑀼𑀢𑀺𑀓𑀁 (𑀲𑁆𑀬𑀸.)] 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀦𑀁 𑀓𑀼𑀮𑀥𑀻𑀢𑀸𑀦𑀁 𑀓𑀼𑀮𑀓𑀼𑀫𑀸𑀭𑀻𑀦𑀁 𑀓𑀼𑀮𑀲𑀼𑀡𑁆𑀳𑀸𑀦𑀁 𑀓𑀼𑀮𑀤𑀸𑀲𑀻𑀦𑀁 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀥𑀻𑀢𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀏𑀓𑀪𑀸𑀚𑀦𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀏𑀓𑀣𑀸𑀮𑀓𑁂𑀧𑀺 𑀧𑀺𑀯𑀦𑁆𑀢𑀺, 𑀏𑀓𑀸𑀲𑀦𑁂𑀧𑀺 𑀦𑀺𑀲𑀻𑀤𑀦𑁆𑀢𑀺, 𑀏𑀓𑀫𑀜𑁆𑀘𑁂𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀯𑀺𑀓𑀸𑀮𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀫𑀚𑁆𑀚𑀫𑁆𑀧𑀺 𑀧𑀺𑀯𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀧𑀺, 𑀕𑀸𑀬𑀦𑁆𑀢𑀺𑀧𑀺, 𑀯𑀸𑀤𑁂𑀦𑁆𑀢𑀺𑀧𑀺, 𑀮𑀸𑀲𑁂𑀦𑁆𑀢𑀺𑀧𑀺; 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀕𑀸𑀬𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀤𑀲𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀦𑁆𑀢𑀺; 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀲𑁆𑀲𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀭𑀣𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀥𑀦𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀣𑀭𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺; 𑀳𑀢𑁆𑀣𑀺𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀅𑀲𑁆𑀲𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀭𑀣𑀲𑁆𑀲𑀧𑀺 𑀧𑀼𑀭𑀢𑁄 [𑀧𑀼𑀭𑀢𑁄 𑀥𑀸𑀯𑀦𑁆𑀢𑀺 (𑀲𑁆𑀬𑀸.)] 𑀥𑀸𑀯𑀦𑁆𑀢𑀺𑀧𑀺 𑀆𑀥𑀸𑀯𑀦𑁆𑀢𑀺𑀧𑀺; 𑀉𑀲𑁆𑀲𑁂𑀴𑁂𑀦𑁆𑀢𑀺𑀧𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺𑀧𑀺, 𑀦𑀺𑀩𑁆𑀩𑀼𑀚𑁆𑀛𑀦𑁆𑀢𑀺𑀧𑀺, 𑀫𑀼𑀝𑁆𑀞𑀻𑀳𑀺𑀧𑀺 𑀬𑀼𑀚𑁆𑀛𑀦𑁆𑀢𑀺; 𑀭𑀗𑁆𑀕𑀫𑀚𑁆𑀛𑁂𑀧𑀺 𑀲𑀗𑁆𑀖𑀸𑀝𑀺𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀘𑁆𑀘𑀓𑀺𑀁 [𑀦𑀘𑁆𑀘𑀦𑁆𑀢𑀺𑀁 (𑀲𑀻. 𑀲𑁆𑀬𑀸.)] 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀇𑀥, 𑀪𑀕𑀺𑀦𑀺, 𑀦𑀘𑁆𑀘𑀲𑁆𑀲𑀽’’𑀢𑀺; 𑀦𑀮𑀸𑀝𑀺𑀓𑀫𑁆𑀧𑀺 𑀤𑁂𑀦𑁆𑀢𑀺; 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺.

𑁨𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑀸𑀲𑀻𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑁄 [𑀯𑀲𑁆𑀲𑀁𑀯𑀼𑀢𑁆𑀣𑁄 (𑀲𑀻. 𑀲𑁆𑀬𑀸.)] 𑀲𑀸𑀯𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀬𑁂𑀦 𑀓𑀻𑀝𑀸𑀕𑀺𑀭𑀺 𑀢𑀤𑀯𑀲𑀭𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀻𑀝𑀸𑀕𑀺𑀭𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 [𑀲𑀫𑁆𑀫𑀺𑀜𑁆𑀚𑀺𑀢𑁂𑀦 (𑀲𑀻. 𑀲𑁆𑀬𑀸. 𑀓𑀁.)] 𑀧𑀲𑀸𑀭𑀺𑀢𑁂𑀦, 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄. 𑀫𑀦𑀼𑀲𑁆𑀲𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑁆𑀯𑀸𑀬𑀁 𑀅𑀩𑀮𑀩𑀮𑁄 𑀯𑀺𑀬 𑀫𑀦𑁆𑀤𑀫𑀦𑁆𑀤𑁄 𑀯𑀺𑀬 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀯𑀺𑀬? 𑀓𑁄 𑀇𑀫𑀲𑁆𑀲 𑀉𑀧𑀕𑀢𑀲𑁆𑀲 𑀧𑀺𑀡𑁆𑀟𑀓𑀫𑁆𑀧𑀺 𑀤𑀲𑁆𑀲𑀢𑀺? 𑀅𑀫𑁆𑀳𑀸𑀓𑀁 𑀧𑀦 𑀅𑀬𑁆𑀬𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀲𑀡𑁆𑀳𑀸 𑀲𑀔𑀺𑀮𑀸 𑀲𑀼𑀔𑀲𑀫𑁆𑀪𑀸𑀲𑀸 𑀫𑀺𑀳𑀺𑀢𑀧𑀼𑀩𑁆𑀩𑀗𑁆𑀕𑀫𑀸 𑀏𑀳𑀺𑀲𑁆𑀯𑀸𑀕𑀢𑀯𑀸𑀤𑀺𑀦𑁄 𑀅𑀩𑁆𑀪𑀸𑀓𑀼𑀝𑀺𑀓𑀸 𑀉𑀢𑁆𑀢𑀸𑀦𑀫𑀼𑀔𑀸 𑀧𑀼𑀩𑁆𑀩𑀪𑀸𑀲𑀺𑀦𑁄. 𑀢𑁂𑀲𑀁 𑀔𑁄 𑀦𑀸𑀫 𑀧𑀺𑀡𑁆𑀟𑁄 𑀤𑀸𑀢𑀩𑁆𑀩𑁄’’𑀢𑀺.

𑀅𑀤𑁆𑀤𑀲𑀸 𑀔𑁄 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀢𑀁 𑀪𑀺𑀓𑁆𑀔𑀼𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀧𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’’𑀢𑀺? ‘‘𑀦 𑀔𑁄, 𑀆𑀯𑀼𑀲𑁄, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’’𑀢𑀺. ‘‘𑀏𑀳𑀺, 𑀪𑀦𑁆𑀢𑁂, 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀢𑀁 𑀪𑀺𑀓𑁆𑀔𑀼𑀁 𑀖𑀭𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀕𑀫𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤, 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀤𑀼𑀝𑁆𑀞𑁄, 𑀪𑀦𑁆𑀢𑁂, 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽. 𑀢𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺, 𑀲𑀺𑀜𑁆𑀘𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀦𑁆𑀢𑀺𑀧𑀺, 𑀑𑀘𑀺𑀦𑀦𑁆𑀢𑀺𑀧𑀺, 𑀑𑀘𑀺𑀦𑀸𑀧𑁂𑀦𑁆𑀢𑀺𑀧𑀺, 𑀕𑀦𑁆𑀣𑁂𑀦𑁆𑀢𑀺𑀧𑀺 𑀕𑀦𑁆𑀣𑀸𑀧𑁂𑀦𑁆𑀢𑀺𑀧𑀺, 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀓𑀭𑁄𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀦𑀁 𑀓𑀼𑀮𑀥𑀻𑀢𑀸𑀦𑀁 𑀓𑀼𑀮𑀓𑀼𑀫𑀸𑀭𑀻𑀦𑀁 𑀓𑀼𑀮𑀲𑀼𑀡𑁆𑀳𑀸𑀦𑀁 𑀓𑀼𑀮𑀤𑀸𑀲𑀻𑀦𑀁 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀳𑀭𑀦𑁆𑀢𑀺𑀧𑀺 𑀳𑀭𑀸𑀧𑁂𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀥𑀻𑀢𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀏𑀓𑀪𑀸𑀚𑀦𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀏𑀓𑀣𑀸𑀮𑀓𑁂𑀧𑀺 𑀧𑀺𑀯𑀦𑁆𑀢𑀺, 𑀏𑀓𑀸𑀲𑀦𑁂𑀧𑀺 𑀦𑀺𑀲𑀻𑀤𑀦𑁆𑀢𑀺, 𑀏𑀓𑀫𑀜𑁆𑀘𑁂𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑁂𑀦𑁆𑀢𑀺, 𑀯𑀺𑀓𑀸𑀮𑁂𑀧𑀺 𑀪𑀼𑀜𑁆𑀚𑀦𑁆𑀢𑀺, 𑀫𑀚𑁆𑀚𑀫𑁆𑀧𑀺 𑀧𑀺𑀯𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀫𑁆𑀧𑀺 𑀥𑀸𑀭𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀧𑀺, 𑀕𑀸𑀬𑀦𑁆𑀢𑀺𑀧𑀺, 𑀯𑀸𑀤𑁂𑀦𑁆𑀢𑀺𑀧𑀺, 𑀮𑀸𑀲𑁂𑀦𑁆𑀢𑀺𑀧𑀺; 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺…𑀧𑁂… (𑀘𑀓𑁆𑀓𑀁 𑀓𑀸𑀢𑀩𑁆𑀩𑀁). 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺; 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀤𑀲𑀧𑀤𑁂𑀧𑀺 𑀓𑀻𑀴𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀦𑁆𑀢𑀺; 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀅𑀲𑁆𑀲𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀭𑀣𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀥𑀦𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺, 𑀣𑀭𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀦𑁆𑀢𑀺; 𑀳𑀢𑁆𑀣𑀺𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀅𑀲𑁆𑀲𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺, 𑀭𑀣𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺𑀧𑀺 𑀆𑀥𑀸𑀯𑀦𑁆𑀢𑀺𑀧𑀺; 𑀉𑀲𑁆𑀲𑁂𑀴𑁂𑀦𑁆𑀢𑀺𑀧𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺𑀧𑀺, 𑀦𑀺𑀩𑁆𑀩𑀼𑀚𑁆𑀛𑀦𑁆𑀢𑀺𑀧𑀺, 𑀫𑀼𑀝𑁆𑀞𑀻𑀳𑀺𑀧𑀺 𑀬𑀼𑀚𑁆𑀛𑀦𑁆𑀢𑀺; 𑀭𑀗𑁆𑀕𑀫𑀚𑁆𑀛𑁂𑀧𑀺 𑀲𑀗𑁆𑀖𑀸𑀝𑀺𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀘𑁆𑀘𑀓𑀺𑀁 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀇𑀥, 𑀪𑀕𑀺𑀦𑀺, 𑀦𑀘𑁆𑀘𑀲𑁆𑀲𑀽’𑀢𑀺; 𑀦𑀮𑀸𑀝𑀺𑀓𑀫𑁆𑀧𑀺 𑀤𑁂𑀦𑁆𑀢𑀺; 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺. 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀲𑀤𑁆𑀥𑀸 𑀅𑀳𑁂𑀲𑀼𑀁 𑀧𑀲𑀦𑁆𑀦𑀸 𑀢𑁂𑀧𑀺 𑀏𑀢𑀭𑀳𑀺 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸. 𑀬𑀸𑀦𑀺𑀧𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑁂 𑀤𑀸𑀦𑀧𑀣𑀸𑀦𑀺 𑀢𑀸𑀦𑀺𑀧𑀺 𑀏𑀢𑀭𑀳𑀺 𑀉𑀧𑀘𑁆𑀙𑀺𑀦𑁆𑀦𑀸𑀦𑀺. 𑀭𑀺𑀜𑁆𑀘𑀦𑁆𑀢𑀺 𑀧𑁂𑀲𑀮𑀸 𑀪𑀺𑀓𑁆𑀔𑀽, 𑀦𑀺𑀯𑀲𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀻𑀝𑀸𑀕𑀺𑀭𑀺𑀁 𑀪𑀺𑀓𑁆𑀔𑀽 𑀧𑀳𑀺𑀡𑁂𑀬𑁆𑀬, 𑀬𑀣𑀸𑀬𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄 𑀲𑀡𑁆𑀞𑀳𑁂𑀬𑁆𑀬𑀸’’𑀢𑀺.

‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺𑀲𑀺 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄, 𑀓𑀼𑀢𑁄 𑀘 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀕𑀘𑁆𑀙𑀲𑀻’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁 𑀪𑀕𑀯𑀸; 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘 𑀅𑀳𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑁄. 𑀇𑀥𑀸𑀳𑀁, 𑀪𑀦𑁆𑀢𑁂, 𑀓𑀸𑀲𑀻𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑁄 𑀲𑀸𑀯𑀢𑁆𑀣𑀺𑀁 𑀆𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀬𑁂𑀦 𑀓𑀻𑀝𑀸𑀕𑀺𑀭𑀺 𑀢𑀤𑀯𑀲𑀭𑀺𑀁. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀻𑀝𑀸𑀕𑀺𑀭𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀅𑀤𑁆𑀤𑀲𑀸 𑀔𑁄 𑀫𑀁, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀅𑀧𑀺, 𑀪𑀦𑁆𑀢𑁂, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’𑀢𑀺. ‘𑀦 𑀔𑁄, 𑀆𑀯𑀼𑀲𑁄, 𑀧𑀺𑀡𑁆𑀟𑁄 𑀮𑀩𑁆𑀪𑀢𑀻’𑀢𑀺. ‘𑀏𑀳𑀺, 𑀪𑀦𑁆𑀢𑁂, 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑁄 𑀉𑀧𑀸𑀲𑀓𑁄 𑀫𑀁 𑀖𑀭𑀁 𑀦𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀕𑀫𑀺𑀲𑁆𑀲𑀢𑀻’𑀢𑀺? ‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀆𑀯𑀼𑀲𑁄, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’𑀢𑀺. ‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤, 𑀏𑀯𑀜𑁆𑀘 𑀯𑀤𑁂𑀳𑀺 𑁋 𑀤𑀼𑀝𑁆𑀞𑁄, 𑀪𑀦𑁆𑀢𑁂, 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽. 𑀢𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀦𑁆𑀢𑀺𑀧𑀺…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺. 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀲𑀤𑁆𑀥𑀸 𑀅𑀳𑁂𑀲𑀼𑀁 𑀧𑀲𑀦𑁆𑀦𑀸 𑀢𑁂𑀧𑀺 𑀏𑀢𑀭𑀳𑀺 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸. 𑀬𑀸𑀦𑀺𑀧𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑁂 𑀤𑀸𑀦𑀧𑀣𑀸𑀦𑀺 𑀢𑀸𑀦𑀺𑀧𑀺 𑀏𑀢𑀭𑀳𑀺 𑀉𑀧𑀘𑁆𑀙𑀺𑀦𑁆𑀦𑀸𑀦𑀺. 𑀭𑀺𑀜𑁆𑀘𑀦𑁆𑀢𑀺 𑀧𑁂𑀲𑀮𑀸 𑀪𑀺𑀓𑁆𑀔𑀽, 𑀦𑀺𑀯𑀲𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀻𑀝𑀸𑀕𑀺𑀭𑀺𑀁 𑀪𑀺𑀓𑁆𑀔𑀽 𑀧𑀳𑀺𑀡𑁂𑀬𑁆𑀬, 𑀬𑀣𑀸𑀬𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑁄 𑀲𑀡𑁆𑀞𑀳𑁂𑀬𑁆𑀬𑀸’𑀢𑀺. 𑀢𑀢𑁄 𑀅𑀳𑀁 𑀪𑀕𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺.

𑁨𑁩. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀦𑀸𑀫 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀅𑀮𑀚𑁆𑀚𑀺𑀦𑁄 𑀧𑀸𑀧𑀪𑀺𑀓𑁆𑀔𑀽? 𑀢𑁂 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀦𑁆𑀢𑀺𑀧𑀺…𑀧𑁂… 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀦𑁆𑀢𑀺? 𑀬𑁂𑀧𑀺 𑀢𑁂 𑀫𑀦𑀼𑀲𑁆𑀲𑀸 𑀧𑀼𑀩𑁆𑀩𑁂 𑀲𑀤𑁆𑀥𑀸 𑀅𑀳𑁂𑀲𑀼𑀁 𑀧𑀲𑀦𑁆𑀦𑀸 𑀢𑁂𑀧𑀺 𑀏𑀢𑀭𑀳𑀺 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸? 𑀬𑀸𑀦𑀺𑀧𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀧𑀼𑀩𑁆𑀩𑁂 𑀤𑀸𑀦𑀧𑀣𑀸𑀦𑀺 𑀢𑀸𑀦𑀺𑀧𑀺 𑀏𑀢𑀭𑀳𑀺 𑀉𑀧𑀘𑁆𑀙𑀺𑀦𑁆𑀦𑀸𑀦𑀺? 𑀭𑀺𑀜𑁆𑀘𑀦𑁆𑀢𑀺 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀦𑀺𑀯𑀲𑀦𑁆𑀢𑀺 𑀧𑀸𑀧𑀪𑀺𑀓𑁆𑀔𑀽’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀆𑀘𑀭𑀺𑀲𑁆𑀲𑀦𑁆𑀢𑀺 𑁋 𑀫𑀸𑀮𑀸𑀯𑀘𑁆𑀙𑀁 𑀭𑁄𑀧𑁂𑀲𑁆𑀲𑀦𑁆𑀢𑀺𑀧𑀺 𑀭𑁄𑀧𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀲𑀺𑀜𑁆𑀘𑀺𑀲𑁆𑀲𑀦𑁆𑀢𑀺𑀧𑀺 𑀲𑀺𑀜𑁆𑀘𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀑𑀘𑀺𑀦𑀺𑀲𑁆𑀲𑀦𑁆𑀢𑀺𑀧𑀺 𑀑𑀘𑀺𑀦𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀕𑀦𑁆𑀣𑁂𑀲𑁆𑀲𑀦𑁆𑀢𑀺𑀧𑀺 𑀕𑀦𑁆𑀣𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀓𑀭𑀺𑀲𑁆𑀲𑀦𑁆𑀢𑀺𑀧𑀺 𑀓𑀸𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀦𑀁 𑀓𑀼𑀮𑀥𑀻𑀢𑀸𑀦𑀁 𑀓𑀼𑀮𑀓𑀼𑀫𑀸𑀭𑀻𑀦𑀁 𑀓𑀼𑀮𑀲𑀼𑀡𑁆𑀳𑀸𑀦𑀁 𑀓𑀼𑀮𑀤𑀸𑀲𑀻𑀦𑀁 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀪𑀢𑁄𑀯𑀡𑁆𑀝𑀺𑀓𑀫𑀸𑀮𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀫𑀜𑁆𑀚𑀭𑀺𑀓𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀺𑀥𑀽𑀢𑀺𑀓𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀯𑀝𑀁𑀲𑀓𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀆𑀯𑁂𑀴𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺, 𑀉𑀭𑀘𑁆𑀙𑀤𑀁 𑀳𑀭𑀺𑀲𑁆𑀲𑀦𑁆𑀢𑀺𑀧𑀺 𑀳𑀭𑀸𑀧𑁂𑀲𑁆𑀲𑀦𑁆𑀢𑀺𑀧𑀺. 𑀢𑁂 𑀓𑀼𑀮𑀺𑀢𑁆𑀣𑀻𑀳𑀺 𑀓𑀼𑀮𑀥𑀻𑀢𑀸𑀳𑀺 𑀓𑀼𑀮𑀓𑀼𑀫𑀸𑀭𑀻𑀳𑀺 𑀓𑀼𑀮𑀲𑀼𑀡𑁆𑀳𑀸𑀳𑀺 𑀓𑀼𑀮𑀤𑀸𑀲𑀻𑀳𑀺 𑀲𑀤𑁆𑀥𑀺𑀁 𑀏𑀓𑀪𑀸𑀚𑀦𑁂𑀧𑀺 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀏𑀓𑀣𑀸𑀮𑀓𑁂𑀧𑀺 𑀧𑀺𑀯𑀺𑀲𑁆𑀲𑀦𑁆𑀢𑀺, 𑀏𑀓𑀸𑀲𑀦𑁂𑀧𑀺 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺, 𑀏𑀓𑀫𑀜𑁆𑀘𑁂𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀏𑀓𑀢𑁆𑀣𑀭𑀡𑀸𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀏𑀓𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀏𑀓𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀧𑀺 𑀢𑀼𑀯𑀝𑁆𑀝𑀺𑀲𑁆𑀲𑀦𑁆𑀢𑀺, 𑀯𑀺𑀓𑀸𑀮𑁂𑀧𑀺 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀺, 𑀫𑀚𑁆𑀚𑀫𑁆𑀧𑀺 𑀧𑀺𑀯𑀺𑀲𑁆𑀲𑀦𑁆𑀢𑀺, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀫𑁆𑀧𑀺 𑀥𑀸𑀭𑁂𑀲𑁆𑀲𑀦𑁆𑀢𑀺, 𑀦𑀘𑁆𑀘𑀺𑀲𑁆𑀲𑀦𑁆𑀢𑀺𑀧𑀺, 𑀕𑀸𑀬𑀺𑀲𑁆𑀲𑀦𑁆𑀢𑀺𑀧𑀺, 𑀯𑀸𑀤𑁂𑀲𑁆𑀲𑀦𑁆𑀢𑀺𑀧𑀺, 𑀮𑀸𑀲𑁂𑀲𑁆𑀲𑀦𑁆𑀢𑀺𑀧𑀺; 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀕𑀸𑀬𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺, 𑀕𑀸𑀬𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀺𑀲𑁆𑀲𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀕𑀸𑀬𑀺𑀲𑁆𑀲𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀯𑀸𑀤𑁂𑀲𑁆𑀲𑀦𑁆𑀢𑀺; 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀲𑁆𑀲𑀦𑁆𑀢𑀺; 𑀅𑀝𑁆𑀞𑀧𑀤𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀤𑀲𑀧𑀤𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀆𑀓𑀸𑀲𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀧𑀭𑀺𑀳𑀸𑀭𑀧𑀣𑁂𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀲𑀦𑁆𑀢𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀔𑀮𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀖𑀝𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀲𑀮𑀸𑀓𑀳𑀢𑁆𑀣𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀅𑀓𑁆𑀔𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀧𑀗𑁆𑀕𑀘𑀻𑀭𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀯𑀗𑁆𑀓𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺 𑀫𑁄𑀓𑁆𑀔𑀘𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀘𑀺𑀗𑁆𑀕𑀼𑀮𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀧𑀢𑁆𑀢𑀸𑀴𑁆𑀳𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀭𑀣𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀥𑀦𑀼𑀓𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀅𑀓𑁆𑀔𑀭𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀫𑀦𑁂𑀲𑀺𑀓𑀸𑀬𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺, 𑀬𑀣𑀸𑀯𑀚𑁆𑀚𑁂𑀦𑀧𑀺 𑀓𑀻𑀴𑀺𑀲𑁆𑀲𑀦𑁆𑀢𑀺; 𑀳𑀢𑁆𑀣𑀺𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀅𑀲𑁆𑀲𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀭𑀣𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀥𑀦𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺, 𑀣𑀭𑀼𑀲𑁆𑀫𑀺𑀫𑁆𑀧𑀺 𑀲𑀺𑀓𑁆𑀔𑀺𑀲𑁆𑀲𑀦𑁆𑀢𑀺; 𑀳𑀢𑁆𑀣𑀺𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀺𑀲𑁆𑀲𑀦𑁆𑀢𑀺, 𑀅𑀲𑁆𑀲𑀲𑁆𑀲𑀧𑀺 𑀧𑀼𑀭𑀢𑁄 𑀥𑀸𑀯𑀺𑀲𑁆𑀲𑀦𑁆𑀢𑀺, 𑀭𑀣𑀲𑁆𑀲𑀧𑀺 𑀧𑀼𑀭𑀢𑁄 [𑀧𑀼𑀭𑀢𑁄 𑀥𑀸𑀯𑀺𑀲𑁆𑀲𑀦𑁆𑀢𑀺 (𑀲𑁆𑀬𑀸.)] 𑀥𑀸𑀯𑀺𑀲𑁆𑀲𑀦𑁆𑀢𑀺𑀧𑀺 𑀆𑀥𑀸𑀯𑀺𑀲𑁆𑀲𑀦𑁆𑀢𑀺𑀧𑀺; 𑀉𑀲𑁆𑀲𑁂𑀴𑁂𑀲𑁆𑀲𑀦𑁆𑀢𑀺𑀧𑀺, 𑀅𑀧𑁆𑀨𑁄𑀝𑁂𑀲𑁆𑀲𑀦𑁆𑀢𑀺𑀧𑀺, 𑀦𑀺𑀩𑁆𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺𑀧𑀺, 𑀫𑀼𑀝𑁆𑀞𑀻𑀳𑀺𑀧𑀺 𑀬𑀼𑀚𑁆𑀛𑀺𑀲𑁆𑀲𑀦𑁆𑀢𑀺; 𑀭𑀗𑁆𑀕𑀫𑀚𑁆𑀛𑁂𑀧𑀺 𑀲𑀗𑁆𑀖𑀸𑀝𑀺𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀘𑁆𑀘𑀓𑀺𑀁 𑀏𑀯𑀁 𑀯𑀓𑁆𑀔𑀦𑁆𑀢𑀺 [𑀯𑀤𑀺𑀲𑁆𑀲𑀦𑁆𑀢𑀺 (𑀓.)] 𑁋 ‘𑀇𑀥, 𑀪𑀕𑀺𑀦𑀺, 𑀦𑀘𑁆𑀘𑀲𑁆𑀲𑀽’𑀢𑀺; 𑀦𑀮𑀸𑀝𑀺𑀓𑀫𑁆𑀧𑀺 𑀤𑀲𑁆𑀲𑀦𑁆𑀢𑀺; 𑀯𑀺𑀯𑀺𑀥𑀫𑁆𑀧𑀺 𑀅𑀦𑀸𑀘𑀸𑀭𑀁 𑀆𑀘𑀭𑀺𑀲𑁆𑀲𑀦𑁆𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀲𑀸𑀭𑀺𑀧𑀼𑀢𑁆𑀢𑀸, 𑀓𑀻𑀝𑀸𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀣, 𑀢𑀼𑀫𑁆𑀳𑀸𑀓𑀁 𑀏𑀢𑁂 𑀲𑀤𑁆𑀥𑀺𑀯𑀺𑀳𑀸𑀭𑀺𑀦𑁄’’𑀢𑀺.

‘‘𑀓𑀣𑀁 𑀫𑀬𑀁, 𑀪𑀦𑁆𑀢𑁂, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀫, 𑀘𑀡𑁆𑀟𑀸 𑀢𑁂 𑀪𑀺𑀓𑁆𑀔𑀽 𑀨𑀭𑀼𑀲𑀸’’𑀢𑀺? ‘‘𑀢𑁂𑀦 𑀳𑀺 𑀢𑀼𑀫𑁆𑀳𑁂, 𑀲𑀸𑀭𑀺𑀧𑀼𑀢𑁆𑀢𑀸, 𑀩𑀳𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀣𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁 𑁋 𑀧𑀞𑀫𑀁 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀘𑁄𑀤𑁂𑀢𑀩𑁆𑀩𑀸, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑀸, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑀸, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁨𑁪. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀓𑀼𑀮𑀤𑀽𑀲𑀓𑀸 𑀧𑀸𑀧𑀲𑀫𑀸𑀘𑀸𑀭𑀸. 𑀇𑀫𑁂𑀲𑀁 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀓𑀼𑀮𑀸𑀦𑀺 𑀘 𑀇𑀫𑁂𑀳𑀺 𑀤𑀼𑀝𑁆𑀞𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀓𑀼𑀮𑀤𑀽𑀲𑀓𑀸 𑀧𑀸𑀧𑀲𑀫𑀸𑀘𑀸𑀭𑀸. 𑀇𑀫𑁂𑀲𑀁 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀓𑀼𑀮𑀸𑀦𑀺 𑀘 𑀇𑀫𑁂𑀳𑀺 𑀤𑀼𑀝𑁆𑀞𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀲𑀗𑁆𑀖𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀇𑀫𑁂 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀓𑀼𑀮𑀤𑀽𑀲𑀓𑀸 𑀧𑀸𑀧𑀲𑀫𑀸𑀘𑀸𑀭𑀸. 𑀇𑀫𑁂𑀲𑀁 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀓𑀼𑀮𑀸𑀦𑀺 𑀘 𑀇𑀫𑁂𑀳𑀺 𑀤𑀼𑀝𑁆𑀞𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀲𑀗𑁆𑀖𑁄 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁨𑁫. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 …𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁨𑁬. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀘𑀼𑀤𑁆𑀤𑀲𑀓𑀁

𑁨𑁭. [𑀧𑀭𑀺. 𑁩𑁨𑁩] ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀓𑀸𑀬𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀳𑀺, 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄; 𑀏𑀓𑁄 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄; 𑀏𑀓𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀓𑀸𑀬𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀏𑀓𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀓𑀗𑁆𑀔𑀫𑀸𑀦𑀘𑀼𑀤𑁆𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀸𑀭𑀲𑀯𑀢𑁆𑀢𑀁

𑁨𑁮. ‘‘𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂 𑀅𑀝𑁆𑀞𑀸𑀭𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁨𑁯. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀻𑀝𑀸𑀕𑀺𑀭𑀺𑀁 𑀕𑀦𑁆𑀢𑁆𑀯𑀸 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀻𑀝𑀸𑀕𑀺𑀭𑀺𑀲𑁆𑀫𑀸 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀅𑀓𑀸𑀲𑀺 𑁋 𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩𑀦𑁆𑀢𑀺. 𑀢𑁂 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀦𑁆𑀢𑀺, 𑀅𑀓𑁆𑀓𑁄𑀲𑀦𑁆𑀢𑀺, 𑀧𑀭𑀺𑀪𑀸𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀦𑁆𑀢𑀺; 𑀧𑀓𑁆𑀓𑀫𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀦𑁆𑀢𑀺𑀧𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀲𑁆𑀲𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀺𑀲𑁆𑀲𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀲𑁆𑀲𑀦𑁆𑀢𑀺, 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺, 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀲𑁆𑀲𑀦𑁆𑀢𑀺; 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺𑀧𑀻’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀪𑀺𑀓𑁆𑀔𑀽 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀦𑁆𑀢𑀺, 𑀅𑀓𑁆𑀓𑁄𑀲𑀦𑁆𑀢𑀺, 𑀧𑀭𑀺𑀪𑀸𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀦𑁆𑀢𑀺; 𑀧𑀓𑁆𑀓𑀫𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀦𑁆𑀢𑀺𑀧𑀻’’𑀢𑀺? ‘‘𑀲𑀘𑁆𑀘𑀁 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁 …𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑀸 𑀦 𑀲𑀫𑁆𑀫𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀦 𑀮𑁄𑀫𑀁 𑀧𑀸𑀢𑁂𑀲𑁆𑀲𑀦𑁆𑀢𑀺, 𑀦 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀺𑀲𑁆𑀲𑀦𑁆𑀢𑀺; 𑀦 𑀪𑀺𑀓𑁆𑀔𑀽 𑀔𑀫𑀸𑀧𑁂𑀲𑁆𑀲𑀦𑁆𑀢𑀺, 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺, 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀺; 𑀙𑀦𑁆𑀤𑀕𑀸𑀫𑀺𑀢𑀸 𑀤𑁄𑀲𑀕𑀸𑀫𑀺𑀢𑀸 𑀫𑁄𑀳𑀕𑀸𑀫𑀺𑀢𑀸 𑀪𑀬𑀕𑀸𑀫𑀺𑀢𑀸 𑀧𑀸𑀧𑁂𑀲𑁆𑀲𑀦𑁆𑀢𑀺; 𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀺𑀧𑀺, 𑀯𑀺𑀩𑁆𑀪𑀫𑀺𑀲𑁆𑀲𑀦𑁆𑀢𑀺𑀧𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁩𑁦. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁩𑁧. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁩𑁨. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺. 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸

𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.