𑁪. 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁

𑁩𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀆𑀯𑀸𑀲𑀺𑀓𑁄 𑀳𑁄𑀢𑀺, 𑀦𑀯𑀓𑀫𑁆𑀫𑀺𑀓𑁄 𑀥𑀼𑀯𑀪𑀢𑁆𑀢𑀺𑀓𑁄. 𑀬𑀤𑀸 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀼𑀓𑀸𑀫𑁄 𑀳𑁄𑀢𑀺 𑀢𑀤𑀸 𑀦 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽, 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀘𑁆𑀘𑀸𑀦𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑁄𑀝𑁆𑀞𑀺𑀓𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀧𑁆𑀧𑀺𑀦𑁄, 𑀆𑀬𑀲𑁆𑀫𑀸 𑀘 𑀫𑀳𑀸𑀘𑀼𑀦𑁆𑀤𑁄, 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄, 𑀆𑀬𑀲𑁆𑀫𑀸 𑀘 𑀭𑁂𑀯𑀢𑁄, 𑀆𑀬𑀲𑁆𑀫𑀸 𑀘 𑀉𑀧𑀸𑀮𑀺, 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄, 𑀆𑀬𑀲𑁆𑀫𑀸 𑀘 𑀭𑀸𑀳𑀼𑀮𑁄, 𑀓𑀸𑀲𑀻𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀬𑁂𑀦 𑀫𑀘𑁆𑀙𑀺𑀓𑀸𑀲𑀡𑁆𑀟𑁄 𑀢𑀤𑀯𑀲𑀭𑀼𑀁.

𑀅𑀲𑁆𑀲𑁄𑀲𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑀸 𑀓𑀺𑀭 𑀪𑀺𑀓𑁆𑀔𑀽 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀅𑀦𑀼𑀧𑁆𑀧𑀢𑁆𑀢𑀸𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀣𑁂𑀭𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀦𑁆𑀢𑀼 𑀫𑁂, 𑀪𑀦𑁆𑀢𑁂, 𑀣𑁂𑀭𑀸 𑀲𑁆𑀯𑀸𑀢𑀦𑀸𑀬 𑀆𑀕𑀦𑁆𑀢𑀼𑀓𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀼𑀁 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 [𑀅𑀥𑀺𑀯𑀸𑀲𑁂𑀲𑀼𑀁 𑀔𑁄 𑀢𑁂 𑀣𑁂𑀭𑀸 𑀪𑀺𑀓𑁆𑀔𑀽 (𑀲𑁆𑀬𑀸.)] 𑀢𑀼𑀡𑁆𑀳𑀻𑀪𑀸𑀯𑁂𑀦.

𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀣𑁂𑀭𑁂𑀳𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 ‘𑀧𑀼𑀩𑁆𑀩𑁂 𑀔𑁆𑀯𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑀤𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀼𑀓𑀸𑀫𑁄 𑀦 𑀫𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀦𑀺𑀫𑀦𑁆𑀢𑁂𑀢𑀺; 𑀲𑁄𑀤𑀸𑀦𑀺 𑀫𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀣𑁂𑀭𑁂 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀲𑀺; 𑀤𑀼𑀝𑁆𑀞𑁄𑀤𑀸𑀦𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀅𑀦𑀧𑁂𑀓𑁆𑀔𑁄 𑀯𑀺𑀭𑀢𑁆𑀢𑀭𑀽𑀧𑁄 𑀫𑀬𑀻’𑀢𑀺 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀕𑀳𑀧𑀢𑀺, 𑀦𑀸𑀥𑀺𑀯𑀸𑀲𑁂𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀣𑁂𑀭𑁂𑀳𑀻’’𑀢𑀺. ‘‘𑀅𑀮𑀁, 𑀕𑀳𑀧𑀢𑀺, 𑀦𑀸𑀥𑀺𑀯𑀸𑀲𑁂𑀫𑀻’’𑀢𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 ‘𑀓𑀺𑀁 𑀫𑁂 𑀓𑀭𑀺𑀲𑁆𑀲𑀢𑀺 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀅𑀥𑀺𑀯𑀸𑀲𑁂𑀦𑁆𑀢𑁄 𑀯𑀸 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀯𑀸’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁩𑁪. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 ‘𑀬𑀁𑀦𑀽𑀦𑀸𑀳𑀁 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀬𑀢𑁆𑀢𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀬𑁂𑀦𑀸𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀥𑀫𑁆𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀏𑀢𑀤𑀯𑁄𑀘 𑁋 ‘‘𑀧𑀳𑀽𑀢𑀁 𑀔𑁄 𑀢𑁂 𑀇𑀤𑀁, 𑀕𑀳𑀧𑀢𑀺, 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢𑀁; 𑀏𑀓𑀸 𑀘 𑀔𑁄 𑀇𑀥 𑀦𑀢𑁆𑀣𑀺 𑀬𑀤𑀺𑀤𑀁 𑀢𑀺𑀮𑀲𑀗𑁆𑀕𑀼𑀴𑀺𑀓𑀸’’𑀢𑀺. ‘‘𑀩𑀳𑀼𑀫𑁆𑀳𑀺 𑀯𑀢, 𑀪𑀦𑁆𑀢𑁂, 𑀭𑀢𑀦𑁂 𑀩𑀼𑀤𑁆𑀥𑀯𑀘𑀦𑁂 [𑀪𑀦𑁆𑀢𑁂 𑀩𑀼𑀤𑁆𑀥𑀯𑀘𑀦𑁂 (𑀲𑁆𑀬𑀸.)] 𑀯𑀺𑀚𑁆𑀚𑀫𑀸𑀦𑁂 𑀅𑀬𑁆𑀬𑁂𑀦 𑀲𑀼𑀥𑀫𑁆𑀫𑁂𑀦 𑀬𑀤𑁂𑀯 𑀓𑀺𑀜𑁆𑀘𑀺 𑀪𑀸𑀲𑀺𑀢𑀁 𑀬𑀤𑀺𑀤𑀁 𑀢𑀺𑀮𑀲𑀗𑁆𑀕𑀼𑀴𑀺𑀓𑀸𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑀦𑁆𑀢𑁂, 𑀤𑀓𑁆𑀔𑀺𑀡𑀸𑀧𑀣𑀓𑀸 𑀯𑀸𑀡𑀺𑀚𑀸 𑀧𑀼𑀭𑀢𑁆𑀣𑀺𑀫𑀁 𑀚𑀦𑀧𑀤𑀁 𑀅𑀕𑀫𑀁𑀲𑀼 𑀯𑀸𑀡𑀺𑀚𑁆𑀚𑀸𑀬. 𑀢𑁂 𑀢𑀢𑁄 𑀓𑀼𑀓𑁆𑀓𑀼𑀝𑀺𑀁 𑀆𑀦𑁂𑀲𑀼𑀁. 𑀅𑀣 𑀔𑁄 𑀲𑀸, 𑀪𑀦𑁆𑀢𑁂, 𑀓𑀼𑀓𑁆𑀓𑀼𑀝𑀻 𑀓𑀸𑀓𑁂𑀦 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀲𑀸 𑀧𑁄𑀢𑀓𑀁 𑀚𑀦𑁂𑀲𑀺. 𑀬𑀤𑀸 𑀔𑁄 𑀲𑁄, 𑀪𑀦𑁆𑀢𑁂, 𑀓𑀼𑀓𑁆𑀓𑀼𑀝𑀧𑁄𑀢𑀓𑁄 𑀓𑀸𑀓𑀯𑀲𑁆𑀲𑀁 𑀯𑀲𑁆𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀸𑀓𑀓𑀼𑀓𑁆𑀓𑀼𑀝𑀻𑀢𑀺 𑀯𑀲𑁆𑀲𑀢𑀺; 𑀬𑀤𑀸 𑀓𑀼𑀓𑁆𑀓𑀼𑀝𑀺𑀯𑀲𑁆𑀲𑀁 𑀯𑀲𑁆𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀼𑀓𑁆𑀓𑀼𑀝𑀺𑀓𑀸𑀓𑀸𑀢𑀺 𑀯𑀲𑁆𑀲𑀢𑀺. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀩𑀳𑀼𑀫𑁆𑀳𑀺 𑀭𑀢𑀦𑁂 𑀩𑀼𑀤𑁆𑀥𑀯𑀘𑀦𑁂 𑀯𑀺𑀚𑁆𑀚𑀫𑀸𑀦𑁂 𑀅𑀬𑁆𑀬𑁂𑀦 𑀲𑀼𑀥𑀫𑁆𑀫𑁂𑀦 𑀬𑀤𑁂𑀯 𑀓𑀺𑀜𑁆𑀘𑀺 𑀪𑀸𑀲𑀺𑀢𑀁 𑀬𑀤𑀺𑀤𑀁 𑀢𑀺𑀮𑀲𑀁𑀕𑀼𑀴𑀺𑀓𑀸’’𑀢𑀺. ‘‘𑀅𑀓𑁆𑀓𑁄𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺, 𑀧𑀭𑀺𑀪𑀸𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺. 𑀏𑀲𑁄 𑀢𑁂, 𑀕𑀳𑀧𑀢𑀺, 𑀆𑀯𑀸𑀲𑁄, 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀦𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑀁 𑀲𑀼𑀥𑀫𑁆𑀫𑀁 𑀅𑀓𑁆𑀓𑁄𑀲𑀸𑀫𑀺, 𑀧𑀭𑀺𑀪𑀸𑀲𑀸𑀫𑀺 [𑀦 𑀧𑀭𑀺𑀪𑀸𑀲𑀸𑀫𑀺 (𑀲𑀻. 𑀲𑁆𑀬𑀸.)]. 𑀯𑀲𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂. 𑀭𑀫𑀡𑀻𑀬𑀁 𑀅𑀫𑁆𑀩𑀸𑀝𑀓𑀯𑀦𑀁. 𑀅𑀳𑀁 𑀅𑀬𑁆𑀬𑀲𑁆𑀲 𑀲𑀼𑀥𑀫𑁆𑀫𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺, 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀅𑀓𑁆𑀓𑁄𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺, 𑀧𑀭𑀺𑀪𑀸𑀲𑀲𑀺 𑀫𑀁 𑀢𑁆𑀯𑀁, 𑀕𑀳𑀧𑀢𑀺. 𑀏𑀲𑁄 𑀢𑁂, 𑀕𑀳𑀧𑀢𑀺, 𑀆𑀯𑀸𑀲𑁄, 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀓𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀕𑀫𑀺𑀲𑁆𑀲𑀢𑀻’’𑀢𑀺? ‘‘𑀲𑀸𑀯𑀢𑁆𑀣𑀺𑀁 𑀔𑁄 𑀅𑀳𑀁, 𑀕𑀳𑀧𑀢𑀺, 𑀕𑀫𑀺𑀲𑁆𑀲𑀸𑀫𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂, 𑀬𑀜𑁆𑀘 𑀅𑀢𑁆𑀢𑀦𑀸 𑀪𑀡𑀺𑀢𑀁, 𑀬𑀜𑁆𑀘 𑀫𑀬𑀸 𑀪𑀡𑀺𑀢𑀁 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀳𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀅𑀬𑁆𑀬𑁄 𑀲𑀼𑀥𑀫𑁆𑀫𑁄 𑀧𑀼𑀦𑀤𑁂𑀯 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀧𑀘𑁆𑀘𑀸𑀕𑀘𑁆𑀙𑁂𑀬𑁆𑀬𑀸’’𑀢𑀺.

𑁩𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀲𑀸𑀯𑀢𑁆𑀣𑀺 𑀚𑁂𑀢𑀯𑀦𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀬𑀜𑁆𑀘 𑀅𑀢𑁆𑀢𑀦𑀸 𑀪𑀡𑀺𑀢𑀁 𑀬𑀜𑁆𑀘 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 𑀪𑀡𑀺𑀢𑀁 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺.

𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀲𑁆𑀲𑀲𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀲𑁆𑀲𑀲𑀺? 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸…𑀧𑁂… 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀼 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀓𑀸𑀢𑀩𑁆𑀩𑀁 𑁋 𑀧𑀞𑀫𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑁄𑀤𑁂𑀢𑀩𑁆𑀩𑁄, 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑀩𑁆𑀩𑁄, 𑀲𑀸𑀭𑁂𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑀩𑁆𑀩𑁄, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩𑁬. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀤𑀸𑀬𑀓𑀁 𑀓𑀸𑀭𑀓𑀁 𑀲𑀗𑁆𑀖𑀼𑀧𑀝𑁆𑀞𑀸𑀓𑀁 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺, 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀭𑀡𑀁 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀓𑀢𑀁 𑀲𑀗𑁆𑀖𑁂𑀦 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑁋 𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄𑀢𑀺. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁩𑁭. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘. 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀅𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀯𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀅𑀯𑀺𑀦𑀬𑀓𑀫𑁆𑀫𑀜𑁆𑀘, 𑀤𑀼𑀯𑀽𑀧𑀲𑀦𑁆𑀢𑀜𑁆𑀘.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁

𑁩𑁮. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘. 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺…𑀧𑁂… 𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀧𑀼𑀘𑁆𑀙𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀅𑀤𑁂𑀲𑀺𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀘𑁄𑀤𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀲𑀸𑀭𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺…𑀧𑁂… 𑀆𑀧𑀢𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀓𑀢𑀁 𑀳𑁄𑀢𑀺, 𑀥𑀫𑁆𑀫𑁂𑀦 𑀓𑀢𑀁 𑀳𑁄𑀢𑀺, 𑀲𑀫𑀕𑁆𑀕𑁂𑀦 𑀓𑀢𑀁 𑀳𑁄𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀯𑀺𑀦𑀬𑀓𑀫𑁆𑀫𑀜𑁆𑀘, 𑀲𑀼𑀯𑀽𑀧𑀲𑀦𑁆𑀢𑀜𑁆𑀘.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀆𑀓𑀗𑁆𑀔𑀫𑀸𑀦𑀘𑀢𑀼𑀓𑁆𑀓𑀁

𑁩𑁯. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻𑀦𑀁 𑀅𑀦𑀸𑀯𑀸𑀲𑀸𑀬 [𑀅𑀯𑀸𑀲𑀸𑀬 (𑀲𑀻.)] 𑀧𑀭𑀺𑀲𑀓𑁆𑀓𑀢𑀺, 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀕𑀺𑀳𑀻𑀦𑀁 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀺𑀳𑀻𑀦𑀁 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀺𑀳𑀻𑀦𑀁 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀺𑀳𑀻 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺, 𑀕𑀺𑀳𑀻𑀦𑀁 𑀥𑀫𑁆𑀫𑀺𑀓𑀁 𑀧𑀝𑀺𑀲𑁆𑀲𑀯𑀁 𑀦 𑀲𑀘𑁆𑀘𑀸𑀧𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀧𑀜𑁆𑀘𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀕𑀺𑀳𑀻𑀦𑀁 𑀅𑀮𑀸𑀪𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀅𑀦𑀢𑁆𑀣𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀅𑀦𑀸𑀯𑀸𑀲𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀏𑀓𑁄 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻 𑀕𑀺𑀳𑀻𑀳𑀺 𑀪𑁂𑀤𑁂𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

‘‘𑀅𑀧𑀭𑁂𑀲𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀏𑀓𑁄 𑀕𑀺𑀳𑀻𑀦𑀁 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀏𑀓𑁄 𑀕𑀺𑀳𑀻 𑀳𑀻𑀦𑁂𑀦 𑀔𑀼𑀁𑀲𑁂𑀢𑀺 𑀳𑀻𑀦𑁂𑀦 𑀯𑀫𑁆𑀪𑁂𑀢𑀺, 𑀏𑀓𑁄 𑀕𑀺𑀳𑀻𑀦𑀁 𑀥𑀫𑁆𑀫𑀺𑀓𑀁 𑀧𑀝𑀺𑀲𑁆𑀲𑀯𑀁 𑀦 𑀲𑀘𑁆𑀘𑀸𑀧𑁂𑀢𑀺 𑁋 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀽𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄, 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬.

𑀆𑀓𑀗𑁆𑀔𑀫𑀸𑀦𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀅𑀝𑁆𑀞𑀸𑀭𑀲𑀯𑀢𑁆𑀢𑀁

𑁪𑁦. ‘‘𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀲𑀫𑁆𑀫𑀸𑀯𑀢𑁆𑀢𑀦𑀸 𑁋 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄, 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸, 𑀲𑀫𑁆𑀫𑀢𑁂𑀦𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀺𑀢𑀩𑁆𑀩𑀸. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀲𑀸 𑀆𑀧𑀢𑁆𑀢𑀺 𑀦 𑀆𑀧𑀚𑁆𑀚𑀺𑀢𑀩𑁆𑀩𑀸, 𑀅𑀜𑁆𑀜𑀸 𑀯𑀸 𑀢𑀸𑀤𑀺𑀲𑀺𑀓𑀸, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸; 𑀓𑀫𑁆𑀫𑀁 𑀦 𑀕𑀭𑀳𑀺𑀢𑀩𑁆𑀩𑀁, 𑀓𑀫𑁆𑀫𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑀸. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑁄 𑀞𑀧𑁂𑀢𑀩𑁆𑀩𑁄, 𑀦 𑀧𑀯𑀸𑀭𑀡𑀸 𑀞𑀧𑁂𑀢𑀩𑁆𑀩𑀸, 𑀦 𑀲𑀯𑀘𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀦𑀼𑀯𑀸𑀤𑁄 𑀧𑀝𑁆𑀞𑀧𑁂𑀢𑀩𑁆𑀩𑁄, 𑀦 𑀑𑀓𑀸𑀲𑁄 𑀓𑀸𑀭𑁂𑀢𑀩𑁆𑀩𑁄, 𑀦 𑀘𑁄𑀤𑁂𑀢𑀩𑁆𑀩𑁄, 𑀦 𑀲𑀸𑀭𑁂𑀢𑀩𑁆𑀩𑁄, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀅𑀝𑁆𑀞𑀸𑀭𑀲𑀯𑀢𑁆𑀢𑀁 𑀦𑀺𑀝𑁆𑀞𑀺𑀢𑀁.

𑁪𑁧. 𑀅𑀣 𑀔𑁄 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀅𑀓𑀸𑀲𑀺 𑁋 ‘‘𑀘𑀺𑀢𑁆𑀢𑁄 𑀢𑁂 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄’’𑀢𑀺. 𑀲𑁄 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀫𑀗𑁆𑀓𑀼𑀪𑀽𑀢𑁄 𑀦𑀸𑀲𑀓𑁆𑀔𑀺 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀔𑀫𑀸𑀧𑀺𑀢𑁄 𑀢𑀬𑀸, 𑀆𑀯𑀼𑀲𑁄 𑀲𑀼𑀥𑀫𑁆𑀫, 𑀘𑀺𑀢𑁆𑀢𑁄 𑀕𑀳𑀧𑀢𑀻’’𑀢𑀺? ‘‘𑀇𑀥𑀸𑀳𑀁, 𑀆𑀯𑀼𑀲𑁄, 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀫𑀗𑁆𑀓𑀼𑀪𑀽𑀢𑁄 𑀦𑀸𑀲𑀓𑁆𑀔𑀺𑀁 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂…. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀁 𑀤𑁂𑀢𑀼 𑁋 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂 𑀤𑀸𑀢𑀩𑁆𑀩𑁄 𑁋 𑀧𑀞𑀫𑀁 𑀪𑀺𑀓𑁆𑀔𑀼 𑀬𑀸𑀘𑀺𑀢𑀩𑁆𑀩𑁄, 𑀬𑀸𑀘𑀺𑀢𑁆𑀯𑀸 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀁 𑀤𑀤𑁂𑀬𑁆𑀬 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀁 𑀪𑀺𑀓𑁆𑀔𑀼𑀁 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀁 𑀤𑁂𑀢𑀺 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑀲𑁆𑀲 𑀤𑀸𑀦𑀁 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀺𑀦𑁆𑀦𑁄 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀤𑀽𑀢𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁪𑁨. ‘‘𑀢𑁂𑀦, 𑀪𑀺𑀓𑁆𑀔𑀯𑁂, 𑀲𑀼𑀥𑀫𑁆𑀫𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀔𑀫𑀸𑀧𑁂𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀧𑀲𑀸𑀤𑁂𑀫𑀺 𑀢’𑀦𑁆𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀧𑀲𑀸𑀤𑁂𑀢𑀺 𑀢’𑀦𑁆𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀅𑀳𑀁 𑀢𑀁 𑀧𑀲𑀸𑀤𑁂𑀫𑀻’𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄 𑁋 ‘𑀔𑀫, 𑀕𑀳𑀧𑀢𑀺, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀲𑀗𑁆𑀖𑀲𑁆𑀲 𑀯𑀘𑀦𑁂𑀦𑀸’𑀢𑀺. 𑀏𑀯𑀜𑁆𑀘𑁂 𑀯𑀼𑀘𑁆𑀘𑀫𑀸𑀦𑁄 𑀔𑀫𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀢𑀺, 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 [𑀲𑀼𑀥𑀫𑁆𑀫𑀁 𑀪𑀺𑀓𑁆𑀔𑀼𑀁… 𑀲𑀸 𑀆𑀧𑀢𑁆𑀢𑀺 𑀤𑁂𑀲𑀸𑀧𑁂𑀢𑀩𑁆𑀩𑀸𑀢𑀺 (𑀲𑀻. 𑀲𑁆𑀬𑀸.)] 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀤𑀲𑁆𑀲𑀦𑀽𑀧𑀘𑀸𑀭𑀁 𑀅𑀯𑀺𑀚𑀳𑀸𑀧𑁂𑀢𑁆𑀯𑀸 𑀲𑀯𑀦𑀽𑀧𑀘𑀸𑀭𑀁 𑀅𑀯𑀺𑀚𑀳𑀸𑀧𑁂𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀢𑀁 𑀆𑀧𑀢𑁆𑀢𑀺𑀁 𑀤𑁂𑀲𑀸𑀧𑁂𑀢𑀩𑁆𑀩𑁄’’𑀢𑀺 [𑀲𑀼𑀥𑀫𑁆𑀫𑀁 𑀪𑀺𑀓𑁆𑀔𑀼𑀁… 𑀲𑀸 𑀆𑀧𑀢𑁆𑀢𑀺 𑀤𑁂𑀲𑀸𑀧𑁂𑀢𑀩𑁆𑀩𑀸𑀢𑀺 (𑀲𑀻. 𑀲𑁆𑀬𑀸.)].

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀥𑀫𑁆𑀫𑁄 𑀅𑀦𑀼𑀤𑀽𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀘𑁆𑀙𑀺𑀓𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀔𑀫𑀸𑀧𑁂𑀲𑀺. 𑀲𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀅𑀳𑀁, 𑀆𑀯𑀼𑀲𑁄, 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺. 𑀓𑀣𑀁 𑀦𑀼 𑀔𑁄 𑀫𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁪𑁩. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

[𑀧𑀭𑀺. 𑁪𑁨𑁦] ‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀘𑁄𑀤𑁂𑀢𑀺, 𑀲𑀸𑀭𑁂𑀢𑀺, 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁’’.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁

𑁪𑁪. ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀦 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺, 𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁 𑀲𑀸𑀤𑀺𑀬𑀢𑀺, 𑀲𑀫𑁆𑀫𑀢𑁄𑀧𑀺 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀑𑀯𑀤𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀧𑀭𑁂𑀳𑀺𑀧𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀦 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁; 𑀓𑀫𑁆𑀫𑀁 𑀦 𑀕𑀭𑀳𑀢𑀺, 𑀓𑀫𑁆𑀫𑀺𑀓𑁂 𑀦 𑀕𑀭𑀳𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀧𑁄𑀲𑀣𑀁 𑀞𑀧𑁂𑀢𑀺, 𑀦 𑀧𑀯𑀸𑀭𑀡𑀁 𑀞𑀧𑁂𑀢𑀺, 𑀦 𑀲𑀯𑀘𑀦𑀻𑀬𑀁 𑀓𑀭𑁄𑀢𑀺, 𑀦 𑀅𑀦𑀼𑀯𑀸𑀤𑀁 𑀧𑀝𑁆𑀞𑀧𑁂𑀢𑀺, 𑀦 𑀑𑀓𑀸𑀲𑀁 𑀓𑀸𑀭𑁂𑀢𑀺, 𑀦 𑀘𑁄𑀤𑁂𑀢𑀺, 𑀦 𑀲𑀸𑀭𑁂𑀢𑀺, 𑀦 𑀪𑀺𑀓𑁆𑀔𑀽𑀳𑀺 𑀲𑀫𑁆𑀧𑀬𑁄𑀚𑁂𑀢𑀺 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑁂 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀅𑀝𑁆𑀞𑀸𑀭𑀲𑀓𑀁 𑀦𑀺𑀝𑁆𑀞𑀺𑀢𑀁.

𑁪𑁫. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀁. 𑀢𑁂𑀦 [𑀢𑁂𑀦 𑀳𑀺 (𑀲𑁆𑀬𑀸. 𑀓.)], 𑀪𑀺𑀓𑁆𑀔𑀯𑁂, 𑀲𑀼𑀥𑀫𑁆𑀫𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀅𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀸𑀫𑀺, 𑀮𑁄𑀫𑀁 𑀧𑀸𑀢𑁂𑀫𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀸𑀫𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀸𑀫𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑀼𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺…𑀧𑁂… 𑀢𑀢𑀺𑀬𑀫𑁆𑀧𑀺 𑀏𑀢𑀫𑀢𑁆𑀣𑀁 𑀯𑀤𑀸𑀫𑀺 𑁋 𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀲𑀼𑀥𑀫𑁆𑀫𑁄 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀓𑀢𑁄 𑀲𑀫𑁆𑀫𑀸 𑀯𑀢𑁆𑀢𑀢𑀺, 𑀮𑁄𑀫𑀁 𑀧𑀸𑀢𑁂𑀢𑀺, 𑀦𑁂𑀢𑁆𑀣𑀸𑀭𑀁 𑀯𑀢𑁆𑀢𑀢𑀺, 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀲𑀗𑁆𑀖𑁂𑀦 𑀲𑀼𑀥𑀫𑁆𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.