𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. 𑀇𑀦𑁆𑀤𑁆𑀭𑀺𑀬𑀬𑀫𑀓𑁂 𑀯𑀺𑀪𑀗𑁆𑀕𑁂 𑀯𑀺𑀬𑀸𑀢𑀺 𑀬𑀣𑀸 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀤𑁆𑀤𑀺𑀝𑁆𑀞𑀁, 𑀦 𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁, 𑀏𑀯𑀁 𑀇𑀫𑀲𑁆𑀫𑀺𑀁 𑀇𑀦𑁆𑀤𑁆𑀭𑀺𑀬𑀬𑀫𑀓𑁂. 𑀢𑀜𑁆𑀘 𑀲𑀼𑀢𑁆𑀢𑀤𑁂𑀲𑀦𑀸𑀦𑀼𑀭𑁄𑀥𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀻𑀡𑀺𑀫𑀸𑀦𑀺…𑀧𑁂… 𑀲𑀼𑀢𑁆𑀢𑁂 𑀤𑁂𑀲𑀺𑀢𑀓𑁆𑀓𑀫𑁂𑀦𑀸’’𑀢𑀺 𑀆𑀳. 𑀲𑁄𑀬𑀁 𑀬𑀤𑀢𑁆𑀣𑀁 𑀢𑀲𑁆𑀲 𑀲𑀼𑀢𑁆𑀢𑁂 𑀤𑁂𑀲𑀺𑀢𑀓𑁆𑀓𑀫𑁂𑀦 𑀉𑀤𑁆𑀤𑁂𑀲𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀯𑀢𑁆𑀢𑀺𑀯𑀸𑀭𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀇𑀤𑀁 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀲𑀸𑀫𑀜𑁆𑀜𑀢𑁄 𑀕𑀳𑀡𑀁, 𑀏𑀯𑀁 𑀉𑀧𑀸𑀤𑀺𑀦𑁆𑀦𑀲𑁆𑀲 𑀅𑀦𑀼𑀧𑀸𑀤𑀺𑀦𑁆𑀦𑀲𑁆𑀲 𑀘𑀸𑀢𑀺 𑀆𑀳 ‘‘𑀓𑀫𑁆𑀫𑀚𑀸𑀦𑀁 𑀅𑀓𑀫𑁆𑀫𑀚𑀸𑀦𑀜𑁆𑀘 𑀅𑀦𑀼𑀧𑀸𑀮𑀓’’𑀦𑁆𑀢𑀺. 𑀅𑀣 𑀯𑀸 𑀲𑀳𑀚𑀥𑀫𑁆𑀫𑀸𑀦𑀼𑀧𑀸𑀮𑀓𑀫𑁆𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀦 𑀓𑁂𑀯𑀮𑀁 𑀔𑀡𑀝𑁆𑀞𑀺𑀢𑀺𑀬𑀸 𑀏𑀯 𑀓𑀸𑀭𑀡𑀁, 𑀅𑀣 𑀔𑁄 𑀧𑀩𑀦𑁆𑀥𑀸𑀦𑀼𑀧𑀘𑁆𑀙𑁂𑀤𑀲𑁆𑀲𑀧𑀺 𑀓𑀸𑀭𑀡𑀫𑁂𑀯. 𑀅𑀜𑁆𑀜𑀣𑀸 𑀆𑀬𑀼𑀓𑁆𑀔𑀬𑀫𑀭𑀡𑀁 𑀦 𑀲𑀫𑁆𑀪𑀯𑁂𑀬𑁆𑀬, 𑀢𑀲𑁆𑀫𑀸 ‘‘𑀓𑀫𑁆𑀫𑀚𑀸𑀦𑀜𑁆𑀘 𑀅𑀦𑀼𑀧𑀸𑀮𑀓’’𑀦𑁆𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀁, 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼 𑀘 𑀧𑀯𑀢𑁆𑀢𑀫𑀸𑀦𑀸𑀦𑀁 𑀓𑀫𑁆𑀫𑀚𑀸𑀦𑀁 𑀅𑀦𑀼𑀧𑀸𑀮𑀓𑀁. 𑀇𑀢𑀻𑀢𑀺 𑀢𑀲𑁆𑀫𑀸. 𑀢𑀁𑀫𑀽𑀮𑀓𑀸𑀦𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑀸𑀦𑀺. 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦𑀸𑀢𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀺𑀯𑀲𑁂𑀦 𑀘. 𑀢𑀢𑁆𑀣 𑀬𑀁 𑀉𑀧𑀸𑀤𑀺𑀦𑁆𑀦𑀁, 𑀢𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯, 𑀇𑀢𑀭𑀁 𑀇𑀢𑀭𑀯𑀲𑁂𑀦𑀧𑀺 𑀯𑀢𑁆𑀢𑀩𑁆𑀩𑀁. 𑀬𑀲𑁆𑀫𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀲𑀼 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀯𑀲𑀸𑀦𑁂𑀲𑀼 𑀏𑀓𑀦𑁆𑀢𑀉𑀧𑀸𑀤𑀺𑀦𑁆𑀦𑁂𑀲𑀼 𑀅𑀢𑀁𑀲𑀪𑀸𑀯𑀢𑁆𑀢𑀸 𑀬𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀽𑀮𑀫𑁂𑀯 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀫𑀽𑀮𑀓𑀸𑀦𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑀸𑀦𑀺. 𑀆𑀬𑀢𑀦𑀬𑀫𑀓𑁂 𑀯𑀺𑀬𑀸𑀢𑀺 𑀬𑀣𑀸 𑀆𑀬𑀢𑀦𑀬𑀫𑀓𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑀸𑀬𑀢𑀦𑀸𑀦𑀁 𑀉𑀧𑁆𑀧𑀸𑀤𑁄, 𑀫𑀭𑀡𑀯𑀲𑁂𑀦 𑀘 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄, 𑀏𑀯𑀫𑀺𑀥𑀸𑀧𑀺 𑀘𑀼𑀢𑀺𑀉𑀧𑀧𑀢𑁆𑀢𑀺𑀯𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀅𑀢𑀁𑀲𑀪𑀸𑀯𑀢𑁆𑀢𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀢𑁂𑀲𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀫𑀚𑁆𑀛𑁂 𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀅𑀦𑁆𑀢𑁂 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀁. 𑀬𑀁 𑀧𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑁂𑀲𑀼 𑀫𑀦𑀺𑀦𑁆𑀤𑁆𑀭𑀺𑀬𑀁 𑀲𑀩𑁆𑀩𑀧𑀘𑁆𑀙𑀸 𑀏𑀯 𑀕𑀳𑀺𑀢𑀁, 𑀢𑀢𑁆𑀣 𑀓𑀸𑀭𑀡𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁯𑁪. 𑀓𑁄𑀘𑀺 𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀓𑁄𑀘𑀺 𑀲𑀪𑀸𑀯𑀥𑀫𑁆𑀫𑁄 𑀦𑀢𑁆𑀣𑀺. 𑀬𑀤𑀺 𑀏𑀯𑀁 ‘‘𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀏𑀯 𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀦 𑀘 𑀭𑀽𑀧𑀸𑀤𑀻’’𑀢𑀺𑀆𑀤𑀺. ‘‘𑀲𑀼𑀔𑀸 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸’’𑀢𑀺𑀆𑀤𑀻𑀲𑀼 𑀲𑀼𑀔𑀤𑀼𑀓𑁆𑀔𑀲𑀤𑁆𑀤𑀸𑀦𑀁 𑀲𑀸𑀫𑀜𑁆𑀜𑀯𑀘𑀦𑀪𑀸𑀯𑁂𑀧𑀺 𑀇𑀦𑁆𑀤𑁆𑀭𑀺𑀬𑀤𑁂𑀲𑀦𑀸𑀬𑀁 𑀢𑁂 𑀯𑀺𑀲𑀺𑀝𑁆𑀞𑀯𑀺𑀲𑀬𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀔𑀲𑁆𑀲…𑀧𑁂… 𑀕𑀳𑀺𑀢𑁄𑀬𑁂𑀯𑀸’’𑀢𑀺 𑀆𑀳. 𑀤𑀼𑀓𑁆𑀔𑀲𑁆𑀲 𑀘 𑀪𑁂𑀤𑀁 𑀓𑀢𑁆𑀯𑀸.

𑁧𑁪𑁦. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀧𑀚𑀸𑀦𑀦𑀝𑁆𑀞𑁂𑀦 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀘 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀤𑀲𑁆𑀲𑀦𑀝𑁆𑀞𑁂𑀦 𑀧𑀦 𑀘𑀓𑁆𑀔𑀽𑀦𑀺 𑀘𑀸𑀢𑀺 𑀘𑀓𑁆𑀔𑀼, 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀢𑀡𑁆𑀳𑀸𑀲𑁄𑀢𑀫𑁂𑀯𑀸𑀳𑀸’’𑀢𑀺 𑀯𑀼𑀢𑁆𑀢𑀁, ‘‘𑀬𑀲𑁆𑀲 𑀙𑀢𑁆𑀢𑀺𑀁𑀲𑀢𑀺 𑀲𑁄𑀢𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁩𑁩𑁯) 𑀧𑀦 𑀤𑀺𑀝𑁆𑀞𑀺𑀆𑀤𑀻𑀦𑀫𑁆𑀧𑀺 𑀲𑁄𑀢𑀪𑀸𑀯𑁄 𑀆𑀕𑀢𑁄.

𑀧𑀡𑁆𑀡𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁮𑁬. 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦𑀸𑀢𑀺 ‘‘𑀬𑁄 𑀢𑁂𑀲𑀁 𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀆𑀬𑀼 𑀞𑀺𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁩𑁪) 𑀅𑀜𑁆𑀜𑀥𑀫𑁆𑀫𑀦𑀺𑀲𑁆𑀲𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀧𑀯𑀢𑁆𑀢𑀺𑀜𑁆𑀘 𑀕𑀳𑁂𑀢𑁆𑀯𑀸 𑀕𑀢𑁂𑀲𑀼 𑀯𑀺𑀲𑁆𑀲𑀚𑁆𑀚𑀦𑁂𑀲𑀼, 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀕𑀳𑁂𑀢𑁆𑀯𑀸 𑀕𑀢𑁂𑀲𑀼 𑀬𑁄𑀚𑀦𑀸 𑀦 𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀮𑀩𑁆𑀪𑀫𑀸𑀦𑀸 𑀘 𑀲𑀼𑀔𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑁂𑀳𑁂𑀯 𑀦 𑀮𑀩𑁆𑀪𑀢𑀺. 𑀢𑀁𑀫𑀽𑀮𑀓𑀸 𑀘 𑀦𑀬𑀸𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑀸 𑀘 𑀦𑀬𑀸. 𑀢𑁂𑀳𑀻𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺. 𑀬𑁄𑀚𑀦𑀸𑀢𑀺 ‘‘𑀧𑀯𑀢𑁆𑀢𑁂 𑀲𑀼𑀔𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀳𑀺 𑀬𑁄𑀚𑀦𑀸. 𑀢𑀁𑀫𑀽𑀮𑀓𑀸 𑀘 𑀢𑀣𑀸𑀬𑁄𑀚𑀦𑀸𑀫𑀽𑀮𑀪𑀽𑀢𑀸 𑀘 𑀦𑀬𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀫𑀽𑀮𑀓𑀸 𑀘 𑀦𑀬𑀸. 𑀧𑀸𑀓𑀝𑀸𑀬𑁂𑀯𑀸𑀢𑀺 𑀧𑀸𑀴𑀺𑀕𑀢𑀺𑀬𑀸 𑀏𑀯 𑀯𑀺𑀜𑁆𑀜𑀸𑀬𑀫𑀸𑀦𑀬𑁄𑀚𑀦𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀏𑀯.

𑀢𑀁 𑀯𑀘𑀦𑀁. 𑀲𑁄𑀫𑀦𑀲𑁆𑀲𑀯𑀺𑀭𑀳𑀺𑀢𑀲𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀦𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀲𑁄𑀫𑀦𑀲𑁆𑀲𑀯𑀺𑀭𑀳𑀺𑀢𑀲𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀬𑁂𑀯 𑀦𑀺𑀤𑀲𑁆𑀲𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀦 𑀧𑀦 𑀕𑀡𑀦𑀧𑀭𑀺𑀘𑁆𑀙𑀺𑀦𑁆𑀤𑀦’’𑀦𑁆𑀢𑀺 𑀆𑀳 ‘‘𑀦 𑀳𑀺 𑀘𑀢𑀼𑀦𑁆𑀦𑀁𑀬𑁂𑀯𑀸𑀢𑀺 𑀦𑀺𑀬𑀫𑁄 𑀓𑀢𑁄’’𑀢𑀺. 𑀢𑀁𑀲𑀫𑀸𑀦𑀮𑀓𑁆𑀔𑀡𑀸𑀢𑀺 𑀢𑀸𑀬 𑀲𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀢𑀸𑀬 𑀲𑀫𑀸𑀦𑀮𑀓𑁆𑀔𑀡𑀸𑀢𑀺 𑀧𑀭𑀺𑀢𑁆𑀢𑀯𑀺𑀧𑀸𑀓𑀕𑁆𑀕𑀳𑀡𑀁. 𑀢𑀢𑁆𑀣 𑀲𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺𑀬𑁄 𑀲𑀦𑁆𑀥𑀸𑀬 𑀉𑀧𑁂𑀓𑁆𑀔𑀸𑀧𑀝𑀺𑀲𑀦𑁆𑀥𑀺𑀬𑁄 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀓𑁂𑀘𑀺. 𑀧𑀭𑀺𑀢𑁆𑀢𑀯𑀺𑀧𑀸𑀓𑀧𑀝𑀺𑀲𑀦𑁆𑀥𑀺 𑀘 𑀓𑀼𑀲𑀮𑀯𑀺𑀧𑀸𑀓𑀸𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀧𑀺 𑀳𑀺 𑀲𑀘𑀓𑁆𑀔𑀼𑀓𑀸 𑀲𑀺𑀬𑀸. 𑀢𑀁𑀲𑀫𑀸𑀦𑀮𑀓𑁆𑀔𑀡𑀸𑀢𑀺 𑀯𑀸 𑀢𑀸𑀬 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀬 𑀲𑀫𑀸𑀦𑀮𑀓𑁆𑀔𑀡𑀸 𑀬𑀣𑀸𑀯𑀼𑀢𑁆𑀢𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀘 𑀧𑀜𑁆𑀘𑀫𑀚𑁆𑀛𑀸𑀦𑀧𑀝𑀺𑀲𑀦𑁆𑀥𑀺 𑀘. 𑀬𑀤𑀺 𑀏𑀯𑀁 ‘‘𑀘𑀢𑀼𑀦𑁆𑀦’’𑀦𑁆𑀢𑀺 𑀓𑀲𑁆𑀫𑀸 𑀕𑀡𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀆𑀳 ‘‘𑀓𑀸𑀫𑀸𑀯𑀘𑀭𑁂…𑀧𑁂… 𑀦𑀺𑀤𑀲𑁆𑀲𑀦𑀁 𑀓𑀢’’𑀦𑁆𑀢𑀺. 𑀢𑁂𑀦𑀸𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀫𑀳𑀸𑀯𑀺𑀧𑀸𑀓𑀦𑀺𑀤𑀲𑁆𑀲𑀦𑁂𑀦, 𑀬𑁂𑀳𑀺 𑀲𑀫𑀸𑀦𑀢𑀸𑀬 𑀇𑀫𑁂 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑁂 𑀏𑀓𑀁𑀲𑁂𑀦 𑀢𑀁𑀲𑀪𑀸𑀯𑀸 𑀏𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀬𑀣𑀸 𑀲𑀲𑁄𑀫𑀦𑀲𑁆𑀲…𑀧𑁂… 𑀢𑁄 𑀳𑁄𑀢𑀻’’𑀢𑀺.

𑀦𑀦𑀼 𑀘 𑀕𑀩𑁆𑀪𑀲𑁂𑀬𑁆𑀬𑀓𑁂𑀲𑀼 𑀅𑀬𑀫𑀢𑁆𑀣𑁄 𑀏𑀓𑀁𑀲𑀢𑁄 𑀦 𑀮𑀩𑁆𑀪𑀢𑀻𑀢𑀺 𑀆𑀲𑀗𑁆𑀓𑀁 𑀲𑀦𑁆𑀥𑀸𑀬𑀸𑀳 ‘‘𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀜𑁆𑀘…𑀧𑁂… 𑀤𑀲𑁆𑀲𑀺𑀢𑀸 𑀳𑁄𑀢𑀻’’𑀢𑀺. 𑀢𑁂𑀦𑀸𑀳 ‘‘𑀲𑀘𑀓𑁆𑀔𑀼𑀓𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀬𑀤𑀺 𑀲𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀓𑀸𑀫𑀸𑀯𑀘𑀭𑀸𑀦𑀁 𑀦𑀺𑀬𑀫𑀢𑁄 𑀲𑀘𑀓𑁆𑀔𑀼𑀓𑀸𑀤𑀺𑀪𑀸𑀯𑀤𑀲𑁆𑀲𑀦𑀁 𑀕𑀩𑁆𑀪𑀲𑁂𑀬𑁆𑀬𑀓𑀯𑀲𑁂𑀦 𑀮𑀩𑁆𑀪𑁂𑀬𑁆𑀬, 𑀬𑀼𑀢𑁆𑀢𑀫𑁂𑀢𑀁 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀕𑀩𑁆𑀪𑀲𑁂𑀬𑁆𑀬𑀓𑁂𑀧𑀺 𑀳𑀻’’𑀢𑀺𑀆𑀤𑀺. 𑀢𑀣𑀸 𑀆𑀬𑀢𑀦𑀬𑀫𑀓𑁂 𑀤𑀲𑁆𑀲𑀺𑀢𑀦𑁆𑀢𑀺 𑀇𑀤𑀁 𑀆𑀬𑀢𑀦𑀬𑀫𑀓𑀯𑀡𑁆𑀡𑀦𑀸𑀬𑀁 𑀅𑀢𑁆𑀢𑀦𑀸 𑀯𑀼𑀢𑁆𑀢𑀁 ‘‘𑀏𑀯𑀜𑁆𑀘 𑀓𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀬𑀫𑀓𑁂’’𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀓𑀓𑀫𑁆𑀫𑀲𑁆𑀲 𑀏𑀓𑀦𑁆𑀢𑁂𑀦 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑀢𑁄 𑀕𑀩𑁆𑀪𑁂𑀧𑀺 𑀬𑀸𑀯 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺, 𑀢𑀸𑀯 𑀉𑀧𑁆𑀧𑀚𑁆𑀚𑀫𑀸𑀦𑀢𑀸𑀬 ‘‘𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀗𑁆𑀕𑀳𑀺𑀢𑀸𑀦𑀦𑁆𑀢𑀺 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀗𑁆𑀕𑀳𑀺𑀢𑀸𑀦𑀁. 𑀇𑀢𑁆𑀣𑀻𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀻𑀦𑀦𑁆𑀢𑀺 𑀆𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀇𑀢𑁆𑀣𑀻𑀦𑀁 𑀅𑀘𑀓𑁆𑀔𑀼𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀻𑀦’’𑀦𑁆𑀢𑀺𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂 𑀏𑀯𑀸𑀢𑀺 𑀕𑀩𑁆𑀪𑀲𑁂𑀬𑁆𑀬𑀓𑀸 𑀏𑀯.

𑀢𑀁𑀲𑀫𑀸𑀦𑀮𑀓𑁆𑀔𑀡𑀦𑁆𑀢𑀺 𑀲𑁄𑀧𑁂𑀓𑁆𑀔𑀅𑀘𑀓𑁆𑀔𑀼𑀓𑀧𑀝𑀺𑀲𑀦𑁆𑀥𑀺𑀪𑀸𑀯𑁂𑀦 𑀲𑀫𑀸𑀦𑀮𑀓𑁆𑀔𑀡𑀁. 𑀢𑀢𑁆𑀣𑀸𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂. 𑀲𑀫𑀸𑀥𑀺𑀮𑁂𑀲𑁄 𑀤𑀼𑀩𑁆𑀩𑀮𑀲𑀫𑀸𑀥𑀺 𑀬𑁄 𑀘𑀺𑀢𑁆𑀢𑀝𑁆𑀞𑀺𑀢𑀺𑀫𑀢𑁆𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘𑀺𑀢𑁆𑀢𑀝𑁆𑀞𑀺𑀢𑀺 𑀯𑀺𑀬 𑀤𑀼𑀩𑁆𑀩𑀮𑀁 𑀯𑀻𑀭𑀺𑀬𑀁 𑀦𑀢𑁆𑀣𑀺, 𑀬𑁄 ‘‘𑀯𑀻𑀭𑀺𑀬𑀮𑁂𑀲𑁄’’𑀢𑀺 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸, 𑀮𑁂𑀲𑀫𑀢𑁆𑀢𑀲𑁆𑀲𑀧𑀺 𑀯𑀻𑀭𑀺𑀬𑀲𑁆𑀲 𑀅𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀲𑀽𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄 𑀅𑀜𑁆𑀜𑁂𑀲𑀼. 𑀓𑁂𑀲𑀼𑀘𑀻𑀢𑀺 𑀏𑀓𑀘𑁆𑀘𑁂𑀲𑀼. 𑀉𑀪𑀬𑁂𑀦𑀧𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀁 𑀯𑀤𑀢𑀺. 𑀇𑀥𑀸𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂. 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀺 𑀇𑀦𑁆𑀤𑁆𑀭𑀺𑀬𑀧𑁆𑀧𑀢𑁆𑀢𑀸𑀦𑀺 𑀘 𑀦 𑀳𑁄𑀦𑁆𑀢𑀻𑀢𑀺 𑀲𑀫𑀸𑀥𑀺𑀓𑀺𑀘𑁆𑀘𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀲𑀫𑀸𑀥𑀺𑀫𑀢𑁆𑀢𑀁, 𑀦 𑀯𑀻𑀭𑀺𑀬𑀮𑁂𑀲𑀲𑁆𑀲 𑀲𑀩𑁆𑀪𑀸𑀯𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀯𑀺𑀲𑁂𑀲𑀦𑀜𑁆𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑁂 𑀧𑀯𑀢𑁆𑀢𑀢𑀻’’𑀢𑀺. 𑀬𑀲𑁆𑀫𑀺𑀁 𑀯𑀻𑀭𑀺𑀬𑁂 𑀲𑀢𑀺 𑀇𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀢𑀤𑁂𑀯 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀅𑀧𑀸𑀬𑁂 𑀑𑀧𑀧𑀸𑀢𑀺𑀓𑀯𑀲𑁂𑀦𑀸𑀢𑀺 𑀇𑀤𑀁 𑀲𑀼𑀕𑀢𑀺𑀬𑀁 𑀑𑀧𑀧𑀸𑀢𑀺𑀓𑁄 𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑁄 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, ‘‘𑀮𑀩𑁆𑀪𑀦𑁆𑀢𑁂𑀯 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀯𑀲𑁂𑀦𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀦𑀸𑀦𑀁. 𑀇𑀢𑁆𑀣𑀺𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀦 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀅𑀪𑀺𑀡𑁆𑀳𑀲𑁄𑀯 𑀳𑁄𑀦𑁆𑀢𑀻𑀢𑀺. 𑀧𑀞𑀫𑀓𑀧𑁆𑀧𑀺𑀓𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀕𑀳𑀺𑀢𑀸𑀦𑀁 𑀧𑀭𑀺𑀯𑀢𑁆𑀢𑀫𑀸𑀦𑀮𑀺𑀗𑁆𑀕𑀸𑀦𑀁 𑀯𑀲𑁂𑀦 𑀉𑀧𑁆𑀧𑀸𑀤𑀦𑀺𑀭𑁄𑀥𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀧𑀦 𑀯𑀲𑁂𑀦 𑀉𑀧𑁆𑀧𑀸𑀤𑁄 𑀏𑀯 𑀮𑀩𑁆𑀪𑀢𑀺. ‘‘𑀘𑀼𑀢𑀺𑀉𑀧𑀧𑀢𑁆𑀢𑀺𑀯𑀲𑁂𑀦𑁂𑀯 𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼𑀧𑀺 𑀲𑀦𑁆𑀦𑀺𑀝𑁆𑀞𑀸𑀦𑁂𑀳𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀉𑀧𑀸𑀤𑀺𑀦𑁆𑀦𑀇𑀦𑁆𑀤𑁆𑀭𑀺𑀬𑁂𑀳𑀺 𑀦𑀺𑀬𑀫𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑁧𑁯𑁦. 𑀲𑀦𑁆𑀢𑀸𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀤𑀲𑁆𑀲𑀦𑀢𑁄𑀢𑀺 𑀲𑀦𑁆𑀢𑀸𑀦𑀯𑀲𑁂𑀦 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀤𑀺𑀲𑁆𑀲𑀫𑀸𑀦𑀢𑁆𑀢𑀸. 𑀏𑀢𑁂𑀦 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀲𑀫𑀸𑀦𑀕𑀢𑀺𑀓𑀢𑀁 𑀬𑀼𑀢𑁆𑀢𑀺𑀢𑁄 𑀲𑀸𑀥𑁂𑀢𑀺. 𑀆𑀕𑀫𑀢𑁄 𑀧𑀦 ‘‘𑀯𑀺𑀦𑀸 𑀲𑁄𑀫𑀦𑀲𑁆𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀭𑀢𑁄 𑀲𑀸𑀥𑁂𑀲𑁆𑀲𑀢𑀺. 𑀙𑁂𑀤𑁄𑀢𑀺 𑀦𑀸𑀫𑀁 𑀤𑀝𑁆𑀞𑀩𑁆𑀩𑀁 𑀲𑀭𑀽𑀧𑀤𑀲𑁆𑀲𑀦𑁂𑀦𑁂𑀯 𑀲𑀁𑀲𑀬𑀙𑁂𑀤𑀦𑀢𑁄.

𑀢𑀲𑁆𑀲𑀸𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲. 𑀢𑁂 𑀘 𑀅𑀲𑀜𑁆𑀜𑀲𑀢𑁆𑀢𑀸. 𑀦𑀦𑀼 𑀘 𑀉𑀧𑁆𑀧𑀸𑀤𑁄𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀘𑀼𑀢𑀺𑀉𑀧𑀧𑀢𑁆𑀢𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑁄, 𑀦 𑀅𑀦𑀼𑀧𑁆𑀧𑀸𑀤𑁄𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀸𑀤𑁄…𑀧𑁂… 𑀦 𑀧𑀯𑀢𑁆𑀢𑁂’’𑀢𑀺. 𑀅𑀬𑀜𑁆𑀘 𑀦𑀬𑁄 𑀦 𑀓𑁂𑀯𑀮𑀁 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑁂 𑀏𑀯, 𑀅𑀣 𑀔𑁄 𑀇𑀢𑀭𑀓𑁄𑀝𑁆𑀞𑀸𑀲𑁂𑀧𑀺 𑀕𑀳𑀺𑀢𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂𑀧𑀻’’𑀢𑀺𑀆𑀤𑀺𑀫𑀸𑀳.

‘‘𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀘𑁄𑀤𑀦𑀸 𑀓𑀢𑀸, 𑀢𑀫𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀺𑀢𑀼𑀁 ‘‘𑀦𑀦𑀼 𑀲𑀼𑀤𑁆𑀥𑀸𑀯𑀸𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 ‘‘𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, ‘‘𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀬𑀣𑀸 ‘‘𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀫𑀦𑀲𑁆𑀲𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀫𑀦𑀺𑀦𑁆𑀤𑁆𑀭𑀺𑀬𑀸𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀤𑀸𑀢𑀺 𑀧𑀞𑀫𑀲𑁆𑀲 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀥𑀭𑀫𑀸𑀦𑀓𑀸𑀮𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀢𑁆𑀣𑁂𑀯 𑀓𑀸𑀮𑀪𑁂𑀤𑁄, 𑀉𑀪𑀬𑀜𑁆𑀘𑁂𑀢𑁆𑀣 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀕𑀬𑁆𑀳𑀢𑀺, 𑀢𑀲𑁆𑀫𑀸. 𑀉𑀪𑀬𑀦𑁆𑀢𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀤𑀁 𑀉𑀪𑀬𑀁. 𑀉𑀧𑁆𑀧𑀸𑀤𑀓𑁆𑀔𑀡𑁂𑀦 𑀦𑀺𑀤𑀲𑁆𑀲𑀺𑀢𑀦𑁆𑀢𑀺 𑀏𑀢𑁂𑀦 ‘‘𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀉𑀤𑀸𑀳𑀭𑀡𑁂𑀦 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀢𑀸𑀤𑀺𑀲𑀸𑀦𑀁 𑀅𑀦𑁂𑀓𑁂𑀲𑀁 𑀘𑀺𑀢𑁆𑀢𑀸𑀦𑀁 𑀪𑀗𑁆𑀕𑀓𑁆𑀔𑀡𑁂 𑀮𑀩𑁆𑀪𑀫𑀸𑀦𑀁 𑀢𑀤𑁂𑀓𑀤𑁂𑀲𑁂𑀦 𑀲𑀩𑁆𑀩𑀧𑀞𑀫𑀲𑁆𑀲 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂𑀦 𑀦𑀺𑀤𑀲𑁆𑀲𑀺𑀢𑀁, 𑀏𑀯𑀫𑀺𑀥𑀸𑀧𑀺 𑀔𑀡𑀤𑁆𑀯𑀬𑁂 𑀮𑀩𑁆𑀪𑀫𑀸𑀦𑀁 𑀢𑀤𑁂𑀓𑀤𑁂𑀲𑁂𑀦 𑀉𑀧𑁆𑀧𑀸𑀤𑀓𑁆𑀔𑀡𑁂𑀦 𑀦𑀺𑀤𑀲𑁆𑀲𑀺𑀢𑀦𑁆𑀢𑀺 𑀏𑀯𑀁 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑁂𑀲𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀧𑀯𑀢𑁆𑀢𑁂. 𑀇𑀥𑀸𑀢𑀺 𑀅𑀦𑀸𑀕𑀢𑀓𑀸𑀮𑀪𑁂𑀤𑁂. 𑀦 𑀦 𑀲𑀫𑁆𑀪𑀯𑀢𑀺 𑀉𑀧𑀧𑀢𑁆𑀢𑀺𑀓𑁆𑀔𑀡𑀲𑁆𑀲 𑀯𑀺𑀬 𑀢𑀢𑁄 𑀧𑀭𑀁 𑀧𑀯𑀢𑁆𑀢𑀺𑀓𑁆𑀔𑀡𑀲𑁆𑀲𑀧𑀺 𑀅𑀦𑀸𑀕𑀢𑀓𑀸𑀮𑀪𑀸𑀯𑀢𑁄. 𑀢𑀲𑁆𑀫𑀸𑀢𑀺 𑀉𑀧𑀧𑀢𑁆𑀢𑀺𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀥𑀺𑀧𑁆𑀧𑁂𑀢𑀉𑀧𑁆𑀧𑀸𑀤𑀲𑀫𑁆𑀪𑀯𑀢𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀯𑀸𑀭𑀦𑁆𑀢𑀭𑁂𑀧𑀺 𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀜𑁆𑀘 𑀓𑀢𑁆𑀯𑀸’’𑀢𑀺𑀆𑀤𑀺. 𑀦 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀢𑀢𑁆𑀣 𑀅𑀧𑀺 𑀧𑀘𑁆𑀙𑀺𑀫…𑀧𑁂… 𑀲𑀦𑁆𑀥𑀺𑀓𑀲𑁆𑀲𑀸𑀢𑀺 𑀅𑀧𑀺-𑀲𑀤𑁆𑀤𑁂𑀦 ‘‘𑀓𑁄 𑀧𑀦 𑀯𑀸𑀤𑁄 𑀅𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲𑀸’’𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀘𑁆𑀙𑀺𑀫𑀪𑀯𑀺𑀓𑀲𑁆𑀲 𑀘𑀼𑀢𑀺𑀢𑁄 𑀧𑀘𑁆𑀙𑀸 ‘‘𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀘𑀼𑀢𑀺𑀢𑁄 𑀧𑀼𑀩𑁆𑀩𑁂𑀯𑀸’’𑀢𑀺. 𑀏𑀢𑁆𑀣 𑀳𑀺 𑀧𑀞𑀫𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀏𑀢𑁆𑀣 ‘‘𑀬𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀬𑀫𑀓𑁂𑀲𑀼 𑀬𑀸 𑀧𑀞𑀫𑀧𑀼𑀘𑁆𑀙𑀸, 𑀢𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑁄 𑀅𑀢𑁆𑀣𑁄. 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀦𑀺𑀲𑁆𑀲𑀬𑁄𑀢𑀺 ‘‘𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁄 𑀫𑀸𑀤𑀺𑀲𑁄𑀯 𑀫𑀬𑀸 𑀲𑀤𑀺𑀲𑁄 𑀏𑀯 𑀅𑀢𑁆𑀣𑁄 𑀉𑀧𑀧𑀢𑁆𑀢𑀺𑀉𑀧𑁆𑀧𑀸𑀤𑀺𑀦𑁆𑀤𑁆𑀭𑀺𑀬𑀯𑀸 𑀉𑀧𑀧𑀢𑁆𑀢𑀺𑀓𑁆𑀔𑀡𑁂 𑀉𑀧𑁆𑀧𑀸𑀤𑀸𑀯𑀢𑁆𑀣𑀇𑀦𑁆𑀤𑁆𑀭𑀺𑀬𑀲𑀳𑀺𑀢𑁄, 𑀉𑀪𑀬𑀼𑀧𑁆𑀧𑀸𑀤𑀺𑀦𑁆𑀤𑁆𑀭𑀺𑀬𑀯𑀸 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀉𑀧𑁆𑀧𑀸𑀤𑀸𑀯𑀢𑁆𑀣𑀇𑀦𑁆𑀤𑁆𑀭𑀺𑀬𑀲𑀳𑀺𑀢𑁄 𑀯𑀸. 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀧𑀺 𑀧𑀼𑀘𑁆𑀙𑀺𑀢𑀩𑁆𑀩𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑁄𑀢𑀺 ‘‘𑀬𑀲𑁆𑀲 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲𑀧𑀺 𑀲𑀁𑀲𑀬𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑁄𑀢𑀺 𑀏𑀯𑀁 𑀇𑀫𑀺𑀦𑀸 𑀯𑀺𑀬 𑀅𑀚𑁆𑀛𑀸𑀲𑀬𑁂𑀦 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀤𑀼𑀢𑀺𑀬𑀧𑀼𑀘𑁆𑀙𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀫𑁂𑀯 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑀫𑁂𑀯 𑀅𑀢𑁆𑀣𑀁 𑀦𑀺𑀬𑀫𑁂𑀢𑀺. 𑀢𑀢𑁆𑀣𑁂𑀯 𑀢𑀸𑀲𑀼 𑀏𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑀞𑀫𑀧𑀼𑀘𑁆𑀙𑀸𑀲𑀼 𑀏𑀯. 𑀧𑀼𑀘𑁆𑀙𑀺𑀢𑀩𑁆𑀩𑀁 ‘‘𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀅𑀦𑀸𑀕𑀢𑀪𑀸𑀯𑀫𑀢𑁆𑀢𑁂𑀦 𑀲𑀭𑀽𑀧𑀢𑁄 𑀕𑀳𑀺𑀢𑀁 𑀉𑀧𑁆𑀧𑀸𑀤𑀁 𑀉𑀧𑁆𑀧𑀸𑀤𑀲𑀗𑁆𑀔𑀸𑀢𑀁, ‘‘𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀅𑀦𑀸𑀕𑀢𑀪𑀸𑀯𑀫𑀢𑁆𑀢𑁂𑀦 𑀲𑀭𑀽𑀧𑀢𑁄 𑀕𑀳𑀺𑀢𑀁 𑀦𑀺𑀭𑁄𑀥𑀁 𑀯𑀸 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀯𑀸 𑀲𑀁𑀲𑀬𑀢𑁆𑀣𑀁 𑀦 𑀦𑀺𑀬𑀫𑁂𑀢𑀻𑀢𑀺. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀲𑁆𑀲 𑀦𑀺𑀬𑀫𑁄 𑀳𑁄𑀢𑀺, 𑀦 𑀲𑀁𑀲𑀬𑀢𑁆𑀣𑀲𑁆𑀲, 𑀢𑀲𑁆𑀫𑀸 ‘‘𑀬𑀲𑁆𑀲 𑀯𑀸 𑀧𑀦…𑀧𑁂… 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 𑀉𑀧𑁆𑀧𑀸𑀤𑀯𑀸𑀭𑁂 𑀯𑀺𑀘𑀸𑀭𑁄 𑀯𑀼𑀢𑁆𑀢𑁄, 𑀦𑀺𑀭𑁄𑀥𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀳𑀺 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀅𑀦𑀸𑀕𑀢𑀸𑀦𑀁 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑀢𑁆𑀢𑀸. 𑀦 𑀳𑀺 𑀢𑀢𑁆𑀣 𑀢𑁂 𑀲𑀭𑀽𑀧𑁂𑀦 𑀯𑀼𑀢𑁆𑀢𑀸, 𑀅𑀣 𑀔𑁄 ‘‘𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀅𑀦𑀼𑀮𑁄𑀫𑁂. 𑀦 𑀏𑀯𑀁 𑀬𑁄𑀚𑁂𑀢𑀩𑁆𑀩𑀸 𑀧𑀝𑀺𑀮𑁄𑀫𑁂. 𑀢𑀫𑁂𑀯 𑀅𑀬𑁄𑀚𑁂𑀢𑀩𑁆𑀩𑀢𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀲𑀫𑁆𑀪𑀯𑀦𑁆𑀢𑀺 𑀬𑁄𑀚𑁂𑀢𑀼𑀁, 𑀢𑀣𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑁂 𑀅𑀧𑁆𑀧𑀢𑁆𑀯𑀸 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀲𑀫𑁆𑀪𑀯𑀦𑁆𑀢𑀺 𑀬𑁄𑀚𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀇𑀤𑀜𑁆𑀘 𑀤𑁆𑀯𑀬𑀁 𑀬𑀣𑀸𑀦𑀼𑀮𑁄𑀫𑁂 𑀲𑀫𑁆𑀪𑀯𑀢𑀺, 𑀦 𑀏𑀯𑀁 𑀧𑀝𑀺𑀮𑁄𑀫𑁂. 𑀢𑁂𑀦𑀸𑀳 ‘‘𑀦 𑀏𑀯𑀁…𑀧𑁂… 𑀲𑀫𑁆𑀪𑀯𑀦𑁆𑀢𑀻’’𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀪𑀽𑀢𑀸𑀪𑀸𑀯𑀲𑁆𑀲…𑀧𑁂… 𑀲𑀫𑁆𑀪𑀯𑀸𑀦𑀼𑀧𑀧𑀢𑁆𑀢𑀺𑀢𑁄’’𑀢𑀺. 𑀅𑀪𑀽𑀢𑀸𑀪𑀸𑀯𑀲𑁆𑀲𑀸𑀢𑀺 𑀅𑀪𑀽𑀢𑀲𑁆𑀲 𑀅𑀪𑀸𑀯𑀲𑁆𑀲, 𑀅𑀪𑀽𑀢𑀲𑁆𑀲 𑀉𑀧𑁆𑀧𑀸𑀤𑀲𑁆𑀲 𑀦𑀺𑀭𑁄𑀥𑀲𑁆𑀲 𑀘 𑀅𑀪𑀸𑀯𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀪𑀽𑀢𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑁄 𑀘 𑀧𑀝𑀺𑀮𑁄𑀫𑁂 𑀧𑀼𑀘𑁆𑀙𑀺𑀢𑁄’’𑀢𑀺, 𑀢𑀲𑁆𑀫𑀸 ‘‘𑀆𑀫𑀦𑁆𑀢𑀸’’𑀢𑀺 𑀘 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲 𑀯𑀺𑀲𑁂𑀲𑀭𑀳𑀺𑀢𑀲𑁆𑀲 𑀅𑀪𑀽𑀢𑀸𑀪𑀸𑀯𑀲𑁆𑀲𑀸𑀢𑀺 𑀇𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀬𑀣𑀸 𑀭𑀽𑀧𑀸𑀪𑀸𑀯𑁄 𑀯𑁂𑀤𑀦𑀸𑀪𑀸𑀯𑁄𑀢𑀺 𑀓𑁄𑀘𑀺 𑀅𑀪𑀸𑀯𑁄𑀧𑀺 𑀯𑀺𑀲𑁂𑀲𑀲𑀳𑀺𑀢𑁄, 𑀦 𑀏𑀯𑀫𑀬𑀦𑁆𑀢𑀺 𑀯𑀺𑀲𑁂𑀲𑀭𑀳𑀺𑀢𑀲𑁆𑀲 𑀅𑀪𑀽𑀢𑀸𑀪𑀸𑀯𑀲𑁆𑀲.

𑀓𑀸𑀮𑀦𑁆𑀢𑀭𑀬𑁄𑀕𑀸𑀪𑀸𑀯𑀢𑁄𑀢𑀺 𑀓𑀸𑀮𑀯𑀺𑀲𑁂𑀲𑀬𑁄𑀕𑀸𑀪𑀸𑀯𑀢𑁄. 𑀬𑀸𑀤𑀺𑀲𑀸𑀦𑀦𑁆𑀢𑀺 𑀬𑀸𑀦𑀺 𑀪𑀽𑀢𑀸𑀦𑀺 𑀦 𑀯𑀢𑁆𑀢𑀫𑀸𑀦𑀸𑀦𑀺 𑀲𑀢𑀺 𑀧𑀘𑁆𑀘𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀺, 𑀢𑁂𑀲𑀁 𑀅𑀦𑀸𑀕𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲𑀸𑀢𑀺 ‘‘𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀸𑀤𑀲𑁆𑀲 𑀦𑀺𑀭𑁄𑀥𑀲𑁆𑀲 𑀘 𑀅𑀪𑀸𑀯𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲. 𑀲𑀦𑁆𑀦𑀺𑀲𑁆𑀲𑀬𑁄 𑀦𑀺𑀲𑁆𑀲𑀬𑀪𑀽𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀲𑀦𑁆𑀦𑀺𑀘𑁆𑀙𑀺𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑁄. 𑀲𑁄 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄 𑀦𑀺𑀲𑁆𑀲𑀬𑁄 𑀏𑀢𑁂𑀲𑀦𑁆𑀢𑀺 𑀢𑀦𑁆𑀦𑀺𑀲𑁆𑀲𑀬𑀸. 𑀢𑀸𑀤𑀺𑀲𑀸𑀦𑀁𑀬𑁂𑀯 𑀅𑀦𑀸𑀕𑀢𑀸𑀦𑀁𑀬𑁂𑀯 𑀉𑀧𑀧𑀢𑁆𑀢𑀺𑀘𑀼𑀢𑀺𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀉𑀧𑀧𑀢𑁆𑀢𑀺𑀘𑀼𑀢𑀺𑀲𑀗𑁆𑀔𑀸𑀢𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑀸𑀦𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦. 𑀚𑀻𑀯𑀺𑀢𑀸𑀤𑀻𑀦𑀫𑁆𑀧𑀺 𑀚𑀻𑀯𑀺𑀢𑀫𑀦𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀫𑁆𑀧𑀺. 𑀅𑀦𑀼𑀧𑁆𑀧𑀸𑀤𑀸𑀦𑀺𑀭𑁄𑀥𑀸 𑀲𑀁𑀲𑀬𑀧𑀤𑁂𑀦 𑀧𑀼𑀘𑁆𑀙𑀺𑀢𑀸 𑀳𑁄𑀦𑁆𑀢𑀺 ‘‘𑀬𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺. ‘‘𑀆𑀫𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀦 𑀯𑀼𑀢𑁆𑀢𑀁…𑀧𑁂… 𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺.

𑀬𑁂 𑀲𑁄𑀧𑁂𑀓𑁆𑀔𑀧𑀝𑀺𑀲𑀦𑁆𑀥𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀭𑀽𑀧𑀮𑁄𑀓𑁂, 𑀢𑁂 𑀲𑀗𑁆𑀕𑀳𑀺𑀢𑀸𑀢𑀺 𑀬𑁄𑀚𑀦𑀸. 𑀢𑀁𑀲𑀫𑀸𑀦𑀮𑀓𑁆𑀔𑀡𑀢𑀸𑀬𑀸𑀢𑀺 𑀢𑁂𑀦 𑀲𑁄𑀧𑁂𑀓𑁆𑀔𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑁂𑀦 𑀲𑀫𑀸𑀦𑀮𑀓𑁆𑀔𑀡𑀢𑀸𑀬. 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁 𑀥𑀫𑁆𑀫𑀬𑀫𑀓𑁂 𑀢𑀸𑀤𑀺𑀲𑀲𑁆𑀲𑁂𑀯 𑀯𑀘𑀦𑀲𑁆𑀲 𑀅𑀪𑀸𑀯𑀢𑁄. 𑀢𑀢𑁆𑀣𑀧𑀺 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀘𑀺𑀢𑁆𑀢𑀬𑀫𑀓𑁂 𑀯𑀼𑀢𑁆𑀢𑀁 ‘‘𑀦 𑀳𑀺 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀅𑀢𑀻𑀢𑀯𑁄𑀳𑀸𑀭𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁪𑁩𑁫-𑁪𑁮𑁨. 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑁂𑀳𑀻𑀢𑀺 𑀨𑀮𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀺𑀦𑀺𑀫𑀼𑀢𑁆𑀢𑁂𑀳𑀺 𑀅𑀩𑁆𑀬𑀸𑀓𑀢𑁂𑀳𑀺. 𑀢𑀸𑀦𑀺 𑀉𑀧𑀸𑀤𑀸𑀬𑀸𑀢𑀺 𑀢𑀸𑀦𑀺 𑀮𑁄𑀓𑀺𑀬𑀅𑀩𑁆𑀬𑀸𑀓𑀢𑀸𑀦𑀺 𑀉𑀧𑀸𑀤𑀸𑀬. 𑀢𑀁𑀲𑀫𑀸𑀦𑀕𑀢𑀺𑀓𑀸𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 ‘‘𑀲𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀧𑀭𑀺𑀚𑀸𑀦𑀸𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 (𑀬𑀫. 𑁧.𑀔𑀦𑁆𑀥𑀬𑀫𑀓.𑁨𑁦𑁬) 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀬 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸. 𑀬𑀜𑁆𑀳𑀺 𑀧𑀭𑀺𑀚𑀸𑀦𑀺𑀢𑀩𑁆𑀩𑀁, 𑀢𑀤𑁂𑀯 𑀧𑀭𑀺𑀚𑀸𑀦𑀸𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀏𑀯𑀫𑀯𑀺𑀧𑀭𑀻𑀢𑁂 𑀅𑀢𑁆𑀣𑁂 𑀲𑀺𑀤𑁆𑀥𑁂𑀧𑀺 𑀘𑁄𑀤𑀓𑁄 ‘‘𑀫𑀺𑀲𑁆𑀲𑀓𑀢𑁆𑀢𑀸’’𑀢𑀺 𑀏𑀢𑁆𑀣 𑀮𑀩𑁆𑀪𑀫𑀸𑀦𑀁 𑀮𑁂𑀲𑀁 𑀕𑀳𑁂𑀢𑁆𑀯𑀸 𑀘𑁄𑀤𑁂𑀢𑀺 ‘‘𑀬𑀤𑀺 𑀧𑀭𑀺𑀜𑁆𑀜𑁂𑀬𑁆𑀬𑀫𑀺𑀲𑁆𑀲𑀓𑀢𑁆𑀢𑀸’’𑀢𑀺𑀆𑀤𑀺𑀦𑀸. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀇𑀥 𑀧𑀭𑀺𑀜𑁆𑀜𑁂𑀬𑁆𑀬𑀫𑀺𑀲𑁆𑀲𑀓𑀸𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸, 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀲𑀸 𑀢𑁂𑀲𑀁 𑀯𑀢𑁆𑀢𑀩𑁆𑀩𑀸, 𑀢𑀣𑀸 𑀪𑀸𑀯𑁂𑀢𑀩𑁆𑀩𑀫𑀺𑀲𑁆𑀲𑀓𑀸𑀦𑀁 𑀪𑀸𑀯𑁂𑀢𑀩𑁆𑀩𑀢𑀸𑀢𑀺. 𑀢𑁂𑀦𑀸𑀳 ‘‘𑀓𑀲𑁆𑀫𑀸 𑀥𑀫𑁆𑀫𑀬𑀫𑀓𑁂’’𑀢𑀺𑀆𑀤𑀺. 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀪𑀸𑀯𑀦𑀸𑀧𑀳𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀬𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀢𑀁 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺. 𑀦 𑀅𑀩𑁆𑀬𑀸𑀓𑀢𑀪𑀸𑀯𑀦𑁆𑀢𑀺 𑀏𑀓𑁂𑀦 𑀬𑀣𑀸 𑀨𑀲𑁆𑀲𑀤𑁆𑀯𑀸𑀭𑀢𑁄 𑀯𑀺𑀬 𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑀢𑁄 𑀓𑀼𑀲𑀮𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄, 𑀏𑀯𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀬 𑀦 𑀅𑀩𑁆𑀬𑀸𑀓𑀢𑀸𑀤𑀻𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺.

𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀸𑀢𑀺 𑀲𑀫𑀼𑀤𑀬𑀲𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀸𑀓𑀼𑀲𑀮𑀸𑀧𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀪𑀸𑀯𑀸𑀧𑀺 𑀲𑀫𑀸𑀦𑀸. 𑀪𑀸𑀯𑁂𑀢𑀩𑁆𑀩𑀧𑀳𑀸𑀢𑀩𑁆𑀩𑀪𑀸𑀯𑁂𑀳𑀺 𑀯𑀺𑀦𑀸𑀧𑀺 𑀳𑁄𑀢𑀺, 𑀬𑁄 𑀦 𑀫𑀕𑁆𑀕𑀲𑀫𑀼𑀤𑀬𑀲𑀘𑁆𑀘𑀧𑀓𑁆𑀔𑀺𑀬𑁄. 𑀬𑀣𑀸 ‘‘𑀅𑀦𑀺𑀘𑁆𑀘𑀁 𑀭𑀽𑀧’’𑀦𑁆𑀢𑀺 𑀏𑀢𑁆𑀣 ‘‘𑀅𑀦𑀺𑀘𑁆𑀘𑀫𑁂𑀯 𑀭𑀽𑀧𑀁, 𑀦 𑀦𑀺𑀘𑁆𑀘’’𑀦𑁆𑀢𑀺 𑀧𑀝𑀺𑀬𑁄𑀕𑀺𑀯𑀺𑀦𑀺𑀯𑀢𑁆𑀢𑀦𑀫𑁂𑀯 𑀏𑀯-𑀓𑀸𑀭𑁂𑀦 𑀓𑀭𑀻𑀬𑀢𑀺, 𑀦 𑀢𑀲𑁆𑀲 𑀤𑀼𑀓𑁆𑀔𑀸𑀦𑀢𑁆𑀢𑀢𑀸𑀤𑀬𑁄 𑀦𑀺𑀯𑀸𑀭𑀺𑀢𑀸 𑀳𑁄𑀦𑁆𑀢𑀺, 𑀏𑀯𑀁 ‘‘𑀧𑀳𑀸𑀢𑀩𑁆𑀩𑀫𑁂𑀯𑀸’’𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁂𑀦 𑀧𑀝𑀺𑀬𑁄𑀕𑀺𑀪𑀽𑀢𑀁 𑀅𑀧𑁆𑀧𑀳𑀸𑀢𑀩𑁆𑀩𑀫𑁂𑀯 𑀦𑀺𑀯𑀢𑁆𑀢𑀻𑀬𑀢𑀺, 𑀦 𑀢𑀢𑁄 𑀅𑀜𑁆𑀜𑀯𑀺𑀲𑁂𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀢𑁂𑀦 𑀧𑀳𑀸𑀢𑀩𑁆𑀩𑀫𑁂𑀯𑀸’’𑀢𑀺𑀆𑀤𑀺. 𑀪𑀸𑀯𑁂𑀢𑀩𑁆𑀩𑀪𑀸𑀯𑁄 𑀏𑀯 𑀢𑀲𑁆𑀲 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀕𑀳𑀺𑀢𑁄 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑀢𑁄. ‘‘𑀧𑀭𑀢𑁄 𑀮𑀺𑀔𑀺𑀢𑀩𑁆𑀩𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀮𑀺𑀔𑀺𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀤𑁆𑀯𑁂 𑀧𑀼𑀕𑁆𑀕𑀮𑀸𑀢𑀺 𑀳𑀺 𑀆𑀤𑀺 𑀅𑀦𑀼𑀮𑁄𑀫𑁂 𑀆𑀕𑀢𑀁 𑀉𑀤𑁆𑀥𑀝𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀧𑀭𑀺𑀚𑀸𑀦𑀸𑀢𑀻𑀢𑀺𑀆𑀤𑀺 𑀧𑀦 𑀧𑀝𑀺𑀮𑁄𑀫𑁂. 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀦 𑀧𑀚𑀳𑀦𑁆𑀢𑀺 𑀦𑀸𑀫𑀸𑀢𑀺 𑀇𑀤𑀁 ‘‘𑀦𑁄 𑀘 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀧𑀚𑀳𑀦𑁆𑀢𑀻’’𑀢𑀺 𑀧𑀸𑀴𑀺𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀬𑀁 𑀧𑀦 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀫𑀽𑀮𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀫𑀽𑀮𑀓𑁂 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀝𑀺𑀮𑁄𑀫𑁂 𑀆𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀦 𑀬𑀼𑀢𑁆𑀢𑀁, 𑀦 𑀢𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀞𑀫𑀁 𑀆𑀕𑀢𑀁 𑀧𑀤𑀁 𑀮𑀗𑁆𑀖𑀺𑀢𑁆𑀯𑀸 𑀢𑀸𑀤𑀺𑀲𑀲𑁆𑀲𑁂𑀯 𑀧𑀘𑁆𑀙𑀸 𑀆𑀕𑀢𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑀺. 𑀧𑀤𑀸𑀦𑀼𑀓𑁆𑀓𑀫𑀢𑁄 𑀏𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀆𑀭𑀤𑁆𑀥𑀸, 𑀧𑀭𑀺𑀬𑁄𑀲𑀸𑀧𑀺𑀢𑀸 𑀘, 𑀢𑀲𑁆𑀫𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸𑀯 𑀮𑀺𑀔𑀺𑀢𑀁, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁 ‘‘𑀤𑁆𑀯𑁂 𑀧𑀼𑀕𑁆𑀕𑀮𑀸’’𑀢𑀺𑀆𑀤𑀺𑀓𑀲𑁆𑀲 𑀅𑀦𑀼𑀮𑁄𑀫𑁂 𑀆𑀕𑀢𑀲𑁆𑀲 𑀉𑀤𑁆𑀥𑀝𑀢𑁆𑀢𑀸.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀭𑀺𑀜𑁆𑀜𑀸𑀯𑀸𑀭𑁂. 𑀙 𑀧𑀼𑀕𑁆𑀕𑀮𑀸𑀢𑀺 𑀧𑀼𑀣𑀼𑀚𑁆𑀚𑀦𑁂𑀦 𑀲𑀤𑁆𑀥𑀺𑀁 𑀬𑀸𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑀸 𑀙 𑀧𑀼𑀕𑁆𑀕𑀮𑀸. 𑀅𑀪𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑁄 𑀢𑀢𑁆𑀣 𑀪𑀩𑁆𑀩𑀸𑀪𑀩𑁆𑀩𑀸𑀦𑀁 𑀓𑀺𑀘𑁆𑀘𑀯𑀺𑀲𑁂𑀲𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸. 𑀬𑀢𑁆𑀣 𑀧𑀦 𑀲𑀢𑀺 𑀧𑀼𑀣𑀼𑀚𑁆𑀚𑀦𑀕𑁆𑀕𑀳𑀡𑀲𑀸𑀫𑀜𑁆𑀜𑁂 𑀪𑀩𑁆𑀩𑀸𑀦𑀁 𑀓𑀺𑀘𑁆𑀘𑀁 𑀕𑀳𑀺𑀢𑀁, 𑀬𑀢𑁆𑀣 𑀘 𑀅𑀪𑀩𑁆𑀩𑀸𑀦𑀁, 𑀢𑀢𑁆𑀣 𑀢𑁂 𑀏𑀯 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 𑀘 𑀆𑀤𑀺𑀫𑀸𑀳. 𑀅𑀭𑀳𑀸𑀢𑀺 𑀅𑀭𑀺𑀬𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀧𑀞𑀫𑀫𑀕𑁆𑀕𑀨𑀮𑀲𑀫𑀗𑁆𑀕𑀻𑀢𑀺 𑀧𑀼𑀭𑀺𑀫𑀫𑀕𑁆𑀕𑀨𑀮𑀲𑀫𑀗𑁆𑀕𑀻. 𑀇𑀢𑀭𑁄𑀢𑀺 𑀅𑀭𑀳𑀸. 𑀏𑀯𑀁 𑀧𑀼𑀕𑁆𑀕𑀮𑀪𑁂𑀤𑀁 𑀜𑀢𑁆𑀯𑀸𑀢𑀺 𑀇𑀥 𑀧𑀼𑀣𑀼𑀚𑁆𑀚𑀦𑁄 𑀲𑁄 𑀘 𑀅𑀪𑀩𑁆𑀩𑁄𑀢𑀺 𑀕𑀳𑀺𑀢𑁄, 𑀇𑀥 𑀪𑀩𑁆𑀩𑁄 𑀇𑀥 𑀅𑀭𑀺𑀬𑀸, 𑀬𑁂 𑀘 𑀧𑀞𑀫𑀫𑀕𑁆𑀕𑀨𑀮𑀲𑀫𑀗𑁆𑀕𑀺𑀦𑁄 𑀬𑀸𑀯 𑀅𑀕𑁆𑀕𑀫𑀕𑁆𑀕𑀨𑀮𑀲𑀫𑀗𑁆𑀕𑀺𑀦𑁄𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀁 𑀧𑀼𑀕𑁆𑀕𑀮𑀯𑀺𑀪𑀸𑀕𑀁 𑀜𑀢𑁆𑀯𑀸. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑁂𑀲𑀁 𑀤𑁆𑀯𑁂 𑀧𑀼𑀣𑀼𑀚𑁆𑀚𑀦𑀸 𑀅𑀝𑁆𑀞 𑀅𑀭𑀺𑀬𑀸𑀢𑀺 𑀇𑀫𑁂𑀲𑀁 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀪𑁂𑀤𑀢𑁄 𑀅𑀪𑁂𑀤𑀢𑁄 𑀘 𑀕𑀳𑀡𑀯𑀲𑁂𑀦 𑀆𑀕𑀢𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀸𑀞𑀧𑀤𑁂𑀲𑁂. 𑀲𑀦𑁆𑀦𑀺𑀝𑁆𑀞𑀸𑀦𑁂𑀦𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀯𑀲𑁂𑀦, 𑀦𑀺𑀘𑁆𑀙𑀬𑀯𑀲𑁂𑀦𑁂𑀯 𑀯𑀸. 𑀦𑀺𑀤𑁆𑀥𑀸𑀭𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀯𑀺𑀲𑁆𑀲𑀚𑁆𑀚𑀦𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀧𑀸𑀴𑀺𑀬𑀸 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀤𑀲𑁆𑀲𑀦𑁂𑀦 𑀲𑀫𑁆𑀩𑀦𑁆𑀥𑀢𑁄 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀦𑁆𑀤𑁆𑀭𑀺𑀬𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀧𑀓𑀭𑀡-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲