𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑁄

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁯. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀯𑀬𑀯𑀧𑀤𑁂𑀳𑀺 𑀯𑀼𑀢𑁆𑀢𑁄 𑀏𑀓𑀤𑁂𑀲𑁄 𑀲𑀓𑀮𑁄 𑀯𑀸 𑀲𑀫𑀼𑀤𑀸𑀬𑀧𑀤𑀸𑀦𑀁 𑀅𑀢𑁆𑀣𑁄, 𑀲𑀫𑀼𑀤𑀸𑀬𑀧𑀤𑁂𑀳𑀺 𑀧𑀦 𑀯𑀼𑀢𑁆𑀢𑁄 𑀏𑀓𑀦𑁆𑀢𑁂𑀦 𑀅𑀯𑀬𑀯𑀧𑀤𑀸𑀦𑀁 𑀅𑀢𑁆𑀣𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑀤𑀲𑁆𑀲𑀦𑀢𑀸𑀬 𑀲𑀩𑁆𑀩𑀧𑀡𑁆𑀡𑀢𑁆𑀢𑀺𑀯𑀸𑀭𑀸𑀤𑀻𑀲𑀼 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧𑁦-𑁧𑁭. 𑀯𑀸𑀬𑀦𑀁 𑀲𑀯𑀺𑀲𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑀁, 𑀢𑀬𑀺𑀤𑀁 𑀬𑀣𑀸 𑀕𑀦𑁆𑀥𑀸𑀬𑀢𑀦𑁂 𑀮𑀩𑁆𑀪𑀢𑀺, 𑀏𑀯𑀁 𑀲𑀻𑀮𑀸𑀤𑀻𑀲𑀼𑀧𑀻𑀢𑀺 𑀧𑀸𑀴𑀺𑀬𑀁 ‘‘𑀲𑀻𑀮𑀕𑀦𑁆𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁 ‘‘𑀲𑀻𑀮𑀸𑀤𑀺𑀬𑁂𑀯 𑀕𑀦𑁆𑀥𑁄’’𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀻𑀮𑀕𑀦𑁆𑀥𑁄…𑀧𑁂… 𑀦𑀸𑀫𑀸𑀦𑀻’’𑀢𑀺. 𑀬𑀲𑁆𑀫𑀸 𑀧𑀦 𑀲𑀯𑀺𑀲𑀬𑀩𑁆𑀬𑀸𑀧𑀦𑀁 𑀢𑀢𑁆𑀣 𑀧𑀲𑀝𑀪𑀸𑀯𑁄 𑀧𑀸𑀓𑀝𑀪𑀸𑀯𑁄 𑀯𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀲𑀸𑀭𑀡𑀝𑁆𑀞𑁂𑀦 𑀧𑀸𑀓𑀝𑀪𑀸𑀯𑀝𑁆𑀞𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀯𑀢𑁆𑀣𑀼𑀲𑁆𑀲 𑀲𑀽𑀘𑀦𑀁 𑀯𑀸 𑀯𑀸𑀬𑀦𑀁. ‘‘𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸 (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭), 𑀧𑀡𑁆𑀡𑀢𑁆𑀢𑀺𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁦𑁮) 𑀲𑀫𑀽𑀳𑀧𑀜𑁆𑀜𑀢𑁆𑀢𑀻𑀲𑀼𑀧𑀺 𑀓𑀸𑀬𑀥𑀫𑁆𑀫𑀲𑀤𑁆𑀤𑀸 𑀆𑀕𑀢𑀸𑀢𑀺 ‘‘𑀲𑀲𑀪𑀸𑀯’’𑀦𑁆𑀢𑀺 𑀯𑀺𑀲𑁂𑀲𑁂𑀢𑀺. 𑀓𑀸𑀬𑀯𑀘𑀦𑁂𑀦…𑀧𑁂… 𑀦𑀢𑁆𑀣𑀻𑀢𑀺 𑀇𑀤𑀁 ‘‘𑀦 𑀥𑀫𑁆𑀫𑁄 𑀦𑀸𑀬𑀢𑀦’’𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀲𑀤𑁆𑀤𑀲𑁆𑀲 𑀯𑀺𑀦𑀺𑀯𑀢𑁆𑀢𑀯𑀺𑀲𑁂𑀲𑀲𑀩𑁆𑀩𑀲𑀪𑀸𑀯𑀥𑀫𑁆𑀫𑀯𑀸𑀘𑀓𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀥𑀫𑁆𑀫𑀸𑀬𑀢𑀦𑀲𑀗𑁆𑀔𑀸𑀢𑀥𑀫𑁆𑀫𑀯𑀺𑀲𑁂𑀲𑀯𑀸𑀘𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁮-𑁨𑁧. 𑀏𑀢𑀲𑁆𑀫𑀺𑀦𑁆𑀢𑀺 𑀧𑀯𑀢𑁆𑀢𑀺𑀯𑀸𑀭𑁂. 𑀧𑀼𑀘𑁆𑀙𑀸𑀫𑀢𑁆𑀢𑀮𑀸𑀪𑁂𑀦𑀸𑀢𑀺 𑀫𑁄𑀖𑀧𑀼𑀘𑁆𑀙𑀸𑀪𑀸𑀯𑀫𑀸𑀳. 𑀏𑀓𑁂𑀓𑀦𑁆𑀢𑀺 ‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀤𑁆𑀤𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀓𑀁 𑀏𑀓𑁂𑀓𑀁. 𑀧𑀜𑁆𑀘𑀸𑀢𑀺 ‘‘𑀬𑀲𑁆𑀲 𑀲𑀤𑁆𑀤𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀕𑀦𑁆𑀥𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀦𑀺 𑀧𑀜𑁆𑀘. 𑀧𑀼𑀘𑁆𑀙𑀸𑀫𑀢𑁆𑀢𑀮𑀸𑀪𑁂𑀦 𑀲𑀗𑁆𑀕𑀳𑀁 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀳𑀸𑀧𑁂𑀢𑀩𑁆𑀩𑀸𑀦𑀻’’𑀢𑀺 𑀆𑀳. ‘‘𑀯𑀓𑁆𑀔𑀢𑀺 𑀳𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀝𑁆𑀞𑀓𑀣𑀸𑀬 𑀲𑀫𑀢𑁆𑀣𑁂𑀢𑀺.

𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑀁 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀫𑁂𑀯 𑀳𑁄𑀢𑀻𑀢𑀺 𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀕𑁆𑀕𑀮𑀯𑀸𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀧𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀬 𑀅𑀩𑁆𑀬𑀸𑀧𑀺𑀢𑀢𑁆𑀢𑀸 𑀬𑀢𑁆𑀣 𑀲𑀤𑀺𑀲𑀁, 𑀢𑀢𑁆𑀣𑀸𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀓𑀸𑀲𑀯𑀸𑀭𑁂 𑀧𑀦…𑀧𑁂… 𑀯𑀺𑀲𑁆𑀲𑀚𑁆𑀚𑀺𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀢𑀦𑁆𑀢𑀺 𑀤𑀼𑀢𑀺𑀬𑀁. 𑀧𑀼𑀕𑁆𑀕𑀮𑀯𑀸𑀭𑁂𑀧𑀻𑀢𑀺 𑀬𑀢𑁆𑀣 𑀲𑀤𑀺𑀲𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀢𑀢𑁆𑀣 𑀧𑀼𑀕𑁆𑀕𑀮𑀯𑀸𑀭𑁂𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀧𑀕𑁂𑀯 𑀑𑀓𑀸𑀲𑀯𑀸𑀭𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀭𑀢𑁆𑀢𑀓𑀸𑀫𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲𑀸𑀢𑀺 𑀪𑀸𑀯𑀦𑀸𑀩𑀮𑁂𑀦 𑀯𑀺𑀭𑀢𑁆𑀢𑁄 𑀓𑀸𑀫𑁄 𑀏𑀢𑁂𑀦𑀸𑀢𑀺 𑀯𑀺𑀭𑀢𑁆𑀢𑀓𑀸𑀫𑀁, 𑀭𑀽𑀧𑀸𑀯𑀘𑀭𑀓𑀫𑁆𑀫𑀁, 𑀢𑀢𑁄 𑀦𑀺𑀩𑁆𑀩𑀢𑁆𑀢𑀲𑁆𑀲. 𑀧𑀝𑀺𑀲𑀦𑁆𑀥𑀺 𑀏𑀯 𑀩𑀻𑀚𑀁 𑀧𑀝𑀺𑀲𑀦𑁆𑀥𑀺𑀩𑀻𑀚𑀁, 𑀢𑀲𑁆𑀲. ‘‘𑀏𑀯𑀁𑀲𑀪𑀸𑀯𑀢𑁆𑀢𑀸’’𑀢𑀺 𑀏𑀢𑁂𑀦 𑀏𑀓𑀦𑁆𑀢𑀢𑁄 𑀓𑀸𑀫𑀢𑀡𑁆𑀳𑀸𑀦𑀺𑀤𑀸𑀦𑀓𑀫𑁆𑀫𑀳𑁂𑀢𑀼𑀓𑀸𑀦𑀺 𑀖𑀸𑀦𑀸𑀤𑀻𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀕𑀦𑁆𑀥𑀸𑀤𑀬𑁄 𑀘 𑀦 𑀲𑀦𑁆𑀢𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑁂𑀲𑀫𑁆𑀧𑀺 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

‘‘𑀲𑀘𑁆𑀘’’𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀁 𑀘𑁄𑀤𑀓𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀦 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀢𑀸𑀦𑀺 𑀬𑀫𑀓𑀸𑀦𑀺 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀢𑁆𑀣 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑁂𑀲𑀼 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 ‘‘𑀲𑀘𑀓𑁆𑀔𑀼𑀓𑀸𑀦𑀁 𑀅𑀖𑀸𑀦𑀓𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀬𑀫𑀓𑀸𑀦𑀺 𑀬𑀣𑀸 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀺, 𑀢𑀣𑀸 𑀇𑀥 𑀖𑀸𑀦𑀸𑀬𑀢𑀦𑀫𑀽𑀮𑀓𑁂𑀲𑀼 𑀖𑀸𑀦𑀸𑀬𑀢𑀦𑀬𑀫𑀓𑁂𑀦 𑀢𑀸𑀦𑀺 𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀬𑀫𑀓𑀸𑀦𑀺 ‘‘𑀬𑀲𑁆𑀲 𑀖𑀸𑀦𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀚𑀺𑀯𑁆𑀳𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺. 𑀏𑀯𑀫𑁂𑀢𑁆𑀣 𑀉𑀪𑀬𑁂𑀲𑀁 𑀯𑀺𑀲𑀼𑀁 𑀅𑀜𑁆𑀜𑀫𑀜𑁆𑀜𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀬 𑀇𑀤𑀁 𑀯𑀼𑀢𑁆𑀢𑀁, 𑀦 𑀏𑀓𑀚𑁆𑀛𑀁 𑀅𑀜𑁆𑀜𑀫𑀜𑁆𑀜𑀁 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀬. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸 𑀧𑀸𑀴𑀺𑀅𑀦𑀸𑀭𑀼𑀴𑁆𑀳𑀢𑀸𑀬 𑀓𑀸𑀭𑀡’’𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 𑀘𑀓𑁆𑀔𑀸𑀬𑀢𑀦𑀫𑀽𑀮𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀦𑀺𑀤𑀲𑁆𑀲𑀦𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀤𑀲𑁆𑀲𑀦𑀪𑀸𑀯𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀲𑀗𑁆𑀔𑀸𑀢𑁂𑀦 𑀦𑀺𑀤𑀲𑁆𑀲𑀦𑀪𑀸𑀯𑁂𑀦𑁂𑀯, 𑀦 𑀧𑀦 𑀢𑁂𑀲𑀁 𑀦𑀺𑀤𑀲𑁆𑀲𑀺𑀢𑀩𑁆𑀩𑁂𑀳𑀺 𑀲𑀩𑁆𑀩𑀣𑀸 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑁂𑀪𑀼𑀬𑁆𑀬𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁 𑀬𑁂𑀪𑀼𑀬𑁆𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀦𑁆𑀢𑀺 𑀇𑀫𑀺𑀦𑀸 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑁂𑀦 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲𑁂𑀯 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑀸𑀦𑀼𑀚𑀸𑀦𑀦𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀆𑀓𑀟𑁆𑀠𑀢𑀺. 𑀲𑀸𑀢𑀺 𑀤𑀼𑀢𑀺𑀬𑀧𑀼𑀘𑁆𑀙𑀸. 𑀖𑀸𑀦𑀸𑀬𑀢𑀦𑀬𑀫𑀓𑁂𑀦𑀸𑀢𑀺 𑀘𑀓𑁆𑀔𑀸𑀬𑀢𑀦𑀫𑀽𑀮𑀓𑁂𑀲𑀼 𑀖𑀸𑀦𑀸𑀬𑀢𑀦𑀬𑀫𑀓𑁂𑀦𑁂𑀯. 𑀢𑀁𑀲𑁂𑀲𑀸𑀦𑀻𑀢𑀺 𑀢𑁂𑀦 𑀖𑀸𑀦𑀸𑀬𑀢𑀦𑀫𑀽𑀮𑀓𑀓𑀸𑀬𑀸𑀬𑀢𑀦𑀬𑀫𑀓𑁂𑀦 𑀲𑀤𑁆𑀥𑀺𑀁 𑀲𑁂𑀲𑀸𑀦𑀺. 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸 𑀅𑀦𑀸𑀭𑀼𑀴𑁆𑀳𑀸𑀦𑀻𑀢𑀺 𑀏𑀢𑁆𑀣 ‘‘𑀅𑀦𑀸𑀭𑀼𑀴𑁆𑀳𑀸𑀦𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀢𑀣𑀸-𑀲𑀤𑁆𑀤𑁂𑀦 𑀅𑀦𑀼𑀓𑀟𑁆𑀠𑀻𑀬𑀢𑀺, 𑀦 ‘‘𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸𑀢𑀺…𑀧𑁂… 𑀲𑀫𑀜𑁆𑀜𑁂𑀦𑀸’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀸𑀭𑀡𑀲𑀸𑀫𑀜𑁆𑀜𑁂𑀦𑀸’’𑀢𑀺 𑀯𑀼𑀢𑁆𑀢𑀲𑁆𑀲 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀲𑁆𑀲 𑀢𑀢𑁆𑀣 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀸𑀦𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀕𑀩𑁆𑀪𑀲𑁂𑀬𑁆𑀬𑀓𑁂𑀲𑀼 𑀧𑀯𑀢𑁆𑀢𑀫𑀸𑀦𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀳𑀘𑀸𑀭𑀺𑀢𑀸𑀬𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀢𑀣𑀸 ‘‘𑀕𑀩𑁆𑀪𑀲𑁂𑀬𑁆𑀬𑀓𑁂𑀲𑀼 𑀘 𑀧𑀯𑀢𑁆𑀢𑀫𑀸𑀦𑀸𑀦’’𑀦𑁆𑀢𑀺. 𑀇𑀢𑀭𑀸𑀦𑀺 𑀖𑀸𑀦𑀸𑀬𑀢𑀦𑀫𑀽𑀮𑀓𑀸𑀦𑀺 𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀬𑀫𑀓𑀸𑀦𑀺 𑀤𑁆𑀯𑁂 𑀦 𑀯𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀺, 𑀖𑀸𑀦𑀸𑀬𑀢𑀦𑀫𑀽𑀮𑀓𑁂𑀲𑀼 𑀘 𑀬𑀫𑀓𑁂𑀲𑀼 𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀇𑀢𑀭𑀤𑁆𑀯𑀬𑀫𑀽𑀮𑀓𑀸𑀦𑀺 𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀫𑀽𑀮𑀓𑀸𑀦𑀺 𑀦 𑀯𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀺 𑀅𑀯𑀺𑀲𑁂𑀲𑀢𑁆𑀢𑀸 𑀅𑀧𑁆𑀧𑀯𑀺𑀲𑁂𑀲𑀢𑁆𑀢𑀸 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀓𑀸𑀬𑀸𑀬𑀢𑀦𑀬𑀫𑀓𑁂 𑀤𑀼𑀢𑀺𑀬𑀧𑀼𑀘𑁆𑀙𑀸𑀯𑀲𑁂𑀦 𑀅𑀧𑁆𑀧𑀯𑀺𑀲𑁂𑀲𑁄, 𑀇𑀢𑀭𑀯𑀲𑁂𑀦 𑀅𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀭𑀽𑀧𑀸𑀬𑀢𑀦𑀫𑀦𑀸𑀬𑀢𑀦𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀇𑀤𑀁 𑀭𑀽𑀧𑀸𑀬𑀢𑀦𑀫𑀽𑀮𑀓𑀫𑀦𑀸𑀬𑀢𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀭𑀽𑀧𑀸𑀬𑀢𑀦…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀭𑀽𑀧𑀸𑀬𑀢𑀦𑀫𑀽𑀮𑀓𑁂𑀲𑀼 𑀳𑀻’’𑀢𑀺𑀆𑀤𑀺. 𑀬𑀫𑀓𑀸𑀦𑀦𑁆𑀢𑀺 𑀭𑀽𑀧𑀸𑀬𑀢𑀦𑀫𑀽𑀮𑀓𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀬𑀫𑀓𑀸𑀦𑀁. 𑀤𑀼𑀢𑀺𑀬𑀧𑀼𑀘𑁆𑀙𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀬𑀫𑀓𑀸𑀦𑀁𑀬𑁂𑀯 𑀤𑀼𑀢𑀺𑀬𑀧𑀼𑀘𑁆𑀙𑀸𑀦𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀲𑀭𑀽𑀧𑀓𑀸𑀦𑀁 𑀅𑀘𑀺𑀢𑁆𑀢𑀓𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀆𑀤𑀺𑀧𑀼𑀘𑁆𑀙𑀸𑀦𑀦𑁆𑀢𑀺 𑀢𑁂𑀲𑀁𑀬𑁂𑀯 𑀬𑀫𑀓𑀸𑀦𑀁 𑀧𑀞𑀫𑀧𑀼𑀘𑁆𑀙𑀸𑀦𑀁.

𑀳𑁂𑀝𑁆𑀞𑀺𑀫𑁂𑀳𑀻𑀢𑀺 𑀇𑀤𑀁 𑀅𑀯𑀺𑀲𑁂𑀲𑀯𑀘𑀦𑀫𑁆𑀧𑀺 𑀬𑁂𑀲𑀼 𑀲𑀤𑀺𑀲𑀯𑀺𑀲𑁆𑀲𑀚𑁆𑀚𑀦𑀢𑀸 𑀲𑀫𑁆𑀪𑀯𑀢𑀺, 𑀢𑀤𑀧𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀕𑀦𑁆𑀥𑀭𑀲…𑀧𑁂… 𑀅𑀢𑁆𑀣𑁄’’𑀢𑀺. 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑁂𑀲𑀼 𑀉𑀤𑁆𑀤𑁂𑀲𑀸𑀦𑀼𑀭𑀽𑀧𑀁 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀓𑀣𑀦𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀬𑁄 𑀢𑀢𑁆𑀣 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀉𑀤𑁆𑀤𑁂𑀲𑀸𑀦𑀼𑀭𑀽𑀧𑀕𑀼𑀡𑁂𑀦 𑀉𑀧𑀮𑀩𑁆𑀪𑀢𑀺, 𑀢𑀲𑁆𑀲 𑀅𑀓𑀣𑀦𑀫𑁆𑀧𑀺 𑀅𑀢𑁆𑀣𑀢𑁄 𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀯𑀺𑀲𑁆𑀲𑀚𑁆𑀚𑀦𑁂𑀦𑁂𑀯 𑀅𑀮𑀩𑁆𑀪𑀫𑀸𑀦𑀢𑀸𑀤𑀲𑁆𑀲𑀦𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀻’’𑀢𑀺.

𑀘𑀓𑁆𑀔𑀼𑀯𑀺𑀓𑀮𑀲𑁄𑀢𑀯𑀺𑀓𑀮𑀸 𑀯𑀺𑀬 𑀘𑀓𑁆𑀔𑀼𑀲𑁄𑀢𑀯𑀺𑀓𑀮𑁄𑀧𑀺 𑀮𑀩𑁆𑀪𑀢𑀻𑀢𑀺 𑀲𑁄 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀧𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀘𑁆𑀘𑀦𑁆𑀥𑀫𑁆𑀧𑀺…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀫𑁂𑀯 𑀑𑀧𑀧𑀸𑀢𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄𑀢𑀺 𑀢𑀲𑁆𑀲 𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀢𑁆𑀯𑀸 𑀢𑁂𑀦 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀲𑁆𑀲 𑀢𑀢𑁆𑀣 𑀅𑀦𑀺𑀬𑀢𑀢𑁆𑀢𑀸 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀲𑁆𑀲𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦 𑀚𑀘𑁆𑀘𑀦𑁆𑀥𑀩𑀥𑀺𑀭𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑀸 𑀦 𑀦𑀺𑀯𑀸𑀭𑀺𑀢𑀸 𑀳𑁄𑀢𑀻’’𑀢𑀺 𑀆𑀳.

𑁨𑁨-𑁨𑁫𑁪. 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀬𑀸𑀯𑀢𑀸 ‘‘𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀁 𑀧𑀼𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸𑀧𑀺 𑀑𑀓𑀸𑀲𑁄𑀬𑁂𑀯 𑀆𑀫𑀝𑁆𑀞𑁄𑀢𑀺. ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀜𑁆𑀜𑀸𑀬 𑀓𑀸𑀭𑀡𑀯𑀺𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁂𑀦𑁂𑀯 ‘‘𑀓𑀲𑁆𑀫𑀸 𑀧𑀝𑀺𑀜𑁆𑀜𑀸𑀢’’𑀦𑁆𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀦𑀦𑀽’’𑀢𑀺𑀆𑀤𑀺𑀫𑀸𑀳. 𑀕𑀩𑁆𑀪𑀲𑁂𑀬𑁆𑀬𑀓𑀪𑀸𑀯𑀁 𑀕𑀦𑁆𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻𑀢𑀺 𑀧𑀘𑁆𑀙𑀺𑀫𑀪𑀯𑀺𑀓𑀁 𑀲𑀦𑁆𑀥𑀸𑀬𑀸𑀳. 𑀢𑀤𑀯𑀢𑁆𑀣𑀲𑁆𑀲𑀸𑀢𑀺 𑀧𑀘𑁆𑀙𑀺𑀫𑀪𑀯𑀸𑀯𑀢𑁆𑀣𑀲𑁆𑀲. 𑀪𑀯𑀺𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀪𑀸𑀯𑀺𑀦𑁄. 𑀧𑀝𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸𑀢𑀺 ‘‘𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀝𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸.

𑀅𑀣 𑀓𑀲𑁆𑀫𑀸𑀢𑀺 𑀏𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀤𑀺 ‘‘𑀬𑀲𑁆𑀲 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀸𑀬𑀁 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀧𑀝𑀺𑀜𑁆𑀜𑀸𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 𑀅𑀣 𑀓𑁂𑀦 𑀓𑀸𑀭𑀡𑁂𑀦 𑀧𑀝𑀺𑀮𑁄𑀫𑁂 ‘‘𑀬𑀲𑁆𑀲 𑀯𑀸 𑀧𑀦 𑀭𑀽𑀧𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀦𑀦𑀼 𑀇𑀤𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀦𑁆𑀢𑀺? 𑀦𑀦𑀽𑀢𑀺𑀆𑀤𑀺𑀦𑀸𑀧𑀺 𑀘𑁄𑀤𑀓𑁄 𑀢𑀫𑁂𑀯 𑀯𑀺𑀭𑁄𑀥𑀁 𑀯𑀺𑀪𑀸𑀯𑁂𑀢𑀺. 𑀦𑁄 𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀢𑀲𑁆𑀫𑀺𑀁 𑀪𑀯𑁂’’𑀢𑀺𑀆𑀤𑀺 𑀢𑀲𑁆𑀲 𑀧𑀭𑀺𑀳𑀸𑀭𑁄. 𑀢𑀢𑁆𑀣 𑀢𑀲𑁆𑀫𑀺𑀁 𑀪𑀯𑁂𑀢𑀺 𑀬𑀲𑁆𑀫𑀺𑀁 𑀪𑀯𑁂 ‘‘𑀭𑀽𑀧𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁 𑀧𑀯𑀢𑁆𑀢𑀫𑀸𑀦𑀢𑁆𑀢𑀸, 𑀢𑀲𑁆𑀫𑀺𑀁 𑀪𑀯𑁂. 𑀅𑀦𑀸𑀕𑀢𑀪𑀸𑀯𑁂𑀦 𑀅𑀯𑀘𑀦𑀢𑁄𑀢𑀺 𑀪𑀸𑀯𑀻𑀪𑀸𑀯𑁂𑀦 𑀅𑀯𑀢𑁆𑀢𑀩𑁆𑀩𑀢𑁄 𑀆𑀭𑀤𑁆𑀥𑀼𑀧𑁆𑀧𑀸𑀤𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀪𑀯𑀦𑁆𑀢𑀭𑁂 𑀳𑀻’’𑀢𑀺𑀆𑀤𑀺. 𑀦 𑀧𑀦 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀧𑀸𑀞𑀦𑁆𑀢𑀭𑁂𑀦 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀺.

𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀬𑁂𑀳𑀺 𑀆𑀬𑀢𑀦𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀁𑀢𑀁𑀆𑀬𑀢𑀦𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑁂𑀦 𑀅𑀯𑀲𑁆𑀲𑀁𑀪𑀸𑀯𑀻𑀆𑀬𑀢𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀦𑁆𑀢𑀸𑀦𑀲𑁆𑀲 𑀯𑀸, ‘‘𑀬𑀲𑁆𑀲 𑀯𑀸 𑀧𑀦 𑀭𑀽𑀧𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸, 𑀬𑀲𑁆𑀲 𑀯𑀸 𑀧𑀦 𑀭𑀽𑀧𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀘 𑀏𑀯𑀁 𑀧𑀯𑀢𑁆𑀢𑀁 𑀧𑀼𑀘𑁆𑀙𑀸𑀤𑁆𑀯𑀬𑀯𑀺𑀲𑁆𑀲𑀚𑁆𑀚𑀦𑀁 𑀆𑀬𑀢𑀦𑀧𑀝𑀺𑀮𑀸𑀪𑀲𑁆𑀲 𑀚𑀸𑀢𑀺𑀪𑀸𑀯𑀢𑁄 𑀲𑀼𑀝𑁆𑀞𑀼 𑀉𑀧𑀧𑀦𑁆𑀦𑀁 𑀪𑀯𑀢𑀺. 𑀧𑀘𑁆𑀙𑀺𑀫𑀪𑀯𑀺𑀓𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀭𑀽𑀧𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑀓𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀇𑀤𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑀦𑀁. 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀢𑁆𑀢𑀸𑀢𑀺 ‘‘𑀆𑀫𑀦𑁆𑀢𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸.

𑀬𑀁 𑀧𑀦 𑀅𑀖𑀸𑀦𑀓𑀸𑀦𑀁 𑀓𑀸𑀫𑀸𑀯𑀘𑀭𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲 𑀯𑀺𑀧𑀸𑀓𑁄 𑀖𑀸𑀦𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺, 𑀢𑀁 𑀖𑀸𑀦𑀸𑀬𑀢𑀦𑀸𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀧𑀦𑀻𑀤𑀺𑀲𑀁 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀬𑀲𑁆𑀲 𑀬𑀢𑁆𑀣𑀸’’𑀢𑀺𑀆𑀤𑀺. 𑀏𑀯𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑁄 𑀏𑀯 𑀇𑀥 𑀅𑀖𑀸𑀦𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀓𑀣𑀫𑀺𑀤𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀘𑁄𑀤𑀦𑀸𑀬 ‘‘𑀦 𑀳𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀲𑀸𑀥𑁂𑀢𑀼𑀁 ‘‘𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀯𑀘𑀦𑀢𑁆𑀢𑀫𑁆𑀧𑀺 𑀳𑀺 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀪𑀺𑀥𑀫𑁆𑀫𑁂 𑀧𑀝𑀺𑀓𑁆𑀔𑁂𑀧𑁄𑀬𑁂𑀯𑀸𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀆𑀬𑀢𑀦𑀬𑀫𑀓𑁂. 𑀬𑀣𑀸𑀤𑀲𑁆𑀲𑀺𑀢𑀸𑀲𑀽𑀢𑀺 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀢𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀬𑀲𑁆𑀲 𑀬𑀢𑁆𑀣 𑀖𑀸𑀦𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀢𑀢𑁆𑀣 𑀭𑀽𑀧𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀸𑀲𑀼 𑀧𑀼𑀘𑁆𑀙𑀸𑀲𑀼. 𑀆𑀫𑀦𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀣 𑀓𑀲𑁆𑀫𑀸 𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀬𑁄𑀚𑀦𑀸. 𑀏𑀢𑀸𑀲𑀼 𑀧𑀼𑀘𑁆𑀙𑀸𑀲𑀼 𑀓𑀲𑁆𑀫𑀸 𑀧𑀝𑀺𑀯𑀘𑀦𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀦 𑀓𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑀢𑁆𑀣𑀲𑁆𑀲𑀸𑀢𑀺 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀢𑀸𑀬𑀢𑀦𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀬𑀲𑁆𑀲 𑀬𑀢𑁆𑀣 𑀖𑀸𑀦𑀸𑀬𑀢𑀦𑀁 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘 𑀏𑀯𑀫𑀸𑀤𑀺𑀓𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑁂𑀦 𑀕𑀳𑀺𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀏𑀓𑀤𑁂𑀲𑁂 𑀲𑀁𑀲𑀬𑀢𑁆𑀣𑀲𑁆𑀲 𑀲𑀫𑁆𑀪𑀯𑁂𑀦𑀸𑀢𑀺 𑀏𑀓𑀤𑁂𑀲𑁂 𑀲𑀁𑀲𑀬𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑀧𑀝𑀺𑀬𑁄𑀕𑀪𑀽𑀢𑀲𑀁𑀲𑀬𑀢𑁆𑀣𑀲𑁆𑀲 𑀧𑀝𑀺𑀯𑀘𑀦𑀲𑁆𑀲 𑀅𑀓𑀭𑀡𑀢𑁄 ‘‘𑀆𑀫𑀦𑁆𑀢𑀸’’𑀢𑀺 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑁄 𑀅𑀢𑁆𑀣𑀲𑁆𑀲 𑀅𑀪𑀺𑀦𑁆𑀤𑀺𑀢𑁆𑀯𑀸 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀅𑀯𑀢𑁆𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀪𑀺𑀦𑁆𑀤𑀺𑀢𑀩𑁆𑀩𑁂𑀳𑀺 𑀦 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀻’’𑀢𑀺.

𑀬𑀤𑀺 𑀲𑀺𑀬𑀸𑀢𑀺 𑀪𑀺𑀦𑁆𑀤𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁂𑀧𑀺 𑀅𑀢𑁆𑀣𑁂 𑀬𑀤𑀺 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁 𑀲𑀺𑀬𑀸, 𑀧𑀭𑀺𑀧𑀼𑀡𑁆𑀡𑀯𑀺𑀲𑁆𑀲𑀚𑁆𑀚𑀦𑀫𑁂𑀯 𑀦 𑀲𑀺𑀬𑀸 𑀅𑀦𑁄𑀓𑀸𑀲𑀪𑀸𑀯𑀢𑁄 𑀪𑀺𑀦𑁆𑀤𑀺𑀢𑀩𑁆𑀩𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 ‘‘𑀧𑀜𑁆𑀘𑀯𑁄𑀓𑀸𑀭𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁, 𑀅𑀭𑀽𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁, 𑀬𑁂 𑀘 𑀅𑀭𑀽𑀧𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀲𑁄𑀢𑀸𑀬𑀢𑀦𑀜𑁆𑀘 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀘𑀓𑁆𑀔𑀸𑀬𑀢𑀦𑀜𑁆𑀘 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀘, 𑀢𑀣𑀸 ‘‘𑀭𑀽𑀧𑀸𑀯𑀘𑀭𑁂 𑀧𑀭𑀺𑀦𑀺𑀩𑁆𑀩𑀦𑁆𑀢𑀸𑀦𑀁, 𑀅𑀭𑀽𑀧𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀖𑀸𑀦𑀸𑀬𑀢𑀦𑀜𑁆𑀘 𑀦 𑀦𑀺𑀭𑀼𑀚𑁆𑀛𑀢𑀺, 𑀭𑀽𑀧𑀸𑀬𑀢𑀦𑀜𑁆𑀘 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘 𑀢𑀢𑁆𑀣 𑀯𑀺𑀪𑀸𑀕𑀯𑀲𑁂𑀦 𑀧𑀯𑀢𑁆𑀢𑁄 𑀧𑀸𑀞𑀲𑁂𑀲𑁄. 𑀅𑀣 𑀓𑀲𑁆𑀫𑀸𑀢𑀺 𑀬𑀤𑀺 𑀅𑀪𑀺𑀦𑁆𑀤𑀺𑀢𑀩𑁆𑀩𑁂 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁, 𑀦 𑀪𑀺𑀦𑁆𑀤𑀺𑀢𑀩𑁆𑀩𑁂, 𑀏𑀯𑀁 𑀲𑀦𑁆𑀢𑁂 ‘‘𑀬𑀲𑁆𑀲 𑀯𑀸 𑀧𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑁂𑀦 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀲𑁄𑀫𑀦𑀲𑁆𑀲𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀓𑀲𑁆𑀫𑀸 𑀦 𑀯𑀺𑀜𑁆𑀜𑀸𑀬𑀢𑀺, 𑀪𑀺𑀦𑁆𑀤𑀺𑀢𑀩𑁆𑀩𑁂 𑀦 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀦𑁆𑀢𑀺? 𑀢𑀁 𑀦, 𑀅𑀜𑁆𑀜𑀸𑀬 𑀧𑀸𑀴𑀺𑀬𑀸 𑀢𑀤𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀥𑀸𑀢𑀼𑀬𑀸’’𑀢𑀺𑀆𑀤𑀺𑀫𑀸𑀳.

‘‘𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀺, 𑀢𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁄 𑀅𑀦𑀸𑀕𑀢𑀪𑀸𑀯𑁂𑀦 𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀬𑀣𑀸 𑀯𑀼𑀢𑁆𑀢𑁄, 𑀏𑀯𑀁 𑀢𑀲𑁆𑀲𑁂𑀯 𑀓𑀫𑁆𑀫𑀚𑀲𑀦𑁆𑀢𑀸𑀦𑀲𑁆𑀲 𑀦𑀺𑀭𑁄𑀥𑁄 𑀢𑀲𑁆𑀲 𑀉𑀧𑁆𑀧𑀸𑀤𑁂 𑀅𑀦𑀸𑀕𑀢𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑁄. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀏𑀓𑀘𑀺𑀢𑁆𑀢𑀲𑁆𑀲 𑀦𑀸𑀫 𑀉𑀧𑁆𑀧𑀸𑀤𑀓𑁆𑀔𑀡𑁂 𑀦𑀺𑀭𑁄𑀥𑁄 𑀅𑀦𑀸𑀕𑀢𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀏𑀓𑀲𑀦𑁆𑀢𑀸𑀦𑀲𑁆𑀲𑀸’’𑀢𑀺. 𑀲𑀩𑁆𑀩𑀢𑁆𑀣 𑀲𑀩𑁆𑀩𑀲𑁆𑀫𑀺𑀁 𑀅𑀦𑀸𑀕𑀢𑀯𑀸𑀭𑁂. 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀏𑀯 𑀯𑀲𑁂𑀦 𑀲𑁄 𑀦𑀺𑀭𑁄𑀥𑁄 𑀢𑀣𑀸 𑀅𑀦𑀸𑀕𑀢𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀦𑀺𑀭𑁄𑀥𑁄 𑀉𑀧𑀧𑀦𑁆𑀦𑀸𑀦𑀁 𑀯𑀲𑁂𑀦 𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀉𑀧𑁆𑀧𑀦𑁆𑀦𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀢𑀲𑁆𑀲𑁂𑀯 𑀬𑀣𑀸𑀧𑀯𑀢𑁆𑀢𑀲𑁆𑀲 𑀓𑀫𑁆𑀫𑀚𑀲𑀦𑁆𑀢𑀸𑀦𑀲𑁆𑀲 𑀏𑀯. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀉𑀧𑁆𑀧𑀸𑀤𑀓𑁆𑀔𑀡𑀢𑁄 𑀉𑀤𑁆𑀥𑀁 𑀦𑀺𑀭𑁄𑀥𑁄 𑀆𑀭𑀤𑁆𑀥𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸. 𑀪𑁂𑀤𑁂 𑀲𑀢𑀺𑀧𑀺 𑀓𑀸𑀮𑀪𑁂𑀤𑀸𑀫𑀲𑀦𑀲𑁆𑀲 𑀓𑀸𑀭𑀡𑁂 𑀲𑀢𑀺𑀧𑀺. 𑀅𑀦𑀸𑀕𑀢𑀓𑀸𑀮𑀸𑀫𑀲𑀦𑀯𑀲𑁂𑀦𑁂𑀯 𑀦𑀺𑀭𑁄𑀥𑀲𑁆𑀲𑁂𑀯 𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀤𑁆𑀯𑀬𑀁 𑀉𑀧𑀧𑀦𑁆𑀦𑀫𑁂𑀯 𑀬𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺. 𑀅𑀜𑁆𑀜𑁂𑀲𑀁 𑀯𑀲𑁂𑀦 𑀦𑀺𑀭𑁄𑀥𑀲𑁆𑀲𑁂𑀯 𑀯𑀢𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 ‘‘𑀅𑀭𑀳𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀤𑀺 𑀉𑀧𑀧𑀢𑁆𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑁄 𑀆𑀭𑀤𑁆𑀥𑁄 𑀦𑀸𑀫 𑀳𑁄𑀢𑀺, 𑀅𑀣 𑀓𑀲𑁆𑀫𑀸 𑀘𑀼𑀢𑀺𑀬𑀸 𑀦𑀺𑀭𑁄𑀥𑀯𑀘𑀦𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀦𑁆𑀦𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀦 𑀘𑀼𑀢𑀺𑀬𑀸 𑀦𑀺𑀭𑁄𑀥𑀯𑀘𑀦’’𑀦𑁆𑀢𑀺. 𑀢𑀦𑁆𑀦𑀺𑀝𑁆𑀞𑀸𑀦𑀪𑀸𑀯𑀢𑁄𑀢𑀺 𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀦𑀺𑀝𑁆𑀞𑀸𑀦𑀪𑀸𑀯𑀢𑁄. 𑀧𑀯𑀢𑁆𑀢𑁂𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀲𑀦𑁆𑀢𑀸𑀦𑀲𑁆𑀲. 𑀯𑀓𑁆𑀔𑀢𑀻𑀢𑀺𑀆𑀤𑀺𑀧𑀺 𑀧𑀯𑀢𑁆𑀢𑁂 𑀦𑀺𑀭𑁄𑀥𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀘𑀼𑀢𑀺𑀦𑀺𑀭𑁄𑀥𑀲𑁆𑀲𑁂𑀯 𑀕𑀳𑀺𑀢𑀢𑀸𑀬 𑀓𑀸𑀭𑀡𑀯𑀘𑀦𑀁. 𑀢𑁂𑀦𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀧𑀸𑀞𑀦𑁆𑀢𑀭𑀯𑀘𑀦𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 ‘‘𑀬𑀲𑁆𑀲 𑀘𑀓𑁆𑀔𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺𑀆𑀤𑀺𑀓𑁂 𑀆𑀬𑀢𑀦𑀬𑀫𑀓𑁂. 𑀬𑀤𑀺 𑀧𑀯𑀢𑁆𑀢𑁂 𑀦𑀺𑀭𑀼𑀤𑁆𑀥𑀲𑁆𑀲𑀧𑀺 𑀘𑀼𑀢𑀺𑀬𑀸 𑀏𑀯 𑀦𑀺𑀭𑁄𑀥𑁄 𑀇𑀘𑁆𑀙𑀺𑀢𑁄, ‘‘𑀲𑀘𑀓𑁆𑀔𑀼𑀓𑀸𑀦’’𑀦𑁆𑀢𑀺𑀆𑀤𑀺 𑀓𑀣𑀦𑁆𑀢𑀺 𑀆𑀳 ‘‘𑀲𑀘𑀓𑁆𑀔𑀼𑀓𑀸𑀦𑀦𑁆𑀢𑀺𑀆𑀤𑀻𑀲𑀼 𑀘 𑀧𑀝𑀺𑀮𑀤𑁆𑀥𑀘𑀓𑁆𑀔𑀼𑀓𑀸𑀦𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻’’𑀢𑀺. 𑀢𑁂𑀢𑀺 𑀅𑀭𑀽𑀧𑁂 𑀧𑀘𑁆𑀙𑀺𑀫𑀪𑀯𑀺𑀓𑀸. 𑀅𑀘𑀓𑁆𑀔𑀼𑀓𑀯𑀘𑀦𑀜𑁆𑀘 𑀲𑀸𑀯𑀲𑁂𑀲𑀦𑁆𑀢𑀺 𑀬𑁄𑀚𑀦𑀸.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀢𑀦𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀥𑀸𑀢𑀼𑀬𑀫𑀓𑀁

𑁧-𑁧𑁯. 𑀲𑀤𑁆𑀤𑀥𑀸𑀢𑀼𑀲𑀫𑁆𑀩𑀦𑁆𑀥𑀸𑀦𑀦𑁆𑀢𑀺 𑀇𑀤𑀁 𑀬𑀸𑀦𑀺 𑀘𑀓𑁆𑀔𑀼𑀥𑀸𑀢𑀸𑀤𑀺𑀫𑀽𑀮𑀓𑁂𑀲𑀼 𑀲𑀤𑁆𑀤𑀬𑀫𑀓𑀸𑀦𑀺, 𑀲𑀩𑁆𑀩𑀸𑀦𑀺 𑀘 𑀲𑀤𑁆𑀤𑀥𑀸𑀢𑀼𑀫𑀽𑀮𑀓𑀸𑀦𑀺, 𑀢𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀢𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀸𑀤𑀺𑀲𑀫𑁆𑀩𑀦𑁆𑀥𑀸𑀦𑀺 𑀯𑀺𑀬 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀮𑀩𑁆𑀪𑀦𑁆𑀢𑀺, 𑀏𑀢𑁂𑀦𑁂𑀯 𑀆𑀬𑀢𑀦𑀬𑀫𑀓𑁂𑀧𑀺 𑀧𑀯𑀢𑁆𑀢𑀺𑀯𑀸𑀭𑁂 𑀲𑀤𑁆𑀤𑀥𑀸𑀢𑀼𑀲𑀫𑁆𑀩𑀦𑁆𑀥𑀸𑀦𑀁 𑀬𑀫𑀓𑀸𑀦𑀁 𑀅𑀮𑀩𑁆𑀪𑀫𑀸𑀦𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀥𑀸𑀢𑀼𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀘𑁆𑀘𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁦-𑁨𑁬. 𑀲𑁄𑀢𑀺 𑀤𑀼𑀓𑁆𑀔𑀲𑀤𑁆𑀤𑁄. 𑀅𑀜𑁆𑀜𑀢𑁆𑀣𑀸𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀤𑀼𑀓𑁆𑀔𑀸𑀥𑀺𑀝𑁆𑀞𑀸𑀦𑁂𑀲𑀼. 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑁄𑀢𑀺 𑀲𑀗𑁆𑀔𑀸𑀭𑀸𑀤𑀺𑀧𑀤𑀦𑁆𑀢𑀭𑀸𑀦𑀧𑁂𑀓𑁆𑀔𑁄. 𑀢𑁂𑀦𑀸𑀢𑀺 𑀅𑀜𑁆𑀜𑀦𑀺𑀭𑀧𑁂𑀓𑁆𑀔𑀤𑀼𑀓𑁆𑀔𑀧𑀤𑀕𑁆𑀕𑀳𑀡𑀢𑁄. 𑀢𑀲𑁆𑀫𑀺𑀁 𑀤𑀼𑀓𑁆𑀔𑀤𑀼𑀓𑁆𑀔𑁂 𑀯𑀺𑀲𑀬𑀪𑀽𑀢𑁂. 𑀏𑀲 𑀤𑀼𑀓𑁆𑀔𑀲𑀤𑁆𑀤𑁄 ‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺 𑀏𑀢𑁆𑀣 𑀧𑀞𑀫𑁄 𑀤𑀼𑀓𑁆𑀔𑀲𑀤𑁆𑀤𑁄. 𑀢𑀜𑁆𑀘 𑀤𑀼𑀓𑁆𑀔𑀤𑀼𑀓𑁆𑀔𑀁. ‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀔𑀫𑁂𑀯 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀦𑀬𑀺𑀤𑀁 𑀅𑀯𑀥𑀸𑀭𑀡𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀘𑁆𑀘𑀫𑁂𑀯𑀸𑀢𑀺 𑀧𑀦 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀏𑀓𑀦𑁆𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑀫𑁂𑀯𑀸’’𑀢𑀺. 𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁂𑀲𑀼 𑀲𑀫𑀼𑀤𑀬𑁂𑀲𑀼 𑀓𑁄𑀘𑀺 𑀨𑀮𑀥𑀫𑁆𑀫𑁂𑀲𑀼 𑀦𑀢𑁆𑀣𑀻𑀢𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 𑀧𑀜𑁆𑀘𑀥𑀸 𑀯𑀼𑀢𑁆𑀢𑁂𑀲𑀼 𑀲𑀫𑀼𑀤𑀬𑁂𑀲𑀼 𑀏𑀓𑁄𑀧𑀺 𑀨𑀮𑀲𑀪𑀸𑀯𑁂𑀲𑀼 𑀦𑀢𑁆𑀣𑀺, 𑀨𑀮𑀲𑀪𑀸𑀯𑁄 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀨𑀮𑀥𑀫𑁆𑀫𑁄 𑀦𑀢𑁆𑀣𑀻’’𑀢𑀺 𑀘 𑀧𑀸𑀞𑁄. 𑀫𑀕𑁆𑀕𑀲𑀤𑁆𑀤𑁄 𑀘 𑀨𑀮𑀗𑁆𑀕𑁂𑀲𑀽𑀢𑀺 𑀲𑀸𑀫𑀜𑁆𑀜𑀨𑀮𑀗𑁆𑀕𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀲𑀼 ‘‘𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁪𑁯𑁨, 𑁪𑁯𑁫) 𑀆𑀕𑀢𑁄 𑀫𑀕𑁆𑀕𑀲𑀤𑁆𑀤𑁄 𑀫𑀕𑁆𑀕𑀨𑀮𑀢𑁆𑀢𑀸 𑀧𑀯𑀢𑁆𑀢𑀢𑀺 𑀓𑀸𑀭𑀡𑀽𑀧𑀘𑀸𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦 𑀫𑀕𑁆𑀕𑀓𑀺𑀘𑁆𑀘𑀲𑀩𑁆𑀪𑀸𑀯𑀸’’𑀢𑀺𑀆𑀤𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀘𑁆𑀘𑀤𑁂𑀲𑀦𑀸𑀬 𑀧𑀪𑀯𑀸𑀤𑀺𑀲𑀪𑀸𑀯𑀸 𑀏𑀯 𑀥𑀫𑁆𑀫𑀸 𑀲𑀫𑀼𑀤𑀬𑀸𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸, 𑀦 𑀅𑀧𑁆𑀧𑀪𑀯𑀸𑀤𑀺𑀲𑀪𑀸𑀯𑀸, 𑀢𑀲𑁆𑀫𑀸. 𑀏𑀢𑁆𑀣 𑀘 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀬𑀣𑀸𑀭𑀳𑀁 𑀤𑀼𑀓𑁆𑀔𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑁄𑀕𑀥𑀢𑁆𑀢𑀸 𑀅𑀲𑀘𑁆𑀘𑀲𑀪𑀸𑀯𑁂 𑀲𑀪𑀸𑀯𑀥𑀫𑁆𑀫𑁂 𑀘 𑀉𑀤𑁆𑀥𑀭𑀦𑁆𑀢𑁄 𑀨𑀮𑀥𑀫𑁆𑀫𑁂 𑀏𑀯 𑀉𑀤𑁆𑀥𑀭𑀺. 𑀦𑀦𑀼 𑀘 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀥𑀫𑁆𑀫𑀸 𑀅𑀲𑀘𑁆𑀘𑀲𑀪𑀸𑀯𑀸𑀢𑀺 𑀢𑁂𑀧𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀢𑀺? 𑀦, 𑀢𑁂𑀲𑀁 𑀫𑀕𑁆𑀕𑀕𑀢𑀺𑀓𑀢𑁆𑀢𑀸. ‘‘𑀨𑀮𑀥𑀫𑁆𑀫𑁂𑀲𑀽’’𑀢𑀺 𑀏𑀢𑁆𑀣 𑀥𑀫𑁆𑀫𑀕𑁆𑀕𑀳𑀡𑁂𑀦 𑀯𑀸 𑀨𑀮𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀬 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀧𑀤𑀲𑁄𑀥𑀦𑁂𑀦…𑀧𑁂… 𑀇𑀥 𑀕𑀳𑀺𑀢𑀸𑀢𑀺 𑀏𑀢𑁂𑀦 𑀅𑀲𑀘𑁆𑀘𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀧𑀓𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑀁 𑀆𑀳. 𑀢𑁂𑀲𑀦𑁆𑀢𑀺 𑀤𑀼𑀓𑁆𑀔𑀸𑀤𑀻𑀦𑀁. 𑀢𑀩𑁆𑀩𑀺𑀲𑁂𑀲𑀦𑀬𑁄𑀕𑀯𑀺𑀲𑁂𑀲𑀦𑁆𑀢𑀺 𑀢𑁂𑀦 𑀤𑀼𑀓𑁆𑀔𑀸𑀤𑀺𑀯𑀺𑀲𑁂𑀲𑀦𑀬𑁄𑀕𑁂𑀦 𑀯𑀺𑀲𑀺𑀝𑁆𑀞𑀢𑀁. 𑀲𑀘𑁆𑀘𑀯𑀺𑀲𑁂𑀲𑀦𑀪𑀸𑀯𑁂𑀦𑁂𑀯 𑀤𑀼𑀓𑁆𑀔𑀸𑀤𑀻𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀺𑀪𑀸𑀯𑁄 𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀏𑀓𑀦𑁆𑀢𑀲𑀘𑁆𑀘𑀢𑁆𑀢𑀸’’𑀢𑀺. 𑀬𑀣𑀸 𑀘𑁂𑀢𑁆𑀣𑀸𑀢𑀺 𑀬𑀣𑀸 𑀏𑀢𑀲𑁆𑀫𑀺𑀁 𑀲𑀘𑁆𑀘𑀬𑀫𑀓𑁂 𑀲𑀼𑀤𑁆𑀥𑀲𑀘𑁆𑀘𑀯𑀸𑀭𑁂 𑀲𑀘𑁆𑀘𑀯𑀺𑀲𑁂𑀲𑀦𑀪𑀽𑀢𑀸 𑀏𑀯 𑀤𑀼𑀓𑁆𑀔𑀸𑀤𑀬𑁄 𑀕𑀳𑀺𑀢𑀸. 𑀏𑀯𑀁 𑀔𑀦𑁆𑀥𑀬𑀫𑀓𑀸𑀤𑀻𑀲𑀼𑀧𑀻𑀢𑀺 𑀦 𑀲𑀼𑀤𑁆𑀥𑀲𑀘𑁆𑀘𑀯𑀸𑀭𑁂 𑀏𑀯 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀤𑀲𑁄𑀥𑀦𑀯𑀸𑀭𑁂 𑀢𑀁𑀫𑀽𑀮𑀘𑀓𑁆𑀓𑀯𑀸𑀭𑁂 𑀘 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀲𑀫𑀼𑀤𑀸𑀬𑀧𑀤𑀸𑀦𑀁𑀬𑁂𑀯 𑀯𑀼𑀢𑁆𑀢𑀢𑁆𑀢𑀸 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 ‘‘𑀲𑀼𑀤𑁆𑀥𑀓𑁆𑀔𑀦𑁆𑀥𑀸𑀤𑀺𑀯𑀸𑀭𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑁂𑀢𑁆𑀣𑀸𑀧𑀺 𑀲𑀼𑀤𑁆𑀥𑀯𑀸𑀭𑁂 𑀏𑀯 𑀅𑀬𑀁 𑀦𑀬𑁄 𑀤𑀲𑁆𑀲𑀺𑀢𑁄. 𑀬𑀤𑀺 𑀲𑀼𑀤𑁆𑀥𑀓𑁆𑀔𑀦𑁆𑀥𑀸𑀤𑀺𑀯𑀸𑀭𑁂𑀲𑀼 𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀦𑀪𑀽𑀢𑀸𑀦𑀫𑁂𑀯 𑀭𑀽𑀧𑀸𑀤𑀻𑀦𑀁 𑀕𑀳𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 𑀔𑀦𑁆𑀥𑀸𑀤𑀺𑀯𑀺𑀲𑁂𑀲𑀦𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀭𑀽𑀧𑀸𑀤𑀻𑀦𑀁 𑀯𑀲𑁂𑀦 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺. 𑀧𑀼𑀭𑀺𑀫𑁄 𑀏𑀯 𑀅𑀢𑁆𑀣𑁄 𑀬𑀼𑀢𑁆𑀢𑁄, 𑀬𑀼𑀢𑁆𑀢𑀺𑀢𑁄 𑀧𑀸𑀞𑁄𑀯 𑀩𑀮𑀯𑀸𑀢𑀺.

𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁨𑁭-𑁧𑁬𑁪. 𑀤𑀼𑀓𑁆𑀔𑀧𑀭𑀺𑀜𑁆𑀜𑀸 𑀬𑀸𑀯 𑀤𑀼𑀓𑁆𑀔𑀲𑀫𑀢𑀺𑀓𑁆𑀓𑀫𑀦𑀢𑁆𑀣𑀸𑀢𑀺 𑀲𑀧𑁆𑀧𑀤𑁂𑀲𑀁 𑀧𑀯𑀢𑁆𑀢𑀸𑀧𑀺 𑀲𑀸 𑀢𑀤𑀢𑁆𑀣𑀸𑀯𑀳𑀸 𑀪𑀯𑁂𑀬𑁆𑀬𑀸𑀢𑀺 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀭𑀺𑀬𑀢𑁆𑀢𑀸…𑀧𑁂… 𑀓𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀅𑀦𑁆𑀢𑀺𑀫𑀪𑀯𑁂 𑀞𑀺𑀢𑀢𑁆𑀢𑀸’’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺 𑀉𑀧𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀯𑀺𑀘𑀸𑀭𑀢𑁆𑀢𑀸, 𑀦 𑀘 𑀲𑀩𑁆𑀩𑁂 𑀲𑀼𑀤𑁆𑀥𑀸𑀯𑀸𑀲𑀸 𑀅𑀦𑁆𑀢𑀺𑀫𑀪𑀯𑀺𑀓𑀸 𑀉𑀤𑁆𑀥𑀁𑀲𑁄𑀢𑀯𑀘𑀦𑀢𑁄. ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸. 𑀅𑀯𑀺𑀲𑁂𑀲𑁂𑀦 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸 𑀲𑀫𑁆𑀩𑀦𑁆𑀥𑀻𑀪𑀸𑀯𑁂𑀦𑁂𑀯 𑀢𑀁𑀲𑀫𑀗𑁆𑀕𑀻 𑀘 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑁂 𑀉𑀧𑀧𑀚𑁆𑀚𑀦𑁆𑀢𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀲𑁆𑀯𑀸𑀬𑀫𑀢𑁆𑀣𑁄 𑀬𑀲𑁆𑀫𑀸 𑀦𑀺𑀘𑁆𑀙𑀬𑀭𑀽𑀧𑁂𑀦 𑀕𑀳𑀺𑀢𑁄, 𑀦𑀺𑀘𑁆𑀙𑀺𑀢𑀲𑁆𑀲𑁂𑀯 𑀘 𑀅𑀢𑁆𑀣𑀲𑁆𑀲 𑀯𑀺𑀪𑀸𑀕𑀤𑀲𑁆𑀲𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀢𑁂𑀲𑁆𑀯𑁂𑀯…𑀧𑁂… 𑀉𑀧𑀧𑀦𑁆𑀦𑀫𑁂𑀯𑀸’’𑀢𑀺 𑀆𑀳. 𑀢𑀢𑁆𑀣 𑀢𑁂𑀲𑁆𑀯𑁂𑀯 𑀓𑁂𑀘𑀺 𑀤𑀲𑁆𑀲𑀻𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀓𑁄𑀝𑁆𑀞𑀸𑀲𑀼𑀧𑁆𑀧𑀢𑁆𑀢𑀺𑀲𑀫𑀗𑁆𑀕𑀺𑀦𑁄𑀢𑀺 𑀤𑀼𑀓𑁆𑀔𑀓𑁄𑀝𑁆𑀞𑀸𑀲𑀼𑀧𑁆𑀧𑀢𑁆𑀢𑀺𑀲𑀫𑀗𑁆𑀕𑀺𑀦𑁄. 𑀢𑁂𑀲𑀽𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀕𑀳𑀺𑀢𑁂𑀲𑀼. 𑀫𑀕𑁆𑀕𑀨𑀮𑀼𑀧𑁆𑀧𑀸𑀤𑀲𑀫𑀗𑁆𑀕𑀻𑀲𑀽𑀢𑀺 𑀫𑀕𑁆𑀕𑀨𑀮𑀼𑀧𑁆𑀧𑀸𑀤𑀲𑀫𑀗𑁆𑀕𑀻𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀏𑀢𑁆𑀣 𑀘𑀸𑀢𑀺𑀆𑀤𑀺𑀦𑀸 ‘‘𑀲𑀩𑁆𑀩𑁂𑀲’’𑀦𑁆𑀢𑀺𑀆𑀤𑀺𑀧𑀸𑀴𑀺𑀬𑀸 𑀧𑀺𑀡𑁆𑀟𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀼𑀧𑁆𑀧𑀸𑀤𑀯𑁄𑀫𑀺𑀲𑁆𑀲𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀼𑀧𑁆𑀧𑀸𑀤𑀲𑁆𑀲𑀸𑀢𑀺 𑀇𑀤𑀁 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀓𑀢𑁆𑀣𑀘𑀺 𑀲𑀫𑀼𑀤𑀬𑀲𑀘𑁆𑀘𑀼𑀧𑁆𑀧𑀸𑀤𑀯𑁄𑀫𑀺𑀲𑁆𑀲𑁂𑀧𑀺 𑀤𑀼𑀓𑁆𑀔𑀲𑀘𑁆𑀘𑁂 𑀢𑀁𑀭𑀳𑀺𑀢𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀼𑀧𑁆𑀧𑀸𑀤𑀭𑀳𑀺𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀓𑁂𑀘𑀺 𑀧𑀦 ‘‘𑀲𑀫𑀼𑀤𑀬𑀲𑀘𑁆𑀘𑀸𑀯𑁄𑀫𑀺𑀲𑁆𑀲𑀲𑁆𑀲𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 ‘‘𑀢𑀁𑀭𑀳𑀺𑀢𑀲𑁆𑀲𑀸’’𑀢𑀺 𑀇𑀤𑀁 𑀧𑀼𑀭𑀺𑀫𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁𑀲𑀳𑀺𑀢𑀲𑁆𑀲𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀼𑀧𑁆𑀧𑀸𑀤𑀲𑀳𑀺𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑀸𑀦𑀁, 𑀧𑀯𑀢𑁆𑀢𑀺𑀬𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 ‘‘𑀧𑀯𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀓𑁄𑀝𑁆𑀞𑀸𑀲𑁂𑀲𑀼 𑀦 𑀕𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀥𑀺𑀬𑀁 𑀧𑀦 𑀢𑁂𑀲𑀁 𑀉𑀧𑁆𑀧𑀸𑀤𑀲𑁆𑀲 𑀧𑀞𑀫𑀓𑁄𑀝𑁆𑀞𑀸𑀲𑁂𑀦 𑀕𑀳𑀺𑀢𑀢𑀸 𑀤𑀲𑁆𑀲𑀺𑀢𑀸 𑀏𑀯. 𑀢𑀣𑀸 𑀦𑀺𑀭𑁄𑀥𑁄 𑀘𑀸𑀢𑀺 𑀬𑀣𑀸 𑀅𑀲𑀜𑁆𑀜𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀧𑀞𑀫𑀓𑁄𑀝𑁆𑀞𑀸𑀲𑁂𑀦 𑀕𑀳𑀺𑀢𑁄, 𑀧𑀯𑀢𑁆𑀢𑀺𑀬𑀁 𑀧𑀦 𑀲𑁄 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀦 𑀕𑀳𑀺𑀢𑁄, 𑀢𑀣𑀸 𑀢𑁂𑀲𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀦𑀺𑀭𑁄𑀥𑁄𑀧𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 ‘‘𑀲𑀩𑁆𑀩𑁂𑀲𑀁 𑀘𑀯𑀦𑁆𑀢𑀸𑀦𑀁 𑀧𑀯𑀢𑁆𑀢𑁂 𑀢𑀡𑁆𑀳𑀸𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂’’𑀢𑀺𑀆𑀤𑀺𑀦𑀸 (𑀬𑀫. 𑁧.𑀲𑀘𑁆𑀘𑀬𑀫𑀓.𑁮𑁮) 𑀦𑀺𑀭𑁄𑀥𑀯𑀸𑀭𑁂 𑀧𑀸𑀴𑀺 𑀧𑀯𑀢𑁆𑀢𑀸. 𑀏𑀲𑁂𑀯 𑀦𑀬𑁄𑀢𑀺 𑀬𑁆𑀯𑀸𑀬𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 𑀲𑀫𑀼𑀤𑀬𑀲𑀘𑁆𑀘𑀬𑀫𑀓𑁂 𑀧𑀸𑀴𑀺𑀬𑀸 𑀅𑀢𑁆𑀣𑀦𑀬𑁄 𑀯𑀼𑀢𑁆𑀢𑁄, 𑀫𑀕𑁆𑀕𑀲𑀘𑁆𑀘𑀬𑀫𑀓𑁂𑀧𑀺 𑀏𑀲𑁂𑀯 𑀦𑀬𑁄, 𑀏𑀯𑀫𑁂𑀯 𑀢𑀢𑁆𑀣𑀸𑀧𑀺 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 ‘‘𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀢𑀢𑁆𑀣 𑀧𑀸𑀴𑀺 𑀧𑀯𑀢𑁆𑀢𑀸.

𑀏𑀯𑀜𑁆𑀘 𑀲𑀢𑀻𑀢𑀺 𑀏𑀯𑀁 𑀔𑀡𑀯𑀲𑁂𑀦 𑀑𑀓𑀸𑀲𑀕𑁆𑀕𑀳𑀡𑁂 𑀲𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀦𑀦𑀼𑀚𑀸𑀦𑀦𑀯𑀲𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀏𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀢𑀺 𑀏𑀢𑀲𑁆𑀲 𑀬𑀫𑀓𑀧𑀤𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂. ‘‘𑀅𑀕𑁆𑀕𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀅𑀭𑀳𑀦𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀅𑀕𑁆𑀕𑀫𑀕𑁆𑀕𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂, 𑀅𑀲𑀜𑁆𑀜𑀲𑀢𑁆𑀢𑀁 𑀉𑀧𑀧𑀚𑁆𑀚𑀦𑁆𑀢𑀸𑀦𑀁 𑀢𑁂𑀲𑀁 𑀢𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀦𑁄 𑀘 𑀢𑁂𑀲𑀁 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 (𑀬𑀫. 𑁧.𑀲𑀘𑁆𑀘𑀬𑀫𑀓.𑁭𑁧) 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑀲𑁆𑀲 𑀆𑀕𑀢𑀢𑁆𑀢𑀸 𑀯𑀺𑀭𑁄𑀥𑁄 𑀦𑀢𑁆𑀣𑀻𑀢𑀺 ‘‘𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦 𑀉𑀧𑀧𑀢𑁆𑀢𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑁄 𑀪𑀸𑀯𑀺𑀦𑁄 𑀲𑀫𑀼𑀤𑀬𑀧𑀘𑁆𑀘𑀼𑀧𑁆𑀧𑀸𑀤𑀲𑁆𑀲 𑀆𑀥𑀸𑀭𑁄, 𑀅𑀣 𑀔𑁄 𑀓𑀸𑀫𑀸𑀯𑀘𑀭𑀸𑀤𑀺𑀑𑀓𑀸𑀲𑁄, 𑀢𑀲𑁆𑀫𑀸. 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄 𑀳𑁂𑀲𑀸𑀢𑀺 𑀬𑀲𑁆𑀫𑀸 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁄 𑀏𑀲, 𑀢𑀲𑁆𑀫𑀸 ‘‘𑀢𑁂𑀲𑀁 𑀢𑀢𑁆𑀣𑀸’’𑀢𑀺 𑀏𑀢𑁆𑀣 𑀑𑀓𑀸𑀲𑀯𑀲𑁂𑀦 𑀢𑀢𑁆𑀣-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂 𑀓𑀸𑀫𑀸𑀯𑀘𑀭𑀸𑀤𑀺𑀑𑀓𑀸𑀲𑀯𑀲𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀦 𑀔𑀡𑀯𑀲𑁂𑀦, 𑀅𑀣 𑀓𑀲𑁆𑀫𑀸 ‘‘𑀲𑀩𑁆𑀩𑁂𑀲𑀁 𑀉𑀧𑀧𑀚𑁆𑀚𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀑𑀓𑀸𑀲𑀁 𑀅𑀦𑀸𑀫𑀲𑀺𑀢𑁆𑀯𑀸 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀁 𑀧𑀯𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀢𑁆𑀣…𑀧𑁂… 𑀲𑁄 𑀏𑀯𑀸’’𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀑𑀓𑀸𑀲𑀯𑀸𑀭𑁂. 𑀧𑀼𑀕𑁆𑀕𑀮𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀬𑀢𑁆𑀣 𑀢𑁂𑀢𑀺 𑀬𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑀸𑀤𑀺𑀑𑀓𑀸𑀲𑁂 𑀢𑁂 𑀧𑀼𑀕𑁆𑀕𑀮𑀸.

𑀓𑁂𑀘𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 ‘‘𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀤𑀼𑀓𑁆𑀔𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀘𑀺𑀢𑁆𑀢𑀚𑀭𑀽𑀧𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁆𑀢𑀸𑀢𑀺 𑀓𑀸𑀭𑀡𑀁 𑀯𑀤𑀢𑀺. 𑀅𑀧𑀭𑁂 ‘‘𑀅𑀭𑀽𑀧𑁂𑀢𑀺 𑀇𑀫𑀁 𑀧𑀼𑀭𑀺𑀫𑀸𑀧𑁂𑀓𑁆𑀔𑀫𑁆𑀧𑀺 𑀳𑁄𑀢𑀻𑀢𑀺 𑀢𑁂𑀦 𑀧𑀯𑀢𑁆𑀢𑀁 𑀯𑀺𑀲𑁂𑀲𑁂𑀢𑁆𑀯𑀸 𑀅𑀭𑀽𑀧𑀪𑀯𑀯𑀲𑁂𑀦 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘𑀬𑀲𑁆𑀲 𑀯𑀸 𑀧𑀦 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦𑁄’𑀢𑀺𑀆𑀤𑀻𑀲𑀼𑀧𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀧𑀼𑀕𑁆𑀕𑀮𑁄 𑀦 𑀘𑀺𑀢𑁆𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸𑀯 𑀕𑀳𑀺𑀢𑁄𑀢𑀺 𑀇𑀤𑀁 𑀘𑀺𑀢𑁆𑀢𑀲𑁆𑀲 𑀅𑀦𑀥𑀺𑀓𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀢𑁆𑀣 𑀧𑀦 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀦𑀺𑀘𑁆𑀙𑀬𑁄, 𑀢𑀢𑁆𑀣𑁂𑀯 𑀢𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀘𑁆𑀙𑀬𑁂𑀦𑀧𑀺 𑀪𑀯𑀺𑀢𑀩𑁆𑀩𑀁 𑀘𑀺𑀢𑁆𑀢𑁂𑀦 𑀘 𑀯𑀺𑀦𑀸 𑀧𑀼𑀕𑁆𑀕𑀮𑀲𑁆𑀲𑁂𑀯 𑀅𑀦𑀼𑀧𑀮𑀩𑁆𑀪𑀦𑀢𑁄𑀢𑀺 ‘‘𑀬𑀲𑁆𑀲 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀸𑀥𑀸𑀭𑀁 𑀘𑀺𑀢𑁆𑀢𑀁 𑀅𑀢𑁆𑀣𑀢𑁄 𑀕𑀳𑀺𑀢𑀫𑁂𑀯𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀅𑀧𑀺𑀘 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀧𑀺 𑀦 𑀲𑀩𑁆𑀩𑁄 𑀭𑀽𑀧𑀼𑀧𑁆𑀧𑀸𑀤𑁄 𑀏𑀓𑀦𑁆𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀥𑀻𑀦𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀦𑀸𑀧𑀺 𑀢𑀢𑁆𑀣 𑀭𑀽𑀧𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸 𑀘𑀺𑀢𑁆𑀢𑀚𑀭𑀽𑀧𑀫𑁂𑀯 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺, 𑀦 𑀇𑀢𑀭𑀁, 𑀇𑀢𑀭𑀁 𑀧𑀦 𑀢𑀲𑁆𑀲 𑀢𑀻𑀲𑀼𑀧𑀺 𑀔𑀡𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀯𑀺𑀪𑀚𑀺𑀢𑀩𑁆𑀩𑀸 𑀅𑀯𑀺𑀪𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀺𑀬𑀸𑀬𑀁 𑀧𑀲𑀗𑁆𑀕𑁄 𑀧𑀞𑀫𑀯𑀸𑀭𑁂, 𑀤𑀼𑀢𑀺𑀬𑀯𑀸𑀭𑁂 𑀧𑀦 𑀯𑀺𑀪𑀚𑀦𑀸 𑀏𑀯 𑀲𑀸𑀢𑀺 𑀦𑀸𑀬𑀁 𑀧𑀲𑀗𑁆𑀕𑁄 𑀮𑀩𑁆𑀪𑀢𑀺, 𑀧𑀞𑀫𑀯𑀸𑀭𑁂𑀧𑀺 𑀯𑀸 𑀦𑀸𑀬𑀁 𑀧𑀲𑀗𑁆𑀕𑁄. 𑀓𑀲𑁆𑀫𑀸? 𑀏𑀲𑀸 𑀳𑀺 𑀬𑀫𑀓𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀬𑀣𑀸𑀮𑀸𑀪𑀯𑀲𑁂𑀦 𑀬𑁄𑀚𑀦𑀸.

𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂𑀢𑀺 𑀏𑀢𑁆𑀣 ‘‘𑀧𑀞𑀫𑀁 𑀪𑀯𑀗𑁆𑀕𑀁, 𑀤𑀼𑀢𑀺𑀬𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀪𑀯𑀦𑀺𑀓𑀦𑁆𑀢𑀺𑀬𑀸 𑀆𑀯𑀚𑁆𑀚𑀦𑀫𑁆𑀧𑀺 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀢𑁄 𑀯𑀺𑀲𑀤𑀺𑀲𑀢𑁆𑀢𑀸 ‘‘𑀤𑀼𑀢𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸, 𑀢𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑁂 𑀢𑀲𑁆𑀲 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀯𑀢𑁆𑀢𑀩𑁆𑀩𑀸𑀢𑀺 𑀅𑀧𑀭𑁂. 𑀪𑀯𑀦𑀺𑀓𑀦𑁆𑀢𑀺𑀬𑀸 𑀧𑀦 𑀲𑀳𑀚𑀸𑀢𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀇𑀥 𑀤𑀼𑀢𑀺𑀬𑀁 𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀁 𑀲𑀩𑁆𑀩𑀁 𑀅𑀩𑁆𑀬𑀸𑀓𑀢𑀪𑀸𑀯𑁂𑀦 𑀲𑀫𑀸𑀦𑀚𑀸𑀢𑀺𑀓𑀢𑁆𑀢𑀸 𑀏𑀓𑀦𑁆𑀢𑀺 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀢𑀲𑁆𑀲 𑀢𑀢𑁆𑀣 𑀲𑀫𑀼𑀤𑀬𑀲𑀘𑁆𑀘𑀁 𑀦𑀼𑀧𑁆𑀧𑀚𑁆𑀚𑀺𑀢𑁆𑀣𑁂𑀯𑀸𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀺𑀦𑁆𑀢𑀺 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂. 𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀤𑀼𑀢𑀺𑀬𑀘𑀺𑀢𑁆𑀢𑁂𑀦 𑀘 𑀢𑀁𑀲𑀫𑀗𑁆𑀕𑀺𑀦𑁄 𑀯𑀸 𑀤𑀼𑀓𑁆𑀔𑀲𑀘𑁆𑀘𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀯𑀢𑁆𑀢𑀩𑁆𑀩𑀪𑀸𑀯𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑀸𑀬 𑀤𑀲𑁆𑀲𑀺𑀢𑀢𑁆𑀢𑀸 𑀏𑀯. 𑀬𑀣𑀸𑀯𑀼𑀢𑁆𑀢𑀸𑀢𑀺 𑀤𑀼𑀢𑀺𑀬𑀸𑀓𑀼𑀲𑀮𑀘𑀺𑀢𑁆𑀢𑀢𑁄 𑀧𑀼𑀭𑀺𑀫𑀲𑀩𑁆𑀩𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀅𑀕𑁆𑀕𑀳𑀺𑀢𑀸 𑀳𑁄𑀦𑁆𑀢𑀺 𑀇𑀢𑀭𑀪𑀸𑀯𑀸𑀪𑀸𑀯𑀢𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀞𑀦𑁆𑀢𑀭𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀢𑀺 𑀘𑀢𑀼𑀯𑁄𑀓𑀸𑀭𑀸. 𑀯𑀚𑁆𑀚𑁂𑀢𑀩𑁆𑀩𑀸𑀢𑀺 ‘‘𑀇𑀢𑀭𑁂𑀲’’𑀦𑁆𑀢𑀺 𑀯𑀺𑀲𑁂𑀲𑀦𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀸. 𑀧𑀜𑁆𑀘𑀯𑁄𑀓𑀸𑀭𑀸 𑀯𑀺𑀬 𑀬𑀣𑀸𑀯𑀼𑀢𑁆𑀢𑀸 𑀲𑀼𑀤𑁆𑀥𑀸𑀯𑀸𑀲𑀸𑀢𑀺 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀲𑀫𑀗𑁆𑀕𑀺𑀪𑀸𑀯𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀬𑀣𑀸 𑀲𑀼𑀤𑁆𑀥𑀸𑀯𑀸𑀲𑀲𑀗𑁆𑀔𑀸𑀢𑀸 𑀧𑀜𑁆𑀘𑀯𑁄𑀓𑀸𑀭𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀲𑀦𑁆𑀢𑀺, 𑀏𑀯𑀁 𑀘𑀢𑀼𑀯𑁄𑀓𑀸𑀭𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀦 𑀳𑀺 𑀲𑀦𑁆𑀢𑀻𑀢𑀺 𑀬𑁄𑀚𑀦𑀸.

‘‘𑀬𑀲𑁆𑀲 𑀬𑀢𑁆𑀣𑀸’’𑀢𑀺 𑀧𑀼𑀕𑁆𑀕𑀮𑁄𑀓𑀸𑀲𑀸 𑀆𑀥𑁂𑀬𑁆𑀬𑀸𑀥𑀸𑀭𑀪𑀸𑀯𑁂𑀦 𑀅𑀧𑁂𑀓𑁆𑀔𑀺𑀢𑀸𑀢𑀺 𑀆𑀳 ‘‘𑀧𑀼𑀕𑁆𑀕𑀮𑁄𑀓𑀸𑀲𑀸 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑀺𑀦𑁆𑀦𑀸 𑀕𑀳𑀺𑀢𑀸’’𑀢𑀺. 𑀓𑀸𑀫𑀸𑀯𑀘𑀭𑁂…𑀧𑁂… 𑀉𑀧𑀧𑀦𑁆𑀦𑀸𑀢𑀺 𑀏𑀢𑁆𑀣 𑀓𑀸𑀫𑀸𑀯𑀘𑀭𑁂 𑀅𑀪𑀺𑀲𑀫𑁂𑀢𑀸𑀯𑀺𑀦𑁄 𑀭𑀽𑀧𑀸𑀯𑀘𑀭𑀁 𑀉𑀧𑀧𑀦𑁆𑀦𑀸, 𑀭𑀽𑀧𑀸𑀯𑀘𑀭𑁂 𑀅𑀪𑀺𑀲𑀫𑁂𑀢𑀸𑀯𑀺𑀦𑁄 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀦𑁆𑀦𑀸, 𑀯𑀸-𑀲𑀤𑁆𑀤𑁂𑀦 𑀓𑀸𑀫𑀸𑀯𑀘𑀭𑁂 𑀅𑀪𑀺𑀲𑀫𑁂𑀢𑀸𑀯𑀺𑀦𑁄 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀦𑁆𑀦𑀸𑀢𑀺 𑀘 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀉𑀧𑀧𑀦𑁆𑀦𑁄𑀓𑀸𑀲𑁂. 𑀅𑀪𑀺𑀲𑀫𑀬𑁄𑀢𑀺 𑀉𑀧𑀭𑀺𑀫𑀕𑁆𑀕𑀸𑀪𑀺𑀲𑀫𑀬𑁄 𑀬𑀸𑀯 𑀉𑀧𑀧𑀦𑁆𑀦𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀸𑀯 𑀢𑁂 𑀢𑀢𑁆𑀣 𑀉𑀧𑀧𑀦𑁆𑀦𑀧𑀼𑀕𑁆𑀕𑀮𑀸 𑀏𑀢𑁆𑀣 𑀏𑀢𑀲𑁆𑀫𑀺𑀁 ‘‘𑀅𑀪𑀺𑀲𑀫𑁂𑀢𑀸𑀯𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀤𑀼𑀢𑀺𑀬𑀓𑁄𑀝𑁆𑀞𑀸𑀲𑁂 𑀦 𑀕𑀬𑁆𑀳𑀦𑁆𑀢𑀺 𑀧𑀼𑀕𑁆𑀕𑀮𑁄𑀓𑀸𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀺𑀁 𑀢𑁂 𑀇𑀫𑀲𑁆𑀫𑀺𑀁 𑀬𑀫𑀓𑁂 𑀅𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 ‘‘𑀢𑁂 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀯𑀼𑀢𑁆𑀢𑀁 ‘‘𑀲𑀫𑀸𑀦𑀕𑀢𑀺𑀓𑀸𑀢𑀺 𑀯𑀺𑀲𑀼𑀁 𑀦 𑀤𑀲𑁆𑀲𑀺𑀢𑀸’’𑀢𑀺, 𑀢𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀅𑀦𑀪𑀺𑀲𑀫𑁂𑀢𑀸𑀯𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 ‘‘𑀅𑀦𑀪𑀺𑀲𑀫𑁂𑀢𑀸𑀯𑀻𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀞𑀫𑀧𑀤𑁂𑀦 𑀕𑀳𑀺𑀢𑀸 𑀲𑀩𑁆𑀩𑀢𑁆𑀣 𑀫𑀕𑁆𑀕𑀼𑀧𑁆𑀧𑀢𑁆𑀢𑀺𑀭𑀳𑁂 𑀲𑀫𑁆𑀧𑀢𑁆𑀢𑀺𑀪𑀯𑁂 𑀢𑀢𑁆𑀣 𑀲𑀼𑀤𑁆𑀥𑀸𑀯𑀸𑀲𑁂 𑀬𑁂 𑀅𑀦𑀪𑀺𑀲𑀫𑁂𑀢𑀸𑀯𑀺𑀦𑁄, 𑀢𑁂𑀲𑀼 𑀤𑁆𑀯𑀺𑀧𑁆𑀧𑀓𑀸𑀭𑁂𑀲𑀼 𑀲𑀼𑀤𑁆𑀥𑀸𑀯𑀸𑀲𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀢𑁆𑀣 𑀅𑀦𑀪𑀺𑀲𑀫𑁂𑀢𑀸𑀯𑀺𑀦𑁄𑀢𑀺 𑀕𑀳𑁂𑀢𑀩𑁆𑀩𑀸, 𑀢𑀢𑁆𑀣 𑀦𑁂𑀲𑀁 𑀢𑀣𑀸 𑀕𑀳𑁂𑀢𑀩𑁆𑀩𑀓𑀸𑀮𑀲𑁆𑀲 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀤𑀼𑀢𑀺𑀬𑁂 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀏𑀢𑁂𑀦𑀸𑀢𑀺 𑀏𑀢𑁂𑀦 𑀯𑀘𑀦𑁂𑀦. 𑀯𑁄𑀤𑀸𑀦𑀘𑀺𑀢𑁆𑀢𑀁 𑀦𑀸𑀫 𑀫𑀕𑁆𑀕𑀘𑀺𑀢𑁆𑀢𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁 𑀘𑀺𑀢𑁆𑀢𑀁, 𑀇𑀥 𑀧𑀦 𑀅𑀕𑁆𑀕𑀫𑀕𑁆𑀕𑀘𑀺𑀢𑁆𑀢𑀲𑁆𑀲. 𑀢𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑁄𑀤𑀸𑀦𑀘𑀺𑀢𑁆𑀢𑀢𑁄 𑀧𑀼𑀭𑀺𑀫𑀢𑀭𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄, 𑀅𑀦𑀼𑀮𑁄𑀫𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄, 𑀅𑀯𑀲𑀺𑀝𑁆𑀞𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀸𑀤𑀺𑀲𑀫𑀗𑁆𑀕𑀺𑀦𑁄𑀧𑀺. 𑀢𑁂𑀦𑀸𑀳 ‘‘𑀬𑀸𑀯 𑀲𑀩𑁆𑀩𑀦𑁆𑀢𑀺𑀫𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑀫𑀗𑁆𑀕𑀻, 𑀢𑀸𑀯 𑀤𑀲𑁆𑀲𑀺𑀢𑀸’’𑀢𑀺.

𑀧𑀝𑀺𑀲𑀦𑁆𑀥𑀺𑀘𑀼𑀢𑀺𑀘𑀺𑀢𑁆𑀢𑀸𑀦𑀁 𑀪𑀗𑁆𑀕𑀼𑀧𑁆𑀧𑀸𑀤𑀓𑁆𑀔𑀡𑀸 𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀼𑀧𑁆𑀧𑀸𑀤𑀓𑁆𑀔𑀡𑁂𑀳𑀺 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀁 𑀦𑀼𑀧𑁆𑀧𑀸𑀤𑀸𑀤𑀻𑀲𑀼 𑀲𑀫𑀸𑀦𑀕𑀢𑀺𑀓𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀯𑀢𑁆𑀢𑁂 𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀘𑀼𑀢𑀺𑀘𑀺𑀢𑁆𑀢𑀲𑁆𑀲𑀧𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑁆𑀲 𑀕𑀳𑀡𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀤𑁆𑀯𑀻𑀲𑀼𑀧𑀺 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀲𑀫𑀼𑀤𑀬𑀲𑀘𑁆𑀘𑀲𑁆𑀲 𑀪𑀸𑀯𑀺𑀦𑁄 𑀦𑀺𑀭𑁄𑀥𑀲𑁆𑀲 𑀅𑀧𑁆𑀧𑀝𑀺𑀓𑁆𑀔𑁂𑀧𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀧𑀯𑀢𑁆𑀢𑁂𑀲𑀼 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑁄𑀝𑁆𑀞𑀸𑀲𑁂𑀲𑀼. 𑀦 𑀯𑀺𑀲𑁂𑀲𑀺𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂 𑀅𑀧𑁆𑀧𑀝𑀺𑀓𑁆𑀔𑁂𑀧𑁂 𑀘 𑀲𑀢𑀺𑀧𑀺 𑀯𑀺𑀲𑁂𑀲𑁂𑀢𑁆𑀯𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀢𑀸𑀤𑀺𑀲𑀲𑁆𑀲 𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘 𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀺𑀦𑁄 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑀲𑁆𑀲𑁂𑀯 𑀅𑀪𑀚𑀦𑀢𑁄 𑀓𑁄𑀝𑁆𑀞𑀸𑀲𑀤𑁆𑀯𑀬𑀲𑀫𑁆𑀪𑀯𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑀲𑁆𑀲 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑁂𑀲𑀜𑁆𑀘𑀺 𑀧𑀼𑀕𑁆𑀕𑀮𑀸𑀦𑀁. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. ‘‘𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑀫𑀕𑁆𑀕𑀨𑀮𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀡𑁆𑀡𑀁 𑀨𑀮𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀫𑀕𑁆𑀕𑀸𑀦’’𑀦𑁆𑀢𑀺 𑀆𑀳. 𑀢𑀸𑀦𑀺 𑀧𑀦 𑀳𑁂𑀝𑁆𑀞𑀺𑀫𑀸𑀦𑀺 𑀢𑀻𑀡𑀺 𑀨𑀮𑀸𑀦𑀺 𑀫𑀚𑁆𑀛𑁂 𑀘 𑀤𑁆𑀯𑁂 𑀫𑀕𑁆𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀭𑀦𑁆𑀢𑀭𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀅𑀯𑁄𑀓𑀺𑀡𑁆𑀡𑀁 𑀓𑀢𑁆𑀯𑀸 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀬𑀸 𑀲𑀸𑀢𑀘𑁆𑀘𑀓𑀺𑀭𑀺𑀬𑀸 𑀓𑀸𑀢𑀩𑁆𑀩𑀸, 𑀢𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑁆𑀢𑀭𑀦𑁆𑀢𑀭𑀸…𑀧𑁂… 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺. ‘‘𑀅𑀭𑀽𑀧𑁂 𑀫𑀕𑁆𑀕𑀲𑁆𑀲 𑀘 𑀨𑀮𑀲𑁆𑀲 𑀘 𑀪𑀗𑁆𑀕𑀓𑁆𑀔𑀡𑁂’’𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑁂 𑀓𑀣𑀫𑀬𑀁 𑀯𑀺𑀲𑁂𑀲𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑀸𑀫𑀜𑁆𑀜𑀯𑀘𑀦𑁂𑀦𑀧𑀻’’𑀢𑀺𑀆𑀤𑀺. 𑀢𑁂𑀦 𑀅𑀧𑀯𑀸𑀤𑀯𑀺𑀲𑀬𑀧𑀭𑀺𑀬𑀸𑀬𑁂𑀦 𑀉𑀧𑀲𑀕𑁆𑀕𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀮𑁄𑀓𑀲𑀺𑀤𑁆𑀥𑁄𑀬𑀁 𑀜𑀸𑀬𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸

𑁧𑁬𑁫-𑁧𑁭𑁦. 𑀏𑀢𑁆𑀣𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 𑀲𑀘𑁆𑀘𑀬𑀫𑀓𑁂 𑀏𑀯. 𑀅𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀏𑀢𑁆𑀣 𑀅-𑀓𑀸𑀭𑁄 𑀦 𑀧𑀭𑀺𑀜𑁆𑀜𑁂𑀬𑁆𑀬𑀸𑀪𑀸𑀯𑀯𑀘𑀦𑁄, 𑀦𑀸𑀧𑀺 𑀧𑀭𑀺𑀜𑁆𑀜𑁂𑀬𑁆𑀬𑀧𑀝𑀺𑀧𑀓𑁆𑀔𑀯𑀘𑀦𑁄, 𑀅𑀣 𑀔𑁄 𑀢𑀤𑀜𑁆𑀜𑀯𑀘𑀦𑁄𑀢𑀺 𑀬𑀣𑀸𑀭𑀳𑀁 𑀲𑀘𑁆𑀘𑁂𑀲𑀼 𑀮𑀩𑁆𑀪𑀫𑀸𑀦𑀸𑀦𑀁 𑀧𑀳𑀸𑀢𑀩𑁆𑀩𑀢𑀸𑀤𑀻𑀦𑀫𑁆𑀧𑀺 𑀤𑀲𑁆𑀲𑀦𑁂 𑀆𑀧𑀦𑁆𑀦𑁂𑀬𑁂𑀯 𑀲𑀫𑀬𑀯𑀸𑀭𑁄 𑀤𑀲𑁆𑀲𑀦𑀧𑀭𑁄, 𑀬𑁂𑀲𑀜𑁆𑀘 𑀦 𑀤𑀲𑁆𑀲𑀦𑀧𑀭𑁄, 𑀢𑁂𑀲𑀼 𑀓𑁂𑀲𑀼𑀘𑀺 𑀲𑀘𑁆𑀘𑁂𑀲𑀼 𑀮𑀩𑁆𑀪𑀫𑀸𑀦𑀸𑀦𑀫𑁆𑀧𑀺 𑀓𑁂𑀲𑀜𑁆𑀘𑀺 𑀯𑀺𑀲𑁂𑀲𑀸𑀦𑀁 𑀅𑀬𑀁 𑀯𑀸𑀭𑁄 𑀦 𑀤𑀲𑁆𑀲𑀦𑀧𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀘𑁆𑀙𑀺𑀓𑀭𑀡…𑀧𑁂… 𑀤𑀲𑁆𑀲𑀦𑀢𑁆𑀣𑀜𑁆𑀘𑀸’’𑀢𑀺 𑀆𑀳. 𑀲𑀫𑀼𑀤𑀬𑁂 𑀧𑀳𑀸𑀦𑀧𑀭𑀺𑀜𑁆𑀜𑀸𑀯 𑀯𑀼𑀢𑁆𑀢𑀸, 𑀦 𑀢𑀻𑀭𑀡𑀧𑀭𑀺𑀜𑁆𑀜𑀸𑀢𑀺 𑀬𑀼𑀢𑁆𑀢𑀁 𑀢𑀸𑀯𑁂𑀢𑀁 𑀲𑀫𑀼𑀤𑀬𑀲𑁆𑀲𑀧𑀺 𑀢𑀻𑀭𑁂𑀢𑀩𑁆𑀩𑀲𑀪𑀸𑀯𑀢𑁆𑀢𑀸, ‘‘𑀤𑀼𑀓𑁆𑀔𑁂 𑀢𑀻𑀭𑀡𑀧𑀭𑀺𑀜𑁆𑀜𑀸𑀯 𑀯𑀼𑀢𑁆𑀢𑀸, 𑀦 𑀧𑀳𑀸𑀦𑀧𑀭𑀺𑀜𑁆𑀜𑀸’’𑀢𑀺 𑀇𑀤𑀁 𑀧𑀦 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀤𑀼𑀓𑁆𑀔𑀁 𑀅𑀧𑁆𑀧𑀳𑀸𑀢𑀩𑁆𑀩𑀫𑁂𑀯𑀸𑀢𑀺? 𑀲𑀫𑀼𑀤𑀬𑀲𑀘𑁆𑀘𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀸𑀦𑀁 𑀓𑁂𑀲𑀜𑁆𑀘𑀺 𑀲𑀫𑀼𑀤𑀬𑀓𑁄𑀝𑁆𑀞𑀸𑀲𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑁂 𑀲𑀗𑁆𑀕𑀳𑀡𑀢𑁄 𑀤𑀼𑀓𑁆𑀔𑀲𑀫𑀼𑀤𑀬𑁂 𑀯𑀸 𑀅𑀲𑀗𑁆𑀓𑀭𑀢𑁄𑀯 𑀕𑀳𑁂𑀢𑁆𑀯𑀸 𑀪𑀽𑀢𑀓𑀣𑀦𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀉𑀪𑀬𑀢𑁆𑀣𑀸𑀢𑀺 𑀤𑀼𑀓𑁆𑀔𑁂 𑀲𑀫𑀼𑀤𑀬𑁂 𑀘 𑀯𑀼𑀢𑁆𑀢𑀸. 𑀓𑀲𑁆𑀫𑀸? 𑀢𑁂𑀲𑀁 𑀲𑀸𑀥𑀸𑀭𑀡𑀸𑀢𑀺. 𑀏𑀯𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀪𑁂𑀤𑀪𑀺𑀦𑁆𑀦𑀁 𑀬𑀣𑀸𑀯𑀼𑀢𑁆𑀢𑀁 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀁 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀓𑁆𑀔𑀡𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀫𑀕𑁆𑀕𑀓𑀸𑀮𑁂 𑀏𑀓𑀓𑁆𑀔𑀡𑁂 𑀏𑀯 𑀮𑀩𑁆𑀪𑀢𑀺 𑀏𑀓𑀜𑀸𑀡𑀓𑀺𑀘𑁆𑀘𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀜𑀸𑀡𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀭𑀺𑀜𑁆𑀜𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀗𑁆𑀔𑀸𑀭𑀬𑀫𑀓𑀁

𑁧. 𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧. 𑀲𑀢𑀺𑀧𑀺 𑀓𑀼𑀲𑀮𑀫𑀽𑀮𑀸𑀤𑀻𑀦𑀫𑁆𑀧𑀺 𑀯𑀺𑀪𑀢𑁆𑀢𑀪𑀸𑀯𑁂 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁄 𑀢𑀢𑁄 𑀲𑀸𑀢𑀺𑀲𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀔𑀦𑁆𑀥𑀸𑀤𑀬𑁄 𑀯𑀺𑀬 𑀧𑀼𑀩𑁆𑀩𑁂 𑀅𑀯𑀺𑀪𑀢𑁆𑀢𑀸’’𑀢𑀺 𑀆𑀳. 𑀧𑀓𑀸𑀭𑀢𑁆𑀣𑁄 𑀯𑀸 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 ‘‘𑀪𑀽𑀯𑀸𑀤𑀬𑁄’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀓𑀼𑀲𑀮𑀫𑀽𑀮𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀯𑀺𑀜𑁆𑀜𑀸𑀢𑀢𑁆𑀢𑀸 𑀦𑀺𑀲𑀸𑀫𑁂𑀦𑁆𑀢𑁂𑀳𑀺. 𑀳𑁂𑀢𑀼𑀅𑀢𑁆𑀣𑁄 𑀯𑀸 𑀏𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀅𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀤𑀺𑀧𑀺 𑀓𑀸𑀬𑀲𑀗𑁆𑀔𑀸𑀭𑀸𑀦𑀁 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀳𑁂𑀢𑀼𑀨𑀮𑀪𑀸𑀯𑁄𑀬𑁂𑀯 𑀇𑀘𑁆𑀙𑀺𑀢𑁄, 𑀲𑀸𑀫𑀺𑀯𑀘𑀦𑀭𑀽𑀧𑀸𑀯𑀺𑀪𑀽𑀢𑁄 𑀧𑀦 𑀅𑀢𑁆𑀣𑁂𑀯 𑀅𑀢𑁆𑀣𑀪𑁂𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑀲𑁆𑀲…𑀧𑁂… 𑀓𑀢𑁆𑀢𑀼𑀅𑀢𑁆𑀣𑁂’’𑀢𑀺 𑀆𑀳. 𑀲𑁄 𑀧𑀦𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁄.

𑁨-𑁭. 𑀲𑀼𑀤𑁆𑀥𑀺𑀓𑀏𑀓𑁂𑀓𑀧𑀤𑀯𑀲𑁂𑀦𑀸𑀢𑀺 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄’’𑀢𑀺𑀆𑀤𑀻𑀲𑀼 𑀤𑁆𑀯𑀻𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀅𑀜𑁆𑀜𑀫𑀜𑁆𑀜𑀁 𑀅𑀲𑀫𑁆𑀫𑀺𑀲𑁆𑀲𑀏𑀓𑁂𑀓𑀧𑀤𑀯𑀲𑁂𑀦. 𑀅𑀢𑁆𑀣𑀸𑀪𑀸𑀯𑀢𑁄𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀸𑀪𑀸𑀯𑀢𑁄. 𑀅𑀜𑁆𑀜𑀣𑀸 𑀓𑀭𑀚𑀓𑀸𑀬𑀸𑀤𑀺𑀓𑁄 𑀅𑀢𑁆𑀣𑁄 𑀅𑀢𑁆𑀣𑁂𑀯. 𑀢𑁂𑀦𑁂𑀯𑀸𑀳 ‘‘𑀧𑀤𑀲𑁄𑀥𑀦…𑀧𑁂… 𑀅𑀯𑀘𑀦𑀻𑀬𑀢𑁆𑀢𑀸’’𑀢𑀺. 𑀇𑀤𑀸𑀦𑀺 𑀢𑀫𑁂𑀯 𑀅𑀢𑁆𑀣𑀸𑀪𑀸𑀯𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀓𑀲𑁆𑀫𑀸 𑀧𑀦 𑀉𑀪𑀬𑀢𑁆𑀣 𑀲𑀫𑀸𑀦𑁂 𑀲𑀫𑀸𑀲𑀧𑀤𑀪𑀸𑀯𑁂 𑀢𑀢𑁆𑀣 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀇𑀥 𑀦 𑀮𑀩𑁆𑀪𑀢𑀻𑀢𑀺? 𑀪𑀺𑀦𑁆𑀦𑀮𑀓𑁆𑀔𑀡𑀢𑁆𑀢𑀸. 𑀢𑀢𑁆𑀣 𑀳𑀺 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀦𑀺 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀻𑀢𑀺 𑀧𑀤𑀤𑁆𑀯𑀬𑀸𑀥𑀺𑀝𑁆𑀞𑀸𑀦𑁄 𑀏𑀓𑁄 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀇𑀥 𑀧𑀦 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀧𑀤𑀸𑀦𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀸𑀦𑀻𑀢𑀺 𑀢𑀣𑀸𑀭𑀽𑀧𑁄 𑀅𑀢𑁆𑀣𑁄 𑀦 𑀮𑀩𑁆𑀪𑀢𑀻𑀢𑀺. 𑀢𑁂𑀦𑀸𑀳 ‘‘𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀸𑀪𑀸𑀯𑀢𑁄’’𑀢𑀺.

𑀯𑀺𑀲𑀼𑀁 𑀅𑀤𑀻𑀧𑁂𑀢𑁆𑀯𑀸𑀢𑀺 ‘‘𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀲𑀳 𑀯𑀼𑀘𑁆𑀘𑀫𑀸𑀦𑁄𑀧𑀺 𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀅𑀚𑁄𑀢𑁂𑀢𑁆𑀯𑀸 𑀏𑀓𑀁 𑀅𑀢𑁆𑀣𑀁 𑀬𑀤𑀺 𑀤𑀻𑀧𑁂𑀢𑀻𑀢𑀺 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀤𑀢𑀺. 𑀢𑁂𑀦 𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. ‘‘𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑁄 𑀓𑀸𑀬𑀲𑀗𑁆𑀔𑀸𑀭𑀢𑁆𑀣𑁂 𑀯𑀢𑁆𑀢𑀫𑀸𑀦𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, ‘‘𑀲𑀗𑁆𑀔𑀸𑀭𑀲𑀤𑁆𑀤𑁄 𑀲𑀗𑁆𑀔𑀸𑀭𑀢𑁆𑀣𑁂𑀯 𑀯𑀢𑁆𑀢𑀫𑀸𑀦𑁄’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀯𑀜𑁆𑀳𑀺 𑀲𑀢𑀺 𑀔𑀦𑁆𑀥𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀔𑀦𑁆𑀥𑀲𑀤𑁆𑀤𑁄 𑀯𑀺𑀬 𑀭𑀽𑀧𑀲𑀤𑁆𑀤𑁂𑀦 𑀓𑀸𑀬𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑁄𑀢𑀺 𑀇𑀤𑀁 𑀯𑀘𑀦𑀁 𑀬𑀼𑀚𑁆𑀚𑁂𑀬𑁆𑀬, 𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑀸𑀦𑀁 𑀧𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂 𑀦 𑀓𑁂𑀯𑀮𑀁 𑀲𑀗𑁆𑀔𑀸𑀭𑀲𑀤𑁆𑀤𑁄𑀬𑁂𑀯 𑀲𑀗𑁆𑀔𑀸𑀭𑀢𑁆𑀣𑁂 𑀯𑀢𑁆𑀢𑀢𑀺, 𑀅𑀣 𑀔𑁄 𑀓𑀸𑀬𑀲𑀤𑁆𑀤𑁄𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀲𑀗𑁆𑀔𑀸𑀭𑀲𑀤𑁆𑀤𑁄 𑀓𑀸𑀬𑀲𑀗𑁆𑀔𑀸𑀭𑀢𑁆𑀣𑁂 𑀯𑀢𑁆𑀢𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸, 𑀓𑀸𑀬𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑁆𑀬𑀥𑀺𑀓𑀭𑀡𑁂𑀦 𑀧𑀦 𑀲𑀗𑁆𑀔𑀸𑀭𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀅𑀢𑁆𑀣𑁂𑀯𑀸𑀢𑀺.

𑀇𑀫𑀲𑁆𑀲 𑀯𑀸𑀭𑀲𑁆𑀲𑀸𑀢𑀺 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑀲𑁆𑀲. 𑀧𑀤𑀲𑁄𑀥𑀦𑁂𑀦 𑀤𑀲𑁆𑀲𑀺𑀢𑀸𑀦𑀦𑁆𑀢𑀺 𑀏𑀢𑁆𑀢𑀓𑁂𑀯 𑀯𑀼𑀘𑁆𑀘𑀫𑀸𑀦𑁂 𑀢𑀢𑁆𑀣 𑀤𑀲𑁆𑀲𑀺𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀲𑀼𑀤𑁆𑀥𑀓𑀸𑀬𑀸𑀤𑀻𑀦𑀫𑁆𑀧𑀺 𑀕𑀳𑀡𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀁 ‘‘𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀫𑁂𑀯𑀸’’𑀢𑀺 𑀆𑀳. 𑀓𑀸𑀬𑀸𑀤𑀺𑀧𑀤𑁂𑀳𑀺 𑀅𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀲𑀼𑀤𑁆𑀥𑀓𑀸𑀬𑀸𑀤𑀺𑀧𑀤𑁂𑀳𑀺 𑀅𑀕𑁆𑀕𑀳𑀺𑀢𑀢𑁆𑀢𑀸. 𑀇𑀥 𑀧𑀦𑀸𑀢𑀺 𑀅𑀝𑁆𑀞𑀓𑀣𑀸𑀬𑀁. 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀫𑁆𑀧𑀺 𑀲𑀼𑀤𑁆𑀥𑀲𑀗𑁆𑀔𑀸𑀭𑀯𑀸𑀭𑀫𑁂𑀯𑁂𑀢𑁆𑀣 𑀅𑀦𑀦𑀼𑀚𑀸𑀦𑀦𑁆𑀢𑁄 𑀲𑀓𑀮𑀲𑀗𑁆𑀔𑀸𑀭𑀬𑀫𑀓𑀯𑀺𑀲𑀬𑀦𑁆𑀢𑀺 𑀆𑀳 ‘‘𑀇𑀥 𑀧𑀦 𑀲𑀗𑁆𑀔𑀸𑀭𑀬𑀫𑀓𑁂’’𑀢𑀺. 𑀅𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀘𑁆𑀘𑀸𑀕𑁄𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀓𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀅𑀕𑁆𑀕𑀳𑀡𑀁 𑀘𑁂𑀢𑀦𑀸𑀓𑀸𑀬𑀅𑀪𑀺𑀲𑀗𑁆𑀔𑀭𑀡𑀲𑀗𑁆𑀔𑀸𑀭𑀸𑀤𑀺 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑀧𑀭𑀺𑀕𑁆𑀕𑀳𑁄. 𑀬𑀤𑀺 ‘‘𑀓𑀸𑀬𑁄 𑀲𑀗𑁆𑀔𑀸𑀭𑁄’’𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀲𑀗𑁆𑀔𑀸𑀭𑀢𑀁𑀫𑀽𑀮𑀘𑀓𑁆𑀓𑀯𑀸𑀭𑀸 𑀅𑀢𑁆𑀣𑀸𑀪𑀸𑀯𑀢𑁄 𑀇𑀥 𑀦 𑀕𑀳𑁂𑀢𑀩𑁆𑀩𑀸, 𑀅𑀣 𑀓𑀲𑁆𑀫𑀸 𑀧𑀯𑀢𑁆𑀢𑀺𑀯𑀸𑀭𑀫𑁂𑀯 𑀅𑀦𑀸𑀭𑀪𑀺𑀢𑁆𑀯𑀸 𑀅𑀜𑁆𑀜𑀣𑀸 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺 𑀆𑀳 ‘‘𑀧𑀤𑀲𑁄𑀥𑀦𑀯𑀸𑀭𑀢𑀁𑀫𑀽𑀮𑀘𑀓𑁆𑀓𑀯𑀸𑀭𑁂𑀳𑀻’’𑀢𑀺𑀆𑀤𑀺. 𑀲𑀁𑀲𑀬𑁄 𑀳𑁄𑀢𑀺 𑀲𑀗𑁆𑀔𑀸𑀭𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑀢𑁄 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀧𑀤𑀸𑀦𑀁 𑀩𑁆𑀬𑀥𑀺𑀓𑀭𑀡𑀪𑀸𑀯𑀢𑁄 𑀘. 𑀢𑁂𑀦𑁂𑀯𑀸𑀳 ‘‘𑀅𑀲𑀫𑀸𑀦𑀸𑀥𑀺𑀓𑀭𑀡𑁂𑀳𑀺…𑀧𑁂… 𑀤𑀲𑁆𑀲𑀺𑀢𑀸𑀬𑀸’’𑀢𑀺.

𑀧𑀡𑁆𑀡𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁯. 𑀲𑀗𑁆𑀔𑀸𑀭𑀸𑀦𑀁 𑀧𑀼𑀕𑁆𑀕𑀮𑀸𑀦𑀜𑁆𑀘 𑀑𑀓𑀸𑀲𑀢𑁆𑀢𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸𑀬, 𑀲𑀗𑁆𑀔𑀸𑀭𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑀸𑀬 𑀧𑀼𑀕𑁆𑀕𑀮𑀸𑀦𑀁 𑀛𑀸𑀦𑀲𑁆𑀲 𑀑𑀓𑀸𑀲𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀪𑀽𑀫𑀺 𑀧𑀦 𑀬𑀤𑀕𑁆𑀕𑁂𑀦 𑀧𑀼𑀕𑁆𑀕𑀮𑀸𑀦𑀁 𑀑𑀓𑀸𑀲𑁄, 𑀢𑀤𑀕𑁆𑀕𑁂𑀦 𑀲𑀗𑁆𑀔𑀸𑀭𑀸𑀦𑀫𑁆𑀧𑀺 𑀑𑀓𑀸𑀲𑁄. ‘‘𑀤𑀼𑀢𑀺𑀬𑁂 𑀛𑀸𑀦𑁂 𑀢𑀢𑀺𑀬𑁂 𑀛𑀸𑀦𑁂’’𑀢𑀺𑀆𑀤𑀺𑀦𑀸 𑀛𑀸𑀦𑀁, ‘‘𑀓𑀸𑀫𑀸𑀯𑀘𑀭𑁂 𑀭𑀽𑀧𑀸𑀯𑀘𑀭𑁂’’𑀢𑀺𑀆𑀤𑀺𑀦𑀸 𑀪𑀽𑀫𑀺 𑀘 𑀯𑀺𑀲𑀼𑀁 𑀑𑀓𑀸𑀲𑀪𑀸𑀯𑁂𑀦 𑀕𑀳𑀺𑀢𑀸. 𑀇𑀢𑀻𑀢𑀺 𑀳𑁂𑀢𑀼𑀅𑀢𑁆𑀣𑁄, 𑀬𑀲𑁆𑀫𑀸 𑀛𑀸𑀦𑀫𑁆𑀧𑀺 𑀑𑀓𑀸𑀲𑀪𑀸𑀯𑁂𑀦 𑀕𑀳𑀺𑀢𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀯𑀸𑀭𑁂 𑀘 𑀑𑀓𑀸𑀲𑀯𑀲𑁂𑀦 𑀧𑀼𑀕𑁆𑀕𑀮𑀕𑁆𑀕𑀳𑀡𑁂𑀢𑀺 𑀧𑀼𑀕𑁆𑀕𑀮𑀯𑀸𑀭𑁂 𑀘 𑀬𑀤𑀸 𑀧𑀼𑀕𑁆𑀕𑀮𑁄𑀓𑀸𑀲𑀲𑀗𑁆𑀔𑀸𑀭𑀸𑀤𑀻𑀦𑀁 𑀑𑀓𑀸𑀲𑀪𑀸𑀯𑁂𑀦 𑀕𑀬𑁆𑀳𑀢𑀺, 𑀢𑀤𑀸 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀑𑀓𑀸𑀲𑀸𑀦𑀁 𑀯𑀲𑁂𑀦 𑀕𑀬𑁆𑀳𑀦𑀁 𑀳𑁄𑀢𑀻𑀢𑀺 𑀬𑀢𑁆𑀣 𑀲𑁄 𑀧𑀼𑀕𑁆𑀕𑀮𑁄, 𑀬𑀜𑁆𑀘 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀛𑀸𑀦𑀁 𑀉𑀧𑀮𑀩𑁆𑀪𑀢𑀺, 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀪𑀽𑀫𑀺𑀛𑀸𑀦𑀲𑀗𑁆𑀔𑀸𑀢𑀸𑀦𑀁 𑀑𑀓𑀸𑀲𑀸𑀦𑀁 𑀯𑀲𑁂𑀦 𑀬𑀣𑀸𑀭𑀳𑀁 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀦𑀁 𑀕𑀳𑀡𑀁 𑀓𑀣𑀦𑀁 𑀳𑁄𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀢𑀤𑁂𑀯, 𑀢𑀲𑁆𑀫𑀸. 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑁄𑀓𑀸𑀲𑀯𑀲𑁂𑀦𑀸𑀢𑀺 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀲𑀗𑁆𑀔𑀸𑀢𑀑𑀓𑀸𑀲𑀯𑀲𑁂𑀦 𑀕𑀳𑀺𑀢𑀸. 𑀓𑀣𑀁? ‘‘𑀯𑀺𑀦𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀏𑀯𑀁 𑀕𑀳𑀺𑀢𑀸 𑀧𑀼𑀕𑁆𑀕𑀮𑀸 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀓𑁂𑀦? 𑀢𑁂𑀦𑁂𑀯 𑀯𑀺𑀢𑀓𑁆𑀓𑀯𑀺𑀘𑀸𑀭𑀭𑀳𑀺𑀢𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀼𑀧𑁆𑀧𑀸𑀤𑀓𑁆𑀔𑀡𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀧𑀞𑀫𑀓𑁄𑀝𑁆𑀞𑀸𑀲𑁂 𑀛𑀸𑀦𑁄𑀓𑀸𑀲𑀯𑀲𑁂𑀦 𑀧𑀼𑀕𑁆𑀕𑀮𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀪𑀽𑀫𑀺𑀑𑀓𑀸𑀲𑀯𑀲𑁂𑀦 𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀦𑁆𑀢𑀺 𑀛𑀸𑀦𑀪𑀽𑀫𑀺𑀑𑀓𑀸𑀲𑀪𑁂𑀤𑁂𑀦 𑀤𑀼𑀯𑀺𑀥𑀸𑀦𑀁. 𑀢𑁂𑀲𑀦𑁆𑀢𑀺 𑀧𑀼𑀕𑁆𑀕𑀮𑀸𑀦𑀁. ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀸𑀦𑀁 𑀓𑀸𑀫𑀸𑀯𑀘𑀭𑀸𑀦’’𑀦𑁆𑀢𑀺 𑀘 𑀇𑀤𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀲𑀸𑀥𑀸𑀭𑀡𑀯𑀘𑀦𑀁, 𑀢𑀲𑁆𑀲 𑀘 𑀅𑀯𑀘𑁆𑀙𑁂𑀤𑀓𑀁 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂’’𑀢𑀺 𑀇𑀤𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀲𑁂𑀲…𑀧𑁂… 𑀔𑀡𑁂’’𑀢𑀺. 𑀢𑁂𑀦 𑀯𑀺𑀲𑁂𑀲𑀦𑁂𑀦. 𑀓𑀸𑀫𑀸𑀯𑀘𑀭𑀸𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦 𑀓𑁂𑀯𑀮𑀁 𑀭𑀽𑀧𑀸𑀭𑀽𑀧𑀸𑀯𑀘𑀭𑁂𑀲𑀼 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀸𑀦𑀁, 𑀅𑀣 𑀔𑁄 𑀓𑀸𑀫𑀸𑀯𑀘𑀭𑀸𑀦𑀫𑁆𑀧𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀓𑀻𑀤𑀺𑀲𑀸𑀦𑀁 𑀓𑀸𑀫𑀸𑀯𑀘𑀭𑀸𑀦𑀦𑁆𑀢𑀺 𑀆𑀳 ‘‘𑀕𑀩𑁆𑀪𑀕𑀢𑀸𑀤𑀻𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀉𑀤𑀓𑀦𑀺𑀫𑀼𑀕𑁆𑀕𑀯𑀺𑀲𑀜𑁆𑀜𑀺𑀪𑀽𑀢𑀸 𑀲𑀗𑁆𑀕𑀳𑀺𑀢𑀸, 𑀦 𑀫𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀸. 𑀢𑁂 𑀳𑀺 𑀅𑀓𑀸𑀫𑀸𑀯𑀘𑀭𑀢𑀸𑀬 𑀯𑀺𑀬 𑀭𑀽𑀧𑀸𑀭𑀽𑀧𑀪𑀯𑀲𑀫𑀗𑁆𑀕𑀺𑀦𑁄 𑀯𑀺𑀢𑀓𑁆𑀓𑀯𑀺𑀘𑀸𑀭𑀼𑀧𑁆𑀧𑀢𑁆𑀢𑀺𑀬𑀸𑀯 𑀦𑀺𑀯𑀢𑁆𑀢𑀺𑀢𑀸. 𑀏𑀓𑀦𑁆𑀢𑀺𑀓𑀢𑁆𑀢𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀪𑀸𑀯𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸. 𑀦𑀺𑀤𑀲𑁆𑀲𑀺𑀢𑀸𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀸 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀢𑀩𑁆𑀩𑀺𑀭𑀳𑀺𑀢𑀸𑀦𑀁 𑀅𑀜𑁆𑀜𑁂𑀲𑀁 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀞𑀫𑀚𑁆𑀛𑀸𑀦𑁄𑀓𑀸𑀲𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀺𑀭𑀳𑀯𑀺𑀲𑀺𑀝𑁆𑀞𑀸𑀢𑀺 𑀬𑁄𑀚𑀦𑀸. 𑀧𑀞𑀫𑀜𑁆𑀘𑁂𑀢𑁆𑀣 𑀧𑀞𑀫𑀚𑁆𑀛𑀸𑀦𑀲𑀫𑀗𑁆𑀕𑀻𑀦𑀁 𑀭𑀽𑀧𑀸𑀭𑀽𑀧𑀸𑀯𑀘𑀭𑀸𑀦𑀁 𑀕𑀳𑀡𑀁, 𑀤𑀼𑀢𑀺𑀬𑀁 𑀬𑀣𑀸𑀯𑀼𑀢𑁆𑀢𑀕𑀩𑁆𑀪𑀕𑀢𑀸𑀤𑀻𑀦𑀁. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀬𑁆𑀯𑀸𑀬𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀧𑀼𑀕𑁆𑀕𑀮𑀸𑀦𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀛𑀸𑀦𑁄𑀓𑀸𑀲𑀪𑀽𑀫𑀺𑀑𑀓𑀸𑀲𑀯𑀲𑁂𑀦 𑀧𑀼𑀕𑁆𑀕𑀮𑀯𑀺𑀪𑀸𑀕𑀦𑀬𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸 𑀦𑀬𑁂𑀦 𑀉𑀧𑀸𑀬𑁂𑀦. 𑀲𑀩𑁆𑀩𑀢𑁆𑀣 𑀲𑀩𑁆𑀩𑀧𑀼𑀘𑁆𑀙𑀸𑀲𑀼.

𑁨𑁧. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀲𑀢𑀻𑀢𑀺 𑀬𑁆𑀯𑀸𑀬𑀁 𑀉𑀧𑁆𑀧𑀢𑁆𑀢𑀺𑀪𑀽𑀫𑀺𑀬𑀸 𑀛𑀸𑀦𑀁 𑀯𑀺𑀲𑁂𑀲𑁂𑀢𑁆𑀯𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀅𑀜𑁆𑀜𑀢𑁆𑀣𑀧𑀺 𑀉𑀧𑁆𑀧𑀢𑁆𑀢𑀺𑀪𑀽𑀫𑀺𑀬𑀸 𑀛𑀸𑀦𑀁 𑀯𑀺𑀲𑁂𑀲𑀺𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀣𑀸 𑀘 𑀅𑀦𑀺𑀝𑁆𑀞𑀁 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂’’𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀧𑀦 𑀢𑀁 𑀅𑀦𑀺𑀝𑁆𑀞𑀦𑁆𑀢𑀺 𑀆𑀳 ‘‘𑀪𑀽𑀫𑀻𑀦𑀁 𑀑𑀓𑀸𑀲𑀪𑀸𑀯𑀲𑁆𑀲𑁂𑀯 𑀅𑀕𑁆𑀕𑀳𑀺𑀢𑀢𑀸𑀧𑀢𑁆𑀢𑀺𑀢𑁄’’𑀢𑀺. 𑀬𑀢𑁆𑀣 𑀬𑀢𑁆𑀣 𑀳𑀺 𑀛𑀸𑀦𑀁 𑀕𑀬𑁆𑀳𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀁 𑀉𑀧𑁆𑀧𑀢𑁆𑀢𑀺𑀪𑀽𑀫𑀺𑀬𑀸 𑀯𑀺𑀲𑁂𑀲𑀺𑀢𑀩𑁆𑀩𑀁 𑀳𑁄𑀢𑀺. 𑀢𑀣𑀸 𑀲𑀢𑀺 𑀛𑀸𑀦𑁄𑀓𑀸𑀲𑁄𑀯 𑀕𑀳𑀺𑀢𑁄 𑀲𑀺𑀬𑀸, 𑀦 𑀪𑀽𑀫𑀺𑀑𑀓𑀸𑀲𑁄 𑀕𑀼𑀡𑀪𑀽𑀢𑀢𑁆𑀢𑀸. 𑀓𑀺𑀜𑁆𑀘 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀭𑀽𑀧𑀸𑀯𑀘𑀭𑁂 𑀅𑀭𑀽𑀧𑀸𑀯𑀘𑀭𑁂’’𑀢𑀺 𑀏𑀢𑁆𑀣 𑀭𑀽𑀧𑀸𑀭𑀽𑀧𑀪𑀽𑀫𑀺𑀬𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀯𑀺𑀲𑁂𑀲𑀺𑀬𑀫𑀸𑀦𑁂 𑀢𑀤𑁂𑀓𑀤𑁂𑀲𑁄𑀯 𑀑𑀓𑀸𑀲𑀯𑀲𑁂𑀦 𑀕𑀳𑀺𑀢𑁄 𑀲𑀺𑀬𑀸, 𑀦 𑀲𑀩𑁆𑀩𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀑𑀓𑀸𑀲𑀯𑀲𑁂𑀦 𑀅𑀕𑁆𑀕𑀳𑀺𑀢𑀢𑀸𑀧𑀢𑁆𑀢𑀺𑀢𑁄 𑀘𑀸’’𑀢𑀺. 𑀛𑀸𑀦𑀪𑀽𑀫𑁄𑀓𑀸𑀲𑀸𑀦𑀦𑁆𑀢𑀺 𑀛𑀸𑀦𑁄𑀓𑀸𑀲𑀪𑀽𑀫𑀺𑀑𑀓𑀸𑀲𑀸𑀦𑀁.

𑀦𑀦𑀼 𑀘 𑀛𑀸𑀦𑀪𑀽𑀫𑀺𑀑𑀓𑀸𑀲𑁂 𑀅𑀲𑀗𑁆𑀓𑀭𑀢𑁄 𑀬𑁄𑀚𑀺𑀬𑀫𑀸𑀦𑁂 𑀦 𑀲𑀩𑁆𑀩𑀲𑁆𑀫𑀺𑀁 𑀧𑀞𑀫𑀚𑁆𑀛𑀸𑀦𑁄𑀓𑀸𑀲𑁂 𑀓𑀸𑀬𑀲𑀗𑁆𑀔𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄 𑀘 𑀅𑀢𑁆𑀣𑀺, 𑀢𑀣𑀸 𑀲𑀩𑁆𑀩𑀲𑁆𑀫𑀺𑀁 𑀓𑀸𑀫𑀸𑀯𑀘𑀭𑁄𑀓𑀸𑀲𑁂𑀢𑀺 𑀘𑁄𑀤𑀦𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀢𑀲𑁆𑀲 𑀧𑀭𑀺𑀳𑀸𑀭𑀁 𑀯𑀢𑁆𑀢𑀼𑀁 ‘‘𑀬𑀤𑀺𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀧𑀞𑀫𑀚𑁆𑀛𑀸𑀦𑁄𑀓𑀸𑀲𑁂 𑀓𑀸𑀫𑀸𑀯𑀘𑀭𑁄𑀓𑀸𑀲𑁂 𑀘. 𑀢𑀁𑀤𑁆𑀯𑀬𑀼𑀧𑁆𑀧𑀢𑁆𑀢𑀻𑀢𑀺 𑀢𑀲𑁆𑀲 𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀤𑁆𑀯𑀬𑀲𑁆𑀲 𑀉𑀧𑁆𑀧𑀢𑁆𑀢𑀺. 𑀑𑀓𑀸𑀲𑀤𑁆𑀯𑀬𑀲𑁆𑀲 𑀅𑀲𑀗𑁆𑀓𑀭𑀢𑁄 𑀕𑀳𑀡𑁂 𑀅𑀬𑀜𑁆𑀘 𑀕𑀼𑀡𑁄 𑀮𑀤𑁆𑀥𑁄 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑀼𑀁…𑀧𑁂… 𑀦 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻’’𑀢𑀺. 𑀢𑀢𑁆𑀣 𑀅𑀗𑁆𑀕𑀫𑀢𑁆𑀢𑀯𑀲𑁂𑀦𑀸𑀢𑀺 𑀯𑀺𑀢𑀓𑁆𑀓𑀸𑀤𑀺𑀛𑀸𑀦𑀗𑁆𑀕𑀫𑀢𑁆𑀢𑀯𑀲𑁂𑀦. 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀯𑀺𑀢𑀓𑁆𑀓𑀭𑀳𑀺𑀢𑁄𑀧𑀺 𑀯𑀺𑀘𑀸𑀭𑁄 𑀯𑀘𑀻𑀲𑀗𑁆𑀔𑀸𑀭𑁄𑀬𑁂𑀯𑀸𑀢𑀺 𑀆𑀳 ‘‘𑀅𑀯𑀺𑀢𑀓𑁆𑀓…𑀧𑁂… 𑀕𑀘𑁆𑀙𑀢𑀻’’𑀢𑀺. 𑀫𑀼𑀤𑁆𑀥𑀪𑀽𑀢𑀁 𑀤𑀼𑀢𑀺𑀬𑀚𑁆𑀛𑀸𑀦𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀫𑀸𑀳. 𑀢𑀜𑁆𑀳𑀺 𑀲𑀓𑀮𑀓𑁆𑀔𑁄𑀪𑀓𑀭𑀥𑀫𑁆𑀫𑀯𑀺𑀕𑀫𑁂𑀦 𑀯𑀺𑀢𑀓𑁆𑀓𑁂𑀓𑀗𑁆𑀕𑀧𑁆𑀧𑀳𑀸𑀬𑀺𑀓𑀢𑁄 𑀲𑀸𑀢𑀺𑀲𑀬𑀢𑁆𑀢𑀸 ‘‘𑀫𑀼𑀤𑁆𑀥𑀪𑀽𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸 𑀯𑀺𑀬𑀸𑀢𑀺 𑀇𑀤𑀁 𑀯𑀺𑀲𑀤𑀺𑀲𑀼𑀤𑀸𑀳𑀭𑀡𑀁 𑀤𑀝𑁆𑀞𑀩𑁆𑀩𑀁.

𑁩𑁭. 𑀆𑀯𑀚𑁆𑀚𑀦𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀁 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀏𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀞𑀫𑀢𑁄’’𑀢𑀺. 𑀢𑁂𑀦𑀸𑀳 ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀢𑁄’’𑀢𑀺𑀆𑀤𑀺. 𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀆𑀤𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑁂 𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀆𑀤𑀺𑀤𑀲𑁆𑀲𑀦𑀢𑁆𑀣𑀁. 𑀢𑀣𑀸 ‘‘𑀯𑀘𑀻𑀲𑀗𑁆𑀔𑀸𑀭𑀲𑁆𑀲 𑀆𑀤𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀏𑀢𑁆𑀣𑀸𑀧𑀺.

𑀧𑀯𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀼𑀲𑀬𑀬𑀫𑀓𑀁

𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧. ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀢𑀡𑁆𑀳𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀓𑀫𑁆𑀫𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄. 𑀮𑁄𑀪𑁄 𑀦𑀺𑀤𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀼𑀤𑀬𑀸𑀬𑀸’’𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀓𑀼𑀲𑀮𑀫𑀽𑀮𑀓𑀼𑀲𑀮𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀘𑁆𑀘𑀬𑀤𑀻𑀧𑀓𑁂𑀦 𑀫𑀽𑀮𑀬𑀫𑀓𑁂𑀦𑀸’’𑀢𑀺. ‘‘𑀲𑁄 ‘𑀅𑀦𑀺𑀘𑁆𑀘𑀁 𑀭𑀽𑀧𑀁, 𑀅𑀦𑀺𑀘𑁆𑀘𑀁 𑀭𑀽𑀧’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀘𑀓𑁆𑀔𑀼 𑀅𑀦𑀺𑀘𑁆𑀘𑀁, 𑀭𑀽𑀧𑀸 𑀅𑀦𑀺𑀘𑁆𑀘𑀸’’𑀢𑀺 𑀘 𑀆𑀤𑀺𑀦𑀸 𑀩𑀳𑀼𑀮𑀔𑀦𑁆𑀥𑀸𑀤𑀺𑀫𑀼𑀔𑁂𑀦 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀯𑀺𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀔𑀦𑁆𑀥𑀸𑀤𑀻𑀲𑀼 𑀢𑀻𑀭𑀡𑀩𑀸𑀳𑀼𑀮𑁆𑀮𑀢𑁄’’𑀢𑀺. 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀧𑀭𑀁 𑀧𑀳𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀅𑀦𑀼𑀲𑀬𑀧𑀳𑀸𑀦𑀦𑁆𑀢𑀸 𑀧𑀳𑀸𑀦𑀧𑀭𑀺𑀜𑁆𑀜𑀸’’𑀢𑀺. 𑀬𑀤𑀺𑀧𑀺 𑀅𑀦𑀼𑀲𑀬𑁂𑀳𑀺 𑀲𑀫𑁆𑀧𑀬𑁄𑀕𑀢𑁄 𑀆𑀭𑀫𑁆𑀫𑀡𑀢𑁄 𑀯𑀸 𑀧𑀳𑀸𑀦𑀧𑀭𑀺𑀜𑁆𑀜𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀅𑀦𑀼𑀲𑀬𑀸𑀪𑀸𑀯𑁂 𑀧𑀦 𑀢𑀤𑀸𑀭𑀫𑁆𑀪𑁄 𑀏𑀯 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀦𑀼𑀲𑀬𑁂𑀳𑀺 𑀧𑀳𑀸𑀦𑀧𑀭𑀺𑀜𑁆𑀜𑀁 𑀯𑀺𑀪𑀸𑀯𑁂𑀢𑀼’’𑀦𑁆𑀢𑀺. 𑀅𑀦𑀼𑀲𑀬𑀪𑀸𑀯𑁂𑀦 𑀮𑀩𑁆𑀪𑀫𑀸𑀦𑀸𑀦𑀦𑁆𑀢𑀺 𑀅𑀦𑀼𑀲𑀬𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀸𑀦𑀁, 𑀅𑀦𑀼𑀲𑀬𑀲𑀪𑀸𑀯𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀧𑀭𑀺𑀘𑁆𑀙𑁂𑀤𑀸𑀤𑀻𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺. 𑀅𑀦𑀼𑀲𑀬𑁂𑀲𑀼 𑀕𑀡𑀦𑀲𑀭𑀽𑀧𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁄 𑀅𑀩𑁄𑀥𑀺𑀢𑁂𑀲𑀼 𑀧𑀼𑀕𑁆𑀕𑀮𑁄𑀓𑀸𑀲𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀸 𑀢𑀩𑁆𑀩𑀺𑀲𑀬𑀸 𑀤𑁂𑀲𑀦𑀸 𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂𑀲𑀼 𑀢𑀣𑀸…𑀧𑁂… 𑀤𑀼𑀭𑀯𑀩𑁄𑀥𑀢𑁆𑀢𑀸’’𑀢𑀺.

𑀏𑀢𑁆𑀣 𑀧𑀼𑀭𑀺𑀫𑁂𑀲𑀽𑀢𑀺 𑀧𑀤𑀼𑀤𑁆𑀥𑀸𑀭𑁄 𑀅𑀦𑀦𑁆𑀢𑀭𑀲𑁆𑀲 𑀯𑀺𑀥𑀺 𑀧𑀝𑀺𑀲𑁂𑀥𑁄 𑀯𑀸𑀢𑀺 𑀓𑀢𑁆𑀯𑀸 𑀲𑀸𑀦𑀼𑀲𑀬𑀯𑀸𑀭𑀸𑀤𑀺𑀅𑀧𑁂𑀓𑁆𑀔𑁄, 𑀦 𑀅𑀦𑀼𑀲𑀬𑀯𑀸𑀭𑀸𑀤𑀺𑀅𑀧𑁂𑀓𑁆𑀔𑁄 𑀅𑀦𑀼𑀲𑀬𑀯𑀸𑀭𑁂 𑀧𑀸𑀴𑀺𑀯𑀯𑀢𑁆𑀣𑀸𑀦𑀲𑁆𑀲 𑀧𑀕𑁂𑀯 𑀓𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁂𑀲𑀼 𑀲𑀸𑀦𑀼𑀲𑀬𑀯𑀸𑀭𑀸𑀤𑀻𑀲𑀼 𑀧𑀼𑀭𑀺𑀫𑁂𑀲𑀽𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀲𑀸𑀦𑀼𑀲𑀬𑀯𑀸𑀭𑀸𑀤𑀻𑀲𑀼 𑀳𑀺 𑀢𑀻𑀲𑀼 𑀧𑀼𑀭𑀺𑀫𑁂𑀲𑀼 𑀑𑀓𑀸𑀲𑀯𑀸𑀭𑁂 𑀬𑀢𑁄 𑀢𑀢𑁄𑀢𑀺 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀦 𑀅𑀦𑀼𑀲𑀬𑀯𑀸𑀭𑀸𑀤𑀻𑀲𑀼. 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄𑀢𑀺 ‘‘𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁩𑁦𑁨) 𑀧𑀸𑀴𑀺𑀆𑀕𑀢𑀧𑀤𑀲𑁆𑀲, ‘‘𑀓𑀸𑀫𑀥𑀸𑀢𑀼𑀁 𑀯𑀸 𑀧𑀦 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀬𑀫𑀓𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀆𑀤𑀺𑀕𑀢𑀧𑀤𑀲𑁆𑀲 𑀘 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄. 𑀓𑀣𑀫𑀬𑀁 𑀬𑀫𑀓𑀤𑁂𑀲𑀦𑀸 𑀲𑀺𑀬𑀸 𑀤𑀼𑀢𑀺𑀬𑀲𑁆𑀲 𑀧𑀤𑀲𑁆𑀲 𑀅𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀬𑀤𑀺 𑀦𑀸𑀬𑀁 𑀬𑀫𑀓𑀤𑁂𑀲𑀦𑀸, 𑀅𑀣 𑀓𑀲𑁆𑀫𑀸 𑀇𑀥𑀸𑀕𑀢𑀸𑀢𑀺 𑀆𑀳 ‘‘𑀧𑀼𑀭𑀺𑀫𑀯𑀸𑀭𑁂 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀼𑀲𑀬𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀦𑁆𑀢𑀺 𑀅𑀦𑀼𑀲𑀬𑀝𑁆𑀞𑀸𑀦𑀢𑀸𑀬 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁. 𑀏𑀯𑀫𑁆𑀧𑀺 𑀓𑀣𑀫𑀺𑀤𑀁 𑀅𑀦𑀼𑀲𑀬𑀬𑀫𑀓𑀁 𑀬𑀫𑀓𑀤𑁂𑀲𑀦𑀸𑀲𑀩𑁆𑀪𑀸𑀯𑀢𑁄𑀢𑀺 𑀆𑀳 ‘‘𑀬𑀫𑀓𑀤𑁂𑀲𑀦𑀸…𑀧𑁂… 𑀦𑀸𑀫𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀅𑀢𑁆𑀣𑀯𑀲𑁂𑀦𑀸𑀢𑀺 𑀧𑀝𑀺𑀮𑁄𑀫𑀢𑁆𑀣𑀯𑀲𑁂𑀦. 𑀧𑀞𑀫𑀧𑀤𑁂𑀦 𑀳𑀺 𑀯𑀼𑀢𑁆𑀢𑀲𑁆𑀲 𑀯𑀺𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑀧𑀺 𑀬𑀫𑀓𑀤𑁂𑀲𑀦𑀸 𑀳𑁄𑀢𑀺 ‘‘𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀬𑀫. 𑁧.𑀔𑀦𑁆𑀥𑀬𑀫𑀓.𑁨), 𑀢𑀢𑁆𑀣 𑀧𑀦 𑀅𑀢𑁆𑀣𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀇𑀥 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑀣𑀸 𑀤𑁂𑀲𑀦𑀸 𑀓𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀢𑁄 𑀧𑀦 𑀦 𑀯𑀼𑀢𑁆𑀢𑀸’’𑀢𑀺. 𑀮𑀩𑁆𑀪𑀫𑀸𑀦𑀢𑀸𑀯𑀲𑁂𑀦𑀸𑀢𑀺 𑀧𑀼𑀘𑁆𑀙𑀸𑀬 𑀮𑀩𑁆𑀪𑀫𑀸𑀦𑀢𑀸𑀯𑀲𑁂𑀦.

𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀁 𑀤𑀲𑁆𑀲𑁂𑀢𑀻𑀢𑀺 𑀇𑀫𑀺𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀦𑀼𑀲𑀬𑀸 𑀅𑀦𑀸𑀕𑀢𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺 𑀬𑀢𑁄 𑀢𑁂 𑀫𑀕𑁆𑀕𑀯𑀚𑁆𑀛𑀸, 𑀦 𑀘 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀢𑁆𑀢𑀺𑀭𑀳𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀬𑀁𑀲𑀪𑀸𑀯𑀸 𑀧𑀦 𑀥𑀫𑁆𑀫𑀸 𑀅𑀦𑀸𑀕𑀢𑀸 𑀅𑀦𑀼𑀲𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀁𑀲𑀪𑀸𑀯𑀸 𑀏𑀯 𑀢𑁂 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀼𑀢𑁆𑀢𑀸. 𑀦 𑀳𑀺 𑀥𑀫𑁆𑀫𑀸𑀦𑀁 𑀅𑀤𑁆𑀥𑀸𑀪𑁂𑀤𑁂𑀦 𑀲𑀪𑀸𑀯𑀪𑁂𑀤𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀦𑀼𑀲𑀬𑀸𑀦𑀁 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑀸 𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀬𑀫. 𑀅𑀝𑁆𑀞. 𑀅𑀦𑀼𑀲𑀬𑀬𑀫𑀓 𑁧) ‘‘𑀅𑀢𑀻𑀢𑁄𑀧𑀺 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁𑀧𑀓𑀸𑀭𑀸𑀢𑀺 𑀅𑀦𑀼𑀲𑀬𑀧𑁆𑀧𑀓𑀸𑀭𑀸, 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀲𑁄 𑀏𑀯𑀁𑀧𑀓𑀸𑀭𑁄 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑁂𑀦 𑀕𑀳𑀺𑀢𑁄 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀸𑀬 𑀅𑀯𑀺𑀘𑁆𑀙𑀺𑀦𑁆𑀦𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀦 𑀔𑀦𑁆𑀥𑀬𑀫𑀓𑀸𑀤𑀻𑀲𑀼 𑀯𑀺𑀬 𑀉𑀧𑁆𑀧𑀚𑁆𑀚𑀫𑀸𑀦𑀢𑀸’’𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀭𑁄𑀢𑀺. 𑀢𑀢𑁆𑀣 𑀦𑀺𑀦𑁆𑀦𑀸𑀦𑀸𑀓𑀭𑀡𑁄𑀢𑀺 𑀦𑀺𑀩𑁆𑀩𑀺𑀲𑁂𑀲𑁄. 𑀉𑀧𑁆𑀧𑀚𑁆𑀚𑀦𑀸𑀦𑀼𑀲𑀬𑀸𑀦𑀁 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑁆𑀢𑀸 𑀏𑀯 𑀳𑀺 ‘‘𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’’𑀢𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁨𑁦𑁩) 𑀆𑀕𑀢𑀁. 𑀅𑀦𑀼𑀲𑀬𑀦𑀜𑁆𑀳𑀺 𑀏𑀢𑁆𑀣 𑀦𑀺𑀯𑀺𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀇𑀤𑀸𑀦𑀺 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀅𑀦𑀼𑀲𑀬𑀯𑁄𑀳𑀸𑀭𑁄, 𑀢𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀅𑀦𑀸𑀕𑀢𑀫𑁆𑀧𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀧𑀦…𑀧𑁂… 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀆𑀳. 𑀏𑀢𑁂𑀦 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀉𑀧𑁆𑀧𑀢𑁆𑀢𑀺𑀭𑀳𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀸 𑀦𑀸𑀫 𑀓𑀺𑀮𑁂𑀲𑀸𑀦𑀁 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀅𑀢𑁆𑀣𑁂𑀯𑀸𑀢𑀺 𑀧𑀓𑀸𑀭𑀦𑁆𑀢𑀭𑁂𑀦𑀧𑀺 𑀢𑁂𑀲𑀁 𑀧𑀭𑀺𑀬𑀸𑀬𑀢𑁄𑀯 𑀅𑀦𑀼𑀲𑀬𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀫𑀕𑁆𑀕𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀢𑀸𑀤𑀺𑀲𑀸𑀦𑀦𑁆𑀢𑀺 𑀬𑁂 𑀫𑀕𑁆𑀕𑀪𑀸𑀯𑀦𑀸𑀬 𑀅𑀲𑀢𑀺 𑀉𑀧𑁆𑀧𑀢𑁆𑀢𑀺𑀭𑀳𑀸, 𑀢𑀸𑀤𑀺𑀲𑀸𑀦𑀁. 𑀥𑀫𑁆𑀫𑁄 𑀏𑀯 𑀘 𑀉𑀧𑁆𑀧𑀚𑁆𑀚𑀢𑀺, 𑀦 𑀥𑀫𑁆𑀫𑀸𑀓𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀥𑀫𑁆𑀫𑀸𑀓𑀸𑀭𑀸 𑀅𑀦𑀺𑀘𑁆𑀘𑀢𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀺 𑀧𑀦 𑀢𑁂 𑀉𑀧𑁆𑀧𑀸𑀤𑀸𑀤𑀺𑀲𑀫𑀗𑁆𑀕𑀺𑀦𑁄 𑀲𑀺𑀬𑀼𑀁, 𑀥𑀫𑁆𑀫𑀸 𑀏𑀯 𑀲𑀺𑀬𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀳𑀻𑀦𑀸𑀓𑀸𑀭𑁄 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀻’’𑀢𑀺.

𑀯𑀼𑀢𑁆𑀢𑀫𑁆𑀧𑀺 𑀣𑀸𑀫𑀕𑀫𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀳𑀻𑀦𑀝𑁆𑀞𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀘𑁄𑀤𑀓𑁄 𑀘𑁄𑀤𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀢𑁆𑀢𑀸𑀦𑀼𑀲𑀬…𑀧𑁂… 𑀆𑀧𑀚𑁆𑀚𑀢𑀻𑀢𑀺 𑀘𑁂’’𑀢𑀺. 𑀦 𑀳𑀺 𑀣𑀸𑀫𑀕𑀫𑀦𑁂 𑀕𑀳𑀺𑀢𑁂 𑀘𑁄𑀤𑀦𑀸𑀬 𑀑𑀓𑀸𑀲𑁄 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀦𑀸𑀧𑀚𑁆𑀚𑀢𑀻’’𑀢𑀺𑀆𑀤𑀺. 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁, 𑀦 𑀓𑁂𑀯𑀮𑀫𑀝𑁆𑀞𑀓𑀣𑀸𑀬𑀫𑁂𑀯 𑀧𑀸𑀞𑀕𑀢𑁄𑀯𑀸𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀏𑀯𑀫𑁂𑀯 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀣𑀸𑀫𑀕𑀢𑁄…𑀧𑁂… 𑀬𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀓𑀺𑀁 𑀧𑀦 𑀢𑀁 𑀣𑀸𑀫𑀕𑀫𑀦𑀦𑁆𑀢𑀺 𑀧𑀭𑀸𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀣𑀸𑀫𑀕𑀢𑀦𑁆𑀢𑀺 𑀘…𑀧𑁂… 𑀯𑀼𑀢𑁆𑀢𑀸’’𑀢𑀺 𑀆𑀳. 𑀢𑀢𑁆𑀣 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑁄𑀢𑀺 𑀓𑀺𑀮𑁂𑀲𑀯𑀢𑁆𑀣𑀼𑀆𑀤𑀻𑀦𑀁 𑀓𑀺𑀮𑁂𑀲𑀢𑀸𑀤𑀺𑀲𑀪𑀸𑀯𑁄 𑀯𑀺𑀬 𑀓𑀸𑀫𑀭𑀸𑀕𑀸𑀤𑀺𑀢𑁄 𑀅𑀜𑁆𑀜𑀢𑁆𑀣 𑀅𑀮𑀩𑁆𑀪𑀫𑀸𑀦𑁄 𑀢𑁂𑀲𑀁𑀬𑁂𑀯 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄, 𑀬𑀢𑁄 𑀢𑁂 𑀪𑀯𑀩𑀻𑀚𑀁 𑀪𑀯𑀫𑀽𑀮𑀦𑁆𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀬𑀲𑁆𑀫𑀸 𑀘 𑀣𑀸𑀫𑀕𑀫𑀦𑀁 𑀢𑁂𑀲𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀪𑀸𑀯𑁄, 𑀢𑀲𑁆𑀫𑀸 𑀅𑀦𑀼𑀲𑀬𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀣𑀸𑀫𑀕𑀢𑁄𑀢𑀺 𑀅𑀦𑀼𑀲𑀬𑀲𑀫𑀗𑁆𑀕𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳.

‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁩) 𑀅𑀦𑀼𑀲𑀬𑀯𑀸𑀭𑁂 𑀯𑀼𑀢𑁆𑀢𑁄 𑀏𑀯 𑀅𑀢𑁆𑀣𑁄 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁩𑁦𑁦) 𑀯𑀼𑀢𑁆𑀢𑁄𑀢𑀺 𑀅𑀦𑀼𑀲𑀬𑀦𑀸𑀓𑀸𑀭𑁄 𑀏𑀯 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑁂𑀦 𑀕𑀳𑀺𑀢𑁄𑀢𑀺 ‘‘𑀉𑀧𑁆𑀧𑀚𑁆𑀚𑀦𑀯𑀸𑀭𑁄 𑀅𑀦𑀼𑀲𑀬𑀯𑀸𑀭𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑁄 𑀯𑀺𑀪𑀢𑁆𑀢𑁄’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀯𑀺𑀘𑀸𑀭𑀁 𑀆𑀭𑀪𑀢𑀺 ‘‘𑀅𑀦𑀼𑀲𑀬𑀉𑀧𑁆𑀧𑀚𑁆𑀚𑀦𑀯𑀸𑀭𑀸𑀦𑀁 𑀲𑀫𑀸𑀦𑀕𑀢𑀺𑀓𑀢𑁆𑀢𑀸’’𑀢𑀺𑀆𑀤𑀺𑀦𑀸. ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀲𑀺𑀬𑀸𑀢𑀺 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀅𑀧𑁆𑀧𑀳𑀻𑀦𑀸𑀓𑀸𑀭𑀤𑀻𑀧𑀓𑀁 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀬𑀣𑀸 ‘‘𑀇𑀫𑀲𑁆𑀲 𑀉𑀧𑁆𑀧𑀸𑀤𑀸’’𑀢𑀺 𑀏𑀢𑁆𑀣 𑀇𑀫𑀲𑁆𑀲 𑀅𑀦𑀺𑀭𑁄𑀥𑀸𑀢𑀺 𑀅𑀬𑀫𑀢𑁆𑀣𑁄𑀧𑀺 𑀜𑀸𑀬𑀢𑀺, 𑀏𑀯𑀁 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀣𑀢𑁄 ‘‘𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺 𑀅𑀧𑁆𑀧𑀳𑀻𑀦𑀸𑀓𑀸𑀭𑀲𑁆𑀲 𑀉𑀧𑁆𑀧𑀢𑁆𑀢𑀺𑀭𑀳𑀪𑀸𑀯𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀲𑀪𑀸𑀯𑀢𑁆𑀢𑀸𑀢𑀺 𑀘𑁄𑀤𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀘𑀦𑀲𑁆𑀲 𑀅𑀯𑀼𑀢𑁆𑀢𑀢𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀘𑁂’’𑀢𑀺 𑀆𑀳. 𑀯𑀘𑀦𑀢𑁆𑀣𑀯𑀺𑀲𑁂𑀲𑁂𑀦 𑀢𑀁𑀤𑁆𑀯𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀏𑀢𑁂𑀦 𑀥𑀫𑁆𑀫𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀧𑀤𑀢𑁆𑀣𑀦𑀸𑀦𑀢𑁆𑀣𑁂𑀦 𑀯𑀸𑀭𑀦𑁆𑀢𑀭𑀤𑁂𑀲𑀦𑀸 𑀳𑁄𑀢𑀺 𑀬𑀣𑀸 𑀲𑀳𑀚𑀸𑀢𑀲𑀁𑀲𑀝𑁆𑀞𑀯𑀸𑀭𑁂𑀲𑀽𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸𑀢𑀺𑀆𑀤𑀺 𑀢𑀫𑁂𑀯 𑀯𑀘𑀦𑀢𑁆𑀣𑀯𑀺𑀲𑁂𑀲𑀁 𑀯𑀺𑀪𑀸𑀯𑁂𑀢𑀼𑀁 𑀆𑀭𑀤𑁆𑀥𑀁. 𑀉𑀧𑁆𑀧𑀢𑁆𑀢𑀺𑀬𑁄𑀕𑁆𑀕𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀬𑀸 𑀬𑁄𑀕𑁆𑀕𑀁, 𑀉𑀧𑁆𑀧𑀚𑁆𑀚𑀦𑀲𑀪𑀸𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁄 𑀅𑀦𑀼𑀲𑀬𑀸 𑀉𑀧𑁆𑀧𑀢𑁆𑀢𑀺𑀭𑀳𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀓𑀦𑁆𑀢𑁂𑀦 𑀘𑁂𑀢𑀤𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁 ‘‘𑀬𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀬𑀫. 𑁨.𑀅𑀦𑀼𑀲𑀬𑀬𑀫𑀓.𑁩𑁦𑁦). ‘‘𑀅𑀦𑀼𑀲𑁂𑀦𑁆𑀢𑀻𑀢𑀺 𑀅𑀦𑀼𑀲𑀬𑀸’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀲𑀤𑀸 𑀯𑀺𑀚𑁆𑀚𑀫𑀸𑀦𑀸 𑀦𑀼 𑀔𑁄 𑀢𑁂 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀦𑀼𑀲𑀬𑀦𑀝𑁆𑀞𑁂𑀦 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀆𑀧𑀚𑁆𑀚𑀢𑀻𑀢𑀺 𑀢𑀁𑀦𑀺𑀲𑁂𑀥𑀦𑀢𑁆𑀣𑀁 ‘‘𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀢𑁆𑀢𑀺𑀅𑀭𑀳𑀪𑀸𑀯𑁂𑀦 𑀣𑀸𑀫𑀕𑀢𑀢𑀸 𑀅𑀦𑀼𑀲𑀬𑀝𑁆𑀞𑁄𑀢𑀺 𑀬𑀁 𑀢𑁂𑀲𑀁 𑀉𑀧𑁆𑀧𑀢𑁆𑀢𑀺𑀬𑁄𑀕𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀁 𑀲𑀫𑁆𑀫𑀤𑁂𑀯 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀅𑀦𑀼𑀲𑀬𑀲𑀤𑁆𑀤𑀲𑁆𑀲𑀸’’𑀢𑀺𑀆𑀤𑀺𑀦𑀸. 𑀢𑁂𑀦 𑀯𑀸𑀭𑀤𑁆𑀯𑀬𑀤𑁂𑀲𑀦𑀼𑀧𑁆𑀧𑀸𑀤𑀺𑀓𑀸 𑀅𑀦𑀼𑀲𑀬𑀲𑀤𑁆𑀤𑀢𑁆𑀣𑀦𑀺𑀤𑁆𑀥𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀫𑁂𑀯 𑀇𑀫𑀺𑀦𑀸 𑀢𑀦𑁆𑀢𑀺𑀧𑁆𑀧𑀫𑀸𑀡𑁂𑀦𑀸𑀢𑀺 𑀇𑀤𑀫𑁆𑀧𑀺 ‘‘𑀅𑀪𑀺𑀥𑀫𑁆𑀫𑁂 𑀢𑀸𑀯𑀸’’𑀢𑀺𑀆𑀤𑀺𑀦𑀸 𑀆𑀕𑀢𑀁 𑀢𑀺𑀯𑀺𑀥𑀫𑁂𑀯 𑀢𑀦𑁆𑀢𑀺𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀦𑁆𑀢𑀺𑀢𑁆𑀢𑀬𑁂𑀦𑀧𑀺 𑀳𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻’’𑀢𑀺.

𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀼𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸

𑁨. 𑀏𑀯𑀁 𑀲𑀢𑀻𑀢𑀺 𑀯𑁂𑀤𑀦𑀸𑀦𑀁 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂 𑀓𑀸𑀫𑀥𑀸𑀢𑀼𑀬𑀸 𑀘 𑀯𑀺𑀲𑁂𑀲𑀦𑀪𑀸𑀯𑁂 𑀲𑀢𑀺. 𑀓𑀸𑀫𑀸𑀥𑀸𑀢𑀼𑀬𑀸 𑀅𑀦𑀼𑀲𑀬𑀦𑀝𑁆𑀞𑀸𑀦𑀢𑀸 𑀦 𑀯𑀼𑀢𑁆𑀢𑀸 𑀳𑁄𑀢𑀺 𑀅𑀧𑁆𑀧𑀥𑀸𑀦𑀪𑀸𑀯𑀢𑁄, 𑀧𑀥𑀸𑀦𑀸𑀧𑁆𑀧𑀥𑀸𑀦𑁂𑀲𑀼 𑀧𑀥𑀸𑀦𑁂 𑀓𑀺𑀘𑁆𑀘𑀤𑀲𑁆𑀲𑀦𑀢𑁄, 𑀯𑀺𑀲𑁂𑀲𑀦𑀪𑀸𑀯𑁂𑀦 𑀘𑀭𑀺𑀢𑀩𑁆𑀩𑀢𑀸𑀬 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁄𑀢𑀼 𑀓𑁄 𑀤𑁄𑀲𑁄𑀢𑀺 𑀓𑀤𑀸𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀫𑀸𑀦𑁄 𑀆𑀳 ‘‘𑀤𑁆𑀯𑀻𑀲𑀼 𑀧𑀦𑀸’’𑀢𑀺𑀆𑀤𑀺. 𑀤𑁆𑀯𑀻𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, 𑀢𑀣𑀸 ‘‘𑀢𑀻𑀲𑀼 𑀥𑀸𑀢𑀽𑀲𑀽’’𑀢𑀺 𑀏𑀢𑁆𑀣𑀸𑀧𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀥𑀸𑀢𑀼𑀆𑀤𑀺𑀪𑁂𑀤𑁂𑀦 𑀢𑀺𑀯𑀺𑀥𑀁 𑀅𑀦𑀼𑀲𑀬𑀝𑁆𑀞𑀸𑀦𑀁, 𑀢𑀢𑁆𑀣 𑀘 𑀭𑀽𑀧𑀸𑀭𑀽𑀧𑀥𑀸𑀢𑀽𑀦𑀁 𑀪𑀯𑀭𑀸𑀕𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸𑀢𑀺 𑀓𑀸𑀫𑀥𑀸𑀢𑀼𑀬𑀸 𑀓𑀸𑀫𑀭𑀸𑀕𑀲𑁆𑀲 𑀅𑀦𑀼𑀲𑀬𑀝𑁆𑀞𑀸𑀦𑀢𑀸 𑀏𑀓𑀦𑁆𑀢𑁂𑀦 𑀯𑀢𑁆𑀢𑀩𑁆𑀩𑀸, 𑀢𑀲𑁆𑀫𑀸. 𑀢𑀻𑀲𑀼 𑀥𑀸𑀢𑀽𑀲𑀼 𑀢𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀘 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁, 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀘 𑀆𑀥𑀸𑀭𑁂.

𑀤𑁆𑀯𑀻𑀲𑁆𑀯𑁂𑀯𑀸𑀢𑀺 𑀤𑁆𑀯𑀻𑀲𑀼 𑀲𑀼𑀔𑁄𑀧𑁂𑀓𑁆𑀔𑀸𑀲𑀼 𑀏𑀯. 𑀲𑀩𑁆𑀩𑀸𑀲𑀼 𑀤𑁆𑀯𑀻𑀲𑀽𑀢𑀺 𑀬𑀸𑀲𑀼 𑀓𑀸𑀲𑀼𑀘𑀺 𑀤𑁆𑀯𑀻𑀲𑀼. 𑀢𑁂𑀦𑀸𑀢𑀺 ‘‘𑀓𑀸𑀫𑀭𑀸𑀕𑁄 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑁂𑀢𑀻’’𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑁂𑀦 𑀯𑀺𑀲𑁂𑀲𑀦𑀺𑀘𑁆𑀙𑀬𑁂𑀦𑁂𑀯. 𑀪𑀯𑀭𑀸𑀕𑀸𑀦𑀼𑀲𑀬𑀝𑁆𑀞𑀸𑀦𑀁 𑀭𑀽𑀧𑀸𑀭𑀽𑀧𑀥𑀸𑀢𑀼𑀬𑁄 𑀢𑀤𑀦𑀼𑀭𑀽𑀧𑀸 𑀘 𑀯𑁂𑀤𑀦𑀸. 𑀦 𑀳𑀺 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀯 𑀅𑀦𑀼𑀲𑁂𑀢𑀻𑀢𑀺 𑀅𑀯𑀥𑀸𑀭𑀡𑀁 𑀇𑀘𑁆𑀙𑀺𑀢𑀁, 𑀤𑁆𑀯𑀻𑀲𑀼 𑀏𑀯 𑀧𑀦 𑀯𑁂𑀤𑀦𑀸𑀲𑀽𑀢𑀺 𑀇𑀘𑁆𑀙𑀺𑀢𑀁. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑀻𑀲𑁆𑀯𑁂𑀯 𑀅𑀦𑀼𑀲𑁂𑀢𑀺, 𑀦 𑀢𑀻𑀲𑀽’’𑀢𑀺. 𑀅𑀝𑁆𑀞𑀸𑀦𑀜𑁆𑀘 𑀅𑀦𑀼𑀲𑀬𑀸𑀦𑀁, 𑀓𑀺𑀁 𑀢𑀁 𑀅𑀧𑀭𑀺𑀬𑀸𑀧𑀦𑁆𑀦𑀁 𑀲𑀓𑁆𑀓𑀸𑀬𑁂? 𑀲𑀩𑁆𑀩𑁄 𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄. 𑀘-𑀲𑀤𑁆𑀤𑁂𑀦 𑀧𑀝𑀺𑀖𑀸𑀦𑀼𑀲𑀬𑀝𑁆𑀞𑀸𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸 𑀘𑀸’’𑀢𑀺𑀆𑀤𑀺. 𑀅𑀜𑁆𑀜𑀸𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀝𑁆𑀞𑀸𑀦𑀪𑀽𑀢𑀸 𑀤𑁆𑀯𑁂 𑀯𑁂𑀤𑀦𑀸.

𑀅𑀜𑁆𑀜𑁂𑀲𑀼 𑀤𑁆𑀯𑀻𑀳𑀺 𑀯𑁂𑀤𑀦𑀸𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼. 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀲𑀽𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀫𑀥𑀼𑀭𑀲𑀪𑀸𑀯𑁂𑀲𑀼. 𑀯𑀺𑀲𑁂𑀲𑀦𑀜𑁆𑀘𑁂𑀢𑀁 𑀭𑀽𑀧𑀸𑀤𑀻𑀦𑀁 𑀲𑀩𑁆𑀩𑀤𑁆𑀯𑀸𑀭𑀲𑀩𑁆𑀩𑀧𑀼𑀭𑀺𑀲𑁂𑀲𑀼 𑀇𑀝𑁆𑀞𑀪𑀸𑀯𑀲𑁆𑀲 𑀅𑀦𑀺𑀬𑀢𑀢𑀸𑀬 𑀓𑀢𑀁. 𑀲𑀸𑀢𑀲𑀦𑁆𑀢𑀲𑀼𑀔𑀕𑀺𑀤𑁆𑀥𑀺𑀬𑀸𑀢𑀺 𑀲𑀸𑀢𑀲𑀼𑀔𑁂 𑀲𑀦𑁆𑀢𑀲𑀼𑀔𑁂 𑀘 𑀕𑀺𑀚𑁆𑀛𑀦𑀸𑀓𑀸𑀭𑁂𑀦 𑀅𑀪𑀺𑀓𑀗𑁆𑀔𑀦𑀸𑀓𑀸𑀭𑁂𑀦. 𑀢𑀢𑁆𑀣 𑀲𑀸𑀢𑀲𑀼𑀔𑀁 𑀓𑀸𑀬𑀺𑀓𑀁, 𑀲𑀦𑁆𑀢𑀲𑀼𑀔𑀁 𑀘𑁂𑀢𑀲𑀺𑀓𑀁. 𑀲𑀸𑀢𑀲𑀼𑀔𑀁 𑀯𑀸 𑀓𑀸𑀬𑀺𑀓𑀲𑀼𑀔𑀁, 𑀲𑀦𑁆𑀢𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀼𑀔𑀁. 𑀢𑀣𑀸 𑀘𑀸𑀳𑀼 ‘‘𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁪; 𑀫𑀳𑀸𑀦𑀺. 𑀅𑀝𑁆𑀞. 𑁨𑁭). 𑀧𑀭𑀺𑀢𑁆𑀢𑀁 𑀯𑀸 𑀑𑀴𑀸𑀭𑀺𑀓𑀁 𑀲𑀼𑀔𑀁 𑀲𑀸𑀢𑀲𑀼𑀔𑀁, 𑀅𑀦𑁄𑀴𑀸𑀭𑀺𑀓𑀁 𑀲𑀦𑁆𑀢𑀲𑀼𑀔𑀁. 𑀧𑀭𑀺𑀢𑁆𑀢𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀜𑁆𑀜𑀢𑁆𑀣𑀸𑀢𑀺 𑀯𑁂𑀤𑀦𑀸𑀳𑀺 𑀅𑀜𑁆𑀜𑀢𑁆𑀣. 𑀲𑁄𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀯𑁂𑀤𑀦𑀸𑀲𑀼 𑀅𑀦𑀼𑀕𑀢𑁄 𑀳𑀼𑀢𑁆𑀯𑀸 𑀲𑁂𑀢𑀻𑀢𑀺 𑀯𑁂𑀤𑀦𑀸𑀧𑁂𑀓𑁆𑀔𑁄 𑀏𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 𑀧𑀼𑀢𑁆𑀢𑀸𑀧𑁂𑀓𑁆𑀔𑀸𑀬 𑀥𑀸𑀢𑀺𑀬𑀸 𑀅𑀦𑀼𑀕𑁆𑀕𑀡𑁆𑀳𑀦𑀧𑁆𑀧𑀯𑀢𑁆𑀢𑀺, 𑀲𑀬𑀦𑀲𑀗𑁆𑀔𑀸𑀢𑀸 𑀧𑀯𑀢𑁆𑀢𑀺 𑀘 𑀓𑀸𑀫𑀭𑀸𑀕𑀲𑁆𑀲 𑀦𑀺𑀓𑀸𑀫𑀦𑀫𑁂𑀯. 𑀢𑁂𑀦𑀸𑀳 ‘‘𑀲𑀼𑀔𑀫𑀺𑀘𑁆𑀘𑁂𑀯 𑀅𑀪𑀺𑀮𑀧𑀢𑀻’’𑀢𑀺. 𑀬𑀣𑀸 𑀢𑀲𑁆𑀲, 𑀏𑀯𑀁 𑀧𑀝𑀺𑀖𑀸𑀦𑀼𑀲𑀬𑀸𑀤𑀻𑀦𑀫𑁆𑀧𑀺 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀬𑀣𑀸𑀲𑀓𑀁 𑀓𑀺𑀘𑁆𑀘𑀓𑀭𑀡𑀫𑁂𑀯 𑀤𑀼𑀓𑁆𑀔𑀯𑁂𑀤𑀦𑀸𑀤𑀻𑀲𑀼 𑀅𑀦𑀼𑀲𑀬𑀦𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀧𑀝𑀺𑀖𑀸𑀦𑀼𑀲𑀬𑁄 𑀘𑀸’’𑀢𑀺𑀆𑀤𑀺. 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑀬𑀦𑀯𑀘𑀦𑁂𑀦𑀸𑀢𑀺 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀬𑀣𑀸𑀭𑀳𑀁 𑀅𑀦𑀼𑀲𑀬𑀦𑀯𑀘𑀦𑁂𑀦. 𑀇𑀝𑁆𑀞𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑁂𑀲𑀽𑀢𑀺 𑀇𑀝𑁆𑀞𑀸𑀤𑀻𑀲𑀼 𑀆𑀭𑀫𑁆𑀫𑀡𑀧𑀓𑀢𑀺𑀬𑀸 𑀯𑀲𑁂𑀦 𑀇𑀝𑁆𑀞𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑁂𑀲𑀼 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀯𑀲𑁂𑀦 𑀅𑀦𑀺𑀝𑁆𑀞𑀸𑀤𑀻𑀲𑀼 𑀇𑀝𑁆𑀞𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑁂𑀲𑀽𑀢𑀺 𑀬𑁄𑀚𑀦𑀸. 𑀦 𑀳𑀺 𑀇𑀝𑁆𑀞𑀸𑀤𑀺𑀪𑀸𑀯𑁂𑀦 𑀕𑀳𑀡𑀁 𑀯𑀺𑀧𑀭𑀻𑀢𑀲𑀜𑁆𑀜𑀸.

𑀢𑀢𑁆𑀣𑀸𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀸𑀤𑀻𑀲𑀼. 𑀏𑀢𑁆𑀣𑀸𑀢𑀺 𑀅𑀦𑀼𑀲𑀬𑀦𑁂. 𑀓𑀸𑀫𑀲𑁆𑀲𑀸𑀤𑀸𑀤𑀺𑀯𑀢𑁆𑀣𑀼𑀪𑀽𑀢𑀸𑀦𑀁 𑀓𑀸𑀫𑀪𑀯𑀸𑀤𑀻𑀦𑀦𑁆𑀢𑀺 𑀓𑀸𑀫𑀲𑁆𑀲𑀸𑀤𑀪𑀯𑀲𑁆𑀲𑀸𑀤𑀯𑀢𑁆𑀣𑀼𑀪𑀽𑀢𑀸𑀦𑀁 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀯𑁂𑀤𑀦𑀸𑀢𑁆𑀢𑀬𑀥𑀸𑀢𑀼𑀢𑁆𑀢𑀬𑁂𑀲𑀼. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀤𑀼𑀓𑁆𑀔𑀧𑀝𑀺𑀖𑀸𑀢𑁄 𑀤𑀼𑀓𑁆𑀔𑁂 𑀅𑀦𑀪𑀺𑀭𑀢𑀺. 𑀬𑀢𑁆𑀣 𑀢𑀢𑁆𑀣𑀸𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀦𑀺𑀝𑁆𑀞𑀭𑀽𑀧𑀸𑀤𑀻𑀲𑀼 𑀯𑀸𑀢𑀺 𑀬𑀢𑁆𑀣 𑀢𑀢𑁆𑀣. 𑀫𑀳𑀕𑁆𑀕𑀢𑀸 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸 𑀭𑀽𑀧𑀸𑀭𑀽𑀧𑀪𑀯𑀸, 𑀅𑀦𑀼𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸. 𑀢𑀢𑁆𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀪𑀯𑀭𑀸𑀕𑁄𑀇𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻’’𑀢𑀺. 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀅𑀯𑀺𑀚𑁆𑀚𑀸𑀦𑀼𑀲𑀬𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀁 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀁 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀧𑀼𑀘𑁆𑀙𑀸𑀬𑀁 ‘‘𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼’’𑀇𑀘𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸. 𑀓𑀸𑀫𑀭𑀸𑀕𑁄 𑀧𑀦 𑀬𑀢𑁆𑀣 𑀦𑀸𑀦𑀼𑀲𑁂𑀢𑀺, 𑀢𑀁 𑀤𑀼𑀓𑁆𑀔𑀯𑁂𑀤𑀦𑀸𑀭𑀽𑀧𑀸𑀭𑀽𑀧𑀥𑀸𑀢𑀼𑀯𑀺𑀦𑀺𑀫𑀼𑀢𑁆𑀢𑀁 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀦𑀼 𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀤𑀦𑀼𑀲𑀬𑀦𑀝𑁆𑀞𑀸𑀦𑀢𑁄𑀢𑀺 𑀢𑀲𑁆𑀲 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀢𑁄. 𑀅𑀜𑁆𑀜𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑁂 𑀯𑀺𑀬 𑀧𑀝𑀺𑀖𑀸𑀦𑀼𑀲𑀬𑁄 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀼 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻𑀢𑀺 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀢𑀲𑁆𑀫𑀸 𑀢𑀁 𑀉𑀤𑁆𑀥𑀭𑀺𑀢𑁆𑀯𑀸 𑀦 𑀯𑀼𑀢𑁆𑀢𑀦𑁆𑀢𑀺. 𑀳𑁄𑀦𑁆𑀢𑀽𑀢𑀺 𑀢𑀸𑀲𑀁 𑀯𑁂𑀤𑀦𑀸𑀦𑀁 𑀅𑀢𑁆𑀣𑀺𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀅𑀯𑀘𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀧𑀦…𑀧𑁂… 𑀢𑀁 𑀦 𑀯𑀼𑀢𑁆𑀢’’𑀦𑁆𑀢𑀺. 𑀢𑀤𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀢𑀺𑀧𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀦𑀝𑁆𑀞𑀸𑀦𑀢𑁄 𑀅𑀜𑁆𑀜𑀲𑁆𑀫𑀺𑀁 𑀤𑀺𑀝𑁆𑀞𑀸𑀦𑀼𑀲𑀬𑀸𑀤𑀻𑀦𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑁂 𑀢𑀁 𑀧𑀦 𑀥𑀸𑀢𑀼𑀢𑁆𑀢𑀬𑀯𑁂𑀤𑀦𑀸𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀯𑁂𑀤𑀦𑀸𑀤𑁆𑀯𑀬𑀪𑀸𑀯𑀢𑁄, 𑀢𑀲𑁆𑀫𑀸. 𑀢𑀁 𑀯𑁂𑀤𑀦𑀸𑀤𑁆𑀯𑀬𑀁 𑀦 𑀯𑀼𑀢𑁆𑀢𑀁 𑀯𑀺𑀲𑀼𑀁 𑀦 𑀉𑀤𑁆𑀥𑀝𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀤𑀬𑁄 𑀦𑀸𑀦𑀼𑀲𑁂𑀦𑁆𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀦𑀸𑀦𑀼𑀲𑁂𑀦𑁆𑀢𑀻’’𑀢𑀺 𑀅𑀬𑀫𑀢𑁆𑀣𑁄 ‘‘𑀆𑀫𑀦𑁆𑀢𑀸’’𑀢𑀺 𑀇𑀫𑀺𑀦𑀸 𑀧𑀝𑀺𑀯𑀘𑀦𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀯𑀺𑀪𑀸𑀕𑀢𑁄 𑀯𑀼𑀢𑁆𑀢𑁄𑀢𑀺 ‘‘𑀬𑀢𑁆𑀣 𑀓𑀸𑀫𑀭𑀸𑀕𑀸𑀤𑀬𑁄 𑀅𑀦𑀼𑀲𑁂𑀦𑁆𑀢𑀺, 𑀢𑀢𑁆𑀣 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸 𑀅𑀦𑀼𑀲𑁂𑀦𑁆𑀢𑀻’’𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀅𑀯𑀺𑀪𑀸𑀕𑀢𑁄𑀯 𑀮𑀩𑁆𑀪𑀢𑀺, 𑀢𑀲𑁆𑀫𑀸. 𑀅𑀯𑀺𑀪𑀸𑀕𑀢𑁄 𑀘 𑀤𑀼𑀓𑁆𑀔𑀁 𑀧𑀝𑀺𑀖𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀯𑀺𑀲𑁂𑀲𑁂𑀦…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣 𑀅𑀯𑀺𑀲𑁂𑀲𑁂𑀦𑀸𑀢𑀺 𑀕𑁂𑀳𑀲𑁆𑀲𑀺𑀢𑀁 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀦𑁆𑀢𑀺 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸. 𑀲𑀫𑀼𑀤𑀸𑀬𑀯𑀲𑁂𑀦 𑀕𑀳𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀅𑀯𑀬𑀯𑀸𑀦𑀁 𑀲𑀫𑀽𑀳𑀯𑀲𑁂𑀦 𑀤𑀼𑀓𑁆𑀔𑀦𑁆𑀢𑁆𑀯𑁂𑀯 𑀕𑀳𑁂𑀢𑁆𑀯𑀸. ‘‘𑀅𑀯𑀺𑀲𑁂𑀲𑁂𑀦 𑀲𑀫𑀼𑀤𑀸𑀬𑀯𑀲𑁂𑀦 𑀕𑀳𑁂𑀢𑁆𑀯𑀸’’𑀢𑀺 𑀇𑀫𑀫𑀢𑁆𑀣𑀁 𑀢𑀣𑀸-𑀲𑀤𑁆𑀤𑁂𑀦 𑀅𑀦𑀼𑀓𑀟𑁆𑀠𑀢𑀺 ‘‘𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽’’𑀢𑀺 𑀏𑀢𑁆𑀣𑀸𑀧𑀺 𑀕𑁂𑀳𑀲𑁆𑀲𑀺𑀢𑀸𑀤𑀺𑀯𑀺𑀪𑀸𑀕𑀲𑁆𑀲 𑀅𑀦𑀺𑀘𑁆𑀙𑀺𑀢𑀢𑁆𑀢𑀸.

𑀬𑀤𑀺 𑀏𑀯𑀁 ‘‘𑀧𑀝𑀺𑀖𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀧𑀤𑀁 𑀓𑀣𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀤𑁄𑀫𑀦𑀲𑁆𑀲𑁂, 𑀢𑀁𑀲𑀫𑁆𑀧𑀬𑀼𑀢𑁆𑀢𑁂 𑀯𑀸 𑀧𑀝𑀺𑀖𑁂. 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀦𑁆𑀢𑀺𑀆𑀤𑀺𑀦𑀸 𑀦𑁂𑀬𑁆𑀬𑀢𑁆𑀣𑀫𑀺𑀤𑀁 𑀲𑀼𑀢𑁆𑀢𑀁, 𑀦 𑀦𑀻𑀢𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀧𑀦 𑀲𑀼𑀢𑁆𑀢𑀁 𑀉𑀤𑀸𑀳𑀝𑀁, 𑀢𑀣𑀸 𑀇𑀥 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀖𑀼𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀸𑀬𑀸’’𑀢𑀺𑀆𑀤𑀺. 𑀏𑀯𑀫𑁆𑀧𑀺 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀸𑀞𑀸𑀦𑀁 𑀓𑀣𑀫𑀯𑀺𑀭𑁄𑀥𑁄𑀢𑀺 𑀆𑀳 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸 𑀳𑁂𑀲𑀸, 𑀲𑀸 𑀧𑀦 𑀧𑀭𑀺𑀬𑀸𑀬𑀤𑁂𑀲𑀦𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀏𑀯. 𑀭𑀸𑀕𑀸𑀦𑀼𑀲𑀬𑁄𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀬𑀢𑁄 ‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀦𑀁 𑀲𑀦𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀦 𑀫𑀳𑀕𑁆𑀕𑀢𑀥𑀫𑁆𑀫𑀸 𑀅𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺 𑀢𑀁 𑀧𑀞𑀫𑀚𑁆𑀛𑀸𑀦𑀜𑁆𑀘 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀦 𑀳𑀺 𑀮𑁄𑀓𑀺𑀬𑀸…𑀧𑁂… 𑀦𑀸𑀦𑀼𑀲𑁂𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀢𑁆𑀣𑀼𑀪𑀸𑀯𑀢𑁄𑀢𑀺 𑀲𑀪𑀸𑀯𑁂𑀦𑁂𑀯 𑀅𑀦𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁆𑀢𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀅𑀦𑀼𑀲𑀬𑀬𑀫𑀓𑁂. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀢𑀁𑀧𑀝𑀺𑀧𑀓𑁆𑀔𑀪𑀸𑀯𑀢𑁄𑀢𑀺 𑀢𑁂𑀲𑀁 𑀧𑀝𑀺𑀖𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀲𑁆𑀲 𑀫𑀕𑁆𑀕𑀲𑁆𑀲 𑀲𑀩𑁆𑀪𑀸𑀯𑀢𑁄. 𑀦 𑀓𑁂𑀯𑀮𑀁 𑀫𑀕𑁆𑀕𑀲𑀩𑁆𑀪𑀸𑀯𑀢𑁄, 𑀅𑀣 𑀔𑁄 𑀩𑀮𑀯𑀯𑀺𑀧𑀲𑁆𑀲𑀦𑀸𑀲𑀩𑁆𑀪𑀸𑀯𑀢𑁄𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀁𑀲𑀫𑀼𑀕𑁆𑀖𑀸…𑀧𑁂… 𑀪𑀸𑀯𑀢𑁄 𑀘𑀸’’𑀢𑀺.

𑀇𑀤𑀸𑀦𑀺 𑀬𑀤𑁂𑀢𑀁 𑀢𑀢𑁆𑀣 𑀢𑀢𑁆𑀣 ‘‘𑀅𑀦𑀼𑀲𑀬𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀕𑀳𑁂𑀢𑀩𑁆𑀩𑀥𑀫𑁆𑀫𑀯𑀲𑁂𑀦 𑀯𑀸 𑀲𑀺𑀬𑀸 𑀕𑀳𑀡𑀯𑀺𑀲𑁂𑀲𑁂𑀦 𑀯𑀸𑀢𑀺 𑀤𑁆𑀯𑁂 𑀯𑀺𑀓𑀧𑁆𑀧𑀸, 𑀢𑁂𑀲𑀼 𑀧𑀞𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀭𑀫𑁆𑀫𑀡𑁂 𑀅𑀦𑀼𑀲𑀬𑀦𑀝𑁆𑀞𑀸𑀦𑁂 𑀲𑀢𑀻’’𑀢𑀺. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀅𑀦𑀼𑀲𑀬𑀸𑀦𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀦𑁆𑀢𑀺 𑀕𑀬𑁆𑀳𑀫𑀸𑀦𑁂 𑀬𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀓𑁆𑀔𑀸𑀬 𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀲𑀺𑀬𑀸𑀢𑀺 𑀬𑀤𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀲𑀺𑀬𑀸. 𑀏𑀢𑀲𑁆𑀲𑀧𑀻𑀢𑀺 𑀤𑀺𑀝𑁆𑀞𑀸𑀦𑀼𑀲𑀬𑀲𑀫𑁆𑀧𑀬𑀼𑀢𑁆𑀢𑀮𑁄𑀪𑀲𑁆𑀲𑀧𑀺 ‘‘𑀲𑀩𑁆𑀩𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀓𑀸𑀫𑀭𑀸𑀕𑀲𑁆𑀲 𑀞𑀸𑀦𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀁. 𑀅𑀣 𑀧𑀦𑀸𑀢𑀺𑀆𑀤𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀚𑁆𑀛𑀸𑀲𑀬𑀯𑀲𑁂𑀦 𑀢𑀁𑀦𑀺𑀦𑁆𑀦𑀢𑀸𑀬𑀸𑀢𑀺 𑀅𑀲𑀢𑀺𑀧𑀺 𑀆𑀭𑀫𑁆𑀫𑀡𑀓𑀭𑀡𑁂 𑀬𑀢𑁆𑀣 𑀓𑀸𑀫𑀭𑀸𑀕𑀸𑀤𑀬𑁄 𑀅𑀚𑁆𑀛𑀸𑀲𑀬𑀢𑁄 𑀦𑀺𑀦𑁆𑀦𑀸, 𑀢𑀁 𑀢𑁂𑀲𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑀼𑀕𑀢𑁄 𑀳𑀼𑀢𑁆𑀯𑀸 𑀲𑁂𑀢𑀻’’𑀢𑀺. 𑀅𑀣 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀤𑀸𑀳𑀭𑀡𑀯𑀲𑁂𑀦 𑀦𑀺𑀭𑀽𑀧𑀦𑀁. 𑀤𑀼𑀓𑁆𑀔𑁂 𑀧𑀝𑀺𑀳𑀜𑁆𑀜𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀦𑀸𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀓𑁆𑀔𑀫𑁂𑀯 𑀢𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀅𑀚𑁆𑀛𑀸𑀲𑀬𑀲𑁆𑀲 𑀢𑀢𑁆𑀣 𑀦𑀺𑀦𑁆𑀦𑀢𑁆𑀢𑀸 𑀤𑀼𑀓𑁆𑀔𑀫𑁂𑀯 𑀢𑀲𑁆𑀲 𑀧𑀝𑀺𑀖𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁, 𑀦𑀸𑀮𑀫𑁆𑀩𑀺𑀢𑀁 𑀭𑀽𑀧𑀸𑀤𑀺 𑀲𑀼𑀔𑀯𑁂𑀤𑀦𑀸 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀦𑁆𑀢𑀺 𑀬𑀣𑀸 𑀅𑀜𑁆𑀜𑀸𑀭𑀫𑁆𑀫𑀡𑀲𑁆𑀲𑀧𑀺 𑀧𑀝𑀺𑀖𑀲𑁆𑀲 𑀅𑀚𑁆𑀛𑀸𑀲𑀬𑀢𑁄 𑀤𑀼𑀓𑁆𑀔𑀦𑀺𑀦𑁆𑀦𑀢𑀸𑀬 𑀤𑀼𑀓𑁆𑀔𑀫𑁂𑀯 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁, 𑀏𑀯𑀁. 𑀤𑀼𑀓𑁆𑀔𑀸𑀤𑀻𑀲𑀼…𑀧𑁂… 𑀯𑀼𑀢𑁆𑀢𑀦𑁆𑀢𑀺 ‘‘𑀤𑀼𑀓𑁆𑀔𑁂𑀦 𑀲𑀼𑀔𑀁 𑀅𑀥𑀺𑀕𑀦𑁆𑀢𑀩𑁆𑀩𑀁. 𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀘 𑀆𑀤𑀺𑀦𑀸 𑀓𑀸𑀬𑀓𑀺𑀮𑀫𑀦𑀤𑀼𑀓𑁆𑀔𑁂 𑀤𑀸𑀦𑀸𑀦𑀼𑀪𑀸𑀯𑀸𑀤𑀺𑀓𑁂 𑀘 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀤𑀺𑀝𑁆𑀞𑀸𑀦𑀼𑀲𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀜𑁆𑀜𑀸𑀭𑀫𑁆𑀫𑀡𑁄𑀧𑀺 𑀮𑁄𑀪𑁄 ‘‘𑀏𑀯𑀁 𑀲𑀼𑀔𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀚𑁆𑀛𑀸𑀲𑀬𑀢𑁄 𑀲𑀼𑀔𑀸𑀪𑀺𑀲𑀗𑁆𑀕𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀲𑀼𑀔𑀼𑀧𑁂𑀓𑁆𑀔𑀸𑀪𑁂𑀤𑀁 𑀲𑀸𑀢𑀲𑀦𑁆𑀢𑀲𑀼𑀔𑀤𑁆𑀯𑀬𑀫𑁂𑀯 𑀅𑀲𑁆𑀲 𑀮𑁄𑀪𑀲𑁆𑀲 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁, 𑀦 𑀬𑀣𑀸𑀯𑀼𑀢𑁆𑀢𑀁 𑀤𑀼𑀓𑁆𑀔𑀸𑀤𑀺, 𑀢𑀲𑁆𑀫𑀸 𑀪𑀯𑀭𑀸𑀕…𑀧𑁂… 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀓𑀲𑁆𑀫𑀺𑀁𑀬𑁂𑀯 𑀘𑀸𑀢𑀺𑀆𑀤𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑀁𑀬𑁂𑀯 𑀉𑀧𑀩𑁆𑀭𑀽𑀳𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀕𑀲𑁆𑀲 𑀲𑀼𑀔𑀚𑁆𑀛𑀸𑀲𑀬𑀢𑀸 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦 𑀯𑀸 𑀘𑀓𑁆𑀔𑀼𑀲𑁆𑀲 𑀯𑀺𑀲𑀫𑀚𑁆𑀛𑀸𑀲𑀬𑀢𑀸 𑀯𑀺𑀬. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑁂𑀲𑀁 𑀭𑀸𑀕𑀧𑀝𑀺𑀖𑀸𑀦𑀁 𑀦𑀸𑀦𑀸𑀦𑀼𑀲𑀬𑀝𑁆𑀞𑀸𑀦𑀢𑀸 𑀳𑁄𑀢𑀺 𑀏𑀓𑀲𑁆𑀫𑀺𑀫𑁆𑀧𑀺 𑀆𑀭𑀫𑁆𑀫𑀡𑁂𑀢𑀺 𑀅𑀢𑁆𑀣𑁄.

𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀅𑀲𑀢𑀺𑀧𑀺 𑀕𑀳𑁂𑀢𑀩𑁆𑀩𑀪𑁂𑀤𑁂 𑀕𑀳𑀡𑀯𑀺𑀲𑁂𑀲𑁂𑀦 𑀅𑀦𑀼𑀲𑀬𑀦𑀝𑁆𑀞𑀸𑀦𑀲𑁆𑀲 𑀪𑀺𑀦𑁆𑀦𑀢𑁆𑀢𑀸 𑀏𑀯. ‘‘𑀬𑀢𑁆𑀣…𑀧𑁂… 𑀦𑁄’’𑀢𑀺 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀕𑀳𑁂𑀢𑀩𑁆𑀩𑀪𑁂𑀤𑁂𑀦 𑀳𑀺 𑀭𑀸𑀕𑀧𑀝𑀺𑀖𑀸𑀦𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀪𑁂𑀤𑁂 𑀕𑀬𑁆𑀳𑀫𑀸𑀦𑁂 𑀯𑀺𑀧𑀸𑀓𑀫𑀢𑁆𑀢𑁂 𑀞𑀸𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀁 𑀬𑀼𑀢𑁆𑀢𑀁, 𑀦𑀧𑀺 𑀲𑀩𑁆𑀩𑁂𑀲𑀁 𑀧𑀼𑀭𑀺𑀲𑀤𑁆𑀯𑀸𑀭𑀸𑀦𑀁 𑀇𑀝𑁆𑀞𑀸𑀦𑀺𑀝𑁆𑀞𑀁 𑀦𑀺𑀬𑀢𑀦𑁆𑀢𑀺. 𑀬𑀤𑀺𑀧𑀺 𑀬𑀣𑀸𑀯𑀼𑀢𑁆𑀢𑀮𑁄𑀪𑀲𑁆𑀲 𑀯𑀼𑀢𑁆𑀢𑀦𑀬𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑀢𑀸 𑀲𑀫𑁆𑀪𑀯𑀢𑀺, 𑀬𑀣𑀸 𑀧𑀦 𑀲𑀼𑀔𑀼𑀧𑁂𑀓𑁆𑀔𑀸𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀘 𑀉𑀧𑁆𑀧𑀚𑁆𑀚𑀦𑁆𑀢𑁂𑀦 𑀤𑁄𑀫𑀦𑀲𑁆𑀲𑁂𑀦 𑀲𑀳 𑀧𑀯𑀢𑁆𑀢𑁄 𑀤𑁄𑀲𑁄 𑀤𑀼𑀩𑁆𑀩𑀮𑀪𑀸𑀯𑁂𑀦 𑀧𑀝𑀺𑀖𑀸𑀦𑀼𑀲𑀬𑁄 𑀦 𑀳𑁄𑀢𑀺, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀮𑁄𑀪𑁄𑀧𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀦 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀏𑀢𑁆𑀣 𑀦-𑀓𑀸𑀭𑁄 𑀧𑀝𑀺𑀲𑁂𑀥𑀦𑀢𑁆𑀣𑁄, 𑀦 𑀅𑀜𑁆𑀜𑀢𑁆𑀣𑁄, 𑀇𑀢𑀭𑀢𑁆𑀣 𑀧𑀦 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀦 𑀳𑀺 𑀤𑁄𑀫𑀦𑀲𑁆𑀲𑀲𑁆𑀲 𑀧𑀝𑀺𑀖𑀸𑀦𑀼𑀲𑀬𑀪𑀸𑀯𑀸𑀲𑀗𑁆𑀓𑀸 𑀅𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀦-𑀓𑀸𑀭𑀲𑁆𑀲 𑀅𑀜𑁆𑀜𑀢𑁆𑀣𑀢𑀸𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀅𑀪𑀸𑀯𑀢𑁆𑀣𑀢𑀁 𑀲𑀫𑀢𑁆𑀣𑁂𑀢𑀺.

𑀤𑁂𑀲𑀦𑀸 𑀲𑀁𑀓𑀺𑀡𑁆𑀡𑀸 𑀯𑀺𑀬 𑀪𑀯𑁂𑀬𑁆𑀬𑀸𑀢𑀺 𑀏𑀢𑁆𑀣 𑀤𑁂𑀲𑀦𑀸𑀲𑀗𑁆𑀓𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀯𑀭𑀸𑀕𑀲𑁆𑀲𑀧𑀺…𑀧𑁂… 𑀪𑀯𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑀣𑀸 𑀓𑀸𑀫𑀭𑀸𑀕𑀲𑁆𑀲 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 ‘‘𑀓𑀸𑀫𑀭𑀸𑀕𑁄 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑁂𑀢𑀻’’𑀢𑀺, 𑀏𑀯𑀁 𑀬𑀤𑀺 ‘‘𑀪𑀯𑀭𑀸𑀕𑁄 𑀓𑀸𑀫𑀥𑀸𑀢𑀼𑀬𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀅𑀦𑀼𑀲𑁂𑀢𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀪𑀯𑀭𑀸𑀕𑀲𑁆𑀲𑀧𑀺…𑀧𑁂… 𑀪𑀯𑁂𑀬𑁆𑀬. 𑀢𑀢𑁄 𑀘 𑀓𑀸𑀫𑀭𑀸𑀕𑁂𑀦 𑀲𑀤𑁆𑀥𑀺𑀁 𑀪𑀯𑀭𑀸𑀕𑀲𑁆𑀲 𑀤𑁂𑀲𑀦𑀸 𑀲𑀁𑀓𑀺𑀡𑁆𑀡𑀸 𑀪𑀯𑁂𑀬𑁆𑀬, 𑀓𑀸𑀫𑀭𑀸𑀕𑀢𑁄 𑀘 𑀪𑀯𑀭𑀸𑀕𑀲𑁆𑀲 𑀯𑀺𑀲𑁂𑀲𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀲𑁄 𑀘 𑀲𑀳𑀚𑀸𑀢𑀸𑀦𑀼𑀲𑀬𑀯𑀲𑁂𑀦 𑀦 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀸 𑀆𑀭𑀫𑁆𑀫𑀡…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀢𑀢𑁆𑀣 𑀆𑀭𑀫𑁆𑀫𑀡𑀯𑀺𑀲𑁂𑀲𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀥𑀸𑀢𑀼𑀲𑀗𑁆𑀔𑀸𑀢𑀆𑀭𑀫𑁆𑀫𑀡𑀯𑀺𑀲𑁂𑀲𑁂𑀦. 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀓𑀸𑀫𑀭𑀸𑀕𑀢𑁄 𑀪𑀯𑀭𑀸𑀕𑀲𑁆𑀲 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁 𑀤𑁂𑀲𑀦𑀸 𑀓𑀢𑀸𑀢𑀺 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀏𑀢𑁆𑀣 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀏𑀯𑀁 𑀯𑀺𑀲𑀬𑁂 𑀪𑀼𑀫𑁆𑀫𑀁 𑀓𑀢𑁆𑀯𑀸 𑀤𑁂𑀲𑀦𑀸 𑀓𑀢𑀸. 𑀢𑁂𑀦𑀸𑀳 ‘‘𑀲𑀳𑀚𑀸𑀢𑀯𑁂𑀤𑀦𑀸𑀯𑀺𑀲𑁂𑀲𑀸𑀪𑀸𑀯𑀢𑁄’’𑀢𑀺.

𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀯𑀸𑀭𑁄

𑁧. 𑀅𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸

𑁩. 𑀧𑀯𑀢𑁆𑀢𑀸𑀯𑀺𑀭𑀸𑀫𑀯𑀲𑁂𑀦𑀸𑀢𑀺 𑀅𑀦𑀼𑀲𑀬𑀧𑁆𑀧𑀯𑀢𑁆𑀢𑀺𑀬𑀸 𑀅𑀯𑀺𑀭𑀸𑀫𑀯𑀲𑁂𑀦, 𑀅𑀯𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑀓𑁆𑀔𑀡𑁂 𑀅𑀦𑀼𑀲𑀬𑀸𑀦𑀁 𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀫𑀕𑁆𑀕𑁂𑀦𑁂𑀯…𑀧𑁂… 𑀧𑀼𑀩𑁆𑀩𑁂’’𑀢𑀺.

𑁨𑁦. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀜𑁆𑀘 𑀞𑀸𑀦𑀁 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀆𑀳 ‘‘𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂’’𑀢𑀺. 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁 𑀧𑀼𑀕𑁆𑀕𑀮𑀸𑀦𑀁. 𑀧𑀓𑀢𑀺𑀬𑀸 𑀲𑀪𑀸𑀯𑁂𑀦. 𑀲𑀪𑀸𑀯𑀲𑀺𑀤𑁆𑀥𑀸 𑀳𑀺 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀓𑀸𑀫𑀭𑀸𑀕𑀲𑁆𑀲 𑀅𑀦𑀦𑀼𑀲𑀬𑀦𑀝𑁆𑀞𑀸𑀦𑀢𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀯𑀓𑁆𑀔𑀢𑀺 𑀳𑀺 ‘‘𑀧𑀓𑀢𑀺𑀬𑀸 𑀤𑀼𑀓𑁆𑀔𑀸𑀤𑀻𑀦𑀁 𑀓𑀸𑀫𑀭𑀸𑀕𑀸𑀤𑀻𑀦𑀁 𑀅𑀦𑀦𑀼𑀲𑀬𑀦𑀝𑁆𑀞𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀧𑀳𑀸𑀦𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦. 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀁. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀸𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁄𑀓𑀸𑀲𑀯𑀸𑀭𑁂. 𑀧𑀼𑀭𑀺𑀫𑀦𑀬𑁂𑀢𑀺 ‘‘𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦’’𑀦𑁆𑀢𑀺𑀆𑀤𑀺𑀓𑁂 𑀧𑀼𑀭𑀺𑀫𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑀦𑀦𑀬𑁂. 𑀑𑀓𑀸𑀲𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁, 𑀇𑀥 𑀧𑀦 𑀤𑀼𑀓𑁆𑀔𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀘𑁆𑀙𑀺𑀫𑀦𑀬𑁂𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦’’𑀦𑁆𑀢𑀺𑀆𑀤𑀺𑀓𑁂 𑀯𑀺𑀲𑁆𑀲𑀚𑁆𑀚𑀦𑀦𑀬𑁂. 𑀅𑀦𑁄𑀓𑀸𑀲𑀢𑀸 𑀅𑀦𑀦𑀼𑀲𑀬𑀦𑀝𑁆𑀞𑀸𑀦𑀢𑀸.

𑀅𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸

𑁬𑁬-𑁧𑁩𑁧. ‘‘𑀲𑀸𑀦𑀼𑀲𑀬𑁄, 𑀧𑀚𑀳𑀢𑀺, 𑀧𑀭𑀺𑀚𑀸𑀦𑀸𑀢𑀻’’𑀢𑀺 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄𑀢𑀺 ‘‘𑀓𑀸𑀫𑀭𑀸𑀕𑁂𑀦 𑀲𑀸𑀦𑀼𑀲𑀬𑁄, 𑀓𑀸𑀫𑀭𑀸𑀕𑀁 𑀧𑀚𑀳𑀢𑀺, 𑀓𑀸𑀫𑀭𑀸𑀕𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 𑀅𑀦𑀼𑀲𑀬𑀲𑀫𑀗𑁆𑀕𑀺𑀪𑀸𑀯𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀸𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀪𑀸𑀯𑁂𑀦 𑀘 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄, 𑀦 𑀥𑀫𑁆𑀫𑁄. 𑀪𑀯𑀯𑀺𑀲𑁂𑀲𑁂𑀦 𑀯𑀸𑀢𑀺 𑀓𑁂𑀯𑀮𑁂𑀦 𑀪𑀯𑀯𑀺𑀲𑁂𑀲𑁂𑀦 𑀯𑀸. 𑀇𑀢𑀭𑁂𑀲𑀽𑀢𑀺 𑀧𑀝𑀺𑀖𑀸𑀦𑀼𑀲𑀬𑀸𑀤𑀻𑀲𑀼. 𑀪𑀯𑀸𑀦𑀼𑀲𑀬𑀯𑀺𑀲𑁂𑀲𑁂𑀦 𑀯𑀸𑀢𑀺 𑀓𑀸𑀫𑀪𑀯𑀸𑀤𑀺𑀪𑀯𑀯𑀺𑀲𑀺𑀝𑁆𑀞𑀸𑀦𑀼𑀲𑀬𑀯𑀺𑀲𑁂𑀲𑁂𑀦 𑀯𑀸. 𑀲𑀸𑀦𑀼𑀲𑀬𑀢𑀸𑀦𑀺𑀭𑀦𑀼𑀲𑀬𑀢𑀸𑀤𑀺𑀓𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀳𑀸𑀦𑀸𑀧𑀳𑀸𑀦𑀧𑀭𑀺𑀜𑁆𑀜𑀸𑀧𑀭𑀺𑀜𑁆𑀜𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀦𑀦𑀼 𑀘 𑀪𑀯𑀯𑀺𑀲𑁂𑀲𑁂 𑀓𑁂𑀲𑀜𑁆𑀘𑀺 𑀅𑀦𑀼𑀲𑀬𑀸𑀦𑀁 𑀅𑀧𑁆𑀧𑀳𑀸𑀦𑀦𑁆𑀢𑀺? 𑀦 𑀢𑀁 𑀅𑀦𑀼𑀲𑀬𑀓𑀢𑀁, 𑀅𑀣 𑀔𑁄 𑀧𑀘𑁆𑀘𑀬𑀯𑁂𑀓𑀮𑁆𑀮𑀢𑁄 𑀅𑀦𑁄𑀓𑀸𑀲𑀢𑀸𑀬 𑀘𑀸𑀢𑀺 𑀦𑀸𑀬𑀁 𑀯𑀺𑀭𑁄𑀥𑁄. 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀽𑀢𑀺 𑀲𑀼𑀔𑀉𑀧𑁂𑀓𑁆𑀔𑀸𑀲𑀼 𑀯𑁂𑀤𑀦𑀸𑀲𑀼 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀦𑀺𑀭𑀦𑀼𑀲𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀫𑁆𑀧𑀺 𑀦𑀢𑁆𑀣𑀺 𑀧𑀼𑀕𑁆𑀕𑀮𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀳𑀺 𑀧𑀼𑀕𑁆𑀕𑀮𑀲𑁆𑀲…𑀧𑁂… 𑀅𑀦𑀼𑀲𑀬𑀸𑀦’’𑀦𑁆𑀢𑀺. 𑀬𑀤𑀺𑀧𑀺 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀲𑀬𑀦𑁄𑀓𑀸𑀲𑁄 𑀅𑀦𑁄𑀓𑀸𑀲𑁄, 𑀢𑀲𑁆𑀲 𑀧𑀦 𑀲𑀸𑀦𑀼𑀲𑀬𑀢𑀸𑀤𑀺𑀳𑁂𑀢𑀼 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀲𑀬𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀭𑀦𑀼𑀲𑀬𑀢𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀧𑁆𑀧𑀳𑀸𑀦𑀸𑀧𑀭𑀺𑀜𑁆𑀜𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀭𑀺𑀚𑀸𑀦𑀦𑀁 𑀲𑀫𑀢𑀺𑀓𑁆𑀓𑀫𑀦𑀦𑁆𑀢𑀺 𑀧𑀭𑀺𑀜𑁆𑀜𑀸𑀯𑀸𑀭𑁂𑀧𑀺 ‘‘𑀅𑀧𑀸𑀤𑀸𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀲𑀬𑀦𑀝𑁆𑀞𑀸𑀦𑀢𑁄𑀢𑀺 𑀅𑀦𑀼𑀲𑀬𑀦𑀝𑁆𑀞𑀸𑀦𑀳𑁂𑀢𑀼. ‘‘𑀅𑀦𑀦𑀼𑀲𑀬𑀦𑀝𑁆𑀞𑀸𑀦𑀢𑁄’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀫𑀺𑀢𑁆𑀢𑀸𑀧𑀸𑀤𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀸𑀦𑀼𑀲𑀬𑀯𑀸𑀭𑁂 𑀦𑀺𑀫𑀺𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀧𑀚𑀳𑀦𑀧𑀭𑀺𑀜𑁆𑀜𑀸𑀯𑀸𑀭𑁂𑀲𑀼 𑀅𑀧𑀸𑀤𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀚𑀳𑀢𑀻𑀢𑀺 𑀏𑀢𑁆𑀣 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸 𑀢𑀢𑁄 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀻’’𑀢𑀺 𑀧𑀸𑀴𑀺𑀧𑀤𑀁 𑀆𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁, 𑀦 𑀧𑀚𑀳𑀢𑀻𑀢𑀺 𑀏𑀢𑁆𑀣 𑀧𑀦 ‘‘𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀦𑀧𑁆𑀧𑀚𑀳𑀢𑀻’’𑀢𑀺. 𑀏𑀯𑀫𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀺𑀜𑁆𑀜𑀸𑀯𑀸𑀭𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁂𑀦𑁂𑀯 𑀳𑁂𑀢𑀼𑀅𑀢𑁆𑀣𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀦𑀸𑀢𑀺 ‘‘𑀬𑀢𑁄 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄, 𑀢𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀲𑀸𑀦𑀼𑀲𑀬𑁄’’𑀢𑀺 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦. 𑀢𑀢𑁆𑀣 𑀳𑀺 ‘‘𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀥𑀸𑀢𑀼𑀬𑀸’’𑀢𑀺𑀆𑀤𑀺𑀦𑀸 𑀲𑀭𑀽𑀧𑀢𑁄 𑀅𑀦𑀼𑀲𑀬𑀦𑀝𑁆𑀞𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀤𑀢𑁆𑀣𑁂𑀢𑀺 𑀢𑀁 𑀅𑀦𑀼𑀲𑀬𑀦𑀝𑁆𑀞𑀸𑀦𑀤𑀲𑁆𑀲𑀦𑀁 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀢𑀤𑀢𑁆𑀣𑁄, 𑀢𑀲𑁆𑀫𑀺𑀁 𑀢𑀤𑀢𑁆𑀣𑁂. ‘‘𑀅𑀦𑀼𑀲𑀬𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀯𑀸𑀭𑁄 𑀆𑀭𑀤𑁆𑀥𑁄’’𑀢𑀺𑀆𑀤𑀺𑀦𑀸 ‘‘𑀬𑀢𑁄’’𑀢𑀺 𑀏𑀢𑁂𑀦 𑀅𑀦𑀼𑀲𑀬𑀦𑀝𑁆𑀞𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑁆𑀯𑀸. 𑀧𑀫𑀸𑀤𑀮𑀺𑀔𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀉𑀧𑁆𑀧𑀦𑁆𑀦-𑀲𑀤𑁆𑀤𑁂𑀦 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑁂 𑀯𑀼𑀘𑁆𑀘𑀫𑀸𑀦𑁂. 𑀬𑀣𑀸 𑀧𑀦 𑀉𑀧𑁆𑀧𑀚𑁆𑀚𑀦𑀯𑀸𑀭𑁂 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑁂𑀦 𑀉𑀧𑁆𑀧𑀢𑁆𑀢𑀺𑀬𑁄𑀕𑀤𑀻𑀧𑀓𑀢𑁆𑀢𑀸 𑀉𑀧𑁆𑀧𑀢𑁆𑀢𑀺𑀭𑀳𑀸 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑀺𑀥𑀸𑀧𑀺 𑀉𑀧𑁆𑀧𑀢𑁆𑀢𑀺𑀅𑀭𑀳𑁂 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀦 𑀳𑀺 𑀅𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀦𑀼𑀲𑀬𑀼𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑀸’’𑀢𑀺, 𑀲𑁄𑀧𑀺 𑀦 𑀤𑁄𑀲𑁄. 𑀬𑀢𑁆𑀣 𑀬𑀢𑁆𑀣 𑀳𑀺 𑀅𑀦𑀼𑀲𑀬𑀸 𑀉𑀧𑁆𑀧𑀢𑁆𑀢𑀺𑀭𑀳𑀸, 𑀢𑀤𑁂𑀯 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀢𑀣𑁂𑀯 𑀤𑀺𑀲𑁆𑀲𑀢𑀻𑀢𑀺 𑀢𑀁 𑀧𑀫𑀸𑀤𑀮𑀺𑀔𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀬𑀢𑁄 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀬𑀢𑁄 𑀅𑀦𑀼𑀲𑀬𑀦𑀝𑁆𑀞𑀸𑀦𑀢𑁄 𑀓𑀸𑀫𑀕𑀸𑀭𑀸𑀦𑀼𑀲𑀬𑁂𑀦 𑀉𑀧𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀉𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑀁 ‘‘𑀬𑀢𑁄’’𑀢𑀺. 𑀢𑀣𑀸𑀢𑀺 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁄 𑀬𑀣𑀸 ‘‘𑀬𑀢𑁄 𑀉𑀧𑁆𑀧𑀦𑁆𑀦𑁂𑀦𑀸’’𑀢𑀺 𑀏𑀢𑁆𑀣 𑀉𑀧𑁆𑀧𑀢𑁆𑀢𑀺𑀭𑀳𑀝𑁆𑀞𑀸𑀦𑀢𑁄 𑀅𑀦𑀼𑀲𑀬𑀲𑁆𑀲 𑀉𑀧𑁆𑀧𑀢𑁆𑀢𑀺𑀭𑀳𑀢𑀸 𑀯𑀼𑀢𑁆𑀢𑀸, 𑀢𑀣𑀸 ‘‘𑀉𑀧𑁆𑀧𑀚𑁆𑀚𑀦𑀓𑁂𑀦𑀸’’𑀢𑀺 𑀏𑀢𑁆𑀣𑀸𑀧𑀺 𑀲𑀸 𑀏𑀯 𑀯𑀼𑀘𑁆𑀘𑀢𑀻𑀢𑀺 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀥𑀫𑁆𑀫𑁂𑀲𑀼…𑀧𑁂… 𑀆𑀧𑀦𑁆𑀦𑁂𑀦𑀸’’𑀢𑀺. 𑀢𑀢𑁆𑀣 ‘‘𑀉𑀧𑁆𑀧𑀚𑁆𑀚𑀦𑀓𑁄’’𑀢𑀺 𑀯𑀼𑀢𑁆𑀢𑁂 𑀅𑀦𑀼𑀧𑁆𑀧𑀚𑁆𑀚𑀦𑀓𑁄 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀢𑀣𑀸 𑀘 𑀲𑀢𑀺 𑀢𑁂𑀦 𑀅𑀦𑀼𑀧𑁆𑀧𑀢𑁆𑀢𑀺 𑀦𑀺𑀘𑁆𑀙𑀺𑀢𑀸𑀢𑀺 𑀉𑀧𑁆𑀧𑀦𑁆𑀦𑀲𑀪𑀸𑀯𑀢𑀸 𑀘 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀥𑀫𑁆𑀫𑁂𑀲𑀼…𑀧𑁂… 𑀅𑀧𑀦𑁂𑀢𑀻’’𑀢𑀺. ‘‘𑀬𑁄 𑀬𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁂𑀦 𑀦𑀺𑀭𑀦𑀼𑀲𑀬𑁄, 𑀲𑁄 𑀢𑀢𑁄 𑀫𑀸𑀦𑀸𑀦𑀼𑀲𑀬𑁂𑀦 𑀦𑀺𑀭𑀦𑀼𑀲𑀬𑁄’’𑀢𑀺 𑀧𑀼𑀘𑁆𑀙𑀸𑀬 ‘‘𑀬𑀢𑁄 𑀢𑀢𑁄’’𑀢𑀺 𑀆𑀕𑀢𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀦𑁂 ‘‘𑀲𑀩𑁆𑀩𑀢𑁆𑀣𑀸’’𑀢𑀺 𑀧𑀤𑀲𑁆𑀲 𑀦𑀺𑀲𑁆𑀲𑀓𑁆𑀓𑀯𑀲𑁂𑀦𑁂𑀯 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀢𑁆𑀣𑀸𑀢𑀺…𑀧𑁂… 𑀦 𑀦 𑀲𑀫𑁆𑀪𑀯𑀢𑀻’’𑀢𑀺 𑀆𑀳. 𑀪𑀼𑀫𑁆𑀫𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀺, 𑀬𑀢𑁄 𑀲𑀩𑁆𑀩𑁂𑀲𑀁 𑀧𑀸𑀤𑀓𑀁 ‘‘𑀲𑀩𑁆𑀩𑀢𑁆𑀣𑀧𑀸𑀤𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀦𑀺𑀲𑁆𑀲𑀓𑁆𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀦𑀼𑀲𑀬𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀚𑀳𑀦𑀯𑀸𑀭𑀯𑀡𑁆𑀡𑀦𑀸

𑁧𑁩𑁨-𑁧𑁯𑁭. 𑀅𑀧𑁆𑀧𑀚𑀳𑀦𑀲𑀩𑁆𑀪𑀸𑀯𑀸𑀢𑀺 𑀅𑀧𑁆𑀧𑀳𑀸𑀦𑀲𑁆𑀲, 𑀅𑀧𑁆𑀧𑀳𑀻𑀬𑀫𑀸𑀦𑀲𑁆𑀲 𑀯𑀸 𑀲𑀩𑁆𑀪𑀸𑀯𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀦 𑀲𑁄 𑀫𑀸𑀦𑀸𑀦𑀼𑀲𑀬𑀁 𑀦𑀺𑀭𑀯𑀲𑁂𑀲𑀢𑁄 𑀧𑀚𑀳𑀢𑀺, 𑀬𑁄 𑀘 𑀫𑀸𑀦𑀸𑀦𑀼𑀲𑀬𑀁 𑀦𑀺𑀭𑀯𑀲𑁂𑀲𑀢𑁄 𑀧𑀚𑀳𑀢𑀺, 𑀦 𑀲𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀺 𑀧𑀕𑁂𑀯 𑀧𑀳𑀻𑀦𑀢𑁆𑀢𑀸, 𑀢𑀲𑁆𑀫𑀸 ‘‘𑀬𑁄 𑀯𑀸 𑀧𑀦 𑀫𑀸𑀦𑀸𑀦𑀼𑀲𑀬𑀁 𑀧𑀚𑀳𑀢𑀺, 𑀲𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀚𑀳𑀢𑀻𑀢𑀺? 𑀦𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀏𑀯𑀁 𑀧𑀞𑀫𑀧𑀼𑀘𑁆𑀙𑀸𑀬𑀁 𑀓𑀣𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀧𑀳𑀸𑀦𑀓𑀭𑀡𑀫𑀢𑁆𑀢𑀫𑁂𑀯𑀸𑀢𑀺 𑀧𑀳𑀸𑀦𑀓𑀺𑀭𑀺𑀬𑀸𑀲𑀫𑁆𑀪𑀯𑀫𑀢𑁆𑀢𑀫𑁂𑀯, 𑀦 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂 𑀞𑀧𑁂𑀢𑁆𑀯𑀸𑀢𑀺 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀤𑀻𑀦𑀁 𑀦𑀺𑀭𑀯𑀲𑁂𑀲𑀧𑀚𑀳𑀦𑀓𑁂 𑀅𑀝𑁆𑀞𑀫𑀓𑀸𑀤𑀺𑀓𑁂 𑀞𑀧𑁂𑀢𑁆𑀯𑀸. 𑀅𑀯𑀲𑁂𑀲𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀦𑀺𑀭𑀯𑀲𑁂𑀲𑀧𑁆𑀧𑀚𑀳𑀦𑀓𑁂𑀳𑀺 𑀅𑀯𑀲𑀺𑀝𑁆𑀞𑀸. 𑀢𑁂𑀲𑀼 𑀬𑁂𑀲𑀁 𑀏𑀓𑀘𑁆𑀘𑁂 𑀅𑀦𑀼𑀲𑀬𑀸 𑀧𑀳𑀻𑀦𑀸, 𑀢𑁂𑀧𑀺 𑀅𑀧𑁆𑀧𑀚𑀳𑀦𑀲𑀩𑁆𑀪𑀸𑀯𑁂𑀦𑁂𑀯 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀦 𑀘 𑀬𑀣𑀸𑀯𑀺𑀚𑁆𑀚𑀫𑀸𑀦𑁂𑀦𑀸𑀢𑀺 𑀫𑀕𑁆𑀕𑀓𑀺𑀘𑁆𑀘𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀧𑁆𑀧𑀓𑀸𑀭𑁂𑀦 𑀧𑀳𑀸𑀦𑁂𑀦 𑀯𑀚𑁆𑀚𑀺𑀢𑀸 𑀭𑀳𑀺𑀢𑀸 𑀏𑀯 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸.

𑀓𑁂𑀲𑀜𑁆𑀘𑀻𑀢𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑀫𑀗𑁆𑀕𑀺𑀲𑀓𑀤𑀸𑀕𑀸𑀫𑀻𑀦𑀁. 𑀧𑀼𑀦 𑀓𑁂𑀲𑀜𑁆𑀘𑀻𑀢𑀺 𑀅𑀦𑀸𑀕𑀸𑀫𑀺𑀅𑀕𑁆𑀕𑀫𑀕𑁆𑀕𑀲𑀫𑀗𑁆𑀕𑀺𑀅𑀭𑀳𑀦𑁆𑀢𑀸𑀦𑀁. 𑀉𑀪𑀬𑀦𑁆𑀢𑀺 𑀓𑀸𑀫𑀭𑀸𑀕𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀤𑁆𑀯𑀬𑀁. 𑀲𑁂𑀲𑀸𑀦𑀦𑁆𑀢𑀺 ‘‘𑀲𑁂𑀲𑀸’’𑀢𑀺 𑀯𑀼𑀢𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀸𑀦𑀁. 𑀢𑁂𑀲𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀦𑀼𑀲𑀬𑀸𑀦𑀁. 𑀉𑀪𑀬𑀸𑀧𑁆𑀧𑀚𑀳𑀦𑀲𑁆𑀲𑀸𑀢𑀺 𑀓𑀸𑀫𑀭𑀸𑀕𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀧𑁆𑀧𑀚𑀳𑀦𑀲𑁆𑀲. 𑀓𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀬𑁂𑀲𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀧𑀳𑀻𑀦𑁄, 𑀢𑁂𑀲𑀁 𑀢𑀲𑁆𑀲 𑀧𑀳𑀻𑀦𑀢𑀸, 𑀬𑁂𑀲𑀁 𑀬𑀣𑀸𑀯𑀼𑀢𑁆𑀢𑀁 𑀉𑀪𑀬𑀧𑁆𑀧𑀳𑀻𑀦𑀁, 𑀢𑁂𑀲𑀁 𑀢𑀤𑀧𑁆𑀧𑀚𑀳𑀦𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 ‘𑀦𑀧𑁆𑀧𑀚𑀳𑀦𑁆𑀢𑀻’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺. 𑀅𑀣 𑀧𑀦 𑀦 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀬𑁂𑀦 𑀓𑀸𑀭𑀡𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀧𑀢𑁆𑀢𑀺 𑀲𑀺𑀬𑀸, 𑀓𑁂𑀯𑀮𑀁 𑀧𑀦 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀕𑀳𑀺𑀢𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁 ‘‘𑀓𑀸𑀫𑀭𑀸𑀕𑀸𑀦𑀼𑀲𑀬𑀜𑁆𑀘 𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺, 𑀏𑀯𑀫𑁆𑀧𑀺 𑀧𑀼𑀘𑁆𑀙𑀺𑀢𑀲𑁆𑀲 𑀲𑀁𑀲𑀬𑀢𑁆𑀣𑀲𑁆𑀲 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀘 𑀲𑀢𑀺 ‘‘𑀲𑁂𑀲𑀧𑀼𑀕𑁆𑀕𑀮𑀸 𑀢𑀲𑁆𑀲 𑀅𑀦𑀼𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀓𑀸𑀭𑀡𑀁 𑀦 𑀯𑀢𑁆𑀢𑀩𑁆𑀩𑀁 𑀓𑀸𑀭𑀡𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄. ‘‘𑀉𑀪𑀬𑀸𑀧𑁆𑀧𑀚𑀳𑀦𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀧𑀦 𑀯𑀢𑁆𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑀁…𑀧𑁂… 𑀯𑀢𑁆𑀢𑀩𑁆𑀩𑀢𑁆𑀢𑀸’’𑀢𑀺 𑀆𑀳. 𑀢𑁂𑀦 𑀧𑀳𑀻𑀦𑀸𑀧𑁆𑀧𑀳𑀻𑀦𑀯𑀲𑁂𑀦 𑀓𑀸𑀭𑀡𑀁 𑀦 𑀯𑀢𑁆𑀢𑀩𑁆𑀩𑀁, 𑀧𑀳𑀻𑀦𑀸𑀦𑀁𑀬𑁂𑀯 𑀧𑀦 𑀯𑀲𑁂𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀁𑀲𑀬𑀢𑁆𑀣𑀲𑀗𑁆𑀕𑀳𑀺𑀢𑁂𑀢𑀺 𑀲𑀁𑀲𑀬𑀢𑁆𑀣𑁂𑀦 𑀧𑀤𑁂𑀦 𑀲𑀗𑁆𑀕𑀳𑀺𑀢𑁂. 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑀁 𑀧𑀦 𑀧𑀳𑀻𑀬𑀫𑀸𑀦𑀢𑁆𑀢𑀸 ‘‘𑀦𑀧𑁆𑀧𑀚𑀳𑀢𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺.

𑀧𑀚𑀳𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀳𑀻𑀦𑀯𑀸𑀭𑀯𑀡𑁆𑀡𑀦𑀸

𑁨𑁬𑁪-𑁨𑁭𑁪. 𑀨𑀮𑀝𑁆𑀞𑀯𑀲𑁂𑀦𑁂𑀯 𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀦 𑀫𑀕𑁆𑀕𑀝𑁆𑀞𑀯𑀲𑁂𑀦, 𑀓𑀼𑀢𑁄 𑀧𑀼𑀣𑀼𑀚𑁆𑀚𑀦𑀯𑀲𑁂𑀦. 𑀓𑀲𑁆𑀫𑀸? 𑀨𑀮𑀓𑁆𑀔𑀡𑁂 𑀳𑀺 𑀅𑀦𑀼𑀲𑀬𑀸 𑀧𑀳𑀻𑀦𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀧𑀳𑀻𑀬𑀦𑁆𑀢𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀫𑀕𑁆𑀕𑀲𑀫𑀗𑁆𑀕𑀻𑀦𑀁 𑀅𑀕𑁆𑀕𑀳𑀺𑀢𑀢𑀁 𑀤𑀻𑀧𑁂𑀢𑀻’’𑀢𑀺. 𑀧𑀝𑀺𑀮𑁄𑀫𑁂 𑀳𑀺 𑀧𑀼𑀣𑀼𑀚𑁆𑀚𑀦𑀯𑀲𑁂𑀦𑀧𑀺 𑀤𑁂𑀲𑀦𑀸 𑀕𑀳𑀺𑀢𑀸 ‘‘𑀬𑀲𑁆𑀲 𑀤𑀺𑀝𑁆𑀞𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄, 𑀢𑀲𑁆𑀲 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄 𑀅𑀧𑁆𑀧𑀳𑀻𑀦𑁄𑀢𑀺? 𑀆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸. 𑀅𑀦𑀼𑀲𑀬𑀘𑁆𑀘𑀦𑁆𑀢𑀧𑀝𑀺𑀧𑀓𑁆𑀔𑁂𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀦𑀦𑁆𑀢𑀺 𑀅𑀦𑀼𑀲𑀬𑀸𑀦𑀁 𑀅𑀘𑁆𑀘𑀦𑁆𑀢𑀁 𑀧𑀝𑀺𑀧𑀓𑁆𑀔𑀪𑀽𑀢𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀦𑀁. 𑀫𑀕𑁆𑀕𑀲𑀫𑀗𑁆𑀕𑀻𑀦𑀦𑁆𑀢𑀺 𑀫𑀕𑁆𑀕𑀝𑁆𑀞𑀸𑀦𑀁. 𑀏𑀢𑁆𑀣 𑀘 𑀅𑀦𑀼𑀲𑀬𑀸𑀦𑀁 𑀅𑀘𑁆𑀘𑀦𑁆𑀢𑀧𑀝𑀺𑀧𑀓𑁆𑀔𑀢𑀸𑀕𑁆𑀕𑀳𑀡𑁂𑀦 𑀉𑀧𑁆𑀧𑀢𑁆𑀢𑀺𑀭𑀳𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦 𑀳𑀺 𑀢𑁂 𑀅𑀘𑁆𑀘𑀦𑁆𑀢𑀧𑀝𑀺𑀧𑀓𑁆𑀔𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀧𑀭𑀢𑁄 𑀉𑀧𑁆𑀧𑀢𑁆𑀢𑀺𑀭𑀳𑀸 𑀳𑁄𑀦𑁆𑀢𑀺. 𑀫𑀕𑁆𑀕𑀲𑀫𑀗𑁆𑀕𑀺𑀢𑀸𑀕𑁆𑀕𑀳𑀡𑁂𑀦 𑀅𑀦𑀼𑀧𑁆𑀧𑀢𑁆𑀢𑀺𑀭𑀳𑀢𑀸𑀧𑀸𑀤𑀺𑀢𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦 𑀳𑀺 𑀫𑀕𑁆𑀕𑀓𑁆𑀔𑀡𑁂 𑀢𑁂 𑀅𑀦𑀼𑀧𑁆𑀧𑀢𑁆𑀢𑀺𑀭𑀳𑀢𑀁 𑀆𑀧𑀸𑀤𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀣 𑀔𑁄 𑀆𑀧𑀸𑀤𑀻𑀬𑀦𑁆𑀢𑀻𑀢𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀸𑀕𑁆𑀕𑀳𑀡𑁂𑀦 𑀲𑀦𑁆𑀢𑀸𑀦𑀩𑁆𑀬𑀸𑀧𑀸𑀭𑀁. 𑀢𑁂𑀦𑀸𑀳 ‘‘𑀦 𑀓𑁄𑀘𑀻’’𑀢𑀺𑀆𑀤𑀺. 𑀢𑀢𑁆𑀣 𑀢𑁂𑀢𑀺 𑀫𑀕𑁆𑀕𑀲𑀫𑀗𑁆𑀕𑀺𑀦𑁄. 𑀦 𑀓𑁂𑀯𑀮𑀁 𑀧𑀳𑀻𑀦𑀯𑀸𑀭𑁂𑀬𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀲𑀼𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀲𑀬…𑀧𑁂… 𑀕𑀳𑀺𑀢𑀸’’𑀢𑀺 𑀆𑀳.

𑁨𑁭𑁫-𑁨𑁯𑁬. 𑀬𑀢𑁆𑀣 𑀅𑀦𑀼𑀲𑀬𑁄 𑀉𑀧𑁆𑀧𑀢𑁆𑀢𑀺𑀭𑀳𑁄, 𑀢𑀢𑁆𑀣𑁂𑀯𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀭𑀳𑀢𑀸𑀧𑀸𑀤𑀦𑀦𑁆𑀢𑀺 ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀑𑀓𑀸𑀲𑁂 𑀏𑀯 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑁄’’𑀢𑀺 𑀆𑀳. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’’𑀢𑀺 (𑀯𑀺𑀪. 𑁨𑁦𑁩) 𑀯𑀢𑁆𑀯𑀸 𑀧𑀼𑀦 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀯𑀺𑀪. 𑁨𑁦𑁪). 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀤𑁄𑀓𑀸𑀲𑀢𑁆𑀢𑀫𑁂𑀯 𑀓𑀸𑀫𑀥𑀸𑀢𑀼𑀆𑀤𑀺𑀑𑀓𑀸𑀲𑀢𑁆𑀢𑀫𑁂𑀯 𑀅𑀦𑀼𑀲𑀬𑀸𑀦𑀁 𑀤𑀻𑀧𑁂𑀦𑁆𑀢𑀺 𑀧𑀳𑀻𑀦𑀸𑀧𑁆𑀧𑀳𑀻𑀦𑀯𑀘𑀦𑀸𑀦𑀺, 𑀢𑀲𑁆𑀫𑀸. 𑀅𑀦𑁄𑀓𑀸𑀲𑁂 𑀢𑀤𑀼𑀪𑀬𑀸𑀯𑀢𑁆𑀢𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺 𑀬𑀲𑁆𑀫𑀸 𑀓𑀸𑀫𑀭𑀸𑀕𑀧𑀝𑀺𑀖𑀸𑀦𑀼𑀲𑀬𑀸𑀦𑀁 𑀤𑁆𑀯𑀺𑀦𑁆𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁, 𑀲𑁄 𑀏𑀯 𑀧𑀳𑀸𑀦𑁄𑀓𑀸𑀲𑁄𑀢𑀺 𑀲𑁆𑀯𑀸𑀬𑀁 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑁄𑀓𑀸𑀲𑁄, 𑀢𑀲𑁆𑀫𑀺𑀁 𑀅𑀦𑁄𑀓𑀸𑀲𑁂 𑀢𑀤𑀼𑀪𑀬𑀲𑁆𑀲 𑀧𑀳𑀸𑀦𑀸𑀧𑁆𑀧𑀳𑀸𑀦𑀲𑁆𑀲 𑀦𑀯𑀢𑁆𑀢𑀩𑁆𑀩𑀢𑀸 𑀯𑀼𑀢𑁆𑀢𑀸. 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀓𑀸𑀲𑁂 𑀳𑀺 𑀧𑀝𑀺𑀖𑀸𑀦𑀼𑀲𑀬𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑁄 ‘‘𑀢𑀢𑁆𑀣 𑀧𑀳𑀻𑀦𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀅𑀝𑁆𑀞𑀺𑀢𑀢𑁆𑀢𑀸 𑀧𑀦 ‘‘𑀢𑀢𑁆𑀣 𑀅𑀧𑁆𑀧𑀳𑀻𑀦𑁄’’𑀢𑀺 𑀘, 𑀢𑀲𑁆𑀫𑀸 𑀅𑀦𑁄𑀓𑀸𑀲𑁂 𑀢𑀤𑀼𑀪𑀬𑀸𑀯𑀢𑁆𑀢𑀩𑁆𑀩𑀢𑀸 𑀯𑀼𑀢𑁆𑀢𑀸𑀢𑀺. 𑀢𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑁄𑀓𑀸𑀲𑁂𑀢𑀺 𑀢𑁂𑀦 𑀓𑀸𑀫𑀭𑀸𑀕𑁂𑀦 𑀲𑀤𑁆𑀥𑀺𑀁 𑀲𑀫𑀸𑀦𑁄𑀓𑀸𑀲𑁂. ‘‘𑀲𑀸𑀥𑀸𑀭𑀡𑀝𑁆𑀞𑀸𑀦𑁂’’𑀢𑀺 𑀯𑀼𑀢𑁆𑀢𑁂 𑀓𑀸𑀫𑀥𑀸𑀢𑀼𑀬𑀁 𑀲𑀼𑀔𑀼𑀧𑁂𑀓𑁆𑀔𑀸𑀲𑀼 𑀧𑀳𑀻𑀦𑁄 𑀦𑀸𑀫 𑀳𑁄𑀢𑀺, 𑀦 𑀲𑀫𑀸𑀦𑀓𑀸𑀮𑁂 𑀧𑀳𑀻𑀦𑁄 𑀢𑀢𑀺𑀬𑀘𑀢𑀼𑀢𑁆𑀣𑀫𑀕𑁆𑀕𑀯𑀚𑁆𑀛𑀢𑁆𑀢𑀸 𑀓𑀸𑀫𑀭𑀸𑀕𑀫𑀸𑀦𑀸𑀦𑀼𑀲𑀬𑀸𑀦𑀁.

𑀧𑀳𑀻𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀸𑀢𑀼𑀯𑀸𑀭𑀯𑀡𑁆𑀡𑀦𑀸

𑁩𑁩𑁨-𑁩𑁪𑁦. 𑀅𑀧𑁆𑀧𑀳𑀻𑀦𑀼𑀧𑁆𑀧𑀢𑁆𑀢𑀺𑀭𑀳𑀪𑀸𑀯𑀸 𑀇𑀥 𑀅𑀦𑀼𑀕𑀫𑀦𑀲𑀬𑀦𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀺𑀁 …𑀧𑁂… 𑀅𑀢𑁆𑀣𑁄’’𑀢𑀺 𑀆𑀳. 𑀇𑀥𑀸𑀧𑀺 𑀬𑀼𑀢𑁆𑀢𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀭𑀸𑀫𑀲𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀢𑁆𑀢𑀺𑀅𑀭𑀳𑀢𑀁 𑀤𑀲𑁆𑀲𑁂𑀢𑀻’’𑀢𑀺 (𑀬𑀫. 𑀫𑀽𑀮𑀝𑀻. 𑀅𑀦𑀼𑀲𑀬𑀬𑀫𑀓 𑁧). 𑀙 𑀧𑀝𑀺𑀲𑁂𑀥𑀯𑀘𑀦𑀸𑀦𑀻𑀢𑀺 𑀢𑀺𑀲𑁆𑀲𑀦𑁆𑀦𑀁 𑀥𑀸𑀢𑀽𑀦𑀁 𑀘𑀼𑀢𑀽𑀧𑀧𑀸𑀢𑀯𑀺𑀲𑀺𑀝𑁆𑀞𑀸𑀦𑀁 𑀧𑀝𑀺𑀲𑁂𑀥𑀦𑀯𑀲𑁂𑀦 𑀯𑀼𑀢𑁆𑀢𑀯𑀘𑀦𑀸𑀦𑀺, 𑀢𑀢𑁄 𑀏𑀯 𑀥𑀸𑀢𑀼𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀸𑀦𑀺 𑀦 𑀳𑁄𑀦𑁆𑀢𑀺. 𑀧𑀝𑀺𑀲𑁂𑀥𑁄𑀢𑀺 𑀳𑀺 𑀇𑀥 𑀲𑀢𑁆𑀢𑀸𑀧𑀝𑀺𑀲𑁂𑀥𑁄 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀅𑀜𑁆𑀜𑀢𑁆𑀣𑁂 𑀧𑀦 𑀦-𑀓𑀸𑀭𑁂 𑀦𑀸𑀬𑀁 𑀤𑁄𑀲𑁄. 𑀇𑀫𑀁 𑀦𑀸𑀫 𑀥𑀸𑀢𑀼𑀁. 𑀢𑀁𑀫𑀽𑀮𑀺𑀓𑀸𑀲𑀽𑀢𑀺 𑀧𑀝𑀺𑀲𑁂𑀥𑀫𑀽𑀮𑀺𑀓𑀸𑀲𑀼. 𑀏𑀯𑀜𑁆𑀳𑀻𑀢𑀺 ‘‘𑀦 𑀓𑀸𑀫𑀥𑀸𑀢𑀼𑀬𑀸 𑀘𑀼𑀢𑀲𑁆𑀲 𑀓𑀸𑀫𑀥𑀸𑀢𑀼𑀁 𑀉𑀧𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀧𑀞𑀫𑀬𑁄𑀚𑀦𑀸𑀬 𑀲𑀢𑀺. 𑀦𑀓𑀸𑀫𑀥𑀸𑀢𑀼𑀆𑀤𑀻𑀲𑀼 𑀉𑀧𑀧𑀢𑁆𑀢𑀺𑀓𑀺𑀢𑁆𑀢𑀦𑁂𑀦𑁂𑀯 𑀦𑀓𑀸𑀫𑀥𑀸𑀢𑀼𑀆𑀤𑀺𑀕𑁆𑀕𑀳𑀡𑁂𑀦𑀧𑀺 𑀥𑀸𑀢𑀼𑀯𑀺𑀲𑁂𑀲𑀲𑁆𑀲𑁂𑀯 𑀕𑀳𑀺𑀢𑀢𑀸𑀬 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀓𑀸𑀫𑀥𑀸𑀢𑀼…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺. 𑀪𑀜𑁆𑀚𑀺𑀢𑀩𑁆𑀩𑀸𑀢𑀺 𑀯𑀺𑀪𑀚𑀺𑀢𑀩𑁆𑀩𑀸. 𑀯𑀺𑀪𑀸𑀕𑁄 𑀧𑀦𑁂𑀢𑁆𑀣 𑀤𑀼𑀯𑀺𑀥𑁄 𑀇𑀘𑁆𑀙𑀺𑀢𑁄𑀢𑀺 𑀆𑀳 ‘‘𑀤𑁆𑀯𑀺𑀥𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄’’𑀢𑀺. 𑀧𑀼𑀘𑁆𑀙𑀸 𑀘 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀺. 𑀬𑀣𑀸 𑀅𑀯𑀼𑀢𑁆𑀢𑁂 𑀪𑀗𑁆𑀕𑀸𑀪𑀸𑀯𑀲𑁆𑀲 𑀅𑀯𑀺𑀜𑁆𑀜𑀸𑀢𑀢𑁆𑀢𑀸 ‘‘𑀅𑀦𑀼𑀲𑀬𑀸 𑀪𑀗𑁆𑀕𑀸 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀣𑀸 𑀢𑀬𑀺𑀤𑀁 ‘‘𑀓𑀢𑀺 𑀅𑀦𑀼𑀲𑀬𑀸 𑀪𑀗𑁆𑀕𑀸’’𑀢𑀺 𑀏𑀢𑀤𑀧𑁂𑀓𑁆𑀔𑀦𑁆𑀢𑀺 𑀢𑀤𑀧𑀺 𑀯𑀢𑁆𑀢𑀩𑁆𑀩𑀁. 𑀧𑀼𑀘𑁆𑀙𑀸𑀧𑁂𑀓𑁆𑀔𑀜𑁆𑀳𑀺 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺.

𑀥𑀸𑀢𑀼𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀲𑀬𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀘𑀺𑀢𑁆𑀢𑀬𑀫𑀓𑀁

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁧-𑁬𑁨. 𑀲𑀭𑀸𑀕𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀬𑀲𑁆𑀲 𑀲𑀭𑀸𑀕𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀬𑀲𑁆𑀲 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀸𑀭𑁄, 𑀢𑀸𑀯 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀼𑀲𑀮𑀸𑀤𑀻𑀢𑀺 𑀧𑀦 𑀆𑀤𑀺-𑀲𑀤𑁆𑀤𑁂𑀦 ‘‘𑀬𑀲𑁆𑀲 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀬𑀲𑁆𑀲 𑀲𑀭𑀡𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀸𑀭𑁄, 𑀢𑀸𑀯 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀲𑀭𑀸𑀕𑀸𑀤𑀺𑀓𑀼𑀲𑀮𑀸𑀤𑀻𑀳𑀻𑀢𑀺 𑀲𑀭𑀸𑀕𑀸𑀤𑀻𑀳𑀺 𑀅𑀯𑀺𑀫𑀼𑀢𑁆𑀢𑀦𑁆𑀢𑁂𑀳𑀺, 𑀓𑀼𑀲𑀮𑀸𑀤𑀻𑀳𑀺 𑀅𑀭𑀡𑀦𑁆𑀢𑁂𑀳𑀺 𑀧𑀤𑁂𑀳𑀺 𑀫𑀺𑀲𑁆𑀲𑀓𑀸 𑀯𑀸𑀭𑀸. 𑀲𑀼𑀤𑁆𑀥𑀺𑀓𑀸𑀢𑀺 𑀓𑁂𑀯𑀮𑀸 𑀬𑀣𑀸𑀯𑀼𑀢𑁆𑀢𑀲𑀭𑀸𑀕𑀸𑀤𑀻𑀳𑀺 𑀓𑀼𑀲𑀮𑀸𑀤𑀻𑀳𑀺 𑀘 𑀅𑀫𑀺𑀲𑁆𑀲𑀓𑀸. 𑀢𑀬𑁄 𑀢𑀬𑁄𑀢𑀺 𑀧𑀼𑀕𑁆𑀕𑀮𑀥𑀫𑁆𑀫𑀯𑀲𑁂𑀦 𑀢𑀬𑁄 𑀢𑀬𑁄 𑀫𑀳𑀸𑀯𑀸𑀭𑀸. 𑀬𑀤𑀺 𑀏𑀯𑀁 𑀓𑀣𑀁 𑀲𑁄𑀴𑀲 𑀧𑀼𑀕𑁆𑀕𑀮𑀯𑀸𑀭𑀸𑀢𑀺 𑀆𑀳 ‘‘𑀢𑀢𑁆𑀣 𑀢𑀢𑁆𑀣 𑀧𑀦 𑀯𑀼𑀢𑁆𑀢𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸’’𑀢𑀺. 𑀢𑀢𑁆𑀣 𑀢𑀢𑁆𑀣 𑀲𑁄𑀴𑀲𑀯𑀺𑀥𑁂 𑀲𑀭𑀸𑀕𑀸𑀤𑀺𑀫𑀺𑀲𑁆𑀲𑀓𑀘𑀺𑀢𑁆𑀢𑁂 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑁂 𑀏𑀯 𑀏𑀓𑀚𑁆𑀛𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀲𑁄𑀴𑀲 𑀧𑀼𑀕𑁆𑀕𑀮𑀯𑀸𑀭𑀸’’𑀢𑀺 𑀯𑀼𑀢𑁆𑀢𑀁. ‘‘𑀥𑀫𑁆𑀫𑀧𑀼𑀕𑁆𑀕𑀮𑀥𑀫𑁆𑀫𑀯𑀸𑀭𑀸’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦 𑀦𑀺𑀭𑀦𑁆𑀢𑀭𑀁 𑀯𑀼𑀢𑁆𑀢𑁂𑀢𑀺 𑀥𑀫𑁆𑀫𑁂 𑀧𑀼𑀕𑁆𑀕𑀮𑀥𑀫𑁆𑀫𑁂 𑀘 𑀅𑀦𑀸𑀫𑀲𑀺𑀢𑁆𑀯𑀸 𑀲𑁄𑀴𑀲𑀲𑀼𑀧𑀺 𑀞𑀸𑀦𑁂𑀲𑀼 𑀦𑀺𑀭𑀦𑁆𑀢𑀭𑀁 𑀧𑀼𑀕𑁆𑀕𑀮𑁂 𑀏𑀯 𑀯𑀼𑀢𑁆𑀢𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀲𑁄𑀴𑀲 𑀧𑀼𑀕𑁆𑀕𑀮𑀯𑀸𑀭𑀸 𑀦 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑀁𑀲𑀕𑁆𑀕𑀯𑀲𑁂𑀦𑀸𑀢𑀺 𑀲𑀁𑀲𑀚𑁆𑀚𑀦𑀯𑀲𑁂𑀦 𑀤𑁂𑀲𑀦𑀸𑀬 𑀯𑀺𑀫𑀺𑀲𑁆𑀲𑀦𑀯𑀲𑁂𑀦. 𑀅𑀜𑁆𑀜𑀣𑀸 𑀳𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑀸 𑀘 𑀓𑀣𑀁 𑀲𑀁𑀲𑀚𑁆𑀚𑀻𑀬𑀦𑁆𑀢𑀺. 𑀲𑁂𑀲𑀸𑀦𑀫𑁆𑀧𑀺 𑀯𑀸𑀭𑀸𑀦𑀦𑁆𑀢𑀺 𑀉𑀧𑁆𑀧𑀸𑀤𑀼𑀧𑁆𑀧𑀦𑁆𑀦𑀯𑀸𑀭𑀸𑀤𑀻𑀦𑀁. 𑀢𑀁𑀢𑀁𑀦𑀸𑀫𑀢𑀸𑀢𑀺 𑀬𑀣𑀸 ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀉𑀧𑁆𑀧𑀸𑀤𑀉𑀧𑁆𑀧𑀦𑁆𑀦𑀪𑀸𑀯𑀸𑀫𑀲𑀦𑀢𑁄 𑀉𑀧𑁆𑀧𑀸𑀤𑀉𑀧𑁆𑀧𑀦𑁆𑀦𑀯𑀸𑀭𑁄𑀢𑀺 𑀦𑀸𑀫𑀁 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀲𑁂𑀲𑀯𑀸𑀭𑀸𑀦𑀫𑁆𑀧𑀻𑀢𑀺 𑀆𑀳 ‘‘𑀢𑀁𑀢𑀁𑀦𑀸𑀫𑀢𑀸 𑀧𑀸𑀴𑀺𑀅𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸

𑁬𑁩. 𑀢𑀣𑀸𑀭𑀽𑀧𑀲𑁆𑀲𑁂𑀯𑀸𑀢𑀺 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄 𑀏𑀯. 𑀢𑀜𑁆𑀘 𑀘𑀺𑀢𑁆𑀢𑀦𑁆𑀢𑀺 𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀓𑁆𑀔𑀡𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁. ‘‘𑀏𑀯𑀁𑀧𑀓𑀸𑀭’’𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀺𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁 𑀦𑀺𑀭𑀼𑀚𑁆𑀛𑀫𑀸𑀦𑀸𑀓𑀸𑀭𑀲𑁆𑀲 ‘‘𑀏𑀯𑀁𑀧𑀓𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸.

𑁬𑁫-𑁮𑁨. 𑀤𑁆𑀯𑀬𑀫𑁂𑀢𑀦𑁆𑀢𑀺 𑀬𑀁 ‘‘𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀸𑀧𑀕𑀫𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀣 𑀦𑀸𑀫, 𑀢𑀤𑁂𑀯 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀸𑀤𑀁 𑀧𑀢𑁆𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀅𑀦𑀢𑀻𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀏𑀢𑀁 𑀉𑀪𑀬𑀫𑁆𑀧𑀺. 𑀏𑀯𑀁 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀧𑀓𑀸𑀭𑀦𑁆𑀢𑀭𑁂𑀦 𑀧𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀧𑀞𑀫𑀧𑀓𑁆𑀔𑀁 𑀯𑀺𑀪𑀸𑀯𑁂𑀢𑀺. 𑀯𑀺𑀪𑀚𑀺𑀢𑀩𑁆𑀩𑀁 𑀲𑀺𑀬𑀸𑀢𑀺 ‘‘𑀪𑀗𑁆𑀕𑀓𑁆𑀔𑀡𑁂 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀦𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀸𑀤𑀓𑁆𑀔𑀡𑁂 𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀣 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺 𑀘𑀸’’𑀢𑀺 𑀯𑀺𑀪𑀚𑀺𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀺𑀪𑀢𑁆𑀢𑀁. ‘‘𑀆𑀫𑀦𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀉𑀪𑀬𑀲𑁆𑀲𑀧𑀺 𑀮𑀩𑁆𑀪𑀫𑀸𑀦𑀢𑁆𑀢𑀸, 𑀦 𑀘 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀬𑁂𑀦 𑀧𑀓𑀸𑀭𑁂𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂’’𑀢𑀺𑀆𑀤𑀺𑀫𑀸𑀳. 𑀧𑀼𑀕𑁆𑀕𑀮𑁄 𑀯𑀼𑀢𑁆𑀢𑁄, 𑀧𑀼𑀕𑁆𑀕𑀮𑀯𑀸𑀭𑁄 𑀳𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑀸𑀢𑀺 𑀧𑀼𑀕𑁆𑀕𑀮𑀲𑁆𑀲. 𑀦 𑀘 𑀓𑀺𑀜𑁆𑀘𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀺𑀪𑀸𑀯𑀢𑁄. 𑀢𑀁 𑀧𑀦 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀬𑀁 𑀘𑀺𑀢𑁆𑀢𑀲𑀫𑀗𑁆𑀕𑀻 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀺 𑀅𑀦𑁂𑀓𑀘𑀺𑀢𑁆𑀢𑀯𑀲𑁂𑀦𑀸𑀬𑀁 𑀬𑀫𑀓𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀘𑀺𑀢𑁆𑀢𑀦𑁆𑀢𑀺 𑀳𑀺…𑀧𑁂… 𑀢𑀺𑀝𑁆𑀞𑀢𑀻’’𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀯𑀲𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀜𑁆𑀜𑀣𑀸 ‘‘𑀦𑁄 𑀘 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀧𑀝𑀺𑀲𑁂𑀥𑁄 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀤𑀺𑀲𑀦𑁆𑀢𑀺 𑀢𑀣𑀸𑀭𑀽𑀧𑀁, 𑀬𑀤𑀯𑀢𑁆𑀣𑁄 𑀉𑀧𑁆𑀧𑀦𑁆𑀦𑀉𑀧𑁆𑀧𑀚𑁆𑀚𑀫𑀸𑀦𑀢𑀸𑀤𑀺𑀧𑀭𑀺𑀬𑀸𑀬𑁂𑀳𑀺 𑀯𑀢𑁆𑀢𑀩𑁆𑀩𑁄 𑀳𑁄𑀢𑀺, 𑀢𑀤𑀯𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑁮𑁩-𑁧𑁧𑁩. 𑀇𑀫𑀲𑁆𑀲 𑀧𑀼𑀕𑁆𑀕𑀮𑀯𑀸𑀭𑀢𑁆𑀢𑀸𑀢𑀺 ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 𑀇𑀫𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑀲𑁆𑀲 𑀧𑀼𑀕𑁆𑀕𑀮𑀯𑀸𑀭𑀢𑁆𑀢𑀸. 𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑁄𑀢𑀺 ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁…𑀧𑁂… 𑀢𑀲𑁆𑀲 𑀘𑀺𑀢𑁆𑀢’’𑀦𑁆𑀢𑀺 𑀘𑀺𑀢𑁆𑀢𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑁄𑀢𑀺 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀇𑀢𑀭𑀣𑀸 𑀅𑀜𑁆𑀜𑀁 𑀧𑀼𑀘𑁆𑀙𑀺𑀢𑀁 𑀅𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑀺𑀢𑀁 𑀲𑀺𑀬𑀸. 𑀦 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀦 𑀕𑀳𑀺𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀺𑀩𑁆𑀩𑀢𑁆𑀢𑀘𑀺𑀢𑁆𑀢𑀢𑀸𑀪𑀸𑀯𑀢𑁄. 𑀢𑁂 𑀘 𑀧𑀦 𑀲𑀩𑁆𑀩𑁂 𑀧𑀼𑀕𑁆𑀕𑀮𑀸. 𑀦𑀺𑀭𑀼𑀚𑁆𑀛𑀫𑀸𑀦𑀓𑁆𑀔𑀡𑀸𑀢𑀻𑀢𑀘𑀺𑀢𑁆𑀢𑀸𑀢𑀺 𑀦𑀺𑀭𑀼𑀚𑁆𑀛𑀫𑀸𑀦𑀓𑁆𑀔𑀡𑀸 𑀳𑀼𑀢𑁆𑀯𑀸 𑀅𑀢𑀻𑀢𑀘𑀺𑀢𑁆𑀢𑀸. 𑀢𑀣𑀸 𑀤𑀼𑀢𑀺𑀬𑀢𑀢𑀺𑀬𑀸𑀢𑀺 𑀬𑀣𑀸 𑀧𑀞𑀫𑀧𑀜𑁆𑀳𑁄 𑀅𑀦𑀯𑀲𑁂𑀲𑀧𑀼𑀕𑁆𑀕𑀮𑀯𑀺𑀲𑀬𑀢𑁆𑀢𑀸 𑀧𑀝𑀺𑀯𑀘𑀦𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑀲𑀺𑀬𑀸, 𑀢𑀣𑀸 𑀢𑀢𑁄 𑀏𑀯 𑀤𑀼𑀢𑀺𑀬𑀢𑀢𑀺𑀬𑀧𑀜𑁆𑀳𑀸 ‘‘𑀆𑀫𑀦𑁆𑀢𑀸’’𑀇𑀘𑁆𑀘𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑁄 𑀧𑀦 𑀧𑀜𑁆𑀳𑁄 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀣𑀸 𑀅𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀢𑁆𑀢𑀯𑀲𑁂𑀦 𑀧𑀼𑀕𑁆𑀕𑀮𑀯𑀯𑀢𑁆𑀣𑀸𑀦𑀢𑁄’’𑀢𑀺𑀆𑀤𑀺𑀫𑀸𑀳. ‘‘𑀪𑀗𑁆𑀕𑀓𑁆𑀔𑀡𑁂 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀯𑀢𑁆𑀢𑀫𑀸𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀉𑀧𑁆𑀧𑀸𑀤𑀓𑁆𑀔𑀡𑀸𑀢𑀻𑀢𑀘𑀺𑀢𑁆𑀢𑁄, ‘‘𑀅𑀢𑀻𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀓𑁆𑀔𑀡𑀜𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀪𑀗𑁆𑀕𑀓𑁆𑀔𑀡𑀜𑁆𑀘 𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀅𑀢𑀻𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀉𑀧𑁆𑀧𑀸𑀤𑀓𑁆𑀔𑀡𑀸𑀢𑀻𑀢𑀘𑀺𑀢𑁆𑀢𑁄 𑀯𑀼𑀢𑁆𑀢𑁄.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀧𑀼𑀭𑀺𑀫𑀲𑁆𑀲𑀸𑀢𑀺 𑀧𑀞𑀫𑀁 𑀯𑀼𑀢𑁆𑀢𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀦𑀧𑀤𑀲𑀗𑁆𑀕𑀳𑀺𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀪𑀗𑁆𑀕𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀁. ‘‘𑀦𑁄 𑀘 𑀪𑀗𑁆𑀕𑀓𑁆𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀘𑁆𑀙𑀺𑀫𑀲𑁆𑀲 𑀯𑀻𑀢𑀺𑀓𑁆𑀓𑀦𑁆𑀢𑀁 𑀘𑀺𑀢𑁆𑀢𑀁 𑀪𑀗𑁆𑀕𑀓𑁆𑀔𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀪𑀗𑁆𑀕𑀓𑁆𑀔𑀡𑀜𑁆𑀘 𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀯𑀫𑀸𑀤𑀺𑀓𑁄 𑀧𑀼𑀕𑁆𑀕𑀮𑀯𑀺𑀪𑀸𑀕𑁄𑀢𑀺 𑀤𑀼𑀢𑀺𑀬𑀧𑀜𑁆𑀳𑀸𑀤𑀻𑀲𑀼 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀢𑀁𑀢𑀁𑀔𑀡𑀯𑀻𑀢𑀺𑀓𑁆𑀓𑀫𑀸𑀯𑀻𑀢𑀺𑀓𑁆𑀓𑀫𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑀲𑁆𑀲 𑀪𑀗𑁆𑀕𑀓𑁆𑀔𑀡𑀲𑁆𑀲 𑀘 𑀬𑀣𑀸𑀭𑀳𑀁 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀲𑁆𑀲 𑀘 𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑁄 𑀳𑁄𑀢𑀺 𑀧𑀼𑀕𑁆𑀕𑀮𑀯𑀺𑀪𑀸𑀕𑁄𑀢𑀺 𑀬𑁄𑀚𑀦𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀯𑀸𑀭𑁂. 𑀧𑀼𑀕𑁆𑀕𑀮𑀯𑀺𑀲𑀺𑀝𑁆𑀞𑀁 𑀘𑀺𑀢𑁆𑀢𑀁 𑀧𑀼𑀘𑁆𑀙𑀺𑀢𑀁 ‘‘𑀬𑀲𑁆𑀲 𑀘𑀺𑀢𑁆𑀢𑀁 𑀢𑀲𑁆𑀲 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺𑀧𑀺 𑀧𑀼𑀕𑁆𑀕𑀮𑀧𑁆𑀧𑀥𑀸𑀦𑀸 𑀧𑀼𑀘𑁆𑀙𑀸 𑀧𑀼𑀕𑁆𑀕𑀮𑀯𑀸𑀭𑀢𑁆𑀢𑀸. 𑀅𑀣𑀸𑀧𑀺 𑀘𑀺𑀢𑁆𑀢𑀧𑁆𑀧𑀥𑀸𑀦𑀸 𑀧𑀼𑀕𑁆𑀕𑀮𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀉𑀪𑀬𑀣𑀸𑀧𑀺 𑀤𑀼𑀢𑀺𑀬𑀧𑀼𑀘𑁆𑀙𑀸𑀬 ‘‘𑀆𑀫𑀦𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀅𑀦𑀯𑀲𑁂𑀲𑀧𑀼𑀕𑁆𑀕𑀮𑀯𑀺𑀲𑀬𑀢𑁆𑀢𑀸. 𑀢𑀣𑀸 𑀧𑀦 𑀅𑀯𑀢𑁆𑀯𑀸 ‘‘𑀅𑀢𑀻𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀲𑁆𑀫𑀸 𑀦𑀺𑀭𑁄𑀥𑀓𑁆𑀔𑀡…𑀧𑁂… 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 ‘‘𑀦 𑀦𑀺𑀭𑀼𑀚𑁆𑀛𑀫𑀸𑀦’’𑀦𑁆𑀢𑀺 𑀏𑀢𑁆𑀣𑀸𑀧𑀻𑀢𑀺 𑀦𑀺𑀭𑀼𑀚𑁆𑀛𑀫𑀸𑀦𑀁 𑀔𑀡𑀁 𑀦𑀺𑀭𑁄𑀥𑀓𑁆𑀔𑀡𑀁 𑀔𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑀓𑀸𑀮𑀁 𑀓𑀺𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁧𑁪-𑁧𑁧𑁬. 𑀲𑀭𑀸𑀕𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲𑀸𑀢𑀺 𑀲𑀭𑀸𑀕𑀘𑀺𑀢𑁆𑀢𑁂𑀲𑀼 𑀧𑀘𑁆𑀙𑀺𑀫𑀲𑁆𑀲 𑀘𑀺𑀢𑁆𑀢𑀲𑁆𑀲, 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀲𑀼 𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁, 𑀢𑀲𑁆𑀲. 𑀲𑁄 𑀧𑀦 𑀧𑀼𑀕𑁆𑀕𑀮𑁄 𑀅𑀦𑀸𑀕𑀸𑀫𑀻 𑀯𑁂𑀤𑀺𑀢𑀩𑁆𑀩𑁄. 𑀦 𑀦𑀺𑀭𑀼𑀚𑁆𑀛𑀢𑀺 𑀦𑀺𑀭𑁄𑀥𑀸𑀲𑀫𑀗𑁆𑀕𑀺𑀢𑀸𑀬. 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀇𑀤𑀸𑀦𑀺 𑀦𑀺𑀭𑁄𑀥𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀧𑀦 𑀢𑀢𑁄 𑀅𑀜𑁆𑀜𑀁 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀇𑀢𑀭𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀭𑀸𑀕𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑀫𑀗𑁆𑀕𑀺𑀁 𑀯𑀻𑀢𑀭𑀸𑀕𑀘𑀺𑀢𑁆𑀢𑀲𑀫𑀗𑁆𑀕𑀺𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀁 𑀇𑀢𑀭𑀲𑁂𑀓𑁆𑀔𑀸𑀦𑀜𑁆𑀘𑁂𑀯 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘.

𑀦𑀺𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀬𑀫𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀥𑀫𑁆𑀫𑀬𑀫𑀓𑀁