𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁧𑁬. 𑀬𑀣𑀸 𑀫𑀽𑀮𑀬𑀫𑀓𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑀸 𑀤𑁂𑀲𑀺𑀢𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸 𑀥𑀫𑁆𑀫𑀸 𑀓𑀼𑀲𑀮𑀓𑀼𑀲𑀮𑀫𑀽𑀮𑀸𑀤𑀺𑀯𑀺𑀪𑀸𑀕𑀢𑁄 𑀫𑀽𑀮𑀬𑀫𑀓𑁂 𑀬𑀫𑀓𑀯𑀲𑁂𑀦 𑀬𑀣𑀸 𑀤𑁂𑀲𑀺𑀢𑀸. 𑀅𑀜𑁆𑀜𑀣𑀸𑀢𑀺 𑀓𑀼𑀲𑀮𑀓𑀼𑀲𑀮𑀫𑀽𑀮𑀸𑀤𑀺𑀯𑀺𑀪𑀸𑀕𑀢𑁄 𑀅𑀜𑁆𑀜𑀣𑀸, 𑀔𑀦𑁆𑀥𑀸𑀤𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁩𑁩-𑁩𑁪. 𑀢𑀁 𑀧𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸. 𑀓𑁂𑀘𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀁 𑀆𑀳𑀭𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀧𑀜𑁆𑀳𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀭𑀽𑀧𑀜𑁆𑀘 𑀮𑀩𑁆𑀪𑀢𑀻’’𑀢𑀺 𑀅𑀯𑁄𑀘. 𑀢𑀣𑀸 𑀘 𑀯𑀢𑁆𑀯𑀸 𑀧𑀝𑀺𑀮𑁄𑀫𑀧𑀸𑀴𑀺𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀭𑀽𑀧𑁂 𑀦 𑀯𑀺𑀥𑀸𑀦𑀁, 𑀦𑀸𑀧𑀺 𑀧𑀝𑀺𑀲𑁂𑀥𑁄’’𑀢𑀺 𑀆𑀳. 𑀢𑀣𑀸𑀢𑀺 𑀬𑀣𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀧𑀸𑀞𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀣𑀸 𑀏𑀢𑁆𑀣𑀸𑀧𑀻𑀢𑀺 𑀅𑀢𑁆𑀣𑁄. 𑀦𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀧𑀦𑁂𑀢𑀦𑁆𑀢𑀺 𑀬𑀣𑀸 𑀉𑀤𑁆𑀥𑀝𑀲𑁆𑀲 𑀧𑀸𑀞𑀲𑁆𑀲 𑀅𑀢𑁆𑀣𑀯𑀘𑀦𑀁, 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂…𑀧𑁂… 𑀧𑀝𑀺𑀲𑁂𑀥𑀲𑀺𑀤𑁆𑀥𑀺𑀢𑁄’’𑀢𑀺. 𑀲𑁆𑀯𑀸𑀬𑀁 𑀧𑀝𑀺𑀲𑁂𑀥𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑁂 𑀘 𑀯𑀤𑀦𑁆𑀢𑀻𑀢𑀺 𑀏𑀢𑁆𑀣 𑀬𑁂 𑀘𑀸𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂’’𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀁 𑀆𑀳𑀭𑀺𑀢𑁆𑀯𑀸 ‘‘𑀬𑀣𑀸 𑀢𑀢𑁆𑀣 𑀲𑀢𑀺𑀧𑀺 𑀓𑀫𑁆𑀫𑀚𑀸𑀤𑀺𑀭𑀽𑀧𑁂 𑀞𑀧𑁂𑀢𑁆𑀯𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀦𑁆𑀢𑀺 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑀚𑀭𑀽𑀧𑀫𑁂𑀯 𑀞𑀧𑁂𑀢𑀩𑁆𑀩𑀪𑀸𑀯𑁂𑀦 𑀉𑀤𑁆𑀥𑀝𑀁, 𑀏𑀯𑀫𑀺𑀥𑀸𑀧𑀺 𑀘𑀺𑀢𑁆𑀢𑀚𑀭𑀽𑀧𑀫𑁂𑀯 𑀓𑀣𑀺𑀢’’𑀦𑁆𑀢𑀺 𑀯𑀤𑀢𑀺. 𑀢𑀜𑁆𑀘 𑀦𑁂𑀲𑀁 𑀯𑀘𑀦𑀁 𑀢𑀣𑀸 𑀦 𑀳𑁄𑀢𑀺, 𑀬𑀣𑀸 𑀢𑁂𑀳𑀺 𑀉𑀤𑀸𑀳𑀝𑀁, 𑀯𑀺𑀲𑀫𑁄𑀬𑀁 𑀉𑀧𑀜𑁆𑀜𑀸𑀲𑁄𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀢𑀁 𑀢𑀣𑀸 𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀓𑀫𑁆𑀫𑀚𑀸𑀤𑀻𑀦𑀁. 𑀢𑀲𑁆𑀲𑀸𑀢𑀺 𑀫𑀕𑁆𑀕𑀲𑁆𑀲. 𑀢𑁂𑀢𑀺 𑀅𑀩𑁆𑀬𑀸𑀓𑀢𑀸, 𑀬𑁂 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀦𑁆𑀢𑁄. 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀘 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀲𑀼 𑀦𑀺𑀩𑁆𑀩𑀸𑀦𑀲𑁆𑀲 𑀯𑀺𑀬.

𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀢𑁂𑀲𑀼 𑀳𑀺 𑀓𑁂𑀘𑀺 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀦𑁄, 𑀓𑁂𑀘𑀺 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲, 𑀓𑁂𑀘𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀲𑁆𑀲, 𑀢𑁂𑀲𑀼 𑀧𑀼𑀭𑀺𑀫𑀸 𑀤𑁆𑀯𑁂 𑀧𑀞𑀫𑀓𑁄𑀝𑁆𑀞𑀸𑀲𑁂𑀦 𑀲𑀗𑁆𑀕𑀳𑀺𑀢𑀸 𑀢𑀲𑁆𑀲 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀧𑀝𑀺𑀲𑁂𑀥𑀧𑀭𑀢𑁆𑀢𑀸, 𑀢𑁂 𑀧𑀦 𑀪𑀯𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀯𑁄𑀓𑀸𑀭𑁂’’𑀢𑀺𑀆𑀤𑀺𑀫𑀸𑀳. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀧𑀜𑁆𑀳𑁂𑀲𑀼.

𑁭𑁯. 𑀢𑀢𑁄𑀢𑀺 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀢𑁄. 𑀧𑀼𑀭𑀺𑀫𑀢𑀭𑀚𑀯𑀦𑀯𑀻𑀣𑀺 𑀬𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀲𑀗𑁆𑀕𑀳𑀺𑀢𑀸, 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑁆𑀲𑀧𑀺 𑀘𑀺𑀢𑁆𑀢𑀲𑁆𑀲. 𑀓𑀼𑀲𑀮𑀸𑀦𑀸𑀕𑀢𑀪𑀸𑀯𑀧𑀭𑀺𑀬𑁄𑀲𑀸𑀦𑁂𑀦𑀸𑀢𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀸𑀕𑀢𑀪𑀸𑀯𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑁂𑀦 𑀅𑀕𑁆𑀕𑀫𑀕𑁆𑀕𑀸𑀦𑀦𑁆𑀢𑀭𑀧𑀘𑁆𑀘𑀬𑀢𑁆𑀢𑁂𑀦 𑀤𑀻𑀧𑀺𑀢𑀁 𑀳𑁄𑀢𑀺 𑀲𑀫𑀸𑀦𑀮𑀓𑁆𑀔𑀡𑀁 𑀲𑀩𑁆𑀩𑀁. 𑀓𑁂𑀦? 𑀢𑀸𑀬 𑀏𑀯 𑀲𑀫𑀸𑀦𑀮𑀓𑁆𑀔𑀡𑀢𑀸𑀬. 𑀏𑀲 𑀦𑀬𑁄𑀢𑀺 𑀬𑀣𑀸 𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑁄 𑀓𑀼𑀲𑀮𑀸𑀦𑀸𑀕𑀢𑀪𑀸𑀯𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀢𑁄 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀑𑀭𑀫𑁆𑀧𑀺 𑀮𑀩𑁆𑀪𑀢𑀻𑀢𑀺 𑀲𑁄 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄 𑀮𑀓𑁆𑀔𑀡𑀫𑀢𑁆𑀢𑀦𑁆𑀢𑀺 𑀲𑁆𑀯𑀸𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄. 𑀏𑀲 𑀦𑀬𑁄 𑀅𑀓𑀼𑀲𑀮𑀸𑀢𑀻𑀢𑀪𑀸𑀯𑀲𑁆𑀲 𑀆𑀤𑀺𑀫𑁆𑀳𑀺 ‘‘𑀤𑀼𑀢𑀺𑀬𑁂 𑀅𑀓𑀼𑀲𑀮𑁂’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂, 𑀅𑀩𑁆𑀬𑀸𑀓𑀢𑀸𑀢𑀻𑀢𑀪𑀸𑀯𑀲𑁆𑀲 𑀆𑀤𑀺𑀫𑁆𑀳𑀺 ‘‘𑀤𑀼𑀢𑀺𑀬𑁂 𑀘𑀺𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂𑀧𑀻𑀢𑀺 𑀬𑁄𑀚𑀦𑀸. 𑀇𑀤𑀸𑀦𑀺 ‘‘𑀏𑀲 𑀦𑀬𑁄’’𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑀺𑀤𑁂𑀲𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀪𑀸𑀯𑀦𑀸𑀧𑀳𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺 ‘‘𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀻 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀪𑀸𑀯𑁂𑀢𑀺, 𑀅𑀓𑀼𑀲𑀮𑀜𑁆𑀘 𑀧𑀚𑀳𑀢𑀻’’𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀯𑀢𑁆𑀢𑀺𑀯𑀸𑀭𑁂. 𑀢𑀁 𑀢𑀦𑁆𑀢𑀺 𑀅𑀓𑀼𑀲𑀮𑀸𑀢𑀻𑀢𑀢𑀸𑀤𑀺 𑀓𑀼𑀲𑀮𑀸𑀦𑀸𑀕𑀢𑀢𑀸𑀤𑀺 𑀘. 𑀢𑁂𑀦 𑀢𑁂𑀦𑀸𑀢𑀺 ‘‘𑀤𑀼𑀢𑀺𑀬𑁂 𑀅𑀓𑀼𑀲𑀮𑁂 𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀅𑀦𑁆𑀢𑁂𑀦 𑀘.

𑁧𑁦𑁦. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀢𑁄𑀢𑀺 𑀇𑀤𑀁 𑀫𑀭𑀺𑀬𑀸𑀤𑀕𑁆𑀕𑀳𑀡𑀁, 𑀦 𑀅𑀪𑀺𑀯𑀺𑀥𑀺𑀕𑁆𑀕𑀳𑀡𑀁, 𑀬𑀢𑁄 ‘‘𑀲𑁄𑀴𑀲𑀫’’𑀦𑁆𑀢𑀺 𑀆𑀳. 𑀅𑀪𑀺𑀯𑀺𑀥𑀺𑀕𑁆𑀕𑀳𑀡𑀫𑁂𑀯 𑀯𑀸 𑀲𑁄𑀴𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀫𑁂𑀯 𑀭𑀽𑀧𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀥𑀺𑀧𑁆𑀧𑁂𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑁄𑀯𑀸𑀬𑀁 𑀯𑀸𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄 𑀧𑀭𑀫𑁆𑀧𑀺 𑀯𑀸’’𑀢𑀺 𑀆𑀳. 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄 𑀏𑀯. 𑀦 𑀢𑀢𑁄 𑀑𑀭𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀢𑁄 𑀑𑀭𑀁 𑀅𑀓𑀼𑀲𑀮𑀦𑀺𑀭𑁄𑀥𑀲𑀫𑀓𑀸𑀮𑀁 𑀅𑀩𑁆𑀬𑀸𑀓𑀢𑀦𑀺𑀭𑁄𑀥𑀲𑁆𑀲 𑀅𑀲𑀫𑁆𑀪𑀯𑀢𑁄.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀇𑀦𑁆𑀤𑁆𑀭𑀺𑀬𑀬𑀫𑀓𑀁