𑀧𑀼𑀘𑁆𑀙𑀸𑀯𑀸𑀭𑁄

𑁧. 𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸

𑀏𑀓𑁂𑀓𑀁 𑀢𑀺𑀓𑀁 𑀤𑀼𑀓𑀜𑁆𑀘𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀲𑀼 𑀩𑀸𑀯𑀻𑀲𑀢𑀺𑀬𑀸 𑀢𑀺𑀓𑁂𑀲𑀼 𑀳𑁂𑀢𑀼𑀤𑀼𑀓𑀸𑀤𑀻𑀲𑀼 𑀲𑀢𑀁 𑀤𑀼𑀓𑁂𑀲𑀼 𑀏𑀓𑁂𑀓𑀁 𑀢𑀺𑀓𑀁 𑀤𑀼𑀓𑀜𑁆𑀘. 𑀦 𑀢𑀺𑀓𑀤𑀼𑀓𑀦𑁆𑀢𑀺 𑀢𑀼𑀮𑁆𑀬𑀬𑁄𑀕𑀻𑀦𑀁 𑀦 𑀢𑀺𑀓𑀤𑀼𑀓𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀓𑀯𑀺𑀲𑀺𑀝𑁆𑀞𑀁 𑀧𑀦 𑀤𑀼𑀓𑀁, 𑀤𑀼𑀓𑀯𑀺𑀲𑀺𑀝𑁆𑀞𑀜𑁆𑀘 𑀢𑀺𑀓𑀁, 𑀢𑀺𑀓𑀯𑀺𑀲𑀺𑀝𑁆𑀞𑀢𑀺𑀓𑀤𑀼𑀓𑀯𑀺𑀲𑀺𑀝𑁆𑀞𑀤𑀼𑀓𑁂𑀲𑀼 𑀯𑀺𑀬 𑀦𑀺𑀲𑁆𑀲𑀸𑀬 𑀉𑀧𑀭𑀺 𑀤𑁂𑀲𑀦𑀸 𑀧𑀯𑀢𑁆𑀢𑀸 𑀏𑀯𑀸𑀢𑀺.

𑀬𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑀸 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀻𑀲𑀼, 𑀢𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑀸 𑀧𑀝𑀺𑀘𑁆𑀘𑀢𑁆𑀣𑀁 𑀨𑀭𑀦𑁆𑀢𑀸 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑀝𑁆𑀞𑀁 𑀲𑀸𑀥𑁂𑀦𑁆𑀢𑀸 𑀓𑀼𑀲𑀮𑀸𑀤𑀺𑀧𑀘𑁆𑀘𑀬𑀸 𑀘𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳𑀸𑀢𑀺 𑀬𑀲𑁆𑀫𑀸 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼 𑀧𑀝𑀺𑀘𑁆𑀘𑀢𑁆𑀣𑀨𑀭𑀡𑀁 𑀉𑀪𑀬𑁂𑀲𑀁 𑀢𑁂𑀲𑀁 𑀲𑀳𑀪𑀸𑀯𑁂 𑀲𑀢𑀺, 𑀦𑀸𑀜𑁆𑀜𑀣𑀸. 𑀢𑁂𑀦𑁂𑀯 𑀓𑀸𑀭𑀡𑁂𑀦𑀸𑀳 ‘‘𑀢𑁂 𑀘 𑀔𑁄 𑀲𑀳𑀚𑀸𑀢𑀸𑀯𑀸’’𑀢𑀺. 𑀢𑁂𑀢𑀺 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑀸. 𑀢𑁂𑀲𑀼 𑀳𑀺 𑀳𑁂𑀢𑀼𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀸𑀤𑀬𑁄 𑀲𑀳𑀚𑀸𑀢𑀸, 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀤𑀬𑁄 𑀅𑀲𑀳𑀚𑀸𑀢𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺. 𑀏𑀢𑁂𑀳𑀺 𑀤𑁆𑀯𑀻𑀳𑀺 𑀯𑀸𑀭𑁂𑀳𑀺 𑀇𑀢𑀭𑁂𑀢𑀭𑀢𑁆𑀣𑀩𑁄𑀥𑀦𑀯𑀲𑁂𑀦 𑀧𑀯𑀢𑁆𑀢𑀸𑀬 𑀤𑁂𑀲𑀦𑀸𑀬 𑀓𑀺𑀁 𑀲𑀸𑀥𑀺𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀜𑁆𑀘 𑀦𑀺𑀭𑀼𑀢𑁆𑀢𑀺𑀓𑁄𑀲𑀮𑁆𑀮𑀁 𑀚𑀦𑀺𑀢𑀁 𑀳𑁄𑀢𑀻’’𑀢𑀺.

𑀢𑁂 𑀢𑁂 𑀧𑀜𑁆𑀳𑁂 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 ‘‘𑀲𑀺𑀬𑀸 𑀓𑀼𑀲𑀮𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀬𑁄 𑀬𑁂 𑀬𑁂 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑀦𑁆𑀢𑀺, 𑀢𑁂 𑀢𑁂 𑀧𑀜𑁆𑀳𑁂 𑀉𑀤𑁆𑀥𑀭𑀺𑀢𑁆𑀯𑀸. 𑀧𑀫𑀸𑀤𑀮𑁂𑀔𑀸 𑀏𑀲𑀸𑀢𑀺 𑀇𑀤𑀁 ‘‘𑀓𑀼𑀲𑀮𑁄 𑀳𑁂𑀢𑀼 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀥𑀫𑁆𑀫𑀸𑀦’’𑀦𑁆𑀢𑀺 𑀮𑀺𑀔𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀝𑀺𑀘𑁆𑀘𑀲𑀳𑀚𑀸𑀢𑀯𑀸𑀭𑁂𑀲𑀼 𑀲𑀳𑀚𑀸𑀢𑀧𑀘𑁆𑀘𑀬𑁄, 𑀧𑀘𑁆𑀘𑀬𑀦𑀺𑀲𑁆𑀲𑀬𑀯𑀸𑀭𑁂𑀲𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀲𑀁𑀲𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀯𑀸𑀭𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄 𑀏𑀓𑀦𑁆𑀢𑀺𑀓𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀼𑀭𑀺𑀫𑀯𑀸𑀭𑁂𑀲𑀼…𑀧𑁂… 𑀦𑀺𑀬𑀫𑁂𑀢𑁆𑀯𑀸’’𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀧𑀼𑀭𑀺𑀫𑀯𑀸𑀭𑁂𑀲𑀼 𑀙𑀲𑀼. 𑀦 𑀯𑀺𑀜𑁆𑀜𑀸𑀬𑀦𑁆𑀢𑀺 𑀲𑀭𑀽𑀧𑀢𑁄 𑀅𑀦𑀼𑀤𑁆𑀥𑀝𑀢𑁆𑀢𑀸. 𑀏𑀯𑀫𑀸𑀤𑀻𑀳𑀺 𑀧𑀜𑁆𑀳𑁂𑀳𑀺. 𑀳𑁂𑀢𑀸𑀤𑀺𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀽𑀢𑀺 𑀳𑁂𑀢𑀼𑀆𑀤𑀻𑀲𑀼 𑀧𑀘𑁆𑀘𑀬𑀥𑀫𑁆𑀫𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀸𑀤𑀺𑀪𑁂𑀤𑁂𑀲𑀼 𑀢𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀲𑀼. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀳𑁂𑀢𑀸𑀤𑀺𑀧𑀘𑁆𑀘𑀬𑀸𑀦𑀁 𑀦𑀺𑀘𑁆𑀙𑀬𑀸𑀪𑀸𑀯𑀢𑁄𑀢𑀺 ‘‘𑀇𑀫𑁂 𑀦𑀸𑀫 𑀢𑁂 𑀳𑁂𑀢𑀼𑀆𑀤𑀬𑁄 𑀧𑀘𑁆𑀘𑀬𑀥𑀫𑁆𑀫𑀸’’𑀢𑀺 𑀦𑀺𑀘𑁆𑀙𑀬𑀸𑀪𑀸𑀯𑀢𑁄 𑀲𑀭𑀽𑀧𑀢𑁄 𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀦𑀸𑀫 𑀦𑀸𑀦𑀸𑀚𑀝𑀸𑀚𑀝𑀺𑀢𑀁 𑀕𑀼𑀫𑁆𑀩𑀦𑁆𑀢𑀭𑀕𑀢𑀜𑁆𑀘 𑀢𑀁𑀲𑀤𑀺𑀲𑀁 𑀲𑀭𑀽𑀧𑀢𑁄 𑀅𑀤𑀺𑀲𑁆𑀲𑀫𑀸𑀦𑀁 𑀇𑀤𑀁 𑀢𑀦𑁆𑀢𑀺 𑀦 𑀯𑀺𑀦𑀺𑀘𑁆𑀙𑀺𑀦𑀻𑀬𑀢𑀺, 𑀏𑀯𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄𑀧𑀺 𑀅𑀢𑁆𑀣𑁄 𑀲𑀭𑀽𑀧𑀢𑁄 𑀅𑀦𑀺𑀤𑁆𑀥𑀸𑀭𑀺𑀢𑁄 𑀦𑀺𑀚𑁆𑀚𑀝𑁄 𑀦𑀺𑀕𑀼𑀫𑁆𑀩𑁄 𑀘 𑀦𑀸𑀫 𑀦 𑀳𑁄𑀢𑀺 𑀦𑀺𑀘𑁆𑀙𑀬𑀸𑀪𑀸𑀯𑀢𑁄, 𑀲𑀭𑀽𑀧𑀢𑁄 𑀧𑀦 𑀢𑀲𑁆𑀫𑀺𑀁 𑀦𑀺𑀤𑁆𑀥𑀸𑀭𑀺𑀢𑁂 𑀢𑀩𑁆𑀩𑀺𑀲𑀬𑀲𑁆𑀲 𑀦𑀺𑀘𑁆𑀙𑀬𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑀲𑁆𑀲 𑀅𑀲𑀫𑁆𑀩𑀼𑀤𑁆𑀥𑀪𑀸𑀯𑀸𑀧𑁆𑀧𑀢𑁆𑀢𑀺𑀬𑀸 𑀲𑁄 𑀧𑀜𑁆𑀳𑁄 𑀦𑀺𑀚𑁆𑀚𑀝𑁄 𑀦𑀺𑀕𑀼𑀫𑁆𑀩𑁄 𑀘 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀘𑁆𑀙𑀬𑀸𑀪𑀸𑀯𑀢𑁄 𑀢𑁂 𑀧𑀜𑁆𑀳𑀸 𑀦𑀺𑀚𑁆𑀚𑀝𑀸 𑀦𑀺𑀕𑀼𑀫𑁆𑀩𑀸 𑀘 𑀓𑀢𑁆𑀯𑀸 𑀦 𑀯𑀺𑀪𑀢𑁆𑀢𑀸’’𑀢𑀺, ‘‘𑀦 𑀓𑁄𑀘𑀺 𑀧𑀼𑀘𑁆𑀙𑀸𑀲𑀗𑁆𑀕𑀳𑀺𑀢𑁄…𑀧𑁂… 𑀯𑀺𑀪𑀢𑁆𑀢𑀸’’𑀢𑀺 𑀘. 𑀢𑀦𑁆𑀢𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀁 𑀲𑀦𑁆𑀥𑀸𑀬 𑀦𑀺𑀚𑁆𑀚𑀝𑀢𑀸 𑀦 𑀯𑀼𑀢𑁆𑀢𑀸, 𑀅𑀣 𑀔𑁄 𑀦𑀺𑀘𑁆𑀙𑀬𑀼𑀧𑁆𑀧𑀸𑀤𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀞𑀧𑀦𑀁 𑀦𑀸𑀫 𑀇𑀥 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀧𑀢𑀺𑀝𑁆𑀞𑀧𑀦𑀁, 𑀢𑀁 𑀧𑀦 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀁 𑀚𑁄𑀢𑀦𑀦𑁆𑀢𑀺 𑀆𑀳 ‘‘𑀧𑀓𑀸𑀲𑀺𑀢𑀢𑁆𑀢𑀸’’𑀢𑀺. 𑀧𑀓𑀸𑀭𑁂𑀳𑀻𑀢𑀺 𑀳𑁂𑀢𑀼𑀆𑀤𑀺𑀧𑀘𑁆𑀘𑀬𑀧𑁆𑀧𑀓𑀸𑀭𑁂𑀳𑀺, 𑀓𑀼𑀲𑀮𑀸𑀤𑀺𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑁆𑀧𑀓𑀸𑀭𑁂𑀳𑀺 𑀯𑀸.

𑁨𑁫-𑁩𑁪. 𑀧𑀭𑀺𑀓𑀧𑁆𑀧𑀦𑀁 𑀯𑀺𑀤𑀳𑀦𑀦𑁆𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀭𑀺𑀓𑀧𑁆𑀧𑀧𑀼𑀘𑁆𑀙𑀸𑀢𑀺 𑀯𑀺𑀥𑀺𑀧𑀼𑀘𑁆𑀙𑀸’’𑀢𑀺. 𑀲𑀺𑀬𑀸𑀢𑀺 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀲𑁄 𑀯𑀺𑀥𑀺 𑀓𑀺𑀁 𑀅𑀢𑁆𑀣𑀻𑀢𑀺 𑀏𑀢𑁂𑀦 ‘‘𑀲𑀺𑀬𑀸’’𑀢𑀺 𑀯𑀺𑀥𑀺𑀫𑁆𑀳𑀺 𑀓𑀺𑀭𑀺𑀬𑀸𑀧𑀤𑀁. 𑀧𑀼𑀘𑁆𑀙𑀸 𑀧𑀦 𑀯𑀸𑀓𑁆𑀬𑀢𑁆𑀣𑀲𑀺𑀤𑁆𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀫𑁂𑀯 𑀳𑀺 𑀯𑀸𑀓𑁆𑀬𑀢𑁆𑀣𑀲𑀺𑀤𑁆𑀥𑀁 𑀧𑀼𑀘𑁆𑀙𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀓𑀺𑀁 𑀲𑁄 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀁𑀧𑀼𑀘𑁆𑀙𑀦𑀁 𑀧𑀭𑀺𑀓𑀧𑁆𑀧𑀧𑀼𑀘𑁆𑀙𑀸𑀢𑀺 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀳𑀺 𑀓𑀺𑀭𑀺𑀬𑀸𑀬 𑀧𑀤𑁂𑀦𑁂𑀯 𑀧𑀼𑀘𑁆𑀙𑀸 𑀯𑀺𑀪𑀸𑀯𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺. ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀉𑀪𑀬𑀫𑀺𑀤𑀁 𑀧𑀘𑁆𑀘𑀬𑀯𑀘𑀦𑀁, ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀘𑀦𑀁. 𑀢𑁂𑀲𑀼 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑁂 𑀯𑀺𑀪𑀸𑀯𑀺𑀢𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀢𑁄 𑀯𑀺𑀪𑀸𑀯𑀺𑀢𑀸𑀬𑁂𑀯 𑀳𑁄𑀢𑀻𑀢𑀺 𑀧𑀘𑁆𑀘𑀬𑀥𑀫𑁆𑀫𑁄𑀯 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀢𑀢𑁆𑀣 𑀘 𑀧𑀘𑁆𑀘𑀬𑀥𑀫𑁆𑀫𑀯𑀺𑀲𑀺𑀝𑁆𑀞𑁄 𑀧𑀝𑀺𑀘𑁆𑀘𑀢𑁆𑀣𑁄 𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑁄 𑀲𑀺𑀬𑀸 𑀧𑀘𑁆𑀘𑀬𑀯𑀺𑀲𑀺𑀝𑁆𑀞𑁄 𑀯𑀸𑀢𑀺 𑀤𑀼𑀯𑀺𑀥𑀸 𑀧𑀼𑀘𑁆𑀙𑀺𑀢𑀩𑁆𑀩𑀸𑀬𑁂𑀯 𑀅𑀢𑁆𑀣𑀯𑀺𑀓𑀧𑁆𑀧𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸. 𑀢𑁂𑀲𑀼 𑀧𑀞𑀫𑀲𑁆𑀫𑀺𑀁 𑀧𑀼𑀘𑁆𑀙𑀸 𑀲𑀤𑁄𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀧𑀼𑀘𑁆𑀙𑀸𑀦𑀁 𑀧𑀯𑀢𑁆𑀢𑀺𑀢𑁄𑀢𑀺 𑀓𑀼𑀲𑀮𑀫𑀽𑀮𑀸𑀤𑀻𑀦𑀁 𑀲𑀢𑁆𑀢𑀲𑀢𑁆𑀢𑀧𑀼𑀘𑁆𑀙𑀸𑀦𑀁 𑀧𑀯𑀢𑁆𑀢𑀦𑀢𑁄, 𑀉𑀧𑁆𑀧𑀚𑁆𑀚𑀫𑀸𑀦𑀁 𑀓𑀼𑀲𑀮𑀁. 𑀢𑁂𑀳𑀺 𑀧𑀘𑁆𑀘𑀬𑁂𑀳𑀻𑀢𑀺 𑀧𑀘𑁆𑀙𑀸𑀚𑀸𑀢𑀯𑀺𑀧𑀸𑀓𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀢𑁆𑀢𑀺 𑀅𑀦𑀼𑀜𑁆𑀜𑀸𑀢𑀸𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀢𑀁 𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁𑀢𑀁𑀧𑀘𑁆𑀘𑀬𑀸𑀢𑀺 𑀢𑀢𑁄 𑀢𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀘𑁆𑀘𑀬𑀢𑁄. 𑀪𑀯𑀦𑀫𑀢𑁆𑀣𑀺𑀢𑀸 𑀏𑀢𑁆𑀣 𑀦 𑀘 𑀧𑀼𑀘𑁆𑀙𑀺𑀢𑀸𑀢𑀺 ‘‘𑀓𑀺𑀁 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀬𑁄𑀚𑀦𑀸𑀬 𑀤𑁄𑀲𑀫𑀸𑀳. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀉𑀧𑁆𑀧𑀢𑁆𑀢𑀺𑀬𑀸 𑀏𑀯 𑀧𑀼𑀘𑁆𑀙𑀺𑀢𑀢𑁆𑀢𑀸.

𑀢𑀢𑁆𑀣𑀸𑀢𑀺 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀅𑀢𑁆𑀣𑀦𑁆𑀢𑀭𑁂. 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑁆𑀧𑀢𑁆𑀢𑀺𑀁 𑀅𑀦𑀼𑀚𑀸𑀦𑀺𑀢𑁆𑀯𑀸𑀢𑀺 ‘‘𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀓𑀼𑀲𑀮𑀧𑀘𑁆𑀘𑀬𑀁 𑀉𑀧𑁆𑀧𑀢𑁆𑀢𑀺𑀁 𑀅𑀦𑀼𑀚𑀸𑀦𑀺𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀉𑀧𑁆𑀧𑀢𑁆𑀢𑀺𑀬𑀸. 𑀪𑀯𑀦𑀧𑀼𑀘𑁆𑀙𑀦𑀦𑁆𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀪𑀯𑀦𑀧𑀼𑀘𑁆𑀙𑀦𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀦 𑀢𑀲𑁆𑀲𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀸 𑀉𑀧𑁆𑀧𑀢𑁆𑀢𑀺𑀬𑀸. 𑀪𑀯𑀦𑀧𑀼𑀘𑁆𑀙𑀦𑀦𑁆𑀢𑀺 𑀓𑁂𑀯𑀮𑀁 𑀪𑀯𑀦𑀧𑀼𑀘𑁆𑀙𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀉𑀪𑀬𑀢𑁆𑀣𑀸𑀧𑀺 𑀉𑀧𑁆𑀧𑀢𑁆𑀢𑀺𑀅𑀦𑀼𑀚𑀸𑀦𑀦𑀫𑀼𑀔𑁂𑀦 𑀪𑀯𑀦𑀧𑀼𑀘𑁆𑀙𑀦𑀁 𑀅𑀬𑀼𑀢𑁆𑀢𑀁, 𑀢𑀲𑁆𑀫𑀸. 𑀅𑀦𑀼𑀚𑀸𑀦𑀦𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁂 𑀅𑀢𑁆𑀣𑀯𑀺𑀓𑀧𑁆𑀧𑀤𑁆𑀯𑀬𑁂 𑀅𑀢𑁆𑀣𑀢𑁄 𑀆𑀧𑀦𑁆𑀦𑀁, 𑀢𑀁 𑀅𑀦𑀦𑀼𑀚𑀸𑀦𑀦𑁆𑀢𑁄 𑀆𑀳 ‘‘𑀅𑀦𑀦𑀼𑀚𑀸𑀦𑀺𑀢𑁆𑀯𑀸𑀯𑀸’’𑀢𑀺𑀆𑀤𑀺. 𑀲𑀁𑀧𑀼𑀘𑁆𑀙𑀦𑀫𑁂𑀯𑀸𑀢𑀺 𑀇𑀫𑀺𑀦𑀸 𑀲𑀁𑀧𑀼𑀘𑁆𑀙𑀦𑁂 ‘‘𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀇𑀤𑀁 𑀓𑀺𑀭𑀺𑀬𑀸𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀏𑀯𑀁 ‘‘𑀲𑀺𑀬𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺 𑀆𑀳 ‘‘𑀲𑀺𑀬𑀸𑀢𑀺…𑀧𑁂… 𑀧𑀼𑀘𑁆𑀙𑀢𑀻’’𑀢𑀺. 𑀅𑀬𑀁 𑀦𑀬𑁄𑀢𑀺 ‘‘𑀲𑀺𑀬𑀸’’𑀢𑀺𑀆𑀤𑀺𑀦𑀸 𑀅𑀦𑀦𑁆𑀢𑀭𑀯𑀼𑀢𑁆𑀢𑁄 𑀅𑀢𑁆𑀣𑀦𑀬𑁄. 𑀦 𑀯𑀺𑀜𑁆𑀜𑀸𑀬𑀢𑀺 𑀅𑀦𑀸𑀫𑀝𑁆𑀞𑀯𑀺𑀲𑁂𑀲𑀢𑁆𑀢𑀸. 𑀤𑁆𑀯𑁂𑀧𑀺 𑀧𑀼𑀘𑁆𑀙𑀸𑀢𑀺 𑀲𑀫𑁆𑀪𑀯𑀦𑀧𑀼𑀘𑁆𑀙𑀸 𑀢𑀩𑁆𑀩𑀺𑀲𑁂𑀲𑀧𑀼𑀘𑁆𑀙𑀸 𑀘𑀸𑀢𑀺 𑀤𑀼𑀯𑀺𑀥𑀸𑀧𑀺 𑀧𑀼𑀘𑁆𑀙𑀸 𑀏𑀓𑀸𑀬𑁂𑀯 𑀧𑀼𑀘𑁆𑀙𑀸 𑀲𑀁𑀧𑀼𑀘𑁆𑀙𑀦𑀪𑀸𑀯𑀢𑁄 𑀏𑀓𑀸𑀥𑀺𑀓𑀭𑀡𑀪𑀸𑀯𑀢𑁄 𑀘.

𑀕𑀫𑀦𑀼𑀲𑁆𑀲𑀼𑀓𑁆𑀓𑀯𑀘𑀦𑀦𑁆𑀢𑀺 𑀕𑀫𑀦𑀲𑁆𑀲 𑀉𑀲𑁆𑀲𑀼𑀓𑁆𑀓𑀯𑀘𑀦𑀁. 𑀕𑀫𑀦𑀓𑀺𑀭𑀺𑀬𑀸𑀬 𑀬𑀣𑀸 𑀅𑀢𑁆𑀢𑀦𑁄 𑀓𑀢𑁆𑀢𑀸 𑀉𑀧𑀭𑀺 𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀬 𑀬𑁄𑀕𑁆𑀬𑀭𑀽𑀧𑁄 𑀳𑁄𑀢𑀺, 𑀏𑀯𑀫𑁂𑀯 𑀞𑀸𑀦𑀁 𑀕𑀫𑀦𑀼𑀲𑁆𑀲𑀼𑀓𑁆𑀓𑀦𑀁 𑀢𑀲𑁆𑀲 𑀩𑁄𑀥𑀦𑀁 𑀯𑀘𑀦𑀁. 𑀏𑀯𑀁𑀪𑀽𑀢𑀸 𑀘 𑀓𑀺𑀭𑀺𑀬𑀸 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀓𑀺𑀭𑀺𑀬𑀦𑁆𑀢𑀭𑀸𑀧𑁂𑀓𑁆𑀔𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀕𑀫𑀦𑀲𑁆𑀲…𑀧𑁂… 𑀅𑀢𑁆𑀣𑁄’’𑀢𑀺. 𑀓𑀣𑀁 𑀧𑀦𑁂𑀢𑀲𑁆𑀫𑀺𑀁 𑀲𑀳𑀚𑀸𑀢𑀧𑀘𑁆𑀘𑀬𑀧𑀝𑁆𑀞𑀸𑀦𑁂 𑀧𑀝𑀺𑀘𑁆𑀘𑀯𑀸𑀭𑁂 𑀧𑀝𑀺𑀘𑁆𑀘𑀲𑀤𑁆𑀤𑀲𑁆𑀲 𑀧𑀘𑁆𑀙𑀺𑀫𑀓𑀸𑀮𑀓𑀺𑀭𑀺𑀬𑀸𑀧𑁂𑀓𑁆𑀔𑀢𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀬𑀤𑀺𑀧𑀻’’𑀢𑀺𑀆𑀤𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀅𑀲𑀢𑀺𑀧𑀺 𑀧𑀝𑀺𑀅𑀬𑀦𑀼𑀧𑁆𑀧𑀚𑁆𑀚𑀦𑀸𑀦𑀁 𑀓𑀸𑀮𑀪𑁂𑀤𑁂 𑀅𑀜𑁆𑀜𑀢𑁆𑀭 𑀳𑁂𑀢𑀼𑀨𑀮𑁂𑀲𑀼 𑀤𑀺𑀲𑁆𑀲𑀫𑀸𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀢𑀁 𑀳𑁂𑀢𑀼𑀨𑀮𑀢𑀸𑀲𑀸𑀫𑀜𑁆𑀜𑀢𑁄 𑀇𑀥𑀸𑀧𑀺 𑀲𑀫𑀸𑀭𑁄𑀧𑁂𑀢𑁆𑀯𑀸 𑀭𑀼𑀴𑁆𑀳𑀻𑀯𑀲𑁂𑀦 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀯𑁄𑀳𑀸𑀭𑁄 𑀓𑀢𑁄’’𑀢𑀺. 𑀢𑁂𑀦𑀸𑀳 ‘‘𑀕𑀳𑀡𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦…𑀧𑁂… 𑀤𑀝𑁆𑀞𑀩𑁆𑀩𑁄’’𑀢𑀺. 𑀢𑀢𑁆𑀣 𑀅𑀢𑁆𑀢𑀧𑀝𑀺𑀮𑀸𑀪𑁄 𑀉𑀧𑁆𑀧𑀸𑀤𑁄𑀢𑀺 𑀅𑀢𑁆𑀣𑁄.

𑀕𑀫𑀦𑀦𑁆𑀢𑀺 ‘‘𑀧𑀝𑀺𑀘𑁆𑀘𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀁 𑀅𑀬𑀦𑀓𑀺𑀭𑀺𑀬𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦𑀸𑀳. 𑀲𑀸 𑀧𑀦𑀢𑁆𑀣𑀢𑁄 𑀧𑀯𑀢𑁆𑀢𑀺, 𑀧𑀯𑀢𑁆𑀢𑀺 𑀘 𑀥𑀫𑁆𑀫𑀸𑀦𑀁 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀢𑁆𑀢𑀺𑀬𑁂𑀯. 𑀲𑀪𑀸𑀯𑀥𑀫𑁆𑀫𑀸𑀦𑀜𑁆𑀳𑀺 𑀉𑀧𑁆𑀧𑀢𑁆𑀢𑀺𑀬𑀁 𑀮𑁄𑀓𑁂 𑀲𑀩𑁆𑀩𑁄 𑀓𑀺𑀭𑀺𑀬𑀸𑀓𑀸𑀭𑀓𑀯𑁄𑀳𑀸𑀭𑁄, 𑀢𑀲𑁆𑀫𑀸 ‘‘𑀧𑀝𑀺𑀘𑁆𑀘𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀁 𑀬𑀁 𑀧𑀝𑀺𑀅𑀬𑀦𑀁 𑀧𑀝𑀺𑀕𑀫𑀦𑀁 𑀅𑀢𑁆𑀣𑀢𑁄 𑀧𑀝𑀺𑀉𑀧𑁆𑀧𑀚𑁆𑀚𑀫𑀸𑀦𑀁, 𑀢𑀜𑁆𑀘 𑀕𑀘𑁆𑀙𑀦𑁆𑀢𑀸𑀤𑀺𑀅𑀧𑁂𑀓𑁆𑀔𑀸𑀬 𑀳𑁄𑀢𑀻𑀢𑀺 𑀆𑀳 ‘‘𑀕𑀘𑁆𑀙𑀦𑁆𑀢𑀲𑁆𑀲 𑀧𑀝𑀺𑀕𑀫𑀦𑀁, 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀧𑀝𑀺𑀉𑀧𑁆𑀧𑀚𑁆𑀚𑀦’’𑀦𑁆𑀢𑀺. 𑀢𑀬𑀺𑀤𑀁 𑀕𑀫𑀦𑀧𑀝𑀺𑀕𑀫𑀦𑀁, 𑀉𑀧𑁆𑀧𑀚𑁆𑀚𑀦𑀧𑀝𑀺𑀉𑀧𑁆𑀧𑀚𑁆𑀚𑀦𑀁 𑀲𑀫𑀸𑀦𑀓𑀺𑀭𑀺𑀬𑀸. 𑀓𑀣𑀁? 𑀬𑀲𑁆𑀫𑀸 𑀧𑀝𑀺𑀓𑀭𑀡𑀁 𑀧𑀝𑀺𑀲𑀤𑁆𑀤𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀳𑀚𑀸𑀢𑀧𑀘𑁆𑀘𑀬𑀪𑀽𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀲𑁆𑀲 𑀧𑀝𑀺𑀉𑀧𑁆𑀧𑀚𑁆𑀚𑀦𑀁 ‘‘𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑁄, 𑀢𑀲𑁆𑀫𑀸. 𑀢𑀤𑀸𑀬𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑀁, 𑀓𑀭𑀡𑀢𑁆𑀣𑁂, 𑀳𑁂𑀢𑀼𑀢𑁆𑀣𑁂 𑀯𑀸, 𑀢𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑁂 𑀓𑀼𑀲𑀮𑀥𑀫𑁆𑀫𑁂 𑀆𑀬𑀢𑁆𑀢𑀸𑀬 𑀧𑀝𑀺𑀩𑀤𑁆𑀥𑀸𑀬 𑀉𑀧𑁆𑀧𑀢𑁆𑀢𑀺𑀬𑀸 𑀲𑀳𑁂𑀯 𑀧𑀝𑀺𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀧𑀝𑀺𑀅𑀬𑀦𑀢𑁆𑀢𑀮𑀸𑀪𑀸𑀦𑀁 𑀲𑀫𑀸𑀦𑀓𑀸𑀮𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀳𑀚𑀸𑀢𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺. 𑀦𑀦𑀼 𑀘 𑀲𑀫𑀸𑀦𑀓𑀸𑀮𑀓𑀺𑀭𑀺𑀬𑀸𑀬𑀁 𑀈𑀤𑀺𑀲𑁄 𑀲𑀤𑁆𑀤𑀧𑁆𑀧𑀬𑁄𑀕𑁄 𑀦𑀢𑁆𑀣𑀺, 𑀧𑀼𑀭𑀺𑀫𑀓𑀸𑀮𑀓𑀺𑀭𑀺𑀬𑀸𑀬𑀫𑁂𑀯 𑀘 𑀅𑀢𑁆𑀣𑀻𑀢𑀺? 𑀦𑀸𑀬𑀫𑁂𑀓𑀦𑁆𑀢𑁄 𑀲𑀫𑀸𑀦𑀓𑀸𑀮𑀓𑀺𑀭𑀺𑀬𑀸𑀬𑀫𑁆𑀧𑀺 𑀓𑁂𑀳𑀺𑀘𑀺 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑁋

‘‘𑀦𑀺𑀳𑀦𑁆𑀢𑁆𑀯𑀸 𑀢𑀺𑀫𑀺𑀭𑀁 𑀮𑁄𑀓𑁂, 𑀉𑀤𑀺𑀢𑁄 𑀲𑀢𑀭𑀁𑀲𑀫𑀺;

𑀮𑁄𑀓𑁂𑀓𑀘𑀓𑁆𑀔𑀼𑀪𑀽𑀢𑁄𑀬-𑀫𑀢𑁆𑀣𑀫𑁂𑀢𑀺 𑀤𑀺𑀯𑀸𑀓𑀭𑁄.

‘‘𑀲𑀺𑀭𑀻𑀯𑀺𑀮𑀸𑀲𑀭𑀽𑀧𑁂𑀦, 𑀲𑀩𑁆𑀩𑀲𑁄𑀪𑀸𑀯𑀺𑀪𑀸𑀯𑀺𑀦𑀸;

𑀑𑀪𑀸𑀲𑁂𑀢𑁆𑀯𑀸𑀤𑀺𑀢𑁄 𑀩𑀼𑀤𑁆𑀥𑁄, 𑀲𑀢𑀭𑀁𑀲𑀺 𑀬𑀣𑀸 𑀧𑀭𑁄’’𑀢𑀺. 𑁋

𑀘 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺.

𑁩𑁫-𑁩𑁮. 𑀢𑀸𑀲𑀽𑀢𑀺 𑀤𑀼𑀓𑀫𑀽𑀮𑀓𑀦𑀬𑁂 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁂 𑀏𑀓𑀽𑀦𑀧𑀜𑁆𑀜𑀸𑀲𑀧𑀼𑀘𑁆𑀙𑀸, 𑀢𑀸𑀲𑀼. 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑁂𑀢𑀺 ‘‘𑀳𑁂𑀢𑀼𑀧𑀘𑁆𑀘𑀬𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀆𑀕𑀢𑁂 𑀧𑀘𑁆𑀘𑀬𑀤𑀼𑀓𑁂. 𑀤𑁆𑀯𑀺𑀦𑁆𑀦𑀁 𑀧𑀼𑀘𑁆𑀙𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸𑀢𑀺 𑀬𑀲𑁆𑀫𑀺𑀁 𑀯𑀸𑀘𑀦𑀸𑀫𑀕𑁆𑀕𑁂 𑀓𑀼𑀲𑀮𑀧𑀤𑀫𑀽𑀮𑀸 𑀓𑀼𑀲𑀮𑀧𑀤𑀸𑀯𑀲𑀸𑀦𑀸, 𑀓𑀼𑀲𑀮𑀸𑀤𑀺𑀧𑀤𑀢𑁆𑀢𑀬𑀫𑀽𑀮𑀸 𑀓𑀼𑀲𑀮𑀸𑀤𑀺𑀧𑀤𑀢𑁆𑀢𑀬𑀸𑀯𑀲𑀸𑀦𑀸 𑀘 𑀏𑀓𑀽𑀦𑀧𑀜𑁆𑀜𑀸𑀲𑀸𑀬 𑀧𑀼𑀘𑁆𑀙𑀸𑀦𑀁 𑀆𑀤𑀺𑀧𑀭𑀺𑀬𑁄𑀲𑀸𑀦𑀪𑀽𑀢𑀸 𑀤𑁆𑀯𑁂 𑀏𑀯 𑀧𑀼𑀘𑁆𑀙𑀸 𑀤𑀲𑁆𑀲𑀺𑀢𑀸, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀡𑁆𑀡𑀢𑁆𑀢𑀺𑀯𑀸𑀭𑁂 𑀧𑀼𑀘𑁆𑀙𑀸𑀦𑀁 𑀯𑀼𑀢𑁆𑀢𑁄 𑀦 𑀧𑀘𑁆𑀘𑀬𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀘𑁆𑀙𑀸𑀬 𑀳𑀺 𑀯𑀲𑁂𑀦 𑀳𑁂𑀢𑀼𑀧𑀘𑁆𑀘𑀬𑁂 𑀳𑁂𑀢𑀼𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀏𑀓𑀫𑀽𑀮𑀁 𑀏𑀢𑀲𑁆𑀲𑀸𑀢𑀺 𑀏𑀓𑀫𑀽𑀮𑀓𑁄, 𑀦𑀬𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀘𑀸𑀬𑀁 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀏𑀯𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀫𑀽𑀮𑀓𑀸𑀤𑀻𑀲𑀼. 𑀢𑀣𑀸 𑀳𑁂𑀢𑀼𑀆𑀭𑀫𑁆𑀫𑀡𑀧𑀘𑁆𑀘𑀬𑀲𑀗𑁆𑀔𑀸𑀢𑀸𑀦𑀺 𑀤𑁆𑀯𑁂 𑀫𑀽𑀮𑀸𑀦𑀺 𑀏𑀢𑀲𑁆𑀲𑀸𑀢𑀺 𑀤𑁆𑀯𑀺𑀫𑀽𑀮𑀓𑁄𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀧𑀘𑁆𑀘𑀬𑀸𑀦𑀁 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀧𑀞𑀫𑀦𑀬𑀲𑁆𑀲 𑀏𑀓𑀫𑀽𑀮𑀓𑀢𑀸 𑀦 𑀲𑀺𑀬𑀸. 𑀦 𑀳𑀺 𑀢𑀢𑁆𑀣 𑀧𑀘𑁆𑀘𑀬𑀦𑁆𑀢𑀭𑀁 𑀅𑀢𑁆𑀣𑀺, 𑀬𑀁 𑀫𑀽𑀮𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑀸𑀦𑀁 𑀧𑀦 𑀯𑀲𑁂𑀦𑀸’’𑀢𑀺𑀆𑀤𑀺. 𑀳𑁂𑀢𑀸𑀭𑀫𑁆𑀫𑀡𑀤𑀼𑀓𑀸𑀤𑀻𑀦𑀦𑁆𑀢𑀺 𑀅𑀯𑀬𑀯𑁂 𑀲𑀸𑀫𑀺𑀯𑀘𑀦𑀁, 𑀅𑀥𑀺𑀧𑀢𑀺𑀆𑀤𑀻𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄 𑀧𑀭𑀁 𑀫𑀽𑀮𑀲𑁆𑀲 𑀅𑀪𑀸𑀯𑀢𑁄 𑀲𑀩𑁆𑀩𑀫𑀽𑀮𑀓𑀁 𑀅𑀦𑀯𑀲𑁂𑀲𑀸𑀦𑀁 𑀧𑀘𑁆𑀘𑀬𑀸𑀦𑀁 𑀫𑀽𑀮𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀦 𑀳𑀺 𑀫𑀽𑀮𑀯𑀦𑁆𑀢𑀪𑀸𑀯𑁂𑀦 𑀕𑀳𑀺𑀢𑀸 𑀧𑀘𑁆𑀘𑀬𑀸 𑀫𑀽𑀮𑀪𑀸𑀯𑁂𑀦 𑀕𑀬𑁆𑀳𑀦𑁆𑀢𑀺. 𑀧𑀘𑁆𑀘𑀬𑀕𑀫𑀦𑀁 𑀧𑀸𑀴𑀺𑀕𑀫𑀦𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺 𑀅𑀪𑀺𑀥𑁂𑀬𑁆𑀬𑀸𑀦𑀼𑀭𑀽𑀧𑀁 𑀮𑀺𑀗𑁆𑀕𑀯𑀘𑀦𑀸𑀤𑀻𑀢𑀺 𑀓𑀢𑁆𑀯𑀸. 𑀇𑀥𑀸𑀢𑀺 𑀅𑀦𑀼𑀮𑁄𑀫𑁂. 𑀘-𑀲𑀤𑁆𑀤𑁄 𑀉𑀧𑀘𑀬𑀢𑁆𑀣𑁄. 𑀲𑁄 𑀢𑁂𑀯𑀻𑀲𑀢𑀺𑀫𑀽𑀮𑀲𑁆𑀲 𑀲𑀩𑁆𑀩𑀫𑀽𑀮𑀪𑀸𑀯𑀁 𑀉𑀧𑀘𑀬𑁂𑀦 𑀯𑀼𑀘𑁆𑀘𑀫𑀸𑀦𑀁 𑀚𑁄𑀢𑁂𑀢𑀺.

𑁩𑁯-𑁪𑁦. 𑀏𑀯𑀁 𑀲𑀢𑀻𑀢𑀺 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀯𑀺𑀕𑀢𑀧𑀘𑁆𑀘𑀬𑀸, 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀯𑀸𑀘𑀦𑀸𑀫𑀕𑁆𑀕𑁂 𑀲𑀢𑀺. 𑀘𑀓𑁆𑀓𑀩𑀦𑁆𑀥𑀦𑀯𑀲𑁂𑀦 𑀧𑀸𑀴𑀺𑀕𑀢𑀺 𑀆𑀧𑀚𑁆𑀚𑀢𑀼, 𑀓𑁄 𑀤𑁄𑀲𑁄𑀢𑀺 𑀓𑀤𑀸𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀳 ‘‘𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦 𑀘 𑀇𑀥 𑀅𑀪𑀺𑀥𑀫𑁆𑀫𑁂 𑀧𑀸𑀴𑀺 𑀕𑀢𑀸’’𑀢𑀺. 𑀢𑀣𑀸 𑀳𑀺 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼𑀧𑀺 𑀧𑀸𑀴𑀺 𑀳𑁂𑀝𑁆𑀞𑀺𑀫𑀲𑁄𑀥𑀦𑀯𑀲𑁂𑀦 𑀧𑀯𑀢𑁆𑀢𑀸. 𑀕𑀡𑀦𑀘𑀸𑀭𑁂𑀦 𑀢𑀫𑀢𑁆𑀣𑀁 𑀲𑀸𑀥𑁂𑀢𑀼𑀁 ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀸𑀤𑀻𑀲𑀽𑀢𑀺 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦𑀬𑁂𑀲𑀼. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁂. 𑀲𑀼𑀤𑁆𑀥𑀺𑀓𑀢𑁄𑀢𑀺 𑀲𑀼𑀤𑁆𑀥𑀺𑀓𑀦𑀬𑀢𑁄. 𑀢𑀲𑁆𑀫𑀸𑀢𑀺 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀲𑀼𑀤𑁆𑀥𑀺𑀓𑀦𑀬𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀏𑀓𑀫𑀽𑀮𑀓𑀦𑀬𑁄 𑀤𑀝𑁆𑀞𑀩𑁆𑀩𑁄 𑀆𑀭𑀫𑁆𑀫𑀡𑀫𑀽𑀮𑀓𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑀸𑀢𑀺 𑀯𑀸’’𑀢𑀺𑀆𑀤𑀺 𑀢𑀸𑀤𑀺𑀲𑀁 𑀯𑀸𑀘𑀦𑀸𑀫𑀕𑁆𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀢𑁆𑀣 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀳𑁂𑀢𑀼𑀧𑀘𑁆𑀘𑀬𑀸, 𑀆𑀭𑀫𑁆𑀫𑀡𑀧𑀘𑁆𑀘𑀬𑀸 𑀅𑀥𑀺𑀧𑀢𑀺𑀧𑀘𑁆𑀘𑀬𑀸, 𑀆𑀭𑀫𑁆𑀫𑀡𑀧𑀘𑁆𑀘𑀬𑀸…𑀧𑁂… 𑀅𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀏𑀯𑀁 𑀆𑀭𑀫𑁆𑀫𑀡𑀫𑀽𑀮𑀓𑁂 𑀅𑀦𑀦𑁆𑀢𑀭𑀧𑀘𑁆𑀘𑀬𑀫𑀽𑀮𑀪𑀽𑀢𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀧𑀭𑀺𑀬𑁄𑀲𑀸𑀦𑀫𑁂𑀯 𑀏𑀓𑀫𑀽𑀮𑀓𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀭𑀺 𑀅𑀯𑀲𑀺𑀝𑁆𑀞𑀏𑀓𑀫𑀽𑀮𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀩𑁆𑀩𑀫𑀽𑀮𑀓𑁂 𑀯𑀺𑀕𑀢𑀧𑀘𑁆𑀘𑀬𑀸, 𑀢𑀸𑀯 𑀲𑀁𑀔𑀺𑀧𑀺𑀢𑁆𑀯𑀸 𑀅𑀯𑀺𑀕𑀢𑀧𑀘𑁆𑀘𑀬𑁄𑀯 𑀤𑀲𑁆𑀲𑀺𑀢𑁄. 𑀢𑁂𑀦𑀸𑀳 ‘‘𑀏𑀓𑀫𑀽𑀮𑀓𑁂𑀲𑀽’’𑀢𑀺𑀆𑀤𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀏𑀲𑁂𑀯 𑀦𑀬𑁄. 𑀫𑀽𑀮𑀫𑁂𑀯 𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀥𑀺𑀧𑀢𑀺𑀫𑀽𑀮𑀓𑁂 𑀏𑀓𑀫𑀽𑀮𑀓𑀲𑁆𑀲 𑀆𑀤𑀺𑀫𑁂𑀯 𑀤𑀲𑁆𑀲𑁂𑀢𑁆𑀯𑀸. 𑀦 𑀲𑀼𑀤𑁆𑀥𑀺𑀓𑀤𑀲𑁆𑀲𑀦𑀦𑁆𑀢𑀺 𑀦 𑀲𑀼𑀤𑁆𑀥𑀺𑀓𑀦𑀬𑀤𑀲𑁆𑀲𑀦𑀁. ‘‘𑀲𑀼𑀤𑁆𑀥𑀺𑀓𑀦𑀬𑁄 𑀳𑀺 𑀯𑀺𑀲𑁂𑀲𑀸𑀪𑀸𑀯𑀢𑁄 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀦 𑀮𑀩𑁆𑀪𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀦𑀸𑀧𑀺 𑀲𑀩𑁆𑀩𑀫𑀽𑀮𑀓𑁂 𑀓𑀢𑀺𑀧𑀬𑀧𑀘𑁆𑀘𑀬𑀤𑀲𑁆𑀲𑀦𑀁 𑀉𑀧𑀭𑀺 𑀲𑀩𑁆𑀩𑀫𑀽𑀮𑀓𑁂 𑀏𑀓𑀫𑀽𑀮𑀓𑀲𑁆𑀲 𑀆𑀕𑀢𑀢𑁆𑀢𑀸.

𑁪𑁧. 𑀏𑀓𑀲𑁆𑀫𑀺𑀜𑁆𑀘𑀸𑀢𑀺 𑀅𑀯𑀺𑀕𑀢𑀫𑀽𑀮𑀓𑀸𑀤𑀺𑀓𑁂 𑀘 𑀦𑀬𑁂. 𑀲𑀗𑁆𑀔𑁂𑀧𑀦𑁆𑀢𑀭𑀕𑀢𑁄𑀢𑀺 𑀲𑀗𑁆𑀔𑁂𑀧𑀲𑁆𑀲 𑀲𑀗𑁆𑀔𑀺𑀧𑀺𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀕𑀢𑁄, 𑀲𑀗𑁆𑀔𑀺𑀧𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀫𑀚𑁆𑀛𑀺𑀫𑀸𑀦𑀁 𑀤𑀲𑁆𑀲𑀦𑀦𑁆𑀢𑀺 𑀫𑀚𑁆𑀛𑀺𑀫𑀸𑀦𑀁 𑀦𑀬𑀢𑁄 𑀤𑀲𑁆𑀲𑀦𑀁, 𑀅𑀜𑁆𑀜𑀣𑀸 𑀲𑀗𑁆𑀔𑁂𑀧𑁄 𑀏𑀯 𑀦 𑀲𑀺𑀬𑀸. 𑀕𑀢𑀺𑀤𑀲𑁆𑀲𑀦𑀦𑁆𑀢𑀺 𑀅𑀦𑁆𑀢𑀤𑀲𑁆𑀲𑀦𑀁 𑀅𑀓𑀢𑁆𑀯𑀸 𑀧𑀸𑀴𑀺𑀕𑀢𑀺𑀬𑀸 𑀤𑀲𑁆𑀲𑀦𑀁, 𑀢𑀜𑁆𑀘 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀢𑀺𑀧𑀬𑀤𑀲𑁆𑀲𑀦𑀫𑁂𑀯. 𑀢𑁂𑀦 𑀯𑀺𑀕𑀢𑀧𑀘𑁆𑀘𑀬𑀼𑀤𑁆𑀥𑀸𑀭𑀡𑁂𑀦 𑀑𑀲𑀸𑀦𑀘𑀢𑀼𑀓𑁆𑀓𑀁 𑀤𑀲𑁆𑀲𑁂𑀢𑀺 𑀅𑀯𑀺𑀕𑀢𑀫𑀽𑀮𑀓𑁂 𑀯𑀺𑀕𑀢𑀧𑀘𑁆𑀘𑀬𑀲𑁆𑀲 𑀑𑀲𑀸𑀦𑀪𑀸𑀯𑀢𑁄. 𑀲𑀩𑁆𑀩𑀫𑀽𑀮𑀓𑀲𑁆𑀲 𑀅𑀯𑀲𑀸𑀦𑁂𑀦 ‘‘𑀯𑀺𑀕𑀢𑀧𑀘𑁆𑀘𑀬𑀸’’𑀢𑀺 𑀧𑀤𑁂𑀦.

𑀬𑀣𑀸 𑀳𑁂𑀢𑀼𑀆𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀉𑀤𑁆𑀤𑁂𑀲𑀸𑀦𑀼𑀧𑀼𑀩𑁆𑀩𑀺𑀬𑀸 𑀤𑀼𑀓𑀢𑀺𑀓𑀸𑀤𑀺𑀬𑁄𑀚𑀦𑀸 𑀓𑀢𑀸, 𑀏𑀯𑀁 𑀢𑀢𑁆𑀣 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑁂 𑀮𑀗𑁆𑀖𑀺𑀢𑁆𑀯𑀸𑀧𑀺 𑀲𑀓𑁆𑀓𑀸 𑀬𑁄𑀚𑀦𑀁 𑀓𑀸𑀢𑀼𑀁, 𑀢𑀣𑀸 𑀓𑀲𑁆𑀫𑀸 𑀦 𑀓𑀢𑀸? 𑀬𑀤𑀺𑀧𑀺 𑀅𑀦𑀯𑀲𑁂𑀲𑀢𑁄 𑀧𑀘𑁆𑀘𑀬𑀸𑀦𑀁 𑀫𑀽𑀮𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀓𑁂𑀲𑀜𑁆𑀘𑀺 𑀓𑁂𑀳𑀺𑀘𑀺 𑀬𑁄𑀚𑀦𑁂 𑀅𑀢𑁆𑀣𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀆𑀭𑀫𑁆𑀫𑀡𑀫𑀽𑀮𑀓𑀸𑀤𑀻𑀲𑀼 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀤𑀼𑀓𑀸𑀤𑀻𑀦𑀁 𑀳𑁂𑀢𑀼𑀫𑀽𑀮𑀓𑁂 𑀘 𑀳𑁂𑀢𑀼𑀅𑀥𑀺𑀧𑀢𑀺𑀅𑀦𑀦𑁆𑀢𑀭𑀢𑀺𑀓𑀸𑀤𑀻𑀦𑀁 𑀢𑀁𑀢𑀁𑀅𑀯𑀲𑀺𑀝𑁆𑀞𑀧𑀘𑁆𑀘𑀬𑁂𑀳𑀺 𑀬𑁄𑀚𑀦𑀸𑀬 𑀅𑀢𑁆𑀣𑁂𑀯 𑀯𑀺𑀲𑁂𑀲𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀬𑁄𑀚𑀦𑀸 𑀦 𑀲𑀼𑀔𑀕𑁆𑀕𑀳𑀡𑀸, 𑀲𑀓𑁆𑀓𑀸 𑀘 𑀜𑀸𑀡𑀼𑀢𑁆𑀢𑀭𑁂𑀦 𑀧𑀼𑀕𑁆𑀕𑀮𑁂𑀦 𑀬𑀣𑀸𑀤𑀲𑁆𑀲𑀺𑀢𑁂𑀦 𑀦𑀬𑁂𑀦 𑀬𑁄𑀚𑀺𑀢𑀼𑀦𑁆𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀘𑁆𑀘𑀬𑁂 𑀅𑀕𑁆𑀕𑀳𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸𑀯 𑀢𑁂 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸.

𑀢𑀜𑁆𑀘 𑀕𑀫𑀦𑀁 𑀬𑀼𑀢𑁆𑀢𑀦𑁆𑀢𑀺 𑀬𑀁 𑀲𑀩𑁆𑀩𑁂𑀳𑀺 𑀢𑀺𑀓𑁂𑀳𑀺 𑀏𑀓𑁂𑀓𑀲𑁆𑀲 𑀤𑀼𑀓𑀲𑁆𑀲 𑀬𑁄𑀚𑀦𑀸𑀯𑀲𑁂𑀦 𑀧𑀸𑀴𑀺𑀕𑀫𑀦𑀁, 𑀢𑀁 𑀬𑀼𑀢𑁆𑀢𑀁 𑀢𑀺𑀓𑁂𑀲𑀼 𑀤𑀼𑀓𑀸𑀦𑀁 𑀧𑀓𑁆𑀔𑁂𑀧𑀪𑀸𑀯𑀢𑁄. 𑀢𑀢𑁆𑀣𑀸𑀢𑀺 𑀤𑀼𑀓𑁂𑀲𑀼. 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀤𑀼𑀓𑀢𑀺𑀓𑁂. 𑀦𑀬𑀸𑀢𑀺 𑀅𑀦𑀼𑀮𑁄𑀫𑀦𑀬𑀸𑀤𑀬𑁄 𑀯𑀸𑀭𑁂 𑀯𑀸𑀭𑁂 𑀘𑀢𑁆𑀢𑀸𑀭𑁄 𑀦𑀬𑀸, 𑀧𑀼𑀘𑁆𑀙𑀸 𑀧𑀦 𑀲𑀢𑁆𑀢𑀯𑀻𑀲𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀳𑁂𑀢𑀼𑀤𑀼𑀓𑁂𑀦 𑀲𑀫𑀸𑀦𑀸𑀢𑀺? 𑀢𑀁 𑀢𑀺𑀓𑀧𑀤𑁂𑀲𑀼 𑀧𑀘𑁆𑀘𑁂𑀓𑀁 𑀳𑁂𑀢𑀼𑀤𑀼𑀓𑀲𑁆𑀲 𑀮𑀩𑁆𑀪𑀫𑀸𑀦𑀲𑁆𑀲 𑀳𑁂𑀢𑀼𑀤𑀼𑀓𑀪𑀸𑀯𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁.

𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀤𑀼𑀓𑀢𑀺𑀓𑁂 𑀯𑀼𑀢𑁆𑀢𑀦𑀬𑁂𑀦. 𑀢𑀢𑁆𑀣 𑀳𑀺 𑀦 𑀤𑀼𑀓𑀲𑁆𑀲 𑀬𑁄𑀚𑀦𑀸 𑀅𑀢𑁆𑀣𑀺, 𑀅𑀣 𑀔𑁄 𑀤𑀼𑀓𑀸𑀦𑀁 𑀏𑀓𑁂𑀓𑁂𑀦 𑀧𑀤𑁂𑀦 𑀢𑀺𑀓𑀲𑁆𑀲 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀏𑀓𑁂𑀓𑁄 𑀢𑀺𑀓𑁄 𑀤𑀼𑀓𑀲𑀢𑁂𑀦 𑀬𑁄𑀚𑀺𑀢𑁄’’𑀢𑀺. 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀢𑀺𑀓𑀤𑀼𑀓𑁂.

𑀢𑀺𑀓𑀸𑀤𑀬𑁄 𑀙 𑀦𑀬𑀸𑀢𑀺 ‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭’’𑀦𑁆𑀢𑀺𑀆𑀤𑀺𑀦𑀸 𑀕𑀸𑀣𑀸𑀬𑀁 𑀯𑀼𑀢𑁆𑀢𑀸 𑀢𑀺𑀓𑀧𑀝𑁆𑀞𑀸𑀦𑀸𑀤𑀬𑁄 𑀙 𑀦𑀬𑀸. 𑀲𑀢𑁆𑀢𑀯𑀺𑀥𑀫𑁆𑀧𑀻𑀢𑀺 𑀯𑀸𑀭𑀪𑁂𑀤𑁂𑀦 𑀲𑀢𑁆𑀢𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀫𑁆𑀧𑀺. 𑀅𑀦𑀼𑀮𑁄𑀫𑀦𑁆𑀢𑀺 𑀧𑀘𑁆𑀘𑀬𑀸𑀦𑀼𑀮𑁄𑀫𑀁 𑀅𑀦𑀼𑀮𑁄𑀫𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀳 𑀕𑀳𑁂𑀢𑁆𑀯𑀸. 𑀢𑀣𑀸 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀢𑀺𑀓𑀧𑀝𑁆𑀞𑀸𑀦𑀁 𑀢𑀺𑀓𑀧𑀝𑁆𑀞𑀸𑀦𑀢𑀸𑀲𑀸𑀫𑀜𑁆𑀜𑁂𑀦, 𑀤𑀼𑀓𑀧𑀝𑁆𑀞𑀸𑀦𑀸𑀤𑀻𑀦𑀺 𑀘 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀢𑀁𑀲𑀸𑀫𑀜𑁆𑀜𑁂𑀦 𑀲𑀳 𑀕𑀳𑁂𑀢𑁆𑀯𑀸. 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭’’𑀦𑁆𑀢𑀺 𑀕𑀸𑀣𑀸𑀬 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀯𑀲𑁂𑀦 ‘‘𑀅𑀦𑀼𑀮𑁄𑀫𑀫𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸. 𑀲𑀢𑁆𑀢𑀧𑁆𑀧𑀪𑁂𑀤𑁂𑀢𑀺 𑀧𑀝𑀺𑀘𑁆𑀘𑀯𑀸𑀭𑀸𑀤𑀺𑀯𑀲𑁂𑀦 𑀲𑀢𑁆𑀢𑀧𑁆𑀧𑀪𑁂𑀤𑁂. 𑀙𑀧𑀺 𑀏𑀢𑁂 𑀢𑀺𑀓𑀸𑀤𑀺𑀪𑁂𑀤𑁂𑀦 𑀘𑀢𑀼𑀘𑀢𑀼𑀧𑁆𑀧𑀪𑁂𑀤𑀸 𑀥𑀫𑁆𑀫𑀸𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀙 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺 𑀇𑀤𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀥𑀫𑁆𑀫𑀸𑀦𑀼𑀮𑁄𑀫𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑀸𑀧𑀺 𑀢𑀺𑀓𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀲𑀗𑁆𑀔𑀸𑀢𑀸 𑀢𑀺𑀓𑀸𑀤𑀬𑁄 𑀙 𑀥𑀫𑁆𑀫𑀦𑀬𑀸 𑀧𑀝𑀺𑀘𑁆𑀘𑀯𑀸𑀭𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀬𑀫𑀸𑀦𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁂 𑀅𑀦𑀼𑀮𑁄𑀫𑀢𑀸𑀲𑀸𑀫𑀜𑁆𑀜𑁂𑀦 𑀅𑀦𑀼𑀮𑁄𑀫𑀦𑁆𑀢𑀺 𑀏𑀓𑀢𑁄 𑀕𑀳𑀺𑀢𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀲𑀼𑀝𑁆𑀞𑀼 𑀅𑀢𑀺𑀯𑀺𑀬 𑀕𑀫𑁆𑀪𑀻𑀭𑀸𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀥 𑀧𑀦 𑀅𑀬𑀁 𑀕𑀸𑀣𑀸 𑀢𑀲𑁆𑀫𑀺𑀁 𑀥𑀫𑁆𑀫𑀸𑀦𑀼𑀮𑁄𑀫𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸’’𑀢𑀺 𑀥𑀫𑁆𑀫𑀸𑀦𑀼𑀮𑁄𑀫𑁄 𑀧𑀘𑁆𑀘𑀬𑀸𑀦𑀼𑀮𑁄𑀫𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀧𑀘𑁆𑀘𑀦𑀻𑀬𑀕𑀸𑀣𑀸𑀤𑀻𑀲𑀼𑀧𑀺. 𑀢𑀺𑀓𑀧𑀝𑁆𑀞𑀸𑀦𑀲𑁆𑀲 𑀤𑀼𑀓𑀧𑀝𑁆𑀞𑀸𑀦𑀲𑁆𑀲 𑀘 𑀧𑀼𑀩𑁆𑀩𑁂 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀽’’𑀢𑀺. 𑀢𑀺𑀓𑁂𑀳𑀺 𑀧𑀝𑁆𑀞𑀸𑀦𑀦𑁆𑀢𑀺 𑀢𑀺𑀓𑁂𑀳𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀘𑁆𑀘𑀬𑀯𑀺𑀪𑀸𑀯𑀦𑀁, 𑀢𑀺𑀓𑁂𑀳𑀺 𑀯𑀸 𑀜𑀸𑀡𑀲𑁆𑀲 𑀧𑀯𑀢𑁆𑀢𑀦𑀝𑁆𑀞𑀸𑀦𑀁. 𑀤𑀼𑀓𑀲𑀫𑁆𑀩𑀦𑁆𑀥𑀺 𑀢𑀺𑀓𑀧𑀝𑁆𑀞𑀸𑀦𑀁, 𑀤𑀼𑀓𑀯𑀺𑀲𑀺𑀝𑁆𑀞𑀸𑀦𑀁 𑀯𑀸 𑀢𑀺𑀓𑀸𑀦𑀁 𑀧𑀝𑁆𑀞𑀸𑀦𑀁 𑀤𑀼𑀓𑀢𑀺𑀓𑀧𑀝𑁆𑀞𑀸𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀓𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀤𑀼𑀓𑀸𑀤𑀺𑀯𑀺𑀲𑁂𑀲𑀺𑀢𑀲𑁆𑀲𑀸𑀢𑀺 𑀤𑀼𑀓𑀸𑀤𑀺𑀧𑀤𑀯𑀺𑀲𑁂𑀲𑀺𑀢𑀲𑁆𑀲 𑀤𑀼𑀓𑀸𑀤𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄 ‘‘𑀳𑁂𑀢𑀼𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘, 𑀦𑀳𑁂𑀢𑀼𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀯𑀘𑀦𑀢𑁄.

𑀧𑀘𑁆𑀘𑀬𑀸𑀦𑀼𑀮𑁄𑀫𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁨-𑁪𑁪. 𑀬𑀸𑀯𑀸𑀢𑀺 𑀧𑀸𑀴𑀺𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁 𑀬𑀢𑁆𑀢𑀓𑁄𑀢𑀺 𑀆𑀳 ‘‘𑀧𑀪𑁂𑀤𑁄’’𑀢𑀺. 𑀅𑀢𑁆𑀣𑀺 𑀢𑁂𑀯𑀻𑀲𑀢𑀺𑀫𑀽𑀮𑀓𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀸𑀯 𑀢𑀢𑁆𑀢𑀓𑀁 𑀧𑀪𑁂𑀤𑀁. 𑀢𑀢𑁆𑀣𑀸𑀢𑀺 𑀅𑀦𑀼𑀮𑁄𑀫𑁂 𑀆𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀬𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑀁, 𑀓𑀺𑀦𑁆𑀢𑀺? 𑀏𑀓𑁂𑀓𑀲𑁆𑀲 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑀺. 𑀅𑀯𑀲𑁂𑀲𑀲𑁆𑀲 𑀧𑀘𑁆𑀘𑀬𑀲𑁆𑀲 𑀫𑀽𑀮𑀯𑀦𑁆𑀢𑀪𑀸𑀯𑁂𑀦 𑀕𑀳𑀺𑀢𑀲𑁆𑀲.

𑀧𑀘𑁆𑀘𑀬𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸

𑁪𑁫-𑁪𑁮. 𑀧𑀼𑀦 𑀢𑀢𑁆𑀣𑀸𑀢𑀺 𑀅𑀦𑀼𑀮𑁄𑀫𑁂. 𑀧𑀘𑁆𑀘𑀬𑀧𑀤𑀸𑀦𑀻𑀢𑀺 𑀧𑀘𑁆𑀘𑀬𑀸 𑀏𑀯 𑀧𑀤𑀸𑀦𑀺 𑀧𑀘𑁆𑀘𑀬𑀧𑀤𑀸𑀦𑀺. 𑀇𑀥𑀸𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂. 𑀲𑀼𑀤𑁆𑀥𑀺𑀓𑀧𑀘𑁆𑀘𑀬𑀸𑀦𑀦𑁆𑀢𑀺 𑀧𑀘𑁆𑀘𑀬𑀦𑁆𑀢𑀭𑁂𑀦 𑀅𑀯𑁄𑀫𑀺𑀲𑁆𑀲𑀸𑀦𑀁 𑀧𑀘𑁆𑀘𑀬𑀸𑀦𑀁, 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀤𑁂𑀲𑀦𑀁 𑀯𑀓𑁆𑀔𑀫𑀸𑀦𑀁 𑀲𑀦𑁆𑀥𑀸𑀬𑀸𑀢𑀺 𑀅𑀢𑁆𑀣𑁄.

𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀓𑀼𑀲𑀮𑀢𑁆𑀢𑀺𑀓𑀁